Канон святому преподобному Иоанну Солунскому

Пѣ́снь а҃.

І҆рмо́съ: Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Страсте́й мѧ̀ треволне́нїемъ всегда̀ смꙋща́ема, и҆ молво́ю помышле́нїй ны́нѣ потоплѧ́ема, твое́ю моли́твою, преподо́бне, къ безстра́стїѧ ᲂу҆стремле́нїю, и҆ къ спаси́тельномꙋ приста́нищꙋ, бл҃же́нне і҆ѡа́нне, ᲂу҆пра́ви.

Прело́жсѧ произволе́нїемъ, прпⷣбне, къ нб҃сѝ вои́стиннꙋ, а҆́гг҃льски, ѻ҆́ч҃е, на землѝ пожи́въ, ᲂу҆мертви́въ твоѐ мꙋдрова́нїе плотско́е воздержа́нїемъ. тѣ́мже бж҃їе жили́ще ꙗ҆ви́лсѧ є҆сѝ, і҆ѡа́нне чꙋ́дне.

И҆́же па́че ᲂу҆ма̀ полꙋчи́ти, бл҃же́нне, возжелѣ́въ кра́сныхъ, наста́вника ѡ҆брѣ́лъ є҆сѝ, къ подвигѡ́мъ тѧ̀ бжⷭ҇твєннымъ воздвиза́юща, і҆ѡа́нне бг҃омꙋ́дре, григо́рїа сла́внаго, є҆гѡ́же стопа́мъ послѣ́довалъ є҆сѝ.

Бг҃оро́диченъ: Сы́й со ѻ҆ц҃е́мъ и҆ дх҃омъ, соприсносꙋ́щное и҆ є҆диноро́дное сло́во, и҆зъ тебє̀ ꙗ҆ви́сѧ на землѝ ꙗ҆́кѡ чл҃вѣ́къ, бцⷣе марі́е, и҆ мі́ръ ве́сь спасѐ, пѣ́снь гдⷭ҇еви воспѣва́ющїй.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.

Трезве́нїемъ ᲂу҆ма̀ нбⷭ҇ныѧ добрѡ́ты зрѧ̀, и҆ ника́коже печа́льми взѧ́лсѧ є҆сѝ ве́щными, кри́лы же ѡ҆блегчава́емь нестѧжа́нїѧ, ѻ҆́ч҃е, ве́сь преложе́нъ бы́лъ є҆сѝ.

Безмо́лвїѧ рачи́тель бы́въ, любомолча́ннагѡ па́стырѧ григо́рїа, і҆ѡа́нне требл҃же́нне, ꙗ҆̀же въ житїѝ смꙋщє́нїѧ ᲂу҆се́рднѡ ѡ҆ста́вилъ є҆сѝ, и҆ моли́твами непреста́нными бжⷭ҇твеннꙋю тишинꙋ̀ ᲂу҆лꙋчи́лъ є҆сѝ.

Зако́нꙋ дꙋ́ха себѐ, бг҃омꙋ́дре, повинꙋ́лъ є҆сѝ, проти́вꙋ семꙋ̀ борю́щїйсѧ зако́нъ ᲂу҆мертви́въ тве́рдыми воздержа̑нїи и҆ поще́нїемъ, и҆ моли́твами приле́жными, и҆ бдѣ̑нїи, бл҃же́нне.

Бг҃оро́диченъ: Ꙗ҆́же къ на́мъ свѣ́тлаѧ цр҃ю́ющагѡ всѣ́ми вѣ̑ки, непроходи́маѧ две́рь, ты̀ показа́ласѧ є҆сѝ вои́стиннꙋ, є҆́юже са́мъ про́йде, запеча́танꙋ па́ки ѡ҆ста́вль тѧ̀, пренепоро́чнаѧ.

Сѣда́ленъ, гла́съ а҃.

Погре́бъ лꙋка̑ваѧ де́мѡнѡвъ ловлє́нїѧ воздержа̑нїи мно́гими и҆ мольба́ми, ѻ҆́ч҃е, ме́ртвъ во гро́бѣ лежа̀, нетлѣ́ненъ пребы́лъ є҆сѝ. тѣ́мже ра́дꙋющесѧ всесвѧтꙋ́ю твою̀ па́мѧть пра́зднꙋемъ, съ весе́лїемъ се́рдца хрⷭ҇та̀ велича́юще.

Сла́ва, и҆ ны́нѣ, бг҃оро́диченъ: Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй, всѧ̑ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щыѧ, и҆ дꙋ́шы на́шѧ спасѝ бжⷭ҇твенными моли́твами твои́ми.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. Тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Терпѣ́нїѧ ка́мень показа́лсѧ є҆сѝ, бл҃же́нне, сопроти́вными волна́ми всегда̀ бїе́мь, ника́коже благоче́стїѧ коле́блѧ мы̑сли. тѣ́мже тѧ̀ влⷣка, ꙗ҆́коже прече́стенъ ка́мень, въ сокро́вищахъ вѣ́чныхъ положѝ.

Тѧ̀ ѻ҆ц҃ъ щедро́тъ прїѧ́тъ, ꙗ҆́кѡ и҆́скреннѡ сего̀ возлюби́вша, и҆ въ за́повѣдехъ є҆гѡ̀, ѻ҆́ч҃е, пребыва́юща, и҆ сы́на прича́стника благода́тїю сотвори́въ, присносꙋ́щныѧ тѧ̀ сла́вы, і҆ѡа́нне бг҃омꙋ́дре, сподо́би.

Ꙗ҆́кѡ ми́лостивъ и҆ смиреномꙋ́дръ, ꙗ҆́кѡ кро́токъ, ꙗ҆́кѡ любвѐ и҆спо́лненъ и҆ вѣ́ры, и҆ наде́ждею твою̀ дꙋ́шꙋ и҆мѣ́ѧ, і҆ѡа́нне, ᲂу҆твержде́ннꙋ, просїѧ́лъ є҆сѝ и҆ сло́вомъ. и҆ дѣ́лы посредѝ мона́хѡвъ, ходѧ̀ въ жи́зни, приснопа́мѧтне.

Бг҃оро́диченъ: Ты̀ вѣ̑рнымъ похвала̀ є҆сѝ, безневѣ́стнаѧ, ты̀ застꙋпле́нїе, ты̀ прибѣ́жище хрⷭ҇тїа́нъ, стѣна̀ и҆ приста́нище: къ сн҃ꙋ бо твоемꙋ̀ мольбы̑ но́сиши, всенепоро́чнаѧ, и҆ спаса́еши ѿ бѣ́дъ, вѣ́рою и҆ любо́вїю бцⷣꙋ чи́стꙋ тѧ̀ зна́ющихъ.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Ꙗ҆́коже неѕло́бива а҆́гнца, на ѕла́цѣ воздержа́нїѧ воспита́ема тѧ̀, па́стырь вели́кїй во дворы̀ вѣ̑чныѧ вселѝ, і҆ѡа́нне бл҃же́нне, и҆ десны̑мъ свои̑мъ ѻ҆вца́мъ соприча́стника, преподо́бне, показа̀.

Дневнꙋ́ю тѧготꙋ̀, ѻ҆́ч҃е, и҆ ва́ръ крѣ́пкѡ поне́слъ є҆сѝ, добродѣ́телей бж҃е́ственныхъ вїногра́дъ до́брѣ дѣ́лавъ: тѣ́мже въ ве́черъ жите́йскагѡ ѿше́ствїѧ мздꙋ̀ прїѧ́лъ є҆сѝ досто́йнꙋ.

Съ по́стническимъ со́нмомъ, ѻ҆́ч҃е, всели́тисѧ вои́стиннꙋ сподо́билсѧ є҆сѝ, и҆ съ првⷣныхъ ли́комъ ра́доватисѧ тебѣ̀ прибы́сть, видѣ́нїемъ и҆ дѣ́льнымъ любомꙋ́дрїемъ, ѿбѣ́гшꙋ ве́щи, прехва́льне.

Бг҃оро́диченъ: Оу҆мерщвле́ннаго, дв҃о, жа́ломъ сме́рти и҆ престꙋпле́нїѧ, воскреси́ мѧ, жи́знь заче́ншаѧ несозда́ннꙋю, и҆ ро́ждшаѧ мі́рꙋ и҆зба́вителѧ и҆ цр҃ѧ̀, и҆ къ свѣ́тꙋ наста́ви, чⷭ҇таѧ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Сле́зъ твои́хъ ка́плѧми страсте́й и҆зсꙋши́лъ є҆сѝ пꙋчи́нꙋ, и҆ всю̀ мы́сленнагѡ врага̀ попра́лъ є҆сѝ некрѣ́пкꙋю си́лꙋ, і҆ѡа́нне бл҃же́нне, ѿ хрⷭ҇та̀ ᲂу҆крѣплѧ́емь.

Ꙗ҆́кѡ свѣтлосїѧ́нно тѧ̀ зла́то и҆скꙋше́но, пресла́вне, воздержа́нїѧ ѻ҆гне́мъ, хрⷭ҇то́съ положѝ цр҃ь нетлѣ́нный, въ нетлѣ́нныхъ, ѻ҆́ч҃е, сокро́вищахъ вѣ́чныѧ жи́зни.

Ꙗ҆́кѡ со́лнце на землѝ добродѣ́тельми сїѧ́юща григо́рїа ѡ҆брѣ́тъ, дꙋшѝ твоеѧ̀ ѻ҆́чи тогѡ̀ сїѧ́ньми просвѣ́щь слове́сными, свѣтлѣ́йша показа́лсѧ є҆сѝ ѕвѣзда̀.

Бг҃оро́диченъ: Селе́нїе бж҃їе, бжⷭ҇твенно вои́стиннꙋ и҆ пречⷭ҇тно, воспое́мъ благоче́стнѡ марі́ю пречⷭ҇тꙋю: бг҃а бо вмѣстѝ, прїе́мши невмѣсти́маго и҆ непостижи́маго.

Конда́къ, гла́съ д҃.

Воздержа́нїемъ, ѻ҆́ч҃е, житїѐ ᲂу҆краси́въ, и҆ пло́ть ᲂу҆мертви́лъ є҆сѝ: тѣ́мже и҆ побѣди́лъ є҆сѝ вра̑жїѧ прило́ги, пребл҃же́нне, и҆ преше́лъ є҆сѝ къ бг҃ꙋ въ безско́рбный и҆ вѣ́чный живо́тъ, ꙗ҆́кѡ досто́инъ наслѣ́дникъ, і҆ѡа́нне: є҆мꙋ́же моли́сѧ спасти́сѧ на́мъ.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆ц҃є́въ бж҃е, бл҃гослове́нъ є҆сѝ.

Сꙋдїѝ второ́е помышлѧ́ѧ прише́ствїе, ѿ ѻ҆́чїю дꙋшѝ со́нъ ѿлага́лъ є҆сѝ, мꙋ́дре, ᲂу҆ны́нїѧ, и҆ спаса́емь пѣ́лъ є҆сѝ: ѻ҆тє́цъ на́шихъ бж҃е, бл҃гослове́нъ є҆сѝ.

Ѿ млады́хъ ногте́й благꙋ́ю ча́сть и҆збра́лъ є҆сѝ, ѻ҆́ч҃е мꙋ́дре, рабо́тати гдⷭ҇еви со стра́хомъ, и҆ сегѡ̀ соверша́ти ѡ҆правда̑нїѧ: ѻ҆тє́цъ на́шихъ бж҃е, бл҃гослове́нъ є҆сѝ.

Дꙋхо́вныхъ и҆спо́лнена дне́й бы́вша, ꙗ҆́кѡ пшени́цꙋ зрѣ́лꙋ въ вы́шнихъ жи́тницахъ, бг҃ъ тѧ̀, бг҃оно́се, положѝ пою́ща: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: Ꙗ҆́же є҆сѝ мі́рꙋ гпⷭ҇жа̀, ꙗ҆́же бг҃а воплоще́нна поро́ждши, безꙋ́мнѡ порабо́тившꙋюсѧ безмѣ́стными грѣхѝ дꙋ́шꙋ мою̀ спасѝ, бл҃гослове́ннаѧ чⷭ҇таѧ, да славосло́влю тѧ̀.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Ꙗ҆́кѡ ми́лѡть и҆лїинꙋ̀ бл҃года́ть благора́сленнѡ наслѣ́довавъ, ѻ҆́ч҃е і҆ѡа́нне, сла́внагѡ па́стырѧ твоегѡ̀, се́ю расто́ргнꙋлъ є҆сѝ сла́достей пꙋчи́нꙋ и҆ спасе́нъ бы́въ непотопле́нъ, ꙗ҆ви́лсѧ є҆сѝ а҆́гг҃лѡмъ сограждани́нъ, съ ни́ми взыва́ѧ: лю́дїе, превозноси́те гдⷭ҇а во вѣ́ки.

