Каноны святому преподобному Никодиму Святогорцу

Пе́снь 1.

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Тро́ице Единосу́щная, о́тче, Сы́не, Ду́ше Святы́й, прему́дрость пода́ждь ми́, да воспою́ све́тло просла́вльшаго словесы́, и уче́нии, и де́лы Тя́, Го́споди, свята́го Никоди́ма.

У́м Небе́сный, мирохрани́тельница Ду́ха, Боже́ственный Никоди́м все́х зове́т на́с ле́тную па́мять его́ соверши́ти. Прии́дем у́бо вси́, сего́ чту́ще.

Умертви́в по́мысл пло́ти твое́й, Никоди́ме, ху́ждшее, о́тче, покори́л еси́ лу́чшему по́двигом любому́дрия Боже́ственнаго и яви́лся еси́ благода́ти сосу́д многоце́нный.

Богоро́дичен: Си́лу, и утвержде́ние, и просвеще́ние стяжа́в Твои́м, Госпоже́, благоволе́нием, Боже́ственный Никоди́м, богодухнове́н и ве́сь богоно́сен, после́дним в ле́тех яви́ся на Афо́не.

И́н. Гла́с 8.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Твои́м сия́нием, Светода́вче Го́споди, у́м мо́й просвети́ и сло́во ми́ да́ждь, Сло́ве, да воспою́ усты́ све́тло пе́снь досто́йную Никоди́му, Боже́ственному и ди́вному Твоему́ служи́телю.

Чи́стое твое́ жи́тельство, преподо́бне, селе́ние све́та яви́ тя́ на Афо́не, и сто́лп всесве́тлый, и свети́льник светле́йший, сия́ющий в ми́ре безсме́ртия уче́нии, о́тче Богоглаго́ливе Никоди́ме.

Зако́н Боже́ственный раскрыва́я, преподо́бне, сло́во богодухнове́нное богоприя́тным язы́ком, разуме́ний мо́ре и бога́тство Боже́ственнаго зна́ния в многообра́зней му́дрости Це́ркви одожди́л еси́, о́тче, я́коже ма́нну Небе́сную.

Богоро́дичен: Струи́ Боже́ственных душепита́тельных, Госпоже́, исто́чниче неистощи́мый, изле́й души́ мое́й во́ду, ска́чущую в живо́т ве́чный, да угаси́ши, Де́во, греха́ у́гли, и преиспо́лнюся невеще́ственнаго сия́ния.

Пе́снь 3.

Ирмо́с: Твоя́ песносло́вцы, Богоро́дице, Живы́й и Незави́стный Исто́чниче, ли́к себе́ совоку́пльшия, духо́вно утверди́, в Боже́ственней Твое́й сла́ве венце́в сла́вы сподо́би.

Испо́лнился еси́ све́та Небе́снаго, очи́стив, Никоди́ме, у́м, и, я́ко свети́ло многосве́тлое, в после́дняя ле́та в Це́ркви возсия́л еси́ во спасе́ние благочести́вых.

Глаго́лов Боже́ственных твои́х благода́ть по все́й земли́ возсия́, я́ко мо́лния небе́сная, нра́вы душе́вныя очища́ющи и к све́ту направля́ющи повеле́ний Созда́вшаго вся́ческая.

Свети́льник Боже́ственнаго разуме́ния, труба́ благохва́льная Бо́га, язы́к богоглаго́ливый, да пое́тся Боже́ственными пе́сньми достодо́лжно дне́сь Богоизбра́нный Никоди́м.

Богоро́дичен: Хра́м светоно́сный и Бо́жий престо́л огнезра́чный яви́лася еси́, Благослове́нная Госпоже́, Того́ пло́тски заче́ншая. Сего́ ра́ди и мене́ озари́ све́тлостию сла́вы Твоея́.

И́н.

