Канон святому священномученику Петру I Александрийскому

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Во свѣтлѣ́йшихъ селе́нїихъ житїѐ и҆мѣ́ѧ, просвѣще́нїе мѝ пода́ждь, моли́твами твои́ми, пе́тре всеблаже́нне.

Зна́нїю наꙋче́нъ, и҆ свѧще́нствомъ ᲂу҆краша́емь, всеблаже́нне пе́тре, хрⷭ҇тꙋ̀ прине́слсѧ є҆сѝ кро́вїю.

Оу҆́тварь ᲂу҆пещре́ннаѧ, ꙗ҆́коже многоцѣ́нное возложе́нїе хрⷭ҇то́вѣ цр҃кви ѿ бг҃а дарова́лсѧ є҆сѝ, блаже́нне:

Бг҃оро́диченъ: Пречⷭ҇таѧ бцⷣе, воплоще́нное, присносꙋ́щное и҆ пребжⷭ҇твенное сло́во па́че є҆стества̀ ро́ждшꙋю пое́мъ тѧ̀.

Пѣ́снь г҃.

І҆рмо́съ: Нѣ́сть ст҃ъ, ꙗ҆́кѡ гдⷭ҇ь, и҆ нѣ́сть пра́веденъ, ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.

Возше́лъ є҆сѝ ѣ҆́здѧ ꙗ҆́кѡ на колесни́цѣ, твое́ю кро́вїю, премꙋ́дре, къ нбⷭ҇нымъ, и҆дѣ́же предте́ча на́шъ хрⷭ҇то́съ вни́де, є҆ди́нъ безгрѣ́шный.

Жи́знь тлѣ́ннꙋю ѡ҆ста́вилъ є҆сѝ, и҆ жи́знь безсме́ртнꙋю ѡ҆брѣ́лъ є҆сѝ, блаже́нне, и҆дѣ́же вѣнцено́сецъ ликꙋ́еши, молѧ̀ спасти́сѧ дꙋша́мъ на́шымъ.

Ꙗ҆́коже фі́нїѯъ процвѣ́лъ є҆сѝ благопло́днѣйшїй: ꙗ҆́кѡ ма́слина плодоро́дна ꙗ҆ви́лсѧ є҆сѝ, бг҃одохнове́нне, во дво́рѣхъ гдⷭ҇нихъ, ꙗ҆́кѡ смѵ́рна и҆ лїва́нъ, и҆ ꙗ҆́кѡ мѵ́ро бл҃гово́ннѣйшее.

Бг҃оро́диченъ: Ꙗ҆́кѡ двє́ри спаси́тєльныѧ, и҆ ра́й кра́сный, свѣ́та присносꙋ́щнагѡ ѻ҆́блакъ, сꙋ́щꙋ ст҃ꙋ́ю дв҃ꙋ воспое́мъ всѝ, глаго́люще є҆́й: ра́дꙋйсѧ.

Конда́къ гла́съ д҃.

Цр҃кве недви́жимїи и҆ бжⷭ҇твеннїи пѵ́ргове, благоче́стїѧ бжⷭ҇твеннїи столпѝ, вои́стиннꙋ крѣ́пцыи, кли́менте съ петро́мъ всехва́льнїи, ва́шими моли́твами соблюди́те всѧ̑.

Сѣда́ленъ гла́съ и҃.

