Канон святому преподобному Тимофею в Символех

Пѣ́снь а҃.

І҆рмо́съ: Пои́мъ гдⷭ҇еви, всѝ лю́дїе, въ мо́ри чермнѣ́мъ фараѡ́на погрꙋзи́вшемꙋ, побѣ́днꙋю пѣ́снь пою́ще, ꙗ҆́кѡ просла́висѧ.

Тѧ̀ мы́сленнꙋю ѕвѣздꙋ̀, на высотѣ̀, ѻ҆́ч҃е, воздержа́нїѧ просїѧ́вшꙋю свѣ́тлѡ, и҆ вѣ́рныхъ сердца̀ ѡ҆зарѧ́ющꙋ, бл҃же́нне тїмоѳе́е, восхвалѧ́емъ при́снѡ.

И҆мѣ́ѧ къ бг҃ꙋ протѧже́нно ᲂу҆ма̀ твоегѡ̀ ѻ҆́ко, ᲂу҆ны́нїѧ со́нъ ѿ дꙋшѝ ѿтрѧ́слъ є҆сѝ, ѻ҆́ч҃е, и҆ хра́мъ бы́лъ є҆сѝ бжⷭ҇твеннагѡ дх҃а, и҆ мѣ́сто свѧще́нїѧ, тїмоѳе́е.

Лꙋка́вагѡ кѡ́зни, смире́нїемъ ѡ҆гражде́нъ, ѻ҆́ч҃е, преше́лъ є҆сѝ невре́днѡ, и҆ къ бг҃ꙋ возвы́силсѧ є҆сѝ: и҆ тогѡ̀ сла́вы вы́нꙋ наслажда́ешисѧ, блаже́нне тїмоѳе́е.

Бг҃оро́диченъ: Несказа́ннѡ бг҃а творца̀ всѧ́ческихъ, во чре́вѣ заче́ншꙋю безсѣ́меннѡ, и҆ пло́тїю ꙗ҆́кѡ и҆́стиннѡ ро́ждшꙋю бцⷣꙋ, ѻ҆трокови́цꙋ, и҆ дѣ́вствꙋющꙋю, пѣ́сньми почита́емъ.

Пѣ́снь г҃.

І҆рмо́съ: Оу҆твержде́нїе моѐ, сп҃се, є҆сѝ, прибѣ́жище моѐ и҆ си́ла, поколеба́вшеесѧ се́рдце моѐ ᲂу҆твердѝ въ стра́сѣ твое́мъ, ꙗ҆́кѡ нѣ́сть свѧ́тъ, ꙗ҆́коже ты̀ бг҃ъ на́шъ.

Оу҆щедрѧ́ѧ всѣ́хъ ми́лованїемъ, и҆́ный а҆враа́мъ бы́лъ є҆сѝ, прїе́млѧ ѿвсю́дꙋ приходѧ́щыѧ, ѽ тїмоѳе́е, и҆ тѣ́ми ᲂу҆гожда́ѧ всѣ́хъ бг҃ꙋ.

Оу҆мертви́лъ є҆сѝ, ѻ҆́ч҃е, ꙗ҆̀же на землѝ твоѧ̑ ᲂу҆́ды, ꙗ҆́кѡ глаго́летъ а҆пⷭ҇лъ: жи́зни нбⷭ҇нѣй прича́стникъ показа́лсѧ є҆сѝ, въ не́йже чтꙋ́щыѧ тѧ̀ при́снѡ помина́й.

Восто́ка твои́хъ дѣ́лъ, ѻ҆́ч҃е, со́лнце бы́лъ є҆сѝ незаходи́мо, лꙋча́ми пѡ́двигъ концы̀ ѡ҆зарѧ́ѧ при́снѡ, и҆ де́мѡнѡвъ разорѧ́ѧ ѡ҆мраче́нїе.

Бг҃оро́диченъ: Ст҃а́ѧ дв҃о, цр҃ѧ̀ ца́рствꙋющихъ роди́тельнице, плени̑цы прегрѣше́нїй мои́хъ расто́ргни, и҆ наста́ви къ покаѧ́нїѧ стезѧ́мъ моли́твами твои́ми.

Сѣда́ленъ, гла́съ и҃.

