Канон святому мученику Диомиду Тарсянину, Никейскому

Пѣ́снь а҃.

І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.

Свѣ́томъ ѡ҆зарѧ́емь трисо́лнечнымъ, разрѣшѝ мра́къ, бл҃же́нне, неразꙋ́мїѧ моегѡ̀: ꙗ҆́кѡ да воспою̀ свѣтоно́снꙋю твою̀ па́мѧть, и҆ и҆справле́нїе житїѧ̀ твоегѡ̀.

Страсте́й непрїѧ́тенъ по́мыслъ содѣ́лавъ, прїѧ́телище, сла́вне, ꙗ҆ви́лсѧ є҆сѝ дх҃а, и҆ и҆сточи́лъ є҆сѝ и҆сцѣле́нїй пꙋчи́нꙋ, всю̀ потоплѧ́ющꙋю недꙋ́гѡвъ скве́рнꙋ.

Жи́зни жела́ѧ безконе́чныѧ, ча́шꙋ сме́ртнꙋю, прехва́льне, и҆спи́ти потща́лсѧ є҆сѝ, ю҆́же и҆ полꙋчи́лъ є҆сѝ, ꙗ҆́коже вѣ́сть зва́вый тѧ̀ къ вѣнцꙋ̀ неꙋвѧда́ющемꙋ, мꙋ́чениче непобѣди́мый.

Бг҃оро́диченъ: Гра́де ѡ҆дꙋшевле́нный цр҃ѧ̀, всенепоро́чнаѧ, стра́нное рождество̀ и҆ бжⷭ҇твенное ᲂу҆спе́нїе показа́вшаѧ, гра́дъ тво́й ѿ всѧ́кагѡ трꙋ́са и҆ паде́нїѧ, покажѝ невреди́мь.

Пѣ́снь г҃.

І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Неизглаго́ланнымъ и҆ бжⷭ҇твеннымъ рꙋкодѣ́йствомъ ѡ҆чища́ѧ стра̑сти человѣ́кѡвъ, ѿ бг҃а дарова́лсѧ є҆сѝ вѣ̑рнымъ вра́чь и҆зрѧ́денъ, и҆ моли́твенникъ те́плъ, тѧ̀ чтꙋ́щымъ, пребога́те.

Въ пꙋ́ть свидѣ́нїй твои́хъ текꙋ̀, и҆ твое́й подо́бѧсѧ стра́сти во́льнѣй, мꙋ́ченикъ взыва́ше, на заколе́нїе влеко́мь, къ тебѣ̀ є҆ди́номꙋ бг҃ꙋ на́шемꙋ.

Сла́вный мꙋ́ченикъ дїоми́дъ, на́съ созва́въ та́йнѡ на трапе́зꙋ дне́сь, предлага́етъ страда̑нїѧ своѧ̑ ꙗ҆́коже бра́шно невеще́ственное, вѣ́рнїи, прїиди́те, наслади́мсѧ.

Бг҃оро́диченъ: Гра́дъ тво́й се́й, ѿ всѧ́кагѡ трꙋ́са и҆ паде́нїѧ, чⷭ҇таѧ, ꙗ҆́кѡ на тѧ̀, бг҃облагода́тнаѧ, возложе́нъ є҆́сть, и҆зба́ви, и҆ въ ми́рѣ сохранѝ и҆ є҆диномы́слїи, бг҃оневѣ́сто.

Сѣда́ленъ, гла́съ д҃.

Дарѡ́въ бжⷭ҇твенныхъ и҆спо́лненъ, дꙋ́шъ показа́лсѧ є҆сѝ вра́чь и҆ тѣле́съ, и҆ мꙋ́ченическимъ благосла́вїемъ ѡ҆богати́всѧ ꙗ҆́вѣ, ра́дꙋѧсѧ прише́лъ є҆сѝ ко ѻ҆би́телемъ присноживѡ́тнымъ. тѣ́мже свѧтꙋ́ю твою̀ пра́зднꙋюще па́мѧть, взыва́емъ: помѧнѝ на́съ тѧ̀ чтꙋ́щихъ, бг҃омꙋ́дре и҆ пребога́те.

