Канон святому преподобному Марону Сирийскому

Пе́снь 1.

Ирмо́с: Я́ко по су́ху, пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м вопия́ше.

Моего́ ра́зума твои́ми моли́твами мра́к отжени́, преподо́бне о́тче Ма́роне, я́ко да воспою́ сла́вно твою́ свяще́нную и светоза́рную па́мять пе́сньми.

Я́ко река́ устреми́ся от Сио́на, преподо́бне о́тче, и напои́л еси́ зело́ Боже́ственными струя́ми ве́рных собо́ры, Бо́гу побе́дную пе́снь вопию́щих.

Поще́нием, о́тче Ма́роне, себе́ очи́стив, ве́сь све́та испо́лнен бы́сть, ве́сь Боговме́стен, ве́сь Ду́ху Свято́му соприча́стен.

Богоро́дичен: Све́тлыми луча́ми Твоего́ Сы́на, Богоро́дице, просвети́ омраче́нную мою́ ду́шу, и страсте́й смуще́ние Твои́м, Чи́стая, укроти́ хода́тайством.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Труды́ по́стническими, свою́ ду́шу вооружи́в, плотска́я увяди́л еси́, о́тче преподо́бне, игра́ния, и у́м сла́вне соде́ла, Боже́ственныя Тро́ицы жили́ще.

Бо́дренными твои́ми моли́твами, о́тче Ма́роне, и жесто́ким воздержа́нием Бо́гу на земли́ до́бре угоди́л еси́, сего́ ра́ди стра́шен бесо́м, и сла́вен челове́ком бы́л еси́.

Ра́йскую жи́знь, и та́мо святы́х селе́ние, всегда́ во уме́ свое́м помина́я, преподо́бне, те́м же в слеза́х и в воздыха́ниих всю́ свою́ жи́знь, о́тче Ма́роне, преше́л еси́. Сего́ ра́ди и по сме́рти Христо́с чудесы́ тя́ просла́ви.

Богоро́дичен: Источа́еши исцеле́ний струи́ боля́щим Де́во всю́ду, Тя́ бо исто́чника показа́ милосе́рдия, Влады́чице, и́же ми́лости Исто́чник из Тебе́ рожде́йся па́че ума́.

Седа́лен, гла́с 8.

Прогони́тель бесо́м яви́ся, и я́ко свети́льник те́мным, просвети́в сия́, яви́л еси́ Со́лнца, от Де́вы возсия́вшаго, и хра́мы и́дольския сокруши́в, воста́вил еси́ це́ркви, блаже́нне, в сла́ву Бо́га на́шего, те́м тя́ почита́ем, и Боже́ственную твою́ па́мять све́тло пра́зднуем, и согла́сно вопие́м ти́: о́тче Ма́роне, моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Богоро́дичен: Со́лнца о́блаче све́тлый, Боже́ственнаго све́та све́щниче златакова́нный, нескве́рная, Непоро́чная, Пречи́стая Влады́чице, омраче́нную ду́шу мою́ слепото́ю страсте́й, безстра́стия заре́ю просвети́ти молю́ся и оскверне́нное се́рдце мое́ омы́й умиле́нием покая́ния, пла́чем же от скве́рны мя́ очи́сти де́л мои́х, да любо́вию зову́ Ти́: Богоро́дице Присноде́во, моли́ся Христу́ Бо́гу, прегреше́ний оставле́ние да́ти ми́, Тебе́ бо наде́жду име́ю, ра́б Тво́й.

Пе́снь 4.

Ирмо́с: Христо́с моя́ си́ла Бо́г и Госпо́дь, честна́я Це́рковь Боголе́пно пое́т взыва́ющи, от смы́сла чи́ста о Го́споде пра́зднующи.

Светоно́сное и светови́дное житие́ твое́, блаже́нне, ра́достно хвали́ти усе́рдствующа, твоея́ све́тлости ти́хостию, просвети́ мя́ молю́ся, и грехо́вную дря́хлость отжени́.

Я́коже благода́ть прие́м исцеле́нием, всеблаже́нне Ма́роне, души́ моея́ я́звы моли́твами твои́ми исцели́, и находя́щих искуше́ний изба́ви мя́ молю́ся.

Все́м нра́вом преподо́бне к Бо́гу ра́достно прилежа́, кроме́ пло́ти и ми́ра бы́в, и смы́сл несмуще́н, и утвержде́н воздержа́нием соблю́л еси́, Боже́ственному безстра́стию присвоя́яся.

Богоро́дичен: Возсия́ Со́лнце из Тебе́, Ма́ти Присноде́во, и́же от Отца́ пре́жде ве́к неви́димый, и ви́димым пресла́вно опису́ем телесе́м, благоче́стия све́том челове́ки просвети́л е́сть.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, И́стиннаго Бо́га, от мра́ка грехо́внаго взыва́юща.

Мольбу́ ны́не сотвори́, о́тче Ма́роне, о рабе́х свои́х, я́ко да оставле́ние согреше́нием прии́мем, и от одержа́щия ско́рби да изба́вимся, и вся́кия тесноты́.

Тебе́ мо́лим, о́тче Ма́роне, блага́го хода́тая ко Го́споду, не оста́ви на́с без заступле́ния, но обы́чною твое́ю моли́твою спаса́й.

Не́сть, и́же призва́вый тя́ в ско́рбех, и ско́ро не обря́щет утеше́ние. Те́м же мо́лим тя́, вся́ боле́зни на́ша, Ма́роне, обле́гчи.

Богоро́дичен: Пое́т вся́к язы́к и сла́вит Тя́, Де́во Богоневе́сто, Бо́га бо препе́таго ро́ждши, Его́же моли́ непреста́нно о душа́х на́ших.