Наꙋчи́всѧ сло́вꙋ, на́съ ра́ди ѿ дв҃ы ро́ждшемꙋсѧ безъ и҆стлѣ́нїѧ, сегѡ̀ бж҃ество̀ безбѡ́жнымъ проповѣ́далъ є҆сѝ: и҆ мнѡ́ги приве́лъ є҆сѝ бг҃ови вѣ́рою, свѧще́нныхъ чꙋде́съ мно́гими ꙗ҆вле́ньми. тѣ́мже, бг҃оно́се, ст҃ꙋ́ю твою̀ па́мѧть творѧ́ще, бл҃года́тїю твое́ю дꙋ́шы просвѣща́емъ, и҆ согла́снѡ вопїе́мъ тѝ: бг҃оно́се тїмоѳе́е, молѝ хрⷭ҇та̀ бг҃а, грѣхѡ́въ ѡ҆ставле́нїе пода́ти чтꙋ́щымъ любо́вїю ст҃ꙋ́ю па́мѧть твою̀.

И҆ ны́нѣ, бг҃оро́диченъ: Ꙗ҆́кѡ невоздѣ́ланнаѧ, дв҃о, лоза̀, краснѣ́йшїй гро́здъ прозѧбла̀ є҆сѝ, и҆сточа́ющъ на́мъ вїно̀ спасе́нїѧ, всѣ́хъ веселѧ́щее дꙋ́шы же и҆ тѣлеса̀. тѣ́мже ꙗ҆́кѡ винꙋ́ тѧ до́брыхъ блажа́ще при́снѡ, со а҆́гг҃ломъ вопїе́мъ тѝ: ра́дꙋйсѧ, бл҃года́тнаѧ.

Крⷭ҇тобг҃оро́диченъ: Неискꙋсобра́чнаѧ чⷭ҇таѧ и҆ мт҃и твоѧ̀, хрⷭ҇тѐ, ви́дѧщи тѧ̀ ме́ртва ви́сѧща на крⷭ҇тѣ̀, мт҃рски пла́чꙋщи гл҃го́лаше: что̀ тебѣ̀ воздадѐ є҆вре́йскїй беззако́нный собо́ръ и҆ неблагода́рный, и҆́же мно́гихъ и҆ вели́кихъ твои́хъ, сн҃е мо́й, дарѡ́въ наслади́выйсѧ; пою̀ твоѐ бжⷭ҇твенное снизхожде́нїе.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Ты̀ моли́твами ᲂу҆твержда́ѧсѧ при́снѡ, мы́сленныхъ врагѡ́въ лꙋ́ки и҆ стрѣ́лы, ꙗ҆́коже младе́нєцъ стрѣлѧ́нїѧ вмѣни́лъ є҆сѝ, ѻ҆́ч҃е пресла́вне тїмоѳе́е.

Є҆́же къ на́мъ хрⷭ҇то́ва смотре́нїѧ, любо́вїю покланѧ́ѧсѧ, бг҃омꙋ́дре, ѻ҆́бразꙋ, и҆скꙋше́нїе мꙋ́къ претерпѣ́лъ є҆сѝ, ѿ сегѡ̀ ѿмета́ющихсѧ, ѽ тїмоѳе́е!

Ꙗ҆́коже нѣ́кїй сто́лпъ непоколеби́мь бы́лъ є҆сѝ при́снѡ къ бг҃ꙋ въ славосло́вїи, ника́коже почива́ѧ въ си́хъ пребы́лъ є҆сѝ красота́хъ прича́стникъ, ѽ тїмоѳе́е!

Бг҃оро́диченъ: Но́во на землѝ родила̀ є҆сѝ ѻ҆троча̀, є҆́же ѿ ѻ҆ц҃а̀ пре́жде всѣ́хъ вѣ̑къ рожде́ннаго, нетлѣ́ннѡ мт҃и чⷭ҇таѧ, хрⷭ҇тїа́нъ и҆справле́нїе.

Пѣ́снь є҃.

І҆рмо́съ: Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.

Оу҆мо́мъ ѡ҆чище́ннымъ предстоѧ̀ трⷪ҇цѣ, бл҃же́нне, и҆ ѿѻнꙋ́дными зарѧ́ми ѡ҆сїѧ́емь, ѻ҆́ч҃е, сꙋ́щыѧ ны̀ во тмѣ̀ бѣ́дствꙋющыѧ дꙋше́вными страстьмѝ просвѣща́еши всегда̀.

Пло́ть воздержа́нїемъ, дꙋ́шꙋ безстра́стїемъ ᲂу҆краси́въ, мꙋ́дре, цр҃ѧ̀ всѧ́ческихъ ᲂу҆го́дникъ ꙗ҆ви́лсѧ є҆сѝ, и҆ ѿ негѡ̀ ꙗ҆́вѣ чꙋде́съ да́ры прїѧ́лъ є҆сѝ, тїмоѳе́е.

