Канон святым мученикам Евстратию, Авксентию, Евгению, Мардарию и Оресту Севастийским (первый канон)

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.

Раздава́ѧй на нб҃сѣ́хъ да́ры, сꙋ́щымъ на землѝ страда́льцємъ, подвигополо́жникъ сѣди́тъ хрⷭ҇то́съ десни́цею вседержи́тельною, є҆ѵстра́тїа сꙋ́щымъ ѻ҆бою́дꙋ, бжⷭ҇твєнныѧ вѣнцы̀ простира́ѧ.

Ли́къ мч҃ническїй пѧточи́сленъ, прїиди́те ви́димъ, пресвѣ́тлымъ блиста́ющїйсѧ свѣ́томъ, и҆мѣ́ѧй чинонача́льника возжелѣ́ннаго є҆ѵстра́тїа, бл҃года́тїю бж҃е́ственною вѣнча́ема.

По́ѧсъ земна́гѡ во́инства ѿрѣши́вый, и҆́стинномꙋ привно́сиши цр҃ю̀, страда́нїѧ зна́менїе ѿ хрⷭ҇та̀, є҆ѵстра́тїе, чрезъ а҆ѵѯе́нтїа прїе́мъ.

Бг҃оро́диченъ: Село̀ вмѣсти́тельно была̀ є҆сѝ бжⷭ҇твеннагѡ є҆стества̀, бг҃ороди́тельнице чⷭ҇таѧ. тѣ́мъ тѧ̀ лꙋкі́а возжела́вши, дѣ́вственнѡ въ слѣ́дъ тебє̀ твоемꙋ̀ сн҃ꙋ приведе́сѧ.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.

Наде́ждею мꙋче́нїй, ꙗ҆́коже невеще́ственнагѡ сокро́вища, преесте́ственнѡ бы́лъ є҆сѝ и҆спо́лненъ всѧ́кїѧ ра́дости, всеблаже́нне є҆ѵстра́тїе.

Мꙋ́дростїю дх҃о́вною, терпѣ́нїемъ же напа́стей, ѡ҆бличи́лъ є҆сѝ, мч҃ниче хрⷭ҇то́въ а҆ѵѯе́нтїе, мꙋчи́тельское безбо́жїе.

Ꙗ҆́коже красота̀ пресвѣ́тлаѧ, цр҃кве вѣ́рныхъ мч҃ницы, хрⷭ҇то́выми ꙗ҆́звами, ꙗ҆́кѡ цвѣ̑ты, ѡ҆бложе́ни бы́сте.

Бг҃оро́диченъ: Госпо́дственнѡ и҆ и҆́стиннѡ тѧ̀ бцⷣꙋ вѣ́рнїи чти́мъ: ты́ бо бг҃а родила̀ є҆сѝ, пло́ть бы́вша, всенепоро́чнаѧ.

Конда́къ, гла́съ в҃.

Свѣти́льникъ ꙗ҆ви́лсѧ є҆сѝ свѣтлѣ́йшїй во тмѣ̀ невѣ́дѣнїѧ сѣдѧ́щымъ, страстоте́рпче: вѣ́рою бо, ꙗ҆́кѡ копїе́мъ, ѡ҆бложи́всѧ, врагѡ́въ шата́нїѧ не ᲂу҆боѧ́лсѧ є҆сѝ, є҆ѵстра́тїе, ри́торѡвъ сы́й благоѧзы́чнѣйшїй.

Сѣда́ленъ, гла́съ и҃.

Ни ме́чь, ни ѕвѣ́рїе, ни ѻ҆́гнь, нижѐ и҆́но что̀ страша́щихъ чꙋ́вственныхъ, ѿню́дъ ᲂу҆страши́ти твою̀ тве́рдость возмого́ша: вра́жїю бо попра́въ тече́нїемъ си́лꙋ, ꙗ҆́кѡ безстра́стенъ преминꙋ́лъ є҆сѝ житїѐ и҆ безпло́тенъ. тѣ́мже вѣ̑рнымъ и҆сцѣлє́нїѧ подава́еши, любо́вїю притека́ющымъ въ па́мѧть твою̀, свѧ́те страстоте́рпче є҆ѵстра́тїе. молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть твою̀.

