Канон святому преподобному Кириаку Палестинскому, отшельнику

Пѣ́снь а҃.

І҆рмо́съ: Пѣ́снь возсле́мъ, лю́дїе, чꙋ́дномꙋ бг҃ꙋ на́шемꙋ, свободи́вшемꙋ і҆и҃лѧ ѿ рабо́ты, пѣ́снь побѣ́днꙋю пою́ще и҆ вопїю́ще, пои́мъ тебѣ̀ є҆ди́номꙋ влⷣцѣ.

Сла́вꙋ бжⷭ҇твеннагѡ ра́зꙋма, хрⷭ҇тѐ, пода́ждь мѝ и҆ бл҃года́ть, прпⷣбнаго досто́йнѡ кѷрїа́ка воспѣ́ти, тогѡ̀ моли́твами: ты́ бо є҆сѝ па́че сло́ва сокро́вище мꙋ́дрыхъ ᲂу҆че́нїй.

Пѣ́снь приносѧ́щаго тебѣ̀ ны́нѣ, кѷрїа́че бл҃же́нне, благосе́рднѡ прїи́мъ, бжⷭ҇твеннѣй причасти́тисѧ мнѣ̀ хрⷭ҇та̀ ᲂу҆молѝ лꙋчѝ и҆ свѣтозаре́нїю, и҆ сꙋ́щѡ полꙋчи́ти спасе́нїѧ.

Си́лою влⷣчнею крѣ́пкѡ ᲂу҆твержда́емь, тогѡ́же стопа́мъ, ѻ҆́тче, послѣ́довавъ, нача́льники тмы̀, кѷрїа́че всебл҃же́нне, побѣди́лъ є҆сѝ, и҆ къ вы́шнемꙋ дости́глъ є҆сѝ поко́ю.

Ра́внꙋ показа́лъ є҆сѝ на землѝ къ безпло́тнымъ ре́ть, всѐ покори́въ плотско́е мꙋдрова́нїе живоно́сномꙋ дх҃ꙋ. тѣ́мъ въ нбⷭ҇ныхъ ны́нѣ ликꙋ́еши съ ни́ми дво́рѣхъ, бг҃оно́сне.

Бг҃оро́диченъ: Пѣ́сньми пречи́стꙋю марі́ю вѣ́рнїи похва́лимъ, бг҃омт҃рь ѡ҆благода́тствованнꙋю, покро́въ бжⷭ҇твенный, ти́хое приста́нище, всѣ́хъ вѣ́рныхъ спасе́нїе.

Пѣ́снь г҃.

І҆рмо́съ: Нѣ́сть свѧ́тъ ꙗ҆́кѡ гдⷭ҇ь, нѣ́сть пра́веденъ ꙗ҆́кѡ бг҃ъ на́шъ є҆го́же пое́тъ всѧ̑ тва́рь: нѣ́сть пра́веденъ па́че тебє̀ гдⷭ҇и.

Непреста́ннѡ ше́ствовавъ жи́зни стезю̀, и҆змла́да бо возлюби́лъ є҆сѝ творца̀ твоего̀, прпⷣбне: є҆гѡ́же жажда́ѧ и҆ска́лъ є҆сѝ, є҆ле́нѧ подо́бѧсѧ тече́нїю на и҆сто́чники во́дъ.

На серде́чнѣй досцѣ̀ написа́нїе твоѐ прїе́мъ, бг҃оглаго́ливе, пе́рстомъ дх҃а, ꙗ҆́кѡ ѡ҆дꙋшевле́ннаѧ кни́га, дѣ́йственнѡ соблю́лъ є҆сѝ хрⷭ҇тѡ́вы живи́тєльныѧ за́пѡвѣди.

Оу҆держа́въ, прпⷣбне, въ постѣ́хъ чре́во, ла́комствєннаѧ жела̑нїѧ, и҆ плотскꙋ́ю сла́дость ты̀ ᲂу҆мертви́лъ є҆сѝ, съ чистото́ю, ѻ҆́тче, пожи́въ чре́зъ всѐ житїѐ.

