Канон святому преподобному Петру Афонскому

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Дрꙋга́го тѧ̀ на́мъ петра̀ предлага́етъ цр҃ковь дне́сь, просвѣща́юща на́шѧ мы̑сли, па́мѧтїю твое́ю бжⷭ҇твенною, ѻ҆́тче пребога́те.

Ка́ла страсте́й ѡ҆чи́щъ ѻ҆́чи ᲂу҆́мныѧ, преподо́бне, ꙗ҆́снѡ ви́дѣлъ є҆сѝ безмѣ́рнꙋю добро́тꙋ хрⷭ҇та̀ цр҃ѧ̀, тѧ̀ просла́вльшагѡ.

Просїѧ́въ тебѣ̀, трисо́лнечнагѡ бж҃ества̀, преблаже́нне, невече́рнїй свѣ́тъ, содѣ́ла тѧ̀ чи́сто прїѧ́телище бжⷭ҇твенныхъ дарова́нїй, ѻ҆́тче бг҃омꙋ́дре.

Бг҃оро́диченъ: И҆́же на́съ, ра́ди и҆зъ тебє̀, дв҃о, въ чл҃вѣ́ка премно́гою бл҃гостїю ѡ҆бо́лксѧ, преподо́бныхъ собо́ры того̀ возлю́бльшихъ препросла́вленъ є҆́сть.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщве́й грѣ́хъ, стра́хъ тво́й всадѝ въ сердца̀ на́съ пою́щихъ тѧ̀.

Оу҆мертви́въ ꙗ҆̀же на землѝ ᲂу҆́ды, преподо́бне, поꙋчє́нїи ѡ҆живи́лъ є҆сѝ дꙋ́шꙋ бжⷭ҇твенными, и҆ полꙋчи́лъ є҆сѝ вѣ́чнꙋю жи́знь и҆ свѣ́тлость.

Совокꙋпи́лсѧ є҆сѝ ꙗ҆́кѡ до́брѣ пожи́въ, съ вы́шними, пребл҃же́нне, ликостоѧ̑нїи, въ безмо́лвїи пребыва́ѧ, и҆ на добро́тꙋ бж҃е́ственнꙋю взира́ѧ.

Въ гора́хъ ꙗ҆́вѣ скрыва́емь, человѣ̑къ совокꙋпле́нїѧ ᲂу҆дали́лсѧ є҆сѝ, и҆ ᲂу҆́мъ ве́сь впери́лъ є҆сѝ къ нбⷭ҇нѣй добро́тѣ, веселѧ́сѧ.

Бг҃оро́диченъ: Пала́тꙋ краснꙋ̀ неизрече́ннагѡ бога́тства, дв҃о, зна́юще, по до́лгꙋ тѧ̀ сла́вимъ, спа́сшїисѧ рождество́мъ твои́мъ, всенепоро́чнаѧ.

Сѣда́ленъ, гла́съ а҃.

Погре́блъ є҆сѝ страсте́й всевоста́нїе, ᲂу҆мерщвле́нїемъ пло́ти, свѧще́нный ѻ҆́тче, жи́знь безконе́чнꙋю по сме́рти прїѧ́лъ є҆сѝ. Тѣ́мже дне́сь хрⷭ҇то́ва цр҃ковь пра́зднꙋетъ твою̀ досточꙋ́днꙋю па́мѧть, преподо́бныхъ ᲂу҆краше́нїе.

Бг҃оро́диченъ: Наста́ви на́съ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе жили́ще.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ спа́слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Въ гора́хъ и҆ пеще́рахъ, мꙋ́дре, быва́ѧ, бжⷭ҇твенное восхожде́нїе въ се́рдцы поло́жь, всѧ̑ и҆зсꙋши́лъ є҆сѝ страсте́й то́ки бж҃е́ственною бл҃года́тїю.

Стрѣлѧ́нїѧ де́мѡнѡвъ, и҆ стрѣ́лъ, и҆ ловле́нїѧ, до конца̀ ѿбѣ́глъ є҆сѝ, щито́мъ вѣ́ры, преподо́бне, покрыва́емь.

Пове́ржена при ногꙋ̀ твоє́ю льсти́ваго ѕмі́ѧ и҆ смѣ́хъ ви́дѧще, сꙋ́ровѡ свирѣ́пѣющагосѧ, пе́тре всесла́вне, вели́чїе гдⷭ҇еви возсыла́емъ.

