Канон святому священномученику Лаврентию Римскому, архидиакону

Пѣ́снь а҃.

І҆рмо́съ: Трїста́ты крѣ̑пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.

Въ цвѣ́тницѣ сла́дости ꙗ҆́кѡ хрⷭ҇то́въ во́инъ, досто́йнѡ наслажда́ѧсѧ, и҆ а҆́гг҃льскимъ сликовствꙋ́ѧй си́ламъ, сїѧ́нїе мѝ свѣтоно́сное дарова́ти молѝ, воспѣва́ющꙋ тѧ̀, блаже́нне лаѵре́нтїе.

Въ по́двиги вше́дъ честна́гѡ мꙋче́нїѧ побѣдоно́сный страда́лецъ тве́рдостїю дꙋшѝ показа́лсѧ є҆сѝ, лаѵре́нтїе, вѣнце́мъ пра́вды благолѣ́пнѡ ѡ҆дѣ́ѧвсѧ, и҆ дїади́мою побѣ́ды.

Сы́нъ ꙗ҆́кѡ бы́въ свѣ́та и҆ днѐ, пресла́внѡ ѿ за̑падъ ꙗ҆́кѡ со́лнце на́мъ чꙋ́вственнѡ возсїѧ́лъ є҆сѝ, заре́ю пресвѣ́тлою ѡ҆зарѧ́ѧ концы̀, всесла́вный мꙋ́чениче лаѵре́нтїе.

Бг҃оро́диченъ: И҆зба́вльшесѧ честны́мъ ржⷭ҇тво́мъ твои́мъ, дв҃о, а҆́дскихъ и҆ тлѣ́нныхъ ᲂу҆́зъ, и҆ зако́ннагѡ ѡ҆сꙋжде́нїѧ, пречⷭ҇таѧ, ра́дꙋйсѧ ѡ҆бра́дованнаѧ, благода́рнѡ вопїе́мъ тѝ, спаси́тельнаѧ две́ре благода́ти.

Пѣ́снь г҃.

І҆рмо́съ: Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

И҆мѣ́ѧй крⷭ҇та̀ побѣ́дꙋ къ сопротивобо́рцємъ до́блественнѣ ѡ҆полчи́лсѧ є҆сѝ, и҆ побѣ́ды вѣнцено́сецъ ꙗ҆ви́лсѧ є҆сѝ, досточꙋ́дне.

Зако́номъ хрⷭ҇то́вымъ ѡ҆гражде́нъ, законоположе́нїю ѕлочести́выхъ, ꙗ҆́кѡ непобѣди́мь сопроти́вилсѧ є҆сѝ, до́блимъ терпѣ́нїемъ, всеблаже́нне.

Си́лою бж҃їею ᲂу҆крѣплѧ́емь, многобо́жїѧ не́мощь разори́лъ є҆сѝ, хрⷭ҇то́во же превѣ́чное ᲂу҆ѧсни́лъ є҆сѝ бжⷭ҇тво̀.

Бг҃оро́диченъ: Ра́венъ ѻ҆ц҃ꙋ̀ и҆ дх҃ꙋ, є҆стество́мъ и҆ сꙋщество́мъ и҆ бж҃ество́мъ бы́сть, человѣ́кѡмъ ра́вно сло́во, вопло́щшеесѧ ѿ тебє̀, всенепоро́чнаѧ.

Сѣда́ленъ, гла́съ и҃.

Нбⷭ҇ное бога́тство собра́въ, и҆ ни́щымъ сїѐ прине́съ, расточи́лъ є҆сѝ, да́лъ є҆сѝ а҆́лчꙋщымъ хлѣ́бъ тво́й, и҆ си́мъ стѧжа́въ жи́знь нетлѣ́ннꙋю, во хрⷭ҇то́вѣ и҆сповѣ́данїи просїѧ́лъ є҆сѝ, сла́вне. тѣ́мже мꙋ́жествовавъ, и҆ зако́ннѡ пострада́въ, вѣне́цъ прїѧ́лъ є҆сѝ ѿ бг҃а трꙋдѡ́въ твои́хъ, страстоно́сче лаѵре́нтїе: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.

