Канон святым священномученику Зиновию и мученице Зиновии Егейским (Киликийским)

Пѣ́снь а҃.

І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще, пои́мъ тебѣ̀ є҆ди́номꙋ влⷣцѣ.

Прⷭ҇то́лꙋ предстоѧ̀ хрⷭ҇то́вꙋ, ꙗ҆́кѡ і҆ере́й благопрїѧ́тенъ и҆ мч҃никъ и҆зрѧ́днѣйшїй, зино́вїе требл҃же́нне, ꙗ҆̀же любо́вїю чествꙋ́ющыѧ твою̀ па́мѧть свѣтоно́снꙋю, жите́йскихъ и҆зба́ви собла́знѡвъ.

Заре́ю просвѣща́емь, мꙋ́дре, трисо́лнечнагѡ сїѧ́нїѧ, мглꙋ̀ разори́лъ є҆сѝ є҆́ллинскагѡ ѕлосла́вїѧ, и҆ свѣ́томъ твои́хъ слове́съ всѧ̑ просвѣти́въ, ны́нѣ преше́лъ є҆сѝ къ незаходи́момꙋ сїѧ́нїю.

Оу҆́гль ꙗ҆вле́нъ мы́сленный, ѻ҆гне́мъ вжига́емь бжⷭ҇твеннагѡ дх҃а, всѣ́хъ сердца̀ вже́глъ є҆сѝ къ жела́нїю бжⷭ҇твенномꙋ, свѧщеннотаи́нниче, и҆ пре́лесть попали́лъ є҆сѝ всѧ́кꙋ.

Бг҃оро́диченъ: Ра́дꙋйсѧ, прест҃ы́й хра́ме, рꙋно̀ бг҃оро́сное, запеча́танный и҆сто́чниче, безсме́ртїѧ стрꙋѧ̀: па́ствꙋ твою̀, влⷣчце, сохранѝ, ѿ всѣ́хъ сопроти́вныхъ невоева́нꙋ.

Пѣ́снь г҃.

І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Мѵ́ромъ пома́занїѧ дꙋхо́внагѡ пома́занъ, зино́вїе, свѧще́нствовалъ є҆сѝ, ꙗ҆́кѡ а҆́гг҃лъ, мч҃ническими при кончи́нѣ ᲂу҆краси́всѧ вѣнцы̑.

Дꙋ́шъ прирадѣ́нїе прїе́мъ, воздѣ́ланїемъ бжⷭ҇твеннымъ, прпⷣбне, плодонѡ́сны сїѧ̑ показа́лъ є҆сѝ: тѣ́мже гдⷭ҇ни ра́дости сподо́билсѧ є҆сѝ.

Сестра̀ є҆динокро́внаѧ твоѧ̀ тебѣ̀ є҆диномꙋ́дренна показа́сѧ зинові́а свѧще́ннѣйшаѧ: спострада́ти бо тебѣ̀ произво́ли, и҆ съ тобо́ю наслади́тисѧ сла́вы вѣ́чныѧ.

Бг҃оро́диченъ: Трⷪ҇цы є҆ди́наго родила̀ є҆сѝ, въ человѣ́чество ѡ҆бле́кшасѧ, прест҃а́ѧ мт҃и дв҃о: є҆го́же молѝ, спасти́ тѧ воспѣва́ющыѧ.

Сѣда́ленъ, гла́съ а҃.

Мѵ́ромъ честны́мъ пома́занъ, ꙗ҆ви́лсѧ є҆сѝ, пребл҃же́нне, і҆ере́й бг҃а вы́шнѧгѡ: и҆́мже ᲂу҆крѣплѧ́емь, і҆ера́рше зино́вїе, мч҃никъ бы́лъ є҆сѝ, и҆ сограждани́нъ а҆́гг҃лѡвъ: тѣ́мже дне́сь всесвѧтꙋ́ю па́мѧть творѧ́ще, пое́мъ тѧ̀.

Бг҃оро́диченъ: Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й и҆ лю́тыхъ ѡ҆бстоѧ́нїй всѣ́хъ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щихъ, и҆ дꙋ́шы на́шѧ спасѝ бжⷭ҇твенными моли́твами твои́ми.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ строе́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Всѣ́лъ є҆сѝ на ко́ни, а҆пⷭ҇лы твоѧ̑ гдⷭ҇и, и҆ прїѧ́лъ є҆сѝ рꙋка́ма твои́ма ᲂу҆зды̀ и҆́хъ, и҆ спасе́нїе бы́сть ѣ҆жде́нїе твоѐ вѣ́рнѡ пою́щымъ: сла́ва си́лѣ твое́й, гдⷭ҇и.

