Канон святому великомученику Никите

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Оу҆мертви́въ пло́ти моеѧ̀ мꙋдрова́нїе, ᲂу҆́мъ ѡ҆зарѝ просвѣти́тельною свѣ́тлостїю, твоѐ воспѣ́ти торжество̀, ꙗ҆́кѡ побѣди́тель всеизѧ́щнѣйшъ, ᲂу҆молѧ́ѧ, ѽ нїки́то, хрⷭ҇та̀.

Ꙗ҆́дъ ѿ страсте́й бы́вшїй ѿложи́въ, ра̑ны претерпѣ́лъ є҆сѝ крѣ́пцѣ, и҆ въ ри́зꙋ че́стнꙋ страда́льчески ѡ҆дѣ́ѧлсѧ є҆сѝ ѿ твои́хъ крове́й и҆стка́ннꙋю.

Но́въ же и҆ чꙋ́денъ ꙗ҆ви́лъ є҆сѝ пꙋ́ть страда́нїѧ, за ны̀ на дре́вѣ пригвозди́всѧ: нача́ло бо бы́лъ є҆сѝ мч҃никѡвъ, влⷣко, и҆сповѣ́данїѧ и҆ крѣ́пости.

Бг҃оро́диченъ: Две́рь, ꙗ҆́же къ на́мъ твоегѡ̀, гдⷭ҇и, снизше́ствїѧ, восто́къ, и҆ сл҃нце, и҆ свѣ́тъ та́инственнѡ тѧ̀ нарица́емъ, преесте́ственнѡ просїѧ̀, сꙋгꙋ́ба є҆стество́мъ, чл҃вѣколю́бца.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀, крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Тве́рдостїю дꙋшѝ, мꙋчи́тєльскаѧ прещє́нїѧ претерпѣ́лъ є҆сѝ, мч҃ниче хрⷭ҇то́въ сла́вне, бжⷭ҇твенною си́лою возмога́емь.

Пло́ти твоеѧ̀ расточє́нїѧ, и҆ ᲂу҆де́съ ѿсѣче́нїѧ претерпѣ́въ мч҃ниче хрⷭ҇то́въ всехва́льне, твою̀ дꙋ́шꙋ приѡбрѣ́лъ є҆сѝ.

Весели́тсѧ ѡ҆ тебѣ̀ мч҃никѡвъ хрⷭ҇то́выхъ собра́нїе, па́мѧть твою̀ дне́сь соверша́емꙋ ви́дѧще.

Бг҃оро́диченъ: Марі́е, чⷭ҇тое дѣ́вства и҆ честно́е селе́нїе, лю̑тыѧ стрꙋ́пы моегѡ̀ се́рдца и҆сцѣлѝ.

Сѣда́ленъ, гла́съ д҃.

Непобѣди́мь ꙗ҆ви́всѧ во́инъ, ва̑рварскїѧ кѡ́зни побѣди́лъ є҆сѝ, и҆ пострада́въ сла́вне, крѣпча́йше по́лкъ пора́товалъ є҆сѝ неви́димыхъ врагѡ́въ. тѣ́мъ и҆ дїади́мꙋ прїѧ́лъ є҆сѝ побѣ́ды, ѡ҆ на́съ молѧ́сѧ не преста́й, бл҃же́нне нїки́то, вѣ́рою пою́щихъ тѧ̀.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

И҆скꙋ́пленъ кро́вїю влⷣчнею страда́лецъ нїки́та, свою̀ кро́вь ра́дꙋѧсѧ прино́ситъ хрⷭ҇тꙋ̀: тѣ́мже закала́емь, сла́ва тебѣ̀ бж҃е мо́й, вопїѧ́ше.

Разжига́емь раче́нїемъ влⷣчнимъ, і҆́дѡльскїй, мч҃ниче, попра́лъ є҆сѝ пла́мень, и҆ всю̀ де́мѡнскꙋю крѣ́пость, зовы́й созда́телю: сла́ва си́лѣ твое́й, гдⷭ҇и.

Наслажда́ѧсѧ гдⷭ҇нимъ видѣ́нїемъ, и҆ тогѡ̀ свѣ́тлостїю насыща́ѧсѧ мч҃никъ, стражда̀ не ѡ҆щꙋща́ше, и҆ ра́дꙋѧсѧ зва́ше: сла́ва си́лѣ твое́й, гдⷭ҇и.

