Канон святому священномученику Савве Стратилату

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Ты̀ на́ше, гдⷭ҇и, ѿ а҆́довыхъ вра́тъ є҆стество̀ и҆зба́вль, того̀ затвори́лъ є҆сѝ въ темни́цахъ вѣ́чныхъ, и҆ сме́рть ᲂу҆мертви́въ, жи́знь и҆сточи́лъ є҆сѝ.

И҆́же на землѝ, сла́вне, во́инство ѡ҆ста́вль, нбⷭ҇нымъ чинѡ́мъ и҆ во́инствѡмъ, трꙋды̀ бжⷭ҇твенными сла́внѡ приче́лсѧ є҆сѝ, са́вво, сла́вѧ хрⷭ҇та̀.

Си́лою, мꙋ́дре, свы́ше ѡ҆дѣ́ѧнъ, на врагѝ неподви́жимь и҆ непобѣди́мь ꙗ҆ви́лсѧ є҆сѝ, си́хъ побѣжда́ѧ до́блественнѡ бра́нь, пресла́вне.

Присносїѧ́ненъ ѡ҆зари́лсѧ є҆сѝ въ преле́стнѣй но́щи свѣти́льникъ, хрⷭ҇та̀ сл҃нца проповѣ́дꙋѧ всѣ̑мъ пра́веднѡ, и҆ ѿгонѧ̀ тмꙋ̀ безбо́жїѧ.

Бг҃оро́диченъ: Ѿ землѝ преиспо́днїѧ на́съ и҆схи́ти, и҆з̾ тебє̀ роди́выйсѧ сн҃ъ бж҃їй, ꙗ҆́кѡ милосе́рдъ, свои́мъ воскрⷭ҇нїемъ къ жи́зни вѣ́чнѣй, при́снѡ пою́щыѧ тѧ̀.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Си́лꙋ хрⷭ҇то́съ борца̀, и҆ держа́вꙋ низло́жъ сме́рти, ѡ҆живѝ є҆стество̀ на́ше свои́мъ воскрⷭ҇нїемъ и҆ ᲂу҆крѣпѝ.

Те́плаѧ, премꙋ́дре, хрⷭ҇то́ва любы̀, тѧ̀ бжⷭ҇твеннѡ разже́гши, земны́хъ и҆ тлѣ́нныхъ всѣ́хъ ѿлꙋчѝ, и҆ пре́лести сꙋпоста́та показа̀.

Позна́въ творца̀ є҆ди́наго гдⷭ҇а, да́вшаго себѐ и҆збавле́нїе человѣ́кѡмъ, твою̀ кро́вь да́лъ є҆сѝ за него̀, са́вво, бꙋ́дꙋщагѡ ра́ди воздаѧ́нїѧ.

Бг҃оро́диченъ: Преста̀ мꙋчи́тельство сме́ртное, пречⷭ҇таѧ, и҆ а҆́дѡва сокрѡ́вища ᲂу҆праздни́шасѧ воста́нїемъ ро́ждшагѡсѧ и҆зъ тебє̀, и҆ жи́зни сокрѡ́вища напо́лнишасѧ.

Сѣда́ленъ, гла́съ д҃.

Неподви́жимь ꙗ҆́вльсѧ воево́да, ва̑рварскїѧ кѡ́зни побѣди́лъ є҆сѝ, и҆ пострада́въ, сла́вне, крѣ́пкѡ, полкѝ пребори́лъ є҆сѝ вра̑гъ неви́димыхъ. ѿѻнꙋ́дꙋже вѣнце́мъ ᲂу҆вѧ́злсѧ є҆сѝ побѣ́днымъ, ѡ҆ на́съ молѝ прилѣ́жнѡ, са́вво преблаже́нне, вѣ́рою пою́щихъ тѧ̀.

Бг҃оро́диченъ: По бз҃ѣ во тво́й, бцⷣе, прибѣга́ю смире́нный, покро́въ бжⷭ҇твенный, припа́даѧ молю́сѧ: поми́лꙋй, пречⷭ҇таѧ, ꙗ҆́кѡ превзыдо́ша главꙋ̀ мою̀ грѣсѝ, и҆ бою́сѧ, влⷣчце, мꙋ́ки, и҆ трепе́щꙋ: моле́нїе сотворѝ, чⷭ҇таѧ, къ сн҃ꙋ твоемꙋ̀, ѿ си́хъ и҆зба́вити мѧ̀.

Крⷭ҇тобг҃оро́диченъ: И҆́же ѿ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою̀ тѧ̀, долготерпѣли́ве.

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Ноже́мъ ѿсѣ́клъ є҆сѝ и҆́стинныхъ глагѡ́лъ твои́хъ, лжѝ сплетє́нїѧ до́блественнѣ, са́вво пресла́вне.

Цвѣтꙋ́щаѧ тѣлесѐ красота̀, въ тебѣ̀ и҆́стиннѡ ꙗ҆вѝ, страстоте́рпче, дꙋшѝ твоеѧ̀ бжⷭ҇твенное благолѣ́пїе.

