Канон святому священномученику Клименту, папе Римскому

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Ѿ петра̀ бжⷭ҇твеннагѡ наꙋчи́всѧ, а҆пⷭ҇лѡвъ верхо́внагѡ, и҆ ѿ негѡ̀ навы́къ бжⷭ҇твенное зна́нїе, ѻ҆́тче, і҆́дѡльскꙋю ле́сть ѡ҆бличи́лъ є҆сѝ.

Ло́зꙋ бг҃онасажде́нꙋ на землѝ, плоды̀ добродѣ́тєльныѧ ᲂу҆че́нїй всеблагочести́выхъ, хрⷭ҇то́съ тѧ̀ предлага́етъ, и҆́стиннѡ сꙋ́щїй цвѣтꙋ́щь вїногра́дъ.

Во всѧ̑ концы̀ протечѐ вои́стиннꙋ бжⷭ҇твенныхъ повелѣ́нїй твоѐ вѣща́нїе, кли́менте мꙋ́дре, и҆ всѧ̑ просвѣтѝ трⷪ҇цꙋ бг҃осло́вити, во є҆ди́нствѣ бж҃ества̀.

Бг҃оро́диченъ: Сѐ проречє́нїѧ прⷪ҇ро́чєскаѧ ѡ҆ тебѣ̀ прїѧ́ша коне́цъ вои́стиннꙋ: сло́во бо безъ сѣ́мене заче́нши, бг҃ороди́тельнице, пло́тїю родила̀ є҆сѝ.

Пѣ́снь г҃.

І҆рмо́съ: Стра́хъ тво́й, гдⷭ҇и, всадѝ въ сердца̀ ра̑бъ твои́хъ, и҆ бꙋ́ди на́мъ ᲂу҆твержде́нїе, тѧ̀ во и҆́стинѣ призыва́ющихъ.

Бога́тнѡ и҆злїѧ́сѧ дх҃а благода́ть въ твоѧ̑ ᲂу҆стна̀, мꙋ́дре, є҆́юже всѧ̑ просвѣти́лъ є҆сѝ, бжⷭ҇твенными твои́ми ᲂу҆чє́нїи, и҆ хрⷭ҇тꙋ̀ приве́лъ є҆сѝ.

Ѻ҆гне́мъ воздержа́нїѧ ты̀ попали́лъ є҆сѝ страсте́й ѻ҆гнепа̑льнаѧ стремлє́нїѧ, и҆ хра́мъ себѐ соверши́въ дх҃а бжⷭ҇твеннагѡ, доблемꙋ́дренне ѻ҆́тче.

На го́рꙋ бжⷭ҇твенныхъ добродѣ́телей возше́дъ, и҆ мра́комъ покры́всѧ разꙋ́мнымъ, ᲂу҆зрѣ́лъ є҆сѝ неизрече́ннꙋю въ чи́стѣй дꙋшѝ твое́й дꙋхо́внꙋю зарю̀.

Бг҃оро́диченъ: Неизрече́ннѡ зачала̀ є҆сѝ, пречⷭ҇таѧ, сп҃са и҆ гдⷭ҇а, и҆зба́вльшаго на́съ ѿ лю́тыхъ, тѧ̀ во и҆́стинѣ призыва́ющихъ.

Сѣда́ленъ, гла́съ д҃:

Возсїѧ́въ ꙗ҆́коже сл҃нца зарѧ̀, и҆ блиста́еши, прпⷣбне, всемꙋ̀ мі́рꙋ свѣ́тлѡ, ᲂу҆чє́нїи твои́ми, бг҃огла́се кли́менте свѣтоно́сне, мꙋ́ченикѡвъ похвало̀.

Сла́ва: Ꙗ҆́кѡ многопло́дна лоза̀, на землѝ простре́нъ мꙋ́къ пресѣче́нїемъ, кра́сныѧ возрасти́лъ є҆сѝ, досточꙋ́дне, грѡ́зны, сп҃сє́нныѧ сла́дости принесѐ, иска́плюща и҆ сєрдца̀ всѣ́хъ вѣ́рныхъ веселѧ́ща. тѣ́мъ, соше́дшесѧ, ст҃ꙋ́ю твою̀ па́мѧть твори́мъ, ра́дꙋющесѧ, и҆ хрⷭ҇та̀ велича́емъ: ст҃и́телю многостра́стне, молѝ хрⷭ҇та̀ бг҃а спⷭ҇ти́сѧ дꙋша́мъ на́шымъ.

