Каноны святителю Савве I Сербскому (на перенесение мощей)

Пе́снь 1.

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Просвети́ мою́ ду́шу и се́рдце, молю́ Тя́, Светода́вче и тва́ри Созда́телю, да́р пода́в мне́ пе́сньми воспе́ти Твоего́ уго́дника, честна́го святи́теля, и́мже оте́чество его́ от ско́рби изба́ви.

К ширине́, блаже́нне, твои́х похва́л упра́ви ума́ моего́ тесноту́ и све́т посли́ се́рдцу моему́, пою́щу светоно́сную и сла́вную па́мять твою́, святи́телю прехва́льне.

Ра́достно повину́яся Бо́жиим повеле́нием, мо́рю соше́ственник бы́сть, я́ко со́лнце к за́паду, твои́ми мощми́ прише́л еси́, просвеща́я оте́чество свое́, Са́вво блаже́нне.

Богоро́дичен: Неусыпа́ющую, Чи́стая, иму́щи моли́тву, успи́ на́ша стра́сти душе́вныя свяще́нными хода́тайствы Твои́ми, боже́ственную и спаси́тельную даю́щи бо́дрость к Бо́жиих хоте́ний исполне́нию.

И́н, гла́с 6.

Ирмо́с: Чу́вственный фарао́н потопле́н бы́сть со всево́инством, Изра́иль же, проше́д посреде́ мо́ря, вопия́ше: Го́сподеви Бо́гу на́шему пои́м, я́ко просла́вися.

Земля́ лику́ет и не́бо с челове́ки ра́дуется боголе́пно в тво́й, му́дре, святы́й пра́здник, в о́ньже свяще́нное твое́ те́ло от гра́да Ты́рнова к твоему́ ста́ду до́йде, сла́вне святи́телю, Ду́ху честно́е жили́ще.

Распя́в пло́ть свою́ стра́хом Влады́чним, умертви́ся ми́рови, прему́дре святи́телю Са́вво, и ны́не пре́йде ве́село к животу́ ве́чному, преблаже́нне.

Ме́ртв ми́рови бы́сть, Са́вво, боже́ственным вселе́нием, и по святе́м преставле́нии и по погребе́нии твое́м в оте́чество твое́ пренесе́н бы́сть све́тло, его́же облагоуха́еши, чу́дне.

Богоро́дичен: И́же Сы́й со Отце́м Соприсносу́щный Сы́н, напосле́док восхоте́в, всели́ся в ложесна́ Твоя́ на на́ше, Богоро́дице, ве́рных отрожде́ние: те́мже воспева́ем Тя́.

Пе́снь 3.

Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Сла́вне Са́вво, Бо́жия уста́ бы́в, из у́ст во́лка неприя́зненна лю́ди оте́чества своего́ изба́ви и преведи́ на ра́дость и весе́лие, пою́щия пе́снь Све́ту.

Загради́ я́звы стру́п на́ших, за на́с, твои́х люде́й па́ствы, моли́ся и напра́ви ны́ ко Ще́дрому Го́споду, святи́телю сла́вне, заступле́ние творя́, да не поги́бнем, я́ко неразу́мни.

От вся́каго зла́ спаси́ оте́чество свое́ и правосла́вныя христиа́ны, и спобо́рствуй и́м, я́ко вели́кий архистрати́г Иису́су Нави́ну, потщи́ся и помози́, зело́ призыва́ем тя́, свя́те, да не пости́гнет ны́ сме́рть и лю́тость.

Во Еги́пте дре́вле на руку́ Деви́чу носи́мь, бесо́вская тре́бища потреби́в, в Се́рбию па́ки Са́вву посла́л еси́ вразуми́ти Твое́ вочелове́чение и Бо́жию, Христе́, Твою́ та́йну.

Богоро́дичен: Тя́, Предста́тельницу, Пречи́стая Де́во, стяжа́хом, претвори́ на́шу печа́ль на ра́дость и ско́рби изба́ви, ражда́ющия сме́рть.

И́н.

Ирмо́с: На тве́рдем ве́ры Твоея́ ка́мени помышле́ние утверди́в души́ моея́, утверди́, Го́споди, Тя́ бо и́мам, Бла́же, прибе́жище и утвержде́ние.

Лю́дие оте́чества твоего́, ви́девше тя́, преблаже́нне, приноси́ма, срето́ша со святи́тели, и́хже укра́си десни́ца твоя́, и́же и просте́ртыми рука́ми приима́ху твое́ свято́е те́ло, я́ко вели́каго граждани́на и засту́пника те́плаго.