Не ᲂу҆мо́мъ льсти́внымъ, но просты́мъ се́рдцемъ проси́вши пристꙋпи́вшаѧ непло́ды, вѣ́рною моли́твою благоча́дна ꙗ҆влѧ́етсѧ ѿ непло́дства, пою́щи хрⷭ҇та̀ бг҃а на́шего.

Бг҃оро́диченъ: Всели́всѧ во чре́во твоѐ живы́й въ вы́шнихъ, тѧ̀ содѣ́ла нб҃съ ши́ршꙋю, марі́е бцⷣе: є҆го́же ѡ҆ всѣ́хъ на́съ, ꙗ҆́кѡ бл҃га́ѧ, не преста́й молѧ́щи, бг҃оневѣ́сто.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

До́брѣ твоѐ соблюда́ѧ дѣ́вства досто́инство во все́й твое́й жи́зни, женѣ̀ никогда́же въ лицѐ зрѣ́лъ є҆сѝ, є҆́же ѿ сегѡ̀ вре́дъ до конца̀ ѿрази́въ.

Въ приста́нище мы́сленное ᲂу҆стреми́лсѧ є҆сѝ, волна́ми сласте́й не ѡ҆мочи́всѧ, всебл҃же́нне тїмоѳе́е: но дх҃а живоно́сными вѣ́тры до́брѣ преплы́лъ є҆сѝ, всесла́вне.

Оу҆дали́лсѧ є҆сѝ ѱало́мски, въ гора́хъ живы́й, въ пꙋсты́нѧхъ при́снѡ, мꙋ́дре, водворѧ́ѧсѧ, до́ндеже вше́лъ є҆сѝ въ бж҃їй гра́дъ нбⷭ҇ный, тїмоѳе́е блаже́нне.

Бг҃оро́диченъ: На плещꙋ̑ херꙋві̑мскꙋ неѡпи́саннѡ сѣдѧ́й, ѡ҆пи́саннѡ въ твоѐ чре́во всели́сѧ пло́тїю, а҆ не бж҃ество́мъ, и҆ и҆зъ тебє̀ про́йде, спаса́ѧ мѧ̀, всенепоро́чнаѧ.

Конда́къ, гла́съ д҃.

Ꙗ҆́кѡ ѕвѣзда̀ многосвѣ́тлаѧ ѿ восто́ка возсїѧ́въ, ѡ҆зари́лъ є҆сѝ въ сердца́хъ вѣ́рныхъ добродѣ́тєли чꙋде́съ твои́хъ, чꙋдотво́рче всебл҃же́нне тїмоѳе́е.

Пѣ́снь з҃.

І҆рмо́съ: А҆́гг҃ломъ ѻ҆́троки и҆зъ ѻ҆гнѧ̀ спасы́й, и҆ гремѧ́щꙋю пе́щь преложи́вый на ро́сꙋ, бл҃гослове́нъ є҆сѝ, бж҃е ѻ҆тє́цъ на́шихъ.

Оу҆гаси́въ страсте́й пла́мень сле́зъ росо́ю, бл҃года́ть чꙋде́съ и҆сточи́лъ є҆сѝ: и҆́миже ѡ҆чища́еши сквє́рны страсте́й, тїмоѳе́е.

Блаже́нство бжⷭ҇твенное нело́жно полꙋчи́лъ є҆сѝ, кро́ткихъ, преподо́бне, наслѣ́довалъ є҆сѝ зе́млю, и҆ ра́дости и҆збра́нныхъ насыща́ѧсѧ.

Разрѣше́нїе грѣхѡ́въ творѧ́щымъ любо́вїю свѧще́ннꙋю па́мѧть твоегѡ̀ преставле́нїѧ, ꙗ҆́кѡ дерзнове́нїе ѡ҆брѣ́тъ, блаже́нне, и҆спросѝ.

Бг҃оро́диченъ: И҆зба́вленнїи всѝ ѿ пе́рвыѧ клѧ́твы, прест҃ы́мъ рождество́мъ твои́мъ, бл҃гослове́ннаѧ є҆ди́на, тѧ̀ благослови́мъ, бцⷣе нескве́рнаѧ.

Пѣ́снь и҃.

І҆рмо́съ: Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.

Страстоꙋбі́йца бы́лъ є҆сѝ воздержа́нїемъ мно́гимъ и҆ ѕѣ́льными болѣ́зньми бдѣ́нїѧ, восхожде́ньми при́снѡ добродѣ́телей, преподо́бне, поꙋча́ѧсѧ въ се́рдцы, и҆ ѿ сла́вы преходѧ̀ въ сла́вꙋ неконча́емыѧ жи́зни и҆ нетлѣ́нїѧ.

