Канон святому священномученику Дорофею Тирскому

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ:

Да́ръ бг҃ꙋ, всеблаже́нне, тебѐ сама́го прине́слъ є҆сѝ, чистѣ́йшїй, житїе́мъ соверше́ннымъ и҆ честны́мъ мꙋче́нїемъ, дѡроѳе́е.

Ꙗ҆́коже зрѣ́лъ гро́здъ, ѻ҆́тче, и҆згне́тъ мы́сль, весе́лїѧ ча́шꙋ вѣ̑рнымъ ᲂу҆чє́нїѧ предложи́лъ є҆сѝ.

То́ки лє́стныѧ ᲂу҆ста́вилъ є҆сѝ, дѡроѳе́е, тече́ньми премꙋ́драгѡ твоегѡ̀ ѧ҆зы́ка, и҆ вѣ́рныхъ мы̑сли напои́лъ є҆сѝ.

Бг҃оро́диченъ: Ѡ҆дожди́ ми, дв҃о, молю́сѧ, ка̑пли ᲂу҆миле́нїѧ, прибы́вшꙋю мѝ скве́рнꙋ ѿмыва́ющыѧ, ꙗ҆́кѡ да сла́влю тѧ̀.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Но́щь ѿгна́лъ є҆сѝ сꙋ́етства всѧ́кꙋ, блиста̑нїи, ѻ҆́тче ст҃и́телю, премꙋ́драгѡ проповѣ́данїѧ.

Чꙋдесы̀ ᲂу҆тверди́лъ є҆сѝ, и҆ свѧще́нными, мꙋ́дре, ᲂу҆чє́нїи, вѣ́рныхъ всѣ́хъ мы̑сли, ꙗ҆́кѡ па́стырь свѧще́ненъ.

Пома́за тѧ̀ гдⷭ҇ь сщ҃е́ннымъ, ѻ҆́тче, пома́занїемъ, и҆ своеѧ̀ бжⷭ҇твенныѧ цр҃кве пастыренача́льника поста́ви.

Бг҃оро́диченъ: Всѐ се́рдце моѐ бжⷭ҇твеннымъ свѣ́томъ просвѣтѝ, две́ре свѣ́та, грѣхо́вное ѡ҆мраче́нїе ѿгонѧ́щи.

Сѣда́ленъ, гла́съ г҃.

Бжⷭ҇твенными догма̑ты при́снѡ сїѧ́ющь да́ръ ст҃ы́й тебѐ сама́го прине́слъ є҆сѝ безсме́ртномꙋ цр҃ю̀, пострада́въ, дѡроѳе́е, и҆ ѡ҆бита́еши ны́нѣ при́снѡ веселѧ́сѧ, перворо́дныхъ въ го́рнѣй митропо́лїи. ѻ҆́тче преподо́бне, хрⷭ҇та̀ бг҃а молѝ, дарова́ти на́мъ ве́лїю ми́лость.

Бг҃оро́диченъ: Бжⷭ҇твеннагѡ є҆стества̀ не ѿлꙋ́чсѧ, пло́ть бы́въ во чре́вѣ твое́мъ: но бг҃ъ вочл҃вѣ́чсѧ и҆ пребы́сть, и҆́же по рождествѣ̀ мт҃рь тѧ̀ дв҃ꙋ, ꙗ҆́кѡ пре́жде рождества̀, сохрани́въ всенепоро́чнꙋ є҆ди́нъ гдⷭ҇ь. того̀ прилѣ́жнѡ молѝ, дарова́ти на́мъ ве́лїю ми́лость.

Крⷭ҇тобг҃оро́диченъ: Нескве́рнаѧ а҆́гница сло́ва, нетлѣ́ннаѧ дв҃а мт҃и, на крⷭ҇тѣ̀ зрѧ́щи повѣ́шена и҆зъ неѧ̀ безъ болѣ́зни прозѧ́бшаго, мт҃рски подо́бнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Возноси́мꙋю ѡ҆плева́лъ є҆сѝ, преподо́бне, зи́мꙋ безбо́жїѧ, и҆ теплото́ю бжⷭ҇твеннагѡ дх҃а невреди́мо се́рдце соблю́лъ є҆сѝ.

Сокрꙋши́шасѧ, дѡроѳе́е блаже́нне, предъ лице́мъ твои́мъ го́ры нꙋ́ждныѧ дє́мѡнскїѧ, и҆ и҆ста́ѧша ѕлочести́выхъ человѣ̑къ шата̑нїѧ.

