Канон святым десяти мученикам Критским

Припев: Святи́и му́ченицы, моли́те Бо́га о на́с.

Для корректного отображения содержимого страницы необходимо включить JavaScript или воспользоваться браузером с поддержкой JavaScript.

Память: 05 января (23 декабря ст. ст.)

Глас 2.

Гражданский
Церковнославянский
Житие
Иконы

Пе́снь 1.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Пресве́тлыя дне́сь лучи́ возсия́ша, у́мнаго возвеща́ющия Со́лнца все́м Того́ в ми́ре во пло́ти осия́ние и явле́ние.

Духо́вную дне́сь предпра́зднственную страстоно́сцы трапе́зу все́м предложи́ша, та́инственно пита́ющую ны́ блиста́ньми ражда́ющагося Христа́.

Я́ко све́тлыя возсия́вше зве́зды, святи́и, у́мному после́довасте сла́вы Со́лнцу во вре́мя подвиго́в и, сего́ ны́не получи́вше, просвети́стеся.

Ополче́ния вра́жия разори́ша, единоду́шствовавше, му́ченицы и победи́тельная от ро́ждшагося в верте́пе Христа́ неизглаго́ланно восприя́ша.

Богоро́дичен: Ро́д челове́ческий хвалу́ Тебе́ предпра́зднственную прино́сит, Богоневе́стная, я́ко о́бщия ра́дости Хода́тая и Вино́вника сла́вит ро́ждшагося из Тебе́ Человеколю́бца.

Пе́снь 3.

Ирмо́с: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Пелена́ми пови́вся, пло́тию ро́ждшееся Сло́во раздра́ ри́зы дре́вняго осужде́ния и на́с в нетле́ние облече́.

Со́нм, прему́дрии, безбо́жия разори́сте си́лою во пло́ти я́вльшагося Христа́ Бо́га и Сего́ любви́ связа́стеся.

Богоро́дичен: Разреши́хомся у́з осужде́ния, Зижди́телю, пелена́ми пови́вшуся, и оде́ждею облеко́хомся, Богоро́дице, пе́рвыя красоты́.

Седа́лен, гла́с 1.

Кри́тстии све́тлии и честни́и градоде́ржцы, страда́вше кре́пко, победи́ша ве́рою зми́я злонача́льнаго и зако́нне венча́ни бы́ша. Си́х дне́сь достохва́льную па́мять пра́зднуем, велегла́сно все́х сла́вяще Го́спода.

Пе́снь 4.

Ирмо́с: Услы́шах, Го́споди, слу́х Тво́й и убоя́хся, разуме́х дела́ Твоя́, и диви́хся, и возопи́х: сла́ва си́ле Твое́й, Го́споди.

Небеса́ да ра́дуются, земля́ та́инственнаго да испо́лнится весе́лия: Христо́с бо прии́де обнови́ти вся́ческая.

Десяти́ца, провозвеща́ющи страда́льцев рожде́ние Зижди́телево, с на́ми лику́ет и сра́дуется.

Христо́во соше́ствие к небеси́ возвы́си Боже́ственно до́блественныя му́ченики страда́нием.

Богоро́дичен: Я́ко о́бщую ра́дость, о Богоро́дице, вся́ тва́рь пе́сньми Тя́ почита́ет, предпра́зднствующи.

Пе́снь 5.

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Ве́ру Христу́, я́ко зла́то, и песнопе́ние, я́ко лива́н прия́тен, и чи́стую любо́вь, я́ко сми́рну, принесе́м, ве́рнии, на́с ра́ди роди́тися пло́тию благоволи́вшему.

Защище́ние страда́льцев, в согла́сие собра́вшеся дне́сь еди́но Христо́во, враго́в многообра́зныя низложи́ ко́зни и побе́ды по́чести досто́йне прия́ша.

