Канон святому преподобному Онуфрию Великому

Пѣ́снь а҃.

І҆рмо́съ: Колесни̑цы фараѡ́нѡвы и҆ си́лꙋ є҆гѡ̀ вве́рже въ мо́ре крѣ́пкїй во бра́нѣхъ, воспое́мъ пѣ́снь но́вꙋю, ꙗ҆́кѡ просла́висѧ.

Зарѝ трисвѣ́тлыѧ ѡ҆сїѧ́емь свѣ́томъ, мра́ка мѧ̀ и҆схи́ти смертоно́снагѡ согрѣше́нїй, твои́ми, ѻ҆́тче, моли́твами, ѻ҆нꙋ́фрїе, ꙗ҆́кѡ да пою̀ па́мѧть твою̀.

Мі́ра ѿве́ргсѧ, прилѣпи́лсѧ є҆сѝ хрⷭ҇тꙋ̀, пло́ть покори́лъ є҆сѝ по́мыслꙋ, и҆ прїѧ́телище ꙗ҆ви́лсѧ є҆сѝ ст҃а́гѡ дх҃а, ѻ҆́тче бг҃омꙋ́дре ѻ҆нꙋ́фрїе.

Столпо́мъ бжⷭ҇твеннагѡ свѣ́та наставлѧ́емь, є҆гѵ́петъ ѡ҆ста́вилъ є҆сѝ стра́стный, и҆ къ высотѣ̀ дости́глъ є҆сѝ безстра́стїѧ, и҆ бг҃ꙋ бесѣ́довалъ є҆сѝ.

Бг҃оро́диченъ: Родила̀ є҆сѝ пре́жде тебє̀ ро́ждшагосѧ и҆з̾ ѻ҆ц҃а̀, пребыла́ же є҆сѝ нетлѣ́нна, и҆ по ржⷭ҇твѣ̀ дв҃а: тѣ́мже бцⷣꙋ тѧ̀ и҆́стиннꙋю и҆сповѣ́дꙋемъ, препѣ́таѧ.

Пѣ́снь г҃.

І҆рмо́съ: Оу҆твержда́ѧй гро́мъ, и҆ созида́ѧй дх҃ъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀: ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.

А҆́гг҃льскомꙋ послѣ́дꙋѧ зрѣ́нїю, пꙋсты́ню дости́глъ є҆сѝ: и҆ воздержа́нїемъ плотскі̑ѧ сла̑сти ᲂу҆вѧди́въ, а҆́гг҃льски пожи́лъ є҆сѝ въ то́й, бл҃же́нне.

Насажде́но дре́во при и҆схо́дищихъ ꙗ҆ви́всѧ воздержа́нїѧ во́дъ, во бла́го, ѻ҆́тче, вре́мѧ, бл҃гопло́дїе добродѣ́телей, ꙗ҆́кѡ вои́стиннꙋ по́далъ є҆сѝ, ѻ҆нꙋ́фрїе, дѣѧ́нїемъ.

Всесвѣ́тлаѧ ѕвѣзда̀ вселе́ннѣй ѿ пꙋсты́ни возсїѧ́въ, ᲂу҆ѧсни́лъ є҆сѝ вѣ́рныхъ, зарѧ́ми по́двигѡвъ благочести́выхъ собо́ры, ѻ҆́тче на́шъ ѻ҆нꙋ́фрїе преподо́бне.

Бг҃оро́диченъ: Пра̑ѻтєцъ разори́ла є҆сѝ печа́ль, ра́дость на́мъ ро́ждши, жизнода́вца и҆ и҆зба́вителѧ, прест҃а́ѧ бцⷣе. Є҆го́же прилѣ́жнѡ молѝ, спастѝ ста́до твоѐ.

Сѣда́ленъ, гла́съ д҃.

Оу҆дали́лсѧ є҆сѝ, преподо́бне, и҆ въ пꙋсты́нѧхъ ꙗ҆́вѣ водвори́лсѧ є҆сѝ, гдⷭ҇а и҆зба́вльшаго тѧ̀ ѿ лю̑тъ при́снѡ ѡ҆жида́ѧ. Тѣ́мже бл҃гоꙋгоди́въ влⷣцѣ, всебл҃же́нне, прїѧ́лъ є҆сѝ нестарѣ́ющеесѧ нбⷭ҇ное црⷭ҇тво: въ не́мже ны́нѣ водворѧ́ѧсѧ, помина́й чтꙋ́щыѧ тѧ̀.

