Канон святым мученикам Даде, Максиму и Квинтилиану

Пѣ́снь а҃.

І҆рмо́съ: Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.

Бг҃ꙋ вседержи́телю со дерзнове́нїемъ добропобѣ́днїи мꙋ́чєницы предстоѧ́ще всегда̀, моли́те согрѣше́нїй ѡ҆чище́нїе посла́ти на́мъ.

Вѣнча́стесѧ, мч҃ницы, добро́тою бжⷭ҇твенною, по́двигъ сконча́вше, и҆ многоко́зненнаго врага̀ побѣди́вше. тѣ́мже ва́съ ѡ҆бра́дованнѡ пѣ́сненнѡ славосло́вимъ при́снѡ.

Крѣ́постїю дх҃а прест҃а́гѡ крѣ́пость погꙋби́сте льсти́вагѡ ѕмі́ѧ, бг҃облаже́ннїи, и҆ безсме́ртныхъ дарѡ́въ ны́нѣ наслажда́етесѧ.

Бг҃оро́диченъ: По́лный и҆стощи́сѧ за милосе́рдїе, и҆ пло́ть бы́сть, возводѧ̀, чⷭ҇таѧ, къ пе́рвой на́съ добро́тѣ, и҆̀же вѣ́рою на землѝ восхвалѧ́ющыѧ тѧ̀.

Пѣ́снь г҃.

І҆рмо́съ: Да ᲂу҆тверди́тсѧ се́рдце моѐ, въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.

Веде́нїемъ нꙋ́жднымъ, свѧті́и, за хрⷭ҇та̀ ᲂу҆́зницы бы́вше, соꙋ́зꙋ пре́лести ѕлꙋ́ю разрѣши́сте бл҃года́тїю, разрѣ́шшежесѧ ѿ пло́ти, къ жи́зни преста́вистесѧ.

Ви́дѣти бж҃їю красотꙋ̀, страда́льцы жела́юще прехва́льнїи, ра̑ны и҆ вѧза̑нїѧ, и҆ нꙋ́жднꙋю сме́рть претерпѣ́сте, тве́рдостїю ᲂу҆ма̀ красѧ́щесѧ.

Зако́ннѡ, мч҃ницы прехва́льнїи, стра́ждꙋще нра́ва крѣ́постїю, ѡ҆дѣ́ѧстесѧ вкꙋ́пѣ побѣ́днымъ вѣнце́мъ, и҆ трⷪ҇цѣ чⷭ҇тнѣ́й ра́достнѡ ны́нѣ предстоитѐ.

Бг҃оро́диченъ: И҆́же є҆стество́мъ неѡпи́санный, вопло́щсѧ и҆зъ тебє̀ ѡ҆писꙋ́етсѧ, бг҃ора́дованнаѧ чⷭ҇таѧ: є҆го́же непреста́ннѡ молѝ, ᲂу҆ще́дрити и҆ спастѝ пою́щыѧ тѧ̀.

Сла́ва: Тве́рдостїю дꙋшѝ прибли́жившесѧ болѣ́знемъ, непобѣди́ми мно́гими козньмѝ льсти́вагѡ ꙗ҆ви́стесѧ, мч҃ницы, а҆́гг҃лѡмъ равноче́стни. тѣ́мже всѧ̀ вселе́ннаѧ почита́етъ борє́нїѧ и҆ чⷭ҇тна̑ѧ ва̑ша страда̑нїѧ, и҆́миже просла́вистесѧ.

И҆ ны́нѣ: Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма́ же и҆ сло́ва, непреста́ннѡ молѝ съ вы́шними си́лами, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ тѧ̀ сла́вѧщымъ.

Крⷭ҇тобг҃оро́диченъ: Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й;

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ: разꙋмѣ́хъ дѣла̀ твоѧ̑, прⷪ҇ро́къ глаго́лаше, и҆ просла́вихъ си́лꙋ твою̀.

Зако́нъ бжⷭ҇твенный ᲂу҆твержда́юще, беззако́нїе страда́льцы безбо́жныхъ ѿри́нꙋша, бл҃гоче́стнѡ пострада́вше, и҆ гдⷭ҇еви бл҃гоꙋгоди́вше.

Оу҆блажи́мъ дне́сь да́да и҆ маѯі́ма дѡ́блїѧ, зако́ннѡ пострада́вшыѧ, и҆ хвала́ми вѣнча́емъ кїнтїлїа́на всечестна́го.

Непрело́жни, свѧті́и, во вре́мѧ страда́нїѧ бы́вше, всѧ́кꙋ ле́сть низложи́сте, и҆ побѣ́дный вѣне́цъ ѿ бг҃а сп҃са прїѧ́сте.

Бг҃оро́диченъ: Оу҆ны́нїемъ ѡ҆держи́маго, бг҃ороди́тельнице, воздви́гни мѧ̀, твори́ти бжⷭ҇твенное хотѣ́нїе, ꙗ҆́кѡ да ᲂу҆блажꙋ́ тѧ, предста́тельнице всѣ́хъ неꙋсы́пнаѧ.

