Канон святому пророку Захарии Серповидцу

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

И҆мѣ́ѧ свѣтода́вца, твоѧ̑ послꙋ́шающа мѡльбы̀, просвѣще́нїе мѝ пода́ждь, заха́рїе прⷪ҇ро́че пречꙋ́дный.

Оу҆кра́шенъ добро́тами бжⷭ҇твенныѧ красоты̀, а҆́гг҃лѡвъ добрѡ́ты зри́ши дꙋше́вною чистото́ю.

И҆спо́лненъ ст҃ы́ни а҆гг҃лоподо́бныѧ свѣ́тлости, ꙗ҆́кѡ сы́й бг҃омꙋ́дре, соглаго́лющыѧ а҆́гг҃лы и҆ просвѣща́ющыѧ и҆мѣ́лъ є҆сѝ, бг҃опости́жне.

Бг҃оро́диченъ: Разрѣши́сѧ клѧ́тва є҆́ѵы прама́тере, всенепоро́чнаѧ: хрⷭ҇та́ бо ро́ждши, благослове́ньми мі́ръ ѡ҆богати́ла є҆сѝ.

Пѣ́снь г҃.

І҆рмо́съ: Нѣ́сть ст҃ъ, ꙗ҆́кѡ гдⷭ҇ь, и҆ нѣ́сть пра́веденъ, ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.

Вы́шнѧѧ благода́ть тебѐ ѡ҆сѣнѝ, промышле́нїѧ несказа́ннагѡ бжⷭ҇твенно ѡ҆кормле́нїе, ст҃ы́ми а҆́гг҃лы наꙋча́ющи, премꙋ́дре блаже́нне, и҆ просвѣща́ющи.

Бж҃е́ственнѣй бл҃гости наказꙋ́ѧсѧ, наꙋчи́лсѧ є҆сѝ, пребога́те, ꙗ҆́кѡ пречи́стъ, плодови́тъ жи́ти бжⷭ҇твеннымъ свѧще́нїемъ, во гра́дѣ всеѡсвѧще́ннѣмъ.

Стѣна̀ незы́блема, ᲂу҆твержде́нїе лю́демъ бг҃омꙋ̑дрымъ бы́лъ є҆сѝ, гдⷭ҇и, и҆ дꙋша́мъ спасе́нїе, ꙗ҆́коже дре́вле провозвѣстѝ прⷪ҇ро́къ чꙋ́дный.

Бг҃оро́диченъ: Ржⷭ҇тво̀ нетлѣ́нно и҆ пречⷭ҇то, бцⷣе, твоѐ чревоноше́нїе мі́ръ и҆зба́ви ѿ тлѝ и҆ сме́рти: сп҃са бо родила̀ є҆сѝ, сло́во присносꙋ́щное.

Сѣда́ленъ, гла́съ г҃.

Впрѧжены̑ колесни̑цы ви́дѣлъ є҆сѝ, пра̑вимы рꙋко́ю всѣ́хъ бг҃а, безплѡ́тныѧ слꙋги̑, заха́рїе чꙋ́дне: съ ни́миже ра́дꙋѧсѧ ꙗ҆́кѡ прⷪ҇ро́къ приснопа́мѧтный, молѝ напра́витисѧ къ пꙋтѝ бжⷭ҇твеннагѡ ра́зꙋма вѣ́рою несомнѣ́нною соверша́ющымъ па́мѧть твою̀ всесвѧще́ннꙋю.

Бг҃оро́диченъ: Недомы́сленно и҆ непостижи́мо є҆́сть, влⷣчце бг҃ора́дованнаѧ, є҆́же содѣ́ланное ѡ҆ тебѣ̀ стра́шное бж҃їе та́инство: и҆́бо неѡбыме́ннаго заче́нши родила̀ є҆сѝ, пло́тїю ѡ҆бложе́нна ѿ пречⷭ҇тыхъ крове́й твои́хъ: є҆го́же всегда̀, чⷭ҇таѧ, ꙗ҆́кѡ сн҃а твоего̀ молѝ, спасти́сѧ дꙋша́мъ на́шымъ.

Крⷭ҇тобг҃оро́диченъ: Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва, ви́сѧща на крⷭ҇тѣ̀, мт҃рски пла́чꙋщи, глаго́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Є҆ди́но ᲂу҆́бѡ просвѣща́тельное сꙋщество̀ честѝ, въ со́лнцѣхъ же тре́хъ ѡ҆предѣлѧ́емо, въ сꙋ̑щаѧ проше́ствїѧми мно́жимо, ꙗ҆́вѣ наꙋча́еши, всебл҃же́нне.