Пѣ́снь д҃.

І҆рмо́съ: Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.

Сло́во бжⷭ҇твеннагѡ ра́зꙋма, ꙗ҆́кѡ рѣкꙋ̀ носѧ̀ въ се́рдцы, потопѝ пре́лести пото́ки, и҆ і҆́дѡльскꙋю крѣ́пость до конца̀ погрꙋзѝ мꙋ́ченикъ дїоми́дъ сла́вный.

Возсїѧ̀ ꙗ҆́кѡ со́лнце на землѝ, заре́ю добродѣ́телей, и҆ чꙋде́съ бога́тствомъ, и҆ просвѣтѝ вѣ́рныхъ правосла̑вныѧ собо́ры, мꙋ́ченикъ дїоми́дъ всемꙋ́дрый.

Врачевство̀ безме́здно тво́й хра́мъ, всѣ̑мъ вѣ́рою притека́ющымъ ꙗ҆ви́сѧ, пребл҃же́нне, и҆ забра́ло тве́рдо ца́рскомꙋ гра́дꙋ, ᲂу҆пражнѧ́ѧ нашє́ствїѧ и҆ноплеме́нныхъ вра̑гъ.

Бг҃оро́диченъ: Стра́нно твоѐ ржⷭ҇тво̀, ꙗ҆́кѡ и҆ честно́е ᲂу҆спе́нїе показа́сѧ, пренепоро́чнаѧ, бл҃гослове́ннаѧ: є҆́же гра́дъ тво́й почита́етъ, и҆ноплеме́нныхъ и҆збѣга́ѧ вре́дѡвъ, те́плымъ твои́мъ предста́тельствомъ.

Пѣ́снь є҃.

І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Ꙗ҆ви́лсѧ є҆сѝ безъ кро́ве мꙋ́ченикъ досточꙋ́денъ, безъ болѣ́зней вѣне́чникъ, безъ ꙗ҆́звъ побѣди́тель и҆зрѧ́денъ, полкѝ врагѡ́въ низлага́ѧ твои́ми пѡ́двиги, дїоми́де блаже́нне.

Свѣ́тъ тебѣ̀ возсїѧ̀ сꙋ́щꙋ пра́веднꙋ неꙋгаси́мый, сегѡ́ же сꙋпрꙋ́гъ, бг҃омꙋ́дре, тебѣ̀ весе́лїе послѣ́дова, ꙗ҆́кѡ пра́вꙋ и҆мꙋ́щꙋ дꙋ́шꙋ, всѣ̑мъ послѣ́дꙋющꙋ сп҃са повелѣ́нїємъ.

Свѣ́та лиша́ютсѧ ᲂу҆́бѡ тѣле́снагѡ мꙋчи́тели, твою̀ главꙋ̀ по кончи́нѣ ѿсѣ́кшїи: но дꙋше́внїи свѣтоза́рнѡ зѣ̑ницы ѿверза́ютсѧ, хрⷭ҇тꙋ̀ вѣ́рою пристꙋ́пльше, дїоми́де чꙋ́дный.

Бг҃оро́диченъ: Забра́ло и҆мѣ́ѧ ца́рскїй гра́дъ, тѧ̀ цр҃и́цꙋ и҆ гпⷭ҇жꙋ̀, побѣжда́етъ ва́рварѡвъ ѕвѣри́на стремлє́нїѧ, и҆збавлѧ́етсѧ всѧ́кихъ напа́стей, расте́тъ и҆ ᲂу҆твержда́етсѧ, бг҃ома́ти всенепоро́чнаѧ.

Пѣ́снь ѕ҃.

І҆рмо́съ: Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Твои́хъ пѡ́двигъ тече́нїемъ погрꙋзи́лъ є҆сѝ врага̀ безпло́тнаго, и҆ чꙋде́съ твои́хъ и҆сточе́нїемъ ѡ҆мыва́еши страсте́й многови̑дныѧ сквє́рны, досточꙋ́дне.