Ирмо́с: Утвержде́й в нача́ле Небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

От скве́рны вся́кия стра́сти ду́шу и те́ло очи́стив, ско́рым воздержа́нием, Богому́дре Никоди́ме, безстра́стия возде́лываеши благода́ть и к стяжа́нию сея́ все́х призыва́еши сло́вом твои́м.

Доброде́тельми украше́нный таи́нник богоно́сный жития́, во Христе́ сокры́таго, яви́лся еси́ на́м, Никоди́ме блаже́нне, к Боже́ственным восхожде́нием возводя́ ду́ши на́ша.

У́м тво́й, о́тче, осия́нный Уте́шителя сла́вою, рука́ же твоя́, И́м дви́жимая, изобрази́ на́м Небе́сная уче́ния во святы́х и мно́гих кни́гах, Никоди́ме.

Богоро́дичен: Препросла́вленная Мариа́м, Всецари́це Де́во, Бо́га неизрече́нно ро́ждшая, растле́вшую страстьми́ мою́ ду́шу исцели́ и да́ждь ми́ ско́ро обраще́ние спаси́тельное.

Седа́лен, гла́с 5.

Богодухнове́нная уста́ Боже́ственнаго Ду́ха, согла́сная ли́ра Небе́сных пе́сней, афо́нских мона́хов украше́ние, богоно́сный кни́жник прему́дрости Бо́жия, Никоди́м Богому́дрый ра́достно да восхва́лится, я́ко Христа́ служи́тель и́стинный.

Богоро́дичен: Богоро́дице Де́во, ми́ра по́моще, во вре́мя ну́жды помога́й при́сно притека́ющим те́пле предста́тельству Твоему́ и настоя́щий Тво́й, Чи́стая, уде́л честны́й сохраня́й от вся́каго вре́да, к Твоему́ бо заступле́нию всегда́ притека́ет, Госпоже́.

Пе́снь 4.

Ирмо́с: Седя́й в сла́ве на Престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Зако́на Боже́ственнаго уче́ний и слове́с Ду́ха научи́вся но́щию и дне́м, Никоди́ме, дре́во многопло́дное яви́ся при вода́х Боже́ственныя благода́ти, плодонося́щее ве́дение лу́чшее.

Ти́хий, о́тче, нра́вом, и кро́ток ви́дом, и сла́дкий сло́вом, и увеща́нием Богому́дрый яви́лся еси́ к тебе́ притека́ющим, свя́те, подава́я все́м спаси́тельная уче́ния.

Поража́ют умы́ ве́рных, о́тче преподо́бне, высота́, и глубина́, и длина́, и широта́, Никоди́ме, му́дрости твоея́ благода́тныя сокро́вища, ты́ бо я́ко бе́здна вели́кая ве́дения яви́ся.

Богоро́дичен: Не́бо на земли́ яви́лася еси́, небе́с вы́шшее, Де́во Пресвята́я, на руку́ держа́щая, я́ко Младе́нца, Творца́ не́бу и земли́, ми́лостию к Небе́сному на́с возводя́щаго жи́тельству.

И́н.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра О́тча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Медото́чный, и сладча́йший, и богогла́сный твоего́ язы́ка орга́н, одушевле́нный Бо́гом, Никоди́ме, воспе́л е́сть преподо́бных сла́вныя по́двиги, зву́ки сладча́йшими и пе́сньми стро́йными благочести́вых сердца́ возвеселя́я.

Ма́нну живота́, ме́д из ка́мене богото́чный, ро́су Боже́ственную, от Свята́го Ду́ха сходя́щую на зе́млю, поражда́ет сло́во твое́, Небе́сный таи́нниче Никоди́ме, окормля́я, и возвеселя́я, и ороша́я сердца́ ве́рно приника́ющих к кни́гам твои́м.

Сла́дость Боже́ственныя благода́ти, преподо́бне, непоро́чным се́рдцем излия́нная усты́ твои́ми честны́ми, в кни́гах святы́х сохрани́ся, Никоди́ме, и все́х услаща́ет и ра́дует, ве́рно поуча́ющихся от кни́г твои́х.