Святи́телю блаже́нне Христо́в Са́вво, иногда́ во Иерусали́м и в Сина́й ше́ствовав, а ны́не во оте́чество свое́ прише́л еси́, чудеса́ творя́ ди́вная на спасе́ние ми́ру всему́.

Бы́л еси́ жили́ще чи́сто и уче́нием испыта́л еси́ глубину́, святи́телю, зломы́слящих потопля́я умы́, ве́рных же напая́я сердца́, те́мже твое́ честно́е пра́зднуем пренесе́ние.

Богоро́дичен: Разреше́ние на́м грехо́в да́ти, Чи́стая, Изба́вителя умоли́, помраче́ние все́ от ду́ш на́ших при́сно Твои́ми моли́твами разгоня́ющи.

Седа́лен, гла́с 4:

Удиви́ся, святи́тельство па́че есте́ственнаго прие́мля, возше́д бо на высоту́, прия́л еси́ да́р дава́ти исцеле́ния притека́ющим тебе́ с ве́рою, сего́ ра́ди вопие́м ти́, преподо́бне Са́вво: непреста́нно моли́ о творя́щих па́мять твою́.

Пе́снь 4.

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Всю́ зло́бу победи́в зми́еву, в незло́бии души́ своея́ пожи́в, Са́вво богому́дре, из зло́бы мя́ исто́ргни и страсте́й смертоно́сных и благи́ми о́бразы украси́, я́ко да восхвалю́ до́бре подвиза́вшагося.

От рожде́ния тя́, Са́вво, роди́тель, я́ко Саму́ила свяще́ннаго, Бо́гу принесе́ и преда́, от млады́х ногте́й воспита́тися в дому́ свяще́ннем, служа́ Го́споду Вседержи́телю, просвеща́ющу доброде́тельми твою́ ду́шу.

Твое́ пречи́стое те́ло, во гро́бе лежа́, не истле́ отню́д, но це́ло обре́теся, преблаже́нне святи́телю, его́же со тща́нием прине́сше, ра́довахуся любе́зная твоя́ ча́да, тя́ богому́дро ублажа́юще, свя́те Са́вво святи́телю.

Богоро́дичен: Во́инства а́нгельская ужаса́ются, Пречи́стая, воспева́юще вели́чество Боже́ственнаго рождества́ Твоего́, с ни́ми же моли́, Де́во, все́м спасти́ся, ве́рою чи́стою Тебе́ блажа́щим.

И́н.

Ирмо́с: Услы́шах слу́х Тво́й и убоя́хся, разуме́х дела́ Твоя́ и ужасо́хся: сла́ва си́ле Твое́й, Го́споди.

Твои́ ученицы́, похва́льныя ти́ венцы́ прино́сим, свя́те Са́вво, приими́ и заступи́ душе́вныя на́ша не́мощи, изле́й на ны́ ми́лостивное твое́, о́тче, изволе́ние и твои́ми моли́твами от напа́сти спаси́.

На небесе́ Бо́гу и Влады́це все́х предстоя́, богому́дре, на земли́ в боже́ственней Того́ Це́ркви му́дро всели́ся, прему́дре святи́телю Са́вво, Ему́же помоли́ся от душе́вных боле́зней и скорбе́й изба́витися пою́щим тя́.

Пропове́дник неизрече́ннаго, да возвели́чится ны́не святи́тель, се́ бо по вре́менней сме́рти до́бре Бо́жиим манове́нием па́ки прихо́дит во свое́ оте́чество, того́ свяще́нно пе́сньми боже́ственными почти́м.

Богоро́дичен: Безневе́стная Влады́чице, Благослове́нная Богороди́тельнице, пою́щия Тя́ спаса́й от вся́каго вре́да, еди́на челове́ков Помо́щнице.

Пе́снь 5.

Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Кра́снеи но́зе твои́, преблаже́нне, по стези́ ше́ствовавши сведе́ний боже́ственных, по те́м до́бро ступа́ющи, на простра́нство ве́лие небе́снаго Ца́рствия доше́дша, Са́вво пресла́вный.

Укрепи́ тя́, на пути́ Бо́жии ходя́ща, а́нгел глаго́лати пре́жде бу́дущая я́сно, Са́вво пребога́те, ра́вна а́нгелом су́ща и вне́ пло́ти ду́хом.

