Канон святому мученику Иринарху Севастийскому

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Ѿ собла̑знъ жите́йскихъ и҆ страсте́й, стꙋжа́ющихъ мѝ, ᲂу҆мирѝ мо́й ᲂу҆́мъ, страда́льче і҆рина́рше, твою̀ похвали́ти па́мѧть ти́хѡ сподо́би.

Стрꙋѧ́ми крове́й твои́хъ пла́мень гони́телей ᲂу҆гаси́въ, напои́лъ є҆сѝ помышлє́нїѧ вѣ́рныхъ, возрасти́ти жела́нїе живота̀ вѣ́чнагѡ благоче́стнѡ, мꙋ́чениче і҆рина́рше.

Свѧщеннопобѣ̑дныѧ вѣнцы̀, ꙗ҆́кѡ страда́лецъ прїе́мъ, і҆рина́рше, преложи́лсѧ є҆сѝ ѿ землѝ къ ми́рꙋ нера́тномꙋ, и҆ свѣ́тꙋ и҆ животꙋ̀ и҆́стинномꙋ, бл҃же́ннѣйше.

Бг҃оро́диченъ: Невмѣсти́мое сло́во, во твое́мъ чре́вѣ вмѣще́но ро́ждши, бг҃овмѣсти́маѧ ски́нїѧ, ᲂу҆тѣснѧ́ющаго мѧ̀ лю́тыхъ треволне́нїѧ ѕлы́хъ, чⷭ҇таѧ, и҆зба́ви.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Вжилѧ́ешисѧ крѣ́постїю бжⷭ҇твенною, и҆ грѧде́ши къ подвигѡ́мъ ᲂу҆се́рднѡ, всебл҃же́нне, терпѧ̀ ра̑ны, и҆ растерза̑нїѧ гонѧ́щихъ, страстоте́рпче мч҃ниче до́блественнѣйше.

Крѣ́пость тѝ дае́тъ хрⷭ҇то́съ, вели́кїй страстополо́жникъ, погꙋби́ти пре́лесть и҆ посрами́ти врага̀, хва́лѧщасѧ безстꙋ́днѡ, и҆ сꙋ́етнѡ, мꙋ́чениче, свирѣ́пѣющаго.

Низложѝ болѣ́зньми мꙋ́жественными ѕлонача́льнаго ѕмі́ѧ, ли́къ ст҃ы́хъ пострада́въ крѣ́пкѡ, и҆ ра̑ны и҆ ᲂу҆́зы претерпѣ́въ, си́лою бжⷭ҇твеннагѡ дх҃а.

Бг҃оро́диченъ: Ю҆́же ви́дѣ дре́вле і҆а́кѡвъ ѿ землѝ досѧ́жꙋщꙋ къ небе́снѣй высотѣ̀ бжⷭ҇твеннꙋю лѣ́ствицꙋ, ꙗ҆́вѣ марі́ю, чⷭ҇тꙋю, влⷣчню воспои́мъ пала́тꙋ.

Пѣ́снь д҃.

І҆рмо́съ: Хрⷭ҇то́съ, моѧ̀ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Зако́ннѡ поте́клъ є҆сѝ, зако́ннѡ пострада́лъ є҆сѝ, и҆ зако́ннѡ вѣнча́лсѧ є҆сѝ, бж҃їимъ зако́номъ ᲂу҆крѣплѧ́емь, и҆ непревре́дна тебѐ сама́го соблюда́ѧ, блаже́ннѣйше.

Не терпѧ̀, сла́вне, въ пре́лести ходи́ти, къ бг҃орожде́нїю, ꙗ҆́кѡ смы́сленъ, ра́дꙋѧсѧ ᲂу҆стреми́лсѧ є҆сѝ, свѣ́тъ разꙋ́мный прїе́мъ, и҆ свѣти́льникъ показꙋ́ѧсѧ.

Ѿню́дъ не покры̀ глꙋбина̀ прїе́мши тѧ̀, всеблаже́нне мч҃ниче, позна́вши тѧ̀ бжⷭ҇твенныхъ стрⷭ҇те́й всеи́стиннѣйшагѡ хрⷭ҇та̀ бжⷭ҇твеннаго свидѣ́телѧ, і҆рина́рше.

Свѧщеннодѣ́йствꙋемы, и҆ предзакала́емы, и҆ стрꙋ́жемы кꙋ́пнѡ, и҆ ѻ҆гне́мъ ѿвсю́дꙋ пали́мы, не ѿверго́стесѧ хрⷭ҇та̀, страстотє́рпицы досточꙋ̑дныѧ.