Богоро́дичен: О на́с при́сно моли́, Богоро́дице, Еди́ная Присноде́во, Проше́дшаго от чи́стых крове́й Твои́х, да ми́лостив бу́дет лю́дем, и́хже сотвори́, и пода́ст все́м на́м грехо́в разреше́ние и све́та ве́чнаго причаще́ние.

Пе́снь 5.

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Уче́ния Боже́ственная источи́л еси́, Никоди́ме, я́ко река́ Бо́га Жива́го, и, я́ко пото́к ра́достный, при́сно ра́дуеши тече́нии слове́с твои́х, му́дре, Це́рковь всю́ Христо́ву Правосла́вную.

Ти́хо пожи́л еси́, Никоди́ме, научи́вся трезве́нию ума́, и воздержа́нию, и чте́нию богодухнове́нных Писа́ний, и возне́слся еси́ мы́сленно в Го́рняя облиста́ния Ду́ха.

Му́ченик воспе́л еси́ труды́ и по́двиги и преподо́бных до́блести, и́мже после́довал еси́ а́нгельским на земли́ житие́м и с ни́ми, преподо́бне, просла́вился еси́.

Богоро́дичен: Пресве́тлое селе́ние Бо́га Вседержи́теля, Благода́тная Богоро́дице, омраче́нную мою́ ду́шу просвети́ и сию́ сосу́д чи́стый Возсия́вшаго из Тебе́, Богома́ти, покажи́.

И́н.

Ирмо́с: Вску́ю мя́ отри́нул еси́ от лица́ Твоего́, Све́те Незаходи́мый, и покры́ла мя́ е́сть чужда́я тьма́, окая́ннаго, но обрати́ мя́ и к све́ту за́поведей Твои́х пути́ моя́ напра́ви, молю́ся.

Доброде́телей преуспе́яние, и духо́вных подвиго́в учи́лище, и писа́ния Боже́ственная велеле́пно составля́еши во святе́й кни́зе, ю́же по до́лгу от де́л си́х наре́кл еси́.

Земледе́ланием словесе́ страсте́й отсека́еши ко́рени, Никоди́ме, и се́мя за́поведей Бо́жиих спаси́тельное в душе́вныя ни́вы му́дро полага́еши, о́тче, я́ко служи́тель Бо́жий Боже́ственнейший.

Пути́ неви́димыя бра́ни ко власте́м тьмы́, Никоди́ме, все́м раскрыва́еши, я́ко в се́й победи́вый, и на́с гото́виши к по́двигу проти́ву страсте́й же и де́монов де́йственными сове́ты, Богодухнове́нне.

Богоро́дичен: Матероде́вственная Дщи́, Я́же Бо́га Сло́ва неизрече́нно заче́ншая, сие́ Твое́ ста́до, сла́вную Го́ру Афо́нскую, сохраня́й, покрыва́й от вся́кия ну́жды и па́губы, я́коже обеща́лася еси́, Твое́ю добро́тою.

Пе́снь 6.

Ирмо́с: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Новоявле́нное яви́ся со́лнце Це́ркви Христо́вей, Никоди́ме, просвеща́я всегда́ правосла́вных собо́р луча́ми слове́сных твои́х наставле́ний.

Ве́лий яви́лся еси́ учи́тель, я́ко сотвори́вый Боже́ственную во́лю и научи́вый, Никоди́ме, исполня́ти ю́. Сего́ ра́ди вели́кия че́сти сподо́бился еси́ от Го́спода, тя́ просла́вльшаго.

В доброде́телех богодухнове́нный, сло́вом же и му́дростию богому́дрый, на Афо́не яви́лся еси́ тайново́дство богоразу́мное помышле́ний мона́хов.

Богоро́дичен: Ра́дуйся, свети́льниче многосве́тлый Све́та Богонача́льнаго, Присноде́во, озаря́ющи та́инственными сия́нии благоче́стно, ра́дуйся, вопию́щих Ти́.