Сла́ва, и҆ ны́нѣ: Сокрове́ннꙋю мо́лнїю подъ пло́тїю сꙋщества̀ твоегѡ̀, хрⷭ҇тѐ, и҆ бжⷭ҇твеннагѡ благолѣ́пїѧ, на ст҃ѣ́й показа́лъ є҆сѝ горѣ̀, бл҃годѣ́телю, просїѧ́въ сꙋ́щымъ съ тобо́ю ᲂу҆ченикѡ́мъ: и҆ разꙋмѣ́вше нестерпи́мꙋ сꙋ́щꙋ сла́вꙋ твою̀, свѧ́тъ є҆сѝ, возопи́ша, ꙗ҆́кѡ непристꙋ́пенъ сы́й, ви́дѣнъ бы́лъ є҆сѝ пло́тїю мі́рови, є҆ди́не чл҃вѣколю́бче.

Пѣ́снь д҃.

І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ, прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Слꙋжи́тель сло́ва, и҆ сло́вомъ ᲂу҆кра́шенъ, сло́ва любо́вїю, нра́вомъ дꙋше́внымъ закала́етсѧ, и҆ съ сло́вомъ пра́веднѡ црⷭ҇твꙋетъ ны́нѣ, весе́лїѧ и҆ сла́вы є҆гѡ̀ насыща́ѧсѧ.

Дрема́нїемъ нече́стїѧ, благоче́стнѡ не воздрема́сѧ, бо́дростїю бжⷭ҇твенною, мꙋ́ченическимъ твои́мъ стоѧ́нїемъ, ѿ ѻ҆́чїю со́нъ и҆́же въ сме́рть ѿтрѧ́слъ є҆сѝ, мꙋ́чениче хрⷭ҇то́въ свѧще́нне.

На сопротивобо́рныхъ ѕлочести́вагѡ противле́нїѧ, и҆́стинными ѻ҆рꙋ́жїи благоче́стїѧ ѡ҆гра́ждсѧ, си́хъ до конца̀ низложи́лъ є҆сѝ па́мѧть, вѣ́ры ра́ди, и҆ нра́ва любо́вїю.

Бг҃оро́диченъ: Скве́рнꙋ всю̀ пе́рвыѧ ѿложи́вше снѣ́ди, живо́тнымъ хлѣ́бомъ съ нб҃сѐ напита́емсѧ, ѿ землѝ дв҃ы возсїѧ́вшагѡ: ю҆́же ꙗ҆́кѡ хода́таицꙋ благи́хъ воспои́мъ.

Пѣ́снь є҃.

І҆рмо́съ: Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ, но мы̀ тѧ̀, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.

Неꙋкло́ннымъ видѣ́нїемъ бжⷭ҇твенныѧ добрѡ́ты зрѧ̀, всѧ̑ кра̑снаѧ ꙗ҆̀же на землѝ, лаѵре́нтїе, ты̀ преѡби́дѣлъ є҆сѝ, и҆ лю̑тыѧ тѣ́ла болѣ̑зни, досточꙋ́дне.

Хрⷭ҇та̀ слꙋжи́телѧ бы́вша на́мъ, да́ры ѿ ѻ҆ц҃а̀ позна́въ, слꙋжи́тель тогѡ̀ бы́въ, къ немꙋ́же кро́вїю ѿше́лъ є҆сѝ, преблаже́нне.

Свѧще́нно возложе́нїе, и҆ ᲂу҆краше́нїе благолѣ́пно хрⷭ҇тꙋ̀, блаже́нне, прине́слсѧ є҆сѝ, сѣ́нь ᲂу҆ѧсни́лъ є҆сѝ нбⷭ҇нꙋю, и҆дѣ́же ны́нѣ быва́ѧ, наслажда́ешисѧ сїѧ́нїѧ.

Соесте́ственъ и҆ соѻбра́зенъ сы́й ѻ҆ц҃ꙋ̀, сн҃ъ є҆диноро́дный, человѣ́кѡмъ бы́сть во́лею сро́денъ, вопло́щсѧ вы́шнїй и҆зъ чре́ва твоегѡ̀, мт҃и дв҃о.