Ѿ вы́шнѧгѡ сꙋда̀ хрⷭ҇то́ва предста́тельствова ста́дꙋ, на па́житехъ благожи́зненныхъ ᲂу҆па́слъ є҆сѝ, всемꙋ́дрыми твои́ми догма̑ты, ѿгна́въ а҆́рїа ꙗ҆́кѡ во́лка некро́ткаго, вше́дшаго въ ни́хъ безбо́жными ᲂу҆чє́нїи. тѣ́мже и҆ дꙋ́шꙋ твою̀ положи́лъ є҆сѝ за ни́хъ, па́стырь наре́клсѧ є҆сѝ, ꙗ҆́кѡ речѐ гдⷭ҇ь: і҆ера́рше пе́тре блаже́нне, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ: Непоро́чнаѧ а҆́гница, и҆ нескве́рный черто́гъ, въ до́мъ бж҃їй бцⷣа марїа́мъ съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи блажа́тъ при́снѡ, и҆ благода́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ спасе́нїе ты̀ є҆сѝ, всенепоро́чнаѧ.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, проро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Добродѣ́телей ше́ствовавъ стезе́ю, ѻ҆́ч҃е, пости́глъ є҆сѝ ѻ҆би́тєли вы̑шнїѧ, бг҃оно́сне, свѧще́нства пома́занїемъ ᲂу҆кра́шенъ, и҆ мꙋче́нїѧ сїѧ́ѧ кро́вїю.

Тꙋ́чами пото́кѡвъ твои́хъ крове́й, бл҃же́нне, ᲂу҆гаси́лъ є҆сѝ пе́щь пре́лести, и҆ гонѧ́щихъ погꙋби́лъ є҆сѝ мра́къ, свѧщенномꙋ́чениче достосла́вне.

Но́вый пе́тръ нѣ́кїй на́мъ ꙗ҆ви́лсѧ є҆сѝ, и҆́стиннѡ а҆пⷭ҇льскими сїѧ́ѧ дарова̑нїи, свѧщеннодѣ́тель же и҆ свидѣ́тель стрⷭ҇те́й влⷣки твоегѡ̀, всебога́те.

Бг҃оро́диченъ: Всѣ́хъ до́брыхъ и҆сполне́нїе ро́ждши, и҆спо́лни на̑ша, дв҃о, молє́нїѧ, грѣхѡ́въ на́мъ и҆збавле́нїѧ просѧ́щи, и҆ просвѣще́нїѧ, и҆ ве́лїѧ ми́лости.

Пѣ́снь є҃.

І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

На ка́мень возше́дъ вѣ́ры, страстоте́рпче, неꙋкло́ненъ пребы́лъ є҆сѝ во и҆скꙋше́нїи сопроти́вныхъ.

Ѻ҆рꙋ́жїемъ пла́меннымъ дх҃а ст҃а́гѡ, і҆ера́рше, а҆́рїа вредосло́вца бжⷭ҇твеннымъ сꙋдо́мъ закла́лъ є҆сѝ.

Крѣ́постїю ᲂу҆крѣплѧ́емь, сла́вне, сп҃совою, вра́жїю си́лꙋ и҆ крѣ́пость попра́лъ є҆сѝ.

Бг҃оро́диченъ: Дв҃ꙋ по ржⷭ҇твѣ̀ пое́мъ тѧ̀, бцⷣе, ты́ бо бг҃а сло́ва пло́тїю мі́рꙋ родила̀ є҆сѝ.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Цѣломꙋ́дреннѡ и҆ пра́веднѡ бг҃ꙋ ты̀ жи́тельствовавъ, коне́цъ блаже́нный ѿ негѡ̀ прїѧ́лъ є҆сѝ, всеблаже́нне пе́тре.

Всесоверше́ннꙋю же́ртвꙋ и҆ прїѧ́тнꙋ, тебѐ сама́го прине́слъ є҆сѝ, пе́тре ди́вный, же́ртва тебє̀ ра́ди бы́вшемꙋ бг҃ꙋ.

Слове́съ дх҃о́вныхъ и҆спо́лнивсѧ, дх҃омъ дви́жимь ѻ҆рга́нъ бы́лъ є҆сѝ пѣснопоѧ̀, бг҃оглаго́ливе, неизречє́ннаѧ.

Бг҃оро́диченъ: Є҆ди́на сло́вомъ пло́тїю сло́во ро́ждшаѧ, и҆зба́ви, мо́лимсѧ, сѣте́й вра́жїихъ дꙋ́шы на́шѧ.

