Канон святому преподобному Алипию Столпнику, Адрианопольскому

Пѣ́снь а҃.

І҆рмо́съ: Конѧ̀ и҆ вса́дника въ мо́ре чермно́е, сокрꙋша́ѧй бра̑ни мы́шцею высо́кою, хрⷭ҇то́съ и҆стрѧсѐ, і҆и҃лѧ же спасѐ, побѣ́днꙋю пѣ́снь пою́ща.

Бл҃года́тїю и҆спо́лненъ, ра́дости мою̀ и҆спо́лни дꙋ́шꙋ, похвали́ти житїѐ твоѐ, а҆лѵ́пїе, и҆ жи́тельство, и҆́миже всѧ̑ а҆́гг҃лы возвесели́лъ є҆сѝ подвиза́всѧ.

Ꙗ҆́кѡ дрꙋга́го тѧ̀ самꙋи́ла бг҃ъ ѡ҆свѧтѝ, и҆зъ ма́тернѧгѡ чре́ва, а҆лѵ́пїе блаже́нне, и҆ зрѣ́ти прє́днѧѧ, ꙗ҆́кѡ прⷪ҇ро́ка бжⷭ҇твенна содѣ́ѧ тѧ̀, достосла́вне.

Ꙗ҆́кѡ да бг҃ъ ꙗ҆ви́тъ твою̀ свѣ́тлость, ю҆́же напослѣ́докъ и҆мѣ́лъ є҆сѝ, до́брѣ подвиза́всѧ, свѣ́та бжⷭ҇твеннагѡ и҆спо́лни, тебѣ̀ ро́ждшꙋсѧ, прпⷣбне, хра́минꙋ, па́че ᲂу҆ма̀.

Бг҃оро́диченъ: Рече́нїе прⷪ҇ро́ка честна́гѡ коне́цъ прїѧ́тъ: се́ бо дв҃а пло́тїю бг҃а родѝ, человѣ́ки воззи́ждꙋща, сокрꙋшє́нныѧ пре́жде грѣхмѝ и҆ прегрѣшє́нїи.

Пѣ́снь г҃.

І҆рмо́съ: Водрꙋзи́вый на ничесо́мже зе́млю повелѣ́нїемъ твои́мъ, и҆ повѣ́сивый неѡдержи́мѡ тѧготѣ́ющꙋю, на недви́жимѣмъ, хрⷭ҇тѐ, ка́мени за́повѣдей твои́хъ цр҃ковь твою̀ ᲂу҆твердѝ, є҆ди́не бла́же и҆ чл҃вѣколю́бче.

Ꙗ҆́кѡ свѣти́льникъ на свѣ́щницѣ дѣѧ́нїѧ лꙋ́чшагѡ возложе́нъ, свѣтоза́рными твои́ми, ѻ҆́тче, добродѣ́тельми всѧ́кꙋ дꙋ́шꙋ, вѣ́рнѡ къ тебѣ̀ приходѧ́щꙋю, благочестномꙋ́дреннѡ просвѣти́лъ є҆сѝ, тмы̀ грѣха̀ и҆збавлѧ́ѧ.

Оу҆ма̀ твоегѡ̀ свѧщє́ннаѧ движє́нїѧ творѧ̀, къ соблюде́нїю бжⷭ҇твенныхъ зако́нѡвъ дх҃а, а҆́гг҃лъ ꙗ҆ви́лсѧ є҆сѝ на землѝ, а҆́гг҃льское жи́тельство съ пло́тїю воспрїе́мъ, ѻ҆́тче бг҃оно́се а҆лѵ́пїе.

Разꙋ́мнѡ пли́щей жите́йскихъ, а҆лѵ́пїе, ѿше́льникъ ꙗ҆ви́лсѧ є҆сѝ, и҆ пристꙋпи́лъ є҆сѝ къ три́знамъ по́стническагѡ пребыва́нїѧ ᲂу҆се́рднѡ, твоѐ се́рдце жили́ще ꙗ҆влѧ́ѧ дх҃а, прпⷣбне.

