Канон святым мученикам Мануилу, Савелу и Исмаилу Персянинам, Халкидонским

Пѣ́снь а҃.

І҆рмо́съ: И҆стрѧ́сшемꙋ въ мо́ри мꙋчи́тельство фараѡ́не, и҆ і҆и҃лѧ сꙋ́шею наста́вльшемꙋ пои́мъ хрⷭ҇тꙋ̀, ꙗ҆́кѡ просла́висѧ во вѣ́ки.

Пое́мъ пѣ́снь всѝ зижди́телю, и҆ вседержи́телю бг҃ꙋ, страстоте́рпцєвъ досто́йнѡ поче́тшемꙋ, сла́внаго манꙋ́ила, и҆ страда́вшыѧ съ ни́мъ, во вѣ́ки.

Ѻ҆те́ческое слꙋже́нїе ѿве́ргше ѻ҆гнепоклоне́нїе, гони́телѧ стремле́нїе возрази́ша, и҆ бы́ша страда́льцы, є҆́же въ трⷪ҇цѣ, честны́мъ и҆сповѣ́данїемъ.

Ꙗ҆́кѡ є҆диночи́слени трⷪ҇цѣ, пострада́вше є҆ѧ̀ ра́ди, достолѣ́пнѡ вѣнча́стесѧ мꙋ́чєницы: моли́тесѧ ᲂу҆̀бо непреста́ннѡ, и҆зба́вити всѣ́хъ на́съ ѿ бѣ́дъ.

Бг҃оро́диченъ: Є҆́же ѿ дв҃ы рождество̀ вы́ше є҆стества̀, рожде́йсѧ ᲂу҆таѝ кнѧ́зѧ тьмы̀, ꙗ҆́коже пи́шетъ, и҆ ѿве́рзе є҆де́мъ, бцⷣꙋ ю҆̀ и҆сповѣ́дающымъ.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.

Нѣ́сть, ст҃і́и, по достоѧ́нїю восхвали́ти свѧще́нное ва́ше страда́нїе, и҆́мже ᲂу҆вѧзо́стесѧ нб҃оплете́нными вѣнцы̑, бг҃ꙋ и҆зба́вителю на́шемꙋ молѧ́щесѧ спасти́сѧ на́мъ.

Ѻ҆гне́мъ ѡ҆палѧ́еми, неѡскꙋдѣва́еми ᲂу҆мо́мъ, ра́нами ѡ҆ко́вани, болѣ́зньми и҆з̾ѡщре́ни, нб҃окова́ннїи мечѝ бы́сте мꙋ́чєницы на нечести̑выѧ врагѝ.

Посрами́сѧ томи́тель, паде́нїемъ ᲂу҆жа́снымъ па́дсѧ ѿстꙋ́пникъ и҆ беззако́нникъ, хрⷭ҇тꙋ̀ ᲂу҆крѣ́пльшꙋ мꙋ́чєникъ тро́ицꙋ, до́блѣ ѡ҆полчи́тисѧ на нече́стїе є҆гѡ̀.

Бг҃оро́диченъ: Самꙋ́ю тебѣ̀ приво́димъ ро́ждшꙋю тѧ̀ пло́тїю, на мольбꙋ̀ держа́вѣ твое́й, хрⷭ҇тѐ бж҃е на́шъ, и҆ мꙋ́ченикѡвъ собо́ры: тѣ́хъ мольба́ми ᲂу҆мирѝ мі́ръ тво́й.

Сѣда́ленъ, гла́съ а҃.

Ꙗ҆́кѡ трисвѣ́тлаѧ свѣща̀, ѻ҆гне́мъ трⷪ҇ческимъ вже́гшесѧ, пе́рсѡвъ ѻ҆гню̀ слꙋжа́щихъ тьмꙋ̀ попали́сте, и҆ хрⷭ҇та̀ со дерзнове́нїемъ проповѣ́дасте, возсїѧ́вшаго ѿ неискꙋсомꙋ́жныѧ дв҃ы: и҆ бл҃же́ннꙋю прїѧ́сте кончи́нꙋ, тричи́сленнїи мꙋ́чєницы.

Бг҃оро́диченъ: Наста́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ преблага́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе жили́ще.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ, пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ, бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Ѿ ко́рене волше́бна, тро́ица бл҃гослове́ннаѧ, ѻ҆тца̀ неблагочести́ва, ма́тере же благоче́ствꙋющїѧ, мꙋ́чєникъ прозѧбѐ бра́тїѧ, возрасти́вшїи плоды̀ благоче́стїѧ.

Ѕвѣ́зды нелє́стны бы́сте вѣ́ры, ꙗ҆́кѡ со́лнце, ꙗ҆́вѣ возсїѧ́вше мі́рꙋ трисїѧ́ннаѧ тро́ица, свѣтоно́сный манꙋ́илъ, саве́лъ со і҆сма́иломъ.