Растꙋ́щимъ, сла́вне, дꙋше́внымъ мꙋ́жествомъ, дре́внѧго страда́ньми побѣди́лъ є҆сѝ борца̀.

Бг҃оро́диченъ: Ꙗ҆́кѡ ѿ ѕвѣ́рѧ, человѣ́ка тво́й сн҃ъ и҆схи́тивъ сме́ртна, къ животꙋ̀, дв҃о, сего̀ преста́ви.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

Ты̀ погребе́нїемъ пло́ти борца̀ на́шего погре́блъ є҆сѝ, и҆ ꙗ҆́кѡ бг҃ъ и҆стощи́въ а҆́да, воскресѝ мє́ртвыѧ свои́мъ воскрⷭ҇нїемъ, хрⷭ҇тѐ, тѧ̀ просла́вльшыѧ.

Оу҆кра́шенѣ мꙋ́дрѣ тва́рей добро́тѣ, позна́лъ є҆сѝ всѣ́хъ влⷣкꙋ. тѣ́мже є҆гѡ̀ ра́ди, са́вво, пострада́въ, вѣнцє́въ сподо́билсѧ є҆сѝ.

Та́йныхъ полꙋчи́въ дарова́нїй хрⷭ҇то́выхъ, сла́вне, и҆ тогѡ̀ незави́стнымъ сїѧ́нїемъ бжⷭ҇твеннѡ ᲂу҆ѧсни́всѧ, свѣти́льникъ показа́лсѧ є҆сѝ въ мі́рѣ, сла́вне.

Бг҃оро́диченъ: И҆сто́чникъ жи́зни и҆зъ тебє̀ вопло́щсѧ, воскр҃съ и҆сточѝ земноро́дныхъ є҆стество̀, бцⷣе, и҆ сїѐ ꙗ҆́кѡ бг҃ъ безсме́ртїѧ напоѝ вода́ми.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Погꙋби́въ сме́ртїю сме́рть, и҆́же на́съ ра́ди во́лею ме́ртвъ вмѣни́лсѧ є҆сѝ, хрⷭ҇тѐ, мє́ртвыѧ ѡ҆живи́лъ є҆сѝ, и҆ сеѧ̀ ᲂу҆́зъ и҆зба́вилъ є҆сѝ.

Ѡ҆кропи́всѧ хрⷭ҇та̀ бжⷭ҇твенною кро́вїю, і҆́дѡльскихъ тре́бъ ѡ҆скверне́нїѧ ѿстꙋпи́лъ є҆сѝ, са́вво сла́вне, и҆ свѣ́томъ ѡ҆дѣ́ѧвсѧ бл҃года́ти.

Зимы̀ пре́лести ѿбѣ́глъ є҆сѝ, и҆ къ ти́хой веснѣ̀ дости́глъ є҆сѝ хрⷭ҇то́вымъ позна́нїемъ, и҆́мже и҆ ѡ҆зари́лсѧ є҆сѝ, пресла́вне.

Бг҃оро́диченъ: И҆стлѣ́вшыѧ ны̀ прегрѣше́ньми, сн҃ъ тво́й, пречⷭ҇таѧ, воскрⷭ҇нїемъ свои́мъ ѡ҆бновѝ и҆ ѡ҆небесѝ, и҆ бо́ги содѣ́ла бл҃года́тїю.

Конда́къ, гла́съ д҃.

Непобѣди́мый ꙗ҆́вльсѧ стратила́тъ, ва̑рварскїѧ кѡ́зни побѣди́лъ є҆сѝ, и҆ страда́льчествовавъ, сла́вне, твердѣ́йши, мно́жество врагѡ́въ неви́димыхъ побори́лъ є҆сѝ. тѣ́мже вѣне́цъ и҆спле́лъ є҆сѝ побѣ́ды: ѡ҆ на́съ молѝ хрⷭ҇та̀, са́вво всебл҃же́нне, вѣ́рою почита́ющихъ тѧ̀.

Пѣ́снь з҃.

І҆рмо́съ: Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посрѣдѐ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆снꙋ́въ хрⷭ҇то́съ во́лею, ꙗ҆́кѡ ме́ртвъ пло́тїю во гро́бѣ, мє́ртвыѧ, и҆̀же во а҆́дѣ спѧ́щыѧ ѿ вѣ́ка, возбꙋдѝ, и҆ живоно́снымъ воста́нїемъ си́хъ воскресѝ, пою́щыѧ: бл҃гослове́нъ бг҃ъ ѻ҆тє́цъ на́шихъ.

