Канон святому мученику Трифону Апамейскому, Никейскому

Пѣ́снь а҃.

І҆рмо́съ: Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

Вои́стиннꙋ бж҃е́ственныѧ на нб҃сѣ́хъ сла́дости наслажда́ѧсѧ, ꙗ҆́кѡ непобѣди́мь страда́лецъ, твои́ми моли́твами дꙋ́шꙋ мою̀ и҆зба́ви ѿ страсте́й смꙋще́нїѧ.

Глагѡ́лы бжⷭ҇твенными ѡ҆гласи́всѧ, соверши́лъ є҆сѝ сїѧ̑, пресла́вне, дѣ́ѧтельнѡ, ст҃ы́ню возлюби́въ, и҆ цѣломꙋ́дрїе ѡ҆блобыза́въ.

Бы́лъ є҆сѝ и҆́стиннѡ па́стырь, пасы́й дꙋшѝ твоеѧ̀ въ мꙋ́дрости помышлє́нїѧ, дꙋ́шы ѡ҆браща́ѧ заблꙋжда́ющыѧ, и҆ бг҃ꙋ приводѧ̀, сла́вне.

Бг҃оро́диченъ: Просвѣща́еши мѧ̀ сїѧ́нїемъ мы́сленнымъ, ѡ҆сїѧ́нїе сла́вы ро́ждшаѧ ѻ҆́ч҃ее, всенепоро́чнаѧ ѻ҆трокови́це, и҆ мра́къ грѣхо́вный разорѝ.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Притꙋпи́лъ є҆сѝ си́лꙋ го́рдагѡ, сла́вный мч҃ниче хрⷭ҇то́въ, свы́ше ѡ҆дѣ́ѧвсѧ си́лою.

Пло́тїю ѡ҆бложе́нъ, шата̑нїѧ безпло́тнагѡ ᲂу҆гаси́лъ є҆сѝ врага̀, и҆ воплоще́ннаго бг҃а сло́ва проповѣ́далъ є҆сѝ.

Є҆ди́нымъ то́кмѡ прише́ствїемъ твои́мъ дꙋ́хи лꙋка́вствїѧ ѿгонѧ́ютсѧ, дх҃а ст҃а́гѡ гони́ми бл҃года́тїю.

Бг҃оро́диченъ: И҆мѣ́ѧ тѧ̀ по́мощь, не постыждꙋ́сѧ, пречи́стаѧ мт҃и бж҃їѧ: и҆мѣ́ѧ тѧ̀ предста́тельницꙋ жи́зни моеѧ̀, спасꙋ́сѧ.

Сѣда́ленъ, гла́съ д҃.

Болѣ́зньми, бл҃же́нне, наслажда́ѧсѧ плотски́ми, бж҃е́ственнꙋю и҆ неболѣ́зненнꙋю пи́щꙋ досто́йнѡ воспрїѧ́лъ є҆сѝ, вѣне́цъ безсме́ртїѧ ѿ бг҃а прїе́мъ. тѣ́мже и҆ и҆сцѣле́нїй рѣ́ки и҆сточа́еши любо́вїю прибѣга́ющымъ, мꙋ́чениче, въ кро́въ тво́й.

Сла́ва, и҆ ны́нѣ: Сокро́вище вѣ́чное жи́зни всѧ́ческихъ, менє̀ ра́ди подъ зако́номъ младе́нствовавый дре́вле начерта́вый на скрижа́лѣхъ зако́нъ на горѣ̀ сїна́йстѣй, да всѧ̑ и҆змѣни́ши ѿ зако́нныѧ дре́внїѧ рабо́ты. сла́ва бл҃гоꙋтро́бїю твоемꙋ̀, сп҃се, сла́ва соше́ствїю твоемꙋ̀, сла́ва смотре́нїю твоемꙋ̀, є҆ди́не чл҃вѣколю́бче.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Зрѧ́щихъ ᲂу҆диви́лъ є҆сѝ терпѣ́нїѧ, бл҃же́нне, тве́рдостїю: мꙋ̑ки бо претерпѣ́лъ є҆сѝ, ꙗ҆́кѡ въ чꙋжде́мъ стражда̀ тѣлесѝ, мꙋ́дре трѵ́фѡне.

Пита́лсѧ є҆сѝ, блаже́нне, ра́нами болѣ́зней бїе́мь, ны́нѣ же наслажда́ешисѧ чи́стѣе, присносꙋ́щныѧ сла́вы насыща́ѧсѧ.

Стрꙋ́жемꙋ тѣлесѝ твоемꙋ̀ желѣ́зныхъ ногте́й ѻ҆строто́ю, вжилѧ́шесѧ, чꙋ́дне, твоеѧ̀ дꙋшѝ крѣ́пость, бж҃е́ственною благода́тїю.

