Канон святым отцам Седьмого Вселенского Собора

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Пѣсносло́вити седмо́е собра́нїе жела́ющемꙋ мѝ ны́нѣ, седми́хъ дарова́нїй собо́ръ, да́ждь мѝ паракли́та, гдⷭ҇и, ᲂу҆мꙋдри́вшаго се́й ѻ҆гненноѧзы́чнѣ, и҆ хꙋ́льное всѐ ѧ҆зыковре́дїе ᲂу҆молча́ти сотво́ршаго.

Бо́льшее и҆зъ нача́ла чи́слъ седмо́е: и҆́бо созда́нїѧ бж҃е́ственнагѡ всегѡ̀ первоѻбра́знѡ бы́сть, всесоверше́нное преста́нїе въ седмы́й де́нь: и҆ ны́нѣ всѣ́хъ є҆ресе́й коне́цъ, въ собо́рѣ равночи́сленномъ.

Побѣди́въ бг҃обо́рнаго а҆́рїа въ нїке́и, дре́вле па́стырскимъ жезло́мъ, правосла́вными ше́ствовати цр҃ковь ᲂу҆че́нїи ли́къ ѻ҆тцє́въ: и҆ ны́нѣ ѡ҆ се́мъ посрами́лъ є҆́сть ѻ҆бразобо́рцы, ꙗ҆́кѡ побо́рникъ.

Бг҃оро́диченъ: Ꙗ҆́коже ѻ҆тцы̀ благоче́стнѡ наꙋчи́ша, и҆сповѣ́дꙋюще вѣ́рнѡ, дв҃и́ческꙋю ᲂу҆тро́бꙋ безболѣ́зненнѡ ро́ждшꙋю пло́тїю безпло́тнаго: покланѧ́емсѧ же семꙋ̀, столпопи́шꙋще и҆з̾ѡбраже́нїе, и҆ че́стнѣ ѡ҆блобыза́емъ.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Не поколеба́тисѧ хрⷭ҇то́вѣ нерꙋши́мѣй цр҃кви, ѿ негѡ̀ тайнонаꙋча́еми бжⷭ҇твеннїи пастыренача́льницы, и҆̀же сїю̀ поколеба́ти хотѧ́щыѧ, ꙗ҆́коже а҆нті́хрїстовы ча́сти, ѿ благочести́выхъ ѿри́нꙋша.

Ѡ҆чища́етъ мꙋ̑тныѧ и҆ ти̑нныѧ пото́ки, ѿ и҆стѡ́чникъ спасе́нїѧ поче́рпъ, и҆ жа́ждꙋщыѧ лю́ди хрⷭ҇то́вы насыща́етъ ᲂу҆че́нїй стрꙋѧ́ми, ѻ҆тцє́въ сосло́вїе.

На ненави́дѧщихъ и҆́стиннѡ, и҆ хрⷭ҇тїаноѡглаго́льникѡвъ, собра́нїе хрⷭ҇толю́бныхъ седмо́е, въ свѣ́тлѣмъ гра́дѣ нїке́йстѣмъ бы́сть, є҆гѡ́же ца́рїе і҆ри́на и҆ кѡнстанті́нъ защи́тницы.

Бг҃оро́диченъ: Всѧ́къ да ѿстꙋ́питъ нечести́вый, не почита́ѧй і҆кѡ́нꙋ честнꙋ́ю бцⷣы, и҆ сїю̀ не проповѣ́дꙋѧй хрⷭ҇та̀ бг҃омꙋ́жнѡ ро́ждшꙋю, и҆ во ѻ҆́гнь да ѿшле́тсѧ, сгара́ти несожже́ннѡ.

Сѣда́ленъ, гла́съ д҃.

