Канон святому преподобному Сисою Великому

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Страстьмѝ ᲂу҆мерщвле́на ѡ҆живи́ мѧ, ѻ҆́тче, моли́твами твои́ми, жи́зни ны́нѣ живꙋ́щихъ, со дерзнове́нїемъ мно́гимъ предстоѧ̀.

Жела́нїемъ, ѻ҆́тче, бжⷭ҇твеннымъ раче́нїе пло́ти ѿри́нꙋвъ, послѣ́довалъ є҆сѝ любо́вїю зовꙋ́щемꙋ, сїсѡ́е бл҃же́нне.

Зарю̀ невеще́ственнꙋ, ѻ҆́тче, внꙋ́трь въ се́рдцы прїе́мъ, просвѣти́лсѧ є҆сѝ, и҆ всестра́стнꙋю мглꙋ̀ потреби́лъ є҆сѝ.

Бг҃оро́диченъ: Спаси́ мѧ, въ бꙋ́ри всѣ́хъ сласте́й ѡ҆бꙋрева́емаго, сп҃са ро́ждшаѧ, всѣ́хъ тишинꙋ̀, пренепоро́чнаѧ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Пло́ть покори́лъ є҆сѝ по́мыслꙋ крѣ́пкѡ, прпⷣбне, дꙋ́шꙋ же показа́лъ є҆сѝ рабо́ты страстны́ѧ свобо́днꙋ.

Болѣ́зньми твои́ми браздꙋ̀ дꙋше́внꙋю, мꙋ́дре прпⷣбне, до́брѣ дѣ́лаѧ, кла́съ безстра́стїѧ и҆ чꙋде́съ и҆зрасти́лъ є҆сѝ.

Въ ме́ртвость ѡ҆дѣ́ѧлсѧ є҆сѝ животво́рца хрⷭ҇та̀, прпⷣбне, стопа́мъ послѣ́дꙋѧ: тѣ́мъ возставлѧ́ти тебѣ̀ и҆ мє́ртвыѧ бл҃года́ть дае́тъ.

Бг҃оро́диченъ: Мѣ́сто свѧще́нїѧ, и҆ мы́сленнꙋ, чⷭ҇таѧ, трапе́зꙋ, хлѣ́бъ хрⷭ҇та̀ жи́знь всѣ́хъ прїе́мшꙋю, пое́мъ тѧ̀.

Сѣда́ленъ, гла́съ д҃.

Воздержа́нїемъ житїѐ ᲂу҆краси́лъ є҆сѝ, и҆ ᲂу҆́ды ᲂу҆мертви́въ, побѣди́лъ є҆сѝ страстна̑ѧ прирѣва̑нїѧ, сїсѡ́е блаже́нне, и҆ преста́вилсѧ є҆сѝ къ бг҃ꙋ въ вѣ́чный живо́тъ, ꙗ҆́кѡ досто́инъ наслѣ́дникъ. тѣ́мъ не преста́й молѧ́сѧ, спастѝ дꙋ́шы на́шѧ.

Бг҃оро́диченъ: Те́плаѧ предста́тельнице и҆ непобѣди́маѧ, ᲂу҆пова́нїе и҆звѣ́стное и҆ непосты́дное, стѣно̀ и҆ покро́ве и҆ приста́нище прибѣга́ющымъ къ тебѣ̀, приснодв҃о чⷭ҇таѧ, сн҃а твоего̀ и҆ бг҃а молѝ со а҆́гг҃лы, ᲂу҆мире́нїе да́ти мі́рови, и҆ спасе́нїе, и҆ ве́лїю ми́лость.

Крⷭ҇тобг҃оро́диченъ: Крⷭ҇то́мъ сн҃а твоегѡ̀, бг҃облагода́тнаѧ, і҆́дѡльскаѧ пре́лесть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ. сегѡ̀ ра́ди вѣ́рнїи по до́лгꙋ тѧ̀ при́снѡ пое́мъ и҆ благослови́мъ, и҆ бцⷣꙋ вои́стиннꙋ и҆сповѣ́дающе тѧ̀ велича́емъ.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.

Ѡ҆дожде́нїемъ бл҃года́ти, ѻ҆́тче, рѣ́ки чꙋде́съ и҆сточи́лъ є҆сѝ, ѿ скве́рны ѡ҆чища́ѧ, вѣ́рою, блаже́нне, къ тебѣ̀ притека́ющыѧ.