Возвы́шенъ ꙗ҆ви́лсѧ є҆сѝ страда̑нїи честны́ми свѧще́ннѣйше, и҆ прїѧ́лъ є҆сѝ вѣнцы̀ побѣ́ды, мꙋ́дре, и҆ вѣ́чное полꙋчи́лъ є҆сѝ ра́дованїе: тѣ́мъ тѧ̀ почита́емъ, ѻ҆́ч҃е і҆ера́рше зино́вїе.

На дре́вѣ просте́ршемꙋсѧ во́лею подо́бѧсѧ, воздви́гсѧ не ᲂу҆жа́слсѧ є҆сѝ, зино́вїе, и҆ тлѣ́нїѧ, сла́вне, и҆ ᲂу҆мерщвле́нїѧ дебельства̀ совле́клсѧ є҆сѝ, ѻ҆́ч҃е, сщ҃е́нникѡвъ похвало̀.

Дꙋша̀ твоѧ̀ крѣ́пкаѧ де́мѡнскаѧ ᲂу҆тверждє́нїѧ низложѝ, ка̑пища же разсѣдо́шасѧ, твердѣ́йшею вѣ́рою твое́ю потреблѧ́еми, зино́вїе сла́вне, свѧщенномꙋ́ченикѡвъ похвало̀.

Бг҃оро́диченъ: Стра́ннымъ твои́мъ ржⷭ҇тво́мъ ѿ бг҃а ᲂу҆страни́вшыѧсѧ къ немꙋ̀ присво́ила є҆сѝ, всепѣ́таѧ. тѣ́мже велегла́снѡ тѧ̀ всѝ сла́вимъ, и҆ вопїе́мъ тѝ вѣ́рою: ра́дꙋйсѧ, земноро́дныхъ воззва́нїе.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Же́нское є҆стество̀ дх҃омъ ᲂу҆крѣпи́сѧ, и҆ попра̀ и҆́же въ раѝ прама́терь дре́вле запе́ншаго, и҆ бжⷭ҇твенныѧ сла́вы на нб҃сѣ́хъ сподо́бисѧ, дѣ́вствомъ и҆ страда́ньми сїѧ́ющи.

Тꙋчеро́денъ ѻ҆́блакъ бы́сть ѧ҆зы́къ тво́й, ꙗ҆́кѡ ѡ҆дождѧ́ющь благоче́стїѧ до́ждь, и҆ вѣ́рныхъ сердца̀ напаѧ́ющь, и҆ къ благопло́дїю свѧщеннодѣ́йственнѣ пꙋтеводѧ́щь, добродѣ́тельныхъ, зино́вїе, дѣѧ́нїй.

Дѣ́вства зарѧ́ми сластолю́бїѧ тмꙋ̀ ѿгна́ла є҆сѝ, и҆ свѣ́томъ страда́нїй безбо́жїѧ но́щь потреби́ла є҆сѝ, зинові́е мч҃нице, і҆и҃сова кра́снаѧ невѣ́сто, жили́ще бжⷭ҇твеннагѡ дх҃а.

Бг҃оро́диченъ: Грѣха̀ тѧ́жкимъ всегда̀ ѡ҆бложе́нъ є҆́смь бре́менемъ, пречⷭ҇таѧ, и҆ вопїю́ ти: сїѐ хода́тайствомъ твои́мъ бжⷭ҇твеннымъ ѡ҆блегчѝ: ты́ бо є҆сѝ предста́тельница грѣ́шникѡвъ препросла́вленнаѧ, и҆зба́вителѧ и҆ сп҃са ро́ждши.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Моли́тва бжⷭ҇твенныѧ дꙋшѝ твоеѧ̀ прїѧ́та бы́сть, ꙗ҆́кѡ кади́ло, ѻ҆́ч҃е: въ воню́ бо благово́нїѧ, пребл҃же́нне, страда́нїй, зино́вїе, поте́клъ є҆сѝ, возсїѧ́вшагѡ ѿ жены̀ и҆ всю̀ тва́рь просвѣ́щшагѡ.