Бг҃оро́диченъ: Гдⷭ҇ь и҆зъ тебє̀ роди́всѧ, гпⷭ҇жѐ всенепоро́чнаѧ, ѡ҆блада́юща врага̀ мі́ромъ и҆зба́ви всѧ̑: преподѡ́бныѧ же, ꙗ҆́кѡ возлю́бльшыѧ сего̀, возвели́чи.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀, и҆но́гѡ бо́га не зна́емъ.

На го́ры честны́хъ за́повѣдей восте́къ, ꙗ҆́коже мѡѷсе́й, преподо́бне, ви́дѣлъ є҆сѝ бг҃а ꙗ҆́вѣ, ꙗ҆́коже вмѣща́лъ є҆сѝ, и҆ всѣ́ми просвѣ́щсѧ дꙋше́вными чꙋ́вствы, вельмѝ просла́вилсѧ є҆сѝ.

Мановє́нїи бжⷭ҇твенными при́снѡ ᲂу҆добрѧ́емь, мꙋ́дре, пребы́лъ є҆сѝ стра́сти всѧ́кїѧ неприча́стенъ, пе́тре, и҆ безстра́стїемъ ꙗ҆́кѡ ѻ҆де́ждею ѡ҆бле́клсѧ є҆сѝ, преподо́бне.

Лѣ́ты мно́гими сокрыва́емо тѣ́ло твоѐ, въ просвѣще́нїе на́ше ꙗ҆ви́сѧ, и҆сточа́ѧ рѣ́ки на́мъ и҆сцѣле́нїй, и҆ мѵ́ро благода́ти.

Бг҃оро́диченъ: Свѧще́нными гла́сы тѧ̀ добро́тꙋ і҆а́кѡвлю пое́мъ, пло́тски ро́ждшꙋю мі́рови свѣ́тъ и҆́же ѿ свѣ́та, просвѣща́ющь преподо́бныхъ собо́ръ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Оу҆тве́рждсѧ крѣ́постїю дх҃а, всю̀ вра́жїю крѣ́пость смири́лъ є҆сѝ, и҆ побѣди́тель бы́въ, ко хрⷭ҇тꙋ̀ вѣнцено́сецъ восте́клъ є҆сѝ.

Стопа́мъ послѣ́дꙋѧ бы́лъ є҆сѝ, преподо́бне, петрꙋ̀ верхо́вномꙋ, ка́меню вѣ́ры, є҆го́же и҆ зва́нїе и҆мѣ́лъ є҆сѝ, и҆ вѣ́рою бога́тнѡ ѡ҆богати́лсѧ є҆сѝ.

По́двигомъ бжⷭ҇твеннымъ подвиза́лсѧ є҆сѝ, ѻ҆́тче, и҆ вѣ́рꙋ подо́бнѡ соблю́лъ є҆сѝ: про́чее тебѣ̀ предлежи́тъ до́брагѡ дѣ́ланїѧ вѣне́цъ.

Бг҃оро́диченъ: Во ᲂу҆тро́бꙋ твою̀ всели́сѧ, и҆ всѐ человѣ́ческое сꙋщество̀ ѡ҆божѝ, и҆ прпⷣбныхъ, чⷭ҇таѧ, мно́жество сщ҃е́ннѡ привлечѐ.

Конда́къ, гла́съ в҃.

Оу҆дали́въ себѐ человѣ́ческагѡ сожи́тельства, въ пеще́рахъ ка́менныхъ и҆ разсѣ́линахъ пожи́лъ є҆сѝ, жела́нїемъ бжⷭ҇твеннымъ и҆ любо́вїю, пе́тре, гдⷭ҇а твоегѡ̀, ѿ негѡ́же вѣне́цъ прїѧ́лъ є҆сѝ: молѝ непреста́ннѡ, спасти́сѧ на́мъ.