И́н.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

С терпе́нием твое́ житие́ соверши́в, Никоди́ме, тишино́ю ума́ и Боже́ственным очище́нием Писа́ний жили́ще и уче́ния оте́ческаго уста́ показа́лся еси́.

Си́лою любве́ к Бо́гу, о́тче, укрепля́емь, не́мощь плотску́ю расточи́л еси́, Никоди́ме преподо́бне, спасе́ния бли́жняго ра́ди напису́я поуче́ния.

Оби́льно излия́нным слове́сным тече́нием у́ст твои́х, Никоди́ме, ороша́ются при́сно на́ша помышле́ния к плодоноше́нию доброде́тельных, о́тче, дея́ний.

Богоро́дичен: А́нгелов ра́дование и люде́й по́моще, Благослове́нная Чи́стая, Еди́на Присноде́во, всегда́ в ну́ждах на́м помога́й и во вся́ких обстоя́ниих.

Конда́к, гла́с 8.

Я́ко таи́нника изря́днейшаго доброде́тельнаго жития́ и благоче́стия, богоно́снаго учи́теля Правосла́вия, пра́зднует тя́ Це́рковь, с Небе́с бо дарова́ния прие́мый, озаря́еши Боже́ственными твои́ми писа́нии вопию́щих ти́: ра́дуйся, о́тче Никоди́ме.

И́кос:

Нра́вом А́нгел и ве́лий в позна́нии, Никоди́ме, на Афо́не показа́лся еси́, а́нгельское бо име́я житие́, ангелоподо́бным гла́сом уясни́л еси́ оте́ческая писа́ния, и́миже просвеща́еши вопию́щих: ра́дуйся, На́ксии благоукраше́ние; ра́дуйся, Афо́на озаре́ние. Ра́дуйся, оте́ческих догма́тов раскры́тие; ра́дуйся, святы́х рече́ний разреше́ние. Ра́дуйся, высото́ ра́зума и му́дрости реко́; ра́дуйся, глубино́ Боже́ственнаго ве́дения и любве́ сокро́вище. Ра́дуйся, я́ко показа́лся еси́ кни́жник Богоно́сный; ра́дуйся, уясни́телю Богоглаго́ливый. Ра́дуйся, свети́льниче нра́вственныя чистоты́; ра́дуйся, огню́ Го́рния све́тлости. Ра́дуйся, и́мже ве́рнии утвержда́ются; ра́дуйся, его́же врази́ трепе́щут. Ра́дуйся, о́тче Никоди́ме.

Пе́снь 7.

Ирмо́с: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

К восхожде́нию степе́ней жития́ све́тлаго, преподо́бне Никоди́ме, ле́ствицею слове́с, тобо́ю водруже́нною, возво́диши ве́рою притека́ющих к кни́зе твое́й, ю́же нарица́еши Ле́ствицею но́вою.

Я́ко благово́нный лу́г Боже́ственнаго Ду́ха, о́тче Никоди́ме, вертогра́д Живота́ благода́тнаго ра́лом язы́ка твоего́ богорече́ннаго богодухнове́нную кни́гу твою́ на́м показа́л еси́, ю́же нарица́еши Вертогра́д благода́ти.

Язы́к Боже́ственный обогати́в, Никоди́ме, и у́м Богоприя́тный, наста́вник свяще́нный словесе́ ве́ры в после́дняя ле́та яви́лся еси́, преподо́бне, и призыва́еши все́х к стяжа́нию лу́чшаго.

Богоро́дичен: Богодухнове́нне восхвали́ свяще́нный Никоди́м вели́чия Твоя́, вои́стинну ди́вная, Де́во Препе́тая, его́же просла́вила еси́ благоволе́ния Твоего́ та́инственными явле́нии, я́ко служи́теля Твоего́ Боже́ственнаго.