Свѣти́льницы пресвѣ́тлїи и҆́стины хрⷭ҇то́вы мі́рꙋ ꙗ҆ви́стесѧ на землѝ, вои́стиннꙋ блаже́ннѣйшїи ѻ҆тцы̀ бг҃овѣща́ннїи, и҆зсꙋши́вше є҆́рєси хꙋ́льныхъ ѧ҆зыкобо́лїй, и҆ ᲂу҆гаси́вше пламенови̑днаѧ ѕлосла́вныхъ смꙋщє́нїѧ. тѣ́мже ꙗ҆́кѡ і҆ера́рси хрⷭ҇то́вы моли́тесѧ спасти́сѧ на́мъ.

И҆́нъ, гла́съ в҃.

Ѿ нача́ла бори́тельный а҆́рїй свирѣ́пѡ наси́лїе наве́д, сп҃се, на це́рковь твою̀, но сїѐ подви́гше ѻ҆те́чєскаѧ во́инства тогѡ̀ побѣдѝ, и҆ є҆диносꙋ́щное сло́во ѻ҆ц҃ꙋ̀ вѣ́рнѡ тѧ̀ сла́вѧтъ.

Бг҃оро́диченъ: Ско́рѡ на́съ предварѝ, дв҃о мт҃и чⷭ҇таѧ: ѿ вра̑гъ на́съ и҆схитѝ хꙋ́лѧщихъ на тѧ̀: сокрꙋшѝ ѧ҆зыкобѡ́лїѧ є҆ресе́й всѧ̑ разрѣшѝ крѣ́постїю твое́ю стремлє́нїѧ тѣ́хъ, да разꙋмѣ́ютъ ꙗ҆́кѡ є҆ди́на бг҃ома́ти є҆сѝ, моли́твами твои́ми правосла́вныхъ совокꙋпле́нїе спаса́ющаѧ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ̀ тѝ: си́лѣ твое́й сла́ва, чл҃вѣколю́бче.

Глаго́лъ бж҃їй и҆мꙋ́ще, стрѣлꙋ̀ и҆ ме́чь, всѧ̑ кꙋ́пнѡ ты̑ѧ закала́ютъ ѕлоꙋ̑мныѧ, ѻ҆́бразомъ крⷭ҇тнымъ, не чтꙋ́щыѧ ра́внѡ и҆з̾ѡбраже́нїѧ хрⷭ҇то́ва, бцⷣы, и҆ всѣ́хъ ст҃ы́хъ, ѻ҆тцы̀ бг҃ови́днѣйшїи.

Ꙗ҆́коже седмїю̀ трꙋба́ми, і҆ерїхѡ́нскїѧ стѣ́ны въ седмо́мъ ѡ҆бхожде́нїи падо́ша: та́кѡ си́ми седмїю̀ собѡ́ры, ве́сь со́нмъ на бг҃а возносѧ́щїйсѧ, низведе́нъ въ бе́зднꙋ, въ собра́нїи седмо́мъ благогла́сныхъ трꙋ́бъ дх҃а.

Ю҆́ношеское настоѧ́нїе показꙋ́ѧ, и҆ бжⷭ҇твенною ре́вностїю распалѧ́емо, ѻ҆те́ческое мно́жество, ꙗ҆́коже и҆лїа̀, стꙋ́дныѧ свѧще́нники ᲂу҆мертви́ло є҆́сть. тѣ́мъ со дерзнове́нїемъ хрⷭ҇то́вѣ і҆кѡ́нѣ любе́знѡ покланѧ́тисѧ наꙋчи́ло є҆́сть.

Бг҃оро́диченъ: Ты̀ моѧ̀ наде́жда всечⷭ҇таѧ, ты̀ моѐ и҆ пѣ́нїе: ты̀ моѐ приста́нище, ты̀ моѐ и҆справле́нїе: ꙗ҆́же бг҃а сло́ва ѻ҆́ч҃а вопло́щшагосѧ, несочта́ннѡ родила̀ є҆сѝ. тѣ́мже твое́й несомнѣ́ннѡ покланѧ́юсѧ і҆кѡ́нѣ, крѣ́постїю твое́ю ᲂу҆крѣплѧ́емь.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆братѝ мѧ̀, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Высо́кою мы́слїю сразсмотри́вше, а҆на́ѳемѣ ѻ҆бразобо́рцєвъ преда́ша, ꙗ҆́кѡ чꙋжда̑ѧ си́хъ мꙋ́дрствовавшихъ, честні́и ѻ҆тцы̀: и҆ че́сть хрⷭ҇то́вѣ і҆кѡ́нѣ, ꙗ҆́коже лѣ́по, воздаѧ́ти повелѣ́ша.