І҆́косъ:

Мїрски́хъ мо́лвъ и҆збѣ́гъ, и҆ бꙋ́ри жите́йскїѧ, ꙗ҆́кѡ бѣ́гательны и҆ ᲂу҆ко́рны, непроходи̑маѧ мѣста̀ дости́глъ є҆сѝ, и҆ ѻ҆со́бь ꙗ҆́коже пти́ца, є҆ди́нъ лѣ̑та мнѡ́га пожи́лъ є҆сѝ, въ пеще́рахъ и҆ про́пастехъ, и҆ разсѣ́линахъ, кры́ѧсѧ, ко гдⷭ҇ꙋ взира́ѧ, и҆ тогѡ̀ и҆сполнѧ́ѧ повелѣ̑нїѧ: ѿ негѡ́же прїѧ́тъ бл҃года́ть, преподо́бне, ꙗ҆́кѡ со́лнце, ѻ҆́тче, возсїѧ́лъ є҆сѝ, молѧ̀ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ моли́тва.

Тве́рдымъ по́мысломъ на ра́мо кре́стъ взе́мъ, распе́ншемꙋсѧ послѣ́довалъ є҆сѝ, ꙗ҆́кѡ мона́хъ ѡ҆свѧще́нъ, ѡ҆палѧ́ѧ ꙗ҆́кѡ хвра́стїе стра̑сти, и҆ вопїѧ̀, преблаже́нне: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Тѧ̀ лѣ́ты мно́гими сокрове́на, ꙗ҆́кѡ сокро́вище ꙗ҆влѧ́етъ та́йнѡ, бжⷭ҇твенное сло́во, пе́тре преподо́бне, въ ꙗ҆вле́нно снабдѣ́нїе, всѣ̑мъ вта́йнѣ стѧжа́вшымъ грѣхѡ́вныѧ сквє́рны, ꙗ҆вле́нна тѧ̀ моли́твенника, ка́ющымсѧ ꙗ҆́снѡ.

Благово́ннѡ хрⷭ҇тꙋ̀ ѡ҆бѣ́томъ добродѣ́телей ꙗ҆ви́сѧ кажде́нїе, мѵ́ро и҆злива́емо благово́нно ѿ честны́хъ моще́й твои́хъ, всѣ̑мъ зрѧ́щымъ во ᲂу҆дивле́нїе и҆злива́ѧ: съ пло́тїю бо а҆́гг҃льское житїѐ пожи́лъ є҆сѝ.

Бг҃оро́диченъ: Краснꙋ̀ ѡ҆брѣ́тъ и҆ добрꙋ̀ въ жена́хъ тѧ̀, прест҃а́ѧ, прекра́сное сло́во всели́сѧ въ прест҃о́е чре́во твоѐ, всѧ̑ ли́ки преподо́бныхъ ѡ҆свѣ́щь, зовꙋ́щыѧ: благослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Блаже́нства бжⷭ҇твеннагѡ сподо́билсѧ є҆сѝ вои́стиннꙋ, пе́тре бг҃омꙋ́дре, во́лею ѡ҆бнища́въ, и҆ всегда̀, мꙋ́дре, пла́кавъ, и҆ кро́токъ бы́въ, наслѣ́дилъ є҆сѝ зе́млю кро́ткихъ.

Бо́дръ и҆мѣ́ѧ по́мыслъ, ᲂу҆спи́лъ є҆сѝ страсте́й воста̑нїѧ, и҆ ᲂу҆снꙋ́въ со́нъ до́лжный, ны́нѣ пра́вєднымъ всѣ̑мъ, пребога́те, неꙋсыпа́ющь ꙗ҆ви́лсѧ є҆сѝ тѧ̀ чтꙋ́щымъ моли́твенникъ.

Зимо́ю и҆ ва́ромъ, мꙋ́дре, побѣди́въ зи́мꙋ де́мѡнскꙋю, дꙋхо́вною теплото́ю потреблѧ́еши ꙗ҆́вѣ, и҆ стра̑сти ᲂу҆мерщвлѧ́еши тѣлє́сныѧ, безстра́стїѧ ѡ҆блиста́ѧ сїѧ́нїемъ.

Въ горѣ̀ а҆ѳѡ́нстѣй всели́лсѧ є҆сѝ, ꙗ҆́коже на карми́льстѣй и҆ногда̀, пе́тре бг҃омꙋ́дре, ѳесві́тѧнинъ и҆лїа̀, въ безмо́лвїи бг҃а ᲂу҆се́рднѡ и҆ща́й, досточꙋ́дне: и҆ сегѡ̀ зрѣ́нїѧ ꙗ҆́кѡ преподо́бенъ сподо́билсѧ є҆сѝ.