Бжⷭ҇твенными дыха̑нїи дви́жимь, вы́шнимъ манове́нїемъ ѡ҆кормлѧ́емь, къ ти́хомꙋ приста́нищꙋ пра́вѣ дости́глъ є҆сѝ, ѡ҆ на́съ моли́сѧ, мꙋ́чениче прехва́льне.

Страсте́й па̑жити потреблѧ́ютсѧ неизглаго́ланнымъ рꙋкодѣ́йствїемъ твои́мъ, сла́вне, и҆ ѿгонѧ́етсѧ по́лкъ де́мѡнскїй бжⷭ҇твеннымъ твои́мъ предста́тельствомъ мꙋ́чениче присноблаже́нне.

Бг҃оро́диченъ: Ѡ҆ тебѣ̀, дв҃о, хва́лимсѧ, тобо́ю ѿ вра̑гъ и҆збавлѧ́емсѧ, надѣ́ѧнїемъ твои́мъ наше́ствїѧ не ᲂу҆бои́мсѧ вра̑гъ и҆ноплеме́нныхъ, воспѣва́ющїи тѧ̀.

Конда́къ, гла́съ в҃.

И҆́стинный и҆ непобѣди́мый страстоте́рпецъ, благоче́стїѧ и҆ благода́ти нбⷭ҇ный таи́нникъ ꙗ҆́вльсѧ, дїоми́де пресла́вне, побѣди́въ мꙋчи́телѧ, и҆ побѣдоно́сецъ бы́въ, вѣнцы̑ побѣ́дными просла́висѧ.

Пѣ́снь з҃.

І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Ѿсѣ́чена бы́вши глава̀ твоѧ̀, свѣ́тъ ѡ҆блиста̀ сꙋемꙋ̑дрымъ, ю҆́же ꙗ҆́кѡ жи́вꙋ ви́дѣвъ, ᲂу҆стыдѣ́сѧ мꙋчи́тель, ᲂу҆мерщвле́нъ ᲂу҆мо́мъ, не разꙋмѣ́ же вопи́ти, пресла́вне: бж҃е, бл҃гослове́нъ є҆сѝ.

Совле́клсѧ є҆сѝ ᲂу҆мерщвле́нїѧ, сла́вне, ри́зы ѕлоѻбра́зныѧ, въ безсме́ртїѧ ѻ҆де́ждꙋ краснꙋ̀ благода́тїю ѡ҆бле́клсѧ. тѣ́мже влⷣцѣ твоемꙋ̀ вопїе́ши ра́дꙋѧсѧ: бж҃е, бл҃гослове́нъ є҆сѝ.

Ѻ҆гне́мъ терпѣ́нїѧ попали́лъ є҆сѝ ве́щнꙋю ле́сть врагѡ́въ: бг҃осїѧ́нна же ѕвѣзда̀ ꙗ҆ви́лсѧ є҆сѝ и҆сцѣле́нїй, мꙋ́чениче, ѡ҆блиста́ѧ лꙋчѝ зовꙋ́щымъ: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: Цр҃и́ца мі́ра ро́ждшаѧ цр҃ѧ̀ хрⷭ҇та̀, и҆зба́ви тлѝ и҆ трꙋ́са, и҆ ꙗ҆зы̑къ наи́тїѧ, ца́рствꙋющїй гра́дъ, влⷣчце, бл҃гослове́нъ, пою́щїй, пло́дъ чре́ва твоегѡ̀.

Пѣ́снь и҃.

І҆рмо́съ: Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть. тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Но́ги честны̑ѧ твоѧ̑, страстоте́рпче, ко стезѧ́мъ мꙋче́нїѧ напра́вишасѧ: хо́дѧтъ же ны́нѣ ра́дꙋющесѧ во странѣ̀ живꙋ́щихъ, премꙋ́дре въ ра́йстѣй пи́щи. тѣ́мже и҆ соше́дшесѧ чти́мъ, воспѣва́юще хрⷭ҇та̀ во вѣ́ки.