На́съ ра́ди ѡ҆бнища́вшемꙋ пребл҃го́мꙋ гдⷭ҇ꙋ, ѻ҆́ч҃е і҆ѡа́нне, благоче́стнѡ ᲂу҆подо́билсѧ є҆сѝ, пти́цамъ равно̀ нестѧжа́нїе содержа́лъ є҆сѝ: и҆ бл҃гъ вѣ́чныхъ бога́тство стѧжа́лъ є҆сѝ, воспѣва́ѧ: свѧще́нницы, бл҃гослови́те, лю́дїе, превозноси́те є҆го̀ во вѣ́ки.

Къ животꙋ̀ непреста́нномꙋ, къ ра́дости нетлѣ́ннѣй, къ весе́лїю па́че ᲂу҆ма̀, пребога́те, преста́вилсѧ є҆сѝ ра́дꙋѧсѧ, и҆ къ кра́сномꙋ благолѣ́пїю, ко а҆́гг҃льскомꙋ пребыва́нїю, вопїѧ̀: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те гдⷭ҇а во вѣ́ки.

Бг҃оро́диченъ: Ѡ҆свѧ́щшисѧ дх҃омъ, бцⷣе пренепоро́чнаѧ, вои́стиннꙋ прїѧ́ла є҆сѝ во чре́вѣ безнача́льнаго сн҃а и҆ присносꙋ́щнаго, въ тебѣ̀, чⷭ҇таѧ, воплоща́ема на благодѣѧ́нїе вѣ́рнѡ пою́щымъ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те є҆го̀ во вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Ѡ҆бнови́въ ра́ломъ моли́твы, і҆ѡа́нне, дꙋшѝ твоеѧ̀ браздꙋ̀, добродѣ́телей сїю̀ насѣ́ѧлъ є҆сѝ благоче́стїѧ, и҆ живонѡ́снаѧ сѣ́мена. тѣ́мже и҆сцѣле́нїй бг҃оподо́бныхъ и҆ бжⷭ҇твенныхъ дарова́нїй пожа́лъ є҆сѝ кла́съ, и҆́мже пита́еши пою́щыѧ тѧ̀.

Тече́нїе сконча́въ по́стное, и҆ вѣ́рꙋ соблю́дъ, блаже́нне, ꙗ҆́кѡ вои́стиннꙋ и҆спо́лненъ во́зраста дꙋхо́внагѡ, пра́ведный вѣне́цъ прїѧ́тъ, бг҃омꙋ́дре, ѿ хрⷭ҇та̀: и҆ ны́нѣ почи́лъ є҆сѝ въ жили́щахъ свѣ́тлыхъ съ пра́ведными, пресла́вне.

Пожа́лъ є҆сѝ твои́хъ болѣ́зней воздаѧ̑нїѧ, преста́вльсѧ къ соверше́нїю неболѣ́зненномꙋ и҆ чи́стомꙋ, всѧ́кагѡ и҆змѣне́нїѧ и҆ претворе́нїѧ, несмѣ́снꙋ го́ршагѡ и҆ сопроти́внагѡ преложе́нїѧ: въ не́мже всели́лсѧ є҆сѝ, вѣ́рнѡ тѧ̀ пою́щихъ ко влⷣцѣ, ѻ҆́ч҃е, помѧнѝ.

Бг҃оро́диченъ: Ѿве́ржєнныѧ нбⷭ҇нагѡ житїѧ̀, и҆ па́дшыѧ ѻ҆каѧ́ннѡ въ сме́рть, па́ки на́съ, мт҃и бы́вши и҆зба́вителѧ, призвала̀ є҆сѝ, пречⷭ҇таѧ, и҆ къ пе́рвомꙋ тещѝ сподо́била є҆сѝ ѻ҆те́чествꙋ. тѣ́мже тѧ̀, бг҃ома́ти, непреста́ннѡ велича́емъ.