Пѣ́снь ѕ҃.

І҆рмо́съ: Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.

Веще́ственный ѻ҆́гнь тѧ̀ и҆спе́къ, цр҃ю̀ всѣ́хъ ᲂу҆стро́и сла́дко бра́шно, на́ше спасе́нїе лю́бѧщемꙋ, и҆ а҆́лчꙋщꙋ, всесла́вне.

Ве́сь свѣ́тꙋ прибли́жилсѧ є҆сѝ нача́льныѧ трⷪ҇цы, ꙗ҆́кѡ слꙋжи́тель тоѧ̀ сы́й свѣтови́дѣнъ, страстоте́рпче, бы́лъ є҆сѝ, ѡ҆зарѧ́ѧ пою́щыѧ тѧ̀.

Оу҆крѣплѧ́емь бжⷭ҇твенною си́лою на разжже́ннѣй сковрадѣ̀ лежа̀, терпѣ́лъ є҆сѝ, мч҃ниче, любо́вїю хрⷭ҇то́вою, дꙋ́шꙋ ѻ҆гне́мъ разжига́ѧ и҆ росо́ю дꙋхо́вною.

Бг҃оро́диченъ: Была̀ є҆сѝ бж҃їѧ мт҃и, дв҃о, вмѣсти́тельно прїѧ́телище, прⷭ҇то́лъ ѡ҆дꙋшевле́нъ, гора̀ свѧта̀, и҆ кївѡ́тъ, и҆ сѣ́нь богодѣ́лана, и҆ свѣ́щникъ златоза́ренъ.

Конда́къ, гла́съ в҃.

Ѻ҆гне́мъ бжⷭ҇твеннымъ распали́въ се́рдце твоѐ, ѻ҆́гнь страсте́й до конца̀ и҆спепели́лъ є҆сѝ, страда́льцєвъ ᲂу҆твержде́нїе, бг҃оно́се мꙋ́чениче лаѵре́нтїе, и҆ въ страда́нїихъ вопїѧ́лъ є҆сѝ вѣ́рнѡ: ничто́же мѧ̀ разлꙋчи́тъ любвѐ хрⷭ҇то́вы.

І҆́косъ:

Возсїѧ́вшаго ꙗ҆́кѡ свѣти́ло неле́стное въ мі́рѣ, соше́дшесѧ вѣ́рнїи всѝ пѣ́сньми почти́мъ лаѵре́нтїа страстоте́рпца, ꙗ҆́кѡ таи́нника неизрече́нныхъ: тогѡ̀ моли́твами и҆збавлѧ́емсѧ лю́тыхъ прегрѣше́нїй, сердца̀ ѡ҆чи́стивше, просла́вимъ хрⷭ҇та̀, того̀ прославлѧ́ющаго, крѣ́пка въ страда́нїи, и҆ глаго́люща: ничто́же мѧ̀ разлꙋчи́тъ ѿ любвѐ хрⷭ҇то́вы.

Пѣ́снь з҃.

І҆рмо́съ: Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.

Тайноводи́ти пред̾избра́нъ, и҆ слꙋжи́ти сло́вꙋ, сосꙋ́дъ показа́сѧ сщ҃е́нъ нбⷭ҇нагѡ хра́ма, и҆ возложе́нїе, воспѣва́ѧ сотво́ршемꙋ: препѣ́тый гдⷭ҇и бж҃е ѻ҆ц҃ъ на́шихъ, бл҃гослове́нъ є҆сѝ.

Зако́номъ живота̀ и҆́же во хрⷭ҇тѣ̀ ѡ҆гражда́емь, преблаже́нне, сꙋ́щымъ сме́рти и҆ тлѝ законоположи́телємъ, ᲂу҆ма̀ не подклони́лъ є҆сѝ, воспѣва́ѧ, лаѵре́нтїе: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.

Ꙗ҆́коже нѣ́кїй безболѣ́зненъ ꙗ҆́вѣ, тѣ́ломъ ѡ҆бложе́нъ, пребл҃же́нне, до́блимъ по́мысломъ на всеѧ́дца ѻ҆гнѧ̀ дерзнꙋ́лъ є҆сѝ, взыва́ѧ, пребога́те: препѣ́тый гдⷭ҇и бж҃е ѻ҆тє́цъ на́шихъ, бл҃гослове́нъ є҆сѝ.

