Канон святому преподобномученику Стефану Новому

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Ра́достнѡ ты̀ проше́дъ тѣ́снꙋю стезю̀ поста̀, мꙋче́нїѧ широто́ю вра̑жїѧ попали́лъ є҆сѝ стремлє́нїѧ, и҆ простра́ннꙋю жи́знь, блаже́нне, наслѣ́довалъ є҆сѝ.

Ко́рень тѧ̀, непло́дный пре́жде, пло́дствꙋетъ, а҆́нны тезоимени́тый, ꙗ҆́кѡ дре́вле самꙋи́ла, и҆ да́вшемꙋ тѧ̀ дае́тъ бг҃ꙋ, житїѧ̀ твоегѡ̀, мꙋ́дре, благода́ть зна́менающи.

Въ свѧще́ннѣйшїй бжⷭ҇твенный мона́хѡвъ прише́дъ чи́нъ, ꙗ҆́кѡ свѣтлѣ́йшаѧ ѕвѣзда̀ добродѣ́тельми возсїѧ́лъ є҆сѝ, вѣ̑рныѧ ѡ҆зарѧ́ѧ та́инственнѡ, прпⷣбне стефа́не.

Стѣсни́въ тѣ́ло заключе́нїемъ тѣ́снагѡ до́мꙋ, впери́лъ є҆сѝ ᲂу҆́мъ къ нбⷭ҇нымъ, мꙋ́дре, восхождє́нїи до́брѣ распространѧ́ѧсѧ.

Бг҃оро́диченъ: Непрохо́днꙋю две́рь, чи́стый чистоты̀ хра́мъ, до́брꙋю въ жена́хъ, ст҃ꙋ́ю влⷣчцꙋ, гла̑сы свѧще́нными, свѧще́ннїи лю́дїе просла́вимъ.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Оу҆́мъ тво́й зрѣ́нїемъ къ бг҃ꙋ ᲂу҆добрѧ́емь, ѻ҆́ч҃е, краснѣ́йшїй ꙗ҆ви́сѧ, и҆ бл҃года́ти всѧ́кїѧ и҆спо́лненъ вои́стиннꙋ, и҆ бжⷭ҇твенныѧ свѣ́тлости прича́стникъ.

Честнѣ́й і҆кѡ́нѣ хрⷭ҇то́вѣ, и҆ тогѡ̀ ро́ждшїѧ покланѧ́ѧсѧ, блаже́нне, царѧ̀ ѕлочести́вагѡ повелѣ́нїе ме́рзское возненави́дѣ, си́лою бжⷭ҇твеннагѡ дх҃а.

Желѣ́зы тебѐ, желѣ́зно и҆мꙋ́ща се́рдце, пребезꙋ́мный свѧза́въ, ѿсыла́етъ въ темни́цꙋ, ꙗ҆́кѡ храни́телѧ хрⷭ҇то́выхъ догма̑тъ, стефа́не всеблаже́нне.

Твоѧ̑ кра̑сныѧ ꙗ҆́вственнѡ и҆мѣ́лъ є҆сѝ, прпⷣбне, но́ги, мꙋче́нїѧ къ стезѧ́мъ стꙋпа́ющыѧ свѣ́тлѡ, и҆ главы̑ вра̑жїѧ сокрꙋша́ющыѧ, стефа́не многострада́льне.

Бг҃оро́диченъ: И҆зъ тебє̀, є҆ди́ныѧ чⷭ҇тыѧ пребжⷭ҇твенное сло́во воплоти́сѧ, ꙗ҆́кѡ вѣ́сть, и҆ сп҃сѐ ны̀ ѿ тлѝ, покланѧ́ющыѧсѧ, за милосе́рдїе, бжⷭ҇твенномꙋ є҆гѡ̀ снизхожде́нїю.

Конда́къ, гла́съ и҃.

Трⷪ҇цы рачи́телѧ и҆ бжⷭ҇твеннаго стефа́на восхва́лимъ вѣ́рнѡ пѣ́сньми, празднолю́бцы, ѿ се́рдца, ꙗ҆́кѡ почествова́вша начерта́нїе кра́сное влⷣки, и҆ мт҃ре є҆гѡ̀, и҆ согла́снѡ ны́нѣ ѿ любвѐ возопїи́мъ є҆мꙋ̀, ра́дꙋющесѧ: ра́дꙋйсѧ, ѻ҆́ч҃е присносла́вне.