Тя́, преблаже́нне о́тче, приноси́ма, Се́рбская земля́ восприе́млет, богате́ющи боже́ственными твои́ми уче́нии, жи́теля тя́ своего́ иму́щи, блаже́нне Са́вво, па́че багряни́цы украша́ется.

Богоро́дичен: У́мныма очи́ма, Де́во, зря́ Тя́, Иса́ия вопие́т: се́ хо́щет роди́тися от Де́вы Богоотрокови́цы Иису́с Госпо́дь, в челове́ков па́ки возрожде́ние.

И́н.

Ирмо́с: Све́т возсия́й ми́ру, Христе́, просвети́ се́рдце мое́, от но́щи Тебе́ зову́ща, и спаси́ мя́.

Со слеза́ми вопие́м ти́, Са́вво преблаже́нне: изба́ви свою́ па́ству от огня́, и меча́, и иноплеме́нников, и междоусо́бицы, и гла́да, и вся́каго зла́.

Твори́т ны́не всебога́тно пра́здник Бо́жия Це́рковь твои́х моще́й, о́тче, пренесе́нием, сла́вящи все́х Творца́, возвели́чившаго тя́, Са́вво преблаже́нне.

Честна́, преблаже́нне, сме́рть твоя́ пред Бо́гом на́шим яви́ся, ея́же ра́ди прославля́ешися прише́ствием твои́м, о́тче, ко оте́честву твоему́, свя́те.

Богоро́дичен: Е́же бы́ти на́м подава́яй в Твою́ утро́бу всели́ся, Богоро́дице, Его́же моли́ спасти́ на́с.

Пе́снь 6.

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Благоуха́ют, преподо́бне, твоего́ уче́ния словеса́ благода́тию Ду́ха Свята́го, Божество́ Еди́но в Тре́х Ли́цех, Сло́ва же воплоще́ние поя́, благоуха́еши на́с, пребога́те.

Досто́йно ти́ дарова́ Христо́с градожи́тельство на небесе́х, пребыва́ющаго бо зде́ гра́да не возлюби́л еси́, блаже́нне Са́вво, ве́рен служи́тель бы́в и приста́вник та́йнам Его́ пребога́т.

Пресла́внии страстоте́рпцы Се́ргий и Ва́кх ра́дуются, име́юще боже́ственное твое́ те́ло, святи́телю, в це́ркви Христо́вой положе́но с ни́ми, веселя́щее ду́ши и сердца́ ве́рою припа́дающих к ра́це твое́й, Са́вво пребога́те.

Богоро́дичен: Лю́дие Твои́ и гра́д мо́лят Тя́, Ма́ти Бо́жия: изми́ на́с вся́кия ну́жды и та́мошняго, Всесвята́я Влады́чице, ве́чнаго осужде́ния.

И́н.

Ирмо́с: Ки́том пожре́н грехо́вным, вопию́ Тебе́, Христе́: я́ко проро́ка, из истле́ния мя́ свободи́.

Творе́ц Бо́г тебе́ засту́пника на́м даде́, те́м зове́м ти́: потщи́ся, Са́вво свя́те, и зло́бы изба́ви ны́, ско́рби бо вели́кия и ра́тныя, теле́сныя и душе́вныя, рабы́ твоя́ обдержа́т, от ни́хже изба́ви ны́, иера́рше Христо́в.

Ме́ртвенное те́ло твое́ Се́рбская земля́ восприя́ла е́сть, живоно́сную све́тлость испуща́ющее, преблаже́нне Са́вво, и умерщвле́нных страстьми́ смертоно́сными исцеля́ющее Ду́хом Боже́ственным.

Преподо́бне возврати́вся в свое́ оте́чество, неми́рная умири́л еси́, и положе́н бы́сть в ра́це в дому́ Спа́сове, святи́телю, Его́же ра́ди обогати́лся еси́ вла́стию, прехва́льне.

Богоро́дичен: Де́во еди́на Чи́стая Обра́дованная, помози́ ми́, при́сно обурева́ему жите́йскими напа́стьми.

Конда́к, гла́с 6:

Засту́пниче скорбя́щим, в напа́стех помо́щниче, ко Влады́це моле́бниче, не пре́зри на́с, смире́нных, обремене́нных грехи́, но предвари́ и исхи́ти от му́к ве́чных с ве́рою моля́щихтися, ускори́ на заступле́ние и потщи́ся на по́мощь, заступи́, святи́телю Христо́в Са́вво, пою́щия тя́.