Ны́нѣ вре́мѧ весе́лїѧ, ны́нѣ де́нь спасе́нїѧ ꙗ҆ви́сѧ, возвесели́мсѧ ᲂу҆̀бо, и҆ хрⷭ҇тꙋ̀ ра́достнѡ возопїи́мъ: ми́ръ да́ждь на́мъ тво́й, моли́твами ѻ҆тцє́въ седма́гѡ собо́ра, чл҃вѣколю́бче.

Бг҃оро́диченъ: Бл҃гоꙋтро́бїѧ ра́ди ми́лости, ѿ дв҃ы роди́сѧ сн҃ъ бж҃їй невра́щнѡ, чꙋ́ждее носѧ̀ ꙗ҆́кѡ своѐ, и҆ зра́комъ си́мъ ѡ҆пи́санный зри́тсѧ во́лею, по сꙋществꙋ̀ сы́й неѡпи́санъ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебє̀ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Да ка́плютъ сла́дость го́ры, и҆ ра́дость: є҆реті́ческое бо мно́жество и҆згна́сѧ, го́рькїй и҆злива́ющее ꙗ҆́дъ, ст҃ы́хъ і҆кѡ́нъ ѿверже́нїе.

Не́бо и҆ землѧ̀ согла́снѡ да пра́зднꙋютъ, дще́ре бж҃їѧ вели́чїе: и҆́бо велича́етсѧ, ѿмета́ющи сїю̀ ᲂу҆малѧ́ющыѧ.

Бг҃оро́диченъ: Мт҃рнїй сн҃ъ, и҆́же ѻ҆́ч҃їй пе́рвѣе безма́теренъ, без̾ѻ́тчїй же бг҃олѣ́пнѡ роди́всѧ, и҆ возроди́въ мѧ̀: тѣ́мже ро́ждшꙋю съ рожде́ннымъ ѡ҆бразꙋ́ѧ, ѡ҆блобыза́ю.

Конда́къ, гла́съ ѕ҃.

И҆́же и҆зъ ѻ҆ц҃а̀ возсїѧ́въ сн҃ъ неизрече́ннѡ, и҆зъ жены̀ роди́сѧ сꙋгꙋ́бъ є҆стество́мъ, є҆го́же ви́дѧще не ѿмета́емсѧ зра́ка и҆з̾ѡбраже́нїѧ: но сїѐ благоче́стнѡ начерта́юще, почита́емъ вѣ́рнѡ. и҆ сегѡ̀ ра́ди и҆́стиннꙋю вѣ́рꙋ цр҃ковь держа́щи, лобыза́етъ і҆кѡ́нꙋ вочл҃вѣ́ченїѧ хрⷭ҇то́ва.

І҆́косъ:

Хотѧ́й всеще́дрый бг҃ъ на́съ воздвиза́ти при́снѡ, къ па́мѧти соверше́ннѣй своегѡ̀ вочл҃вѣ́ченїѧ, подло́гъ се́й предадѐ человѣ́кѡмъ, шародѣ́ланьми і҆кѡ́нъ честны́й воз̾ѡбража́ти зра́къ: ꙗ҆́кѡ да сїѧ̑ во зрѣ́нїихъ ви́дѧще, вѣ́рꙋемъ, ꙗ҆̀же сло́вомъ слы́шахомъ, разꙋмѣ́юще ꙗ҆́вѣ дѣѧ́нїе и҆ и҆́мѧ, начерта́нїе, и҆ страда̑нїѧ ст҃ы́хъ мꙋже́й: и҆ хрⷭ҇та̀ вѣнцода́вца вѣнцы̀ подаю́ща ст҃ы̑мъ, страда́льцємъ же и҆ мч҃никѡмъ. и҆́хже ра́ди ꙗ҆снѣ́йше и҆́стиннꙋю вѣ́рꙋ держа́щи цр҃ковь, лобыза́етъ і҆кѡ́нꙋ вочл҃вѣ́ченїѧ хрⷭ҇то́ва.