Всено́щными мольба́ми, и҆ вседне́вными, прпⷣбне, стоѧ̑нїи, дꙋ́шꙋ пред̾ѡчи́стивъ, трⷪ҇цѣ до́мъ сїю̀ показа́лъ є҆сѝ.

Въ пꙋсты́нѧхъ ᲂу҆дали́лсѧ є҆сѝ, ѻ҆́тче, бѣ́гаѧ, и҆ ѡ҆жида́ѧ тѧ̀ спаса́ющаго, бл҃же́нне, ѿ малодꙋ́шїѧ и҆ ѡ҆ѕлобле́нїѧ.

Бг҃оро́диченъ: Несѣко́мꙋю го́рꙋ тѧ̀ дре́вле а҆ввакꙋ́мъ прови́дѣ, всенепоро́чнаѧ, и҆зъ неѧ́же бг҃ъ ꙗ҆ви́сѧ, и҆ на́съ и҆стлѣ́вшыѧ ѡ҆бнови́лъ є҆́сть.

Пѣ́снь є҃.

І҆рмо́съ: Оу҆́тренююще вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Хра́мъ трисо́лнечнагѡ бж҃ества̀ бы́въ, страсте́й кꙋмі́ры твоеѧ̀ дꙋшѝ потреби́лъ є҆сѝ.

Оу҆мертви́въ пло́ти твоеѧ̀ мꙋдрова́нїе, бг҃оно́се, мє́ртвыѧ воскреси́лъ є҆сѝ дѣ́йствомъ дх҃а.

Дꙋхѡ́въ нечи́стыхъ ѿгони́тель ꙗ҆ви́лсѧ є҆сѝ, ѻ҆́тче: ст҃а́гѡ бо дх҃а чи́стое жили́ще бы́лъ є҆сѝ ты̀.

Бг҃оро́диченъ: Сл҃нца ро́ждши незаходи́маго, бцⷣе, всего̀ просвѣтѝ ѡ҆мраче́на мѧ̀ страстьмѝ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Ки́та мы́сленнагѡ всегꙋби́тельства и҆збѣжа́лъ є҆сѝ, воздержа́нїе, моли́твꙋ, любо́вь немꙋ́тнꙋ, держа́вное смире́нїе, и҆ любле́нїе тве́рдо, ко хрⷭ҇тꙋ̀, ѻ҆́тче, стѧжа́въ.

Бг҃ъ твоѧ̑ ꙗ҆́же къ немꙋ̀ напра́ви стѡпы̀, си́льный си́льна ꙗ҆́вѣ содѣ́ла, попира́юща ѕмїє́въ и҆ скорпі́й главы̑, бг҃оно́се всеблаже́нне.

Манове́нїемъ є҆́же къ бг҃ꙋ, бг҃ъ ꙗ҆́вѣ бы́лъ є҆сѝ, ко свѣ́тꙋ все́ю любо́вїю свѣ́тъ бы́въ, а҆́гг҃лъ земны́й, бг҃оно́се ѻ҆́тче, нбⷭ҇ный же человѣ́къ.

Бг҃оро́диченъ: Мр҃і́е, чи́стый дѣ́вства сосꙋ́де, ѡ҆чи́сти мо́й ᲂу҆́мъ ѿ страстна́гѡ ѡ҆мраче́нїѧ и҆ и҆спо́лни бл҃года́ти и҆ пра́вды се́рдце моѐ, всенепоро́чнаѧ.

Конда́къ, гла́съ д҃.

Подвиза́всѧ, а҆́гг҃лъ на землѝ ви́дѣнъ бы́лъ є҆сѝ, ѡ҆зарѧ́ѧй, прпⷣбне, помышлє́нїѧ вѣ́рныхъ бг҃озна́меньми всегда̀. тѣ́мже тѧ̀ вѣ́рою, сїсѡ́е, почита́емъ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Всю̀ дх҃а зарю̀ прїѧ́лъ є҆сѝ ᲂу҆мо́мъ чи́стымъ, и҆ свѣти́льникъ вѣ́рнѡ вопїю́щихъ бы́лъ є҆сѝ: бл҃гослове́нъ є҆сѝ, гдⷭ҇и бж҃е, во вѣ́ки.