Веселѧ́сѧ, разꙋ́мный трⷪ҇цѣ хра́мъ тебѐ сама́го сотвори́лъ є҆сѝ, ᲂу҆́мъ ѡ҆чища́ѧ, и҆ тѣ́ло и҆ дꙋ́хъ, требл҃же́нне: и҆ бы́лъ є҆сѝ прїѧ́телище трисо́лнечнагѡ свѣ́та.

Бг҃оро́диченъ: Дв҃а родила̀ є҆сѝ неискꙋсобра́чнаѧ, и҆ дв҃а пребыла̀ є҆сѝ мт҃и безневѣ́стнаѧ, бцⷣе марі́е, хрⷭ҇та̀ бг҃а на́шего молѝ, спасти́сѧ на́мъ.

Конда́къ, гла́съ и҃.

Ꙗ҆́кѡ побо́рника крѣ́пкаго и҆ застꙋ́пника, чтꙋ́щи тѧ̀, свѧще́ннаѧ ла́ѵра всегда̀, пра́зднꙋетъ лѣ́тнѣ па̑мѧти. но ꙗ҆́кѡ и҆мѣ́ѧ дерзнове́нїе ко гдⷭ҇ꙋ, ѿ врагѡ́въ находѧ́щихъ соблюди́ ны, да зове́мъ: ра́дꙋйсѧ, ѻ҆́тче требл҃же́нне.

Сѣда́ленъ, гла́съ є҃.

Воздержа́нїемъ житїѐ твоѐ ᲂу҆краси́лъ є҆сѝ, и҆ ᲂу҆́ды ᲂу҆мертви́въ, побѣди́лъ є҆сѝ вра̑жїѧ прило́ги, ѻ҆́тче прпⷣбне, и҆ пꙋсты́ни насе́льникъ, свѣти́льникъ же мі́ра ᲂу҆́мный, кѷрїа́че, ꙗ҆ви́лсѧ є҆сѝ. тѣ́мъ моли́сѧ гдⷭ҇ꙋ, поми́ловати дꙋ́шы на́шѧ.

Бг҃оро́диченъ: Тѧ̀ приста́нище и҆ стѣ́нꙋ, и҆ прибѣ́жище, и҆ наде́ждꙋ, и҆ покро́въ, и҆ предста́тельницꙋ те́плꙋю ѡ҆брѣ́тше вѣ́рнїи, къ тебѣ̀ притека́емъ, и҆ вопїе́мъ прилѣ́жнѡ, и҆ взыва́емъ вѣ́рнѡ: поми́лꙋй, бцⷣе, на тѧ̀ ᲂу҆пова́ющыѧ, и҆ ѿ прегрѣше́нїй и҆зба́ви.

Крⷭ҇тобг҃оро́диченъ: Крⷭ҇то́мъ сн҃а твоегѡ̀, бг҃ора́дованнаѧ, і҆́дѡльскаѧ ле́сть всѧ̀ ᲂу҆праздни́сѧ, и҆ де́мѡнскаѧ крѣ́пость попра́сѧ, сегѡ̀ ра́ди вѣ́рнїи по до́лгꙋ тѧ̀ всегда̀ пое́мъ и҆ благослови́мъ, и҆ бцⷣꙋ и҆́стиннѡ и҆сповѣ́дающе тѧ̀ велича́емъ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Оу҆жасе́сѧ твоегѡ̀ со́лнце воздержа́нїѧ и҆ крѣ́пости, лѣ́ты мно́гими тѧ̀ гнѣ́вающасѧ не возмо́же ѿню́дъ ви́дѣти, нижѐ во днѝ пи́щи прїе́млюща, преподо́бне, благомо́щнѡ пѣснопою́ща бдѣ̑нїи непреста́нными: си́лѣ твое́й сла́ва, чл҃вѣколю́бче.

Закѡ́ны но́выми и҆ ве́тхимъ завѣ́томъ, мꙋ́дре, ра́зꙋмомъ, бл҃же́нне, ст҃ы́хъ мꙋже́й поꙋча́ѧсѧ, всѧ́кїѧ добродѣ́тели ви́дъ навы́къ, мꙋ́дрыѧ пчелы̀ нра́вꙋ ревнꙋ́ѧ, и҆ сосꙋ́дъ бы́въ и҆збра́ненъ, вопїѧ́лъ є҆сѝ: си́лѣ твое́й сла́ва, чл҃вѣколю́бче.

