Канон святому великомученику Феодору Стратилату (иной)

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре: і҆и҃лѧ же бѣглеца̀ пѣшехо́дца спасѐ, пѣ́снь бг҃ови воспѣва́юща.

Бжⷭ҇твенными ꙗ҆́вѣ свѣ́тлостьми ᲂу҆добрѧ́ѧсѧ, страда́льческимъ вѣнце́мъ свѧщенноꙋкраша́емь и҆ сла́вою ѡ҆блиста́емь ст҃ы́ѧ трⷪ҇цы, хва́лѧщыѧ тѧ̀ помина́й, вели́кїй въ мꙋ́ченицѣхъ ѳео́дѡре.

И҆спо́лнь свѣ́та, и҆спо́лнь бжⷭ҇твенныѧ благода́ти на́мъ возсїѧ̀ свѧще́ннаѧ па́мѧть честны́хъ пѡ́двигъ твои́хъ, пресвѣ́тлыми свѣтлостьмѝ ѡ҆зарѧ́ющи всѣ́хъ благоче́стнѡ тѧ̀ почита́ющихъ, мꙋ́чениче страстоте́рпче ѳео́дѡре.

І҆́дѡльстѣй ѡ҆держа́щи бꙋ́ри человѣ́чество, свѧще́нный мꙋ́ченикъ ѡ҆кормлѧ́емь крⷭ҇та̀ бж҃е́ственною благода́тїю, небꙋ́рнѡ преплы́въ, и҆ въ приста̑нища дости́же небє́снаѧ ра́дꙋѧсѧ.

Бг҃оро́диченъ: Две́ре бж҃їѧ, покаѧ́нїѧ двє́ри мѝ, дв҃о, ѿве́рзи, помышле́ньми бжⷭ҇твенными дꙋ́шꙋ мою̀ просвѣтѝ, и҆ страсте́й ѿженѝ тѧ̑жкїѧ ѻ҆́блаки, ꙗ҆́кѡ да почита́ю ра́дꙋѧсѧ, и҆ до́лжнѡ ᲂу҆блажа́ю тѧ̀.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть ст҃ъ, па́че тебє̀, є҆ди́не чл҃вѣколю́бче.

Ꙗ҆́кѡ ле́въ дерзнꙋ́въ посредѝ сꙋди́ща ста́лъ є҆сѝ, возвѣща́ѧ спаси́тельное сло́во, досажда́ѧ ѕлочести̑вымъ, проповѣ́даѧ и҆́стинꙋ, и҆ ѡ҆блича́ѧ лжꙋ̀ безбо́жїѧ, ѳео́дѡре.

Мꙋчи́тель ᲂу҆ди́вльсѧ твоемꙋ̀ мꙋ́жествꙋ, мꙋ́дре, ско́тскою ꙗ҆́ростїю подви́гсѧ, жи́лами волꙋ́ѧми неща́днѡ ᲂу҆ранѧ́етъ тѧ̀, ѳео́дѡре, ме́рзкимъ и҆стꙋка̑ннымъ сокрꙋше́нїе содѣ́лавша.

Мꙋ́жескимъ по́мысломъ ꙗ҆́звєнныѧ ка̑пли, ꙗ҆́кѡ во́лны морскі̑ѧ, бг҃омꙋ́дре, ѿри́нꙋлъ є҆сѝ, крⷭ҇та̀ благода́тїю ᲂу҆крѣплѧ́емь и҆ вѣнцено́сецъ бжⷭ҇твеннагѡ дх҃а си́лою ꙗ҆влѧ́ѧсѧ.

Бг҃оро́диченъ: Сотворѝ вои́стиннꙋ тебѣ̀ вели́чїе, и҆́же ѿ тебє̀ рожде́йсѧ гдⷭ҇ь: и҆ ро́ди всѝ тѧ̀, бж҃їю мт҃рь, сла́вѧтъ.

Сѣда́ленъ, гла́съ и҃.

Бжⷭ҇твенное всеѻрꙋ́жїе воспрїи́мъ, и҆ і҆́дѡльскꙋю ле́сть низложи́въ, а҆́гг҃лы воздви́глъ є҆сѝ восхвали́ти по́двиги твоѧ̑: бжⷭ҇твенною бо любо́вїю ᲂу҆́мъ распали́въ, на ѻ҆́гненнꙋю сме́рть до́блественнѡ дерзнꙋ́лъ є҆сѝ. тѣ́мже тезоимени́тнѡ просѧ́щымъ тѧ̀ дае́ши бжⷭ҇твєннаѧ дарова̑нїѧ, страстоте́рпче ѳео́дѡре. сегѡ̀ ра́ди вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю па́мѧть твою̀.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ̀ тѝ: си́лѣ твое́й сла́ва, чл҃вѣколю́бче.