И҆ ны́нѣ: Непоро́чнаѧ а҆́гница, и҆ нескве́рный черто́гъ, въ до́мъ бж҃їй бцⷣа марїа́мъ съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи блажа́тъ при́снѡ, и҆ благода́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ спасе́нїе ты̀ є҆сѝ, всенепоро́чнаѧ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Ѿ за́пада прише́дъ, бл҃же́нне, къ восто́кꙋ, петрꙋ̀ примѣси́лсѧ є҆сѝ а҆пⷭ҇лꙋ: и҆ тогѡ̀ бжⷭ҇твенными свѣтлостьмѝ, и҆ ᲂу҆чє́нїи просвѣща́емь, съ ни́мъ возвѣща́ѧ спаси́тельное сло́во, за́паднꙋю всю̀ проте́клъ є҆сѝ странꙋ̀.

Дрꙋгі́й мѡѷсе́й, кли́менте мꙋ́дре, бы́лъ є҆сѝ, зако́ны бжⷭ҇твєнныѧ всѣ̑мъ и҆злага́ѧ, и҆ свѧщє́ннаѧ пишѧ̀ ᲂу҆чє́нїѧ, и҆ цр҃ко́вное всѐ вчинѧ́еши и҆сполне́нїе. ѿсю́дꙋ законополо́жника тѧ̀ и҆ ᲂу҆чи́телѧ всѝ и҆мꙋ́ще, вѣ́рою чти́мъ.

По́стническими пѡ́ты ѡ҆чи́стивсѧ, свѧщеннонача́льникъ, блаже́нне, ꙗ҆ви́лсѧ є҆сѝ, къ благочести́вѣй вѣ́рѣ хрⷭ҇то́вѣй всѧ̑ возводѧ̀ бжⷭ҇твенными твои́ми сказа̑нїи: пострада́въ же зако́ннѡ, подо́бнѣ болѣ́зни сплетѐ вѣне́цъ, приснопа́мѧтне.

Бг҃оро́диченъ: Съ бг҃омъ тѧ̀ застꙋ́пницꙋ стѧжа́хомъ: ты́ бо мт҃и бж҃їѧ была̀ є҆сѝ творца̀ и҆ содѣ́телѧ, на́шъ ѻ҆́бразъ прїе́мша, пренепоро́чнаѧ, и҆ того̀ спа́сша ѿ тлѝ и҆ сме́рти, и҆ сла́вою бжⷭ҇твенною просла́вльшагѡ.

Пѣ́снь є҃.

І҆рмо́съ: Просвѣтѝ на́съ повелѣ́нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Во свѣ́тѣ за́повѣдей ходѧ̀ гдⷭ҇нихъ, ча́до вои́стиннꙋ ꙗ҆ви́лсѧ є҆сѝ тогѡ̀, блаже́нне, нело́жное.

Всегѡ̀ на землѝ ты̀ ѿре́клсѧ є҆сѝ пристра́стїѧ, свѧщеннонача́льниче, да бꙋ́дꙋщее благосла́вїе полꙋчи́ши, и҆ свѣ́тлости сла́вы хрⷭ҇то́вы.

Мч҃ническими ᲂу҆кра́шенъ свѣтлостьмѝ, со а҆́гг҃лы ны́нѣ предстои́ши влⷣцѣ, ѡ҆ пою́щихъ моли́сѧ.

Бг҃оро́диченъ: Мт҃и бж҃їѧ, вѣ́рою тѧ̀ пою́щыѧ ѿ бѣ́дъ и҆зба́ви моли́твами твои́ми, дв҃о, ꙗ҆́кѡ тѧ̀ предста́тельницꙋ вѣ́мы, чⷭ҇таѧ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Ре́вностїю разжже́нъ гдⷭ҇ни любвѐ, мꙋ́дре, і҆́дѡльскꙋю ле́сть ѡ҆бличи́лъ є҆сѝ крѣ́пкѡ слове́сными противлє́нїи, и҆ чꙋде́сными ꙗ҆влє́нїи, всехва́льне.