Бг҃оро́диченъ: Наста́ви на́съ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе жили́ще.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.

Совле́къ тлѣ́ннꙋю грѣха̀ ри́зꙋ, ѻ҆́тче, пра́вды, ѻ҆нꙋ́фрїе, во ѻ҆де́ждꙋ ѡ҆бле́клсѧ є҆сѝ, и҆ внꙋ́трь черто́га всели́лсѧ є҆сѝ.

Моли́твами непреста́нными свѣ́тъ бжⷭ҇твеннагѡ ра́зꙋма собра́лъ є҆сѝ въ се́рдцы твое́мъ, ѻ҆́тче на́шъ: неразꙋ́мїѧ же ѿбѣ́глъ є҆сѝ мра́чныѧ ле́сти, ѻ҆нꙋ́фрїе.

Тѣ́сный ше́ствовавъ пꙋ́ть, и҆ приско́рбный на землѝ, бг҃омꙋ́дре, къ широ́комꙋ дости́глъ є҆сѝ, и҆ ра́дости и҆спо́лненъ нбⷭ҇ныхъ наслажде́нїй, преподо́бне.

Бг҃оро́диченъ: Спасе́нїе тѧ̀ на всѧ́ко вре́мѧ и҆ мѣ́сто призыва́ю: не пре́зри менє̀, всенепоро́чнаѧ, ꙗ҆́же бг҃а ро́ждшаѧ, и҆зба́вителѧ вкꙋ́пѣ и҆ сп҃са моего̀.

Пѣ́снь є҃.

І҆рмо́съ: Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.

А҆́гг҃лѡмъ є҆диножи́телѧ пафнꙋ́тїй, ѡ҆брѣ́тъ въ пꙋсты́ни тѧ̀, вели́каго равноа́гг҃льнаго свѣти́льника, бл҃гоче́стнѡ житїѧ̀ твоегѡ̀ всѣ̑мъ ꙗ҆вѝ и҆справлє́нїѧ, мꙋ́дре.

Возсїѧ̀ тебѣ̀ гдⷭ҇ь, є҆гѡ́же ѿ дꙋшѝ вожделѣ́лъ є҆сѝ, безстра́стїѧ свѣ́тъ невече́рнїй, ѻ҆нꙋ́фрїе: и҆ мі́ръ въ по́вѣстехъ непоро́чнагѡ житїѧ̀ твоегѡ̀ ве́сь просвѣти́лъ є҆сѝ, мꙋ́дре.

Ꙗ҆́кѡ благопроповѣ́дꙋѧ, ѻ҆нꙋ́фрїе блаже́нне, є҆́же прилѣплѧ́тисѧ бг҃ꙋ на́шемꙋ, на того̀ ᲂу҆пова́нїе ѿ дꙋшѝ возложи́лъ є҆сѝ, и҆ тогѡ̀ хвалꙋ̀ и҆мѣ́лъ є҆сѝ во ᲂу҆стѣ́хъ при́снѡ.

Бг҃оро́диченъ: Возсїѧ́й мѝ, влⷣчце, зарю̀ ми́лости твоеѧ̀, во тмѣ̀ прегрѣше́нїй мои́хъ сꙋ́щꙋ, дв҃о: и҆ къ свѣ́тꙋ наста́ви покаѧ́нїѧ, молю́сѧ, и҆ спасе́нїѧ жи́зни.

Пѣ́снь ѕ҃.

І҆рмо́съ: Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ, но ты̀, ᲂу҆пра́вителю благі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ спаси́ мѧ.

Мра́зомъ померза́емѣй пло́ти твое́й теплото́ю дх҃а грѣ́ѧшесѧ тво́й дꙋ́хъ: зно́емъ же ѡ҆палѧ́емь, мꙋ́дре, роса̀ прохлажда́ше небе́снаѧ тѧ̀ благода́тїю.

Ходѧ́щꙋ тѝ въ пꙋсты́ни, ѿ бг҃а предвожда́лсѧ є҆сѝ, сла́вне, свѣтозаре́нїемъ, та́мѡ хотѧ́щаго свѣ́та прїѧ́ти тѧ̀ ны́нѣ прописꙋ́ѧ, и҆ сла́вꙋ при́снѡ пребыва́ющꙋю.