Бг҃оро́диченъ: Дв҃о чⷭ҇таѧ, сло́ва пала́та, дꙋ́шꙋ мою̀ покажѝ до́мъ дх҃а, и҆ водо́ю и҆сто́чника живонача́льнагѡ напо́й мѧ̀, зно́емъ грѣха̀ пали́маго, ꙗ҆́кѡ да по до́лгꙋ сла́влю тѧ̀.

Сѣда́ленъ, гла́съ д҃.

Свѣ́тлостїю вѣ́ры и҆ дѣ́тельнымъ свѣ́томъ, ꙗ҆ви́лсѧ є҆сѝ равноа́гг҃ленъ на землѝ вои́стинꙋ, а҆лѵ́пїе прпⷣбне, показа́лъ є҆сѝ мꙋ́жественнѡ крѣ́пкое ра́зꙋма твоегѡ̀, побѣди́въ ѡ҆полчє́нїѧ стра̑стнаѧ посто́мъ. тѣ́мже и҆ по кончи́нѣ ꙗ҆́кѡ жи́въ сы́й, молѝ спасти́сѧ на́мъ.

Бг҃оро́диченъ: Дв҃о всенепоро́чнаѧ, ꙗ҆́же пресꙋ́щнагѡ бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй, и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Крⷭ҇тобг҃оро́диченъ: Дв҃о пренепоро́чнаѧ мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи непреста́й, проще́нїе прегрѣше́нїй на́мъ дарова́ти.

Пѣ́снь д҃.

І҆рмо́съ: Бжⷭ҇твенное твоѐ разꙋмѣ́въ и҆стоща́нїе прозорли́вѡ а҆ввакꙋ́мъ, хрⷭ҇тѐ, со тре́петомъ вопїѧ́ше тебѣ̀: во спасе́нїе люде́й твои́хъ, спастѝ помаза̑нныѧ твоѧ̑ прише́лъ є҆сѝ.

Любо́вь и҆́стиннꙋю и҆ милосе́рдїе, вѣ́рꙋ и҆ наде́ждꙋ тве́рдꙋ, и҆ жи́тельство нельсти́вое прїе́мь, ѻ҆́тче, ᲂу҆го́дникъ хрⷭ҇то́въ бы́лъ є҆сѝ.

Стоѧ̀ на столпѣ̀ непрекло́ненъ проти́вными прилѡ́ги, де́мѡнѡвъ по́лкъ побѣди́лъ є҆сѝ, и҆ коле́блємымъ бы́лъ є҆сѝ, всеблаже́нне, незы́бленное ᲂу҆твержде́нїе.

Во́дъ бжⷭ҇твенныхъ и҆спо́лненъ бы́въ и҆ ѡ҆роси́лъ є҆сѝ дꙋ́шы и҆ста́ѧвшыѧ зно́емъ лю́тагѡ грѣха̀, а҆лѵ́пїе бг҃омꙋ́дре всебога́те.

Ꙗ҆ви́лсѧ є҆сѝ стра́шенъ и҆ непристꙋ́пенъ де́мѡнѡмъ всѣ̑мъ вои́стиннꙋ, ᲂу҆ранѧ́ѧ сїѧ̑ ра́ною свѧще́нныхъ твои́хъ моли́твъ, и҆ дале́че ѿгонѧ́ѧ, а҆лѵ́пїе.

Бг҃оро́диченъ: Стра̑сти дꙋшѝ моеѧ̀ и҆сцѣлѝ, и҆ просвѣтѝ ᲂу҆́мъ и҆ се́рдце моѐ, влⷣчце, свѣтода́телѧ ро́ждши хрⷭ҇та̀, преблага́го бг҃а.

Пѣ́снь є҃.

І҆рмо́съ: Ѡ҆дѣѧ́йсѧ свѣ́томъ ꙗ҆́кѡ ри́зою, къ тебѣ̀ ᲂу҆́тренюю, и҆ тебѣ̀ зовꙋ̀: дꙋ́шꙋ мою̀ просвѣтѝ ѡ҆мраче́ннꙋю, хрⷭ҇тѐ, ꙗ҆́кѡ є҆ди́нъ благоꙋтро́бенъ.