Во пло́ти Христо́во прише́ствие, прему́дрии му́ченицы, уве́девше я́вственно, плотску́ю любо́вь отри́нуша. Те́мже за любо́вь Его́ и пострада́ша.

Богоро́дичен: Изба́вльшеся пре́лести, Чи́стая, и́дольския, Тебе́ ра́ди позна́хом Творца́ и Еди́наго Спа́са. Те́м в Того́ рождестве́ Тя́ любо́вию почита́ем, Пречи́стая.

Пе́снь 6.

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

С высоты́ на́м возсия́вшая за неизрече́нную ми́лость восто́чная звезда́, возвеща́ющая, привеща́ше, су́щим в ми́ре озаре́ние.

В нощи́ жития́ светя́ще в пучи́не пре́лести ходя́щим, све́том Христо́вым упра́висте к Нему́ челове́ки, всесла́внии.

Из глубины́ безбо́жия возвлече́ к богове́дения высоте́ му́ченики за неизрече́нную ми́лость в верте́пе Рожде́йся, я́ко Человеколю́бец.

Богоро́дичен: Ро́ждшагося из Тебе́, Богоневе́сто, во пло́ти Христа́ Бо́га па́че смы́сла, Боже́ственнаго возрожде́ния, земноро́днии, и че́сти сподо́бихомся.

Пе́снь 7.

Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси́, Бо́же оте́ц на́ших.

Бога́тство Своего́ неизрече́ннаго Христо́с человеколю́бия, пло́тию обнища́в, показа́: вочелове́чився бо, отве́рзе благи́х оби́льство, немо́лчно зову́щим: благослове́н еси́, Бо́же оте́ц на́ших.

Боже́ственным Христо́вым благово́нием мы́сленне услади́вшеся, страстоно́сцы возгнуша́шася сла́дких все́х красо́т и страда́нием Сему́ после́доваша, зову́ще: благослове́н еси́, Бо́же оте́ц на́ших.

Же́ртва Христу́ предпра́зднственная, му́дрии, показа́вшеся, благоуха́ние страда́ния, я́ко ми́ро, Сему́ принесо́сте. Те́мже мироуха́нием чуде́с вы́ просла́ви, вопию́щия: благослове́н еси́, Бо́же оте́ц на́ших.

Богоро́дичен: Ви́дети чи́стыми мы́сли очесы́ разумева́емую, в верте́пе из Тебе́, Всечи́стая, пло́тию ро́ждшагося Бо́га на́шего, сла́ву и све́тлость Боже́ственную, Твое́ю сподо́би ны́ моли́твою, ве́рно песносло́вящия Тя́.

Пе́снь 8.

Ирмо́с: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Вся́ тва́рь нача́тки гото́вит Тебе́, Христе́, в верте́пе от Чи́стыя Де́вы иму́щу роди́тися, и пое́т хвалу́ предпра́зднственную, Тя́ славосло́вящи, Еди́наго Благоде́теля.

Рожде́нному на земли́ после́дующе Христу́, страстоно́сцы, ве́ру предводи́теля, я́коже звезду́ све́тлую, иму́ще, ви́деша, и принесо́ша да́ры Сему́ боже́ственныя муче́нием.

Си́лою Христо́вою укрепля́еми, прему́дрии, наси́лование вра́жие, страстоте́рпцы, побори́сте и сего́ не́мощна показа́сте, песносло́вяще Христа́ во ве́ки вся́.

Богоро́дичен: И́же в не́дрех О́тчих, на дла́нех Ма́терних Твои́х, Богоро́дице, рожде́йся в верте́пе почи́ и все́м, ве́рно пою́щим Тя́, на небесе́х отверза́ет Ца́рство.

Пе́снь 9.

Ирмо́с: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Царя́ вся́ческих прише́ствие Боже́ственное, во́инство страда́льцев предте́кшее все́й тва́ри весе́лия трапе́зу возвеща́ет и вся́ прие́млет ве́рныя, своя́ до́блести предложи́в, я́коже сне́ди.

