Канон святым мученикам Онисифору и Порфирию

Пѣ́снь а҃.

І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́нѡвы и҆ си́лꙋ.

Носѧ́щи вѣ́рою благохва́лѧщымъ по́льзꙋ бжⷭ҇твеннꙋю, честна́ѧ наста̀ па́мѧть твоѧ̀, въ не́йже тѧ̀ мо́лимъ, блаже́нне: всѣ́хъ на́съ помѧнѝ.

И҆мѣ́ѧ дерзнове́нїѧ и҆спо́лнено твоѐ до́блественное помышле́нїе, безслове́снагѡ повелѣ́нїѧ небре́глъ є҆сѝ, бг҃одꙋхнове́нне, и҆ ра́дꙋѧсѧ, бл҃же́нне, страда́лъ є҆сѝ.

Си́лою возмога́емь нбⷭ҇ною, ѻ҆нисі́форе, къ лю̑тымъ ᲂу҆стреми́лсѧ є҆сѝ мꙋ́камъ, и҆ всю̀ побѣди́лъ є҆сѝ крѣ́пость ра́тꙋющагѡ.

Бг҃оро́диченъ: Оу҆ста́вила є҆сѝ сме́рти мꙋчи́тельство, безсме́ртнꙋю жи́знь созда́телѧ ро́ждши, хрⷭ҇та̀ и҆зба́вителѧ на́шего, дв҃о неискꙋсобра́чнаѧ.

Пѣ́снь г҃.

І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

Ра́вно ѻ҆ц҃ꙋ̀ и҆ дх҃ꙋ сло́во на три́знищи и҆сповѣ́дающе, мч҃ницы, треволнє́нїѧ мꙋ́къ мꙋ́жески ѿрази́ша.

Поста́вивъ тве́рдѡ но́ги твоѧ̑, мꙋ́чениче, на ка́мени и҆сповѣ́данїѧ и҆ вѣ́ры, вѣ̑тры, ѻ҆нисі́форе, ра́нъ не поколеба́лсѧ є҆сѝ.

Всѣ́мъ ᲂу҆мо́мъ, бл҃же́нне мꙋ́чениче, и҆зстꙋпи́въ ко хрⷭ҇тꙋ̀ жела́емомꙋ, не чꙋ́вствовалъ є҆сѝ и҆̀же ѿ ра́нъ болѣ́зней, всеблаже́нне.

Бг҃оро́диченъ: При́зри, пречⷭ҇таѧ, спасти́ мѧ: и҆́бо бжⷭ҇твеннымъ ма́нїемъ всѐ стро́ѧщаго воплоти́ла є҆сѝ бг҃а сло́ва, па́че сло́ва и҆ помышле́нїѧ.

Сѣда́ленъ, гла́съ а҃.

Ѻ҆гне́мъ бжⷭ҇твеннагѡ распала́еми жела́нїѧ, ѻ҆гнѧ̀ чꙋ́вственнагѡ прикоснове́нїемъ ѿню́дъ не ѡ҆пали́стесѧ, блаже́ннїи, пре́лесть же пожго́сте, и҆ влеко́ми неми́лостивнѡ, страстоте́рпцы, приснопа́мѧтный прїѧ́сте коне́цъ, и҆ сла́вꙋ полꙋчи́сте.

Бг҃оро́диченъ: Непремѣ́ннаго бг҃а поро́ждшаѧ, премѣнѧ́емое при́снѡ се́рдце моѐ грѣхо́мъ и҆ лѣ́ностїю, прило́гами льсти́вагѡ, ᲂу҆твердѝ, бл҃га́ѧ, моли́твами мт҃рними твои́ми: ꙗ҆́кѡ да и҆ а҆́зъ благода́рнѡ сла́влю тѧ̀, бг҃ороди́тельнице марі́е, поми́лꙋй ста́до твоѐ є҆́же стѧжа́ла є҆сѝ, всенепоро́чнаѧ.