Бг҃оро́диченъ: Є҆гда̀ прїи́детъ сꙋди́ти все́й землѝ всѣ́хъ влⷣка и҆ творе́цъ, ѻ҆вца́мъ мѧ̀ причтѝ десны́мъ ѡ҆сꙋжде́ннаго, и҆ кромѣ́шнїѧ тмы̀, и҆ всѧ́кагѡ мꙋче́нїѧ, твоего̀ непотре́бнаго. раба̀ и҆схитѝ, молю́сѧ: да благода́рнѡ велича́ю бога́тство твоеѧ̀ бл҃гости, бцⷣе всенепоро́чнаѧ, и҆ вопїю́ ти ра́дꙋѧсѧ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти, тѧ́ бо и҆́мамъ наде́ждꙋ ра́бъ тво́й.

Пѣ́снь д҃.

І҆рмо́съ: Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ. чл҃вѣколю́бче, крѣ́пость моѧ̀ и҆ хвале́нїе.

Ѿложи́лъ є҆сѝ съ ꙗ҆́звами пло́ти твоеѧ̀ дꙋше́вныѧ сквє́рны: стрѣ́лы сокрꙋши́лъ є҆сѝ лꙋка́вагѡ ѕмі́ѧ вѣ́рою, є҆ѵстра́тїе.

Просла́висѧ твои́ми ра́нами, страстоте́рпче, цр҃ь сла́вы и҆ неизрече́нныѧ тѧ̀ сла́вы си́лою и҆спо́лни чꙋде́съ, є҆ѵстра́тїе.

Ры́барскомꙋ поревнова́въ дерзнове́нїю, мꙋ́ченическою мре́жею влⷣцѣ приво́диши мꙋ́драго є҆ѵге́нїа, ᲂу҆лови́въ, є҆ѵстра́тїе.

Бг҃оро́диченъ: Всенепоро́чнаѧ, и҆ є҆ди́на ст҃ѣ́йшаѧ херꙋві́мѡвъ ꙗ҆́вльшисѧ, дꙋ́шы на́шѧ спасѝ ѿ всѧ́кагѡ ѡ҆бстоѧ́нїѧ, вѣ́рою пою́щихъ тѧ̀.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Ты̀, ꙗ҆́коже ѕвѣзда̀ свѣтоно́снаѧ, возсїѧ́лъ є҆сѝ въ полцѣ̀ мꙋ́чєникъ далечесїѧ́тельнѡ, непобѣди́мый є҆ѵстра́тїе.

Ѽ жре́бїѧ блага́гѡ! ѽ ча́сти бг҃ода́нныѧ! ѽ жены̀ добрѣ́йшїѧ! совѣ́томъ побѣди́вшїѧ ле́сть прама́тернюю.

Ты̀ всѧ̑ кра̑снаѧ вмѣни́лъ є҆сѝ, ꙗ҆́кѡ ᲂу҆ме́ты, марда́рїе, побѣди́въ є҆стества̀ зако́ны любо́вїю страда́нїѧ.

Бг҃оро́диченъ: Оу҆́мъ зе́мленъ твоегѡ̀ па́че ᲂу҆ма̀ зача́тїѧ не мо́жетъ разꙋмѣ́ти, дв҃о мт҃и, ѻ҆трокови́це: бг҃а бо родила̀ є҆сѝ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Хрⷭ҇то́съ мнѣ̀ вмѣ́стѡ всѣ́хъ є҆́сть, марда́рїй велегла́снѡ вопїѧ́ше, и҆ ѻ҆те́чество и҆ че́сть и҆ и҆́мѧ: ѿ тебє́ бо семꙋ̀ наꙋчи́хсѧ, є҆ѵстра́тїе.

Ѧ҆зы́къ ѿрѣ́занъ пѣ́сней непрестае́тъ, ѿсѣ́чєнныѧ же твоѧ̑ рꙋ́ки къ бг҃ꙋ, є҆ѵге́нїе, возвыша́хꙋсѧ, спасе́нїѧ просѧ́ще пою́щымъ па́мѧть твою̀.

Нога́мъ провертѣ̑ннымъ повѣ́шенъ бы́сть стремгла́въ, разжже́нными же рожны̀ пали́мь по плеще́мъ, дꙋ́хъ влⷣцѣ пре́далъ є҆сѝ, марда́рїе.