Ꙗ҆́кѡ же́ртвꙋ, прпⷣбне, моли̑твы твоѧ̑ къ бг҃ꙋ пречⷭ҇томꙋ ты̀ прине́слъ є҆сѝ чи̑сты ѿ дꙋшѝ: бжⷭ҇твенно дѣ́йство ѿ негѡ̀ прїѧ́лъ є҆сѝ чꙋде́съ, де́мѡны ѿгонѧ́ти, и҆ человѣ́чєскїѧ цѣли́ти не́мѡщи.

Ненавистоѕло́бенъ и҆ неѕло́бивъ, ми́лостивъ и҆ кро́токъ и҆ пра́вдою ᲂу҆кра́шенъ, ѻ҆́ч҃е, бы́лъ є҆сѝ, прпⷣбенъ, непоро́ченъ, ѡ҆ша́ѧсѧ всѧ́кїѧ непра́вды, сто́лпъ мона́шествꙋющихъ: тѣ́мже тѧ̀ почита́емъ вѣ́рнїи во вѣ́ки.

Бг҃оро́диченъ: Є҆ди́нꙋ тѧ̀ и҆збра̀ добро́тꙋ і҆а́кѡвлю ѻ҆́ч҃ее сло́во, и҆ во ᲂу҆тро́бѣ твое́й всели́сѧ, ꙗ҆́коже благоволѝ, па́че всѣ́хъ краснѣ́йшїй человѣ̑къ, всечⷭ҇таѧ, про́йде, ѡ҆мраче́нное на́ше ѡ҆чища́ѧ є҆стество̀.

Пѣ́снь ѳ҃.

І҆рмо́съ: Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀: въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.

Свѧще́нїѧ хра́мъ, ᲂу҆миле́нїѧ и҆сто́чникъ, сострада́нїѧ стрꙋѧ̀ ꙗ҆ви́лсѧ є҆сѝ, мꙋ́дре, любве́ же безмѣ́рнаѧ пꙋчи́на, гдⷭ҇ень ᲂу҆го́дникъ нело́женъ, и҆ нбⷭ҇ный граждани́нъ, и҆ а҆́гг҃лѡвъ є҆динокро́вникъ, и҆ чꙋде́съ точе́нїе.

Хвали́тисѧ ми́лости, ѻ҆́ч҃е, сꙋда̀ свѣ́дый, не презрѣ́лъ є҆сѝ стра́нна: но всѣ̑мъ бла́гъ, милосе́рдїѧ ѿве́рзлъ є҆сѝ, преподо́бне, ѻ҆те́цъ бы́въ си́рыхъ, и҆ вдови́цъ застꙋ́пникъ, и҆ наги́хъ ѡ҆дѣѧ́нїе, и҆ пи́ща а҆́лчꙋщихъ.

Ѿ землѝ ѿлꙋчи́лсѧ є҆сѝ къ нб҃сѝ, и҆дѣ́же и҆мѣ́лъ є҆сѝ є҆щѐ ходѧ̀ во пло́ти, до́брѣ житїѐ, преподо́бне, на́мъ ѡ҆чище́нїе согрѣше́нїй молѧ̀ дарова́ти, вѣ́рнѡ чтꙋ́щымъ твою̀ свѧтꙋ́ю па́мѧть.

Стрꙋю̀ на́мъ всегда̀ честна́ѧ твоѧ̀ ра́ка и҆сцѣле́нїѧ и҆сточа́етъ, ѻ҆́ч҃е, страсте́й и҆злїѧ̑нїѧ всѧ́ческихъ и҆зсꙋша́ющи, и҆ всѧ́кꙋ напоѧ́ющи дꙋ́шꙋ, къ благопло́дїю бжⷭ҇твенномꙋ, свѧще́нне тїмоѳе́е, хрⷭ҇то́въ ᲂу҆го́дниче.

Бг҃оро́диченъ: Глаго́лѡмъ твои̑мъ послѣ́дꙋюще, ро́ди родѡ́въ, блаже́ннаѧ, тѧ̀ бл҃жи́мъ при́снѡ, бг҃а бо и҆́стиннѡ бл҃же́ннаго родила̀ є҆сѝ, прест҃а́ѧ чⷭ҇таѧ, всѧ̑ блажє́нны томꙋ̀ рабо́тающыѧ нело́жнѡ творѧ́ща.