Канон святому преподобному Даниилу Столпнику

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Пѣ́сньми бл҃говосхвали́ти хотѧ́щꙋ па́мѧть твою̀, блаже́нне, свѣтоно́снꙋю мѝ зарю̀, данїи́ле, съ нб҃сѐ низпослѝ.

Ве́лїе сл҃нце и҆́стиннѡ, ѻ҆́тче, возсїѧ́лъ є҆сѝ концє́мъ, добродѣ́телей свѣ́тлостїю ѡ҆зарѧ́ѧй вѣ́рныхъ собра̑нїѧ.

Зако́нѡмъ влады̑чнимъ, ѻ҆́тче, повинꙋ́ѧсѧ, ᲂу҆мертви́лъ є҆сѝ воздержа́нїемъ пло́ть, и҆ повинꙋ́лъ є҆сѝ сїю̀ дх҃ꙋ.

Бг҃оро́диченъ: Ве́сь чл҃вѣ́къ ꙗ҆ви́сѧ, пребы́въ є҆́же бѣ̀ и҆ по воплоще́нїи, и҆́же и҆зъ тебє̀, бцⷣе, роди́выйсѧ неизмѣ́нный гдⷭ҇ь.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Жезло́мъ воздержа́нїѧ страсте́й мо́ре, ѻ҆́тче, растерза́въ, преше́лъ є҆сѝ непотопле́нъ, и҆ го́рꙋ дости́глъ є҆сѝ и҆́стиннагѡ безстра́стїѧ, и҆ бг҃ꙋ бесѣ́довалъ є҆сѝ ᲂу҆ма̀ чистото́ю.

Возше́дъ на высотꙋ̀ добродѣ́телей, зна́емь бы́лъ є҆сѝ мі́рꙋ: на столпѣ́ бо стоѧ̀ возвы́шенъ, и҆ сїѧ́нїемъ пресла́вныхъ чꙋде́съ ѡ҆зарѧ́ѧй вѣ́рою къ тебѣ̀ притека́ющыѧ.

Водрꙋже́нъ, на ка́мени бж҃їѧ зна́нїѧ, всѣ́ми козньмѝ бѣсо́вскими ꙗ҆ви́лсѧ є҆сѝ непоколеби́мь: на сто́лпъ ᲂу҆́бѡ тѣ́ло твоѐ на землѝ возвы́силъ є҆сѝ, дꙋ́шꙋ же впери́лъ є҆сѝ къ нбⷭ҇нымъ.

Бг҃оро́диченъ: И҆зба́ви мѧ̀ страсте́й наше́ствїѧ, влⷣчце, и҆ борю́щыѧ мѧ̀ врагѝ ны́нѣ преборѝ: ᲂу҆тверди́ мѧ на ка́мени бж҃їѧ во́ли: дꙋ́шꙋ мою̀ просвѣтѝ, две́ре бжⷭ҇твеннагѡ свѣ́та.

Сѣда́ленъ, гла́съ а҃.

На сто́лпъ тебѐ сама́гѡ возвы́сивъ, ѻ҆́тче, воздержа́нїемъ, данїи́ле, пло́ть и҆знꙋри́лъ є҆сѝ. тѣ́мъ и҆ дх҃а сосꙋ́дъ досто́инъ бы́лъ є҆сѝ: бл҃года́ть же бжⷭ҇твеннꙋю воспрїе́мъ, требл҃же́нне, недꙋ́гъ всѧ́кїй ѿго́ниши вѣ́рою чтꙋ́щихъ па́мѧть твою̀.

Бг҃оро́диченъ: Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма̀ и҆ сло́ва, непреста́ннѡ молѝ ѡ҆ воспѣва́ющихъ тѧ̀, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ сла́вѧщымъ тѧ̀.

Крⷭ҇тобг҃оро́диченъ: Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й сни́тїе, и҆ вѡ́льныѧ стрⷭ҇ти, бж҃е пребл҃гі́й;

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Ꙗ҆́кѡ свѣтоза́рное сл҃нце, ѻ҆́тче приснопа́мѧтне, на столпѣ̀ блиста́юща ви́дѣлъ є҆сѝ бж҃їѧ раба̀ сѷмеѡ́на: и҆ и҆стека́ющими ѿ тогѡ̀ бж҃е́ственными свѣтлостьмѝ бж҃е́ственнѡ ѡ҆зари́лсѧ є҆сѝ, данїи́ле, и҆ во слѣ́дъ тогѡ̀ жи́тельства ходи́лъ є҆сѝ.