Бога́тство сла́дости, хвала̀ и҆ ра́дость прпⷣбныхъ є҆сѝ, хрⷭ҇тѐ бж҃е: тогѡ̀ ра́ди любѧ́й тѧ̀ кѷрїа́къ, всѧ̑ въ мі́рѣ ᲂу҆тѣ̑шнаѧ вмѣнѝ ᲂу҆ме́ты: тѣ́мъ и҆ въ пꙋсты́нѧхъ непроходи́мыхъ любе́знѣ наслажда́шесѧ твоеѧ̀ красоты̀.

Вѣ́мъ дре́вле, ме́ррскїѧ сладча́йшыѧ во́ды прⷪ҇ро́ка: ѕе́лїй же го́рькꙋю ꙗ҆́дь преложи́въ ты̀, кѷрїа́че, въ сла́дкое вкꙋше́нїе, дерзнове́нїе показꙋ́ѧ ꙗ҆́вѣ ко гдⷭ҇ꙋ, и҆́стиннѡ своѧ̑ рабы̑, бжⷭ҇твенною си́лою сла́вѧщемꙋ.

Ꙗ҆́кѡ ᲂу҆чени́къ и҆ подража́тель влⷣки хрⷭ҇та̀, ра́бїѧ лꙋ́нствꙋющасѧ сы́на, ѻ҆́тче, моли́твою и҆сцѣлѧ́еши, бл҃года́ть прїе́мъ недꙋ́ги ѿгонѧ́ти, и҆ де́мѡнскїѧ полкѝ низлага́ти ѻ҆́бразомъ бжⷭ҇твеннагѡ крⷭ҇та̀.

Бг҃оро́диченъ: Ты̀ вѣ́рныхъ хвала̀ є҆сѝ, безневѣ́стнаѧ, ты̀ предста́тельница, ты̀ и҆ прибѣ́жище хрⷭ҇тїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши, всенепоро́чнаѧ, и҆ ѿ бѣ́дъ спаса́еши вѣ́рою и҆ любо́вїю бцⷣꙋ чⷭ҇тꙋю тѧ̀ сла́вѧщыѧ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Ѿ хрⷭ҇та̀ прїе́мь непобѣди́мꙋю бл҃года́ть дх҃а, низложи́лъ є҆сѝ ᲂу҆́бѡ держа́внѡ лю́таго мїроде́ржца, дꙋшє́вныѧ стра̑сти ᲂу҆держа́въ, кѷрїа́че, безстра́стїѧ вѣнце́мъ вѣнча́лсѧ є҆сѝ.

Крѣ́покъ ꙗ҆ви́лсѧ є҆сѝ, болѣ́зньми поще́нїѧ терпѣ́въ тве́рдѡ, до ста́рости пребы́въ глꙋбоча́йшїѧ неѡсла́бленъ, прпⷣбне, въ пꙋсты́нѧхъ ꙗ҆́кѡ ца́рскихъ дворѡ́въ въ черто́зѣхъ, со мно́гимъ весе́лїемъ живѧ̀.

Всенѡ́щнаѧ соверша́ѧ, бл҃же́нне, бдѣ̑нїѧ, и҆ къ бг҃ꙋ и҆сходѧ̀ не го́рдостнѡ, моли́твою невеще́ственномꙋ бесѣ́дꙋеши ᲂу҆мꙋ̀, и҆ свѣ̑тлыѧ прїима́лъ є҆сѝ, кѷрїа́че, свѣ́та лꙋчы̀, свѣтода́тельнѣ ᲂу҆мо́мъ просвѣща́емь.

Свѣтоно́сїѧ и҆спо́лнивсѧ, и҆ прⷪ҇ро́ческагѡ дарова́нїѧ, преподо́бне, чи́стый тво́й ѧ҆зы́къ провозвѣстѝ мꙋ́чащагѡ дре́вле недꙋ́га ѻ҆рїге́нова вредоꙋ́мнагѡ и҆ дꙋшетлѣ́ннагѡ, ѿню́дъ соверше́нное и҆стребле́нїе.