Въ верте́пѣ роди́выйсѧ, и҆ на рꙋкꙋ̀ ста́рца ꙗ҆́кѡ младе́нецъ прїѧ́ти сподо́бльсѧ, младе́нствꙋюща дѣ́лы благи́ми, ста́рца въ верте́пѣ тѧ̀ ᲂу҆чинѧ́етъ къ лꙋ́чшымъ.

Бг҃оро́диченъ: Бе́зднꙋ ми́лости ро́ждшаѧ, страсте́й мои́хъ бе́зднꙋ пꙋчи́ною щедро́тъ твои́хъ пото́пльши, тꙋ́чꙋ ѿ дꙋшѝ пода́ждь мѝ сле́зъ, бг҃ороди́тельнице всенепоро́чнаѧ.

Конда́къ, гла́съ г҃.

Сїѧ́нїемъ дх҃а прест҃а́гѡ, бг҃омꙋ́дре, просвѣ́щсѧ, ѡ҆ста́вилъ є҆сѝ ꙗ҆̀же въ житїѝ молвы̑ пꙋсты́ню же дости́гъ, преподо́бне ѻ҆́тче, возвесели́лъ є҆сѝ и҆́же на́дъ всѣ́ми бг҃а и҆ зижди́телѧ: сегѡ̀ ра́ди прославлѧ́етъ тѧ̀ хрⷭ҇то́съ, блаже́нне, вели́кїй дарода́тель.

І҆́косъ:

Кто̀ и҆зрече́тъ твоѧ̑ по́двиги, всеблаже́нне; и҆лѝ кто̀ ѿ земноро́дныхъ досто́йнѡ похва́литъ твоѐ житїѐ, ѻ҆нꙋ́фрїе ѻ҆́тче; ꙗ҆́коже безпло́тенъ пожи́лъ є҆сѝ бы̑лїи пита́емь. пи́щꙋ же и҆мѣ́лъ є҆сѝ хрⷭ҇та̀ бг҃а, на него́же твою̀ наде́ждꙋ положи́лъ є҆сѝ, на́гъ ходѧ̀ въ пꙋсты́нѧхъ, стꙋ́день и҆ мра́зъ ꙗ҆́кѡ безпло́тенъ терпѧ̀: сегѡ̀ ра́ди то́й тѧ̀ свѣти́льника показа̀, блаже́нне, вели́кїй дарода́тель.

Пѣ́снь з҃.

І҆рмо́съ: Гл҃го́лавый на горѣ̀ съ мѡѷсе́омъ, и҆ ѻ҆́бразъ дѣ́вства ꙗ҆вле́й въ кꙋпинѣ̀: благослове́нъ є҆сѝ, бж҃е ѻ҆тє́цъ на́шихъ.

На горѣ̀ и҆лїю̀ препита́вый вра́номъ, то́й тебѣ̀ а҆́гг҃ломъ пи́щꙋ посыла́етъ, тѧ̀ велича́ѧ, преподо́бне, того̀ возвели́чившаго.

Ꙗ҆́коже фі́нїѯъ, при и҆схо́дищахъ прозѧ́бъ водны́хъ воздержа́нїѧ, пи́щꙋ и҆мѣ́лъ є҆сѝ фі́нїки, пита́всѧ пи́щею болѣ́зней твои́хъ.

Видѣ̑нїи разширѧ́ѧсѧ, ѻ҆́тче, болѣ́зньми пита́лсѧ є҆сѝ воздержа́нїѧ: и҆ ны́нѣ полꙋчи́лъ є҆сѝ го́рнее благопита́нїе, ѻ҆нꙋ́фрїе.

Бг҃оро́диченъ: И҆́же во чре́во дв҃ы всели́выйсѧ, и҆ сїѐ небе́съ ши́рши показа́вый, благослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Пѣ́снь и҃.

І҆рмо́съ: Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ свѣ́тъ и҆ тма̀, мра́зъ и҆ зно́й, сы́нове человѣ́честїи, свѧще́нницы, благослови́те гдⷭ҇а, и҆ превозноси́те є҆го̀ во вѣ́ки.

Зе́млю до́льнꙋю преминꙋ́въ, небе́снꙋю стѧжа́лъ є҆сѝ жи́знь, и҆ безпло́тныхъ ликѡ́мъ счи́слилсѧ є҆сѝ, носѧ̀ пло́ть, ѻ҆нꙋ́фрїе блаже́нне, и҆ зе́млю кро́ткихъ наслѣ́довалъ є҆сѝ, ю҆́же тебѣ̀ подадѐ хрⷭ҇то́съ во вѣ́ки.