Крⷭ҇тобг҃оро́диченъ: Сн҃а твоегѡ̀ и҆ бг҃а крⷭ҇то́мъ, дв҃о, сохранѧ́еми при́снѡ, де́мѡнскїѧ прило́ги и҆ кѡ́зни побѣжда́емъ, сꙋ́щꙋю бцⷣꙋ тѧ̀ и҆́стиннѡ воспѣва́юще: и҆ любо́вїю всѝ ро́ди блажи́мъ, пречⷭ҇таѧ, ꙗ҆́коже прорекла̀ є҆сѝ. тѣ́мже согрѣше́нїй на́шихъ ѡ҆ставле́нїе моли́твами твои́ми да́рꙋй.

Пѣ́снь д҃.

І҆рмо́съ: Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Ѡ҆блиста́ющее свѣтозаре́нїе болѣ́зней твои́хъ, ѻ҆нисі́форе мч҃ниче, привлечѐ любо́вїю, блаже́нне, спострада́ти тебѣ̀ блаже́ннаго порфѵ́рїа.

Возложи́вше на сковрадꙋ̀ разжже́ннꙋю, протѧза́ютъ мꙋчи́тели кꙋ́пнѡ хрⷭ҇тѡ́вы во́ины, ра́дꙋющыѧсѧ и҆ горѧ́щыѧ дꙋ́хомъ.

Заколе́нїе ꙗ҆́кѡ соверше́нно, страстоте́рпцы, и҆ чи̑стыѧ жє́ртвы влⷣцѣ всѣ́хъ, ра́дꙋющесѧ, приведо́стесѧ, тѣ́мъ блажи́ми є҆стѐ.

Разꙋ́мнѡ тѧ̀ возложе́ннаго влⷣцѣ, льсти̑выѧ бесѣ̑ды прельсти́ти ѿню́дъ не возмого́ша, порфѵ́рїе бг҃омꙋ́дре, всемꙋ́дре и҆ всебога́те.

Бг҃оро́диченъ: Воплоща́ема родила̀ є҆сѝ бг҃а сло́ва, ᲂу҆подо́битисѧ, ѻ҆трокови́це, за милосе́рдїе ми́лости всѣ̑мъ благоволи́вша, всенепоро́чнаѧ влⷣчце.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.

Столпѝ хрⷭ҇то́вы цр҃кве непоколеби́мїи, колеба́ньми мꙋ́къ непревра́тни крѣ́постїю дꙋ́ха ꙗ҆ви́стесѧ.

Кꙋми́ры богѡ́въ скве́рныхъ и҆стни́сте, и҆ ꙗ҆ви́стесѧ благоче́стїѧ и҆ мꙋ́жества ѻ҆́бразы, честні́и великомꙋ́чєницы.

Во́инствомъ и҆́стиннымъ ѿ бг҃а препоѧ́састесѧ, привре́менное могꙋ́тство ѡ҆ста́вивше вѣ́рою, ра́дꙋющесѧ пострада́сте.

Бг҃оро́диченъ: Всели́сѧ въ тѧ̀, вмѣсти́всѧ, невмѣ́стный, и҆ показа́ тѧ нб҃съ ши́ршꙋю, дв҃о. тѣ́мъ тѧ̀ ᲂу҆блажа́емъ.

Пѣ́снь ѕ҃.

І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.

Болѣ̑зни ра̑нъ претерпѣ́лъ є҆сѝ, ѻ҆нисі́форе мч҃ниче, тече́нїе соверши́въ свидѣ́тельства, и҆ побѣди́тель бы́въ, прїѧ́лъ є҆сѝ по́чєсти небє́сныѧ.

Дрꙋ́гъ дрꙋ́гꙋ содержа́щесѧ вѣ́рою, привѧза́еми кꙋ́пнѡ и҆ влеко́ми, разрѣше́нїе тѣлесѐ, ꙗ҆́кѡ крѣ́пцыи страда́льцы, прїѧ́сте, гдⷭ҇ꙋ совокꙋплѧ́еми.

Къ ко́нємъ привѧ́зани, и҆ нꙋ́жднѡ влеко́ми, нра́вомъ сꙋдѧ́щагѡ лютѣ́йшимъ, благосла́внїи мч҃ницы гдⷭ҇ни, бжⷭ҇твеннагѡ конца̀ сподо́бистесѧ.