И́кос:

Приими́ мольбы́ на́ша, иера́рше Госпо́день, и́миже недоуме́нно припа́даем ти́, недосто́йнии, мно́жеством заступле́ний твои́х при́зри на́с всегда́, припа́дающих ти́, неусы́пною свое́ю моли́твою и неизрече́нною по́мощию не оста́ви на́с и пода́ждь рабо́м твои́м избавле́ние от все́х нападе́ний лю́тых, тебе́ бо засту́пника и́мамы, святи́телю, иера́рше Христо́в Са́вво, от стужа́ющих на́с бе́д лю́тых, но я́ко име́я дерзнове́ние ко Влады́це все́х, лю́ди заступа́й, святи́телю Христо́в Са́вво, при́сно пою́щия тя́.

Пе́снь 7.

Ирмо́с: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Я́ко уя́звлен Тро́ическим Бо́жиим раче́нием, Тому́ созда́ боже́ственныя оби́тели, и в ни́х насади́ богожела́нныя му́жи, и научи́ пе́ти: благослове́н Бо́г оте́ц на́ших.

Прии́де свети́льник от Ты́рнова на све́щнице положи́тися, приспе́ украше́ние Бо́жия Це́ркве, воспо́йте Го́сподеви, по́йте с весе́лием, и, сре́тение творя́ще ему́, духо́вно возопии́м: о́тче, моли́твами твои́ми спаси́ на́с, пою́щих: благослове́н Бо́г оте́ц на́ших.

Па́влов нело́жный, Са́вво, бы́сть свети́льник и того́ стопа́м после́довал еси́, преподо́бне, и подви́жник нарече́ся, мона́хом, и святи́телем, и все́м бы́в пра́вило, и́хже научи́ пе́ти: благослове́н Бо́г оте́ц на́ших.

Богоро́дичен: Успи́ воста́ния страсте́й моея́ души́, бо́дренною моли́твою Твое́ю да́ждь ми́ бо́дрость, Отрокови́це, уны́ния дрема́ние дале́че отгоня́ющи.

И́н.

Ирмо́с: Преподо́бных Твои́х отроко́в пе́снь услы́шавый и пе́щь горя́щую ороси́вый, благослове́н еси́, Го́споди, Бо́же оте́ц на́ших.

Престо́лу Бо́жию предстоя́, святи́телю блаже́нне, о ве́рных свои́х рабе́х моле́ния непреста́нно твори́, ве́рою вопию́щих Христу́: благослове́н Бо́г оте́ц на́ших.

Ра́дуется дне́сь богоно́сных святи́телей собо́р, и́хже ты́ породи́ Ду́хом, честны́м пренесе́нием твои́х моще́й, и пра́зднуют лю́дие Се́рбския земли́, священнотаи́нниче му́дре Са́вво, зову́ще: благослове́н Бо́г оте́ц на́ших.

Обстои́м, лику́юще, богоно́сне о́тче, свяще́нную твою́ ра́ку и бога́тно от нея́ почерпа́ем ве́рою, блаже́нне Са́вво, исцеле́ний благода́ть, зову́ще: благослове́н Бо́г оте́ц на́ших.

Богоро́дичен: Влады́чице все́х челове́к, Свята́я Богоро́дице, рабо́ты мя́ страстны́я Твои́ми моли́твами до конца́ свободи́.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Па́че ине́х честне́йши, Са́вво, бы́сть у́бо тебе́ ра́ди Се́рбская всесла́вная митропо́лия, Христу́ Бо́гу принесе́ нача́ток свяще́нен, все́х Царю́ пою́щи непреста́нно: Го́спода по́йте и превозноси́те Его́ во ве́ки.

Сотворя́юще ны́не пра́зднственное весе́лие, Са́вво, пренесе́нием твои́х честны́х моще́й, лю́дие ве́рнии хвало́ю зову́т ти́: при́сный Христа́ Царя́ уго́дниче, исцели́ неду́ги ду́ш и теле́с на́ших, моля́ся все́х бла́г Пода́телю: вся́ дела́, Го́спода по́йте и превозноси́те Его́ во ве́ки.

К ра́це моще́й твои́х святы́х, лю́дие оте́чества твоего́, прихо́дим и от се́рдца зове́м: поми́луй своя́ рабы́ и от печа́ли избавля́й, ви́диши бо вся́ печа́льны и уны́лы, но моли́ Ми́лостиваго Бо́га изба́вити на́с вско́ре твои́ми моли́твами.

