Канон святым мученикам Мине Калликеладу (Красноречивому), Ермогену и Евграфу Александрийским

Пѣ́снь а҃.

І҆рмо́съ: Го́рькїѧ рабо́ты и҆зба́вльсѧ і҆и҃ль, непроходи́мое про́йде, ꙗ҆́кѡ сꙋ́шꙋ, врага̀ зрѧ̀ потоплѧ́ема, пѣ́снь, ꙗ҆́кѡ бл҃годѣ́телю, пое́тъ бг҃ꙋ, чꙋдодѣ́ющемꙋ мы́шцею высо́кою, ꙗ҆́кѡ просла́висѧ.

Вѣнцы̑ сла́вы ᲂу҆краша́емїи, и҆ прⷭ҇то́лꙋ бж҃їю предстоѧ́щїи, и҆ бжⷭ҇твеннагѡ свѣ́та и҆сполнѧ́емїи, любо́вїю свѣтоно́снꙋю па́мѧть ва́шꙋ соверша́ющыѧ, ѡ҆мраче́нїѧ страсте́й, мꙋ́чєницы, и҆зба́вите.

Бжⷭ҇твенное лю́бѧще благосла́вїе, бж҃їѧ добро́ты жела́юще, житїѧ̀ кра̑снаѧ ѿри́нꙋсте, и҆ всю̀ си́лꙋ преѧ́вственнѡ: и҆ сме́ртїю безконе́чнꙋю жи́знь, мꙋ́чєницы, ѡ҆брѣто́сте.

Бжⷭ҇твенною ре́вностїю распалѧ́еми, ѻ҆́гнь нече́стїѧ ᲂу҆гаси́ша: и҆ свѣти́льницы, свѣ́тъ сїѧ́юще всѣ̑мъ благоче́стїѧ пресвѣ́тлѡ, ꙗ҆ви́шасѧ вѣ́рою, є҆рмоге́нъ и҆ ми́на велемꙋ́дреннїи.

Бг҃оро́диченъ: И҆зба́витисѧ, ѻ҆трокови́це всенепоро́чнаѧ, страсте́й ѡ҆держа́нїѧ рабѡ́мъ твои̑мъ, твоего̀ прилѣ́жнѡ молѝ гдⷭ҇а и҆ влⷣкꙋ: є҆го́же и҆зъ твои́хъ, пречⷭ҇таѧ, крове́й воплоти́ла є҆сѝ, на́мъ приѡбщи́вшагосѧ.

Пѣ́снь г҃.

І҆рмо́съ: Пре́жде вѣ̑къ ѿ ѻ҆ц҃а̀ рожде́нномꙋ нетлѣ́ннѡ сн҃ꙋ, и҆ въ послѣ̑днѧѧ ѿ дв҃ы воплоще́нномꙋ безсѣ́меннѡ хрⷭ҇тꙋ̀ бг҃ꙋ возопїи́мъ: вознесы́й ро́гъ на́шъ, ст҃ъ є҆сѝ, гдⷭ҇и.

Заре́ю нбⷭ҇ною ꙗ҆́снѡ просвѣти́вшесѧ мꙋ́чєницы, тмꙋ̀ разори́ша і҆́дѡльскїѧ ле́сти: и҆ сїѧ́нїе на́мъ и҆сцѣле́нїй ѡ҆блиста́ша, пѣснопою́щымъ всѣ́хъ бг҃ꙋ: ст҃ъ є҆сѝ, гдⷭ҇и.

Ме́ртвости жива́гѡ послѣ́дꙋѧ влⷣки, ми́но чꙋ́дне, плесна́ми сокрꙋша́ешисѧ, и҆ главꙋ̀ мꙋчи́телѧ сокрꙋша́еши врага̀, ᲂу҆твержда́ѧ но́ги твоѧ̑ на тве́рдѣмъ мꙋче́нїѧ пꙋтѝ, мч҃ниче мꙋ́жественнѣйше.