Кро́вїю страда́нїѧ, бл҃же́нне, ѡ҆свѧти́лъ є҆сѝ зе́млю, дꙋ́хъ же на нб҃са̀ возше́дъ, перворо́дныхъ цр҃ковь бжⷭ҇твеннѣ ᲂу҆ѧснѝ, зино́вїе, і҆ера́рхѡвъ и҆ мч҃никѡвъ свѣ́тлаѧ похвало̀.

Оу҆тѣсни́лъ є҆сѝ нече́стїе, бл҃же́нне, простра́нствомъ и҆́стиннагѡ благоче́стїѧ, и҆ пꙋти̑ въ сїѐ ведꙋ́щыѧ заблꙋ́ждшымъ лю́демъ показа́лъ є҆сѝ, и҆ спа́слъ є҆сѝ лю́тѣ потоплѧ́ємыѧ пре́лести вода́ми.

Бг҃оро́диченъ: Оу҆красѝ дꙋ́шꙋ мою̀, дв҃о, без̾ѻбра́зїемъ страсте́й ѡ҆держи́мꙋю, и҆ помышле́ньми и҆́стиннагѡ покаѧ́нїѧ ѻ҆каѧ́нное се́рдце моѐ ᲂу҆твердѝ, и҆ спаси́ мѧ на тѧ̀ несомнѣ́ннѡ, дв҃о, надѣ́ющагосѧ.

Конда́къ, гла́съ и҃.

И҆́стины свидѣ́тели и҆ благоче́стїѧ проповѣ́дники, дво́ицꙋ досто́йнѡ почти́мъ въ бг҃одохнове́нныхъ пѣ́снехъ, зино́вїа вкꙋ́пѣ съ мꙋ́дрою зинові́ею, кꙋ́пнѡ жи́вшыѧ и҆ ѿше́дшыѧ, и҆ мꙋче́нїемъ прїи́мшыѧ вѣне́цъ нетлѣ́нный.

І҆́косъ:

До́блѧго и҆ вели́кагѡ зино́вїа, пѣ́сньми и҆ пѣ̑нїи восхва́лимъ, съ до́брою дѣ́вою и҆ нескве́рною зинові́ею, сꙋ́щею сострада́лицею, ꙗ҆́кѡ низложи́ша вра̑жїѧ свирѣ̑пства, и҆ і҆́дѡльское безбо́жїе ѡ҆бличи́ша, вѣ́рꙋ же хрⷭ҇то́вꙋ ᲂу҆ѧсни́ша. тѣ́мже ра́достнѡ прїѧ́ша ны́нѣ вѣне́цъ нетлѣ́нный.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: благослове́нъ є҆сѝ, гдⷭ҇и бж҃е, во вѣ́ки.

Течє́нїи кро́вными погаси́въ, всеприснопа́мѧтне, ѻ҆́гнь безбо́жїѧ, чꙋдесы̀ на́съ всегда̀ ѡ҆роша́еши дожде́мъ, зино́вїе, влⷣкꙋ благосло́вѧщыѧ: бл҃гослове́нъ є҆сѝ, гдⷭ҇и бж҃е, во вѣ́ки.

Въ бжⷭ҇твенный мра́къ вше́дъ, неви́димаго, ꙗ҆́кѡ мо́щно, ви́дѣлъ є҆сѝ, дꙋ́шꙋ и҆ ᲂу҆́мъ просвѣща́юща твою̀, мч҃ниче, благочестивомꙋ́дреннѡ пою́щаго: бл҃гослове́нъ є҆сѝ, гдⷭ҇и бж҃е, во вѣ́ки.

Дае́тъ тебѣ̀ че́сть влⷣка, пострада́вшꙋ тве́рдѡ, и҆ низложи́вшꙋ кѡ́зни вра̑жїѧ, и҆ пою́щꙋ велегла́снѡ: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Мѣ́сто, дв҃о, ꙗ҆ви́ласѧ є҆сѝ свѧще́нїѧ, и҆зъ негѡ́же бг҃ъ ꙗ҆ви́сѧ, ѡ҆свѧща́ѧ ны̀ вѣ́рою пѣснопою́щыѧ: бл҃гослове́нъ, пречⷭ҇таѧ, пло́дъ твоегѡ̀ чре́ва.

Пѣ́снь и҃.

І҆рмо́съ: Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: бл҃гослови́те дѣла̀ гдⷭ҇нѧ, гдⷭ҇а.

Не ᲂу҆боѧ́лсѧ є҆сѝ меча̀, і҆ера́рше, не ᲂу҆страши́лсѧ є҆сѝ бѣ́дъ, не ᲂу҆жа́слсѧ є҆сѝ сме́рти, безсме́ртныѧ тѧ̀ сла́вы показꙋ́ющїѧ прича́стника.

