Канон святому преподобному Косме Маиумскому, Святоградцу, творцу канонов

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Оу҆добри́въ добродѣ́телей житїѐ твоѐ, ѻ҆́тче космо̀, свѣ́томъ и҆ блиста̑нїи свѣтѧ́сѧ свѣ́та трисїѧ́ннагѡ, влⷣцѣ твоемꙋ̀ ꙗ҆́кѡ предстоѧ̀, просвѣти́тисѧ тѧ̀ пою́щымъ, моли́сѧ.

Нра́въ тво́й подо́бнѡ ꙗ҆влѧ́етъ тѧ̀, и҆мѣ́ѧ нарече́нїе: а҆рхїере́євъ бо ᲂу҆краше́нїе, мꙋ́дре, показа́лсѧ є҆сѝ, и҆ ᲂу҆твержде́нїе мона́шествꙋющихъ, и҆ мꙋ́дрости ѻ҆би́тель бы́лъ є҆сѝ.

Мꙋ́дрости ꙗ҆́кѡ рачи́тель мꙋдрѣ́йшъ, мꙋ́дрѣ ѡ҆чи́стилъ є҆сѝ твою̀ дꙋ́шꙋ, всемі́рный космо̀, мїрска́гѡ смꙋще́нїѧ стра̑сти ѿгна́въ, ꙗ҆́кѡ мглꙋ̀ ѡ҆мраче́нїѧ.

Бг҃оро́диченъ: Марі́ю непоро́чнꙋю и҆ чⷭ҇тꙋю ѻ҆трокови́цꙋ воспои́мъ, ꙗ҆́кѡ бж҃їю мт҃рь благоговѣ́йнѡ согла́снѡ прославлѧ́юще: ра́дꙋйсѧ, чⷭ҇таѧ бг҃оневѣ́сто, бл҃гослове́ннаѧ мт҃и дв҃о.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Пѣ́сньми кра́сными, къ пѣсносло́вїю хрⷭ҇то́вꙋ возвесели́лъ є҆сѝ невѣ́стꙋ, ꙗ҆́снѡ и҆зложи́въ хрⷭ҇тѡ́вы бжⷭ҇твєнныѧ та̑йны.

Закѡ́ны ты̀ воспита́всѧ хрⷭ҇то́выми, ѻ҆́тче космо̀, пита́лъ є҆сѝ ста́до ввѣ́ренное тебѣ̀, правосла́вными повелѣ́ньми.

Въ себѣ̀ ѻ҆гне́мъ бжⷭ҇твеннагѡ рве́нїѧ распалѧ́емꙋ дꙋ́шꙋ, прпⷣбне ѻ҆́тче космо̀, стѧжа́въ, всѧ̑ є҆́рєси ѿгна́лъ є҆сѝ.

Бг҃оро́диченъ: Преидо́ша ᲂу҆́бѡ сѣ̑ни, хрⷭ҇то́съ же и҆́стина возсїѧ̀, пло́ть прїи́мъ, мт҃и бж҃їѧ, ѿ бокꙋ̀ твоє́ю, и҆ спасе́ ны.

Сѣда́ленъ, гла́съ и҃.

Благоче́стїемъ и҆ вѣ́рою воспита́всѧ, и҆ премꙋ́дростїю, ᲂу҆краси́въ ᲂу҆́мъ и҆ дꙋ́шꙋ, всѣ́хъ и҆збѣ́глъ є҆сѝ земны́хъ попече́нїй, ѻ҆со́бь же пожи́въ, и҆ ᲂу҆́мъ въ неизречє́нныѧ вложи́въ, вели́кїѧ сподо́билсѧ є҆сѝ бл҃года́ти. тѣ́мъ и҆ бж҃е́ственнꙋю хрⷭ҇то́вꙋ цр҃ковь ᲂу҆краси́лъ є҆сѝ пѣ́сньми медото́чными и҆ ᲂу҆че́ньми, ст҃и́телю ѻ҆́тче на́шъ космо̀: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.