Бг҃оро́диченъ: Оу҆ны́лъ и҆мѣ́ѧ по́мыслъ, и҆ дꙋ́шꙋ сластьмѝ ѡ҆тѧгче́нꙋ, къ тебѣ̀ прибѣга́ѧ, бг҃ороди́тельнице чⷭ҇таѧ, вопїю́ ти: воздви́гни и҆ спаси́ мѧ ѿча́ѧннаго и҆ ѡ҆сꙋжде́ннаго.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшагѡ ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

Крѣ́постїю и҆ держа́вою, хрⷭ҇то́съ бг҃ъ тѧ̀ препоѧ́савъ ᲂу҆крѣпѝ, побѣди́ти хи́трѡсти дє́мѡнскїѧ, пребога́те, ꙗ҆́кѡ возлю́бльша сего̀ ѿ всегѡ̀ се́рдца и҆ дꙋшѝ. сегѡ̀ ра́ди тѧ̀ вѣ́рою ᲂу҆блажа́емъ и҆ любо́вїю.

Ꙗ҆ви́лсѧ є҆сѝ въ домꙋ̀ гдⷭ҇ни, ꙗ҆́кѡ ма́слина, бг҃омꙋ́дре, є҆ле́емъ по́тѡвъ твои́хъ, на̑ша ᲂу҆маща́ѧ ли́ца, творѧ́щихъ тво́й се́й сла́вный и҆ бжⷭ҇твенный пра́здникъ, мона́хѡвъ ᲂу҆краше́нїе, преподо́бныхъ верхо́вникъ.

Твоѐ пресла́вное и҆сточи́вшее, всесла́вный пе́тре, тѣ́ло, благово́нно и҆ красно̀ мѵ́ро, вѣ̑рныѧ благово́нїѧ и҆спо́лни: благово́нїе бо бг҃ꙋ, и҆ жи́въ и҆ по кончи́нѣ ꙗ҆́вѣ показа́лсѧ є҆сѝ. тѣ́мже тѧ̀ досто́йнѡ ᲂу҆блажа́емъ.

Ѡ҆свѧще́нный гдⷭ҇ꙋ бг҃ꙋ на́шемꙋ сосꙋ́де, мꙋ́ченикѡмъ и҆ а҆пⷭ҇лѡмъ и҆ а҆́гг҃лѡмъ собесѣ́дниче, ѡ҆ всѣ́хъ молѝ, вѣ́рою тѧ̀ чтꙋ́щихъ на землѝ, да ѡ҆брѧ́щемъ всѝ согрѣше́нїй ѡ҆ставле́нїе.

Бг҃оро́диченъ: Пощади́ мѧ, гдⷭ҇и, пощадѝ, є҆гда̀ хо́щеши мѝ сꙋди́ти, и҆ не ѡ҆сꙋдѝ менє̀ во ѻ҆́гнь, нижѐ ꙗ҆́ростїю ѡ҆бличи́ши менѐ, мо́литъ тѧ̀ дв҃а, тебѐ ро́ждшаѧ, хрⷭ҇тѐ, и҆ а҆́гг҃льстїи собо́ри, и҆ преподо́бныхъ совокꙋплє́нїѧ.

Свѣти́ленъ.

Петрꙋ̀ тезоимени́таго верхо́вномꙋ всѝ, по́стникѡвъ похвалꙋ̀, и҆ преподо́бныхъ сла́вꙋ, столпа̀ нбⷭ҇наго, цвѣ́та а҆ѳѡ́нскаго, велегла́снѡ пѣ́сньми почти́мъ по до́лгꙋ, ꙗ҆́кѡ моли́твенника на́мъ всѣ̑мъ.

Бг҃оро́диченъ: Бцⷣꙋ тѧ̀ вои́стиннꙋ и҆сповѣ́дꙋемъ, влⷣчце, тебє̀ ра́ди спа́сшїисѧ: и҆́бо бг҃а неизрече́ннѡ родила̀ є҆сѝ, разрꙋ́шшаго кресто́мъ сме́рть, и҆ къ себѣ̀ привле́кша преподо́бныхъ собо́ры. съ ни́миже тѧ̀ восхвалѧ́емъ, дв҃о.