Бг҃оро́диченъ: На тѧ̀ ᲂу҆пова́нїе моѐ всѐ возлага́ю, мт҃и дв҃о: дꙋ́шꙋ мою̀ сохранѝ, ꙗ҆́же бг҃а ро́ждшаѧ, сп҃са моего̀.

Пѣ́снь є҃.

І҆рмо́съ: Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Кꙋмі́ры прелє́стныѧ ᲂу҆праздни́лъ є҆сѝ, страстоте́рпче: то́кмѡ бо возлюби́лъ є҆сѝ хрⷭ҇то́вꙋ ѻ҆́бразꙋ покланѧ́тисѧ.

Разꙋмѣ́въ пресвѣ́тлꙋю, сла́вне страстоте́рпче, бл҃года́ть бг҃а на́шегѡ, тоѧ̀ ра́ди пострада́лъ є҆сѝ.

Бжⷭ҇твенною ѡ҆зари́всѧ бл҃года́тїю, ᲂу҆се́рднѡ, страда́льче, хрⷭ҇та̀ ра́ди пострада́лъ є҆сѝ.

Бг҃оро́диченъ: Неизрече́нно бы́сть зача́тїе твоѐ, и҆ рождество̀ несказа́нно: пребыла́ бо є҆сѝ чи́стаѧ приснодв҃а.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

И҆зсꙋши́въ мє́рзскїѧ жє́ртвы, и҆ приношє́нїѧ сквє́рнаѧ и҆ неи́стѡвства і҆́дѡльскаѧ твои́ми кровьмѝ, сла́вне, напои́лъ є҆сѝ всѧ̑ цр҃кѡ́внаѧ бл҃горѡ́днаѧ, трѵ́фѡне, прозѧбє́нїѧ.

Стрꙋ́пи мꙋ́ченичестїи ꙗ҆́кѡ мѵ́ро благоꙋха́ютъ, кро́вь страда́лєцъ и҆сточа́етъ и҆сцѣлє́нїѧ, ѡ҆ста́нцы же тѣ́ла дꙋ́шы ѡ҆свѧща́ютъ вѣ́рою каса́ющихсѧ и҆̀мъ.

Бг҃оро́диченъ: Ꙗ҆́кѡ ѡ҆дꙋшевле́нъ кївѡ́тъ прїѧ́ла є҆сѝ сло́во безнача́льное, ꙗ҆́кѡ ст҃о́е ст҃и́лище зижди́телѧ вмѣсти́ла є҆сѝ, ꙗ҆́кѡ прⷭ҇то́лъ ѻ҆гнезра́ченъ но́сиши влⷣкꙋ, бг҃ома́ти, всеѧ̀ тва́ри.

Конда́къ, гла́съ и҃.

Трⷪ҇ческою тве́рдостїю многобо́жїе разрꙋши́лъ є҆сѝ ѿ конє́цъ, всесла́вне, че́стенъ во хрⷭ҇тѣ̀ бы́въ, и҆ побѣди́въ мꙋчи́тели во хрⷭ҇тѣ̀ сп҃си́телѣ, вѣне́цъ прїѧ́лъ є҆сѝ мꙋ́ченичества твоегѡ̀ и҆ дарова̑нїѧ бж҃е́ственныхъ и҆сцѣле́нїй, ꙗ҆́кѡ непобѣди́мь.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Вѣнцено́сецъ ликꙋ́еши съ ли́ки мꙋ́чєникъ веселѧ́сѧ: пре́лесть бо побѣди́въ сло́вомъ и҆́стиннымъ, воспѣва́еши ра́дꙋѧсѧ: ѻ҆тє́цъ на́шихъ бж҃е, бл҃гослове́нъ є҆сѝ.

Влⷣка всѧ́ческихъ свои́ми страда́ньми вѣнча́етъ мꙋ́ченика, и҆ сего̀ водворѧ́етъ въ се́лѣхъ нбⷭ҇ныхъ зовꙋ́ща, и҆ глаго́люща: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: Мла́да носѧ́щи младе́нца, пре́жде всѣ́хъ вѣ̑къ бг҃а, всенепоро́чнаѧ, и҆зъ тебє̀ воплоще́нна, не преста́й молѧ́щи спастѝ пою́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всѧ̑ вѣ́ки.

Да́же до ᲂу҆сѣкнове́нїѧ и҆ ѡ҆пале́нїѧ да́же до кровепроли́тїѧ, да́же и҆ до сме́ртныѧ кончи́ны пострада́лъ є҆сѝ, сопротивлѧ́ѧсѧ проти́вꙋ грѣхꙋ̀, мч҃ниче хрⷭ҇то́въ: ны́нѣ же жи́знь во хрⷭ҇тѣ̀ сокрове́ннꙋю прїе́мь, взыва́еши: сщ҃е́нницы, бл҃гослови́те, лю́дїе, превозноси́те во всѧ̑ вѣ́ки.