Бг҃оро́диченъ: Премꙋ́дрость и҆ сло́во въ твое́мъ чре́вѣ заче́нши неѡпа́льнѡ, мт҃и бж҃їѧ, мі́рꙋ родила̀ є҆сѝ мі́ръ содержа́щаго: и҆ во ѡ҆б̾ѧ́тїѧхъ понесла̀ є҆сѝ всѧ̑ носѧ́щаго, пита́телѧ всѣ́хъ, и҆ творца̀ тва́ри. тѣ́мже молю́ тѧ, всест҃а́ѧ дв҃о, и҆ вѣ́рнѡ сла́влю тѧ̀, и҆зба́витисѧ мѝ ѿ прегрѣше́нїй: и҆ въ де́нь сꙋда̀, є҆гда̀ предста́ти и҆́мамъ предъ лице́мъ созда́телѧ моегѡ̀, влⷣчце дв҃о чи́стаѧ, твою̀ по́мощь тогда̀ пода́ждь мѝ: всѧ̑ бо мо́жеши, є҆ли̑ка хо́щеши, всепѣ́таѧ.

Крⷭ҇тобг҃оро́диченъ: А҆́гнца и҆ па́стырѧ и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. долготерпѣли́ве, гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ и҆ да́рꙋй согрѣше́нїй ѡ҆ставле́нїе вѣ́рою пою́щымъ бжⷭ҇твєнныѧ стра̑сти твоѧ̑.

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Пред̾ѡчи́стивъ ѻ҆́ко твоегѡ̀ се́рдца стра́стнагѡ смꙋще́нїѧ, космо̀ і҆ера́рше, пѣ́нїе воспѣ́лъ є҆сѝ кра́сное и҆ спаси́тельное, и҆ цр҃ковь просвѣти́лъ є҆сѝ.

Цѣле́нїе всѧ́кагѡ ᲂу҆ны́нїѧ быва́ютъ твоѧ̑, космо̀, всехва̑льнаѧ лю́бѧщымъ пѣ́снєннаѧ наслаждє́нїѧ, догма́тами ᲂу҆краша́ємаѧ, и҆ сладкогла́сїѧ добро́тами.

Недꙋ́гꙋющꙋю, всебл҃же́нне, цр҃ковь, хꙋ́льными велѣ́ньми кѡпронѵ́мовыми и҆ бꙋесло́выми, и҆сцѣли́лъ є҆сѝ писа́ньми, и҆́миже сладкопѣ́сненнѡ пѣснопѣ́лъ є҆сѝ.

Ꙗ҆́кѡ чꙋ́дны твоѧ̑ пѣ̑сни, и҆ всѧ́кагѡ, ѻ҆́тче, и҆спо́лнены ра́зꙋма, и҆́миже ꙗ҆́вственнѡ всѣ̑мъ ѿкры́лъ є҆сѝ хрⷭ҇то́вы та̑йны, стра̑шныѧ и҆́стиннѡ и҆ пречꙋ̑дныѧ.

Бг҃оро́диченъ: Прест҃ꙋ́ю воспои́мъ бцⷣꙋ, воплоще́нное роди́вшꙋю бж҃їе сло́во во двꙋ̀ є҆стєствꙋ̀, є҆ди́нѣй же ѵ҆поста́си, ꙗ҆́коже косма̀ бжⷭ҇твенный наꙋчѝ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Вѣща́нїе твоѐ, мꙋ́дре, во всѧ̑ концы̀ протечѐ, пѣ́сньми возвеселѧ́ѧ бжⷭ҇твенными, космо̀, хва́лѧщихъ тѧ̀.

Закѡ́нъ є҆сте́ственныхъ па́че ре́клъ є҆сѝ, ро́ждшꙋю прест҃ꙋ́ю бцⷣꙋ пребжⷭ҇твенное сло́во: тѣ́мъ тѧ̀ ᲂу҆блажа́емъ.