Ве́сь возложи́всѧ вседержи́телю, лѣ́тнымъ стоѧ́нїемъ безъ покро́ва, ѻ҆́тче, дожде́мъ и҆ зно́емъ ѕѣ́льнѡ стражда̀, ᲂу҆се́рднѡ претерпѣ́лъ є҆сѝ.

Въ пѣ́снехъ и҆ мольба́хъ ᲂу҆пражнѧ́ѧсѧ, прпⷣбне, трисо́лнечныѧ зарѝ благода́ть ᲂу҆ма̀ чистото́ю прїѧ́лъ є҆сѝ, и҆ свѣ́тъ цѣле́нїй возблиста́лъ є҆сѝ.

Тѣ́ло твоѐ на столпѣ̀ ѡ҆гради́въ, ᲂу҆мо́мъ ше́ствовати невозбра́ннѡ, къ тебѣ̀ жела́емомꙋ, ѻ҆́тче, попꙋсти́лъ є҆сѝ, свѣ́та и҆сполнѧ́емь.

Бг҃оро́диченъ: Ст҃а́го родила̀ є҆сѝ бг҃а, бы́вша человѣ́ка за милосе́рдїе, ст҃а́ѧ ѻ҆трокови́це, ѡ҆свѧща́ющаго, и҆̀же того̀ вѣ́рою и҆ стра́хомъ ѡ҆свѧща́ющыѧ.

Пѣ́снь ѕ҃.

І҆рмо́съ: Неи́стовствꙋющеесѧ бꙋ́рею дꙋшетлѣ́нною, влⷣко хрⷭ҇тѐ, страсте́й мо́ре ᲂу҆кротѝ, и҆ ѿ тлѝ возведи́ мѧ, ꙗ҆́кѡ благоꙋтро́бенъ.

Ка́менїемъ тѧ̀ дꙋ́си ѕло́бы бїю́ще ꙗ҆́вѣ, творѧ́ща стоѧ́нїе на столпѣ̀, ꙗ҆́кѡ тве́рдагѡ ка́мене ника́коже поколеба́ша.

Терпѧ̀, прпⷣбне, претерпѣ́лъ є҆сѝ, терпѣ́нїе тебѣ̀ и҆́стинное гдⷭ҇ꙋ дарова́вшꙋ, и҆ ѿ всѣ́хъ неꙋдо́бныхъ тѧ̀ и҆зба́вившꙋ.

Пресла́внѡ, прпⷣбне, свѣ́тъ ви́дѣнъ бы́сть вы́ше столпа̀, на всѧ́къ де́нь просвѣща́ющь твоѧ̑, чꙋдотво́рче, дꙋшє́внаѧ чꙋ̑вства.

Бг҃оро́диченъ: Крѣ́пко тѧ̀ ᲂу҆тѣше́нїе сꙋ́щїи въ ско́рби, и҆ прибѣ́жище, и҆ и҆звѣ́стное всѝ и҆́мамы застꙋпле́нїе, бцⷣе: спасѝ ѿ бѣ́дъ рабы̑ твоѧ̑.

Конда́къ, гла́съ и҃.

Ꙗ҆́кѡ добродѣ́телей винꙋ̀, и҆ по́стникѡвъ ᲂу҆добре́нїе, цр҃ковь сла́витъ тѧ̀ дне́сь и҆ воспѣва́етъ, а҆лѵ́пїе: моли́твами твои́ми пода́ждь чтꙋ́щымъ любо́вїю до́блєсти твоѧ̑ и҆ борє́нїѧ лю́тыхъ прегрѣше́нїй и҆збавле́нїе, ꙗ҆́кѡ тезоимени́тый.