Я́коже звезду́, ве́ру, страстоте́рпцы Госпо́дни, зря́ще и держа́ще тве́рдо к невече́рнему Со́лнцу, тоя́ ра́ди непреткнове́нно ко Христу́ наста́вистеся, му́дрии, и кро́ви Сему́ я́ко да́ры принесо́сте.

От нетле́нных злачнико́в, страстоно́сцы, цве́ты поже́нше ра́зума Христо́ва, благово́ния Его́ напо́лнистеся, пострада́вше, и ми́ра благово́ннейшая Тому́ муче́нием са́ми себе́ принесо́сте.

Богоро́дичен: Излия́ся благода́ть, Богоро́дице Де́во, во все́х роде́х земноро́дных, и чуде́с Твои́х бога́тство истека́ет оби́льно во све́тлей Рождества́ Твоего́ ра́дости и богати́т ве́рою и любо́вию Тя́ сла́вящия.

Свети́лен.

С Феоду́лом венча́ем Зо́тика, Агафопо́да и Саторни́на, Помпи́я, вку́пе Евникиа́на, сла́внаго Васили́да, Евпо́ра же боже́ственнаго, и сла́внаго Гела́сия, и Ева́реста пе́сньми ра́достно, я́ко да моли́твами те́х изба́вимся прегреше́ний и венцы́ прии́мем от Христа́ Спаси́теля.

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Пресвѣ̑тлыѧ дне́сь лꙋчи̑ возсїѧ́ша, ᲂу҆́мнаго возвѣща́ющыѧ сл҃нца всѣ̑мъ тогѡ̀ въ мі́рѣ во пло́ти ѡ҆сїѧ́нїе и҆ ꙗ҆вле́нїе.

Дꙋхо́внꙋю дне́сь предпра́зднственнꙋю страстоно́сцы трапе́зꙋ всѣ̑мъ предложи́ша, та́инственнѡ пита́ющꙋю ны̀ блиста́ньми ражда́ющагѡсѧ хрⷭ҇та̀.

Ꙗ҆́кѡ свѣ̑тлыѧ возсїѧ́вше ѕвѣ́зды ст҃і́и, ᲂу҆́мномꙋ послѣ́довасте сла́вы сл҃нцꙋ, во вре́мѧ подвигѡ́въ: и҆ сегѡ̀ ны́нѣ полꙋчи́вше, просвѣти́стесѧ.

Ѡ҆полчє́нїѧ вра̑жїѧ разори́ша є҆динодꙋ́шствовавше мꙋ́чєницы, и҆ побѣди́тєльнаѧ ѿ ро́ждшагѡсѧ въ верте́пѣ хрⷭ҇та̀ неизглаго́ланнѡ воспрїѧ́ша.

Бг҃оро́диченъ: Ро́дъ человѣ́ческїй хвалꙋ̀ тебѣ̀ предпра́зднственнꙋю прино́ситъ, бг҃оневѣ́стнаѧ: ꙗ҆́кѡ ѻ҆́бщїѧ ра́дости хода́таѧ и҆ вино́вника сла́витъ ро́ждшагосѧ и҆зъ тебє̀ чл҃вѣколю́бца.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ, пою́щихъ тѧ̀.

Пелена́ми пови́всѧ, пло́тїю ро́ждшеесѧ сло́во раздра̀ ри̑зы дре́внѧгѡ ѡ҆сꙋжде́нїѧ, и҆ на́съ въ нетлѣ́нїе ѡ҆блечѐ.

Со́нмъ, премꙋ́дрїи, безбо́жїѧ разори́сте, си́лою во пло́ти ꙗ҆́вльшагосѧ хрⷭ҇та̀ бг҃а, и҆ сегѡ̀ любвѝ свѧза́стесѧ.