И́н.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Глаго́лов твои́х Боже́ственных держа́ву, о́тче, и све́тлость, и Го́рнюю благода́ть, и оби́льный вои́стинну исто́чник николи́же можа́ху терпе́ти, Никоди́ме, со́нми му́дрствующих, сего́ ра́ди побежда́хуся тобо́ю.

От вся́кия скве́рны очи́стил еси́, о́тче Никоди́ме, и ду́шу, и те́ло, и чу́вства, и помышле́ния. Сего́ ра́ди и на́с возво́диши к чистоте́ и соблюде́нию ума́ му́дрым уче́нием твои́м.

Ума́ чистото́ю и кре́постию помышле́ния, о́тче, святы́х оте́ц богоглаго́ливая словеса́ уясни́л еси́ и сокро́вище душеполе́зное оста́вил еси́ Це́ркви Христо́вей, Боже́ственныя кни́ги твоя́.

Богоро́дичен: Тишину́ Небе́сную и умиле́нный нра́в да́ждь ми́, Богоро́дице Де́во, и све́т душе́вным мои́м стопа́м, я́ко да стезя́ми, до́бре веду́щими мя́ к Го́рнему житию́, ше́ствую, Де́во Чи́стая.

Пе́снь 8

Ирмо́с: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Очище́ние от страсте́й греха́ и исцеле́ние стра́ждущим душа́м, свя́те, печа́ли искупле́ние и жития́ свята́го лучи́ подае́т при́сно Боже́ственное сло́во твое́, сия́ющее све́том Небе́сным благогове́йно к нему́ притека́ющим.

Незло́бив и кро́ток яви́лся еси́ и, вся́кою пра́вдою украша́емь, преподо́бне Никоди́ме, и пра́ведности явля́я све́тлость в лице́ твое́м, ми́лостив бы́л еси́ все́м, я́ко преиспо́лнен сия́ния Боже́ственнаго.

Усты́ всему́дрыми твои́ми уясни́в догма́тов Правосла́вных акриви́ю, преподо́бне Никоди́ме, от за́пада прише́дших к тебе́ удиви́л еси́ и си́х показа́л еси́ вои́стинну я́ко ры́бы безгла́сныя пото́ком, о́тче, Боже́ственных твои́х рече́ний.

Богоро́дичен: Исцели́ ду́шу мою́, боля́щую и страстьми́ грехо́вными и по́мыслы нечести́выми и скве́рными опаля́емую, Всечи́стая, и покая́ния све́том озари́ се́рдце мое́, к Тебе́ бо прибега́ю, окая́нный, да не пре́зриши моли́твы моея́, Де́во.

И́н.

Ирмо́с: Седмери́цею пе́щь халде́йский мучи́тель Богочести́вым неи́стовно разжже́, си́лою же лу́чшею спасе́ны, сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Сла́вно украси́лся еси́ на Афо́не, Никоди́ме, сло́вом и му́дростию и жития́ све́тлостию о́браз яви́лся еси́ и наста́вник спаси́тельный все́м и́ноком в доброде́телей воздая́ние, вопия́ непреста́нно: свяще́нницы, благослови́те, лю́дие, превозноси́те Христа́ во ве́ки.

Глаго́лом Бо́жиим препоя́савыйся, я́ко мече́м Небе́сным, и облеки́йся, о́тче, я́коже броне́ю, благода́тию Ду́ха, еретики́ и ду́хи мы́сленныя обрати́л еси́ вспя́ть, в весе́лии вопия́: свяще́нницы, по́йте, лю́дие, превозноси́те Христа́ во ве́ки.

Святы́ни сокро́вище зри́тся глава́ твоя́, Боже́ственное благоуха́ние источа́ющи, сосу́ди бо яви́шася арома́тов уста́ твоя́, преподо́бне, я́коже рече́ Прему́дрость, дыха́ние безсме́ртия и питие́ весе́лия, е́же от безстра́стия, на́м при́сно подава́ющии

Богоро́дичен: Пло́тски заче́ншая безпло́тнаго Го́спода, су́щаго в не́дрех о́тчих, Сы́на, Собезнача́льна Отцу́ же и Ду́ху, без истле́ния обновля́юща ми́р, плотско́ю зло́бою растле́нную ду́шу мою́ обнови́, Де́во, и́стинным покая́нием.