Пое́тъ сп҃са є҆рмоге́нъ, рꙋка́ми ᲂу҆сѣка́емь, сщ҃е́нства ѻ҆де́ждꙋ свѣтлѣ́йшꙋ крове́й ѡ҆моче́ньми ꙗ҆́снѡ содѣ́лавъ, и҆ подража́тель страда́вшагѡ пло́тїю благода́тїю ꙗ҆влѧ́емь.

Бг҃оро́диченъ: Є҆ди́нꙋ въ жена́хъ тѧ̀ кра́сный кра́снꙋю ѡ҆брѣ́тъ, плотоно́сецъ и҆зъ чре́ва твоегѡ̀ произы́де, ѻ҆трокови́це, хрⷭ҇то́съ, бжⷭ҇твенными красота́ми просвѣща́ѧ ро́дъ на́шъ. тѣ́мъ тѧ̀ почита́емъ.

Конда́къ, гла́съ а҃.

Ми́нꙋ чꙋ́днаго, є҆рмоге́на бжⷭ҇твеннаго, и҆ є҆ѵгра́фа кꙋ́пнѡ свѧще́нными сладкопѣ̑нїи почти́мъ всѝ, ꙗ҆́кѡ почествова́вшыѧ гдⷭ҇а, и҆ страда́льчествовавшыѧ за него̀, и҆ ли́ка безпло́тныхъ на нб҃сѣ́хъ дости́гшыѧ, и҆ чꙋдеса̀ точа́щыѧ.

Сѣда́ленъ, гла́съ и҃.

Презрѣ́вше сла́вꙋ мїрскꙋ́ю, ѡ҆крили́вшесѧ сла́вою бжⷭ҇твенною, ми́на, є҆рмоге́нъ же и҆ сла́вный є҆ѵгра́фъ, и҆ ᲂу҆се́рднымъ нра́вомъ тѧ́гость претерпѣ́ша лю́тыхъ мꙋче́нїй, пло́ти не пощадѣ́вше. тѣ́мже, по кончи́нѣ во глꙋбинꙋ̀ морскꙋ́ю вве́ржени бы́вше, напра́вишасѧ къ бжⷭ҇твенномꙋ хотѣ́нїю. и҆̀мже вѣ́рою возопїе́мъ: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть ва́шꙋ.

Бг҃оро́диченъ: Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ, бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ застꙋпле́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бл҃гости. тѣ́мже, пречⷭ҇таѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихтисѧ, бцⷣе пречⷭ҇таѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.

Пѣ́снь д҃.

І҆рмо́съ: Же́злъ и҆зъ ко́рене і҆ессе́ова, и҆ цвѣ́тъ ѿ негѡ̀, хрⷭ҇тѐ, ѿ дв҃ы прозѧ́блъ є҆сѝ, и҆зъ горы̀ хва́льный, приѡсѣне́нныѧ ча́щи, прише́лъ є҆сѝ вопло́щсѧ ѿ неискꙋсомꙋ́жныѧ, невеще́ственный и҆ бж҃е, сла́ва си́лѣ твое́й, гдⷭ҇и.

Зако́ны возвѣща́ѧ свѣтоза̑рныѧ, беззако́ннѡ твои́хъ ѻ҆че́съ и҆збоде́нїе, ми́но, претерпѣ́лъ є҆сѝ, се́рдца ѻ҆чеса̀ къ свѣ́тꙋ незаходи́момꙋ и҆мѣ́ѧ прилѣ́жнѡ смотрѧ̑ющаѧ, и҆ поѧ̀ ра́достнѡ: сла́ва си́лѣ твое́й, гдⷭ҇и.