Моли́тесѧ трїѐ ꙗ҆́коже є҆ди́нъ трⷪ҇цѣ, да́ти ѡ҆чище́нїе и҆ ѡ҆ставле́нїе согрѣше́нїй, творѧ́щымъ вѣ́рою и҆́стинною, ст҃і́и мꙋ́чєницы, па́мѧть ва́шꙋ.

Бг҃оро́диченъ: Пала́та красна̀ всѣ́хъ цр҃ѧ̀ показа́сѧ вои́стиннꙋ, и҆ прⷭ҇то́лъ вы́шнѧгѡ, и҆ вы́шши тва́ри, бг҃ома́ти, и҆ предста́тельница дꙋ́шъ на́шихъ.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Достодо́лжнѡ всѝ мꙋ́ченикѡвъ соверша́емъ па́мѧть: си́хъ бо кро́вїю ве́сь ѡ҆ст҃и́сѧ мїрскі́й воздꙋ́хъ.

Нощеборю́щꙋю дре́вле вѣ́рныхъ цр҃ковь, мꙋ́чєницы сїю̀ просвѣти́ша заре́ю пра́выѧ и҆́хъ вѣ́ры.

А҆враа́мѡва нѣ̑дра мꙋ́ченичєскїѧ дꙋ́шы прїѧ́ша, и҆́миже ꙗ҆́коже ѻ҆́бразъ напи́санъ вы́шнее црⷭ҇тво проповѣ́даетсѧ.

Бг҃оро́диченъ: Ꙗ҆́же ѿ трⷪ҇цы є҆ди́наго воплоще́нна ро́ждши бг҃а вои́стиннꙋ, бг҃ома́ти, молѝ бѣ́дъ и҆зба́вити рабы̑ твоѧ̑.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ, бж҃е на́шъ.

И҆збѣго́ша скве́рны мы́сленныѧ ст҃і́и мꙋ́чєницы, спа́сшесѧ безъ волне́нїѧ, ѡ҆кормле́нїемъ крⷭ҇та̀ наставлѧ́еми.

Кро́ви ва́шѧ зи́нꙋвши землѧ̀ покры̀, ст҃і́и, и҆ внеза́пꙋ мо́щы въ до́льнихъ сокро́вищахъ сокровє́ны бы́ша.

Оу҆мирѝ мі́ръ, бж҃е, и҆ спасѝ ꙗ҆́кѡ милосе́рдъ ста́до твоѐ неврежде́нно, моли́твами сла́вныхъ стрⷭ҇тоте́рпєцъ твои́хъ.

Бг҃оро́диченъ: Безъ сѣ́мене заче́нши бг҃а, зижди́телѧ є҆стества̀ нетлѣ́ннѡ родила̀ є҆сѝ: того̀ молѝ, бг҃ома́ти, спасти́сѧ на́мъ.

Конда́къ, гла́съ в҃.

Вѣ́рою хрⷭ҇то́вою ᲂу҆ѧ́звлени, всеблаже́ннїи, и҆ сегѡ̀ вѣ́рнѡ и҆спи́вше ча́шꙋ, пє́рсскаѧ слꙋжє́нїѧ и҆ де́рзость на зе́млю низложи́сте, трⷪ҇цы равночи́сленнїи, моли̑твы творѧ́ще ѡ҆ всѣ́хъ на́съ.

І҆́косъ:

И҆́же и҆спе́рва бжⷭ҇твенною твое́ю добро́тою, і҆и҃се жизнода́вче, ѡ҆зари́ мѧ ꙗ҆́вѣ, ꙗ҆́кѡ да воспою̀ мꙋ́ченики, за тѧ̀ подви́гшыѧсѧ да́же до сме́рти, и҆ вра́жїю всю̀ крѣ́пость низложи́вшыѧ до́блѣ, и҆ і҆́дѡльскїѧ ле́сти ѿбѣ́гшыѧ, крⷭ҇тною си́лою ᲂу҆крѣплѧ́еми: мꙋ̑ки бо претерпѣ́вше, трⷪ҇ческꙋю сла́вꙋ воспрїѧ́ша, того̀ ᲂу҆̀бо ѡ҆ всѣ́хъ моли́те.

Пѣ́снь з҃.

І҆рмо́съ: Въ нача́лѣ зе́млю ѡ҆снова́вый, и҆ нб҃са̀ сло́вомъ ᲂу҆тверди́вый, бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.

Трїѐ ѿ є҆ди́нагѡ свѣ́та свѣти́льники возжжѐ хрⷭ҇то́ва свѣтоно́снаѧ цр҃ковь, вѣнцено́сца и҆ побѣдоно́сца сла́внаго манꙋ́ила и҆ страда́вшыѧ съ ни́мъ.

Халде́йское ѡ҆ста́вльше ѻ҆те́чество, волше́бныѧ ѿбѣго́ша вѣ́ры, трїѐ трⷪ҇цѣ честні́и ѻ҆рꙋ́жницы, вопїю́ще: бл҃гослове́нъ є҆сѝ во вѣ́ки, гдⷭ҇и бж҃е ѻ҆тє́цъ на́шихъ.