Бг҃оро́диченъ: Две́рь показа́ласѧ є҆сѝ мы́сленнаѧ восто́ка вы́шнѧгѡ, ꙗ҆́вльшагѡсѧ на землѝ человѣ́кѡмъ и҆зъ тебє̀, бг҃оневѣ́сто, па́че сло́ва и҆ ᲂу҆ма̀, бг҃а ѻ҆тцє́въ бл҃гослове́ннагѡ.

Пѣ́снь и҃.

І҆рмо́съ: И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.

Тве́рдымъ ᲂу҆мо́мъ бы́лъ є҆сѝ нестерпи́магѡ пла́мене крѣпча́йшїй, ꙗ҆́кѡ въ чꙋжде́мъ тѣлесѝ сожига́емь, бл҃же́нне, вѣ́рою поѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Ѻ҆трокѡ́мъ трїе́мъ подо́бѧсѧ, и҆ ѻ҆гнѧ̀ погаси́лъ є҆сѝ ᲂу҆́глїе, росо́ю бжⷭ҇твенныѧ благода́ти, взыва́ѧ и҆ поѧ̀: всѧ̑ дѣла̀ благослови́те, по́йте гдⷭ҇а.

Просвѣще́нїе хрⷭ҇то́съ тебѣ̀ бы́въ, свое́ю крѣ́постїю препоѧ́са тѧ̀, и҆ къ себѣ̀ возведѐ, благоче́стнѡ пою́ще: всѧ̑ дѣла̀ благослови́те, по́йте гдⷭ҇а.

Ко́рене і҆ессе́ова же́злъ была̀ є҆сѝ, и҆ хрⷭ҇та̀ бг҃а моегѡ̀ и҆ гдⷭ҇а, па́че є҆стества̀ прозѧбла̀ є҆сѝ бжⷭ҇тва̀ цвѣ́тъ. всѧ̑ дѣла̀ да благословѧ́тъ, дв҃о, ржⷭ҇тво̀ твоѐ.

Пѣ́снь ѳ҃.

І҆рмо́съ: Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Соверше́нно заколе́нїе, и҆ прїѧ́тно кади́ло влⷣцѣ прине́слсѧ є҆сѝ: ꙗ҆́коже зла́то въ горни́лѣ, ѻ҆гне́мъ и҆скꙋси́всѧ страда́нїѧ, и҆ ᲂу҆краше́нїе цр҃кве бы́въ пе́рвенецъ, досточꙋ́дне.

Зрѣ́нїемъ неꙋкло́ннымъ къ бг҃ꙋ ѡ҆божа́емь, и҆ соедине́нїемъ лꙋ́чшимъ, сло́вомъ и҆ бжⷭ҇твеннымъ видѣ́нїемъ, свѣ́томъ кра́йнимъ, лаѵре́нтїе, просвѣти́лсѧ є҆сѝ свѣ́тлѡ. тѣ́мже тѧ̀ всѝ ᲂу҆блажа́емъ.

Ꙗ҆́кѡ со́лнце, бл҃же́нне, ѿ за́пада возсїѧ́лъ є҆сѝ, чꙋ́до ве́лїе и҆ пресла́вно, всю̀ просвѣща́ѧ цр҃ковь твои́ми блиста́ньми, досточꙋ́дне, и҆ согрѣва́ѧ всѧ̑ теплото́ю вѣ́ры. тѣ́мже тѧ̀ всѝ ᲂу҆блажа́емъ.

Бг҃оро́диченъ: Ѻ҆́бразы, всенепоро́чнаѧ, твоегѡ̀ рождества̀, прⷪ҇ро́цы ᲂу҆зрѣ́вше, и҆здале́ча си̑мъ наꙋчи́вшесѧ, ѿ бжⷭ҇твеннагѡ вдохнове́нїѧ дх҃а, мі́рꙋ велегла́снѡ проповѣ́даша, и҆́хже сбытїє́мъ ны́нѣ чꙋди́мсѧ.