Бг҃оро́диченъ: Разрѣши́хомсѧ ᲂу҆́зъ ѡ҆сꙋжде́нїѧ, зижди́телю пелена́ми пови́вшꙋсѧ: и҆ ѻ҆де́ждею ѡ҆блеко́хомсѧ, бцⷣе, пе́рвыѧ красоты̀.

Сѣда́ленъ, гла́съ а҃.

Кри́тстїи свѣ́тлїи и҆ честні́и градоде́ржцы, страда́вше крѣ́пкѡ, побѣди́ша вѣ́рою ѕмі́ѧ ѕлонача́льнаго, и҆ зако́ннѣ вѣнча́ни бы́ша. си́хъ дне́сь достохва́льнꙋю па́мѧть пра́зднꙋемъ, велегла́снѡ всѣ́хъ сла́вѧще гдⷭ҇а.

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ диви́хсѧ, и҆ возопи́хъ: сла́ва си́лѣ твое́й, гдⷭ҇и.

Нб҃са̀ да ра́дꙋютсѧ, землѧ̀ та́инственнагѡ да и҆спо́лнитсѧ весе́лїѧ: хрⷭ҇то́съ бо прїи́де ѡ҆бнови́ти всѧ́чєскаѧ.

Десѧти́ца провозвѣща́ющи страда́льцєвъ рожде́нїе зижди́телево, съ на́ми ликꙋ́етъ и҆ сра́дꙋетсѧ.

Хрⷭ҇то́во соше́ствїе къ нб҃сѝ возвы́си бжⷭ҇твеннѡ до́блествєнныѧ мꙋ́ченики страда́нїемъ.

Бг҃оро́диченъ: Ꙗ҆́кѡ ѻ҆́бщꙋю ра́дость, ѽ бцⷣе! всѧ̀ тва́рь пѣ́сньми тѧ̀ почита́етъ, предпра́зднствꙋющи.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.

Вѣ́рꙋ хрⷭ҇тꙋ̀, ꙗ҆́кѡ зла́то, и҆ пѣснопѣ́нїе, ꙗ҆́кѡ лїва́нъ прїѧ́тенъ, и҆ чи́стꙋю любо́вь, ꙗ҆́кѡ смѵ́рнꙋ принесе́мъ вѣ́рнїи, на́съ ра́ди роди́тисѧ пло́тїю благоволи́вшемꙋ.

Защище́нїе страда́льцєвъ, въ согла́сїе собра́вшесѧ дне́сь є҆ди́но хрⷭ҇то́во, врагѡ́въ многоѻбра̑зныѧ низложѝ кѡ́зни, и҆ побѣ́ды по́чєсти досто́йнѣ прїѧ́ша.

Во пло́ти хрⷭ҇то́во прише́ствїе, премꙋ́дрїи мꙋ́чєницы ᲂу҆вѣ́дѣвше ꙗ҆́вственнѡ, плотскꙋ́ю любо́вь ѿри́нꙋша. тѣ́мже за любо́вь є҆гѡ̀ и҆ пострада́ша.

Бг҃оро́диченъ: И҆зба́вльшесѧ пре́лести, чⷭ҇таѧ, і҆́дѡльскїѧ, тебє̀ ра́ди позна́хомъ творца̀ и҆ є҆ди́наго сп҃са. тѣ́мъ въ тогѡ̀ рождествѣ̀, тѧ̀ любо́вїю почита́емъ, пречⷭ҇таѧ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Съ высоты̀ на́мъ возсїѧ́вшаѧ за неизрече́ннꙋю ми́лость восто́чнаѧ ѕвѣзда̀, возвѣща́ющаѧ привѣща́ше сꙋ́щымъ въ мі́рѣ ѡ҆заре́нїе.

Въ нощѝ житїѧ̀ свѣтѧ́ще въ пꙋчи́нѣ пре́лести ходѧ́щымъ, свѣ́томъ хрⷭ҇то́вымъ ᲂу҆пра́висте къ немꙋ̀ человѣ́ки, всесла́внїи.