Терпѣ́лъ є҆сѝ ѡ҆скорблѧ́емь, ѿ гра́да во гра́дъ и҆згони́мь: тѣ́мже блаже́ннꙋю ᲂу҆лꙋчи́лъ є҆сѝ мꙋ́чєникъ сла́вꙋ и҆ свѣ́тлость.

Бг҃оро́диченъ: И҆скꙋше́нїй мѧ̀ спасѝ и҆ дꙋшетлѣ́нныѧ страсте́й бꙋ́ри: ꙗ҆́кѡ да вѣ́рою ᲂу҆блажа́ю тѧ̀, прест҃а́ѧ ѻ҆трокови́це мт҃и дв҃о.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Смотрѧ́ѧ разꙋ́мнѡ воздаѧ̑нїѧ бжⷭ҇твєннаѧ, дѡроѳе́е, вели̑кїѧ бѣды̑ и҆ напа̑сти претерпѣ́лъ є҆сѝ.

Є҆ди́нствомъ бжⷭ҇тва̀ проповѣ́даѧ трⷪ҇цꙋ, дѡроѳе́е, многобо́жнагѡ неи́стовства сꙋ́етное погꙋби́лъ є҆сѝ шата́нїе.

Не поклони́всѧ, мꙋ́чениче, дѣлѡ́мъ рꙋ́къ беззако́нныхъ, терпѣ́лъ є҆сѝ и҆скꙋшє́нїѧ и҆ бѣды̑, и҆ ра̑ны, и҆ болѣ̑зни, дѡроѳе́е.

Бг҃оро́диченъ: Восто́къ со́лнца, пре́жде денни́цы возсїѧ́вшагѡ была̀ є҆сѝ, и҆́мже свѣ́тъ сꙋ́щїй во тмѣ̀ лю́тыхъ, чⷭ҇таѧ, ви́дѣша.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ, ꙗ҆́кѡ ри́зою, многоми́лостиве хрⷭ҇тѐ бж҃е на́шъ.

Се́рдце разжже́но дыха̑нїи дх҃а стѧжа́лъ є҆сѝ, дꙋхѡ́въ, дѡроѳе́е, сопроти́вныхъ стремле́нїе разрꙋша́ющо.

Ст҃ы́хъ житїѧ̑ сщ҃е́нными списа́ньми ꙗ҆ви́лъ є҆сѝ, ѻ҆́тче бг҃одохнове́нне, бжⷭ҇твеннымъ ра́зꙋмомъ дꙋ́шꙋ просвѣща́ѧ.

Глагѡ́лъ твои́хъ вѣща́нїе, и҆ кра́сныхъ ᲂу҆че́нїй си́ла, всю̀ ѡ҆бтечѐ, преблаже́нне, зе́млю, бжⷭ҇твенною бл҃года́тїю.

Бг҃оро́диченъ: Дв҃о, є҆го́же родила̀ є҆сѝ бг҃а, чл҃вѣ́ка бы́вша, того̀ молѝ и҆зба́вити мѧ̀ ѻ҆гнѧ̀ и҆ мꙋ́ки.

Конда́къ, гла́съ є҃:

Добродѣ́тельми сїѧ́ѧ, и҆ бжⷭ҇твенными ᲂу҆чє́нїи па́че со́лнца, и҆ страда̑нїи, блаже́нне, ѡ҆блиста́лъ є҆сѝ, просвѣти́лъ є҆сѝ зе́млю, дѡроѳе́е, ѿгна́въ мглꙋ̀ многобо́жїѧ, и҆ лю̑тыѧ є҆́рєси. сегѡ̀ ра́ди па́мѧть твою̀ свѣ́тлѡ пра́зднꙋемъ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Ѕвѣзда̀ многосвѣ́тлаѧ ꙗ҆ви́лсѧ є҆сѝ, свѣтлостьмѝ страда́нїй твои́хъ просвѣща́ѧ дꙋ́шы вѣ́рнѡ, дѡроѳе́е, вопїю́щихъ: благослове́нъ є҆сѝ, гдⷭ҇и бж҃е, во вѣ́ки.

Стезѧ́ми пра́выми ходѧ̀, низве́рглъ є҆сѝ дє́бри льсти́вагѡ, и҆ къ пꙋтє́мъ живѡ́тнымъ наставлѧ́ѧ вопїю́щыѧ: бл҃гослове́нъ є҆сѝ, гдⷭ҇и бж҃е, во вѣ́ки.

