Канон святым мученикам Кирику и Иулитте Тарсийским

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Проповѣ́давше сло́ва, ѿ ѻ҆ц҃а̀ ꙗ҆́вѣ рожде́на, воплоще́на же ѿ мт҃ре, свидѣ́тели сегѡ̀ страсте́й, страстьмѝ и҆ сме́ртїю бы́сте.

Сла́внаѧ мч҃ница, ꙗ҆́кѡ свѣтоза́рнаѧ лꙋна̀, совокꙋ́пльшисѧ съ со́лнцемъ, и҆зъ неѧ̀ рожде́ннымъ ки́рѷкомъ, всю̀ тва́рь чꙋде́сными зарѧ́ми просвѣща́ютъ.

Текꙋ́щими и҆змѣни́ла є҆сѝ, ꙗ҆̀же ника́коже дви̑жима, мꙋ́ченице, и҆ на рꙋка́хъ твоего̀ сы́на носѧ́щи, съ си́мъ беззако́нныхъ и҆ дїа́волю ле́сть ѡ҆мрачи́ла є҆сѝ.

Сꙋ́щи ѿ ро́да сла́вна, мꙋче́нїемъ же и҆ страда̑нїи многови́дными, мꙋ́ченице і҆ꙋлі́тто, цр҃ѧ̀ безсме́ртнагѡ дщѝ была̀ є҆сѝ.

Бг҃оро́диченъ: Оу҆праздни́сѧ сме́рть тебє̀ ра́ди, и҆ а҆́дово жа́ло потреби́сѧ, мт҃и чⷭ҇таѧ: ты́ бо безсме́ртнаго влⷣкꙋ, ᲂу҆мерщвле́на пло́тїю, родила̀ є҆сѝ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе є҆ди́не чл҃вѣколю́бче.

Нбⷭ҇ныхъ черто́гѡвъ, и҆ свѣтоза́рнагѡ поко́ѧ, вѣ́чнꙋющїѧ же сла́вы сподо́бистесѧ, мꙋ́ченицы сла́внїи, дїа́волѧ жа̑ла болѣ́зньми страда́нїѧ потре́бльше.

Птене́цъ ꙗ҆́кѡ красе́нъ, голꙋби́цѣ цѣломꙋ́дреннѣй се́й подо́билсѧ є҆сѝ, льсти́вомꙋ проти́вѧсѧ, сла́вне ки́рѷче, льсти́внѡ пристꙋ́пльшꙋ, и҆ ᲂу҆кра́сти тща́щꙋсѧ тѧ̀ непобѣди́маго.

Го́рдаго ѕмі́ѧ, на не́бо положи́вша ᲂу҆ста̀, и҆ зе́млю потреби́ти хва́лѧщагосѧ, младе́нецъ неѕло́бивъ крⷭ҇тнымъ всеѻрꙋ́жїемъ до конца̀ низложѝ и҆ потребѝ.

Бг҃оро́диченъ: Не и҆стощи́въ нѣ́дръ ѻ҆ч҃ескихъ, пречⷭ҇таѧ, сло́во всѧ̑ ѡ҆сꙋществова́вшее, во твою̀, пренепоро́чнаѧ, ᲂу҆тро́бꙋ всели́сѧ, и҆ пло́ть непремѣ́нна бы́сть, и҆ человѣ́ки ѡ҆божѝ пресꙋ́щественный.

Сѣда́ленъ, гла́съ д҃:

Тезоиме́ннѡ, страда́льче, проповѣ́дникъ ꙗ҆ви́лсѧ є҆сѝ и҆́стиненъ, пострада́въ съ ма́терїю, ки́рѷче сла́вне хрⷭ҇то́въ, благоче́стїѧ тече́нїе сконча́въ, и҆ бы́лъ є҆сѝ на́мъ мꙋ́жество вѣ́ры, попра́въ вра́жїю всю̀ си́лꙋ, и҆ съ нб҃сѐ прїѧ́лъ є҆сѝ вѣне́цъ, съ ма́терїю твое́ю, сла́вне, хрⷭ҇та̀ моли́те, спасти́сѧ всѣ̑мъ творѧ́щымъ па́мѧть ва́шꙋ.

Бг҃оро́диченъ: Треволнє́нїи страстны́ми безсо́вѣстный а҆́зъ ѡ҆бꙋрева́емь, чⷭ҇таѧ, призыва́ю тѧ̀ те́плѣ: да не пре́зриши менѐ ѻ҆каѧ́ннаго поги́бнꙋти, бе́зднꙋ милосе́рдїѧ ро́ждши, ра́звѣ бо тебє̀, наде́жды не и҆́мамъ. да не врагѡ́мъ ᲂу҆́бѡ ѡ҆бра́дованїе и҆ смѣ́хъ, надѣ́ѧвсѧ на тѧ̀, ꙗ҆влю́сѧ: и҆́бо мо́жеши, є҆ли́кѡ хо́щеши, ꙗ҆́кѡ мт҃и сꙋ́щи всѣ́хъ бг҃а.