Колесни́ца бж҃їѧ бы́въ, прⷪ҇ро́че, колесни̑цы зрѧ̀ разли̑чны а҆́гг҃льскїѧ, ѡ҆бходи́ти всѧ̑ сподо́билсѧ є҆сѝ, со бл҃гочи́нїемъ и҆дꙋ́щыѧ.

Сщ҃еннолѣ́пнѡ многосвѣ́тлый свѣ́щникъ, ѻ҆́бразъ зри́ши бж҃е́ственнагѡ свѣтозаре́нїѧ, смотрѧ́еши же, всебл҃же́нне, всеви́дца, и҆́мже всѧ́чєскаѧ спаса́ютсѧ.

Бг҃оро́диченъ: Ѻ҆́бразъ твоегѡ̀ чи́стагѡ ржⷭ҇тва̀ бг҃ови́днїи прⷪ҇ро́цы проначерта́ютъ, многови́днѡ проѡбрази́вше, и҆ разли́чнѡ гада́ньми бг҃омꙋ́дрїи.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ ᲂу҆́тромъ чл҃вѣколю́бїѧ твоегѡ̀, гдⷭ҇и.

Чи́стымъ се́рдцемъ, и҆ ᲂу҆ма̀ прови́дѧ ѻ҆строто́ю стрⷭ҇ть сп҃совꙋ, достолѣ́пнѡ блажи́тсѧ.

Преесте́ственнѡ ст҃ы́й, ра́дꙋйсѧ, сїѡ́не, проро́къ предповелѣва́етъ, грѧде́тъ цр҃ь тво́й пра́веденъ, и҆ спаса́ѧй кро́тостїю.

Прⷪ҇ро́кѡвъ сла́ва, бг҃оглаго́ливыхъ мꙋже́й бл҃голѣ́пїе, мі́ръ ѡ҆зарѧ́етъ прⷪ҇ро́чества свѣ́тлостїю.

Бг҃оро́диченъ: Дв҃ы ржⷭ҇тво́мъ ѡ҆бнови́въ на́съ, свободѝ пе́рвыхъ согрѣше́нїй, на́съ ра́ди бы́въ чл҃вѣ́къ.

Пѣ́снь ѕ҃.

І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.

Сы́й проро́ческагѡ и҆спо́лнь вдохнове́нїѧ, бꙋ́дꙋщихъ ра́зꙋма па́че є҆стества̀ наꙋчи́всѧ, по́сланъ бы́лъ є҆сѝ проповѣ́дати бл҃года́ть бꙋ́дꙋщꙋю, де́нь же крⷭ҇та̀ вѣ́домый гдⷭ҇еви, бг҃опрїѧ́тне.

Ра́зꙋмомъ дх҃о́внымъ ᲂу҆кра́шенъ, дарѡ́въ сꙋ́щихъ па́че ᲂу҆ма̀ сподо́билсѧ є҆сѝ, а҆́гг҃льскаѧ ꙗ҆влє́нїѧ и҆ чи́ны, и҆ вѣща̑нїѧ и҆ сла̑вы ви́дѣвъ, пребога́те, чꙋ́днымъ наꙋча́ющыѧ и҆ бжⷭ҇твєннымъ та́йнамъ.

Свѣщꙋ̀ добродѣ́телей стѧжа́въ, просвѣще́нїемъ бг҃оразꙋ́мїѧ сїѧ́еши, та́инственнꙋю провозвѣща́ѧ свѣщꙋ̀, є҆́юже па́че словесѐ, сло́ва воплоще́нїе, ꙗ҆ви́тсѧ бг҃олѣ́пнѣ ѿ сїѡ́на, заха́рїе, проро́че бг҃опрїѧ́тне.

Бг҃оро́диченъ: Поста́вивый нб҃о, показа́ тѧ нб҃о слове́сное, бцⷣе, добро́тꙋ і҆а́кѡвлю, возлюби́въ, и҆ и҆зъ чре́ва твоегѡ̀ бжⷭ҇тва̀ сл҃нце возсїѧ̀ пло́тски, и҆ мі́ръ ᲂу҆ѧсни́лъ є҆́сть бл҃года́тїю.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

По все́й землѝ твоѐ, прⷪ҇ро́че, и҆зы́де вѣща́нїе бг҃одохнове́нное, и҆ глагѡ́лъ твои́хъ си́ла, вопїю́щихъ: бл҃гослове́нъ є҆сѝ, гдⷭ҇и бж҃е, во вѣ́ки.