Оу҆гаси́лъ є҆сѝ тꙋ́чами крове́й твои́хъ, всесла́вне, пе́щь преле́стнꙋю, и҆ на водѣ̀ жи́зни всели́лсѧ є҆сѝ, взыва́ѧ: благослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: И҆зба́ви соꙋ̑зъ грѣха̀ ѻ҆каѧ́ннꙋю мою̀ дꙋ́шꙋ, бг҃ороди́тельнице, и҆ любвѝ бж҃їей припрѧзѝ соверше́ннѣ, да вѣ́рнѡ сла́влю тѧ̀, бцⷣе, во вѣ́ки.

Пѣ́снь и҃.

І҆рмо́съ: Бг҃оглаго́ливїи ѻ҆́троцы, въ пещѝ со ѻ҆гне́мъ пла́мень попира́юще, поѧ́хꙋ: благослови́те, дѣла̀ гдⷭ҇нѧ, гдⷭ҇а.

Хва́лѧщагосѧ ѕмі́ѧ въ ѕло́бѣ, смири́всѧ ѡ҆ гдⷭ҇ѣ, ѻ҆́тче, смири́лъ є҆сѝ, вопїѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Во глꙋбо́цѣй тѧ̀ ста́рости, въ нестарѣ́ющихсѧ поко́йныхъ мѣ́стѣхъ зижди́тель вселѝ, сщ҃е́нный ѻ҆́тче, мꙋ́ченикѡвъ ᲂу҆краше́нїе.

Житїѐ равноа́гг҃льно и҆мѣ́ѧ, со а҆́гг҃лы влⷣки твоегѡ̀ престо́лꙋ ны́нѣ предстои́ши, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Кра́снаѧ дв҃о ꙗ҆ви́ласѧ є҆сѝ, прекра́сное сло́во поро́ждши, є҆мꙋ́же пое́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Проѧвле́нное на горѣ̀ законополо́жникꙋ во ѻ҆гнѝ и҆ кꙋпинѣ̀, ржⷭ҇тво̀ приснодв҃ы, въ на́ше вѣ́рныхъ спасе́нїе, пѣ́сньми немо́лчными велича́емъ.

И҆спра́вилъ є҆сѝ ста́до хрⷭ҇то́во къ бжⷭ҇твєннымъ приста́нищємъ: невре́дно соблю́дъ є҆̀ ѿ бꙋ́ри сопроти́вныѧ, ꙗ҆́кѡ преизрѧ́денъ ст҃и́тель, и҆ бжⷭ҇твенныхъ, ѻ҆́тче, и҆спо́лнитель, мꙋ́дре, повелѣ́нїй.

Ꙗ҆́кѡ сщ҃еннодѣ́йственникъ чи́стъ, ꙗ҆́кѡ мꙋ́ченикъ до́бль, ꙗ҆́кѡ чꙋдодѣ́йственникъ чꙋ́денъ, ꙗ҆́кѡ бж҃е́ственныхъ словопи́сецъ, ꙗ҆́кѡ вѣ́ры непоколеби́мь сто́лпъ, сла́вꙋ вѣ́чнꙋю, ѻ҆́тче, ᲂу҆лꙋчи́лъ є҆сѝ.

На сꙋди́щи под̾е́мъ мнѡ́ги трꙋды̀ и҆ болѣ̑зни, къ неболѣ́зненнѣй и҆ бжⷭ҇твеннѣй жи́зни ра́дꙋѧсѧ преше́лъ є҆сѝ, ѡ҆боже́нїемъ ны́нѣ чи́стѡ прича́щсѧ, мꙋ́чениче досточꙋ́дне дѡроѳе́е.

Бг҃оза́рнаѧ па́мѧть твоѧ̀ возсїѧ̀ мі́рꙋ, ѡ҆зарѧ́ющи вѣ̑рныѧ лꙋча́ми дарова́нїй: ю҆́же сла́вѧщыѧ ѻ҆́бщники ны̀ покажѝ, ѻ҆́тче, въ тебѣ̀ бж҃е́ственныѧ свѣ́тлости.

Бг҃оро́диченъ: Носѧ́щи хрⷭ҇та̀ на рꙋка́хъ, носѧ́щаго всѧ̑ ма́нїемъ бж҃е́ственнымъ, чⷭ҇таѧ, того̀ при́снѡ молѝ, рꙋ́къ на́шихъ воздѣѧ̑нїѧ и҆спра́вити, ꙗ҆́кѡ ѳѷмїа́мъ предъ лице́мъ є҆гѡ̀.