Бг҃оро́диченъ: Оу҆краша́емо разли́чнымъ свѣтоли́тїемъ нб҃о ѡ҆дꙋшевле́нное твоѐ, цр҃ѧ̀ црⷭ҇твꙋющихъ, хрⷭ҇тѐ, дв҃а пречⷭ҇таѧ, ны́нѣ ꙗ҆́кѡ бцⷣа сла́витсѧ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.

Кто̀ мо́жетъ и҆зрещѝ твои́хъ, нїки́то, натрижне́нїй, всехва́льне. вѣнцы̀, ꙗ҆̀же дарова̀ тебѣ̀ хрⷭ҇то́съ, за него̀ пострада́вшꙋ;

Мч҃ницы на землѝ по́двиги сконча́вше, нбⷭ҇ное въ высоча́йшихъ ѿ тебє̀, жизнода́вче, воздаѧ́нїе прїѧ́ша.

Ны́нѣ сїѧ́еши ꙗ҆́кѡ свѣти́ло, ѽ нїки́то всехва́льне. свѣ́тъ вторы́й быва́еши, свѣ́тꙋ вели́комꙋ сла́внѡ предстоѧ̀.

Бг҃оро́диченъ: Свѣ́тъ безлѣ́тный на́мъ подлѣ́тенъ бы́вшь, родила̀ є҆сѝ, бг҃омт҃и, сꙋ́щымъ во тмѣ̀ житїѧ̀, и҆ мі́ръ ве́сь просвѣти́ла є҆сѝ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Вожделѣ́въ добро́ты созда́вшагѡ, сла́вне, и҆ ѿтꙋ́дꙋ сїѧ̑нїѧ прїе́мь, мч҃ниче, впери́лсѧ є҆сѝ, и҆ ѡ҆ сме́рти небре́гъ, томꙋ̀ пристꙋпи́лъ є҆сѝ.

Текꙋ́щихъ по́мысломъ прїе́мь цѣломꙋ́дреннымъ, неистощи̑маѧ, мч҃ниче, предче́ствовавъ, тѣ́ло твоѐ мꙋ́камъ, ѽ нїки́то! съ весе́лїемъ ра́дꙋѧсѧ преда́лъ є҆сѝ.

Бг҃оро́диченъ: Ꙗ҆́кѡ ꙗ҆́блоко въ дꙋбра́вѣ є҆ди́нꙋ тѧ̀ ѡ҆брѣ́тъ, и҆ чистѣ́йшїй крі́нъ, и҆ ᲂу҆до́льный цвѣ́тъ, ѽ бг҃омт҃и! жени́хъ мы́сленный въ тѧ̀ всели́сѧ.

Конда́къ, гла́съ в҃.

Пре́лести посѣ́къ держа́вꙋ стоѧ́нїемъ твои́мъ, и҆ побѣ́ды прїи́мъ вѣне́цъ во страда́льчествѣхъ твои́хъ, со а҆́гг҃лы, сла́вне, ра́дꙋешисѧ, нїки́то тезоимени́те, съ ни́ми хрⷭ҇та̀ бг҃а молѧ̀ непреста́ннѡ ѡ҆ всѣ́хъ на́съ.

І҆́косъ:

Зна́нїе твоѐ вложи́въ дꙋшѝ мое́й, ѡ҆чи́сти мо́й по́мыслъ, и҆ твои́хъ за́повѣдей дѣ́лателѧ, сп҃се, покажѝ, да возмогꙋ̀ побѣди́ти страсте́й мои́хъ ра̑знаѧ привоста̑нїѧ, побѣди́тельнꙋю по́честь прїе́мъ безстра́стїѧ, моли́твами твоегѡ̀ до́блѧгѡ страстоте́рпца нїки́ты, чл҃вѣколю́бче: и҆́бо са́мъ на́съ воспомина́ти того̀ въ па́мѧти є҆гѡ̀ созва̀, молѧ́сѧ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Ны́нѣ непристꙋ́пною заре́ю ѡ҆сїѧ́емь, мч҃ниче, пою́щыѧ ны́нѣ тво́й пра́здникъ, свѣ́томъ твои́мъ просвѣтѝ, бл҃гослове́нъ є҆сѝ, бж҃е мо́й, зовы́й, и҆ гдⷭ҇и.