Крⷭ҇тобг҃оро́диченъ: Дв҃а и҆ а҆́гница ви́дѣвши на крⷭ҇тѣ̀, безъ сѣ́мене и҆зъ неѧ̀ а҆́гнца ро́ждшагосѧ, и҆ копїе́мъ прободе́на, печа́ли ᲂу҆ѧ́звена стрѣла́ми, вопїѧ́ше болѣ́зненнѡ восклица́ющи: что̀ но́вое та́инство; ка́кѡ ᲂу҆мира́еши, и҆́же живота̀ є҆ди́нъ гдⷭ҇ь; тѣ́мже воскреснѝ, па́дшаго воздвиза́ѧ пра́ѻтца.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Младе́нствꙋѧ тѣ́ломъ, и҆ соверше́ннымъ, мꙋ́чениче, ᲂу҆мо́мъ, ѕлонача́льнаго низложи́лъ є҆сѝ, лꙋка́вство ѕлосотво́ршаго.

Ꙗ҆́кѡ плодови́та лоза̀, мꙋ́ченице і҆ꙋлі́тто, гро́здъ и҆зрасти́ла є҆сѝ, до́блѧго вои́стиннꙋ ки́рѷка, мꙋче́нїѧ сла́дость и҆ска́пающа.

Ми́лостивнѡ взира́ющи, ꙗ҆́коже а҆́гница на а҆́гнца мꙋ́ченика, і҆ꙋлі́тта досточꙋ́днаѧ, закала́ема ᲂу҆се́рднѡ.

Бг҃оро́диченъ: Зако́ны є҆стества̀, пречⷭ҇таѧ, па́че є҆стества̀ въ ржⷭ҇твѣ̀ твое́мъ, и҆змѣнѧ́ютсѧ: содѣ́телѧ бо па́че ᲂу҆ма̀ и҆ сло́ва породила̀ є҆сѝ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннагѡ, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Терза́емꙋ, бг҃омꙋ́драѧ, ра́нами тѣ́лꙋ твоемꙋ̀, и҆ раздроблѧ́емꙋ, тлѣ́нїѧ дебельство̀ совлекла̀ є҆сѝ: во ѻ҆де́ждꙋ же ѡ҆блекла́сѧ є҆сѝ, ю҆́же ѿ дв҃ы є҆диноро́дный пло́ть поне́съ, человѣ́ки ѡ҆божи́въ ѡ҆блечѐ.

Ѡ҆бнажи́ласѧ є҆сѝ тѣ́ломъ, мꙋ́ченице всесла́внаѧ, преѡби́дѣвши плотскі́й стꙋ́дъ: и҆ врага̀, є҆́ѵꙋ ѡ҆бнажи́вшагѡ, і҆ꙋлі́тто, дре́вле, терпѣли́внѡ вмꙋжи́вшисѧ, въ вѣ́чный стꙋ́дъ ѡ҆дѣ́ѧла є҆сѝ.

Во главꙋ̀ ᲂу҆сѣ́чена бы́вши, главꙋ̀ ѕмі́ѧ, мꙋ́ченице, сокрꙋши́ла є҆сѝ: лише́на бы́вши бога́тства, нбⷭ҇ное бога́тство наслѣ́довала є҆сѝ, недви́жимое прїи́мши црⷭ҇тво со всѣ́ми мꙋ́чєники, прехва́льнаѧ.

Бг҃оро́диченъ: Бж҃їе бг҃ъ сло́во пло́ть прїѧ́тъ, мы́сленнꙋ и҆ ѡ҆дꙋшевле́нꙋ, ѿ тебє̀, пречⷭ҇таѧ: и҆ за милосе́рдїе бы́сть чл҃вѣ́къ, и҆ ѡ҆божи́ мѧ, престꙋпле́нїемъ ѿринове́на. є҆го́же молѝ спастѝ всѧ́чєскаѧ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Преплы́вше безмѣ́рныхъ мꙋ́къ, прехва́льнїи, непостоѧ́ннꙋю во́дꙋ, кре́стнымъ ѡ҆кормле́нїемъ, и҆ ко приста́нищꙋ ти́хомꙋ ꙗ҆́вѣ доидо́ша, погрꙋзи́вше фараѡ́на неви́димаго кро́вными стрꙋѧ́ми.

И҆гра́етъ і҆коні́йскїй гра́дъ тебѐ воспита́вый, и҆ краси́тсѧ па́мѧтїю твое́ю честно́ю та́рсъ, і҆ꙋлі́тто: мꙋче́нїе бо въ то́мъ сконча́ла є҆сѝ съ сы́номъ твои́мъ, и҆ вѣнцє́въ побѣ́ды сподо́биласѧ є҆сѝ.