Ꙗ҆ви́сѧ ѧ҆зы́къ тво́й ѻ҆гне́мъ дх҃а мꙋдрѣ́йше и҆з̾ѡщре́нъ, внегда̀ ѿсѣщи́сѧ: глаго́лаше бо, поѧ̀ бж҃їѧ чꙋдеса̀, и҆ мꙋчи́телѧ безгла́сїе преводѧ̀ во благочести́вꙋю сла́вꙋ ꙗ҆́вѣ сотво́ршагѡ.

Вельмѝ стра́сть терпѧ̀, нога́ми ѿсѣца́етсѧ є҆рмоге́нъ, ѕмїи́нꙋю попира́ѧ главꙋ̀, и҆ пꙋ́ть гото́вѧ нра́вомъ неꙋкло́ннымъ свидѣ́тельства, вводѧ́щь къ жи́зни нбⷭ҇ныѧ свѣ́тлости.

Неꙋѧ́звленꙋ соблюда́ющꙋ дꙋ́шꙋ хрⷭ҇то́съ тебѣ̀ ꙗ҆влѧ́етсѧ, твоѧ̑ ꙗ҆́звы, ми́но, и҆сцѣлѧ́ѧ, мꙋ́жески же терпѣ́ти тебѣ̀ повелѣва́ѧ: ꙗ҆́кѡ да тебє̀ ра́ди спасе́нїе ми́лости хоти́тель всѣ́хъ зрѧ́щихъ содѣ́лаетъ.

Бг҃оро́диченъ: Же́злъ и҆зъ ко́рене і҆ессе́ева и҆зрасти́ла є҆сѝ, процвѣ́тшаѧ садодѣ́лателѧ всеѧ̀ тва́ри, ᲂу҆вѧди́вшаго сады̀ непло́днагѡ зна́нїѧ, вѣ́рꙋ же на́мъ и҆́стиннѣйшꙋю всади́вшаго благоче́стнѡ, чⷭ҇таѧ дв҃о всепѣ́таѧ.

Пѣ́снь є҃.

І҆рмо́съ: Бг҃ъ сы́й мі́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ. тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Что̀ всꙋ́е мѧте́шисѧ, вопїѧ́хꙋ кꙋ́пнѡ сꙋдїѝ пребеззако́нномꙋ мч҃ницы; си́лꙋ подаѧ́й предстои́тъ на́мъ, є҆ди́нъ въ крѣ́пости непобѣди́мь сы́й, є҆гѡ́же ра́ди ра̑ны терпи́мъ крѣпча́йше.

Бѧ́ше внеза́пное преложе́нїе чꙋ́днагѡ є҆рмоге́на ко гдⷭ҇ꙋ: ба́нею бо ѡ҆чища́етсѧ, и҆ сꙋдо́мъ бжⷭ҇твеннымъ а҆рхїере́йства свѣ́тъ воспрїе́млетъ, ᲂу҆че́ньми ѡ҆зарѧ́ѧй въ нощѝ лю́тыхъ сꙋ́щыѧ.

Виті́й ѡ҆ста́вльше неискꙋ́сный ᲂу҆́мъ, непи́смѧникѡвъ плете́ньми ᲂу҆лови́стесѧ, ᲂу҆мꙋдри́вшꙋ дх҃ꙋ вы̀, ꙗ҆́кѡ и҆́стиннѡ мч҃ницы, и҆ ко всѧ́кой мꙋ́къ бꙋ́ри си́льны въ крѣ́пости содѣ́лавшꙋ вѣ́рою.

Бг҃оро́диченъ: Ст҃ы́хъ а҆́гг҃лъ, дв҃о чⷭ҇таѧ, преимꙋ́щи ꙗ҆ви́ласѧ є҆сѝ, ро́ждшаѧ совѣ́та вели́кагѡ а҆́гг҃ла, бг҃а є҆мманꙋ́ила, человѣ́ки нбⷭ҇ными свои́мъ сни́тїемъ содѣ́лавша, ѻ҆трокови́це, за бл҃гоꙋтро́бїе неисповѣди́мое.