І҆́косъ:

А҆лѵ́пїевꙋ житїю̀ бжⷭ҇твенномꙋ и҆ равноа́гг҃льномꙋ прїиди́те, почꙋди́мсѧ, а҆рхїєре́и, свѧще́нницы, и҆ мона́шествꙋющїи, и҆ всѝ лю́дїе бг҃омꙋ́дрїи, и҆ подража́имъ дѣѧ̑нїѧ є҆гѡ̀, да и҆ тогѡ̀ ча́сти сподо́бимсѧ мольба́ми є҆гѡ̀ празднолю́бцы: и҆́бо то́й нбⷭ҇нꙋю пѣ́снь пое́тъ безпеча́льнѡ бг҃ꙋ, ꙗ҆́кѡ тезоимени́тый.

Пѣ́снь з҃.

І҆рмо́съ: Превозноси́мый ѻ҆ц҃є́въ гдⷭ҇ь, пла́мень ᲂу҆гасѝ, ѻ҆́троки ѡ҆росѝ, согла́снѡ пою́щыѧ: бж҃е, бл҃гослове́нъ є҆сѝ.

Терпѣли́вѣйшїй и҆ крѣ́пкїй а҆лѵ́пїй, лѣ́ты мно́гими зимо́ю дрꙋчи́мь, дх҃а теплото́ю грѣ́ѧшесѧ пресла́внѡ.

Къ высотѣ̀ нбⷭ҇нѣй и҆мѣ́ѧ жи́тельство, ѡ҆ тѣлесѝ небре́глъ є҆сѝ, ꙗ҆́кѡ растлѣ́тисѧ и҆мꙋ́щемъ: и҆ томꙋ̀ согнива́емꙋ, неради́лъ є҆сѝ ѡ҆ болѣ́знехъ.

Всѧ́кагѡ сладостра́стїѧ, ѻ҆́тче, ѿве́ргсѧ, съ зимо́ю и҆ ва́ромъ борѧ́сѧ пострада́лъ є҆сѝ, безпокро́венъ поѧ̀: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Непостижи́мый пло́ть прїѧ́тъ, ᲂу҆́мнꙋ же и҆ ѡ҆дꙋшевле́ннꙋ, и҆зъ тебє̀, приснодв҃о, є҆́же спастѝ пою́щыѧ: бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Тебѣ̀ вседѣ́телю, въ пещѝ ѻ҆́троцы всемі́рный ли́къ спле́тше, поѧ́хꙋ: дѣла̀ всѧ̑каѧ гдⷭ҇а по́йте, и҆ превозноси́те во всѧ̑ вѣ́ки.

Но́вый самꙋи́лъ предзрѧ̀ бꙋ́дꙋщее ᲂу҆ма̀ чистото́ю, ꙗ҆ви́лсѧ є҆сѝ, а҆лѵ́пїе, всѣ̑мъ предглаго́лѧ, ꙗ҆́кѡ бж҃їй проро́къ, ѿ гдⷭ҇а ꙗ҆влѧ́ємаѧ тебѣ̀, ѻ҆́тче.

Свѣтови́дный цр҃кве сто́лпъ, забра́ло незы́бленное, стѣна̀ нерꙋши́маѧ всѣ́хъ человѣ́кѡвъ, бг҃ꙋ вѣ́ровавшихъ, хрⷭ҇то́въ ᲂу҆го́дникъ а҆лѵ́пїй да почти́тсѧ.

Оу҆снꙋ́лъ є҆сѝ до́брѣ сно́мъ пра́веднымъ, ѻ҆́тче, всѣ̑мъ до́лжнымъ, ᲂу҆спи́въ пре́жде стра̑сти многоѻбра̑зныѧ мольба́ми и҆ бдѣ̑нїи. тѣ́мже неꙋсы́пна тѧ̀ предста́телѧ и҆мꙋ́ще ны́нѣ, ѡ҆богати́хомсѧ.

Бг҃оро́диченъ: Твоѐ ржⷭ҇тво̀ роди́вшїйсѧ грѣ́хъ ѕло́бою ѕмїи́ною ѡ҆безпло́дстви ны́нѣ, є҆ди́на клѧ́твы потреби́тельница дв҃о. тѣ́мже тѧ̀ чти́мъ во всѧ̑ вѣ́ки.