И҆мѣ́ѧ хрⷭ҇та̀ внꙋ́трь себє̀, бл҃же́нне, вѣща́юща, лїкїні́евꙋ горды́ню низложи́лъ є҆сѝ словесы̀ мꙋ́дрыми. сѐ вои́стиннꙋ, мч҃ниче, ѡ҆бличи́лъ є҆сѝ премно́гое безꙋ́мїе, и҆ дѣ́лы пресла́вными зрѧ́щыѧ ᲂу҆диви́лъ є҆сѝ, страда́льче доблемꙋ́дренне ѳео́дѡре.

Повѣ́шенъ бы́въ беззако́нїемъ мꙋчи́телѧ, и҆ ногтьмѝ и҆стерза́емь, и҆ ѡ҆багре́нъ ка́плѧми, мꙋ́чениче, непра́веднѡ и҆злива́емыхъ крове́й твои́хъ, ᲂу҆мерщвле́нїѧ дебельства̀ и҆ тлѝ совле́клъ є҆сѝ ри̑зы, преблаже́нне ѳео́дѡре.

Бг҃оро́диченъ: Лꙋка́вое грѣхѡ́въ мои́хъ рꙋкописа́нїе бж҃е́ственнымъ копїе́мъ, пречⷭ҇таѧ, расто́ргни, пробо́дшимъ бж҃е́ствєннаѧ ре́бра, вочл҃вѣ́читисѧ и҆зъ тебє̀, дв҃о, восхотѣ́вшаго, и҆ въ кни́зѣ мѧ̀ написа́ти спаса́емыхъ, моли́сѧ, безъ ᲂу҆ма̀ ѿ бг҃а ᲂу҆да́льшасѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆братѝ мѧ̀, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Просвѣща́емь заре́ю, мꙋ́чениче, бжⷭ҇твеннагѡ дх҃а, и҆ распалѧ́емь хрⷭ҇то́вою любо́вїю, ѡ҆палѧ́емѣ пло́ти неради́лъ є҆сѝ, ни ѡ҆щꙋти́лъ є҆сѝ болѣ́зни, ни вмѣни́лъ є҆сѝ мꙋ́ки, нбⷭ҇ными наде́ждами пита́емь.

И҆́го влⷣки носѧ̀ на вы́и преле́гкое, ѻ҆́лова тѧгото́ю, страстоте́рпче преблаже́нне, ѡ҆тѧгче́нъ, не преклони́лсѧ є҆сѝ ѿню́дъ, ни поколеба́лсѧ є҆сѝ, нижѐ побѣди́лсѧ є҆сѝ, во́ине до́блїй ѳео́дѡре.

Съ нб҃сѐ пригласи́въ тѧ̀ пребл҃го́е сло́во, де́рзостна сотворѝ, є҆гѡ́же си́лою гѡ́рькїѧ болѣ̑зни претерпѣ́лъ є҆сѝ беззако́ннꙋющихъ, мꙋ́чениче хрⷭ҇то́въ, и҆ мꙋ̑ки и҆ нꙋ́жднꙋю, сла́вне, сме́рть.

Бг҃оро́диченъ: Пребыва́ти мѧ̀ цѣ́ла, непрело́жна стоѧ́нїѧ лꙋ́чшагѡ, но пра́вѣ ше́ствꙋюща, и҆ бг҃оꙋгѡ́днаѧ дѣ́юща бл҃га́ѧ ᲂу҆молѝ, бл҃га́го ро́ждши сло́ва, на́съ безслове́сїѧ и҆зба́вльшаго.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведѝ мѧ̀.

Стра́сть безстра́стнагѡ воѡбража́ѧ, распѧ́лсѧ є҆сѝ, сла́вный мꙋ́чениче, пригвозди́всѧ на дре́вѣ, преблаже́нне, и҆ подо́бникъ влⷣцѣ бы́лъ є҆сѝ, разрѣши́вшаго крⷭ҇то́мъ человѣ́чєскїѧ стра̑сти во́лею.

Повѣ́шенъ ꙗ҆́кѡ а҆́гнецъ на дре́вѣ, и҆ стрѣла́ми сострѣ́лѧнъ, блаже́нне, и҆ ѻ҆че́съ зѣ̑ницы и҆збоде́нъ, и҆ ᲂу҆ѧ́звленъ по всемꙋ̀ тѣлесѝ, ᲂу҆ѧзви́лъ є҆сѝ врагѡ́въ сердца̀ копїе́мъ болѣ́зней твои́хъ.

Пото́цы безмѣ́рныхъ мꙋ́къ, ко хра́минѣ припрѣ́вшесѧ, мꙋ́чениче, твоеѧ̀ дꙋшѝ, не поколеба́ша сеѧ̀: на недви́жимѣмъ бо ка́мени ᲂу҆тверди́сѧ просїѧ́вшагѡ ѿ дв҃ы и҆ человѣ́ческїй ро́дъ просвѣ́щшагѡ.