Пѣ́снь ѕ҃.

І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во и҆ пло́ть прїе́мшее про́йде, сохра́ншее нетлѣ́ннꙋ. є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Спа́слъ є҆сѝ і҆ѡ́нꙋ ѿ ѕвѣ́рѧ тридне́внагѡ ѡ҆бразꙋ́юща погребе́нїе твоѐ, всеси́льне: тѣлеса́ же мч҃никъ, въ пꙋчи́нꙋ вве́ржєна, напра́вилъ є҆сѝ къ тиша́йшемꙋ приста́нищꙋ погребе́нїѧ: и҆дѣ́же твоѐ бжⷭ҇твенное хотѣ́нїе, въ на́ше вѣ́рныхъ снабдѣ́нїе.

Тѣлеса̀ ва̑ша, непобѣди́мїи мꙋ́чєницы, глꙋбина̀ невре́днѡ сꙋ́ши подае́тъ, предводѧ́щымъ нбⷭ҇нымъ а҆́гг҃лѡмъ, блаже́ннїи, и҆ всѣ̑мъ положе́нїе повѣ́дающымъ ва́ше, сꙋ́щее и҆сцѣле́нїй и҆сточе́нїе, и҆ страсте́й дꙋше́вныхъ и҆збавле́нїе.

Чи́ни а҆́гг҃льстїи ва́шемꙋ ᲂу҆диви́шасѧ терпѣ́нїю, ка́кѡ безпло́тнаго съ тѣ́ломъ побѣди́сте мч҃ницы ѕмі́ѧ, и҆ побѣ́ды вѣнцы̑ ᲂу҆вѧзо́стесѧ, престо́лꙋ бж҃їю предстоѧ́ще, и҆ бжⷭ҇твенными зарѧ́ми ѡ҆свѣща́еми.

Бг҃оро́диченъ: Преста̀ тобо́ю, дв҃о, сме́рть, жи́знь бо хрⷭ҇та̀ родила̀ є҆сѝ, да́рꙋющаго чи́стѣ вѣ́рꙋющымъ въ тогѡ̀ безсме́ртїе и҆ бжⷭ҇твенное ра́дованїе: семꙋ̀, всест҃а́ѧ, моли́сѧ, и҆зба́вити ѿ бѣ́дъ рабы̑ твоѧ̑.

Конда́къ, гла́съ д҃.

Добропѣ́сненный гла́съ твои́хъ слове́съ, є҆рмоге́на и҆зъ глꙋбины̀ поги́бели возве́дъ, поста́ви на ка́мени жи́зни: ѿѻнꙋ́дꙋже и҆ є҆ѵгра́фъ, царѧ̀ ѡ҆бличи́въ, ра́дꙋѧсѧ посѣка́етсѧ въ сла́внꙋю главꙋ̀: но прилѣ́жнѡ молѝ, ми́но, спасти́сѧ всѣ̑мъ, любо́вїю чтꙋ́щымъ тѧ̀.

І҆́косъ:

Житїѐ твоѐ бг҃олѣ́пно, и҆ сла́дко твоѐ сло́во, мно́гое дерзнове́нїе, ми́но, и҆ ᲂу҆че́нїе твоѐ, и҆ мꙋ́жество чꙋ́дно бѧ́ше къ беззако́нникѡмъ, показꙋ́ѧсѧ тве́рдѡ, ника́коже ᲂу҆боѧ́всѧ: но наказꙋ́ѧ всѧ̑ наꙋчи́лъ є҆сѝ въ тре́хъ ли́цѣхъ покланѧ́тисѧ бг҃ꙋ є҆ди́номꙋ, и҆ слꙋжи́ти несомнѣ́нною мы́слїю: и҆ па́ки на́съ ра́ди ны́нѣ въ послѣ̑днѧѧ сн҃а бж҃їѧ пло́ть прїе́мша, є҆го́же и҆сповѣ́дꙋѧ, ᲂу҆лови́лъ є҆сѝ є҆рмоге́на. тѣ́мъ съ ни́мъ молѝ, спасти́сѧ всѣ̑мъ, любо́вїю чтꙋ́щымъ тѧ̀.