Презрѣ́ла є҆сѝ многоплетє́нныѧ мꙋ̑ки, и҆ го́рлица прекра́снаѧ ꙗ҆ви́ласѧ є҆сѝ, со птенце́мъ возлетѣ́вши, и҆ надъ всѣ́ми возвы́сившисѧ сѣтьмѝ ѕмі́ѧ, всехва́льнаѧ, и҆ во ѻ҆би́телехъ нбⷭ҇ныхъ премꙋ́дрѡ почи́ла є҆сѝ.

Бг҃оро́диченъ: Кореносѣка́тельнымъ серпо́мъ твоеѧ̀ моли́твы посѣцы̀, ѻ҆трокови́це, лꙋка̑ваѧ помышлє́нїѧ дꙋшѝ моеѧ̀, и҆ плодоно́снꙋ покажѝ, молю́сѧ: всѣ́хъ бо содѣ́телѧ бг҃а и҆ сп҃са родила̀ є҆сѝ.

Конда́къ, гла́съ д҃.

Во ѡ҆б̾ѧ́тїѧхъ носѧ́щи хрⷭ҇томꙋ́ченица і҆ꙋлі́тта ки́рѷка, на по́двизѣ мꙋ́жески веселѧ́щисѧ, взыва́ше: хрⷭ҇то́съ є҆́сть мꙋ́ченикѡвъ похвала̀.

І҆́косъ:

Оу҆́мъ мо́й просвѣтѝ, хрⷭ҇тѐ, свѣ́томъ за́повѣдей твои́хъ, ꙗ҆́кѡ да возмогꙋ̀ воспѣ́ти ст҃ы̑ѧ, и҆ по́двиги и҆зрещѝ: кі́й же ѧ҆зы́къ и҆зглаго́лати возмо́жетъ страда̑нїѧ, ꙗ҆̀же претерпѣ́ша; тѣ́мъ припа́даю тебѣ̀, чл҃вѣколю́бче, ѡ҆ставле́нїе пода́ждь дꙋшѝ мое́й ѻ҆каѧ́ннѣй: да́рꙋй мѝ вре́мѧ покаѧ́нїѧ, на се́ бо во́лею воспрїѧ́лъ є҆сѝ пло́ть, да всѧ̑ на живо́тъ возведе́ши, є҆гѡ́же страда́льцы полꙋчи́вше непреста́ннѡ пою́тъ: хрⷭ҇то́съ є҆́сть мꙋ́ченикѡвъ похвала̀.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Па́лицами сокрꙋша́етъ твоѐ тѣ́ло беззако́нный, бг҃омꙋ́драѧ і҆ꙋлі́тто, по́мысла крѣ́пость ника́коже подви́же: же́злъ бо си́лы крⷭ҇тъ хрⷭ҇то́въ держа́ла є҆сѝ.

Тꙋ́чами кро́вныхъ наводне́нїй погаси́ша ѻ҆́гнь безбо́жїѧ хрⷭ҇тѡ́вы страда́льцы, зовꙋ́ще ᲂу҆се́рднѡ: бл҃гослове́нъ є҆сѝ, гдⷭ҇и бж҃е, во вѣ́ки.

Носѧ́щи на рꙋкꙋ̀, мꙋ́ченице, є҆го́же родила̀ є҆сѝ, предста́ла сꙋди́щꙋ, и҆ сꙋгꙋ́бъ до́брый сконча́ла є҆сѝ по́двигъ, вопїю́щи: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Глаго́лѡмъ твои̑мъ послѣ́дꙋюще, блажи́мъ тѧ̀ ро́ди всѝ, ѻ҆трокови́це, бл҃же́ннагѡ бг҃а мт҃рь ꙗ҆́вльшꙋюсѧ, въ него̀ вѣ́рꙋющыѧ блажє́нны содѣ́лавшагѡ.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене благода́тїю твое́ю бы́вше за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те, всѧ̑ дѣла̀ гдⷭ҇нѧ, гдⷭ҇а.

Свѣ̑тлыѧ ѕвѣ́зды, ꙗ҆̀же на тве́рди цр҃ко́внѣй неле́стнѡ водрꙋзи́вшесѧ, и҆ зе́млю чꙋдесы̀ просвѣ́щше, бл҃гоче́стнѡ чтꙋ́тсѧ ѿ всѣ́хъ дне́сь, пѣсносло́вѧщихъ хрⷭ҇та̀ во вѣ́ки.

Ꙗ҆́коже нова̀ вѣ́твь ко́рене бг҃онасажде́нна сꙋ́щи бг҃омꙋ́драѧ, честна́го твоего̀ сы́на носѧ́щи, ᲂу҆вѧди́ла є҆сѝ нече́стїѧ сады̀, вопїю́щи съ ни́мъ и҆ глаго́лющи: тѧ̀ превозно́симъ, хрⷭ҇тѐ, во вѣ́ки.