Пѣ́снь ѳ҃.

І҆рмо́съ: И҆са́їе, ликꙋ́й, дв҃а и҆мѣ̀ во чре́вѣ, и҆ родѝ сн҃а є҆мманꙋ́ила, бг҃а же и҆ чл҃вѣ́ка, восто́къ и҆́мѧ є҆мꙋ̀: є҆го́же велича́юще, дв҃ꙋ ᲂу҆блажа́емъ.

Свѧще́нное житїѐ твоѐ ѿ пеле́нъ ꙗ҆ви́сѧ хрⷭ҇тꙋ̀, сїѧ́ѧ добродѣ́тельнымъ свѣ́томъ, бл҃же́нне: честна́ же твоѧ̀ сме́рть предъ бг҃омъ бы́сть, ѻ҆́тче а҆лѵ́пїе, мона́шествꙋющихъ нача́льниче.

Ꙗ҆́кѡ свѣти́ло пресвѣ́тлое просвѣща́еши всю̀ зе́млю, ѿгонѧ̀ лꙋка̑выѧ стра̑сти, и҆ разрѣша́ѧ тмꙋ̀ грѣхо́внꙋю, и҆ просвѣща́ѧ бжⷭ҇твенными свѣтлостьмѝ и҆сцѣле́нїй пою́щыѧ тѧ̀.

Стоѧ́нїе на столпѣ̀ сотвори́лъ є҆сѝ лѣ̑та, мꙋ́дре, пѧтьдесѧ́тъ къ тре́мъ, ꙗ҆́кѡ страда́лецъ стражда̀ ᲂу҆се́рднѣйше, и҆ зимо́ю и҆ мра́зомъ и҆ зно́емъ, ѻ҆́тче, неѡсла́бнѡ дрꙋчи́мь.

Ст҃а́ѧ твоѧ̀ па́мѧть дх҃омъ ст҃ы́мъ на́съ ѡ҆свѧща́етъ, мꙋ́дре, сїю̀ свѧще́ннѡ соверша́ющыѧ, и҆ вѣ́рою тѧ̀ воспѣва́ющыѧ, ѻ҆́тче, въ не́й, ꙗ҆́кѡ застꙋ́пника и҆ предста́телѧ дꙋ́шъ на́шихъ.

Бг҃оро́диченъ: Просвѣще́нїе мнѣ̀ да́рꙋй, во тмѣ̀ сꙋ́щꙋ страсте́й, ѻ҆каѧ́нномꙋ и҆ грѣ́шномꙋ, и҆ и҆зба́ви мѧ̀ лꙋка́выхъ дѣ́лъ, и҆ пла́мене предлежа́щагѡ мѝ, пречⷭ҇таѧ влⷣчце, предста́тельнице пою́щихъ тѧ̀.

Свѣти́ленъ.

По́двиги па́че человѣ́ка проше́лъ є҆сѝ, ѻ҆́тче прпⷣбне, хрⷭ҇то́вою си́лою: пѧтьдесѧ́тъ бо къ тре́мъ лѣ́тѡмъ на столпѣ̀ стоѧ́лъ є҆сѝ, мꙋ́дре а҆лѵ́пїе, ѿвсю́дꙋ дрꙋчи́мь: и҆ ны́нѣ коне́чное, бл҃же́нне, благи́хъ всѣ́хъ ѡ҆брѣ́лъ є҆сѝ.

Бг҃оро́диченъ: Ты̀ моѧ̀ предста́тельница чⷭ҇таѧ, и҆ тве́рдое прибѣ́жище, ты̀ моѧ̀ застꙋ́пница и҆ покро́въ, и҆ къ тебѣ̀ припа́даѧ зовꙋ̀: болѣ́зней мои́хъ и҆зба́ви мѧ̀, ꙗ҆́кѡ всѣ́хъ преимꙋ́щи, и҆ ѻ҆гнѧ́ мѧ и҆схитѝ вѣ́чнꙋющагѡ, дв҃о, на тѧ̀ ᲂу҆пова́ющаго.