Де́мѡнскїѧ полкѝ ѻ҆рꙋ́жїемъ вѣ́ры побѣди́лъ є҆сѝ стрꙋѧ́ми же потопи́лъ є҆сѝ моли́твъ, па́гꙋбꙋ тѣ́хъ, ѻ҆́тче, ѿгна́въ, ю҆́же творѧ́хꙋ пла́вающымъ, и҆ спа́слъ є҆сѝ вѣ́рою бг҃ꙋ пѣснопою́щыѧ: си́лѣ твое́й сла́ва, чл҃вѣколю́бче.

Возстолплѧ́ѧ, ѻ҆́тче, тебѐ сама́го, всебл҃же́нне, всено́щнѣ стоѧ́лъ є҆сѝ, ꙗ҆́кѡ безпло́тенъ, не высо́ко дꙋше́вное ѻ҆́ко стѧжа́въ, и҆ чи́сто ꙗ҆́коже зерца́ло дх҃а зарю̀ и҆ бжⷭ҇твєннаѧ ꙗ҆влє́нїѧ чи́стымъ по́мысломъ прїе́млѧ.

Бг҃оро́диченъ: Зако́ни въ тебѣ̀ є҆стества̀ ѡ҆бновлѧ́ютсѧ: законода́вца бо сло́ва родила̀ є҆сѝ, па́че вины̀ ꙗ҆́кѡ и҆́стиннѡ, пречⷭ҇таѧ, и҆ сло́ва, безслове́сїѧ и҆зба́вльшаго ро́дъ человѣ́ческїй, вѣ́рнѡ пѣснопою́щихъ: си́лѣ твое́й сла́ва, чл҃вѣколю́бче.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Да безсме́ртныѧ сла́вы полꙋчи́ши, плѡтска́ѧ ᲂу҆мертви́лъ є҆сѝ жела̑нїѧ, ѻ҆́тче, и҆ страсте́й стремлє́нїѧ ѡ҆бꙋзда́лъ є҆сѝ воздержа́нїѧ трꙋды̑, и҆ рѣка̀ чꙋде́съ ꙗ҆ви́лсѧ є҆сѝ, и҆ и҆сто́чникъ врачева́нїй, приснопа́мѧтне.

Є҆́же хожда́ше стезе́ю, ѻ҆́тче, на землѝ, сѷмеѡ́нъ чꙋ́дный, во ᲂу҆́жасѣ, бл҃же́нне, бы́вшꙋ тебѣ̀ ꙗ҆ви́сѧ, показꙋ́ѧ тебѣ̀ со двѣма̀ а҆́гг҃лы, грѧдѝ, вопїѧ̀, и҆ ста́ни ᲂу҆ менє̀, къ бг҃ꙋ возвыша́ѧсѧ благода́тїю.

Просвѣща́емь заре́ю, ѻ҆́тче, невече́рнею и҆ бжⷭ҇твеннымъ ѡ҆сїѧ́нїемъ, бѣсо́вскїй мра́къ и҆ страсте́й мглꙋ̀ ѿгна́лъ є҆сѝ, и҆ ꙗ҆ви́лсѧ є҆сѝ сто́лпъ свѣтови́дѣнъ, и҆ лѣ́ствица, и҆́стиннѡ къ бг҃ꙋ вѣ̑рныѧ возводѧ́щаѧ.

Бг҃оро́диченъ: Влⷣкꙋ ро́ждшаѧ ꙗ҆ви́ласѧ є҆сѝ превы́шши го́рнихъ си́лъ, и҆ земны́хъ є҆стество̀ ѡ҆божи́ла є҆сѝ, ѻ҆трокови́це бг҃оневѣ́стнаѧ. тѣ́мъ бцⷣꙋ тѧ̀ всеи́стиннꙋю дꙋше́ю и҆ ѧ҆зы́комъ, вѣ́рнїи, дв҃о, сла́вимъ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Оу҆́мъ тво́й къ бг҃ꙋ приближе́нїемъ ѡ҆блиста́емь, неѧ́тенъ сла́достей ѻ҆гне́мъ, ѻ҆́тче, пребы́сть, и҆ страсте́й го́рншїй, и҆ къ пло́ти пристра́стїѧ вы́шшїй.

Во́дъ животво́рныхъ дарова́нїй, дх҃а и҆спо́лншисѧ твоѧ̀ дꙋша̀, бг҃омꙋ́дре всебл҃же́нне, рѣ́ки и҆сточѝ врачева́нїй и҆́стиннѡ, то́ки страсте́й сꙋша́щыѧ.

