Канон святому мученику Евдоксию Мелитинскому

Пѣ́снь а҃.

І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.

И҆̀же сла́вы жела́юще страда́льческїѧ, прїиди́те восхва́лимъ вели́каго во страда́льцѣхъ є҆ѵдоѯі́а всѝ, въ кѷмва́лѣхъ дв҃дски торжествꙋ́юще.

И҆зы́де повелѣ́нїе нечести́вое въ ве́сь мі́ръ, не слꙋжи́ти живо́мꙋ бг҃ꙋ, но і҆́дѡлѡмъ: ты́ же, мч҃ниче, нбⷭ҇номꙋ бг҃ꙋ твоемꙋ̀ слꙋжи́лъ є҆сѝ.

Тезоимени́те, сло́во благочести́выхъ є҆ѵдоѯі́е мꙋ́чениче, и҆сповѣ́далъ є҆сѝ хрⷭ҇та̀ бг҃а сꙋ́ща безнача́льна посредѣ̀ сꙋде́й непра́ведныхъ ᲂу҆ѧзвлѧ́ющихъ тѧ̀.

Бг҃оро́диченъ: Чи́ни тѧ̀ а҆́гг҃лъ и҆ человѣ̑къ, мт҃и безневѣ́стнаѧ, хва́лѧтъ непреста́ннѡ: зижди́телѧ бо и҆́хъ, ꙗ҆́кѡ младе́нца на рꙋка́хъ твои́хъ носи́ла є҆сѝ.

Пѣ́снь г҃.

І҆рмо́съ: Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Ꙗ҆́коже а҆́гнецъ на заколе́нїе приве́лсѧ є҆сѝ, є҆ѵдоѯі́е мч҃ниче, не прерѣкꙋ́ѧ, ни вопїѧ̀, всебл҃же́нне, ᲂу҆чи́телѧ твоегѡ̀, хрⷭ҇та̀, житїѐ подража́ѧ, и҆ сегѡ̀ ра́ди сла́вꙋ прїѧ́лъ є҆сѝ безконе́чнꙋю.

І҆́дѡльскимъ слꙋжи́телємъ, страда́льче, возглаша́лъ є҆сѝ: бг҃ъ мо́й живе́тъ во вѣ́ки: ва́ши же бо́зи дѣла̀ рꙋ́къ человѣ́ческихъ сꙋ́ть, па́дше не востаю́тъ, и҆стꙋка́нни сꙋ́ще, бездꙋ́шнїи.

Хи́трѡсти вра̑жїѧ низложи́лъ є҆сѝ, страда́льче, ᲂу҆тве́рждь тво́й ᲂу҆́мъ на ка́мени цр҃кве хрⷭ҇то́вы, тѣ́мъ и҆ взыва́лъ є҆сѝ: жи́знь тлѣ́ннꙋю ѡ҆ставлѧ́ю за сꙋ́щꙋю вѣ́чнꙋю жи́знь.

Бг҃оро́диченъ: Соприсносꙋ́щный ѻ҆ц҃ꙋ̀, и҆ сопресто́льный бг҃ъ сло́во, ѡ҆бнови́ти восхотѣ́въ родонача́льника, по ѵ҆поста́си того̀ и҆зъ тебє̀ чⷭ҇таѧ, воспрїѧ́ше, ст҃ѣ́йшꙋ всѣ́хъ тѧ̀, бг҃омт҃и, ѡ҆брѣ́тъ.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

Пре́лесть ѡ҆бличи́лъ є҆сѝ, нꙋ́дѧщихъ тѧ̀ ѿврещи́сѧ жи́зни безконе́чныѧ, и҆ жи́знь сꙋ́етнꙋю возлюби́ти.

Оу҆ранѧ́емь ра́довалсѧ є҆сѝ, закла́вшагѡсѧ ра́ди сло́ва пло́тїю ра́ди на́съ: мꙋчи́телємъ же взыва́лъ є҆сѝ: ꙗ҆́кѡ недостѡ́йна сꙋ́ть моѧ̑ страда̑нїѧ.

Бо́зи, и҆̀мже слꙋ́жите, ᲂу҆ста̀ и҆мꙋ́ще не вѣща́ютъ, є҆ѵдоѯі́е взыва́лъ є҆сѝ, и҆̀мже подо́бни да бꙋ́дꙋтъ творѧ́щїи ты́ѧ.

Бг҃оро́диченъ: Ѡ҆чище́нїе на́мъ да́рꙋй невѣ́дѣнїй, ꙗ҆́кѡ безгрѣ́шенъ, и҆ ᲂу҆мирѝ мі́ръ тво́й, бж҃е, моли́твами ро́ждшїѧ тѧ̀.

Пѣ́снь є҃.

І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою, тво́й ми́ръ пода́ждь на́мъ, чл҃вѣколю́бче.