Бг҃оро́диченъ: Мр҃і́е, всегѡ̀ мі́ра гпⷭ҇жѐ, ꙗ҆́кѡ гдⷭ҇а всѣ́хъ ро́ждши, вра́жїѧ рабо́ты мѧ̀ и҆зба́ви: и҆ тогѡ̀ мꙋче́нїѧ и҆схи́ти и҆ сп҃сѝ мѧ̀, на тѧ̀ несомнѣ́ннѡ ᲂу҆пова́ющаго.

Конда́къ, гла́съ в҃.

Мꙋ́жествомъ дꙋшѝ въ вѣ́рꙋ ѡ҆болкі́йсѧ, и҆ глаго́лъ бж҃їй а҆́ки копїѐ въ рꙋ́кꙋ взе́мъ, врага̀ побѣди́лъ є҆сѝ, мꙋ́ченикѡвъ, преве́лїй ѳео́дѡре: съ ни́ми хрⷭ҇тꙋ̀ бг҃ꙋ молѧ́сѧ, не преста́й ѡ҆ всѣ́хъ на́съ.

І҆́косъ:

Страда́льцєвъ пресвѣ́тлꙋю добро́тꙋ, прїиди́те всѝ, пѣ́сненными вѣнцы̀, вѣ́рнїи, ѳео́дѡра вѣнча́емъ: да́ръ бо бж҃їй вели́къ мі́рꙋ ꙗ҆ви́сѧ сїѧ́ньми чꙋде́съ, врага̀ бо побѣди́въ велїа́ра страда̑нїи честны́ми, ѡ҆дождѧ́етъ вмѣ́стѡ кро́вныхъ ка́плей и҆сцѣле́нїй то́ки, съ си́ми ᲂу҆́бѡ всѣ́ми ра́дꙋетсѧ хрⷭ҇тꙋ̀, и҆ дае́тъ ми́ръ неѡскꙋ́денъ. тѣ́мъ вопїе́мъ є҆мꙋ̀: молѝ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Глаго́лаше ра́дꙋѧсѧ вели̑чїѧ вседержи́телева, тѣ́мже ᲂу҆ди́вльшесѧ зрѧ́щїи, пре́лести ѡ҆ста́виша мꙋчи́тельство, и҆ вѣ́рою вопїѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Плени́цами премꙋ́дрыхъ твои́хъ слове́съ, преблаже́нне, ра́дꙋѧсѧ ᲂу҆лови́лъ є҆сѝ и҆зъ глꙋбины̀ неразꙋ́мїѧ пристꙋпа́ющыѧ, и҆ бжⷭ҇твєнны мꙋ́ченики содѣ́лалъ є҆сѝ, ѳео́дѡре, пою́щыѧ: бл҃гослове́нъ є҆сѝ, бж҃е ѻ҆тє́цъ на́шихъ.

Въ темни́цѣ къ дре́вꙋ тѧ̀ свѧ́зана, а҆́гг҃лъ свѧ́тъ прише́дъ разрѣшѝ, дерзнове́нїе даѧ̀ и҆ ᲂу҆крѣплѧ́ѧ тѧ̀ велегла́снѡ вопи́ти, ѳео́дѡре: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Менѐ жи́вша въ лѣ́ности, и҆ презрѣ́вша ст҃ы̑ѧ твоѧ̑ зако́ны, и҆ честны̑ѧ твоѧ̑, хрⷭ҇тѐ, за́пѡвѣди, ᲂу҆ще́дри и҆ спасѝ ро́ждшїѧ тѧ̀ ра́ди, ꙗ҆́кѡ бл҃годѣ́тель бг҃ъ и҆ многоми́лостивъ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Свѣ́тлѡ подвиза́всѧ, врага̀ побѣди́лъ є҆сѝ, и҆ потре́бль вѡ́инства є҆гѡ̀ ѻ҆рꙋ́жїи вѣ́ры: тѣ́мже побѣ́днымъ вѣнце́мъ ᲂу҆вѧ́злсѧ є҆сѝ, поѧ̀ влⷣцѣ: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