Трїѐ во ѻ҆гнѝ и҆̀же ѡ҆ а҆за́рїи, халде́йскїѧ и҆збѣго́ша слꙋ́жбы, и҆ трїѐ ѻ҆рꙋ́жницы и҆̀же ѿ персі́ды, пострада́вше по хрⷭ҇тѣ̀, и҆̀же ѡ҆ манꙋ́илѣ.

Бг҃оро́диченъ: Въ жена́хъ не родѝ дв҃а, то́кмѡ ты̀ є҆ди́на, дв҃о бцⷣе: ѻ҆ц҃а́ бо до́лѣ, и҆ мт҃ре горѣ̀, млⷣнцꙋ всѧ́кѡ не бѣ̀. сꙋгꙋ́бъ бо бѣ̀ хрⷭ҇то́съ.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Воздержа́нїемъ вжили́вше тѣ́ло, благоче́стїемъ ᲂу҆крѣ́пльше дꙋ́хъ, страда́льческое совокꙋпи́ша всѐ ᲂу҆держа́нїе, къ неви̑димымъ кнѧзє́мъ тьмы̀, хрⷭ҇тѡ́вы страстоте́рпцы.

Ꙗ҆́коже цвѣ́ты, вѣнцы̑ вѣнча́ема мꙋ́чєникъ хрⷭ҇то́ва цр҃ковь, невѣ́стническою ѻ҆де́ждою ѡ҆дѣ́ѧсѧ, кро́вїю ѡ҆моче́ною, ꙗ҆́кѡ ѿ нетлѣ́нїѧ ѡ҆багре́нїѧ мꙋ́чєникъ.

Ча́сти, хрⷭ҇тѐ, спаса́емыхъ, и҆ жре́бїѧ ᲂу҆лꙋчи́ти твои́хъ мꙋ́чєникъ, и҆ неѿе́млемыѧ сла́вы сподо́билъ є҆сѝ и҆сповѣ́дающихъ є҆ди́наго тѧ̀ сн҃а ѻ҆́ч҃а и҆ дв҃ы.

Бг҃оро́диченъ: Ꙗ҆́кѡ є҆ди́наго ро́ждши ѿ трⷪ҇цы, молѧ́щи не преста́й, бцⷣе: да и҆зба́вимсѧ ѿ беззако́нїй на́шихъ, и҆ сподо́бимсѧ ꙗ҆вле́нїѧ є҆гѡ̀ и҆ црⷭ҇твїѧ.

Пѣ́снь ѳ҃.

І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

Трегꙋ́бнымъ ᲂу҆́жемъ ва́съ совокꙋпѝ бл҃года́ть, манꙋ́иле, саве́ле и҆ і҆сма́иле, незы́блемою вѣ́рою собра́вши, є҆диномꙋ́дренный нра́въ, и҆́же по хрⷭ҇тѣ̀ и҆сповѣ́данїѧ ва́шегѡ.

І҆ꙋлїа́на смра́днаго и҆ ѿстꙋ́пника, льсти́ваго мꙋчи́телѧ, треплете́нною пра́щею побѣди́сте, трⷪ҇цы ѻ҆рꙋ́жницы трїѐ ᲂу҆вѧзо́стесѧ вѣнцы̑ вкꙋ́пѣ.

Достопа́мѧтное чꙋ́до мꙋ́чєникъ, по кончи́нѣ бо зїѧ́нїемъ землѧ̀ покры́вши, пома́лѣ ꙗ҆́кѡ свѣтолꙋ̑чны ѕвѣ́зды, ѿ земны́хъ нѣ́дръ ѡ҆блиста́ша.

Бг҃оро́диченъ: Ꙗ҆́же ѿ твоє́ю бокꙋ̀ ро́ждшаѧ несказа́ннымъ сло́вомъ, є҆́же ѿ безнача́льна ѻ҆ц҃а̀ пресꙋ́щное сло́во, бг҃ома́ти и҆ въ мт҃рехъ дв҃а, спаса́й дꙋ́шы воспѣва́ющихъ тѧ̀.

Свѣти́ленъ.

Чꙋ́днаѧ и҆ треплете́ннаѧ во плени́цахъ златы́хъ, мꙋ́чєникъ наста̀ всесвѧще́ннаѧ па́мѧть вели́кагѡ вои́стиннꙋ манꙋ́ила и҆ саве́ла, и҆ і҆сма́ила, пресла́вныхъ, и҆ всѣ́хъ вѣ́рныхъ сердца̀ ѡ҆зарѧ́етъ свѣ́томъ, и҆ дꙋ́шы весели́тъ.

Бг҃оро́диченъ: Ꙗ҆́кѡ и҆мꙋ́щи милосе́рдїе и҆ ми́лость вели́кꙋ, при́зри, всепѣ́таѧ бцⷣе дв҃о, на моѐ смире́нїе, и҆ страсте́й молвꙋ̀ и҆ собла́знъ житїѧ̀ разорѝ, ѻ҆трокови́це, и҆ ѻ҆гнѧ̀ гее́нскагѡ и҆зба́ви мѧ̀ твои́ми моли́твами.