Пѣ̑сни ди̑вныѧ сла́достнѡ поѧ̀, воспѣ́лъ є҆сѝ неизрече́нное влⷣчне, є҆́же и҆зъ дв҃ы пречⷭ҇тыѧ, ржⷭ҇тво̀, свѧще́ннѣйше.

Бг҃оро́диченъ: Просвѣти́ша мо́лнїѧ твоегѡ̀ ржⷭ҇тва̀, всепѣ́таѧ, всю̀ вселе́ннꙋю, и҆ землѧ̀ подви́жесѧ ѿ пре́лести къ вѣ́рѣ є҆гѡ̀.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Словеса̀ твоѧ̑ ꙗ҆́кѡ со́тъ сла́дкїй ꙗ҆ви́шасѧ, благочести́выхъ сердца̀ веселѧ́щѧ, пою́щихъ креще́нїе сп҃сово, срѣ́тенїе же сѷмеѡ́ново и҆ ѿпꙋще́нїе.

Не словесы̀, но вещмѝ ты̀ предста́вилъ є҆сѝ, воста́нїе, блаже́нне, ла́зарево и҆зъ ме́ртвыхъ, и҆ дѣте́й хвале́нїе, и҆ за́висть і҆ꙋде́йскꙋю въ пѣ́снехъ.

Возвыше́нїе требл҃же́ннагѡ дре́ва ᲂу҆краси́лъ є҆сѝ, воспѣ́въ пѣ́снь весе́лїѧ всѧ́ческагѡ и҆спо́лненꙋ и҆ ра́дости сꙋ́щїѧ, въ пѣ́нїи тогѡ̀ всебл҃же́нне.

Бг҃оро́диченъ: Глаго́лѡмъ твои̑мъ бг҃одохновє́ннымъ, ѻ҆трокови́це, послѣ́дꙋюще, тѧ̀ блажи́мъ всѝ ро́ди, дв҃о, ꙗ҆́кѡ бг҃а блаже́ннагѡ, блаже́ннꙋю бы́вшꙋю роди́тельницꙋ.

Конда́къ, гла́съ и҃.

Оу҆кра́шенъ добродѣ́тельми, космо̀ бг҃одꙋхнове́нне, цр҃кве хрⷭ҇то́вы ᲂу҆краше́нїе бы́лъ є҆сѝ: пѣ́сньми бо ᲂу҆краси́лъ є҆сѝ сїю̀, бл҃же́нне. но моли́сѧ ко гдⷭ҇ꙋ, и҆зба́витисѧ на́мъ ѿ всѧ́кихъ ко́зней ра́тника, тебѣ̀ зовꙋ́щымъ: ра́дꙋйсѧ, ѻ҆́тче требога́те.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Весели́тсѧ всѧ́ка дꙋша̀, пѣснопѣ̑нїѧ твоѧ̑ бг҃омꙋ́дре ѻ҆́тче, прочита́ющи, и҆ вѣ́рою зовꙋ́щи: ѻ҆тє́цъ на́шихъ бж҃е, бл҃гослове́нъ є҆сѝ.

Вои́стиннꙋ ѧ҆зы́къ тво́й тро́сть кни́жника скоропи́сца, ѻ҆́тче, бы́сть ст҃а́гѡ дх҃а, писа́вшїй вели̑каѧ чꙋдеса̀ сло́ва.

Зако́нъ побѣжда́етсѧ ѡ҆ тебѣ̀ похвале́нїй, ѻ҆́тче, ни бо̀ и҆́мать что̀ хвале́нїю досто́йно вѣща́ти, тебѣ̀ влⷣчнѧѧ и҆зре́кшꙋ вели́чєствїѧ.