И҆зъ глꙋбины̀ безбо́жїѧ возвлечѐ къ бг҃овѣ́дѣнїѧ высотѣ̀ мꙋ́ченики, за неизрече́ннꙋю ми́лость въ верте́пѣ рожде́йсѧ, ꙗ҆́кѡ чл҃вѣколю́бецъ.

Бг҃оро́диченъ: Ро́ждшагосѧ и҆зъ тебє̀, бг҃оневѣ́сто, во пло́ти хрⷭ҇та̀ бг҃а, па́че смы́сла, бжⷭ҇твеннагѡ возрожде́нїѧ земноро́днїи, и҆ че́сти сподо́бихомсѧ.

Пѣ́снь з҃.

І҆рмо́съ: Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Бога́тство своегѡ̀ неизрече́ннагѡ хрⷭ҇то́съ чл҃вѣколю́бїѧ, пло́тїю ѡ҆бнища́въ, показа̀: вочл҃вѣ́чивсѧ бо ѿве́рзе благи́хъ ѻ҆би́льство, немо́лчнѡ зовꙋ́щымъ: бл҃гослове́нъ є҆сѝ, бж҃е ѻ҆тє́цъ на́шихъ.

Бжⷭ҇твеннымъ хрⷭ҇то́вымъ благово́нїемъ мы́сленнѣ ᲂу҆слади́вшесѧ страстоно́сцы, возгнꙋша́шасѧ сла́дкихъ всѣ́хъ красо́тъ, и҆ страда́нїемъ семꙋ̀ послѣ́доваша, зовꙋ́ще: бл҃гослове́нъ є҆сѝ, бж҃е ѻ҆тє́цъ на́шихъ.

Же́ртва хрⷭ҇тꙋ̀ предпра́зднственнаѧ, мꙋ́дрїи, показа́вшесѧ, благоꙋха́нїе страда́нїѧ, ꙗ҆́кѡ мѵ́ро семꙋ̀ принесо́сте. тѣ́мже мѷроꙋха́нїемъ чꙋде́съ вы̀ просла́ви, вопїю́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Ви́дѣти чи́стыми мы́сли ѻ҆чесы̀ разꙋмѣва́емꙋю, въ верте́пѣ и҆зъ тебє̀, всечⷭ҇таѧ, пло́тїю ро́ждшагѡсѧ бг҃а на́шегѡ, сла́вꙋ и҆ свѣ́тлость бжⷭ҇твеннꙋю, твое́ю сподо́би ны̀ моли́твою, вѣ́рнѡ пѣсносло́вѧщыѧ тѧ̀.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго и҆ пла́мень въ ро́сꙋ прело́жшаго бг҃а, по́йте дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Всѧ̀ тва́рь нача́тки гото́витъ тебѣ̀, хрⷭ҇тѐ, въ верте́пѣ ѿ чⷭ҇тыѧ дв҃ы и҆мꙋ́щꙋ роди́тисѧ: и҆ пое́тъ хвалꙋ̀ предпра́зднственнꙋю, тѧ̀ славосло́вѧщи є҆ди́наго бл҃годѣ́телѧ.

Рожде́нномꙋ на землѝ послѣ́дꙋюще хрⷭ҇тꙋ̀, страстоно́сцы, вѣ́рꙋ предводи́телѧ, ꙗ҆́коже ѕвѣздꙋ̀ свѣ́тлꙋю, и҆мꙋ́ще, ви́дѣша: и҆ принесо́ша да́ры семꙋ̀ бжⷭ҇твєнныѧ, мꙋче́нїемъ.

Си́лою хрⷭ҇то́вою ᲂу҆крѣплѧ́еми премꙋ́дрїи, наси́лованїе вра́жїе, страстоте́рпцы, побори́сте, и҆ сего̀ не́мощна показа́сте, пѣсносло́вѧще хрⷭ҇та̀ во вѣ́ки всѧ̑.