Пѣ́снь є҃.

І҆рмо́съ: Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.

Бжⷭ҇твенное и҆́мѧ и҆ спаси́тельное и҆сповѣ́давше предъ мꙋчи́тели, свѧті́и, мно́гихъ мꙋ́къ и҆скꙋ́съ претерпѣ́сте, и҆ сме́рть непра́веднꙋю.

Бл҃года́тїю ᲂу҆крѣплѧ́еми бжⷭ҇твеннагѡ дх҃а, не ᲂу҆боѧ́стесѧ мꙋче́нїй тѣле́сныхъ, ни и҆стꙋка̑ннымъ че́сти пренесо́сте, добропобѣ́днїи мч҃ницы.

Вѣне́цъ неꙋвѧда́емый прїе́мше, свѧті́и мч҃ницы, трⷪ҇цѣ ны́нѣ предстоитѐ трїѐ, незаходи́момꙋ сїѧ́нїю сподо́блени, и҆ ны́нѣ ᲂу҆блажа́етесѧ.

Бг҃оро́диченъ: И҆сцѣлѝ, влⷣчце всенепоро́чнаѧ, се́рдца моегѡ̀, молю̀ тѧ̀, стра̑сти неисцѣ̑льныѧ, и҆ ᲂу҆ма̀ моегѡ̀ тмꙋ̀ тѧ́жкꙋю ѿженѝ, пречⷭ҇таѧ.

Пѣ́снь ѕ҃.

І҆рмо́съ: Ꙗ҆́кѡ і҆ѡ́нꙋ прⷪ҇ро́ка, возведѝ, хрⷭ҇тѐ бж҃е, живо́тъ мо́й ѿ тлѝ, вопїю́ ти, чл҃вѣколю́бче, ꙗ҆́кѡ жи́знь ᲂу҆ тебє̀ є҆́сть, и҆ нетлѣ́нїе и҆ си́ла.

Новоѧвле́ннѡ ꙗ҆́коже ѕвѣ́зды зри́ми, просвѣща́ете земны́й мі́ръ, всехва́льнїи мч҃ницы, помраче́нїе ѿгонѧ́ще безбо́жїѧ, бл҃года́тїю.

Законоположе́нїѧ безбо́жныхъ до конца̀ ѿри́нꙋвше, и҆ зако́номъ гдⷭ҇нимъ ꙗ҆́вѣ ᲂу҆твержда́еми, зако́ннѡ, свѧті́и мч҃ницы, за хрⷭ҇та̀ пострада́сте.

Высоча́йшими ра́зꙋмы и҆ дѣ́лы пока́зани до́брѣ, съ высоты̀ спа́дшаго подъ но́ги покори́сте, ᲂу҆кра́шеными въ добро́тахъ мꙋче́нїѧ, прехва́льнїи.

Бг҃оро́диченъ: Закѡ́нъ є҆сте́ственныхъ кромѣ̀, творца̀ є҆стествꙋ̀ воплоти́ла є҆сѝ, ѻ҆трокови́це, па́че ᲂу҆ма̀, всенепоро́чнаѧ: є҆го́же добропобѣ́днїи мч҃ницы и҆сповѣ́дающе, пострада́ша.

Пѣ́снь з҃.

І҆рмо́съ: Сꙋ́щымъ въ пещѝ ѻ҆трокѡ́мъ твои̑мъ, сп҃се, не прикоснꙋ́сѧ нижѐ стꙋжѝ ѻ҆́гнь. тогда̀ трїѐ, ꙗ҆́кѡ є҆ди́нѣми ᲂу҆сты̀, поѧ́хꙋ, и҆ бл҃гословлѧ́хꙋ, глаго́люще: бл҃гослове́нъ бг҃ъ ѻ҆тє́цъ на́шихъ.

Ѻ҆гне́мъ бжⷭ҇твеннагѡ стра́ха дꙋ́шꙋ распала́юще, всѧ́кꙋ попали́сте, мꙋ́дрїи, ве́щь го́рькꙋю многобо́жїѧ, и҆ къ сїѧ́нїю взѧ́стесѧ невече́рнемꙋ, согрѣше́нїємъ на́шымъ разрѣше́нїе подаю́ще.

Стрꙋѧ́ми крове́й ᲂу҆гаси́вше запале́нїе, бл҃же́ннїи, многобо́жїѧ вои́стиннꙋ, тꙋ́чꙋ на́мъ и҆сточа́ете чꙋде́съ, вѣ́рою притека́ющымъ къ ра́цѣ моще́й ва́шихъ всегда̀.

До́мъ ꙗ҆́вльшесѧ дх҃а, мꙋ́дрїи, добропобѣ́днїи мч҃ницы, хра́мъ, въ не́мже ны́нѣ лежитѐ, и҆сто́чникъ содѣва́етъ чꙋде́съ: въ ѻ҆́ньже прибѣга́юще, ѿ всѧ́кїѧ скве́рны страсте́й и҆збавлѧ́емсѧ.