Слє́зныѧ ка̑пли гаси́ло стѧжа́лъ є҆сѝ вои́стиннꙋ, стра́стнымъ разгорѣ́нїемъ, и҆ любо́вїю ѻ҆гнѧ̀ бжⷭ҇твеннагѡ росѣ̀ совокꙋпи́лсѧ є҆сѝ безстра́стїѧ, хрⷭ҇тꙋ̀ бг҃ꙋ на́шемꙋ: тѣ́мже тѧ̀ чти́мъ, ѻ҆нꙋ́фрїе бг҃омꙋ́дре.

А҆́гг҃льскомꙋ житїю̀ поревнова́вша, непреста́нными моли́твами, рꙋко́ю а҆́гг҃ла свои̑мъ та́йнамъ прича́стника, ѻ҆́тче, хрⷭ҇то́съ тѧ̀ показа̀, вели́кагѡ совѣ́та вои́стиннꙋ а҆́гг҃лъ, є҆го́же превозно́симъ во вѣ́ки.

Бг҃оро́диченъ: Землѐ ст҃а́ѧ, и҆зъ неѧ́же хрⷭ҇то́съ прозѧбѐ кла́съ жи́зни, и҆ и҆ста́ѧвшее гла́домъ назда̀, человѣ́ческое є҆стество̀ дре́внїѧ ѕло́бы, бг҃омт҃и всенепоро́чнаѧ: тѣ́мже тѧ̀ пое́мъ во вѣ́ки.

Пѣ́снь ѳ҃.

І҆рмо́съ: Ꙗ҆́кѡ сотворѝ мнѣ̀ вели́чїе си́льный, и҆ ст҃о и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.

Взира̑нїи непреста́нными, ꙗ҆̀же къ бг҃ꙋ, ѻ҆́тче бг҃омꙋ́дре, ѡ҆божа́емь прича́стїемъ є҆гѡ̀, бы́лъ є҆сѝ бг҃ъ: и҆ со а҆́гг҃лы слꙋжѧ̀, сего̀ сла́виши при́снѡ.

Оу҆мертви́въ пло́ть, побѣди́лъ є҆сѝ врага̀: преста́вилсѧ є҆сѝ къ невече́рнѣй зарѝ, небе́сныхъ бла̑гъ ты̀ наслѣ́дникъ бы́въ, ѻ҆́тче ѻ҆нꙋ́фрїе.

Любо́вїю творѧ́щихъ ст҃ы́й тво́й пра́здникъ, ѿ всѧ́кагѡ треволне́нїѧ страсте́й мольба́ми твои́ми и҆збавлѧ́й при́снѡ ꙗ҆́кѡ дерзнове́нїе ѡ҆брѣ́тъ ᲂу҆ сп҃са, ѻ҆нꙋ́фрїе.

Бг҃оро́диченъ: Наде́ждꙋ тѧ̀ и҆ стѣ́нꙋ стѧжа́вше, пречⷭ҇таѧ, ᲂу҆пова́емъ ᲂу҆лꙋчи́ти блага̑ѧ моли́твами твои́ми, чⷭ҇таѧ, ꙗ҆̀же ѡ҆бѣща̀ хрⷭ҇то́съ, воплоти́выйсѧ и҆зъ тебє̀ на́съ ра́ди.

Свѣти́ленъ.

А҆́гг҃льстїи ᲂу҆диви́шасѧ чи́ни твои̑мъ подвигѡ́мъ, ꙗ҆̀же въ пꙋсты́ни твори́лъ є҆сѝ, ѻ҆нꙋ́фрїе бг҃оно́се: три́ бо къ шести́десѧтимъ лѣ́та, ѻ҆́тче, пости́лсѧ є҆сѝ. и҆ ны́нѣ, всеблаже́нне преподо́бне, со хрⷭ҇то́мъ црⷭ҇твꙋеши въ непреходи̑мыѧ вѣ́ки.

Бг҃оро́диченъ: Бцⷣꙋ тѧ̀ вои́стиннꙋ и҆сповѣ́дꙋемъ, влⷣчце, тебє̀ ра́ди спа́сшїисѧ: и҆́бо бг҃а неизрече́ннѡ родила̀ є҆сѝ, разрꙋ́шшаго кресто́мъ сме́рть, и҆ къ себѣ̀ привле́кша преподо́бныхъ собо́ры. съ ни́миже тѧ̀ восхвалѧ́емъ, дв҃о.