Преꙋдиви́шасѧ твоемꙋ̀ мꙋ́жествꙋ вѡ́инства а҆́гг҃льскаѧ, бл҃же́нне, зрѧ́ще терпѣли́внѡ стра́ждꙋща тѧ̀ и҆ глаго́люща: бл҃гослове́нъ є҆сѝ, бж҃е всѣ́хъ и҆ гдⷭ҇и.

Бг҃оро́диченъ: Съ вы́шнимъ ликостоѧ́нїемъ безпло́тный, ра́дꙋйсѧ бцⷣе чⷭ҇таѧ, гаврїи́лъ веселѧ́сѧ зовѧ́ше тѝ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Всецѣ́лꙋ же́ртвꙋ и҆ прїѧ́тнꙋ тебѐ сама́го прине́слъ є҆сѝ, мч҃ниче непобѣди́ме, и҆ всепло́дїе бы́лъ є҆сѝ бл҃гово́нно влⷣцѣ твоемꙋ̀, распе́ншемꙋсѧ на́съ ра́ди, съ весе́лїемъ вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Зако́ннѣ ꙗ҆́кѡ бжⷭ҇твенный хра́брникъ, вра̑жїѧ полкѝ низврати́въ, досто́йнѣ прїѧ́лъ є҆сѝ вѣне́цъ побѣ́ды неꙋвѧда́ющїй ѿ жизноно́сныѧ десни́цы, є҆́йже ны́нѣ предстои́ши, воспѣва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.

Возлюби́лъ є҆сѝ безмѣ́рнѡ хрⷭ҇та̀, и҆ тогѡ̀ кро́ви твою̀ кро́вь примѣси́лъ є҆сѝ, и҆ раздроблѧ́емь ра́нами, и҆ разли́чнѡ ᲂу҆бива́емь. є҆мꙋ́же и҆ ны́нѣ ꙗ҆́кѡ подо́бникъ сца́рствꙋеши, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Скве́рнꙋ є҆стества̀ на́шегѡ, хрⷭ҇та̀ ро́ждши є҆ди́наго пречⷭ҇таго, ꙗ҆́вѣ ѿмы́ла є҆сѝ, чⷭ҇таѧ бцⷣе всенепоро́чнаѧ, и҆ херꙋві́мъ и҆ серафі́мъ была̀ є҆сѝ превы́шше, вопїю́щихъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀, тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ, веселѧ́щесѧ, тѧ̀, бцⷣе, велича́емъ.

Всего̀ менѐ сама́го тебѣ̀ приношꙋ̀ бг҃обл҃же́нне нїки́то, да ѡ҆брѧ́щꙋ тѧ̀ предста́телѧ ко влⷣцѣ, спаса́ти могꙋ́ща ѿ всѧ́кагѡ ѡ҆бстоѧ́нїѧ, и҆ спасе́нїѧ бжⷭ҇твеннагѡ хода́таѧ.

Свидѣ́тель и҆́стиннѡ бы́лъ є҆сѝ и҆́стины, страстоте́рпче, ѵ҆поста́снѣй и҆ честнѣ́й ны́нѣ и҆́стинѣ ра́дꙋѧсѧ предстои́ши, по́двигѡвъ натрижне́нїѧ со дерзнове́нїемъ прїе́млѧ.

Ко приста́нищꙋ ти́хомꙋ приста́въ, почѝ ѿ болѣ́зней: и҆ вѣнцено́сецъ ликꙋ́еши въ раѝ съ мч҃ники хрⷭ҇то́выми. тѣ́мъ тѧ̀ ны́нѣ ꙗ҆́кѡ бг҃опросла́вленна всѝ досто́йнѡ сла́вимъ.

Бг҃оро́диченъ: Зако́нѡвъ є҆сте́ственныхъ кромѣ̀, законода́вца ражда́еши, пло́ть бы́вша невра́щнѡ за бл҃гоꙋтро́бїе неизрече́нное, благослове́ннаѧ чⷭ҇таѧ, во двꙋ́хъ сꙋщества́хъ познава́ема.

Свѣти́ленъ.

Ѻ҆рꙋ́жїемъ честна́гѡ твоегѡ̀ крⷭ҇та̀ ѡ҆гради́всѧ, страстоте́рпецъ тво́й, сло́ве, проти̑вныѧ си̑лы крѣ́пкѡ препобѣдѝ, и҆ мꙋчи́тели посрамѝ, и҆ за тѧ̀ пострада̀, и҆ съ тобо́ю, хрⷭ҇тѐ мо́й всецр҃ю̀, нїки́та црⷭ҇твꙋетъ.