Ты̀ моѧ̀ крѣ́пость, є҆ѵдоѯі́е, вопїѧ́лъ є҆сѝ, пло́тїю пострада́вый хрⷭ҇тѐ бж҃е, ᲂу҆твердѝ менѐ: се́ бо страждꙋ̀ мꙋ́чимь.

Ты̀ сокро́вище проше́нїй є҆сѝ хрⷭ҇тѐ бж҃е, не пре́зри менѐ, вопїѧ́лъ є҆сѝ въ мꙋ́кахъ, є҆ѵдоѯі́е терпѣливодꙋ́шне.

Меча̀ и҆ ѻ҆гнѧ̀ не бою́сѧ, є҆ѵдоѯі́й вопїѧ́ше къ мꙋчи́телю: се́ бо и҆́мамъ бг҃а крѣ́пость крѣ́пкꙋю, є҆мꙋ́же слꙋжꙋ̀.

Бг҃оро́диченъ: И҆сцѣлѝ, чⷭ҇таѧ, страсте́й мои́хъ неможе́нїе, посѣще́нїѧ твоегѡ̀ ᲂу҆досто́ивши, и҆ здра́вїе мольба́ми твои́ми пода́ждь мѝ.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Ни ме́чь, нижѐ ѻ҆́гнь разлꙋчи́тъ мѧ̀ любвѐ хрⷭ҇то́вы: ва̑ша же прещє́нїѧ ꙗ҆́кѡ дѣ̑тскаѧ глꙋмлє́нїѧ вмѣнѧ́ю, є҆ѵдоѯі́е, вопїѧ́лъ є҆сѝ вѣ́рою, жре́ти принꙋжда́ющымъ.

Ѻ҆́нагѡ ᲂу҆жаса́юсѧ ѻ҆гнѧ̀ негаси́магѡ мꙋ́чащагѡ, жи́зни же жела́ю неѿе́млемыѧ, мꙋчи́телю є҆ѵдоѯі́е, взыва́лъ є҆сѝ: сѐ тѣ́ло ᲂу҆ѧзвлѧ́й, не слꙋжꙋ̀ і҆́дѡлѡмъ твои̑мъ.

Бо́зи, и҆̀мже ты̀ кла́нѧешисѧ, сребро̀ и҆ зла́то сꙋ́ть, ᲂу҆ста̀ и҆́мꙋтъ, и҆ не глаго́лютъ: ᲂу҆́ши, не слы́шатъ: но́ги, не хо́дѧтъ: мо́й же бг҃ъ вседѣ́тель є҆́сть, взыва́лъ є҆сѝ.

Бг҃оро́диченъ: Да и҆зба́вимсѧ лю́тыхъ прегрѣше́нїй, моли́твами твои́ми, бг҃ороди́тельнице чⷭ҇таѧ, и҆ да ᲂу҆лꙋчи́мъ прест҃а́ѧ бжⷭ҇твенное сїѧ́нїе, и҆зъ тебє̀ неизрече́ннѡ воплоще́ннагѡ сн҃а бж҃їѧ.

Сѣда́ленъ, гла́съ и҃:

Нбⷭ҇ное бога́тство собра́въ, и҆ ни́щымъ сїѐ прине́съ, расточи́лъ є҆сѝ, и҆ да́лъ є҆сѝ а҆́лчꙋщымъ хлѣ́бъ тво́й: и҆ сегѡ̀ ра́ди жи́знь нетлѣ́ннꙋю стѧжа́въ, хрⷭ҇то́вымъ и҆сповѣ́данїемъ просїѧ́лъ є҆сѝ: тѣ́мже мꙋ́жествовавъ, и҆ зако́ннѡ пострада́въ, вѣне́цъ прїѧ́лъ є҆сѝ ѿ бг҃а трꙋдѡ́въ твои́хъ, страстоте́рпче є҆ѵдоѯі́е, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чествꙋ́ющымъ любо́вїю свѧтꙋ́ю па́мѧть твою̀.

Пѣ́снь з҃.

І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, благослове́нъ є҆сѝ.

Ѻ҆трокѡ́въ поревнова́въ терпѣ́нїю, є҆ѵдоѯі́е премꙋ́дре, ѻ҆́бразꙋ ле́стномꙋ не поклони́лъ є҆сѝ колѣ́нъ, но взыва́лъ є҆сѝ вѣ́рою те́плою: ѻ҆тцє́въ на́шихъ, бж҃е бл҃гослове́нъ є҆сѝ.

По́мощь стѧжа́въ непобѣ́днꙋю бл҃года́ти, мч҃ниче є҆ѵдоѯі́е, тве́рдѡ ѡ҆полчє́нїѧ вра̑жїѧ низложи́лъ є҆сѝ, и҆ побѣди́въ взыва́лъ є҆сѝ: ѻ҆тцє́въ на́шихъ бж҃е бл҃гослове́нъ, є҆сѝ.