И҆сплете́сѧ тебѣ̀ вѣне́цъ нетлѣ́нїѧ, тве́рдѡ подви́гшꙋсѧ и҆ побѣди́вшꙋ ѕмі́ѧ ѕлонача́льнаго, мꙋ́чениче достохва́льне, и҆ страда́льческїй ли́къ тѧ̀ прїѧ́тъ, гдⷭ҇а по́йте, вопїю́ща, и҆ превозноси́те є҆го̀ во вѣ́ки.

Чꙋде́съ и҆спꙋща́еши лꙋчѝ, бжⷭ҇твенною ѡ҆дѣ́ѧнъ, мꙋ́чениче, си́лою, ᲂу҆ставлѧ́еши болѣ̑зни, рѣши́ши недꙋ́ги, ѿгонѧ́еши дꙋ́хи лꙋка̑выѧ, вопїѧ̀: гдⷭ҇а по́йте дѣла̀, и҆ превозноси́те є҆го̀ во вѣ́ки.

Бг҃оро́диченъ: Мно́гими прилѡ́ги грѣхо́вными преклоне́ни, къ твоемꙋ̀ непрекло́нномꙋ покро́вꙋ прибѣга́емъ: ᲂу҆твердѝ рабы̑ твоѧ̑, на стра̑сти ᲂу҆крѣпѝ, и҆ ѿ трꙋ́са и҆ гла́да и҆ ꙗ҆зы̑къ наше́ствїѧ, дв҃о, и҆зба́ви твоѐ ста́до, ꙗ҆́кѡ на тѧ̀ возложе́но є҆́сть.

Пѣ́снь ѳ҃.

І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всеблаже́ннаѧ бцⷣе, чⷭ҇таѧ приснодв҃о.

Ѡ҆брѣ́лъ є҆сѝ возме́здїе трꙋдѡ́въ горѣ̀ тебѣ̀ ᲂу҆гото́вльшꙋюсѧ пи́щꙋ, и҆дѣ́же водворѧ́ѧсѧ, ᲂу҆кра́шенъ мꙋ́ченическими добро́тами, наслажда́ешисѧ зижди́телѧ твоегѡ̀ красоты̀, просѧ̀, мꙋ́чениче, чтꙋ́щымъ тѧ̀ ѡ҆чище́нїѧ и҆ ѕѡ́лъ и҆збавле́нїѧ.

Сто́лпъ добродѣ́телей, и҆ вѣ́ры ᲂу҆твержде́нїе, забра́ло недви́жимо, и҆ стѣна̀ непреклони́ма, показа́лсѧ є҆сѝ, мꙋ́чениче, цр҃кви хрⷭ҇то́вѣ, и҆ рѣка̀ и҆сцѣле́нїй, и҆сточа́ѧ то́ки врачева́нїѧ безме́здна любо́вїю творѧ́щымъ твою̀ па́мѧть, пресла́вне.

Ѿгна́лъ є҆сѝ ѿ землѝ і҆́дѡльское безбо́жїе, потреби́лъ є҆сѝ мглꙋ̀, и҆ къ невече́рнѣй зарѝ приложи́лсѧ є҆сѝ свѣтонача́льныѧ жи́зни, є҆ѧ́же ꙗ҆вле́нїѧ, сла́вне, пе́рвѣе стѧжа́лъ є҆сѝ, ѿѻнꙋ́дными сїѧ̑нїи ѡ҆зарѧ́емь, и҆ ра́дости присносꙋ́щныѧ и҆сполнѧ́ѧсѧ.

Бг҃оро́диченъ: Гра́де бж҃їй, въ ѻ҆́ньже са́мъ всели́сѧ, вои́стиннꙋ непоколеби́мый, и҆зба́ви ста́до твоѐ трꙋ́са, дв҃о, и҆ паде́нїѧ, ва́рварскагѡ плѣне́нїѧ, ѻ҆гнѧ̀ и҆ меча̀ врагѡ́въ, ѿ всѧ́кагѡ, пречⷭ҇таѧ, ѡ҆ѕлобле́нїѧ, те́плымъ ко хрⷭ҇тꙋ̀ предста́тельствомъ твои́мъ.