Сѣда́ленъ, гла́съ а҃.

Кро́вь твоѧ̀ мꙋ́дре, та́йнѡ зове́тъ ѿ землѝ къ бг҃ꙋ, ꙗ҆́коже а҆́велева, бг҃омꙋ́дре, ꙗ҆́снѡ бо проповѣ́да хрⷭ҇то́во вочл҃вѣ́ченїе. тѣ́мже посрами́лъ є҆сѝ і҆кѡнора́тныхъ пре́лесть, и҆ преше́лъ є҆сѝ въ нбⷭ҇ныѧ черто́ги, молѝ спастѝ на́съ.

Поще́нїемъ просвѣти́всѧ, ꙗ҆́кѡ зла́то въ горни́лѣ ѡ҆блиста́лъ є҆сѝ, мꙋ́дре, зако́ннымъ страда́нїемъ: и҆ вѣне́цъ прїѧ́лъ є҆сѝ твоемꙋ̀ зва́нїю подо́бенъ. тѣ́мъ ра́дꙋющесѧ всесвѧтꙋ́ю твою̀ па́мѧть пра́зднꙋемъ, твоѧ̑ по́двиги почита́юще, приснопа́мѧтне стефа́не.

Бг҃оро́диченъ: Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щыѧ: и҆ дꙋ́шы на́шѧ спасѝ бжⷭ҇твенными моли́твами твои́ми.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ строе́нїе, и҆́мже спа́слъ є҆сѝ, пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Свѣ́томъ дх҃а просвѣща́емь, мольба́ми бжⷭ҇твенными, слѣпы̑мъ свѣ́тъ, ѻ҆́ч҃е, по́далъ є҆сѝ, твоего̀ влⷣкꙋ и҆ бг҃а подража́въ, бг҃одохнове́нне.

Ви́дѣнъ бы́лъ є҆сѝ и҆здале́ча пла́вающими въ мо́ри, ѡ҆кормлѧ́ѧ ты́ѧ, бл҃же́нне, къ ти́хомꙋ приста́нищꙋ, бж҃е́ственною благода́тїю, призыва́ющыѧ твоѐ вѣ́рнѡ, ѻ҆́ч҃е стефа́не, и҆́мѧ.

Свѧщеннодѣ́йствꙋемь, ꙗ҆́коже заколе́нїе свѧще́нное прине́слсѧ є҆сѝ тебє̀ ра́ди пожре́нномꙋ, стефа́не, и҆ перворожде́нныхъ во ѻ҆би́телехъ воспочи́лъ є҆сѝ ра́дꙋѧсѧ.

Честны́мъ твои́мъ глаго́ломъ, пре́жде на по́лы сꙋхі́й здра́въ ꙗ҆ви́сѧ ве́сь, ᲂу҆диви́всѧ, мч҃ниче, да́нной тѝ благода́ти съ высоты̀ ѻ҆би́льнѡ, человѣ́кѡвъ на и҆справле́нїе.

Бг҃оро́диченъ: На тѧ̀, пренепоро́чнаѧ, спасе́нїѧ моегѡ̀ надє́жды возложи́хъ, къ твоемꙋ̀ покро́вꙋ прибѣго́хъ: бꙋ́ди мѝ, ѻ҆трокови́це, помо́щница, лю́тыхъ и҆збавлѧ́ющи мѧ̀.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Мꙋ́ченическими вѣнча̀ почестьмѝ, по́стничєскїѧ твоѧ̑ трꙋды̀ и҆́стиннѡ, прпⷣбне стефа́не, подвигополо́жникъ є҆ди́нъ бг҃ъ на́шъ, на ᲂу҆бі̑йцы ᲂу҆крѣпи́вый тѧ̀.

Подвиза́ѧсѧ благосла́внѡ, со мно́жествомъ мꙋ́чєникъ въ темни́цахъ приѡбща́ѧсѧ, мꙋ́чениче, ѡ҆брѣ́лсѧ є҆сѝ: тѧ̀ бо ꙗ҆́кѡ ѕвѣ́зды незаходи́мое со́лнце, ѡ҆бстоѧ́ще пребо́льше просвѣща́хꙋсѧ.

Глагѡ́лы бжⷭ҇твенными свѧщє́нныѧ и҆сповѣ́дники и҆ подража́тели бжⷭ҇твенныхъ стрⷭ҇те́й, ᲂу҆блажа́емъ трѝ ста̀ и҆ четы́редесѧть и҆ два̀ безбо́жныхъ пора́товавшыѧ.

Власѡ́въ ѿѧ́тїе рꙋга́тельнѡ, ᲂу҆ше́съ ѿрѣ́занїе и҆ рꙋ́къ, ᲂу҆де́съ же бжⷭ҇твенныхъ пожже́нїе, по і҆кѡ́нѣ хрⷭ҇то́вѣ под̾ѧ́ше мно́жество прпⷣбныхъ благосла́внѣйшее.

Бг҃оро́диченъ: Прест҃а́ѧ, ꙗ҆́же бг҃а є҆ди́на на землѝ ꙗ҆́кѡ и҆́стиннѡ прест҃а́го ро́ждшаѧ, тѧ̀ бцⷣꙋ при́снѡ проповѣ́дающыѧ ѡ҆свѧтѝ и҆ спасѝ хода́тайствомъ твои́мъ.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю̀ тѝ: возведѝ ѿ тлѝ живо́тъ мо́й, многоми́лостиве.

Слове́съ твои́хъ си́лы ѕло́бы ѡ҆брѣта́тель претерпѣ́ти не возмо́же: тѣ́мже ю҆́замъ тѧ̀, стефа́не, и҆ ра́намъ, сме́рти же нꙋ́жднѣй сꙋро́вѡ льсте́цъ предадѐ.

Ꙗ҆́кѡ хлѣ́бъ пеко́мъ ѻ҆гне́мъ, и҆ за но́зѣ неми́лостивнѡ повѣ́шаемь, всесоже́глсѧ є҆сѝ, па́ѵле, и҆ бг҃ꙋ же́ртва прине́слсѧ є҆сѝ, соводворе́нїѧ мꙋ́чєникъ сподоблѧ́емь.

Зако́ннѡ пострада́вше заключе́ни, и҆ ᲂу҆давле́нїемъ житїѐ ѡ҆ста́вльше, во є҆фе́сѣ прпⷣбнїи мона́си, ѻ҆́смь къ три́десѧтимъ, ꙗ҆̀же вѣ́рою и҆ любо́вїю ᲂу҆блажа́емъ.

Крѣ́пкѡ сꙋдѧ́щемꙋ проти́вилсѧ є҆сѝ, и҆ ра́нами ра́нимꙋ твоемꙋ̀ тѣ́лꙋ, ᲂу҆мре́ти и҆зво́лилъ є҆сѝ за хрⷭ҇та̀ є҆ди́наго безсме́ртнаго, достосла́вне пе́тре великоимени́тый.

Бг҃оро́диченъ: Є҆ди́нꙋ всепѣ́тꙋю и҆ до́брꙋю въ жена́хъ бг҃ороди́тельницꙋ, хрⷭ҇тїа́нъ стѣ́нꙋ неѡбори́мꙋю, пречⷭ҇тꙋю влⷣчцꙋ, несомнѣ́ннымъ се́рдцемъ ᲂу҆блажа́емъ.

Конда́къ, гла́съ г҃.

И҆зъ непло́дна, прпⷣбне, ко́рене возрастѐ вѣ́твь, первострада́льцꙋ тезоимени́те, мона́хѡвъ наста́вникъ вели́къ, ѻ҆́ч҃е, ꙗ҆ви́лсѧ є҆сѝ, и҆ ꙗ҆́рости не ᲂу҆боѧ́всѧ царѧ̀, не хотѧ́ща хрⷭ҇то́въ чествова́ти ѻ҆́бразъ: сегѡ̀ ра́ди сконча́всѧ, мꙋ́ченическїй вѣне́цъ прїѧ́лъ є҆сѝ, стефа́не.

І҆́косъ:

И҆́же за́висти ѻ҆те́цъ и҆ бг҃а чꙋ́ждь, и҆скꙋшє́нїѧ тебѣ̀ мнѡ́га, и҆ треволнє́нїѧ воздви́же, не терпѧ̀ зрѣ́ти твоегѡ̀ бжⷭ҇твеннагѡ житїѧ̀ и҆ пра́вагѡ твоегѡ̀ непреткнове́ннагѡ ше́ствїѧ. ме́рзскїй лꙋка̑вствїѧ на тѧ̀ сшива́етъ, мнѣ́всѧ бы́ти ᲂу҆чени́къ, ꙗ҆́коже і҆ꙋ́да пре́жде, и҆ тебѐ въ рꙋ́ки беззако́нныхъ, ѻ҆́ч҃е, потща́сѧ вложи́ти, хрⷭ҇та̀ проповѣ́дающа свѣ́тлѡ, и҆ тогѡ̀ ѻ҆́бразꙋ любо́вїю кла́нѧющасѧ: тогѡ̀ ра́ди мч҃ническїй вѣне́цъ прїѧ́лъ є҆сѝ, стефа́не.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ преподѡ́бнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Возвѣсти́сѧ тебѣ̀ коне́цъ, блаже́нне, вседѣ́тельнымъ хотѣ́нїемъ: тѣ́мже бо́льшемꙋ постꙋ̀ вда́лъ є҆сѝ себѐ, и҆ ѿ сла́вы въ сла́вꙋ прехо́диши, ᲂу҆бїе́нъ за хрⷭ҇та̀, сꙋ́щаго надъ всѣ́ми бг҃а.

Тезоиме́ннѡ первострада́льцꙋ спросла́вилсѧ є҆сѝ: и҆́бо каменꙋ́емь неми́лостивнѡ, и҆ влачи́мь и҆ бїе́мь, кровьмѝ и҆спо́лнилъ є҆сѝ зе́млю: и҆ дꙋ́шꙋ твою̀ гдⷭ҇ꙋ ра́дꙋѧсѧ пре́далъ є҆сѝ.

На сто́гнахъ, мꙋ́чениче стефа́не, гра́дскихъ неми́лостивнѡ влачи́мь, ᲂу҆гла́дилъ є҆сѝ мꙋче́нїѧ стезю̀ вѣ̑рнымъ: на ню́же настꙋпа́ющїи крѣ́пкѡ, къ нбⷭ҇номꙋ гра́дꙋ ꙗ҆́вѣ доидо́ша.

Бг҃оро́диченъ: Свѧще́ннѣйшїи прⷪ҇ро́цы провозвѣсти́ша, чⷭ҇таѧ, ꙗ҆вле́ннѣйше та́инство честна́гѡ твоегѡ̀ ржⷭ҇тва̀: и҆ ны́нѣ мы̀ сбытїѐ свѣ́тлѡ разꙋмѣ́юще, благоче́стнѡ тѧ̀ ᲂу҆блажа́емъ.

Пѣ́снь и҃.

І҆рмо́съ: И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Свирѣ́пѣйше, ꙗ҆́коже ѕвѣ́рїе, восхи́тиша хрⷭ҇то́ва а҆́гнца бїю́щїи ᲂу҆бива́юще, и҆ съ мꙋ́жи беззако́нными спогреба́юще, пребеззако́нїемъ живꙋ́щїи.

Неми́лостивнѡ твою̀ главꙋ̀ вра́гъ сокрꙋшѝ, ю҆́же бг҃ъ въ высоча́йшихъ вѣнце́мъ вѣнча̀ побѣди́тельнымъ, вѣне́чниче многострада́льне, сла́ва мꙋ́ченикѡвъ и҆ всѣ́хъ прпⷣбныхъ.

Терпѣли́внѡ мꙋчи́телю противлѧ́ѧсѧ бг҃омꙋ́дрый а҆ндре́й, ра́нами раздроблѧ́етсѧ и҆ неми́лостивнѡ ᲂу҆мерщвлѧ́етсѧ пра́ведный, поѧ̀ влⷣцѣ хрⷭ҇тꙋ̀ во вѣ́ки.

Ст҃ѣ́йшїй до́мъ ᲂу҆жѐ бы́въ, и҆́же надъ всѣ́ми ст҃ы́ми воспочива́ющаго, во твое́мъ и҆мѣ́лъ є҆сѝ се́рдцы живꙋ́ща, многострада́льне стефа́не во всѧ̑ вѣ́ки.

Бг҃оро́диченъ: Кропле́нїемъ бжⷭ҇твенныѧ кро́ве, бг҃облагода́тнаѧ, и҆зъ ре́бръ и҆стоще́нныѧ сн҃а твоегѡ̀ и҆ бг҃а, лꙋка́вымъ грѣхо́мъ прибы́вшꙋю мнѣ̀ скве́рнꙋ, молю́сѧ тебѣ̀, ѡ҆мы́й, дв҃о.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Ви́дѣвъ ра́дꙋѧсѧ а҆́гг҃лѡвъ чи́ны, патрїа́рхѡвъ, преподо́бныхъ, прⷪ҇ро́кѡвъ, страда́льцєвъ, а҆пⷭ҇лѡвъ же и҆ пра́ведныхъ всѣ́хъ, бг҃одохнове́нне: съ ни́миже совокꙋплѧ́ѧсѧ, помѧнѝ, застꙋпѝ на землѝ чи́стѣ ᲂу҆блажа́ющихъ тѧ̀.

Ꙗ҆́кѡ свѣ́тъ, ꙗ҆́кѡ ᲂу҆́тро, ꙗ҆́кѡ вели́кое со́лнце, ꙗ҆́кѡ нб҃о, наѕвѣ́зденное чꙋде́съ свѣтлостьмѝ, и҆ ꙗ҆́звами свѧты́ми бы́лъ є҆сѝ, всѣ́хъ помышлє́нїѧ благохва́лѧщихъ тѧ̀, стефа́не, ᲂу҆краша́ѧ и҆́стиннѡ, мч҃ниче многострада́льне.

Тве́рдыми по́стничества пѡ́двиги низложи́въ тмы̀ нача̑ла, ѻ҆́ч҃е, пре́жде, и҆ въ послѣ̑днѧѧ пострада́въ крѣ́пкѡ, всеконе́чнѣй па́гꙋбѣ сїѧ̑ преда́въ, стефа́не, мꙋ́ченикѡвъ добро́то и҆ прпⷣбныхъ похвало̀.

Твоѧ̀ пресла́внаѧ па́мѧть дне́сь пресвѣ́тлыми зарѧ́ми дарѡ́въ дх҃а ѡ҆зарѧ́етъ земна̑ѧ и҆сполнє́нїѧ, ю҆́же ра́достнѡ ны́нѣ пра́зднꙋющыѧ просвѣтѝ и҆ ѡ҆свѧтѝ ны̀, бг҃облаже́нне стефа́не.

Бг҃оро́диченъ: Свѣ́та прїѧ́телище, бг҃ора́дованнаѧ, свѧщенномꙋ́ченикѡвъ и҆́стинно ᲂу҆твержде́нїе и҆ прпⷣбныхъ всѣ́хъ похвало̀, сп҃сѝ ны̀ ѿ бѣ́дъ и҆ ѡ҆бстоѧ́нїй, и҆ врагѡ́въ наше́ствїѧ, воспѣва́ющыѧ тѧ̀.

Свѣти́ленъ.

Болѣ́зньми по́стническими началоѕло́бнаго ѕмі́ѧ до конца̀ ᲂу҆мертви́лъ є҆сѝ на концѣ̀ же вѣне́цъ мꙋче́нїѧ взе́мъ, стефа́не всехва́льне, поклоне́нїе подаѧ̀ честны̑мъ ѡ҆бразѡ́мъ, ꙗ҆́кѡ вѣ́дый на первоѻбра́зное ꙗ҆́вѣ преходи́ти, всеблаже́нне.

Сла́ва, и҆ ны́нѣ: Неизрече́ннагѡ ржⷭ҇тва̀ была̀ є҆сѝ всенепоро́чнаѧ невѣ́ста, ꙗ҆́кѡ сꙋ́щи чистѣ́йшїй хра́мъ, бцⷣе: свѣ́та бо превѣ́чнаго, въ тѧ̀ все́льшагосѧ родила̀ є҆сѝ бг҃а сло́ва. пою́ще твоѐ ᲂу҆̀бо ржⷭ҇тво̀, велича́емъ досто́йнѡ тебѐ, всенепоро́чнаѧ ѻ҆трокови́це.