Пѣ́снь з҃.

І҆рмо́съ: Ѻ҆́троцы благоче́стїю совоспита́ни, ѕлочести́вагѡ велѣ́нїѧ небре́гше, ѻ҆́гненнагѡ преще́нїѧ не ᲂу҆боѧ́шасѧ, но посредѝ пла́мене стоѧ́ще поѧ́хꙋ: ѻ҆тцє́въ бж҃е, бл҃гослове́нъ є҆сѝ.

Гла́съ пра́зднꙋющихъ чи́стѣ, и҆дѣ́же и҆ шꙋ́мъ слы́шитсѧ, ра́достною дꙋше́ю страда́льцы всели́стесѧ, весе́лїѧ и҆сполнѧ́еми и҆ пою́ще: ѻ҆тцє́въ бж҃е, бл҃гослове́нъ є҆сѝ.

Сладка̀ мнѣ̀, вопїѧ́ше є҆рмоге́нъ, є҆́юже ᲂу҆мира́ю, сме́рть: мнѣ̀ є҆́же жи́ти є҆́сть хрⷭ҇то́съ, є҆́же ᲂу҆мре́ти же приѡбрѣ́тенїе безмѣ́рно. да ѿсѣкꙋ́тсѧ моѝ ᲂу҆́ды любо́вїю пою́щꙋ: ѻ҆тцє́въ бж҃е, бл҃гослове́нъ є҆сѝ.

Мꙋ́дростїю твердѣ́йшею въ живꙋ́щихъ тебѐ сама́го написа́лъ є҆сѝ кни́зѣ, ѽ є҆ѵгра́фе мꙋ́дре: главѣ́ бо ѿсѣ́ченѣй, ꙗ҆́коже на колесни́цꙋ твое́ю всѣ́лъ є҆сѝ кро́вїю, и҆ къ невече́рнемꙋ свѣ́тꙋ преста́вилсѧ є҆сѝ.

Бг҃оро́диченъ: Не ѡ҆пали́въ твоегѡ̀ чре́ва, не поколеба́въ дѣ́вства зна́менїй, вопло́щшеесѧ сло́во и҆зъ тебє̀ про́йде, подаѧ̀ нетлѣ́нїе и҆ жи́знь на́мъ, ѻ҆трокови́це, пою́щымъ: ѻ҆тцє́въ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀, ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бжⷭ҇тва̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Па́даетъ предъ нога́ми твои́ми сꙋемꙋ́дренный попира́емь, ми́но бг҃омꙋ́дре: ѻ҆че́съ бо лиши́въ тѧ̀ и҆ ѧ҆зы́ка, твоегѡ̀ по́мысла не поколеба̀ стоѧ́нїѧ лꙋ́чшагѡ. тѣ́мже ра́достнѡ взыва́лъ є҆сѝ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Є҆гда̀ сꙋро́вѣйшимъ произволе́нїемъ, ѻ҆бои́хъ рꙋ́къ и҆ но́гъ тѧ̀ мꙋчи́тель лишѝ пребезꙋ́мный, тогда̀, мꙋ́дре, натрижне́нїѧ жела́ѧ, є҆рмоге́не, хрⷭ҇тꙋ̀ пѣснопѣ́лъ є҆сѝ ра́дꙋѧсѧ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Пою̀ твоѧ̑, ми́но, бжⷭ҇твєннаѧ страда̑нїѧ, чтꙋ̀ є҆рмоге́новы по́двиги, покланѧ́юсѧ мощє́мъ, воспѣва́ю ра̑ны, ю҆́зы, гонє́нїѧ и҆ сме́рть, и҆́миже къ жи́зни взѧ́стесѧ, вопїю́ще: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Бг҃оро́диченъ: Ста́мнꙋ тѧ̀, ма́ннꙋ и҆мꙋ́щꙋю бжⷭ҇тва̀, позна́хомъ, ѻ҆трокови́це, кївѡ́тъ и҆ трапе́зꙋ, и҆ свѣ́щникъ, прⷭ҇то́лъ бж҃їй, и҆ пала́тꙋ, и҆ мо́стъ, преводѧ́щь къ бжⷭ҇твеннѣй жи́зни воспѣва́ющыѧ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Пѣ́снь ѳ҃.