Бг҃оро́диченъ: Воплоще́нно родила̀ є҆сѝ на́мъ, пренепоро́чнаѧ, сло́во, є҆диносꙋ́щно ѻ҆ц҃ꙋ̀ и҆ дх҃ꙋ, бг҃ороди́тельнице: є҆го́же молѝ, спастѝ пою́щыѧ тѧ̀ ѿ всѣ́хъ страсте́й и҆ ѡ҆бстоѧ́нїѧ.

Пѣ́снь и҃.

І҆рмо́съ: Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте, свѧще́нницы, просла́вите, ѻ҆́троцы, бл҃гослови́те, лю́дїе, и҆ превозноси́те во всѧ̑ вѣ́ки.

Лю́бѧще гдⷭ҇а ѿ всеѧ̀ дꙋшѝ, ꙗ҆́кѡ а҆́гнцы закла́ни бы́сте па́стырю слове́сномꙋ, и҆ бжⷭ҇твеннѣй трапе́зѣ принесо́стесѧ, и҆ въ кро́вѣхъ пе́рвенєцъ живетѐ.

Вѣ́рою почти́мъ кїнтїлїа́на и҆ да́дꙋ, и҆ маѯі́ма, мꙋ́чєники хрⷭ҇тѡ́вы, бжⷭ҇твєнныѧ ѕвѣ́зды, просвѣща́ющыѧ всѣ́хъ сердца̀ чꙋде́сными лꙋча́ми.

Глаго́лы преѡби́дѣша безбо́жныхъ и҆ ѕлочести́выхъ, и҆ ра́дꙋющесѧ пострада́вше мч҃ницы хрⷭ҇тѡ́вы: и҆ сꙋ́щымъ ѿ вѣ́ка причто́шасѧ бжⷭ҇твєннымъ страстоте́рпцємъ: съ ни́миже при́снѡ почита́ютсѧ.

Бг҃оро́диченъ: Ꙗ҆́кѡ прⷭ҇то́лъ ѻ҆гнезра́ченъ носи́ла є҆сѝ хрⷭ҇та̀, на́мъ примѣ́шшасѧ дебельство́мъ пло́ти: того̀ молѝ, бцⷣе чⷭ҇таѧ, ᲂу҆ще́дрити и҆ спастѝ любо́вїю чтꙋ́щыѧ тѧ̀.

Пѣ́снь ѳ҃.

І҆рмо́съ: Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чи́стꙋю.

Послѣ́дꙋюще стрⷭ҇ти безстра́стнагѡ, страстоте́рпцы, и҆скꙋше́нїе под̾ѧ́сте вкꙋ́пѣ, многоплете́нныхъ мꙋ́къ, и҆ сме́ртїю жи́знь наслѣ́довасте, пребыва́юще въ вѣ́къ вѣ́ка: сегѡ̀ ра́ди блажи́ми є҆стѐ при́снѡ.

Краснѡ̀ стезю̀ мꙋче́нїѧ ᲂу҆вѣ́дѣвше, и҆ ше́ствовавше до́брѣ, въ пꙋтѝ ведꙋ́щыѧ къ поко́ищємъ ᲂу҆́мнымъ, сла́внїи мч҃ницы, прїѧ́сте кончи́нꙋ мече́мъ, и҆ со а҆́гг҃лы ликꙋ́ете при́снѡ.

Ста́немъ во хра́мѣ гдⷭ҇ни, и҆ ᲂу҆блажи́мъ да́дꙋ, маѯі́ма и҆ кїнтїлїа́на, дѡ́блїѧ ѻ҆рꙋ́жники, и҆ погꙋби́вшыѧ врагѝ, и҆ вѣ́рою вопїе́мъ: чл҃вѣколю́бче, тѣ́хъ моли́твами и҆зба́ви всѣ́хъ многоплете́нныѧ напа́сти.

Свѧще́ннаѧ ва́ша па́мѧть, пресла́внїи побѣдоно́сцы, ꙗ҆́коже со́лнце свѣ́тлѡ ѡ҆зарѧ́етъ тва́рь: ю҆́же творѧ́щыѧ, ѡ҆мраче́нїѧ страсте́й ны̀ и҆зба́вите, мо́лимсѧ, свѧще́нными хода́тайствы, страстоте́рпцы сп҃са и҆ бг҃а.

Бг҃оро́диченъ: Грѣхолюби́въ сы́й, покаѧ́нїемъ припа́даю щедро́тамъ твои̑мъ, бж҃е, и҆ вѣ́рнѡ взыва́ю: мольба́ми чи́стѡ ро́ждшїѧ тѧ̀ на землѝ, ᲂу҆ще́дри мѧ̀, и҆ мꙋ́къ и҆зба́ви вѣ́чныхъ, пребл҃гі́й хрⷭ҇тѐ.