Бг҃оро́диченъ: Дв҃а пребыла̀ є҆сѝ по ржⷭ҇твѣ̀, ꙗ҆́коже была̀ є҆сѝ пре́жде ржⷭ҇тва̀, ꙗ҆́кѡ бг҃а сло́ва родила̀ є҆сѝ и҆зба́вльшаго ны̀ хода́тайствомъ твои́мъ, всенепоро́чнаѧ.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Копїе́мъ ᲂу҆ѧзви́сѧ вра́гъ, терпѣ́нїѧ крѣ́пкагѡ доблемꙋ́дреннагѡ мꙋ́ченика, и҆ тогѡ̀ пѧта́мъ покори́сѧ, и҆ смѣ́хъ ви́дитсѧ и҆ посрамлѧ́етсѧ.

Нога̀ твоѧ̀ ста̀ прⷪ҇ро́чески, мꙋ́чениче, на пра́вости ꙗ҆́вѣ, непревра́тнымъ мꙋдрова́нїемъ подпина́ющи многоко́зненнаго, и҆ стезѧ́ми мꙋче́нїѧ ᲂу҆добрѧ́ема.

Ты̀ ѕло́бꙋ гонѧ́щихъ, неѕло́бивъ и҆ про́стъ ꙗ҆ви́всѧ, мꙋ́чениче, ѿри́нꙋлъ є҆сѝ, і҆рина́рше, и҆ конча́нїемъ твоеѧ̀ кро́ве вѣнцы̀ нетлѣ́нїѧ вѣнча́лсѧ є҆сѝ.

Бг҃оро́диченъ: Оу҆разꙋмѣ́въ и҆здале́ча та́инственнѡ прⷪ҇ро́кѡвъ бг҃освѣ́тлый ли́къ, дв҃о бг҃оневѣ́стнаѧ, бжⷭ҇твеннагѡ ржⷭ҇тва̀ твоегѡ̀ глꙋбинꙋ̀ неизрече́ннꙋю, ѻ҆́бразы свѧще́нными тѧ̀ проначерта̀.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю̀ тѝ: возведѝ ѿ тлѝ живо́тъ мо́й, многоми́лостиве.

Возше́дъ на во́ды ѡ҆кормлѧ́емь рꙋко́ю живонача́льною, і҆рина́рше, и҆ спа́слсѧ є҆сѝ си́ми, гони́телей погрꙋзи́въ ѕлоче́стїѧ, моли́твою прилѣ́жною, свѧще́ннѣйше.

Ма́лыми и҆скꙋпи́вше вели̑каѧ, на вели̑ка себѐ са̑мыѧ преда́ша мꙋчє́нїѧ свѧщє́нныѧ жєны̀, лестца̀ є҆́ѵина дх҃омъ ᲂу҆мертви́вше, ѕмі́ѧ началоѕло́бнагѡ.

Ѻ҆́троцы ст҃і́и, а҆́гнцы чи́стїи, и҆ приноше́нїѧ совершє́ннаѧ, на́съ ра́ди пожре́номꙋ ꙗ҆́кѡ же́ртва и҆́стинномꙋ а҆́гнцꙋ приведе́ни бы́ша, въ воню̀ благово́нїѧ веселѧ́щесѧ.

Бг҃оро́диченъ: Сѐ ны́нѣ воплоти́сѧ ѿ крове́й твои́хъ чⷭ҇тыхъ, дв҃о ма́ти, гдⷭ҇ь, и҆ человѣ́кѡмъ соединѧ́етсѧ кромѣ̀ враще́нїѧ, за неизглаго́ланнꙋю ми́лость, на́ше спасе́нїе содѣ́ловаѧ.

Сѣда́ленъ, гла́съ а҃.

Ми́ръ тебѣ̀ мно́гъ прибы́сть, мꙋ́чениче, пости́гшꙋ врага̀, и҆ побѣди́вшꙋ пре́лести ра́ть бжⷭ҇твенною благода́тїю, крѣ́пкѡ пострада́вшꙋ тѝ. тѣ́мже вѣ́рою тѧ̀ мо́лимъ: всѧ́кагѡ вре́да и҆зба́ви ст҃ꙋ́ю твою̀ па́мѧть чтꙋ́щихъ, і҆рина́рше.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Любвѐ є҆́же къ пло́ти распрѧ́гъ тво́й ᲂу҆́мъ, блаже́ннѣйше, пали́мь и҆ ѻ҆гне́мъ жго́мь, мꙋ́дре, ѻ҆́троческꙋю вопїѧ́лъ є҆сѝ пѣ́снь: бл҃гослове́нъ є҆сѝ, гдⷭ҇и бж҃е ѻ҆ц҃ъ на́шихъ.

Оу҆блаже́нъ бы́сть ѻ҆трокѡ́въ бжⷭ҇твенный собо́ръ, и҆ же́нъ седмочи́сленный ли́къ ст҃ы́й, строга̑нїѧ, ѻ҆́гнь и҆ ра̑ны крѣ́пкѡ претерпѣ́вше кꙋ́пнѡ, и҆ нбⷭ҇ныхъ бла̑гъ сподоблѧ́еми.