Бг҃оро́диченъ: И҆́же въ нѣ́дрѣхъ ѻ҆́ч҃ихъ, на дла́нѣхъ мт҃рнихъ твои́хъ, бцⷣе, рожде́йсѧ въ верте́пѣ, почѝ: и҆ всѣ̑мъ вѣ́рнѡ пою́щымъ тѧ̀, на нб҃сѣ́хъ ѿверза́етъ црⷭ҇тво.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю, прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Цр҃ѧ̀ всѧ́ческихъ прише́ствїе бжⷭ҇твенное, во́инство страда́льцєвъ предте́кшее, все́й тва́ри весе́лїѧ трапе́зꙋ возвѣща́етъ, и҆ всѧ̑ прїе́млетъ вѣ̑рныѧ, своѧ̑ до́блєсти предложи́въ, ꙗ҆́коже снѣ̑ди.

Ꙗ҆́коже ѕвѣздꙋ̀ вѣ́рꙋ страстоте́рпцы гдⷭ҇ни зрѧ́ще, и҆ держа́ще тве́рдѡ, къ невече́рнемꙋ сл҃нцꙋ, тоѧ̀ ра́ди непреткнове́ннѡ ко хрⷭ҇тꙋ̀ наста́вистесѧ мꙋ́дрїи: и҆ крѡ́ви семꙋ̀ ꙗ҆́кѡ да́ры принесо́сте.

Ѿ нетлѣ́нныхъ ѕлачникѡ́въ, страстоно́сцы, цвѣ́ты поже́нше ра́зꙋма хрⷭ҇то́ва, благово́нїѧ є҆гѡ̀ напо́лнистесѧ, пострада́вше: и҆ мѵ̑ра благовѡ́ннѣйшаѧ томꙋ̀ мꙋче́нїемъ са́ми себѐ принесо́сте.

Бг҃оро́диченъ: И҆злїѧ́сѧ бл҃года́ть, бцⷣе дв҃о, во всѣ́хъ родѣ́хъ земноро́дныхъ, и҆ чꙋде́съ твои́хъ бога́тство и҆стека́етъ ѻ҆би́льнѡ во свѣ́тлѣй ржⷭ҇тва̀ твоегѡ̀ ра́дости, и҆ богати́тъ вѣ́рою и҆ любо́вїю тѧ̀ сла́вѧщыѧ.

Свѣти́ленъ.

Съ ѳеодꙋ́ломъ вѣнча́емъ зѡ́тїка, а҆гаѳопо́да и҆ саторні́на, помпі́а, вкꙋ́пѣ є҆ѵнїкїа́на, сла́внаго васїлі́да, є҆ѵпо́ра же бжⷭ҇твеннаго, и҆ сла́внаго гела́сїа и҆ є҆ѵа́реста пѣ́сньми ра́достнѡ, ꙗ҆́кѡ да моли́твами тѣ́хъ и҆зба́вимсѧ прегрѣше́нїй, и҆ вѣнцы̀ прїи́мемъ ѿ хрⷭ҇та̀ сп҃си́телѧ.

Десять святых мучеников Критских: Феодул, Саторнин, Евпор, Геласий, Евникиан, Зотик, Помпий, Агафопус, Василид и Еварест пострадали за Христа в III веке при императоре Декии (249–251). Правитель Крита, соименный императору Декию, жестоко преследовал Критскую Церковь. Однажды перед ним предстали 10 христиан из разных городов Крита, которые твердо исповедали на суде свою веру во Христа и обличили поклонение идолам. В течение 30 дней их подвергали жестоким истязаниям, но с помощью Божией они всё перенесли, славя Господа. Перед смертью они молились, чтобы Господь просветил их мучителей светом истинной веры. Все святые были обезглавлены.

См. также: