Канон святому преподобному Иоанникию Девиченскому, Сербскому

Пе́снь 1.

Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Присносу́щным Све́том Триипоста́снаго ны́не озаря́емь, предстои́ши ве́сь све́тел, я́коже А́нгели, но молю́ тя́, о́тче Иоанни́кие: отжени́ от се́рдца моего́ омраче́ние, преподая́ све́т жития́ твоего́.

Жела́ние Христо́вы красоты́ стяжа́в, затвори́л еси́ чу́вства своя́ от всего́ тле́ннаго и мимотеку́щаго и по́двигами души́ своея́ возше́л еси́ на высоту́, блаже́нне.

Вели́кое смотре́ние Бо́жие освяти́ тя́ от утро́бы и показа́ тя́ сосу́д прия́тен Свято́му Ду́ху, те́мже яви́лся еси́ от ю́ности огражда́емь стра́хом Бо́жиим.

От Небе́с прие́м оби́льно дарова́ние Ду́ха Пресвята́го, о́тче Иоанни́кие, да́руй ми́ сло́во во отверзе́ние у́ст мои́х, да воспою́ равноа́нгельское житие́ твое́.

Любо́вию Влады́чнею разже́гся, оста́вил еси́ вся́ земна́я и, восприя́в кре́ст сво́й на ра́мо, Тому́ после́довал еси́, просла́влься зна́меньми и чудесы́, преподо́бне.

Богоро́дичен: Словеса́ Гаврии́ла Архистрати́га слы́шавши, Непоро́чная, и, наше́дшу на Тя́ Ду́ху Свято́му, заче́нши, родила́ еси́ Сы́на, Отцу́ Собезнача́льна.

Пе́снь 3.

Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́ бо ся́ ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.

Ви́девши бо́дренная душа́ твоя́ разу́мныма очи́ма, я́ко вся́ су́етна су́ть, отве́ргл еси́ всю́ мирску́ю красоту́ и, разда́в име́ние свое́ ни́щим, стяжа́л еси́ некра́домое.

Боже́ственных послу́шав за́поведей, в молча́нии пребы́л еси́ чрез все́ житие́ свое́ и, бы́в в поноше́ние во оте́чествии свое́м, пита́лся еси́ жела́нием и́стинныя сла́вы.

Отврати́л еси́ плещи́ своя́ от мирски́я красоты́ и возве́л еси́ о́чи свои́ на го́ру, ча́я отту́ду Боже́ственныя по́мощи. Те́мже от горы́ святы́я услы́ша тебе́ Госпо́дь и Свои́ми просла́ви чудесы́.

Кре́пкую с высоты́ по́мощь и озаре́ние ра́зума получи́в, пожи́л еси́ на земли́ равноа́нгельски, те́мже бы́л еси́ исто́чник чуде́с, о́тче Иоанни́кие.

Я́ко дре́во, о́тче, насажде́нное при исхо́дищих во́д, процве́л еси́ Боже́ственными доброде́тельми, я́ко ке́др в Лива́не, те́мже осеня́еши неду́жныя.

Седа́лен, гла́с 8.

Мона́хов све́рстник яви́лся еси́, му́дре, подо́бник бы́в Анто́нию в после́док ле́т, блаже́нне, просвеща́я ве́рныя све́тлостию чуде́с, преподо́бне. Те́мже, собра́вшеся в па́мять твою́, вси́ ве́рнии, про́сим благода́ти ко исцеле́нию страсте́й на́ших и вопие́м ти́: моли́ Христа́ Бо́га грехо́в оставле́ние дарова́ти чту́щим любо́вию святу́ю па́мять твою́.

Богоро́дичен: Ра́дуйся, я́же А́нгелом ра́дость ми́ра прие́мшая. Ра́дуйся, ро́ждшая Творца́ Твоего́ и Го́спода. Ра́дуйся, сподо́бльшаяся бы́ти Ма́ти Бо́жия.

Пе́снь 4.

Ирмо́с: Прише́л еси́ от Де́вы, не хода́тай, ни А́нгел, но Са́м, Го́споди, вопло́щся, и спа́сл еси́ всего́ мя́ челове́ка. Те́м зову́ Ти́: сла́ва си́ле Твое́й, Го́споди.

Воззва́л тя́ е́сть Госпо́дь от Сио́на, я́коже дре́вле пра́отца Авраа́ма, повеле́в ти́ изы́ти от земли́ оте́чествия. Ты́ же после́довал еси́ Того́ словеси́, о́тче Иоанни́кие, со усе́рдием.

Свети́льник нога́ма твои́ма зако́н благода́ти, и, сего́ зако́на придержа́вся, ве́л еси́ твоя́ исправле́ния, те́мже и просия́л еси́, о́тче, я́ко в полу́дни.

Оде́жда пло́ти твоея́ ри́за ко́жна, в ню́ же обле́кся, умертви́л еси́, о́тче, стра́стная взыгра́ния, те́мже и истни́л еси́ дебе́льство ко́жное.

Умертви́л еси́ по́хоть плотску́ю, бы́в ча́до Бо́га на́шего, не роди́вся от по́хоти плотски́я, но сы́н бы́в благода́тию. Те́мже и прия́л еси́ жре́бий оте́ческий в ве́чном Ца́рстве.

Ра́зум и у́м сво́й украси́л еси́ от ю́ности, стяжа́в ста́рость Соломо́нову; оба́че всю́ сладостра́стную пи́щу отмета́л еси́, потща́вся стяжа́ти нестаре́ющую пи́щу трудо́м и боле́зньми свои́х по́двигов, блаже́нне.

Богоро́дичен: Написа́ся персто́м Бо́жие Сло́во в Тебе́, Препе́тая, Безнача́льное, я́коже в глави́зне кни́жне. Те́мже, припа́дая Ти́, молю́ Тя́: до́лгое рукописа́ние мно́гих мои́х страсте́й изгла́ди из кни́ги живо́тныя.

Пе́снь 5.

Ирмо́с: Хода́тай Бо́гу и челове́ком бы́л еси́, Христе́ Бо́же: Тобо́ю бо Влады́ко, к Светонача́льнику Отцу́ Твоему́, от но́щи неве́дения, приведе́ние и́мамы.

Собла́зн готовля́ет тебе́ диа́вол, полага́я претыка́ния души́ твое́й, и посла́ разбо́йники отгна́ти тя́ от ма́лыя хра́мины. Ты́ же, преблаже́нне о́тче, я́ко за Христа́ гони́м, ра́довашеся.

Завеща́л еси́ души́ свое́й по гора́м превита́ти, я́ко птене́ц го́рличищ, о́тче Иоанни́кие, и ту́ научи́лся еси́ ви́дети Бо́га.

Науче́н зако́ном Христо́вым не пещи́ся о пи́щи и о оде́жди, испо́лнил еси́ де́лание пти́ц небе́сных, те́мже, всели́вся в ду́пленно дре́во, в мно́гия дни́ пребы́л еси́ без кро́ва и пи́щи.

Напои́л еси́ зе́млю души́ твоея́ слеза́ми, блаже́нне, те́мже и ненасе́янная земля́ препита́ тя́, даю́щи те́лу твоему́ ма́лое утеше́ние.

Не да́л еси́ сна́ свои́ма очи́ма, преподо́бне, ниже́ ве́ждома свои́ма дрема́ния, до́ндеже плотска́я уста́вил еси́ стремле́ния, и к Све́ту за́йде незаходи́мому, Влады́ку все́х воспева́я.

Богоро́дичен: Ру́чку злату́ю, и све́щник, Деви́це, и трапе́зу дре́вле прообразова́ху нело́жно проро́ческая прорече́ния, быва́ющая по Бо́жию смотре́нию, во е́же бы Ты́ была́ Богороди́тельница Рождество́м Свои́м.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Пути́ мы́сленнаго лука́вства избе́гл еси́ воздержа́нием и моли́твою, любо́вию же и и́стиною. Те́мже кре́плим жела́нием и и́стинным смире́нием восхо́д ко Христу́ стяжа́л еси́, о́тче.

Не да́л еси́ сна́ свои́м очесе́м, до́ндеже показа́ся до́м Святы́я Тро́ицы и Прему́дрости сокро́вище.

Ми́р обогаща́я Боже́ственными исцеле́ньми, благогове́нием же к Творцу́ я́вственне прибли́жився к вели́кому Све́ту, соде́лался еси́ земны́й А́нгел и Небе́сный челове́к.

Богоро́дичен: Мари́е Пресвята́я, чи́стое де́вства сокро́вище, очи́сти у́м мо́й, стра́стию омраче́нный, и испо́лни се́рдце мое́ Боже́ственною благода́тию, Всенепоро́чная.

Конда́к, гла́с 8.

От ю́ности, Богому́дре, возлюби́в а́нгельское житие́, вся́ кра́сная оста́вил еси́, за́йде бо, я́коже звезда́ от ми́ра, восте́к к разу́мному и пра́ведному со́лнцу, Христу́, от Него́ же прие́мь благода́ть исцеле́ния, разли́чныя неду́ги врачу́еши притека́ющих к свяще́нней ра́це твое́й. Те́мже и мы́, соверша́юще любо́вию всечестну́ю твою́ па́мять, вопие́м ти́: ра́дуйся, о́тче Иоанни́кие.

И́кос:

Христо́в услы́шав гла́с, преподо́бне, ше́ствовал еси́ всле́д за́поведей Его́, на́г жи́тель бы́в, зане́ отрече́ся попече́ния о стяжа́нии, па́че же отве́ржеся при́сных и сро́дных свои́х, еди́н в пусты́ни бесе́дуя с Бо́гом, с Ни́мже соединя́яся бде́нием, посто́м и моли́твами, ра́зума дарова́ние восприя́л еси́. То́й же да́р и на́м ниспосли́, пою́щим ти́ си́це: ра́дуйся, о́тче Иоанни́кие.

Пе́снь 7.

Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й благослове́н и препросла́влен.

Взя́лся еси́ к высоте́ безстра́стия, уподо́бився А́нгелом, в пло́ти сы́й, и, бы́в прича́стник присносу́щней пи́щи, взыва́л еси́, блаже́нне: благослове́н еси́, Бо́же оте́ц на́ших.

Сия́я луча́ми Богови́дными, разгна́л еси́ бесо́вския нахо́ды и ве́рныя от озлобле́ний мно́гих изба́вил еси́, вопию́щих, преподо́бне: благослове́н еси́, Бо́же оте́ц на́ших.

Святы́я све́тлости, и жи́зни безконе́чныя, и ра́дости неизрече́нныя, и Ца́рствия Небе́снаго сподо́бився, всеблаже́нне, посыла́еши освяще́ние и избавле́ние все́м, ве́рою взыва́ющим: благослове́н еси́, Го́споди, Бо́же оте́ц на́ших.

Богоро́дичен: Се́ Де́ва, Ю́же Ду́хом прови́де Иса́ия, заче́нши, роди́ Спа́са и Изба́вителя на́м, пою́щим: благослове́н еси́, Го́споди, Бо́же оте́ц на́ших.

Пе́снь 8.

Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Недрема́нну душе́вную свещу́ ма́слом по́двигов твои́х сохрани́в, ра́достно вше́л еси́ к нетле́нному Жениху́, иде́же ве́чно живе́ши, вопия́: вся́ дела́, благослови́те, по́йте Го́спода.

Окормле́нием Свята́го Ду́ха преплы́в мо́ре искуше́ний немо́кренно, преподо́бне, дости́гл еси́ тишину́ Ца́рствия Небе́снаго, потопи́в неви́димыя враги́ сле́зными струя́ми, отону́дуже источа́еши цельбы́ приходя́щим и вопию́щим: благослови́те, вся́ дела́ Госпо́дня, Го́спода.

Ны́не дерзнове́ние име́я, я́ко Бо́гу предстоя́ и злоко́зненныя бе́сы победи́в, сотвори́ моли́тву о на́с ко Го́споду, я́ко да изба́вимся собла́знов диа́вольских и ве́чных избу́дем му́к, ве́рою зову́ще: благослови́те, вся́ дела́ Госпо́дня, Го́спода.

Богоро́дичен: Умерщвле́нную ду́шу мою́ оживи́, па́дшую возста́ви, уязвле́нную исцели́, у́м мо́й умири́, волне́ния искуше́ний, Де́во, укроти́ и спаси́ вопию́щия: благослови́те, дела́ Госпо́дня, Го́спода.

Пе́снь 9.

Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу, велича́ем.

Христо́ви соца́рствовати вы́ну сподо́бился еси́ на Небесе́х, равноа́нгельное житие́ на земли́ пожи́в, моли́ся Творцу́ и Влады́це со дерзнове́нием о все́х, ве́рою соверша́ющих всечестну́ю па́мять твою́.

В земли́ положе́нныя твоя́ свяще́нныя мо́щи освяща́ются, стяжа́вши Боже́ственную благода́ть, е́юже то́чат исцеле́ния, стра́сти душе́вныя исцеля́ют и от вредоно́сных я́зв бесо́вских свобожда́ют.

Боже́ственными добро́тами, о́тче, обложе́н, святы́м житие́м обожи́лся еси́ и, просвеще́н, предстоя́ вели́кому Све́ту, помина́й приближа́ющихся тебе́, чту́щих тя́ ве́рно и па́мять твою́ ве́рно соверша́ющих.

Богоро́дичен: Пречи́стая Богоро́дице, я́же Бо́га несказа́нно заче́нши и ро́ждши пло́тию на спасе́ние всему́ ми́ру, Того́ моли́, Преблага́я, умири́ти ми́р и спасти́ ду́ши на́ша.

Свети́лен:

Доброде́тели крило́ма на Небеса́ возлете́в, прибли́жився же Трисо́лнечному Све́ту, со А́нгелы воспева́еши Трисвяту́ю пе́снь, с ни́миже все́х на́с помина́й, почита́ющих па́мять твою́.

Сла́ва, и ны́не: Ю́же дре́вле пропове́даша проро́чески ли́цы, апо́столи научи́ша, Де́ву по рождестве́, му́ченицы испове́даша и́стинную Богоро́дицу, Ту́южде и мы́ согла́сно воспои́м и велича́ем я́ко Ма́терь Бо́жию и с Гаврии́лом зове́м к Не́й: ра́дуйся, Ма́ти Госпо́дня, христиа́ном Засту́пнице.