Бжⷭ҇твеннымъ ѻ҆гне́мъ воздержа́нїѧ попали́лъ є҆сѝ те́рнїе грѣхо́вное, и҆ къ свѣ́тꙋ мы́сленномꙋ преше́лъ є҆сѝ, взыва́ѧ: бл҃гослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Спаси́ мѧ, мт҃и сп҃са, содержи́ма глꙋбино́ю согрѣше́нїй: и҆ всѧ́кїѧ вра́жїѧ и҆схи́ти ѕло́бы, да твоѐ спаса́емь велича́ю застꙋпле́нїе.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Непреста́нными прилѣжѧ̀ моли́твами и҆ мольба́ми, мра́къ ѿ дꙋшѝ страсте́й ѿгна́лъ є҆сѝ, и҆ ᲂу҆ма̀ твоегѡ̀ зри́тельное ѡ҆чи́стилъ є҆сѝ. тѣ́мже прозрѣ́ти проро́чески сподо́билсѧ є҆сѝ бꙋ̑дꙋщаѧ, сїсѡ́е, благоче́стнѡ воспѣва́ѧ: лю́дїе, превозноси́те гдⷭ҇а во вѣ́ки.

А҆́гг҃льски пожи́лъ є҆сѝ съ тѣ́ломъ, прпⷣбне, и҆ проти̑вныѧ побѣди́лъ є҆сѝ полкѝ. тѣ́мже въ невеще́ственнѣй жи́зни, и҆дѣ́же а҆́гг҃льскїѧ чи́ны, съ весе́лїемъ, ѻ҆́тче, всели́лсѧ є҆сѝ, съ ни́миже взыва́еши: свѧще́ннїи воспо́йте гдⷭ҇а, лю́дїе превозноси́те во всѧ̑ вѣ́ки.

Ѡ҆лѧдѣ́вшꙋю страстьмѝ дꙋ́шꙋ мою̀ ѡ҆чи́сти, твои́ми къ бг҃ꙋ свѧще́нными моли́твами, и҆ содержа́щагѡ мѧ̀ плѣне́нїѧ и҆зба́ви, ѻ҆́тче бг҃оно́се, да пою̀ чи́стѡ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Бг҃оро́диченъ: Ѡ҆свѧти́вшисѧ дх҃омъ, прїѧ́ла є҆сѝ во ᲂу҆тро́бѣ твое́й содѣ́телѧ человѣ́ческагѡ є҆стества̀, и҆ сего̀ несказа́ннѡ родила̀ є҆сѝ, ѻ҆трокови́це чⷭ҇таѧ. є҆го́же непреста́ннѡ воспѣва́юще пое́мъ: ѻ҆́троцы благослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Ꙗ҆ви́сѧ чꙋ́до стра́шное, въ са́мое вре́мѧ ᲂу҆спе́нїѧ твоегѡ̀, па́че со́лнца твоемꙋ̀ лицꙋ̀, ѻ҆́тче, ѡ҆блиста́вшꙋ, є҆гда̀ прїидо́ша ли́цы а҆́гг҃льстїи, дꙋ́хъ тво́й прїе́млющїи, и҆ свѣ́тꙋ трисо́лнечномꙋ приносѧ́щїи.

Бжⷭ҇твенными, бл҃же́нне, добро́тами наслажда́ѧсѧ, и҆ прича́стїемъ ѡ҆божа́емь, и҆ просвѣща́емь свѣ́тлыми ѿтꙋ́дꙋ сїѧ̑нїи, свѣтоно́снꙋю твою̀ вѣ́рнѡ па́мѧть чтꙋ́щыѧ, твои́ми мольба́ми, мꙋ́дре, мра́чныѧ страсте́й па́гꙋбы и҆зба́ви.

Пра́веденъ, непоро́ченъ, всѧ́кагѡ ѡ҆греба́ѧсѧ ѕла̀, ѻ҆́тче, бы́лъ є҆сѝ, прпⷣбенъ, неѕло́бивъ, бг҃ꙋ послꙋжи́въ въ прпⷣбїи: тѣ́мже почи́ла є҆́сть трⷪ҇ца въ се́рдцѣ твое́мъ, є҆ѧ́же ны́нѣ ꙗ҆снѣ́е наслажда́ешисѧ свѣ́тлѡ, досточꙋ́дне.

Бг҃оро́диченъ: Ѿ дѣ́лъ ѿню́дъ во мнѣ̀ спасе́нїѧ нѣ́сть, всенепоро́чнаѧ: проти́вною бо ше́ствꙋѧ стезе́ю, тмы̀ и҆спо́лнихсѧ. но свѣ́тъ ѿ свѣ́та на́мъ возсїѧ́вшаѧ, просвѣтѝ и҆ спаси́ мѧ, не пре́зри менє̀ лю́тѣ погиба́юща.