Канон святому мученику Анастасию Персянину

Пѣ́снь а҃.

І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Оу҆́тромъ свѣтлѣ́йшимъ твоегѡ̀, хрⷭ҇тѐ, воста́нїѧ ѡ҆сїѧва́емь, сегѡ̀ тезоимени́тый, ѿ восто́ка ᲂу҆стреми́всѧ ꙗ҆́кѡ со́лнце, ны́нѣ цр҃ковь ѡ҆зарѧ́етъ чꙋдесы̀.

Бж҃е́ственныѧ любвѐ и҆спо́лненъ, терпѣли́внѡ мꙋ́ки претерпѣ́лъ є҆сѝ, мꙋ́чениче а҆наста́сїе: и҆ хрⷭ҇тꙋ̀ по́стническими ᲂу҆кра́шенъ добро́тами, ра́дꙋѧсѧ приве́лсѧ є҆сѝ, благово́ннаѧ же́ртва, бл҃же́нне.

Бг҃оро́диченъ: Ра́дꙋйсѧ, благода́ти и҆сто́чниче, ра́дꙋйсѧ, лѣ́ствице и҆ две́ре нбⷭ҇наѧ, ра́дꙋйсѧ, свѣ́щниче и҆ ста́мно злата́ѧ, и҆ горо̀ несѣко́маѧ, ꙗ҆́же жизнода́вца хрⷭ҇та̀ мі́рꙋ ро́ждшаѧ.

Пѣ́снь г҃.

І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.

Стезю̀ ше́ствовавъ тѣ́снꙋю, пе́рвѣе ᲂу҆́бѡ поще́нїемъ, къ мꙋ́ченической сла́вѣ пред̾ꙋспѣ́лъ є҆сѝ, мꙋче́нїѧ ра́ди наслажде́нїе ѡ҆брѣ́тъ болѣ́зньми, сла́вне мч҃ниче а҆наста́сїе, небе́снꙋю красотꙋ̀ прїе́млѧ.

Болѣ́знь страда́нїѧ твоегѡ̀ во всю̀ и҆зы́де вселе́ннꙋю, мꙋ́чениче непобѣди́ме: проти́вꙋ бо грѣха̀ да́же до кро́ве сопроти́вивсѧ, побѣдоно́сецъ бы́лъ є҆сѝ, и҆ вѣнце́мъ побѣ́ды ᲂу҆краси́лсѧ є҆сѝ.

Бг҃оро́диченъ: И҆зъ тебє̀ прозѧбѐ, чⷭ҇таѧ, цвѣ́тъ неꙋвѧда́емый, бл҃гоꙋха́ющїй всѐ человѣ́чество бжⷭ҇твеннымъ мѵ́ромъ є҆стества̀ своегѡ̀, и҆́же ѻ҆ц҃ꙋ̀ собезнача́льный, и҆ и҆зъ тебє̀ бы́въ подъ лѣ́томъ, дв҃о всенепоро́чнаѧ.

Сѣда́ленъ, гла́съ д҃.

Сла́вою соверше́нства ꙗ҆ви́лсѧ є҆сѝ прече́стенъ, ꙗ҆́кѡ бж҃е́ственными просвѣти́въ свѣтозарє́нїи ᲂу҆́мъ, и҆ позна́въ креста̀ крѣ́пость: преподо́бенъ посто́мъ, и҆ кровьмѝ мꙋ́ченикъ бы́лъ є҆сѝ бг҃омꙋ́дреннѣ, а҆наста́сїе блаже́нне: тѣ́мже и҆ чꙋде́съ тобо́ю то́читъ да́ръ хрⷭ҇то́съ.

Бг҃оро́диченъ: Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Крⷭ҇тобг҃оро́диченъ: На крестѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ, жи́знь всѣ́хъ, вкꙋша́еши сме́рть, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ.

Пѣ́снь д҃.

І҆рмо́съ: Го́рꙋ тѧ̀, благода́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.

Ничто́же тѧ̀ сꙋ́щїѧ ко хрⷭ҇тꙋ̀ любвѐ ѿлꙋчѝ, ни ᲂу҆дѡ́въ ѿсѣче́нїе, ни ра́нъ преще́нїе, ни ме́чь, ни сме́рть, но нижѐ ѻ҆́гнь, нижѐ гла́дъ, а҆наста́сїе, нбⷭ҇нагѡ ликова́нїѧ кꙋпносе́льниче.

Со ᲂу҆се́рдїемъ на ра́мо кре́стъ тво́й взе́мъ, послѣ́довалъ є҆сѝ хрⷭ҇тѡ́вымъ спаси́тєльнымъ за́повѣдемъ: и҆ сегѡ̀ бы́въ подража́тель да́же до сме́рти, всеизрѧ́днѣйше, ны́нѣ наслажда́ешисѧ тогѡ̀ свѣ́тлости.