Пе́снь 6.

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́, возведи́ от тли́ живо́т мо́й, Многоми́лостиве.

Кре́пко врага́ попра́л еси́, му́дре, его́ же сокруша́ти и на́с твои́ми моли́твами укрепи́, Ма́роне, и́же тобо́ю, предста́телем Боже́ственным, обогати́вшихся.

От вся́кия изба́ви мя́ тесноты́, простра́нство я́ко име́я ми́лости, Ма́роне, и те́сным ше́ствовати укрепи́ путе́м ко Го́споду.

Я́ко фи́никс высокора́сленый, ты́ на горе́, о́тче Ма́роне, процвете́, и Бо́гу плодоноси́л еси́ сла́дкия боле́зни трудо́в свои́х.

Всесве́тлый показа́ся, Богому́дре, сто́лп, наставля́я чи́ны и́нок, о́тче Ма́роне, о́блак же, осеня́ющ жре́бий Бо́жий, и ли́ца неви́димых вра́г помрача́ющ благода́тию все́х Царя́.

Богоро́дичен: От Де́вы Младе́нец ражда́ется, созда́вый ве́ки хоте́нием, Ю́же воспева́ем я́ко Богоро́дицу, и пра́ведно ублажа́ем.

Конда́к, гла́с 5.

Страсте́й пе́щь, преподо́бне, угаси́л еси́, воздержа́ния росо́ю. Дарова́нием обогати́лся еси́ исцеле́ний от Бо́га, Ма́роне, прия́л еси́ цели́ти ве́рным боле́зни тя́жкия, и бесо́в отгони́ти полки́. Сего́ ра́ди с весе́лием почита́ем тя́.

И́кос:

Отве́рзи ми́ устне́, преблаже́нне, Богоприя́тными моли́твами, предстоя́ Бо́гови, всесла́вне Ма́роне, да воспою́ Боже́ственное твое́ житие́, и возглаго́лю досто́йно доброде́тели твоя́, я́же на земли́ Христа́ Бо́га ра́ди сверши́л еси́ подо́бно. Сто́лп бо яви́ся и пра́вило и́ноком све́тло, ра́вно А́нгелом стяжа́ житие́. Сего́ ра́ди с весе́лием почита́ем тя́.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти; благослове́н еси́, Бо́же оте́ц на́ших.

Вся́каго сладостра́стия, о́тче, отве́ргся, с зимо́ю и ва́ром боря́ся, пострада́л еси́ без покро́ва, поя́: благослове́н Бо́г оте́ц на́ших.

Пребыва́ет сла́ва во ве́ки твоя́, о́тче, и па́мять со все́ми пра́ведными. С ни́ми же на́с, ве́рою пою́щих, помина́й, благослове́н Бо́г оте́ц на́ших.

Глаго́л мои́х услы́шав, спе́шно, о́тче Ма́роне, потщи́ся приити́ ми́ на по́мощь, обурева́ему скорбьми́, и ну́ждами жите́йскими, и бесо́вскими озлобле́нии я́ко да спаса́ем пою́, благослове́н Бо́г оте́ц на́ших.

Твои́ к Бо́гу непреста́нно ру́це воздева́еме, руки́ льсти́ваго, о́тче, благочести́выя изба́виша, и вся́кому боля́щему здра́вие подава́ша.

Богоро́дичен: Де́во Чи́стая, Сло́ву пала́то, ду́шу мою́ покажи́ до́м Ду́хови. И водо́ю исто́чника живонача́льнаго напо́й мя́, зно́ем грехо́вным изгара́ема, я́ко да по до́лгу прославля́ю Тя́.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Си́лою Боже́ственною ополче́ния бесо́вская па́губная потреби́л еси́. Благода́ть же прии́м уставля́ти тряса́вичныя не́мощи и отгони́ти ду́хи нечи́стыя от вопию́щих: Тя́ превозно́сим Го́спода во ве́ки.

Моле́ния Го́сподеви, о́тче, неоску́дно приноси́ ты́, я́ко да грехо́в и пла́мене муче́ния ве́чнующаго, и напа́стей и скорбе́й изба́вит на́с, я́ко Еди́н преблаги́й.

Сокруши́л еси́ куми́ры па́губныя иногда́, Христо́в уго́дниче. Те́м же ны́не ве́рою молю́ тя́, Ма́роне, ума́ моего́ куми́ры потреби́.

Богоро́дичен: Поглоще́ннаго боле́зньми и па́дшася, воста́ви Богома́ти, я́ко да Тя́ сла́влю во вся́ ве́ки.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и, Тя́ ублажа́ем.

Мене́, и́же па́че все́х челове́к Тебе́ прогне́вавша умо́м неразу́мным, Преблаги́й, уще́дри, Ма́рона те́плыми моли́твами.

Врача́ изря́дна показа́ тя́ Влады́ка Христо́с, те́м же боле́зни исцели́ благоче́стно к тебе́ приходя́щих, Ма́роне, о́тче на́ш.

Сокруше́нным се́рдцем вопие́м ти́, о́тче, утеше́ние на́м бу́ди в ско́рбех, печа́ли разгоня́я всегда́ от ду́ш на́ших, Ма́роне.

Богоро́дичен: Гла́с Ти́ прино́сим Гаврии́лов, ра́дующеся, ра́дуйся, глаго́люще, ме́сто свяще́ния, ра́дуйся, преподо́бным сла́во, и все́м ве́рным спасе́ние. Тебе́ бо ра́ди обожи́хомся, Богоро́дице Присноде́во.