Богоро́дичен: Ми́лости Твоея́ мя́ сподо́би, Ми́лостивейшаго Сло́ва ро́ждши, Благослове́нная Всечи́стая, в ча́с су́дный предста́ни и изба́ви та́мошняго мя́, Чи́стая, осужде́ния.

И́н.

Ирмо́с: Преподо́бнии Твои́ о́троцы в пещи́ херуви́мы подража́ху, трисвяту́ю пе́снь воспева́юще: благослови́те, по́йте и превозноси́те во вся́ ве́ки.

Земля́ от свои́х не́др предаде́ тя́ священноле́пна, це́ла же и неразруши́ма, благоуха́нием чуде́с удивля́юща гра́да жи́телей пе́рстию гро́ба твоего́, проро́чески вопию́щих: пра́ведницы во ве́ки живу́т.

Пе́рсть, облежа́щая многострада́льное твое́ те́ло, о́тче, показа́ся дража́йши ка́мене сапфи́ра, целе́бна бо и чудотвори́ва, и па́че зла́та ве́рными цени́ма, пою́щими досто́йно: честна́ пред Го́сподем сме́рть преподо́бных Его́.

Царя́ благочести́ваго, держа́ща святы́ню и благослове́ние, твое́ свято́е и честно́е те́ло, со́нным явле́нием пренести́ убежда́еши, его́же ча́да твоя́ со святи́тели и свяще́нники, я́ко пребога́тое сокро́вище, во своя́ пренесо́ша.

Богоро́дичен: Пое́м Тя́, Де́во Богороди́тельнице, Ея́же ра́ди кля́тва непло́дна бы́сть и благослове́ние все́м прии́де, ве́дущим Тя́ еди́ну Ма́терь Бо́га на́шего безму́жную.

Пе́снь 9.

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Корабле́м, блаже́нне, кра́сным преплы́в свире́пеющее мо́ре жития́, доше́л еси́ к приста́нищу небу́рному, ра́дуяся, и ны́не предстои́ши с ли́ком а́нгелов, моля́ за ны́ Милосе́рдаго.

Дне́сь боже́ственная митропо́лия, наме́стника до́бляго тебе́ стяжа́вши, пра́зднует, боже́ственное творя́щи твое́ пра́зднество со все́ми епа́рхиями и гра́ды, и́хже соблюда́еши свои́ми моли́твами.

Христолюби́вый Владисла́в самоде́ржец, я́коже дре́вле Дави́д, пред киво́том предстоя́ свята́го твоего́ те́ла, ра́довашеся, поя́: вели́чит душа́ моя́ Го́спода, я́ко даде́ ми́ отца́ и учи́теля, и во це́ркви Свое́й, ра́дуяся, положи́л е́сть.

Богоро́дичен: Гла́с Тебе́ боже́ственнаго Гаврии́ла прино́сим ра́достно и взыва́ем: ра́дуйся, раю́, Я́же дре́во живо́тное посреде́ иму́щая всегда́, пресла́вная Сло́ва Пала́то, ра́дуйся, Де́во Всенепоро́чная.

И́н.

Ирмо́с: Е́же ра́дуйся от а́нгела прии́мшая и ро́ждшая Созда́теля Своего́, Де́во, спаси́ Тя́ велича́ющия.

Яви́ся чу́до стра́шное в са́мый ча́с успе́ния: па́че со́лнца твое́ лице́, о́тче, заблиста́, внегда́ приидо́ша ли́цы святы́х, ду́х тво́й восприе́млюще и Бо́гу Творцу́ принося́ще.

Стека́ются лю́дие па́ствы твоея́, кра́ль же благочести́вый и свяще́нных служи́телей мно́жество и возложи́ша твое́ честно́е те́ло на вы́и богоприя́тныя, я́ко киво́т, пресвяты́й да́р принося́ще, тебе́ велича́ху.

Дне́сь пра́зднственно лику́им вси́, созыва́ет бо Са́вва святи́телей собо́р и честны́я чернори́зцы на ликова́ние духо́вное и на трапе́зу безсме́ртныя жи́зни.

Богоро́дичен: Все́ми владе́ющи тва́рьми, лю́дем Твои́м да́руй побе́ды на враго́в моли́твами святи́теля, да Тя́ я́ко Богоро́дицу велича́ем.

Свети́лен:

Святи́теля Христо́ва да восхва́лим, па́мять его́ че́стно торжеству́юще, то́й бо на́м подае́т трапе́зу духо́вную, ея́же ду́хом насыща́ющеся, наслажде́ние боже́ственное получа́ем, Светода́вца прославля́юще.