Бг҃оро́диченъ: Разꙋ́мнѡ ᲂу҆вѣ́дѣ прⷪ҇ро́кѡвъ сосло́вїе твоѧ̑ та̑инства: нбⷭ҇нꙋю бо две́рь влⷣка тѧ̀ показа̀, чⷭ҇таѧ, и҆ и҆зъ тебє̀, дв҃о, воплоти́всѧ, пра́вды сꙋ́щымъ во тмѣ̀ возсїѧ̀ сл҃нце.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Бг҃ъ положе́нїемъ бы́въ, хрⷭ҇та̀ ѡ҆боже́нїемъ сꙋ́щагѡ є҆стество́мъ бг҃а, є҆сте́ствєнныѧ ра̑ны неможе́нїѧ и҆справлѧ́лъ є҆сѝ, бл҃же́нне, недꙋ̑жныѧ и҆сцѣлѧ́ѧ, де́мѡнствꙋющыѧсѧ а҆́бїе лѣчѧ̀ бжⷭ҇твенною бл҃года́тїю.

И҆збѣжа́лъ є҆сѝ къ тебѣ̀ приходѧ́щагѡ мно́жества наро́да: и҆ па́ки стра́шныѧ пото́ки пости́глъ є҆сѝ, ᲂу҆клонѧ́ѧсѧ, приснопа́мѧтне, тщи́хъ похва́лъ чл҃вѣ́ческихъ сла́вицъ.

Ꙗ҆́кѡ сна̀ тлѣ́ннагѡ мі́ра всю̀ сла́вꙋ зрѧ̀, є҆ди́нагѡ живꙋ́щагѡ бг҃а лꙋ́чшїѧ сла́вы возлюби́лъ є҆сѝ прича́стникъ бы́ти: є҆ѧ́же, мꙋ́дре, пра́веднѡ сподо́билсѧ є҆сѝ.

Бг҃оро́диченъ: Ꙗ҆́кѡ ѡ҆дꙋшевле́нный кївѡ́тъ прїѧ́ла є҆сѝ сло́во безнача́льное, ꙗ҆́кѡ ст҃о́е ст҃и́лище созда́телѧ вмѣсти́ла є҆сѝ, ꙗ҆́кѡ престо́лъ ѻ҆гнеѻбра́зный но́сиши влⷣкꙋ, бг҃ома́ти, всеѧ̀ тва́ри.

Конда́къ, гла́съ в҃.

Чистото́ю дꙋше́вною бжⷭ҇твеннѡ воѡрꙋжи́всѧ, и҆ непреста́ннꙋю моли́твꙋ ꙗ҆́кѡ копїѐ врꙋчи́въ, крѣ́пкѡ ссѣ́клъ є҆сѝ дє́мѡнскаѧ ѡ҆полчє́нїѧ, кѷрїа́че ѻ҆́тче на́шъ: моли́сѧ непреста́ннѡ ѡ҆ всѣ́хъ на́съ.

І҆́косъ:

Ка́кѡ восхвалю̀ ѻ҆каѧ́нный а҆́зъ твоѧ̑ по́двиги, преподо́бне ѻ҆́тче; сле́зъ же ка́кѡ пꙋчи́нꙋ ѿры́гнꙋ; ты́ бо въ житїѝ преизѧ́ществꙋѧ, а҆́гг҃льскїй пости́глъ є҆сѝ ли́къ. всѧ̑ не́гли воздержа́нїемъ стра̑сти ᲂу҆мертви́лъ є҆сѝ, мꙋ́дре, и҆ пло́ть порабо́тивъ, покори́лъ є҆сѝ сїю̀ дꙋ́хꙋ: моли́твꙋ же и҆мѣ́ѧ ꙗ҆́кѡ ме́чь, тмы̀ предста́телѧ низложи́лъ є҆сѝ: моли́сѧ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Зако́нѡвъ и҆ слове́съ бг҃одохнове́нныхъ насладѝ горта́нь поꙋче́нїемъ па́че ме́да тво́й вѣ́рнѣйшїй ᲂу҆го́дникъ, бл҃гослове́нъ є҆сѝ гдⷭ҇и, пѣснопоѧ̀, бж҃е во вѣ́ки.