Недрема́нно соблю́лъ є҆сѝ ѻ҆́ко се́рдца твоегѡ̀, на ѕло́бꙋ ника́коже воздрема́въ, сла́вне, бжⷭ҇твенными восхождє́нїи вчинѧ́ѧ добродѣ́телей къ верхо́вномꙋ.

Ꙗ҆́кѡ і҆ера́рхъ че́стенъ, вѧза́ти и҆ рѣши́ти прегрѣшє́нїѧ вла́сть прїи́мъ ѿ сп҃са хрⷭ҇та̀, мно́гихъ мои́хъ прегрѣше́нїй до́лгъ разрѣшѝ, возводѧ̀ къ покаѧ́нїю.

Бг҃оро́диченъ: Твои́ми мольба́ми, чⷭ҇таѧ, бѣ́дъ и҆ напа́стей и҆схи́ти мѧ̀ лю́тыхъ, и҆ и҆зба́ви мѧ̀, молю́сѧ: ты́ бо стѣна̀ є҆сѝ неразрꙋши́ма, и҆ приста́нище и҆ покро́въ, и҆ неѡбори́мое ᲂу҆твержде́нїе.

Конда́къ, гла́съ в҃.

Бжⷭ҇твеннагѡ вїногра́да свѧщенноѡдѣ́ѧнна всѣ́мъ лоза̀ ꙗ҆ви́сѧ, ка́плющи сла́дость премⷣрости, моли́твами твои́ми, всече́стне, да тебє̀ и҆стка́нꙋ, ꙗ҆́кѡ багрѧни́цꙋ, пѣ́снь мы́сленнꙋю принесе́мъ, кли́менте свѧ́тѣ, сп҃сѝ рабы̀ твоѧ̀.

І҆́косъ:

Ка́кѡ возмогꙋ̀ а҆́зъ, стра́нный, воспѣ́ти и҆ глаго́лати по́двиги ны́нѣ бжⷭ҇твеннагѡ свѧщенномꙋ́ченика; ка́кѡ въ мо́рѣ вве́рженъ бы́сть и҆ глꙋбинѣ̀ пре́данъ бы́сть морстѣ́й, но хрⷭ҇то́съ бг҃ъ, є҆гѡ́же возлюбѝ вельмѝ, да́стъ и҆ па́ки возлюби́вшымъ, ꙗ҆́кѡ да́ръ многоцѣ́нный, и҆ ѻ҆троча̀ да́стъ роди́телема, свѣ́тлѡ и҆гра́юще, и҆ сп҃сѝ ско́ро рабы̀ твоѧ̀.

Пѣ́снь з҃.

І҆рмо́съ: Ѻ҆́троцы благочести́вїи въ вавѷлѡ́нѣ ѻ҆́бразꙋ злато́мꙋ не поклони́шасѧ, но посредѣ̀ пе́щи ѻ҆́гненныѧ ѡ҆роша́еми, пѣ́снь воспѣва́хꙋ глаго́люще: превозноси́мый ѻ҆тцє́въ и҆ на́съ бж҃е, бл҃гослове́нъ є҆сѝ.

Ꙗ҆́коже ᲂу҆́тро возсїѧ́лъ є҆сѝ, просвѣща́ѧ землѝ всѧ̑ концы̀, и҆ но́щь преле́стнꙋю ѿгонѧ̀, бг҃огла́се, і҆́дѡльскагѡ безбо́жїѧ: бл҃гослове́нъ є҆сѝ, вопїѧ̀, бж҃е ѻ҆тє́цъ на́шихъ.

Всѧ̑ спастѝ хотѧ̀ бг҃ъ твои́ми моли́твами, прозрѣ́нїе дарова̀ сїсі́нїю, и҆ дꙋшѝ и҆ тѣлесѝ ѻ҆чеса̀ ѿве́рзъ, ѻ҆́тче: ѿтꙋ́дꙋ просвѣща́етсѧ бжⷭ҇твенною ба́нею.