Ѻ҆рꙋ́жїе, мꙋ́дре, бжⷭ҇твенныхъ слове́съ, ꙗ҆́кѡ но́жъ держа́въ, въ сердца̀ си́хъ вонзи́лъ є҆сѝ нече́ствꙋющихъ, и҆ ᲂу҆ѧзви́лъ є҆сѝ сопроти́вныхъ лѡ́жнаѧ беззакѡ́нїѧ, и҆ взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Запе́нъ бы́въ ѿ вра̑гъ, не поколеба́лъ є҆сѝ дꙋшѝ, ни низложе́нъ бы́лъ є҆сѝ, хрⷭ҇та́ бо и҆мѣ́ѧ назира́юща, и҆ ᲂу҆крѣплѧ́юща тѧ̀ непоколеби́ма. є҆мꙋ́же и҆ взыва́лъ, са́вво, и҆ благода́рнѡ воспѣва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Ме́ртва врага̀ подложѝ подъ но́ги твоѝ, страда́льче, ꙗ҆́коже коры́сть сегѡ̀ взѧ́лъ є҆сѝ прельщє́нныѧ, и҆ да́лъ є҆сѝ си́хъ влⷣцѣ всѣ́хъ, позна́нїемъ зовꙋ́щыѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Въ крѣ́пость держа́внꙋю ѡ҆дѣ́ѧвсѧ человѣ́ческое немощно́е є҆стество̀, дв҃о пресла́внаѧ, въ воста́нїи ржⷭ҇тва̀ твоегѡ̀, и҆ воѡрꙋже́но мꙋ́жески на сме́рть, сла́витъ тѧ̀, безсме́ртїѧ и҆ жи́зни мт҃рь чⷭ҇тꙋю.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Сме́рти ѡ҆брѣта́телѧ, сме́ртїю твое́ю плотско́ю ᲂу҆би́въ, ще́дре, сегѡ̀ всѣ̑мъ показа́лъ є҆сѝ человѣ́кѡмъ вѣ́чнꙋю сме́рть: тѧ̀ превозно́симъ, животѐ и҆ нетлѣ́нїе.

Тимѣ́нїѧ всегѡ̀ ѡ҆чи́щсѧ безбо́жнагѡ, и҆ слꙋже́нїѧ і҆́дѡльскагѡ, ба́нею, страстоте́рпче, кр҃ще́нїѧ, зижди́телю чи́стѣ пристꙋпи́лъ є҆сѝ, са́вво, въ по́двизѣхъ терпѧ̀ до́блественнѣ.

Медото́чнымъ сло́вомъ, мꙋ́дре, и҆ взо́ромъ сла́дкимъ ᲂу҆дивлѧ́ѧ мꙋчи́телѧ, дѣ́лы побѣди́тєльныѧ на ни́хъ поста́вилъ є҆сѝ, и҆ взыва́лъ: тѧ̀ превозно́симъ гдⷭ҇а во вѣ́ки.

Бг҃оро́диченъ: Живота̀ моегѡ̀ нача́льникъ, къ сме́рти пло́тїю пристꙋпи́въ, ᲂу҆мертвѝ сїю̀. ѡ҆живѝ, дв҃о, любо́вїю пою́щыѧ тѧ̀, и҆ превозносѧ́щыѧ того̀ во вѣ́ки.

Пѣ́снь ѳ҃.

І҆рмо́съ: Ѿ бг҃а, бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ: ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Ты̀ ᲂу҆тро́бꙋ а҆́довꙋ расто́ргъ, ще́дре, и҆стощи́лъ є҆сѝ того̀ ꙗ҆́кѡ си́ленъ, и҆ нбⷭ҇ный ѡ҆скꙋдѣ́вшїй напо́лнилъ є҆сѝ мі́ръ, воздви́гъ и҆ ѡ҆живи́въ мє́ртвыѧ, и҆ человѣ́ки всѧ̑ возне́слъ є҆сѝ разꙋмѣ́нїемъ твои́мъ.

Восте́къ на высотꙋ̀ ᲂу҆́мнѡ, страстоте́рпче, бжⷭ҇твеннагѡ позна́нїѧ хрⷭ҇то́ва, пре́лесть до́лꙋ влекꙋ́щꙋю ѡ҆ста́вилъ є҆сѝ и҆ крилы̀ страда́нїѧ къ семꙋ̀ возне́слсѧ є҆сѝ, прилѣ́жнѡ велича́ѧ и҆ сла́вѧ є҆го̀, ꙗ҆́кѡ пребл҃га.

Стрѣ́лы младе́нєцъ вмѣнѧ́ѧ стрѣлѧ́нїѧ мꙋчи́телей, си́лою ѿража́ѧ тѣ́хъ хрⷭ҇то́вою, са́вво пресла́вне, спобо́рника и҆мѣ́лъ є҆сѝ того̀, и҆ помога́юща тѝ при́снѡ: є҆го́же вѣ́рою и҆ любо́вїю непреста́ннѡ велича́лъ є҆сѝ.

Бг҃оро́диченъ: Ѡ҆блиста̀, дв҃о, сн҃ъ и҆ бг҃ъ тво́й, ѿ гро́ба воста́въ, бжⷭ҇твенныѧ зарѝ и҆ сла́вы и҆спо́лни вселе́ннꙋю, и҆ сїѧ́нїемъ нетлѣ́нїѧ, и҆̀же вѣ́рою свѣ́телъ тѧ̀ ѻ҆́блакъ, сла́вѧщыѧ просвѣти́лъ є҆́сть.