Ѿгонѧ́ютсѧ ѿ є҆ди́нагѡ твоегѡ̀ призыва́нїѧ лꙋка́вїи дꙋ́си, ᲂу҆вѣ́дѣвше тѧ̀ страда́льца непобѣ́дна хрⷭ҇то́ва, і҆рина́рше, пою́ща те́плѣ: бл҃гослове́нъ є҆сѝ, гдⷭ҇и бж҃е ѻ҆тє́цъ на́шихъ.

Бг҃оро́диченъ: Оу҆ны́нїемъ мѧ̀ ѡ҆бдержи́ма воздви́гни къ дѣ́йствꙋ, пречⷭ҇таѧ, бжⷭ҇твенныхъ дѣѧ́нїй, ᲂу҆крѣплѧ́ющи мѧ̀ на врагѝ, при́снѡ борю́щыѧ мѧ̀ лю́тѣ, и҆ проти́вными помышлє́нїи льстѧ́щыѧ мѧ̀.

Пѣ́снь и҃.

І҆рмо́съ: И҆зъ пла́мене преподѡ́бнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. Тѧ̀ превозно́симъ во всѧ̑ вѣ́ки.

Кро́вными течє́нїи є҆щѐ ка́плѧ, и҆ ра́нъ добро́тою ᲂу҆добрѧ́емь, побѣдотво́рцꙋ ꙗ҆ви́лсѧ є҆сѝ, і҆рина́рше, побѣ́ды по́чєсти ѿ негѡ̀ прїе́млѧ.

Возвы́сивсѧ любо́вїю вседержи́телевою, гони́телей вознесе́ннꙋю горды́ню низложи́лъ є҆сѝ, и҆ і҆́дѡльское смири́лъ є҆сѝ киче́нїе, мꙋ́чениче страстоте́рпче і҆рина́рше всебл҃же́нне.

Милосе́рдїѧ мѧ̀ бжⷭ҇твеннагѡ, мꙋ́чениче, сподо́би, и҆скꙋше́нїй и҆ бѣ́дъ и҆збавлѧ́ѧ, вѣ́рою тѧ̀ те́плою чтꙋ́щаго, і҆рина́рше, и҆ подъ покро́въ тво́й прибѣга́ющагѡ.

Бг҃оро́диченъ: Ра́дꙋйсѧ, ст҃а́ѧ горо̀ и҆ бг҃опрохо́днаѧ неизрече́нныхъ веще́й: ра́дꙋйсѧ, ꙗ҆вле́нїе и҆ слы́шанїе стра́шное, неꙋдобови́димое видѣ́нїе: ра́дꙋйсѧ, па́дшихъ воззва́нїе, дв҃о.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно. є҆го́же велича́юще, съ нбⷭ҇ными вѡ́и тѧ̀ ᲂу҆бл҃жа́емъ.

Са́мое послѣ́днее и҆ кра́йнѣйшее жела́нїй пости́глъ є҆сѝ, бг҃омꙋ́дре і҆рина́рше, и҆ прича́стїемъ бг҃ъ бы́лъ є҆сѝ, поѧ̀ съ безтѣле́сными: ст҃ъ, ст҃ъ, ст҃ъ, трⷪ҇це вседѣ́тельнаѧ и҆ всеси́льнаѧ.

И҆збѣ́гъ сѣ́тей ловѧ́щихъ тѧ̀, ко гнѣздꙋ̀ нбⷭ҇номꙋ воспочи́лъ є҆сѝ, сла́вне, и҆ мꙋ́ченикѡвъ совокꙋпи́лсѧ є҆сѝ во́инствѡмъ, съ тобо́ю сострада́вшими. тѣ́мже чти́мъ па́мѧть ва́шꙋ, прера́достнѡ торжествꙋ́юще.

Крѣ́пость и҆ си́лꙋ хрⷭ҇та̀ полага́ѧ, лю́тꙋю мꙋ́къ преплы́въ пꙋчи́нꙋ, и҆ вы́шнѧгѡ приста́нища дости́глъ є҆сѝ, ве́сь ᲂу҆кра́шенъ, ве́сь дх҃а свѣтоли̑тїи ѻ҆би́льнѡ ѡ҆блива́емь.

Бг҃оро́диченъ: Разꙋмѣ́ти чꙋ́до непости́жное ржⷭ҇тва̀ твоегѡ̀, дв҃о мт҃и, не могꙋ́ще, молча́нїемъ сїѐ па́че сла́вимъ: и҆ тебѐ славосло́вимъ всеблаже́ннꙋю є҆ди́нꙋ, и҆ до́брꙋю въ жена́хъ, ѽ всенепоро́чнаѧ!