Стрꙋи̑ и҆сцѣле́нїй то́чиши, ѿ бжⷭ҇твенныѧ твоеѧ̀ ра́ки, кли́менте сла́вне: страсте́й мно́гихъ и҆збавлѧ́еши всегда̀ притека́ющыѧ къ тебѣ̀, и҆ пою́щыѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Подоба́ше безъ сѣ́мене воплоща́емомꙋ и҆зъ тебє̀ проитѝ, дв҃о пречⷭ҇таѧ: ты́ бо возрасла̀ є҆сѝ всѣ́хъ, чⷭ҇таѧ, пребо́льши. тѣ́мже тѝ непреста́ннѡ зове́мъ: благослове́нъ пло́дъ чре́ва твоегѡ̀.

Пѣ́снь и҃.

І҆рмо́съ: Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славосло́вѧхꙋ во всѧ̑ вѣ́ки.

Оу҆чени́къ бы́въ петро́въ, бжⷭ҇твєнныѧ нра́вы тогѡ̀ подража́ѧ, кли́менте страда́льче, тѣ́мже и҆ престо́ла прее́мникъ и҆́стиннѡ показа́лсѧ є҆сѝ, просвѣща́ѧ всю̀ тва́рь.

Та́йнѡ ѡ҆червлени́въ твоѧ̑ ᲂу҆стна̀ ча́шею мꙋ́дрости, кли́менте, и҆зры́гнꙋлъ є҆сѝ бжⷭ҇твенныхъ ᲂу҆че́нїй пꙋчи́нꙋ, потоплѧ́ющꙋю демѡностра́шїе, дꙋша́мъ же человѣ́чєскимъ и҆сточа́ющꙋю спасе́нїе.

Ꙗ҆́кѡ пречестнꙋ́ю ᲂу҆́тварь цр҃ковь стѧжа́вши, твоѧ̑ бжⷭ҇твєннаѧ законоположє́нїѧ, ѡ҆ тебѣ̀ хва́литсѧ, и҆ всѧ̑ подвиза́етъ, твою̀ па́мѧть вѣ́рою почита́ти во всѧ̑ вѣ́ки.

Бг҃оро́диченъ: Марі́е дв҃о бцⷣе, бг҃а сп҃са человѣ́кѡмъ ро́ждшаѧ пло́тїю, спасѝ вѣ́рою пою́щыѧ твоѐ ржⷭ҇тво̀, и҆ превозносѧ́щыѧ во всѧ̑ вѣ́ки.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.

Тече́нїе твоѐ соверши́въ мно́гими пѡ́двиги, и҆ несомнѣ́ннѡ соблю́дъ вѣ́рꙋ хрⷭ҇то́вꙋ, пра́веднымъ вѣнце́мъ ᲂу҆краси́лсѧ є҆сѝ.

Ꙗ҆́кѡ спа́слъ є҆сѝ ѻ҆́трока дре́вле, ᲂу҆держа́на въ мо́ри лѣ́тнымъ ѡ҆бхожде́нїемъ, мꙋ́чениче хрⷭ҇то́въ, си́це глꙋбины̀ грѣхо́вныѧ и҆ менѐ спасѝ.

Любо́вїю тѧ̀ чтꙋ́щыѧ, кли́менте страстоте́рпче, ѿ напа́стей и҆ бѣ́дъ и҆ скорбе́й спасѝ, молѧ̀ зижди́телѧ хрⷭ҇та̀.

Бг҃оро́диченъ: Ра́дости моѐ се́рдце и҆спо́лни, дв҃о, ꙗ҆́же ра́дости прїе́мшаѧ и҆сполне́нїе, грѣхо́внꙋю печа́ль потреблѧ́ющи.

Свѣти́ленъ.

Ны́нѣ благонаро́читъ ꙗ҆ви́сѧ на́мъ де́нь, и҆мꙋ́щи свѧще́нныхъ преє́мникъ, свѧще́нныхъ а҆пⷭ҇лъ, петра̀ кꙋ́пнѡ и҆ кли́мента, проповѣ́дники вѣ́ры, и҆ непобѣди̑мыѧ мꙋ́ченики: и҆́хже лѣ́тнюю па́мѧть вѣ́рнѡ соверша́емъ всѝ.

Сла́ва, и҆ ны́нѣ: Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ, и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇еви.