Канон святому преподобному Фоме Малеину

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Просвѣще́нїе бжⷭ҇твенныѧ благода́ти, сла́вне, въ дꙋшѝ прїи́мъ, ꙗ҆́кѡ дрꙋгі́й є҆гѵ́петъ страсте́й мглꙋ̀ ѡ҆ста́вилъ є҆сѝ, и҆ житїѐ прїѧ́лъ є҆сѝ нбⷭ҇ное.

Свѣ́телъ, ѻ҆́тче, въ житїѝ бы́въ, на и҆ноплеме́нники воздви́глъ є҆сѝ неисчє́тны побѣ̑ды, и҆ мона́шествовавъ прпⷣбнѡ, полкѝ де́мѡнѡвъ побѣди́лъ є҆сѝ.

Воздержа́тельнѡ врагꙋ̀ спле́тсѧ, посо́бїемъ, прпⷣбне, бжⷭ҇твеннагѡ дх҃а смири́лъ є҆сѝ сего̀, и҆ побѣ́ды съ небесѐ вѣне́цъ прїѧ́лъ є҆сѝ.

Бг҃оро́диченъ: Є҆ди́на бг҃а всѣ́хъ сꙋ́щаго невмѣсти́ма, тебѣ̀ вмѣ́стна бы́вша за бла́гость, породила̀ є҆сѝ, ѻ҆трокови́це. є҆го́же молѝ, спастѝ пою́щыѧ тѧ̀.

Пѣ́снь г҃.

І҆рмо́съ: Оу҆твердѝ на́съ въ тебѣ̀, гдⷭ҇и, дре́вомъ ᲂу҆мерщвле́й грѣ́хъ, и҆ стра́хъ тво́й всадѝ въ сердца̀ на́съ пою́щихъ тѧ̀.

Твои́ми прекло́ньсѧ бг҃ъ мольба́ми, рꙋко́ю тѧ̀ прⷪ҇ро́ка ᲂу҆́зъ и҆зба́ви, и҆ ше́ствовати благоизво́ли къ болѣ́зненномꙋ трꙋдꙋ̀ воздержа́нїѧ.

Житїѧ̀ го́рькое ѡ҆ста́вивъ треволне́нїе, ко приста́нищꙋ пристꙋпи́лъ є҆сѝ воздержа́нїѧ и҆ тишинѣ̀ бжⷭ҇твеннѣй, ѻ҆́тче ѳѡмо̀, и҆спо́лнивсѧ дх҃а благода́тїю.

Столпо́мъ і҆и҃лѧ, и҆ногда̀ пꙋсты́ню, всеблаже́нне, проходи́ти наста́вивый, столпо́мъ тѧ̀ ѻ҆́гненнымъ наставлѧ́ше, прови́дѧй дꙋшѝ твоеѧ̀ благоро́дїе.

Бг҃оро́диченъ: Златꙋ́ю ꙗ҆́кѡ и҆́стиннѡ кади́льницꙋ, и҆ ста́мнꙋ ма́нны, и҆ бжⷭ҇твеннꙋю го́рꙋ, и҆ пала́тꙋ краснꙋ̀ бж҃їю, тѧ̀, дв҃о, и҆менꙋ́емъ.

Сѣда́ленъ, гла́съ д҃.

Ꙗ҆ви́лсѧ є҆сѝ, преподо́бне, благоꙋгоди́въ бжⷭ҇твенными дѣѧ̑нїи, и҆ житїе́мъ чи́стымъ, наслѣ́дїѧ сподо́билсѧ є҆сѝ безпло́тныхъ, молѝ спасти́сѧ на́мъ.

Бг҃оро́диченъ: Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀: и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.

Крⷭ҇тобг҃оро́диченъ: На крⷭ҇тѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й, ка́кѡ жи́знь всѣ́хъ вкꙋша́еши сме́рти, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ;

Пѣ́снь д҃.

І҆рмо́съ: Оу҆слы́шахъ, гдⷭ҇и, слꙋ́хъ твоегѡ̀ смотре́нїѧ, и҆ просла́вихъ тѧ̀, є҆ди́не чл҃вѣколю́бче.

Воздержа́нїѧ поже́глъ є҆сѝ ѻ҆гне́мъ бжⷭ҇твеннымъ те́рнїе грѣхо́вное, и҆ чꙋде́съ заре́ю, ѻ҆́тче, ѡ҆блиста́лъ є҆сѝ.

Дꙋшѝ твоеѧ̀ ѻ҆́чи ѿ страстны́ѧ ти́ны ѡ҆чи́стивъ, незрѧ́щыѧ зѣ̑ницы, ѻ҆́тче, ѿве́рзлъ є҆сѝ.

Са́мъ ѿчꙋжди́лсѧ є҆сѝ мїрски́хъ мѧте́жей, бг҃оно́се, и҆ премі́рнꙋю тишинꙋ̀ полꙋчи́лъ є҆сѝ.

Бг҃оро́диченъ: Неискꙋсобра́чнаѧ влⷣчце, ꙗ҆́же бг҃а безъ сѣ́мене заче́ншаѧ, напа́стей и҆ печа́лей всѣ́хъ и҆зба́ви.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бо́га не зна́емъ.

Рꙋководѧ́щаго тѧ̀ къ пꙋсты́нѧмъ благоче́стнѡ и҆мѣ́лъ є҆сѝ и҆лїю̀, ѻ҆́тче, ѳесві́тѧнина, ꙗ҆влѧ́ющасѧ но́щїю и҆ тайноꙋча́ща бжⷭ҇твєннымъ тѧ̀, прпⷣбне.

Ꙗ҆́кѡ въ дрꙋгі́й карми́ль, въ мале́йскꙋю го́рꙋ, мꙋ́дре, всели́лсѧ є҆сѝ, видѣ́нїй бжⷭ҇твенныхъ наслажда́ѧсѧ, и҆ чꙋдотворе́нїй бл҃года́ть пресла́внѡ, блаже́нне, прїе́млѧ.

Простра́ннагѡ пꙋтѝ тѣ́сный предпочита́ѧ, дости́глъ є҆сѝ ра́достнѡ широтꙋ̀ раѧ̀: и҆ дре́вꙋ жи́зненномꙋ, ѻ҆́тче, невозбра́ннѡ причаща́ешисѧ веселѧ́сѧ.

Бг҃оро́диченъ: Оу҆ѧзви́вшеесѧ прилѡ́ги вра́жїими, чⷭ҇таѧ, ꙗ҆́кѡ ми́лостива, и҆сцѣлѝ се́рдце моѐ, на крⷭ҇тѣ̀ пло́тїю пригвозди́вшагосѧ неизрече́ннѡ ро́ждшаѧ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Въ пꙋсты́ни безво́днѣй всели́лсѧ є҆сѝ, и҆ моли́твъ ѡ҆дожде́нїемъ твои́хъ, прпⷣбне, во́дꙋ всебога́тнꙋ, влⷣкꙋ и҆сточи́ти ᲂу҆моли́лъ є҆сѝ.

Ꙗ҆́коже а҆враа́мъ дре́вле пра́ведный, во и҆́нꙋ странꙋ̀ себѐ ᲂу҆дали́лъ є҆сѝ, и҆ бг҃ꙋ прибли́жилсѧ, и҆ въ зе́млю кро́ткихъ всели́лсѧ є҆сѝ.

Мона́хъ и҆́стиненъ бы́лъ є҆сѝ, и҆ по погребе́нїи и҆сцѣле́нїй дарова̑нїѧ, ѻ҆́тче ѳѡмо̀, тре́бꙋющымъ и҆сточа́еши си́лою дꙋхо́вною.

Бг҃оро́диченъ: Во́лею всѧ̑ содѣ́лавый, въ ложесна̀ восхотѣ́въ неискꙋсобра́чныѧ всели́сѧ, тлѣ́нїемъ недꙋ́говавшыѧ нетлѣ́нїемъ почестѝ хотѧ̀, ꙗ҆́кѡ благосе́рдъ.

Конда́къ, гла́съ д҃.

Ве́лїю побѣ́дꙋ мꙋ́жески показа́лъ є҆сѝ, ѿѻнꙋ́дꙋже бж҃е́ственною любо́вїю разгорѣ́всѧ, царѧ̀ тлѣ́ннаго и҆ всѧ̑ кра̑снаѧ преѡби́дѣлъ є҆сѝ, на горѣ̀ мале́йстѣй вселе́нїе соверши́въ, ѿ неѧ́же въ нбⷭ҇наѧ возше́лъ є҆сѝ къ цр҃ю̀ царе́й, ѳѡмо̀: молѝ непреста́ннѡ ѡ҆ всѣ́хъ на́съ.

Пѣ́снь з҃.

І҆рмо́съ: Ѻ҆́бразꙋ злато́мꙋ, на по́лѣ деи́рѣ слꙋжи́мꙋ, трїѐ твоѝ ѻ҆́троцы небрего́ша безбо́жнагѡ велѣ́нїѧ, посредѣ́ же ѻ҆гнѧ̀ вве́ржени, ѡ҆роша́еми поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.

Ѻ҆́гнь страсте́й воздержа́нїѧ росо́ю, ѻ҆́тче, погаси́лъ є҆сѝ, и҆ просїѧ́въ ꙗ҆́коже со́лнце добродѣ́телей свѣ́тлостїю, всѣ́хъ вопїю́щихъ просвѣща́еши сердца̀, блаже́нне: бл҃гослове́нъ є҆сѝ, бж҃е ѻ҆тє́цъ на́шихъ.

Слѣпы̑мъ є҆́же зрѣ́ти, и҆ хромы̑мъ, ѻ҆́тче ѳѡмо̀, благотече́нїе, скѡ́рбнымъ и҆збавле́нїе, и҆ болѧ́щымъ и҆сцѣле́нїе подаѧ̀ си́лою хрⷭ҇то́вою, взыва́лъ є҆сѝ: бл҃гослове́нъ є҆сѝ, бж҃е ѻ҆тє́цъ на́шихъ.

Безмо́лвнѡ твою̀ соверши́лъ є҆сѝ жи́знь, ѻ҆́тче блаже́нне, нестѧжа́нїемъ просвѣща́ѧсѧ, и҆ воздержа́нїемъ ᲂу҆краша́ѧсѧ, поѧ̀ ᲂу҆миле́нїемъ се́рдца влⷣцѣ, пребога́те: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Дв҃о чⷭ҇таѧ, неискꙋсобра́чнаѧ, бл҃гослове́ннаѧ, па́дающихъ и҆справле́нїе, согрѣша́ющихъ и҆збавле́нїе, спаси́ мѧ блꙋ́днаго, спасѝ сн҃ꙋ твоемꙋ̀ зовꙋ́ща: бл҃гослове́нъ є҆сѝ, бж҃е ѻ҆тє́цъ на́шихъ.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Стра̑сти неꙋдержи̑мыѧ дꙋшѝ воздержа́нїѧ ᲂу҆здо́ю покори́въ, невеще́ствєннымъ а҆́гг҃лѡмъ ᲂу҆подо́билсѧ є҆сѝ, вопїѧ̀: по́йте дѣла̀ ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Ѳесві́тѧнина и҆лїѝ послѣ́дꙋѧ, преблаже́нне, свѧще́нномꙋ житїю̀, на го́рꙋ возше́лъ є҆сѝ бесѣ́довати къ бг҃ꙋ, посто́мъ ᲂу҆́мъ ѡ҆чища́ѧ, поѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Кро́токъ и҆ неѕло́бивъ ꙗ҆́вльсѧ, на землѝ кро́ткихъ живе́ши, бг҃омꙋ́дре, со всѣ́ми преподо́бными и҆ и҆збра́нными поѧ̀: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Живы́й сꙋ́щїй и҆сто́чникъ, ꙗ҆́кѡ во́дꙋ жи́зни ро́ждшаѧ, дꙋ́шꙋ мою̀ и҆ста́ѧвшꙋю грѣхо́внымъ пла́менемъ, дв҃о бцⷣе, напо́й, да тѧ̀ сла́влю во всѧ̑ вѣ́ки.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи є҆диномꙋ́дреннѡ пѣ́сньми велича́емъ.

Дх҃омъ, ѻ҆́тче, ѡ҆бнища́въ, нбⷭ҇ное црⷭ҇тво воспрїѧ́лъ є҆сѝ со всѣ́ми и҆збра́нными, сла́вы неизрече́нныѧ и҆сполнѧ́емь, и҆ болѣ́зней по́честь прїе́млѧ, ѳѡмо̀, возда́нїѧ. сегѡ̀ ра́ди тѧ̀ вѣ́рою и҆ любо́вїю ᲂу҆блажа́емъ.

Моще́й твои́хъ ра́ка вѣ́рнѡ пристꙋпа́ющымъ и҆сточа́етъ и҆сцѣле́нїй рѣ́ки, стра̑сти дꙋ́шъ потоплѧ́ющаѧ, и҆ тѣле́съ болѣ̑зни ѿе́млющаѧ, блаже́нне ѳѡмо̀, моли́твенниче вѣ́рою при́снѡ блажа́щымъ тѧ̀.

Совокꙋплѧ́ѧсѧ съ прпⷣбныхъ свѣ́тлыми ли̑ки, и҆ сїѧ́нїемъ невече́рнимъ мы́сленнѡ, ѻ҆́тче ѳѡмо̀, ѡ҆зарѧ́емь, бж҃е́ственнꙋю твою̀ па́мѧть творѧ́щыѧ просвѣтѝ вѣ́рнѡ, и҆ ᲂу҆лꙋчи́ти спасе́нїе моли́твами твои́ми сподо́би.

Бг҃оро́диченъ: Ѡ҆блиста́ющаѧ всѣ́хъ чꙋде́съ зарѧ̀ твои́хъ, бг҃облагода́тнаѧ чⷭ҇таѧ, страсте́й и҆ скорбе́й ѿе́млетъ мглꙋ̀, и҆ свѣ́тъ весе́лїѧ мы́сленный простира́етъ, мт҃рь бж҃їю тѧ̀ велича́ющымъ.