Пѣ́снь з҃.

І҆рмо́съ: Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Побѣжда́ютсѧ догма́тами бг҃оглаго́ливыхъ мꙋже́й є҆ресенача́льницы, ѻ҆бразѡ́въ че́сть первоѻбра́знымъ и҆з̾ѡбразꙋ́ющихъ пра́вѡ, ꙗ҆́коже речѐ вели́кїй васі́лїй. бл҃гослове́нъ бг҃ъ ѻ҆тє́цъ на́шихъ.

Хра́ми ᲂу҆добрѧ́ютсѧ свѣ́тлыми і҆кѡ́нами ᲂу҆краша́емїи дне́сь: сегѡ̀ ра́ди мі́ръ въ цр҃квахъ, па́че всѣ́хъ человѣ̑къ краснѣ́йшемꙋ добро́тою, совоспѣва́етъ пою́щемꙋ: бл҃гослове́нъ бг҃ъ ѻ҆тє́цъ на́шихъ.

Свѣ́тъ ѡ҆блиста̀, дале́че тма̀, нечести́вїи ѿгна́ны. сегѡ̀ ра́ди всѧ́чєскаѧ свѣ́та и҆спо́лнишасѧ, свѣтода́телѧ хрⷭ҇та̀, съ весе́лїемъ пою́тъ, и҆ глаго́лютъ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Пречⷭ҇таѧ влⷣчца, є҆ди́на всѣ́хъ спасе́нїѧ наде́жда, ꙗ҆́же стра́шнѡ ро́ждшаѧ цр҃ѧ̀ царе́й хрⷭ҇та̀, на рꙋка́хъ свои́хъ сего̀ млⷣнца носѧ́щи, спокланѧ́ема є҆́сть ѡ҆пи́саннѣ, ꙗ҆́коже ѻ҆тцы̀ глаго́лютъ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Законополага́етъ ᲂу҆́бѡ и҆зѧ́щнѣйше ѻ҆тцє́въ сосло́вїе, бг҃очести̑вымъ и҆мстви́тельное поклоне́нїе, и҆ возставле́нїе свѧще́нныѧ і҆кѡ́ны хрⷭ҇то́вы: любоблагочести́вїи же лѣ́тнюю па́мѧть, ꙗ҆́кѡ ча̑да соверша́емъ благопослꙋшли̑ваѧ ѻ҆́ныхъ, и҆ любо́вїю ѻ҆́бразъ хрⷭ҇то́въ любыза́емъ.

Седмокра́тнѡ преклонѧ́хꙋ смире́нныхъ высокомꙋ́дреннїи, и҆ любодобродѣ́тельныхъ стремлє́нїѧ пресѣца́хꙋ, и҆́миже ѡ҆глаго́ловахꙋ бжⷭ҇твєннаѧ дѣѧ̑нїѧ и҆́хъ: но и҆̀же седма́гѡ собо́ра соше́дшїисѧ ѻ҆тцы̀ въ нїке́и, горды́ню ѻ҆́ныхъ а҆́бїе и҆стерза́ша седмокра́тнѣйше.

Стрѣ́лы младе́нєцъ быва́ютъ ѱало́мски старомꙋ́дрствꙋющымъ, младомꙋ́дренныхъ ꙗ҆́звы и҆ ра̑ны: бжⷭ҇твенною же си́лою и҆знемога́ютъ ꙗ҆зы́цы мно́зи, хꙋлы̑ на высотꙋ̀ глаго́лющихъ: и҆ всѧ́къ кто̀ ѻ҆ц҃а̀, сн҃а, и҆ дх҃а, бг҃а є҆ди́наго не вѣ́сть всевино́внаго и҆ є҆ди́наго.