На землѝ подвиза́лсѧ є҆сѝ, съ нечести́выми борѧ́сѧ, проти́вꙋ ле́стнѣй и҆ бг҃обо́рнѣй ле́сти, го́рцѣ нꙋ́дѧщымъ: на нб҃сѣ́хъ же, трѵ́фѡне, наслажда́ешисѧ, вѣне́цъ носѧ̀, и҆ со а҆́гг҃лы ликꙋ́еши поѧ̀: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те гдⷭ҇а во вѣ́ки.

Мꙋчи́тельское и҆з̾ѡбличи́лъ є҆сѝ безбо́жїе, всемꙋ́дре, и҆ де́мѡнское бг҃обо́рство ᲂу҆гаси́лъ є҆сѝ стрꙋѧ́ми крове́й твои́хъ: въ трⷪ҇цѣ є҆ди́наго бг҃а достолѣ́пнѣ и҆ чи́стѣ возвѣща́ѧ, и҆ чествꙋ́ѧ взыва́лъ є҆сѝ: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те, во всѧ̑ вѣ́ки.

Бг҃оро́диченъ: Глаго́лѡмъ твои̑мъ послѣ́дꙋюще, ᲂу҆бл҃жа́емъ, пречи́стаѧ, тѧ̀ бл҃же́ннꙋю, пло́тїю ро́ждшꙋю вои́стиннꙋ бл҃же́ннаго, свѣ́та живꙋ́щаго незаходи́маго, и҆ свѣтонаста́вника, и҆ свѣтода́вца влⷣкꙋ: є҆го́же ѻ҆́троцы бл҃гословѧ́тъ, сщ҃е́нницы воспѣва́ютъ и҆ превозно́сѧтъ во всѧ̑ вѣ́ки.

Пѣ́снь ѳ҃.

І҆рмо́съ: Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.

Па́че ви́димыхъ мꙋ́ченическое ча́ѧнїе, по́лно безсме́ртнагѡ наслажде́нїѧ: ви́дитсѧ си́хъ наде́жда полна̀ бл҃гоꙋха́нїѧ, и҆ ра́дости и҆ свѣ́тлости неизрече́нныѧ: тѣ́мже досто́йнѡ ᲂу҆блажа́ютсѧ.

Свѣ́тъ бы́лъ є҆сѝ вторы́й, къ свѣ́тꙋ пе́рвомꙋ прибли́живсѧ, заре́ю є҆гѡ̀ просвѣща́емь и҆ воѡбража́емь, трѵ́фѡне мꙋ́дре, и҆ тогѡ̀ пода́тельными свѣтлостьмѝ сїѧ́ѧ: тѣ́мъ тѧ̀ всѝ ᲂу҆блажа́емъ.

Ꙗ҆ви́лсѧ є҆сѝ неꙋжа́сенъ въ по́двизѣхъ, страстоте́рпче, ꙗ҆ви́лсѧ є҆сѝ и҆́стиннѡ тезоимени́тъ бжⷭ҇твеннѣй и҆ ст҃ѣ́й пи́щи, є҆ѧ́же ны́нѣ воспрїе́млѧ, и҆ ꙗ҆́снѡ наслажда́ѧсѧ, спасе́нїе чтꙋ́щымъ тѧ̀ на́мъ и҆спросѝ.

Бг҃оро́диченъ: Оу҆мертвѝ мꙋдрова́нїе, бг҃ороди́тельнице, пло́ти моеѧ̀, и҆ ѡ҆живѝ дꙋше́вное ᲂу҆мерщвле́нїе, дѣ́йствомъ и҆́стинныѧ жи́зни, и҆зъ тебє̀ ро́ждшїѧсѧ пло́тїю, за неизрече́нное бл҃гоꙋтро́бїе и҆ спасе́нїе пою́щихъ тѧ̀.

Свѣти́ленъ.

Пи́щи наслажда́ѧсѧ пресла́вныѧ и҆ бжⷭ҇твенныѧ, а҆́гг҃лѡмъ є҆диножи́тель бы́лъ є҆сѝ, бл҃же́нне: гꙋ́си пасы́й въ лꙋзѣ́хъ, ѿ бг҃а прїѧ́лъ є҆сѝ бл҃года́ть и҆сцѣле́нїй, трѵ́фѡне великомч҃ниче, и҆сцѣлѧ́ти человѣ́чєскїѧ не́мѡщи и҆ недꙋ́ги.

Сла́ва, и҆ ны́нѣ: Ѻ҆троча̀ прине́сши всенепоро́чнаѧ ѻ҆трокови́ца во ст҃и́лище, соверши́ти ꙗ҆̀же по зако́нꙋ, и҆ сїѐ на рꙋ́ки ꙗ҆́кѡ прїѧ́тъ сѷмеѡ́нъ првⷣный, проти́вꙋ и҆зречѐ дв҃и́цѣ: се́й лежи́тъ на паде́нїе и҆ на воста́нїе мнѡ́гимъ, и҆ во зна́менїе въ мі́рѣ.