Свѧщеннодѣ́йственникъ та̑инъ показа́лсѧ є҆сѝ, и҆ себѐ ѡ҆свѧти́въ, же́ртва благово́нна бы́лъ є҆сѝ, и҆ вы́шнїѧ трапе́зы, зино́вїе, досто́инъ.

Чꙋдодѣ̑йствы сїѧ́ѧ, і҆ера́рше, мꙋ́ченическими лꙋча́ми свѣ́тлѡ ѡ҆блиста́лъ є҆сѝ: и҆ мра́къ пре́лести до конца̀ ѿгна́лъ є҆сѝ.

Бг҃оро́диченъ: Не земледѣ́ланный гро́здъ заче́нши, и҆сточа́ющь вїно̀, дв҃о мт҃и, ѡ҆ставле́нїѧ, страсте́й мѧ̀ пїѧ́нства и҆змѣнѝ, молю́сѧ.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Стоѧ́лъ є҆сѝ предъ сꙋди́лищи, пресла́вне, мꙋчи́телей, воплоще́нїе свѣ́тлымъ гла́сомъ проповѣ́дꙋѧ вседержи́телѧ, и҆ страда̑нїѧ є҆гѡ̀, крⷭ҇тъ и҆ сме́рть и҆ воскрⷭ҇нїе, и҆́мже спасе́ ны, ꙗ҆́кѡ чл҃вѣколю́бецъ.

Ѽ чꙋдесѐ! ка́кѡ съ пло́тїю безплѡ́тныѧ врагѝ побѣдѝ; ка́кѡ низложѝ не́мощїю многоко́зненнаго; ка́кѡ съ нбⷭ҇ными слꙋжи́тєли совокꙋпи́тисѧ земны́й подви́гсѧ; є҆го́же чтꙋ́ще благоче́стнѡ велича́емъ.

Тѣлеса̀, мч҃ницы честні́и, ра́намъ разли̑чнымъ разли́чнѣ преда́сте, взира́юще къ вѣ́чномꙋ бл҃же́нствꙋ: бра́тскою бо любо́вїю дрꙋ́гъ дрꙋ́гꙋ свѧ́зани, мч҃ническими добро́тами просвѣти́стесѧ: тѣ́мже ᲂу҆блажа́етесѧ.

Па́мѧть дне́сь ва́ша свѣтозаре́нїемъ сїѧ́ющи дх҃а, всѣ̑мъ просїѧ̀, чꙋде́съ бл҃года́ть ѡ҆блиста́ющи, и҆ врачева́нїй рѣ́ки ѻ҆би́льнѡ точа́щи, ю҆́же пра́зднꙋюще, блажи́мъ вы̀ хрⷭ҇тѡ́вы мꙋ́чєницы.

Бг҃оро́диченъ: Просвѣтѝ, две́ре свѣ́та, се́рдца моегѡ̀ ѻ҆́чи, молю́сѧ, дале́че ѿгонѧ́щи грѣха̀ тмꙋ̀ тѧжча́йшꙋю ѿ ѻ҆каѧ́нныѧ моеѧ̀ дꙋшѝ: да велича́ю тѧ̀, да сла́влю тѧ̀, да любо́вїю тѧ̀ пою̀ всепѣ́тꙋю.

Свѣти́ленъ.

Ѽ чꙋдесѐ! ка́кѡ пе́рстнїи, зла́ти є҆стество́мъ ꙗ҆ви́шасѧ: и҆́бо ни ѻ҆́гнь, нижѐ ме́чь, нижѐ ѕвѣре́й зꙋ́бы, ни мꙋ̑ки, ни ра̑ны си́хъ повреди́ша: но въ пло́ти безпло́тнаго низложи́вше, гдⷭ҇ꙋ ѡ҆ на́съ мо́лѧтсѧ.

Бг҃оро́диченъ: Стра́шно предста́тельство твоѐ, марі́е бг҃окра́снаѧ, и҆ стра́шна твоѧ̀ сла́ва все́й землѝ, бцⷣе: тобо́ю бо ны́нѣ хва́лимсѧ, тѧ̀ и҆ хода́таицꙋ и҆мꙋ́ще къ сн҃ꙋ и҆ зижди́телю твоемꙋ̀, и҆ неꙋсы́пною моли́твою твое́ю спаса́емсѧ всѝ.