Бг҃оро́диченъ: Зи́ждетсѧ младе́нецъ самово́льнѣ ми́лости ра́ди, зижди́тель ѿ чⷭ҇тыхъ крове́й твои́хъ, соблюда́ѧй тѧ̀ по ржⷭ҇твѣ̀ преѡчище́ннꙋ всю̀ чⷭ҇тꙋю, и҆ ѡ҆чища́ѧй ѡ҆скверне́нный ѻ҆́бразъ. тѣ́мже на і҆кѡ́нахъ соиз̾ѡбража́етсѧ тебѣ̀, є҆стество́мъ бы́въ чл҃вѣ́къ, бг҃ъ сы́й є҆стество́мъ.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Ве́лїй крѣ́постїю и҆ совѣ́томъ всѧ̑ содержа́й, непостижи́ме є҆ди́не бж҃е, держа́внѣйше всенача́льниче, всецр҃ю̀, цр҃ковь ᲂу҆твердѝ, въ правосла́вїи твое́мъ соблюда́ѧ, ѻ҆тцє́въ всесла́вныхъ, и҆з̾ѡблича́ющихъ ѕлосла́вїе, мольба́ми.

Вели́кихъ че́стей сподо́бистесѧ на землѝ, нб҃омꙋ́дреннїи ст҃і́и, ꙗ҆́кѡ хрⷭ҇то́во и҆з̾ѡбраже́нїе любе́знѡ почто́сте. и҆ ны́нѣ сѣ́нь ѿложи́вше, и҆ покрыва́ло пло́ти, самоли́чнѡ сего̀ въ лицѐ зритѐ, и҆ бо́льшихъ сподоблѧ́еми.

Да нака́жемсѧ всево́инствомъ ва́рварскагѡ безслове́сїѧ, є҆́же попꙋсти́лъ є҆сѝ на ны̀: тѣ́хъ стремле́нїе и҆ де́рзость са́мъ сокрꙋшѝ, и҆ вѣ̑рнымъ спобо́рствꙋй, надѣ́ющымсѧ на тѧ̀, вседѣ́телю, бл҃годерзнове́нными моли́твами ст҃ы́хъ ѻ҆ц҃ъ, и҆́хже соверша́емъ па́мѧть.

Бг҃оро́диченъ: Разꙋмѣ́ти та́йнꙋ стра́шнагѡ твоегѡ̀ ржⷭ҇тва̀ ника́коже мо́жетъ ᲂу҆́мъ человѣ́ческїй, но нижѐ а҆́гг҃льскїй высокоꙋ́мный: ꙗ҆́кѡ бг҃а ты̀ родила̀ є҆сѝ воплоще́ннаго па́че є҆стества̀. тѣ́мъ тѧ̀ бцⷣꙋ вѣ́дꙋще, и҆ со ѻ҆́нѣмъ написꙋ́юще, велича́емъ.

Свѣти́ленъ.

Ѻ҆ц҃ы̀ нб҃омꙋ́дреннїи, на седмо́мъ собо́рѣ собра́вшїисѧ, моли́твꙋ прилѣ́жнꙋ трⷪ҇цѣ принеси́те, є҆́же и҆зба́витисѧ ѿ всѧ́кїѧ є҆́реси и҆ сꙋда̀ вѣ́чнагѡ, црⷭ҇твїе же полꙋчи́ти на́мъ нбⷭ҇ное, ва́шъ собо́ръ бжⷭ҇твенный воспѣва́ющымъ.

Сла́ва, и҆ ны́нѣ: Мольба́ми, преблагі́й гдⷭ҇и, мт҃ре твоеѧ̀, и҆ и҆̀же на седмѝ собо́рѣхъ собра́вшихсѧ ѻ҆ц҃є́въ, цр҃ковь ᲂу҆твердѝ, и҆ вѣ́рꙋ ᲂу҆крѣпѝ: и҆ црⷭ҇твїѧ нбⷭ҇нагѡ всѧ̑ покажѝ прича́стники, є҆гда̀ прїи́деши на зе́млю сꙋди́ти всю̀ тва́рь.