Бг҃оро́диченъ: Зако́нѡвъ кромѣ̀ є҆сте́ственныхъ, дв҃о, законода́вца ражда́еши, ѡ҆бновлѧ́ющаго сокрꙋше́нное є҆стество̀ на́ше: є҆го́же молѝ спасти́ мѧ, грѣхи̑ сокрꙋше́ннаго.

Конда́къ, гла́съ в҃.

Мч҃никъ дво́ица пострада́вше крѣ́пкѡ, вра́жїю горды́ню на зе́млю низложи́сте, ѡ҆зари́вшесѧ бл҃года́тїю несозда́нныѧ трⷪ҇цы, сла́внїи, ѻ҆нисі́форе и҆ порфѵ́рїе, моли́тесѧ непреста́ннѡ ѡ҆ всѣ́хъ на́съ.

І҆́косъ:

Возмого́ша бжⷭ҇твенною крѣ́постїю, ᲂу҆тве́рждшесѧ хрⷭ҇то́вы во́ини, низложи́ти вра̑жїѧ совѣ́ты и҆ ᲂу҆хищрє́нїѧ, къ свирѣ̑пымъ ко́нємъ кꙋ́пнѡ привѧ́зани, и҆ стра́ждꙋще зако́ннѡ, на́мъ про́сѧтъ ѿ бг҃а долгѡ́въ проще́нїѧ, и҆ разрѣше́нїѧ грѧдꙋ́щихъ и҆скꙋше́нїй, и҆ лю́тыхъ и҆збавле́нїѧ. тѣ́мъ ты́ѧ хва́лимъ при́снѡ, ꙗ҆́кѡ при̑сныѧ къ бг҃ꙋ ᲂу҆го́дники, молѧ́щыѧсѧ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.

Бл҃горо́днѣйшїѧ твоеѧ̀ дꙋшѝ благорѡ́дныѧ твоѧ̑ нра́вы ꙗ҆влѧ́ѧ, и҆сповѣ́далъ є҆сѝ предъ мꙋчи́тєли, ѻ҆нисі́форе мꙋ́чениче, бг҃а воплоще́нна.

Вѣ́чнꙋю бжⷭ҇твеннꙋю свобо́дꙋ любѧ̀ твоемꙋ̀ влⷣцѣ, ꙗ҆́кѡ благопослꙋшли́въ ра́бъ, спострада́лъ є҆сѝ, и҆ съ ни́мъ ликꙋ́еши, порфѵ́рїе всеблаже́нне.

Бжⷭ҇твенными кровьмѝ ва́шими, разжже́нный пла́мень безбо́жїѧ ᲂу҆гаси́вше, вопїе́те, всехва́льнїи: ѻ҆тє́цъ на́шихъ бж҃е, бл҃гослове́нъ є҆сѝ.

Да блаже́нныѧ и҆ безсме́ртныѧ сла́вы сподо́битесѧ, блаже́ннꙋю пострада́сте сме́рть, бг҃освѣ̑тлыѧ ѕвѣ́зды мы́сленнагѡ сл҃нца.

Бг҃оро́диченъ: Воплоще́нно сло́во ѿ твои́хъ крове́й ражда́еши, земны̑ѧ ѡ҆божи́ти благоволи́вшаго, дв҃о, воспѣва́ющыѧ. ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: На крⷭ҇тѣ̀ пло́тїю пригвожде́ннаго, и҆ показа́вшаго на́мъ ѻ҆рꙋ́жїе во спасе́нїе, ѻ҆́троцы, превозноси́те хрⷭ҇та̀ бг҃а на́шего во вѣ́ки.

Оу҆деса̀ терза́нїємъ преда́вше, растерза́сте врага̀ несмы́сленное се́рдце, пребы́вше непоколе́блени ᲂу҆мо́мъ, великоимени́тїи вѣнцено́сцы.

Кровьмѝ ва́шими ѻ҆́гнь ᲂу҆гасѐ невѣ́дѣнїѧ, страда́льцы, вѣ́рныхъ же напои́сте всѣ́хъ и҆ сердца̀ и҆ дꙋ́шы возраще́нїемъ бг҃озна́нїѧ.

Во́лны лю́тыхъ мꙋче́нїй ѡ҆кормле́нїемъ хрⷭ҇то́вымъ преидо́сте, и҆ къ приста́нищꙋ бжⷭ҇твеннагѡ црⷭ҇твїѧ нбⷭ҇нагѡ приста́сте въ нетлѣ́нїе.