Бг҃оро́диченъ: Крѣ́пость тѧ̀ ѡ҆брѣ́тши, дв҃о, и҆ тве́рдь страстоте́рпица, ра̑ны до́блественнѣ терпи́тъ, и҆ ра́дꙋющисѧ въ слѣ́дъ тебє̀ всѣ́хъ влⷣчцѣ приво́дитсѧ.

Конда́къ, гла́съ г҃.

Виті́йствꙋѧ предъ беззако́ннꙋющими бжⷭ҇твєннаѧ, бїє́нїѧ претерпѣ́лъ є҆сѝ мꙋ́жественнѣйшимъ се́рдцемъ, ѡ҆блиста́лъ є҆сѝ бг҃озна́меньми, пречꙋ́дне, ᲂу҆гаси́лъ є҆сѝ возвы́шенный пре́лести пла́мень: сегѡ̀ ра́ди тѧ̀ чествꙋ́емъ, всеблаже́нне мꙋ́чениче хрⷭ҇то́въ є҆ѵстра́тїе.

І҆́косъ:

Свѧще́нный соверша́етъ цр҃ковь дне́сь пра́здникъ та́инственнѡ, свѣ́тлѡ проповѣ́дающи твоѧ̑ до́блєсти, болѣ̑зни и҆ трꙋды̀, ꙗ҆̀же па́че є҆стества̀ бжⷭ҇твєннаѧ борє́нїѧ, ꙗ҆̀же всю́дꙋ ра̑ны: и҆́миже низложѝ многоко́зненнаго, сла́ва страда́льцєвъ ве́лїѧ и҆ хвала̀, мꙋ́жества сто́лпъ, свѣти́льникъ всѣ́хъ тѧ̀ чтꙋ́щихъ благоче́стнѡ, врачева́нїй сокро́вище, богати́телю ни́щихъ, первопобѣ́дниче честны́хъ мꙋ́ченикѡвъ, всебл҃же́нне мꙋ́чениче хрⷭ҇то́въ є҆ѵстра́тїе.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Непрело́жно и҆сповѣ́данїѧ мꙋдрова́нїе и҆мѣ́ѧ, въ трⷪ҇цѣ чествова́ти є҆ди́наго бг҃а, мꙋ̑ки преѡби́дѣлъ є҆сѝ, зовѧ́й: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ꙗ҆́кѡ бл҃же́нъ въ непоро́чномъ пꙋтѝ ходи́лъ є҆сѝ, колѣ̑ни бл҃горазꙋ́мнѡ преклони́лъ є҆сѝ и҆зба́вителю, дꙋ́шꙋ же преда́въ влⷣцѣ въ рꙋ́ки, ꙗ҆́кѡ бл҃гово́ннѣйшꙋ же́ртвꙋ, а҆ѵѯе́нтїе.

И҆́же вра́номъ и҆лїѝ пи́щꙋ подава́ѧй бг҃ъ, то́й и҆ ѡ҆ честнѣ́й твое́й главѣ̀ чꙋдотворѧ̀, жела́ющымъ ѿкры̀, ꙗ҆́кѡ многожела́нное чрежде́нїе мі́рꙋ, а҆ѵѯе́нтїе.

Бг҃оро́диченъ: Дв҃о мт҃и, ꙗ҆́кѡ чи́стꙋ тѧ̀ и҆ нетлѣ́ннꙋ сло́во чи́стое возлюбѝ, и҆ и҆зъ тебє̀ вопло́щсѧ возсозда̀ всего̀ человѣ́ка, и҆́же лꙋкі́ю просла́вивый чꙋдесы̀.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Оу҆стна̀ разве́рзъ чи́стѡ, бжⷭ҇твенный привле́клъ є҆сѝ дх҃ъ, є҆ѵстра́тїе: и҆ дꙋшетлѣ́нныхъ ᲂу҆́бѡ ѡ҆бличи́лъ є҆сѝ слꙋже́нїй не́мощь, въ трⷪ҇цѣ же бг҃а чествова́ти взыва́лъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.