Бл҃же́нне, бг҃оглаго́ливе, приво́диши пою́щыѧ тѧ̀ хрⷭ҇тꙋ̀, ѡ҆чище́ны ѿ ти́ны страсте́й моли́твами твои́ми, вопїю́щыѧ, кѷрїа́че, и҆ глаго́лющыѧ: бл҃гослове́нъ є҆сѝ гдⷭ҇и бж҃е во вѣ́ки.

Львѡ́въ и҆збѣжа́въ свирѣ́пства данїи́лъ просла́висѧ, слꙋги̑ же тѣ́хъ и҆мѧ́ше повелѣва́ѧ кѷрїа́къ, зовы́й тебѣ̀: бл҃гослове́нъ є҆сѝ гдⷭ҇и бж҃е во вѣ́ки.

Всю̀ дх҃а бл҃года́ть вселѝ, хрⷭ҇тѐ, рачи́тель бо твоеѧ̀ пречⷭ҇тыѧ добро́ты бы́сть, вседꙋ́шнѡ кѷрїа́къ зовѧ́й тебѣ̀: бл҃гослове́нъ є҆сѝ гдⷭ҇и бж҃е во вѣ́ки.

Трⷪ҇ченъ: Дѣѧ́нїю приложи́въ видѣ́нїе, трїѷпоста́сное проповѣ́далъ є҆сѝ сꙋщество̀, во ѻ҆ц҃ѣ̀ и҆ сн҃ѣ и҆ дс҃ѣ, зовѧ́й, кѷрїа́че бг҃опрїѧ́тне: бл҃гослове́нъ є҆сѝ гдⷭ҇и бж҃е во вѣ́ки.

Бг҃оро́диченъ: Оу҆гасѝ пла́мень страсте́й мои́хъ, и҆ ᲂу҆кротѝ є҆ресе́й бꙋ́рю, бг҃ома́ти: тѧ́ бо и҆мѣ́емъ предста́тельницꙋ хрⷭ҇тїа́не, и҆ побо́рницꙋ, и҆ тѧ̀ вѣ́рою воспѣва́емъ во вѣ́ки.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: благослови́те всѧ̑ дѣла̀ гдⷭ҇нѧ гдⷭ҇а.

Тече́ньми сле́зъ напои́лъ є҆сѝ, бл҃же́нне, свѧще́ннꙋю твою̀ дꙋ́шꙋ, ᲂу҆миле́нїемъ бжⷭ҇твеннымъ, и҆ многопло́днꙋ показа́лъ є҆сѝ, поѧ̀: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Ѳесві́тѧнинъ дре́вле сꙋ́шею пресꙋшѝ тꙋ́чныѧ ка̑пли: ты́ же дождѧ̀ проли́тїе на во́зрастъ жа́твы низве́лъ є҆сѝ, всебл҃же́нне, поѧ̀: благослови́те всѧ̑ дѣла̀ гдⷭ҇а, и҆ превозноси́те є҆го̀ во вѣ́ки.

Ты̀ ѕлосла́вныхъ ле́сть ѡ҆бличи́лъ є҆сѝ, ѻ҆рїге́на ᲂу҆ченикѡ́въ бꙋ́їѧгѡ и҆ басносло́вца, до́блими пѡ́двиги, бл҃гослови́те, поѧ̀, правосла́внѡ гдⷭ҇а, и҆ превозноси́те є҆го̀ во вѣ́ки.

Трⷪ҇ченъ: Трⷪ҇цы є҆ди́но благоче́стнѡ наꙋчи́лъ є҆сѝ, ѻ҆́тче, сꙋщество̀, въ тре́хъ сл҃нцѣхъ, ꙗ҆́кѡ є҆ди́нꙋ зарю́ же и҆ свѣ́тлость, благослови́те, глаго́лѧ, правосла́внѡ гдⷭ҇а, и҆ превозноси́те є҆го̀ во вѣ́ки.