По распѧ́тїи сла́внѣ, по стра́сти блаже́ннѣй, по безмѣ́рныхъ ра́нахъ, блаже́нне, бг҃ꙋ вы́ю твою̀ приклони́лъ є҆сѝ, мꙋ́чениче мꙋ́дре, мече́мъ честна́ѧ глава̀ твоѧ̀ ᲂу҆сѣ́чена бы́сть, зовы́й влⷣцѣ: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Свѧще́нное, ѳео́дѡре, и҆ многострада́льное тѣ́ло твоѐ, и҆сто́чникъ и҆сцѣле́нїй вѣ̑рнымъ бы́сть, и҆зъ негѡ́же почерпа́ютъ бл҃гоче́стное притека́ющїи разрѣше́нїе страсте́й, и҆ дꙋ́шъ спасе́нїе, вопїю́ще влⷣцѣ: ѻ҆́троцы, благослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ: Оу҆мерщвле́ннꙋю ѡ҆живѝ, па́дшꙋю возста́ви, ᲂу҆ѧ́звленнꙋю дꙋ́шꙋ мою̀ и҆сцѣлѝ, ᲂу҆́мъ мо́й ᲂу҆мирѝ, напа́стей во́лны ᲂу҆кротѝ, дв҃о, и҆ вопїю́ща мѧ̀ спасѝ: ѻ҆́троцы, благослови́те, сщ҃е́нницы, воспо́йте, лю́дїе, превозноси́те гдⷭ҇а во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.

Ѡ҆свѧти́лъ є҆сѝ, бг҃омꙋ́дре мꙋ́чениче, са́мъ себѐ, поже́ршемꙋсѧ а҆́гнцꙋ и҆ бг҃ꙋ на́шемꙋ, возвы́сивсѧ ꙗ҆́кѡ всесожже́нїе благово́нно къ немꙋ̀, и҆ свѧще́нно возложе́нїе, и҆ соверше́нна и҆ чиста̀ бл҃гопрїѧ́тна же́ртва: тѣ́мже тѧ̀ восхвалѧ́емъ, и҆ по до́лгꙋ ᲂу҆блажа́емъ.

Ꙗ҆́кѡ ᲂу҆́тро, ꙗ҆́кѡ де́нь свѣтоза́ренъ ꙗ҆ви́лсѧ є҆сѝ, ѳео́дѡре, со́лнце свѣ́тлыми твоегѡ̀ страда́нїѧ лꙋча́ми, и҆ чꙋдесы̀, всеблаже́нне, подсо́лнечнꙋю благоче́стнѡ просвѣща́ѧ, и҆ ѿгонѧ̀ тмꙋ̀ пре́лести и҆ страсте́й на́шихъ, ѳео́дѡре.

Совокꙋпи́лсѧ є҆сѝ со а҆́гг҃лы пло́тїю, безплѡ́тныѧ врагѝ побѣ́ждь, и҆ со страда́льческими ли́ки весели́шисѧ всегда̀: и҆ съ ни́ми бжⷭ҇твеннꙋю пѣ́снь трⷪ҇цѣ возглаша́еши, ѳео́дѡре треблаже́нне, свѣти́льниче це́ркве, и҆ страстоте́рпцєвъ ᲂу҆добре́нїе.

Землѧ̀ положе́нїемъ твоегѡ̀ честна́гѡ, ѳео́дѡре, тѣлесѐ ѡ҆сщ҃а́етсѧ, не́бо же ра́дꙋетсѧ, дꙋ́хъ тво́й сщ҃е́нный стѧжа́въ: всегда̀ человѣ́цы па́мѧть твою̀ честнꙋ́ю творѧ́ще, моле́бнѡ про́симъ тѧ̀ моли́твенника ѡ҆ на́съ, преблаже́нне.

Бг҃оро́диченъ: Бг҃олюби́ваѧ дв҃о, бл҃га́го молѝ спⷭ҇тѝ мѧ̀ ѿ скве́рнъ всѣ́хъ, ꙗ҆́звы се́рдца моегѡ̀ ѡ҆мы́вши покаѧ́нїемъ чи́стымъ и҆ пла́чемъ сле́знымъ: да тѧ̀ ᲂу҆блажа́ю и҆ велича́ю, пренепоро́чнаѧ.

Свѣти́ленъ.

Полкѝ врагѡ́въ и҆ де́мѡнѡвъ на́глости до конца̀ низложи́лъ є҆сѝ, и҆ кончи́нꙋ прїѧ́лъ є҆сѝ, ѳео́дѡре блаже́нне, вѣ́ры ра́ди зижди́телѧ твоегѡ̀, ꙗ҆́кѡ свидѣ́тель и҆́стины спаса́еши всѣ́хъ ѿ всѧ́кихъ скорбе́й, и҆ вре́да чꙋжда́гѡ.

Сла́ва, и҆ ны́нѣ: Дх҃омъ во ст҃и́лищи предста́въ ста́рецъ, на рꙋ́ки воспрїѧ́тъ зако́на влⷣкꙋ, вопїѧ̀: ны́нѣ соꙋ̑зъ мѧ̀ плотски́хъ разрѣшѝ, ꙗ҆́коже ре́клъ є҆сѝ, съ ми́ромъ: ви́дѣхъ бо ѻ҆чи́ма ѿкрове́нїе ꙗ҆зы́кѡвъ, и҆ і҆и҃лю спасе́нїе.