Мꙋ́дрыми наказа̑нїи твои́ми ᲂу҆крѣпи́въ смы́слъ, мꙋ́чениче є҆ѵстра́тїе, на ѻ҆дрѣ̀ желѣ́знѣмъ просте́ртъ бы́въ непобѣди́мый ѻ҆ре́стъ, вопїѧ́ше разори́телємъ пла́мене, дѣ́тємъ подо́бѧсѧ: благослови́те, всѧ̑ дѣла̀ гдⷭ҇нѧ, гдⷭ҇а.

Просте́ръ тѣ́ло терпѣли́внѡ, ѻ҆ре́сте сла́вне, ты̀ на ѻ҆дрѣ̀ разжже́ннѣмъ сопричта́лсѧ є҆сѝ ᲂу҆́бѡ мꙋ́ченикѡвъ въ гдⷭ҇ѣ ра́дꙋѧсѧ, воспочи́лъ же є҆сѝ въ ски́нїѧхъ нбⷭ҇ныхъ, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Ꙗ҆ви́ласѧ є҆сѝ превы́шши нб҃съ, бг҃а нбⷭ҇наго поро́ждши, ѡ҆небеси́вшаго, всечⷭ҇таѧ, земноро́дныхъ всѐ смѣше́нїе, и҆ лꙋкі́и честны́ѧ па́мѧть ᲂу҆ѧсни́вшаго, є҆мꙋ́же вопїе́мъ всегда̀: благослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Бжⷭ҇твенныхъ причасти́тисѧ та̑инъ возжелѣ́въ, страстоте́рпче, и҆ бг҃оѧвле́нїѧ свѣтоза́рнагѡ сподо́битисѧ, блаже́нне є҆ѵстра́тїе, къ зовꙋ́щемꙋ тѧ̀ на нб҃са̀, жела́емомꙋ прибли́жилсѧ є҆сѝ хрⷭ҇тꙋ̀.

Ѕѣлѡ̀ веселѧ́сѧ страстоте́рпче, ра́достномꙋ ѡ҆сꙋжде́нїю мꙋчи́тельскагѡ пребезꙋ́мїѧ, подвигополо́жника твоего̀ велича́лъ є҆сѝ, пѣсносло́вѧ, є҆ѵстра́тїе, сме́рти разори́телѧ хрⷭ҇та̀.

Прїиди́те мꙋчениколю́бцы всѝ, пре́лести потреби́телѧ свѧще́нными є҆ѵге́нїа пѣ́сньми, мꙋ́драго ѻ҆ре́ста же и҆ марда́рїа, и҆ съ ни́ми а҆ѵѯе́нтїа со є҆ѵстра́тїемъ возвели́чимъ.

Бг҃оро́диченъ: Свѣ́тъ на́мъ возсїѧ̀ и҆зъ ложе́снъ неискꙋсомꙋ́жныхъ твои́хъ, дв҃о, є҆гѡ́же свѣтосїѧ̑нїи бжⷭ҇твеннѡ ѡ҆зари́вшисѧ, свѣ́тъ же бы́сть чꙋ́днаѧ лꙋкі́а, бг҃ороди́тельнице дв҃о мт҃и.

Свѣти́ленъ.

Соверши́лъ є҆сѝ чꙋ́дное страда́нїѧ тече́нїе, є҆ѵстра́тїе блаже́нне, и҆ приве́дъ кꙋ́пнѡ є҆ѵге́нїа честна́го, и҆ мꙋ́драго а҆ѵѯе́нтїа, марда́рїа же со ѻ҆ре́стомъ, и҆́хже вѣ́рѣ и҆ де́рзости ᲂу҆диви́шасѧ чл҃вѣ́честїи и҆ а҆́гг҃льстїи собо́ри.

Бг҃оро́диченъ: Несказа́ннагѡ ржⷭ҇тва̀ твоегѡ̀ была̀ є҆сѝ, пренепоро́чнаѧ невѣ́ста, ꙗ҆́кѡ сꙋ́щи честнѣ́йшїй хра́мъ, бцⷣе, ты́ бо превѣ́чное въ тѧ̀ все́льшеесѧ родила̀ є҆сѝ бг҃а сло́во. тѣ́мъ пою́ще ржⷭ҇тво̀ твоѐ велича́емъ, ѽ всенепоро́чнаѧ ѻ҆трокови́це.