Пе́снь 9.

Ирмо́с: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Таи́нник тве́рдый Ду́ха бы́л еси́ ума́ све́тлостию, преподо́бне Никоди́ме, и отце́в дре́вних, свя́те, свяще́нными труды́ твои́ми све́тлый цве́т подава́я, от слове́с те́х ве́рным благово́нное разуме́ние.

Все́ житие́ твое́, я́ко фимиа́м, от ю́ности, и я́ко же́ртву непоро́чную, Жизнода́вцу Сло́ву прине́сл еси́, Того́ стопа́м после́довав, преподо́бне. Сего́ ра́ди венча́ свяще́нно тя́ Христо́с венце́м прему́дрости.

Пе́сньми свяще́нными, Никоди́ме всему́дре, пра́зднуем святу́ю па́мять твою́, освяща́еми твое́ю благода́тию. Но, я́ко да́р благоприя́тный, приими́, о́тче, хвале́ние все́х на́с, те́пле целу́ющих тя́, я́ко отца́ на́шего и учи́теля.

Богоро́дичен: Всевы́шняго Бо́га неизрече́нно заче́ншая, Еди́на Преблагослове́нная, бла́гостию от а́да на́с возве́дшаго, па́дшаго мя́ в глубину́ страсте́й возведи́ на высоту́ жития́ чи́стаго, Богоро́дице, по́моще на́ша.

И́н.

Ирмо́с: Ужасе́ся о се́м Не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее Небе́с. Те́м Тя́, Богоро́дицу, А́нгелов и челове́к чинонача́лия велича́ют.

Ви́дети сподо́бился еси́, разреши́вся пло́ти твоея́, Никоди́ме преподо́бне, па́че ума́ Благонача́лия Трисия́ннаго све́т и благода́ть, и́хже и насле́дник, и прича́стник бы́л еси́, Богоглаго́ливе, я́ко пожи́вый житие́м во все́м богодухнове́нным.

Арома́т источа́ют словеса́ твоя́ честна́я, я́коже цве́ти весны́ благово́ннии, дыха́ние живота́ бо и благоуха́ние от Бо́га все́м показа́л еси́ ты́, уче́ния, о́тче, ни́во, Никоди́ме Богому́дре, свети́ло Це́ркве, правосла́вных украше́ние.

Небе́сную сла́дость восприя́в от Бо́га, Богоно́се Никоди́ме, и живота́ необори́маго услади́вся, любо́вию тя́ пра́зднующих сохраня́й и покрыва́й твои́ми моли́твами и мене́, усе́рдно тя́ воспева́юща, о́тче, просвеще́нием твои́м озари́.

Богоро́дичен: Пресве́тлый свети́льниче оте́ческаго, Чи́стая, озаре́ния, престо́ле Бо́га, его́же обстоя́т со стра́хом ве́лиим си́лы Небе́сныя, Еди́на Присноде́во Мари́е, озари́ у́м мо́й све́том повеле́ний из утро́бы Твоея́ Возсия́вшаго.

Свети́лен:

Любому́дрия Боже́ственнаго любо́вию пита́емь, му́дрости Го́рния, о́тче, наслади́лся еси́ бога́тством, Никоди́ме Богому́дре, с богосло́вия орга́ном и пра́ведными пожи́в, с ни́миже не преста́й моля́ся о на́с, Богоно́се.

Богоро́дичен: Бо́га Пресу́щественнаго, Де́во, воплоти́вшая, низложи́ла еси́ Твои́м Рождество́м осужде́ние Е́вы и благослове́ния исто́чник источи́ла еси́ Тя́ сла́вящим и благоче́стно пропове́дующим Тя́ Всечи́стую Богоро́дицу и Присноде́ву.