Бг҃оро́диченъ: А҆да́ма, дв҃о, па́дшагѡ ꙗ҆ви́ласѧ є҆сѝ дщѝ, бж҃їѧ же мт҃и ѻ҆бнови́вшагѡ моѐ сꙋщество̀. є҆го́же пое́мъ всѧ̑ дѣла̀ ꙗ҆́кѡ гдⷭ҇а, и҆ превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ, неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дѣви́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Верте́пъ тѧ̀, мꙋ́дре, прїѧ́тъ, прїе́мшаго и҆сто́чникъ бл҃года́тный чꙋдодѣ́йствовавша бжⷭ҇твеннагѡ дре́вле ѻ҆тца̀ харїтѡ́на мѡѷсе́йски, кѷрїа́че, и҆ стѣна̀ незы́бленна па́ствѣ ѻ҆́нагѡ бы́лъ є҆сѝ, и҆ храни́тель твердѣ́йшїй.

Сꙋ́щѡ раче́нїемъ жи́зни крⷭ҇тъ на ра́мена взе́мъ, житїѐ, кѷрїа́че, поꙋче́нїе положи́лъ є҆сѝ сме́рти. тѣ́мъ и҆ ны́нѣ къ нестарѣ́ющейсѧ преста́вилсѧ є҆сѝ сла́дости нетлѣ́ннѣй, нбⷭ҇нымъ ликѡ́мъ во свѣ́тѣ при бз҃ѣ сликовствꙋ́еши при́снѡ.

Ѡ҆блиста́въ, заре́ю разже́гсѧ дх҃а, и҆ ꙗ҆ви́лсѧ є҆сѝ превы́шнимъ ликостоѧ́нїємъ свѣ́телъ: но ѡ҆зарѝ мо́й ᲂу҆́мъ, бл҃же́нне, разꙋ́мнымъ и҆ трїсїѧ́ннымъ свѣ́томъ бжⷭ҇тва̀, моли́твами твои́ми, и҆ ѿ страсте́й мѧ̀ и҆ прегрѣше́нїй спасѝ.

Вѣнча́вшесѧ побѣди́тельною дїадѵ́мою, харїтѡ́не бг҃оглаго́ливе, и҆ кѷрїа́че бл҃же́нне, и҆ предстоѧ́ще въ высоча́йшихъ хрⷭ҇тꙋ̀, па́ствꙋ свою̀ ѻ҆те́чески ѿ бѣ́дъ и҆збавлѧ́юще, ны́нѣ призира́йте пра́зднꙋющꙋю ва́шѧ па̑мѧти.

Бг҃оро́диченъ: Напрѧзѝ, и҆ благопꙋ́тствꙋй, и҆ црⷭ҇твꙋй сн҃е бг҃ома́тере, і҆сма́ильтѧнина врага̀ покарѧ́ѧ ра́тꙋющаго ны̀, хрⷭ҇толюби́вомꙋ во́инствꙋ, моли́твами, мо́лимсѧ, ро́ждшїѧ тѧ̀ неискꙋсомꙋ́жнѡ, ꙗ҆́кѡ бг҃ъ и҆ чл҃вѣколю́бецъ.

Свѣти́ленъ.

Дꙋ́шꙋ ѡ҆чи́стивъ, прпⷣбне, страсте́й ѡ҆мраче́нїѧ, ѕѣ́льнымъ посто́мъ, и҆ моли́твою непреста́нною, зерца́ло, ѻ҆́тче, бы́лъ є҆сѝ бжⷭ҇твенныхъ ѡ҆сїѧ́нїй, возвождє́нїѧ посыла́ѧ на́мъ ны́нѣ, свѣти́льниче мона́хѡвъ, кѷрїа́че бг҃оно́се.

Бг҃оро́диченъ: И҆́стиннѡ бцⷣꙋ тѧ̀ и҆сповѣ́дꙋемъ, влⷣчце, тобо́ю спа́сшїисѧ: и҆́бо бг҃а неизрече́ннѡ родила̀ є҆сѝ, разрꙋши́вшаго крⷭ҇то́мъ сме́рть, къ себѣ́ же привле́кша преподо́бныхъ собо́ры: съ ни́миже тѧ̀ восхвалѧ́емъ, дв҃о.