Конда́къ, гла́съ г҃.

Правосла́вными повелє́нїи цр҃ковь просвѣти́лъ є҆сѝ, за ню́же и҆ пострада́въ, бг҃обл҃же́нне ѻ҆́тче, а҆́рїа ѿстꙋ́пника ѿгна́въ, тѣ́мже твою̀ пречестнꙋ́ю па́мѧть соверша́юще, правосла́вно вопїе́мъ: ра́дꙋйсѧ, пе́тре, ка́меню вѣ́рѣ.

І҆́косъ:

Въ ди́внѣй а҆леѯандрі́и потщи́мсѧ ше́ствовати ᲂу҆мо́мъ и҆ ᲂу҆́зримъ вели́каѧ стра́ннаѧ, та́мо соверша́ема, ка́кѡ на же́ртвꙋ себѐ предлага́етъ, ꙗ҆́кѡ ѻ҆вча̀ неѕло́бивое, первосвѧще́нникъ и҆ вели́кїй побо́рникъ пе́тръ и҆ ны́нѣ созыва́етъ на́съ здѣ̀, и҆ ст҃ꙋ́ю свою̀ главꙋ̀ предложи́въ, ꙗ҆́кѡже снѣ́дь честнꙋ́ю, є҆ѧ́же наслади́вшесѧ всѧ̑, правосла́вно возопїе́мъ: ра́дꙋйсѧ, пе́тре, ка́меню вѣ́рѣ.

Пѣ́снь з҃.

І҆рмо́съ: Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ, глаго́люще: превозноси́мый ѻ҆тцє́въ и҆ на́шъ бж҃е, бл҃гослове́нъ є҆сѝ.

Житїе́мъ бг҃олѣ́пнымъ ᲂу҆кра́шенъ, и҆ бжⷭ҇твеннымъ свѣ́томъ просвѣща́емь нбⷭ҇ныхъ въ нехѡ́днаѧ вше́лъ є҆сѝ веселѧ́сѧ, и҆ вопїѧ̀, мꙋ́дре, сотво́ршемꙋ: бл҃гослове́нъ бг҃ъ ѻ҆тє́цъ на́шихъ.

Ꙗ҆́кѡ да пресвѣ́тлѡ благоꙋгоди́ши хрⷭ҇тꙋ̀ бг҃ꙋ, бг҃облаже́нне, въ рꙋ́ки беззако́нныхъ тѧ̀ сама́го пре́далъ є҆сѝ во́лею, поѧ̀, пребога́те: бл҃гослове́нъ бг҃ъ ѻ҆тє́цъ на́шихъ.

Ве́сь просвѣще́нъ, сподо́билсѧ є҆сѝ ви́дѣти хрⷭ҇та̀, тебѣ̀ показꙋ́юща свою̀ ри́зꙋ, лю́тѣ расте́рзанꙋ, и҆стка́ннꙋю свы́ше, прпⷣбне, бл҃гослове́нъ є҆сѝ, вопїѧ̀, бж҃е ѻ҆тє́цъ на́шихъ.

Бг҃оро́диченъ: Всѧ̀ ꙗ҆́кѡ чиста̀ прїѧ́ла є҆сѝ во ᲂу҆тро́бѣ твое́й сло́во воплоща́емо: но того̀ молѝ ѡ҆чи́стити мѝ прегрѣше́нїй дꙋ́шꙋ и҆ тѣ́ло, пречⷭ҇таѧ, къ тебѣ̀ чи́стою вѣ́рою прири́щꙋщагѡ.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте, и҆ превозноси́те во всѧ̑ вѣ́ки.