Бг҃оро́диченъ: Ра́дость тебѣ̀ ꙗ҆́вѣ съ нб҃сѐ прише́дъ а҆рхїстрати́гъ, чⷭ҇таѧ, благовѣстѝ, ре́къ: бг҃ъ и҆зы́детъ съ пло́тїю и҆зъ тебє̀, дв҃о всечи́стаѧ, во спасе́нїе любо́вїю пою́щихъ тѧ̀.

Пѣ́снь є҃.

І҆рмо́съ: Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Дре́вле хвалѧ́йсѧ безмѣ́рнѡ, и҆ зе́млю претѧ̀ ѡ҆б̾ѧ́ти, и҆ всꙋ́е гордѧ́сѧ мо́ре, мꙋ́дре, всѐ потреби́ти, твои́ми благомꙋ́жествы, а҆наста́сїе мч҃ниче, попира́етсѧ бг҃опроти́вный.

Зако́ннѡ пострада́въ мч҃никъ хрⷭ҇то́въ, и҆ побѣди́въ, страда̑нїи возмє́здїѧ, чꙋде́съ дѣ́йство прїе́млетъ ꙗ҆́вѣ: недꙋ́ги бо цѣли́тъ и҆ де́мѡны ѿгонѧ́етъ, хрⷭ҇то́вою си́лою чꙋдодѣ́йствꙋѧ а҆наста́сїй.

Бг҃оро́диченъ: Проклѧ́тїе є҆́ѵы, всѣ́хъ мт҃ре, твои́мъ ржⷭ҇тво́мъ, дв҃о, ᲂу҆праздни́ла є҆сѝ, мі́рꙋ благослове́нїе и҆зрасти́вши хрⷭ҇та̀: тѣ́мъ тѧ̀ ра́дꙋющесѧ, и҆ ᲂу҆сты̀ и҆ ѧ҆зы́комъ бцⷣꙋ вои́стиннꙋ и҆сповѣ́дающе велича́емъ.

Пѣ́снь ѕ҃.

І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. Є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Заре́ю кре́стною ꙗ҆́вѣ просвѣща́емь, пре́лести мра́къ разрѣши́лъ є҆сѝ, и҆ побѣди́лъ є҆сѝ спле́тсѧ съ мꙋчи́телемъ, всесла́вне: и҆ ра́дꙋѧсѧ прїѧ́лъ є҆сѝ твоѧ̑ побѣди́тєльнаѧ, мч҃ниче хрⷭ҇то́въ а҆наста́сїе, ликꙋ́ѧ съ мꙋ́ченическими во́инствы.

Бг҃оро́диченъ: Ве́сь ли́къ ѿ бг҃а наꙋче́нъ прⷪ҇ро́ческїй, твоѐ проречѐ та́инство несказа́ннагѡ и҆ бж҃е́ственнагѡ зача́тїѧ, є҆́же и҆зъ тебє̀ бж҃е́ственнагѡ сло́ва, мт҃и дв҃о: ты́ бо и҆́стиннѣйшїй и҆ дре́внїй совѣ́тъ ꙗ҆ви́ла є҆сѝ.

Конда́къ, гла́съ а҃.

Бж҃е́ственнагѡ ᲂу҆ченика̀ и҆ спꙋтеше́ственника па́ѵлова тїмоѳе́а, вѣ́рнїи, воспои́мъ всѝ: съ си́мъ почита́юще мꙋ́драго а҆наста́сїа, возсїѧ́вшаго ѿ персі́ды ꙗ҆́кѡ ѕвѣздꙋ̀, и҆ ѿгонѧ́щаго дꙋшє́вныѧ на́шѧ стра̑сти, и҆ недꙋ́ги тѣлє́сныѧ.

І҆́косъ:

Со́лнца мно́жае возсїѧ̀ лѣ́тнее ст҃ы́хъ торжество̀, и҆ вѣ̑рныѧ просвѣтѝ, и҆ де́мѡнскꙋю тмоѻбра́знꙋю си́лꙋ ѿгна̀ всю̀, и҆ недꙋ́ги ѡ҆чи́сти, и҆ прошє́нїѧ просѧ́щихъ и҆спо́лни. тѣ́мже притека́ю а҆́зъ ѻ҆каѧ́нный, и҆ молю́сѧ ѿ болѣ́зни стра́стнагѡ моегѡ̀ се́рдца, да прїимꙋ̀ ꙗ҆̀же хощꙋ̀, и҆ ѡ҆брѧ́щꙋ ꙗ҆̀же тре́бꙋю: премѣне́нїе печа́ли, и҆ житїѐ безпеча́льно, и҆ прегрѣше́нїй ѡ҆ставле́нїе, и҆ бж҃е́ственное врачева́нїе, дꙋше́вное и҆ тѣле́сное.

Пѣ́снь з҃.

І҆рмо́съ: Тебѐ ᲂу҆́мнꙋю, бцⷣе, пе́щь разсмотрѧ́емъ, вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆ц҃є́въ бг҃ъ и҆ препросла́вленъ.