Бг҃оро́диченъ: Тѧ̀ предста́тельницꙋ вѣ́рнїи и҆ стѣ́нꙋ всѝ стѧжа́хомъ, во глꙋбинѣ̀ ѕлы́хъ и҆ молвѣ̀ скорбе́й при́снѡ бѣ́дствꙋюще, бцⷣе, є҆ди́на земны́хъ прибѣ́жище.

Конда́къ, гла́съ и҃.

Ꙗ҆́коже ѕвѣзда̀ многосвѣ́тлаѧ, ты̀ возше́дъ, бл҃же́нне, на сто́лпъ, мі́ръ просвѣти́лъ є҆сѝ прпⷣбными дѣ́лы твои́ми, и҆ тмꙋ̀ пре́лести ѿгна́лъ є҆сѝ, ѻ҆́тче. тѣ́мже мо́лимъ тѧ̀, и҆ ны́нѣ ѡ҆блиста́й въ сердца́хъ ра̑бъ твои́хъ незаходѧ́щїй свѣ́тъ ра́зꙋма.

І҆́косъ:

Пѣ́снь скве́рна къ похвале́нїю пѡ́двигъ твои́хъ, ѻ҆́тче, прино́ситсѧ: не и҆́мамъ бо чи́сто се́рдце моѐ, ꙗ҆́кѡ сїѐ сра́мнѡ ѡ҆калѧ́хъ: но пода́ждь мѝ сло́во, свѧ́те, чи́стѣ воспѣ́ти твоѐ житїѐ, є҆мꙋ́же ᲂу҆диви́шасѧ вои́стиннꙋ и҆ а҆́гг҃ли: и҆́бо бы́лъ є҆сѝ, ꙗ҆́коже безтѣле́сенъ, прїе́мъ свѣ́тъ незаходѧ́щїй ра́зꙋма.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще. благослове́нъ є҆сѝ, гдⷭ҇и бж҃е, во вѣ́ки.

Чи́ни а҆́гг҃льстїи твоемꙋ̀ стоѧ́нїю ᲂу҆диви́шасѧ, всеблаже́нне бг҃оно́се: съ тѣ́ломъ бо тѣ́хъ жи́тельство воспрїе́мъ, взыва́лъ є҆сѝ: бл҃гослове́нъ є҆сѝ, гдⷭ҇и бж҃е, во вѣ́ки.

Высото́ю невеще́ственнагѡ жи́тельства и҆ прⷪ҇ро́чества сїѧ́ѧ свѣтозаре́нїемъ, врачева́нїй на́мъ ѡ҆блиста́лъ є҆сѝ лꙋчы̀, бл҃гоче́стнѡ чтꙋ́щымъ тѧ̀, данїи́ле чꙋдоно́сне.

Разрѣшѝ страсте́й мои́хъ мглꙋ̀ свѣ́тлостїю, всебл҃же́нне, твоеѧ̀ моли́твы, и҆ на стезю̀ жи́зни наста́ви вопїю́ща: благослове́нъ є҆сѝ, гдⷭ҇и бж҃е, во вѣ́ки.

Бг҃оро́диченъ: Ми́лостива мнѣ̀ бꙋ́ди, дв҃о, и҆ ᲂу҆ѧ́звлена мѧ̀ ѻ҆рꙋ́жїемъ грѣха̀, врачевство́мъ твоеѧ̀ моли́твы и҆злѣчѝ, бл҃гослове́нъ, зовꙋ́ща, пло́дъ чре́ва твоегѡ̀.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Жела́нїй коне́чное, до́брыхъ кра́йнѣйшее, ѻ҆́тче бг҃оно́се, и҆звѣ́стнѡ дости́глъ є҆сѝ, кри́лы ѡ҆блегчева́ѧсѧ добродѣ́тельныхъ дѣѧ́нїй, и҆ со безтѣле́сными, данїи́ле, взыва́еши: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Бж҃їѧ тѧ̀ си́ла проѧвле́ннѣ ᲂу҆крѣпи́вши, терпѣ́ти зимы̀ ѕлостꙋ́жное сотворѝ, и҆ сл҃нца зно́й, и҆ гни́лости твоеѧ̀ пло́ти, и҆ ѿ неѧ̀ бы́вшихъ черве́й ѡ҆ѕлобле́нїе, вопїю́ща: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Но́вый і҆́ѡвъ ты̀ ꙗ҆ви́лсѧ є҆сѝ, данїи́ле досточꙋ́дне, мно́жествомъ и҆скꙋше́нїй ѡ҆бдержи́мъ и҆ скорбе́й, дв҃довꙋ кро́тость, и҆ і҆а́кѡвле безѕло́бїе, и҆ цѣломꙋ́дрїе і҆ѡ́сифово подража́лъ є҆сѝ, вопїѧ̀ бл҃года́рственнѣ: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ: Бцⷣꙋ, влⷣчце всест҃а́ѧ, мꙋ́дрствꙋющїи тѧ̀, глаго́лѡмъ послѣ́дꙋюще твои̑мъ, всепѣ́таѧ, тѧ̀ ны́нѣ блажи́мъ, ꙗ҆́кѡ бг҃а бл҃же́ннаго родила̀ є҆сѝ на́мъ: є҆го́же, во двꙋ̀ сꙋщества́хъ, є҆ди́нѣй же ѵ҆поста́си, воспѣва́юще вопїе́мъ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Оу҆страши́сѧ всѧ́къ слꙋ́хъ неизрече́нна бж҃їѧ снизхожде́нїѧ, ꙗ҆́кѡ вы́шнїй во́лею сни́де да́же и҆ до пло́ти, ѿ дв҃и́ческагѡ чре́ва бы́въ чл҃вѣ́къ. тѣ́мже пречⷭ҇тꙋю бцⷣꙋ, вѣ́рнїи, велича́емъ.

Сѐ, тебѣ̀ двє́ри нбⷭ҇ныѧ ѿверзо́шасѧ преста́вльшемꙋсѧ, и҆ тече́нїе сконча́вшемꙋ, ѻ҆́тче, и҆ а҆́гг҃лѡвъ чи́ни воспрїѧ́ша, вѣнцеда́вецъ же хрⷭ҇то́съ сла́вою вѣнча́ тѧ пра́вды. є҆го́же пою́ще, вѣ́рнїи, велича́емъ.

Ꙗ҆́кѡ крі́нъ, ѻ҆́тче, се́льный въ раѝ воздержа́нїѧ процвѣ́лъ є҆сѝ: и҆ ꙗ҆́кѡ кѷпарі́съ, на высотꙋ̀ возвы́силсѧ є҆сѝ соверше́нства: ꙗ҆́кѡ ма́слина, ѱало́мски ꙗ҆ви́лсѧ є҆сѝ, ли́ца и҆ сердца̀ на̑ша ᲂу҆маща́ѧ є҆ле́емъ болѣ́зней твои́хъ.

Сто́лпъ тѧ̀ ѡ҆снова́нїемъ добродѣ́телей ᲂу҆твержда́емь тва́рь позна̀, забра́ло непоколеби́мо, чꙋде́съ и҆сто́чникъ, приста́нище бл҃гоꙋти́шное, врачева́нїй сокро́вище, прїѧ́телище дх҃а. тѣ́мъ твою̀ дне́сь, данїи́ле, сотворѧ́емъ па́мѧть.

Со́лнца дне́сь на́мъ возсїѧ̀ свѣтлѣ́е, прпⷣбне, бжⷭ҇твеннаѧ па́мѧть твоѧ̀, вѣ́рныхъ сердца̀ просвѣща́ющи свѣ́томъ пра́вды, мра́къ же ѿгонѧ́щи дꙋшетлѣ́нныхъ страсте́й: ю҆́же соверша́юще, благоче́стнѡ воспѣва́емъ тѧ̀.

Бг҃оро́диченъ: Пощади́ мѧ, сп҃се, рожде́йсѧ и҆ сохрани́въ ро́ждшꙋю тѧ̀ нетлѣ́ннꙋ по рождествѣ̀, є҆гда̀ сѧ́деши сꙋди́ти дѣла̀ моѧ̑, беззакѡ́нїѧ презира́ѧ и҆ грѣхѝ моѧ̑, ꙗ҆́кѡ безгрѣ́шенъ, ꙗ҆́кѡ бг҃ъ, ми́лостивъ и҆ чл҃вѣколю́бецъ.

Свѣти́ленъ.

Твоѧ̑ по́двиги сто́лпъ вопїе́тъ гла́сы неглаго́льными, стра́ждꙋща безпокро́внѡ ка́чествы проти́вными, ѿѻнꙋ́дꙋже, ꙗ҆́кѡ свѣти́льникъ свѣтоно́сне, просїѧ́лъ є҆сѝ, ѻ҆́тче, ѡ҆зарѧ́ѧ всю̀ тва́рь.

Бг҃оро́диченъ: Тѧ̀ пѣ́сньми немо́лчными блажи́мъ, дв҃о, ꙗ҆́кѡ ѿ трⷪ҇цы є҆ди́наго родила̀ є҆сѝ, бцⷣе, и҆ но́сиши бжⷭ҇твенными рꙋка́ми пресꙋ́щное сло́во, невра́щнѡ и҆ неизмѣ́ннѡ.