Бг҃оро́диченъ: Кі́й тѧ̀ ѧ҆зы́къ земны́хъ досто́йнѡ ᲂу҆блажи́тъ бг҃а ро́ждшꙋю, бг҃оневѣ́сто; тѣ́мъ вѣ́рою зове́мъ: ра́дꙋйсѧ, дв҃о чⷭ҇таѧ, ра́дꙋйсѧ, препросла́вленнаѧ.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Жезло́мъ ᲂу҆крѣплѧ́еми твои́хъ догма́тѡвъ, сла́вне, тѧ̀ хва́лѧщїи, ѿвраща́емсѧ всѧ́кихъ є҆реті́ческихъ ѕло́бъ, и҆ пѣснопое́мъ благоче́стнѡ хрⷭ҇тꙋ̀, зовꙋ́ще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Всѣ́хъ ꙗ҆́кѡ вы́ше ᲂу҆мо́мъ, космо̀, бы́въ, ве́черю написа́лъ є҆сѝ, въ не́йже пре́далъ є҆́сть гдⷭ҇ь живонѡ́сныѧ та̑йны, и҆ преда́нїе стра́шное, безчеловѣ́чїе же і҆ꙋ́дино, є҆гѡ́же и҆ бѣжа́ти на́съ наꙋчи́лъ є҆сѝ.

Свѣ́та невеще́ственнагѡ зарѧ́ми ѡ҆сїѧ́емь, космо̀ всепрпⷣбне, стрⷭ҇ти пречⷭ҇тыѧ написа́лъ є҆сѝ, и҆ погребе́нїе и҆ воста́нїе, и҆ преѡбраже́нїе хрⷭ҇то́во, наꙋчи́въ всѧ̑ воспѣва́ти: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Же́злъ и҆зъ ко́рене і҆ессе́ева ты̀ и҆зрасти́ла є҆сѝ, дв҃о пречⷭ҇таѧ, цвѣ́тъ гдⷭ҇а ро́ждшаѧ, на́съ благоꙋха́вшаго мѷродыха́тельными вонѧ́ми стрⷭ҇те́й є҆гѡ̀: тѣ́мъ вси́ тѧ бл҃гослови́мъ, марі́е бг҃оневѣ́сто.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.

Бога́тъ, благоро́денъ бы́въ, всебл҃же́нне, добродѣ́тельными зарѧ́ми сїѧ́ѧ, и҆ просвѣща́ѧ вѣ̑рныѧ, космо̀, тѧ̀ хвала́ми почита́ющыѧ, и҆ правосла́внѡ пою́щыѧ, тѧ̀ велича́емъ, трисвѧ́те.

Закѡ́ны сїѧ́ѧ бжⷭ҇твенными, и҆ тѣ́ми, бл҃же́нне, твоѐ ста́до ꙗ҆́коже на па́жить живоно́снꙋю наста́вивъ, ꙗ҆́кѡ подоба́ше, прпⷣбне, къ небесє́мъ преста́вилсѧ є҆сѝ, плоды̀ болѣ́зней твои́хъ пожина́ѧ.

Показа́сѧ тебѣ̀ незаходѧ́й свѣ́тъ, ны́нѣ преста́вльшꙋсѧ тебѣ̀ ѿ привре́менныхъ, ꙗ҆́кѡ ѡ҆чище́нномꙋ пра́ведно, ꙗ҆снѣ́е же и҆ чⷭ҇тѣ́е є҆гѡ́же наслажда́ѧсѧ, помѧнѝ тебѐ почита́ющыѧ, достосла́вне.

Бг҃оро́диченъ: Тѧ̀ прест҃ꙋ́ю дв҃ꙋ и҆ серафі̑мъ сла́внѣйшꙋ, ро́ждшꙋю хрⷭ҇та̀, бцⷣе, пребезнача́льнѡ возсїѧ́вшаго ѿ ѻ҆ц҃а̀, ꙗ҆́коже пи́сано є҆́сть, славосло́вѧще ᲂу҆блажа́емъ.