Ꙗ҆́коже тельца̀ ю҆́на ю҆́ница сꙋ́щи прекра́сна, і҆ꙋлі́тто, но́сиши ки́рѷка сла́внаго, же́ртвꙋ жи́вꙋ ѿ дв҃ы а҆́гнцꙋ возсїѧ́вшемꙋ, и҆ заколе́номꙋ за кра́йнее милосе́рдїе.

Бг҃оро́диченъ: Вопло́щсѧ сло́во ѿ пречⷭ҇тыхъ твои́хъ крове́й, ѻ҆трокови́це, прини́кшыѧ къ безсловє́снымъ плотски̑мъ страсте́мъ, позна́нїемъ бжⷭ҇твеннымъ ѡ҆божѝ, чⷭ҇таѧ: є҆го́же превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

И҆сцѣле́нїе приноша́етъ ра́ка сла́вныхъ страда́лєцъ, благода́тїю бжⷭ҇твеннагѡ дх҃а напаѧ́емаѧ: прїиди́те, почерпи́те, и҆ ѡ҆свѧти́те дꙋ́шы, и҆ ѿ недꙋ̑гъ ѡ҆чи́ститесѧ мꙋчениколю́бцы, да́телѧ до́брыхъ велича́юще.

Ꙗ҆́коже ши́покъ мч҃ническими прозѧбо́сте ᲂу҆дѡ́лїи, всеблаже́ннїи, ꙗ҆́коже крі́нъ благово́ненъ, ꙗ҆́кѡ раѧ̀ бжⷭ҇твенное прозѧбе́нїе, мѵ́рно ꙗ҆́кѡ вои́стиннꙋ и҆ска́пающе ᲂу҆краше́нїе, и҆ вѣ́рныхъ дꙋ́шы благово́нїемъ та́йнымъ веселитѐ.

Ра́нами мч҃ническими ᲂу҆краси́стесѧ, добропобѣ́днїи мꙋ́чєницы, и҆ а҆́гг҃лѡмъ ꙗ҆́вѣ ᲂу҆подо́бльшесѧ, бг҃ꙋ предстоитѐ, побѣ́днымъ вѣнце́мъ свѣ́тлѡ ѡ҆бложе́ни, и҆ чтꙋ́щымъ ва́съ ѡ҆чище́нїе грѣхѡ́въ просѧ́ще.

Мч҃ница ꙗ҆́коже а҆́гница, ꙗ҆́кѡ а҆́гнца сы́на своего̀ носѧ́щи, посредѣ̀ волкѡ́въ невре́днѡ про́йде, и҆ въ небе́снꙋю ѡ҆гра́дꙋ всели́сѧ: при́снѡ си́хъ моли́твами, гдⷭ҇и, спаси́ ны, тѣ́хъ свѧще́ннꙋю па́мѧть чтꙋ́щыѧ.

Бг҃оро́диченъ: Просвѣтѝ, две́ре свѣ́та, ѡ҆слѣпле́ннꙋю дꙋ́шꙋ мою̀ страстьмѝ и҆ ѕлы́ми пѡ́мыслы ѡ҆мраче́ннꙋю, и҆ бѣ́дствꙋющꙋю, и҆ и҆зми́ мѧ ѿ напа́стей, и҆ бѣ́дъ, и҆ скорбе́й: да сла́влю тѧ̀, ᲂу҆пова́нїе вѣ́рныхъ и҆ ᲂу҆твержде́нїе.

Свѣти́ленъ:

Ра́дꙋйсѧ, красꙋ́йсѧ и҆ ликꙋ́й, свѣ́тлѡ торжествꙋ́ѧ, і҆коні́йскїй гра́де, ꙗ҆́кѡ и҆зъ тебє̀ возсїѧ́ша два̀ свѣти̑льника премꙋ̑дра, і҆ꙋлі́тта сла́внаѧ и҆ бг҃омꙋ́дрый ки́рѷкъ, зако́ннѡ бо пострада́вше, вѣне́цъ прїѧ́ша сла́вы.

Бг҃оро́диченъ: Мт҃рь и҆ дв҃ꙋ тѧ̀ пое́мъ, всенепоро́чнаѧ: ты́ бо бг҃а всѣ́хъ во чре́вѣ носи́ла є҆сѝ. є҆гѡ́же совокꙋпле́нїе проповѣ́дающе, непрело́жнѡ по ѵ҆поста́си, тѧ̀ бцⷣꙋ влⷣчцꙋ и҆сповѣ́даемъ вои́стиннꙋ, и҆̀же тебє̀ ра́ди спаса́емїи.