Страда́лецъ вѣ̑рныѧ поꙋща́етъ, ꙗ҆́вѣ ѻ҆́бразъ показа́въ мꙋ́жество своѐ, бж҃е́ственнѣй ны́нѣ подража́ти стрⷭ҇ти во́льнѣй, ю҆́же за ны̀ претерпѣ̀ хва́льный ѻ҆ц҃є́въ бг҃ъ и҆ препросла́вленъ.

Равномо́щнаѧ трⷪ҇ца вѣ́рꙋетсѧ бл҃гоче́стїѧ рачи́телемъ: до́блїи бо страда́льцы за сїю̀ пострада́ша, крѡ́ви и҆злива́юще, мꙋ́ченически борю́щесѧ, и҆ дꙋ́шы предаю́ще ꙗ҆́вѣ, и҆ ᲂу҆бива́еми.

Бг҃оро́диченъ: Ра́дꙋйсѧ, чⷭ҇таѧ, и҆зъ тебє̀ про́йде па́стырь, и҆́же во а҆да́мовꙋ ко́жꙋ ѡ҆дѣ́ѧвсѧ, вои́стиннꙋ превозноси́мый, во всего́ мѧ человѣ́ка, за благоꙋтро́бїе непости́жное хва́льный ѻ҆ц҃є́въ бг҃ъ и҆ препросла́вленъ.

Пѣ́снь и҃.

І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀ ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Ѿ землѝ ты̀ къ нб҃сє́мъ вѣнцено́сецъ, мꙋ́чениче а҆наста́сїе, возлетѣ́лъ є҆сѝ, ле́сти всѧ́кїѧ де́мѡнскїѧ и҆збѣ́гъ, и҆ попра́лъ є҆сѝ і҆́дѡльскаѧ чти̑лища. тѣ́мже и҆ зове́ши ны́нѣ ра́дꙋѧсѧ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Ѡ҆мочи́лъ є҆сѝ мꙋ́ченическими твои́ми кровьмѝ твою̀ ѻ҆де́ждꙋ, пребога́те мꙋ́чениче: крⷭ҇тъ же ꙗ҆́кѡ ски́птръ носѧ̀, со хрⷭ҇то́мъ ца́рствꙋеши во вѣ́ки, а҆наста́сїе, є҆мꙋ́же ны́нѣ воспѣва́еши, ра́дꙋѧсѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Бг҃оро́диченъ: А҆рха́гг҃льскими пѣснослѡ́вїи сла́вимый бога́тное сло́во на́съ ра́ди ѡ҆бнища̀, тѧ̀ мт҃рь добро́тꙋ і҆а́кѡвлю, благослове́ннаѧ, и҆збра́въ. тѣ́мже воспѣва́юще пое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Пѣ́снь ѳ҃.

І҆рмо́съ: Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Стрꙋѧ́ми твои́хъ крове́й, сла́вне, і҆́дѡльскꙋю ле́сть всю̀ погаси́лъ є҆сѝ, и҆сполне́нїе же цр҃кве ᲂу҆ѧсни́лъ є҆сѝ, ѡ҆ не́йже молѧ́сѧ всеизрѧ́днѣйше не преста́й влⷣцѣ, да тѧ̀ всѝ блажи́мъ.

Ѽ па́че сло́ва сла́вы твоеѧ̀, и҆ неизрече́ннагѡ бжⷭ҇твеннагѡ вои́стиннꙋ ѡ҆сїѧ́нїѧ! є҆гѡ́же причасти́лсѧ є҆сѝ ꙗ҆́кѡ побѣди́тель, а҆наста́сїе, влⷣцѣ хрⷭ҇тꙋ̀ предстоѧ̀: є҆го́же и҆ ны́нѣ молѝ ѡ҆ на́съ, воспѣва́ющихъ тѧ̀.

Бг҃оро́диченъ: Ѽ стра́шнагѡ твоегѡ̀ чꙋдесѐ! ты́ бо, дв҃о бцⷣе, та́инство, пре́жде родѡ́въ и҆ пре́жде вѣкѡ́въ сокрове́нное въ бз҃ѣ, всѧ̑ созда́вшемъ, ро́ждши бг҃а сло́ва несказа́ннѡ, ꙗ҆ви́ла є҆сѝ.

Свѣти́ленъ.

Два̀ свѣти̑ла въ мі́рѣ сїѧ́ютъ свѣтоно́снѡ, тїмоѳе́й же вели́кїй въ хрⷭ҇то́выхъ а҆пⷭ҇толѣхъ и҆ а҆наста́сїй мч҃никъ во є҆диноѻбра́зныхъ, и҆̀хже восхва́лимъ вкꙋ́пѣ.

Бг҃оро́диченъ: Всѝ вѣ́рнїи тѧ̀ хода́таицꙋ, ко и҆зъ тебє̀ ны́нѣ ро́ждшемꙋсѧ предлага́емъ, прест҃а́ѧ: мы́ же лꙋ́чшагѡ ра́ди сраспина́емсѧ семꙋ̀. тѣ́мже не преста́й ѡ҆ на́съ молѧ́щи.