Распала́емь мч҃ниче, любо́вїю бжⷭ҇твеннагѡ жела́нїѧ, є҆ѵдоѯі́е, пристра́стїѧ привре́меннагѡ ꙗ҆́вѣ возгнꙋша́лсѧ є҆сѝ, возме́здїе прїе́млѧ, и҆ взыва́лъ є҆сѝ: ѻ҆тцє́въ на́шихъ бж҃е, бл҃гослове́нъ є҆сѝ.

Бг҃оро́диченъ: Ле́стїю па́дшаго восхотѣ́въ ѡ҆бнови́ти пребл҃гі́й бг҃ъ, ѿ дв҃ы воплоща́етсѧ и҆ ражда́етсѧ, и҆ ѡ҆божа́етъ человѣ́чество.

Пѣ́снь и҃.

І҆рмо́съ: Седмери́цею пе́щь халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею, спасе́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Ꙗ҆́звъ пꙋчи́нꙋ преплы́лъ є҆сѝ, сла́вне, и҆ въ приста́нище жи́зни дости́глъ є҆сѝ, є҆ѵдоѯі́е, вѣне́цъ терпѣ́нїѧ прїе́мъ, и҆ со а҆́гг҃лы немо́лчнѡ зове́ши: дѣ́ти, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Сквозѣ̀ ѻ҆́гнь и҆ во́дꙋ проше́дша, бл҃же́нне, въ поко́й тѧ̀ хрⷭ҇то́съ и҆зведѐ, въ не́мже ра́дꙋѧсѧ со а҆́гг҃лы, мч҃ниче мꙋ́дре, пое́ши немо́лчнѡ трⷪ҇цѣ пѣ́снь: дѣ́ти, бл҃гослови́те, свѧще́нницы воспо́йте, лю́дїе превозноси́те во всѧ̑ вѣ́ки.

Ты̀ мы́сленнаго погꙋби́лъ є҆сѝ ѕмі́ѧ, по́мощїю нбⷭ҇нагѡ цр҃ѧ̀ сла́вне, и҆ побѣ́ды вѣне́цъ терпѣ́нїѧ прїе́мъ, со безпло́тными немо́лчнѡ взыва́еши: дѣ́ти бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Трⷪ҇ченъ: Трисвѣ́тлое бжⷭ҇тво̀ во є҆ди́ной сїѧ́ющее зарѝ, ѿ є҆ди́нагѡ трїѷпоста́снагѡ є҆стества̀, роди́телѧ безнача́льна, є҆диноесте́ственна же сло́ва ѻ҆ц҃ꙋ̀, и҆ сца́рствꙋющаго є҆диносꙋ́щнаго дх҃а, ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ не́бо, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.

Оу҆страши́шасѧ а҆́гг҃льскаѧ вѡ́инства, и҆ человѣ́честїи собо́ри ᲂу҆диви́шасѧ, ꙗ҆́кѡ тлѣ́нно є҆стество̀ страда́льче и҆мѣ́ѧ, и҆ те́чное, безплѡ́тныѧ де́мѡны показа́лъ є҆сѝ ѻ҆каѧ́нны и҆ не́мощны, и҆ вѣ́рою трⷪ҇цѣ, взыва́лъ є҆сѝ, слꙋжа̀: трисїѧ́нный свѣ́те, ты̀ є҆сѝ сла́ва моѧ̀.

Бл҃же́нъ ты̀ мч҃ниче, въ ро́ды родѡ́въ просла́вивсѧ є҆ѵдоѯі́е, ꙗ҆́кѡ пло́ти ника́коже пощадѣ́въ хрⷭ҇та̀ ра́ди, но мꙋ́ки претерпѣ́лъ є҆сѝ, и҆ не поклони́лсѧ є҆сѝ и҆стꙋка̑ннымъ. тѣ́мже тѧ̀ чи́ни а҆́гг҃льстїи, ѻ҆де́ждею нетлѣ́нїѧ ѡ҆дѣ́ѧвше, вѣнча́ша.

Вѣ́рою соверша́ющихъ, мч҃ниче, страда́нїй твои́хъ па́мѧть, є҆ѵдоѯі́е, къ бг҃ꙋ твои́ми моли́твами, ѿ всѧ́кагѡ навѣ́та вра́жїѧ и҆схитѝ, да не похва́литсѧ на ны̀: ꙗ҆́кѡ мч҃никъ бо мо́жеши, прїе́мъ ѿ вы́шнѧгѡ страда́нїй воздаѧ́нїе.

Бг҃оро́диченъ: Ꙗ҆ви́ласѧ є҆сѝ, ѽ дв҃о мт҃и бж҃їѧ, па́че є҆стества̀ ро́ждши пло́тїю бг҃а сло́ва: є҆го́же ѻ҆ц҃ъ ѿ се́рдца своегѡ̀ ѿры́гне, пре́жде всѣ́хъ вѣкѡ́въ ꙗ҆́кѡ бл҃гъ, є҆го́же ны́нѣ и҆ тѣле́съ превы́шша разꙋмѣва́емъ, а҆́ще и҆ въ тѣ́ло ѡ҆блече́сѧ.