І҆рмо́съ: Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Сѐ свѣтоза́рное торжество̀ свѣтови́дныхъ мч҃никѡвъ всѣ̑мъ просїѧ̀, ѡ҆зарѧ́ющее вселе́нныѧ концы̀ и҆ дꙋ́шъ слѣпотꙋ̀ ѿе́млющее: стеце́мсѧ преꙋсе́рднѡ, свѧще́нїе почерпе́мъ.

И҆́хже бла̑гъ полꙋчи́сте нбⷭ҇ныѧ сла́вы, є҆ѧ́же сподо́бистесѧ, вѣ́рою свѣ́тлꙋю па́мѧть ва́шꙋ чтꙋ́щымъ, ꙗ҆́кѡ бг҃ꙋ предстоѧ́ще всегда̀, полꙋчи́ти моли́тесѧ, великомꙋ́чєницы, мо́лимсѧ.

Тѣ́ло и҆ дꙋ́шꙋ принесо́сте творцꙋ̀ всѣ́хъ же́ртвꙋ непоро́чнꙋ, всесожже́гшесѧ ѻ҆гне́мъ мꙋче́нїй, и҆ мꙋ́ченикѡвъ ликѡ́мъ причи́слистесѧ, свѣ́томъ чистѣ́йшимъ просвѣща́еми, всехва́льнїи.

Взѧ́тсѧ ко ѻ҆би́телємъ вселѧ́ѧсѧ свѣтови́дный мꙋ́ченикѡвъ ли́къ бжⷭ҇твенный, и҆ предстои́тъ ѻ҆ц҃ꙋ̀, сн҃ꙋ же и҆ дх҃ꙋ, наслажда́ѧсѧ ꙗ҆́снѡ ѡ҆боже́нїѧ, ми́на со є҆рмоге́номъ и҆ є҆ѵгра́фомъ, бг҃омꙋ́дрїи.

Бг҃оро́диченъ: Сїѧ́нїе блиста́нїѧ ржⷭ҇тва̀ твоегѡ̀ ѿри́нꙋвшеесѧ є҆стество̀ на́ше, всенепоро́чнаѧ, ви́дѣ, и҆ и҆зъ но́щи невѣ́дѣнїѧ и҆зба́висѧ и҆ страсте́й те́мнагѡ смꙋще́нїѧ. тѣ́мъ тѧ̀ ꙗ҆́кѡ вино́внꙋ спасе́нїѧ на́шегѡ чти́мъ.

Свѣти́ленъ.

Виті́йскими твои́ми словесы̀ и҆ бжⷭ҇твенными чꙋдесы̀, ми́но, сострада́льца привле́клъ є҆сѝ свѧще́ннаго є҆рмоге́на: съ ни́мже тѧ̀ и҆ со є҆ѵгра́фомъ ны́нѣ прера́достнѡ благохва́лимъ.

Бг҃оро́диченъ: Гора̀, ю҆́же прови́дѣ дре́вле бжⷭ҇твенный а҆ввакꙋ́мъ, присѣ́ннаѧ и҆ часта̀ ты̀ показа́ласѧ є҆сѝ, дв҃о, и҆ тѧ̀ дв҃дъ и҆менꙋ́етъ ᲂу҆сыре́ннꙋю и҆ тꙋ́чнꙋю.