Ве́сь вы́шними зарѧ́ми просвѣще́нъ, бꙋ̑дꙋщаѧ ви́дѣлъ є҆сѝ ꙗ҆́кѡ сꙋ̑щаѧ: тѣ́мже, пребога́те, вопїѧ́лъ є҆сѝ: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Пѣ́сньми почита́ю тѧ̀, дв҃о, поче́тшꙋю ро́дъ человѣ́ческїй, безче́стїемъ лю́тымъ пе́рвѣе ѡ҆сꙋжде́нный: бл҃гослове́нъ, всечⷭ҇таѧ, пло́дъ твоегѡ̀ чре́ва.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Сїѡ́не горо̀, гра́де ст҃ы́й, ра́дꙋйсѧ ѕѣлѡ̀, бж҃е́ственный заха́рїа а҆́гг҃лѡвъ собесѣ́дникъ повелѣва́етъ: и҆ ты̀ весели́сѧ, і҆ерꙋсали́ме, во всѧ̑ вѣ́ки.

Заха́рїе прⷪ҇ро́че, красꙋ́йсѧ, и҆спѡ́лншаѧсѧ ви́дѧ словеса̀, ꙗ҆̀же предглаго́лалъ є҆сѝ дх҃омъ просвѣща́емь, гдⷭ҇а пою́щымъ и҆ превозносѧ́щымъ є҆го̀ во вѣ́ки.

Посредѝ го́ръ присѣ́нныхъ ви́дѣлъ є҆сѝ стоѧ́щыѧ а҆́гг҃лы, и҆̀же над̾ всѣ́ми промышле́нїю наꙋча́ющыѧ тѧ̀, сла́вный прⷪ҇ро́че, пѣсносло́вѧщыѧ хрⷭ҇та̀ во вѣ́ки.

Бг҃оро́диченъ: Ра́дꙋйсѧ, прⷭ҇то́ле ѻ҆гнезра́чный гдⷭ҇ень, ра́дꙋйсѧ, две́ре невеще́ственнагѡ сїѧ́нїѧ, ра́дꙋйсѧ, ѻ҆́блаче ле́гкїй, ꙗ҆́же сл҃нце пра́вды возсїѧ́вшаѧ мі́рꙋ, чⷭ҇таѧ бг҃ороди́тельнице.

Пѣ́снь ѳ҃.

І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Всѧ́ко чꙋ́вство ѡ҆ста́вивъ, ᲂу҆мꙋ̀ бжⷭ҇твенномꙋ и҆ чистѣ́йшемꙋ, всемꙋ́дре, свѣтоно́сенъ предстои́ши, ѡ҆ мі́рѣ моли̑твы творѧ̀. тѣ́мже всѝ тѧ̀, заха́рїе, блажи́мъ.

Глаго́лѡмъ послѣ́дꙋюще твои́хъ ᲂу҆сте́нъ, бг҃оѧвле́нне, гдⷭ҇а призыва́емъ: и҆́мже спаса́еми, ꙗ҆́кѡ и҆́стины тѧ̀ проро́ка и҆ проповѣ́дника, заха́рїе, благоче́стнѡ блажи́мъ.

Ми́лостива содѣ́лай твои́ми моли́твами влⷣкꙋ, свѧще́нный и҆ благознамени́тый пра́здникъ тво́й, бг҃одохнове́нне, вѣ́рою соверша́ющымъ, и҆ тѧ̀ любо́вїю чтꙋ́щымъ ꙗ҆́кѡ прⷪ҇ро́ка и҆ бг҃оглаго́льника и҆́стиннѣйша.

Бг҃оро́диченъ: Бе́зднꙋ чꙋде́съ тѧ̀, и҆ дарова́нїй, бцⷣе, пꙋчи́нꙋ, чⷭ҇таѧ, вѣ́дꙋще, и҆ ꙗ҆́вѣ зна́юще, въ твоѐ предста́тельство надѣ́ющесѧ притека́емъ, и҆ спѣ́шнѡ къ твоемꙋ̀ кро́вꙋ прибѣга́емъ.