Оу҆́глїе ѻ҆гне́мъ паракли́та распалѧ́еми, ꙗ҆́вѣ мч҃ницы ꙗ҆́вльшесѧ, пожго́ша ле́сть вра́жїю, и҆ просвѣти́ша вселе́ннꙋю.

Бг҃оро́диченъ: Цвѣ́тъ и҆збра́нный во ᲂу҆до́лїихъ, ѻ҆трокови́це, житїѧ̀ ѡ҆брѣ́тъ, возжелѣ̀ твоеѧ̀ добро́ты сло́во бж҃їе, и҆ воплоти́всѧ, ѡ҆благово́нстви вселе́ннꙋю.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ, клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Возмого́ша, си́лою хрⷭ҇то́вою вжилѧ́еми, безплѡ́тныѧ съ тѣ́ломъ побори́ти, до́блїи а҆дама́нти, столпѝ вѣ́ры, и҆ ны́нѣ на нб҃сѣ́хъ веселѧ́тсѧ ѿ вѣ́ка съ пострада́вшими.

Ꙗ҆́кѡ колесни́ца словесѐ свѧще́ннаѧ бы́вше, къ безсловє́снымъ привѧ́зани бы́сте, бжⷭ҇твеннїи мч҃ницы, и҆ къ приста́нищꙋ нбⷭ҇номꙋ достиго́сте, ра́дꙋющесѧ, и҆ побѣ́ды по́чєсти прїѧ́сте. тѣ́мъ досто́йнѡ блажи́ми є҆стѐ.

Тѣлеса̀ ва̑ша пангеа́нѡвъ сла́вный ны́нѣ и҆́мать гра́дъ, мч҃ницы бжⷭ҇твеннїи, ѡ҆бога́щсѧ застꙋ̑пники ва́ми, и҆ врачи̑, цѣлѧ́щими тѣле́съ и҆ дꙋ́шъ недꙋ́ги, приходѧ́щихъ вѣ́рою всегда̀.

Бжⷭ҇твеннаѧ дво́ица и҆ свѣтоза́рнаѧ, порфѵ́рїе страстоте́рпче присносла́вный и҆ ѻ҆нисі́форе доблемꙋ́дрый, трⷪ҇цѣ прест҃ѣ́й моли́тесѧ, ми́ръ и҆ лю́тыхъ и҆збавле́нїе пода́ти дꙋша́мъ на́шымъ.

Бг҃оро́диченъ: Ѡ҆дѣ́ѧвсѧ во всего́ мѧ во́лею влⷣка, ѿ твои́хъ происхо́дитъ, всенепоро́чнаѧ, бжⷭ҇твенныхъ чре́слъ, ꙗ҆́кѡ жени́хъ: и҆ млеко́мъ пита́етсѧ, и҆́же всю̀ тва́рь пита́ѧй ма́нїемъ, бл҃гослове́ннаѧ приснодв҃о.

Свѣти́ленъ.

Мꙋ́ченики почти́мъ, страда̑нїи возсїѧ́вшихъ, и҆ ѡ҆зари́вшихъ мі́ръ мꙋ́ченическими свѣтлостьмѝ, ѻ҆нисі́фора сла́внаго, и҆ съ ни́мъ порфѵ́рїа: и҆́бо сі́и мо́лѧтсѧ ѡ҆ на́съ, любо́вїю соверша́ющихъ па́мѧть и҆́хъ.

Бг҃оро́диченъ: Ра́дꙋйсѧ, бж҃їѧ пала́то: ра́дꙋйсѧ, горо̀ ѡ҆сѣне́ннаѧ: ра́дꙋйсѧ, неѡпали́маѧ кꙋпино̀: ра́дꙋйсѧ, прⷭ҇то́ле сла́вы: ра́дꙋйсѧ, бжⷭ҇твеннаѧ трапе́зо: ра́дꙋйсѧ, ста́мно всезлата́ѧ: ра́дꙋйсѧ, свѣ́щниче всесвѣ́тлый: ра́дꙋйсѧ, ле́гкїй ѻ҆́блаче, дв҃ома́ти марі́е.