Жирꙋ́ющꙋю соскꙋ́талъ є҆сѝ па́гꙋбꙋ, а҆́рїева ѕлѣ́йшагѡ хꙋле́нїѧ, ѿ вѣ́рныхъ собо́рища ѿсѣ́къ, и҆ ѿгна́въ церко́вныхъ, бг҃омꙋ́дре, ѡ҆гра́дъ.

Первостоѧ́тель ли́ка а҆́гг҃льскагѡ пе́тръ ꙗ҆ви́сѧ, бжⷭ҇твенный верхо́вникъ, сто́лпъ же мꙋ́ченикѡвъ бы́лъ є҆сѝ, всемꙋ́дре пе́тре бг҃оно́се, и҆ свѧщеннодѣ́йствитель бжⷭ҇твенныхъ та́инствъ.

Наꙋчи́всѧ ѿ бжⷭ҇твеннагѡ вдохнове́нїѧ бꙋ́дꙋщихъ ра́зꙋмꙋ, бг҃оглаго́ливе, и҆ є҆́же ѿ землѝ проꙋвѣ́дѣвъ твоѐ преставле́нїе мꙋче́нїемъ, къ вы́шнихъ гдⷭ҇ꙋ сла́вы хрⷭ҇тꙋ̀ во вѣ́ки всѧ̑.

Бг҃оро́диченъ: Во ᲂу҆тро́бꙋ дв҃ы все́льшагосѧ, и҆ ѿ неѧ̀ стра́шнѡ и҆ па́че сло́ва дре́внѧго а҆да́ма ѡ҆бно́вльшаго гдⷭ҇а, по́йте и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, рождество̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

Пред̾ѡпредѣле́ннаго свѧще́ннѡ і҆ера́ршествовати, и҆ свѧще́нства коне́цъ благосла́внѡ прїи́мша, и҆ хрⷭ҇то́вꙋ подража́вша стрⷭ҇ть, петра̀ чꙋ́днаго воспои́мъ.

Жезло́мъ ᲂу҆крѣ́пльшасѧ си́лы гдⷭ҇ни, и҆ свѧще́нствовавша, и҆ свѧще́нствованна, и҆ хрⷭ҇тꙋ̀ прине́сшагосѧ же́ртва, петра̀ бг҃оно́снаго воспои́мъ.

Всесмѣше́ннаго заре́ю трⷪ҇чною, и҆ свѣтлѣ́йшагѡ є҆ѧ̀ насла́ждшасѧ сїѧ́нїѧ, и҆ на́мъ спасе́нїѧ просѧ́ща, петра̀ бг҃опрїѧ́тнаго воспои́мъ.

Дае́ши ѻ҆би́льнѡ дꙋшѝ мое́й спасе́нїе, ꙗ҆́кѡ первосвѧще́нникъ бо и҆́маши вла́сть вѧза́ти и҆ рѣши́ти прегрѣше́нїй вины̑, твои́ми молє́нїи, свѧще́ннѣйшїй.

Бг҃оро́диченъ: Ты̀ є҆сѝ, бцⷣе, ѻ҆рꙋ́жїе на́ше и҆ стѣна̀, ты̀ є҆сѝ застꙋпле́нїе къ тебѣ̀ прибѣга́ющихъ, тебѐ и҆ ны́нѣ на моли́твꙋ подвиза́емъ, да и҆зба́вимсѧ ѿ вра̑гъ на́шихъ.

Свѣти́ленъ.

Ны́нѣ благонаро́читъ ꙗ҆ви́сѧ на́мъ де́нь, и҆мꙋ́щи свѧще́нныхъ преє́мникъ, свѧще́нныхъ а҆пⷭ҇лъ, петра̀ кꙋ́пнѡ и҆ кли́мента, проповѣ́дники вѣ́ры, и҆ непобѣди̑мыѧ мꙋ́ченики: и҆́хже лѣ́тнюю па́мѧть вѣ́рнѡ соверша́емъ всѝ.

Сла́ва, и҆ ны́нѣ: Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ, и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇еви.