Канон святому мученику Александру Римскому

Пѣ́снь а҃.

І҆рмо́съ: Во глꙋбинѣ̀ постла̀ и҆ногда̀, фараѡни́тское всево́инство преѡрꙋже́ннаѧ си́ла, вопло́щшеесѧ же сло́во всеѕло́бный грѣ́хъ потреби́ло є҆́сть, препросла́вленный гдⷭ҇ь, сла́внѡ бо просла́висѧ.

Ꙗ҆́коже самꙋи́лъ и҆ногда̀, ѿ вы́шнихъ повелѣ́нїй и҆збра́нъ ꙗ҆ви́лсѧ є҆сѝ, мч҃ниче а҆леѯа́ндре, со хрⷭ҇то́мъ во́инствовати во ᲂу҆твержде́нїи цр҃кве є҆гѡ̀ ст҃ы́ѧ, въ не́йже порфѵ́ра є҆стества̀ на́шегѡ въ пакибытїѝ ѡ҆бновлѧ́етсѧ, мл҃твами твои́ми.

Ви́дѧще, ка́кѡ возлюбѝ гдⷭ҇ь дꙋшѝ твоеѧ̀ добро́тꙋ, вѣ́рный во́ине хрⷭ҇то́въ а҆леѯа́ндре, є҆гда̀ сла́вꙋ мі́ра сегѡ̀ презрѣ́въ, вѣнце́мъ мч҃ническимъ возжелѣ́лъ є҆сѝ ᲂу҆краси́тисѧ: мо́лимтисѧ, воспламенѝ и҆ срⷣца̀ на̑ша горѣ́нїемъ любвѐ твоеѧ̀ ко гдⷭ҇ꙋ.

Си́лою вы́шнѧгѡ ѡ҆зарѧ́емь, и҆зше́лъ є҆сѝ, бг҃олюби́ве а҆леѯа́ндре, въ срѣ́тенїе во́инѡвъ по тебѣ̀ грѧдꙋ́щихъ: си́хже, къ нога́мъ твои̑мъ па́дшихъ, воздви́глъ и҆ возвѣсти́лъ є҆сѝ и҆̀мъ тебѣ̀ предречє́ннаѧ страда̑нїѧ, въ ни́хже ѿ ри́ма до вѷзанті́и всеꙋсе́рднѡ хрⷭ҇та̀ проповѣ́далъ є҆сѝ, мл҃твенниче преди́вне.

Бг҃оро́диченъ: Свѣ́томъ на́съ твоегѡ̀ млⷭ҇рдїѧ во тьмѣ̀ неразꙋ́мїѧ лежа́щихъ ѡ҆зарѝ, мт҃и бж҃їѧ, є҆ди́на, цр҃ѧ̀ свѣтода́вца ро́ждшаѧ: є҆го́же, пресла́дкагѡ сн҃а твоего̀ и҆ бг҃а на́шего, молѝ сп҃сти́сѧ ѿ бѣ́дъ и҆ скорбе́й всѣ̑мъ на́мъ, на по́мощь тѧ̀ призыва́ющихъ.

Пѣ́снь г҃.

І҆рмо́съ: Процвѣла̀ є҆́сть пꙋсты́нѧ, ꙗ҆́кѡ крі́нъ, гдⷭ҇и, ꙗ҆зы́ческаѧ неплодѧ́щаѧ цр҃ковь, прише́ствїемъ твои́мъ, въ не́йже ᲂу҆тверди́сѧ моѐ срⷣце.

Ѡ҆блгⷣтствованъ бы́въ крѣ́постїю бжⷭ҇твенною, грѧде́ши къ подвигѡ́мъ мꙋче́нїѧ ᲂу҆се́рднѡ, всебл҃же́нне а҆леѯа́ндре, и҆ ꙗ҆́кѡ а҆́гнецъ безгла́сенъ, терпи́ши ноготьмѝ желѣ́зными стрꙋже́нїе, возжже́нъ любо́вїю до конца̀ за хрⷭ҇та̀ страда́ти, да сего̀ возлю́бленна приѡбрѧ́щеши.

Мꙋче́ньми мно́гими тщи́тсѧ ѕлочести́вый тїве́рїанъ разлꙋчи́ти тѧ̀ ѿ любвѝ хрⷭ҇то́вы, но посра́мленъ бы́сть ѻ҆каѧ́нный, ѡ҆брѣ́те бо тѧ̀ на ка́мене вѣ́ры си́лою бжⷭ҇твеннагѡ дх҃а ᲂу҆твержде́нна, стрⷭ҇тоте́рпче хрⷭ҇то́въ до́блественнѣйше.

Ꙗ҆́кѡ жени́хъ цр҃ко́вный, ᲂу҆́зами желѣ́зными свѧзꙋ́емь, въ постѣ̀ и҆ мл҃твѣ ше́ствовалъ є҆сѝ ѿ ри́ма до вѷзанті́и вѣнце́мъ мч҃ническимъ вѣнча́тисѧ, да вѣ́рнїи восто́ка и҆ за́пада, ᲂу҆́зами любвѐ хрⷭ҇то́вы свѧзꙋ́еши, въ сою́зѣ любвѝ и҆знемога́ющихъ.

Бг҃оро́диченъ: Гл҃го́лѡмъ твои̑мъ послѣ́дꙋюще, ро́ди родѡ́въ при́снѡ тѧ̀ ᲂу҆бл҃жа́ютъ, мт҃и бж҃їѧ, бг҃а бо и҆́стиннѡ родила̀ є҆сѝ, дв҃о чⷭ҇таѧ: є҆го́же, ꙗ҆́кѡ мт҃и свѣ́та, ᲂу҆се́рднѡ молѝ дарова́ти цр҃квамъ є҆диномы́слїе, въ сою́зѣ ми́ра бжⷭ҇твенна.

Сѣда́ленъ, гла́съ д҃.

Дне́сь цр҃ковь хрⷭ҇то́ва весели́тсѧ, ри́мъ же да ра́дꙋетсѧ, вѷзанті́а ликовствꙋ́етъ, ви́дѧще тѧ̀, мч҃ниче а҆леѯа́ндре, за и҆́стинꙋ хрⷭ҇то́вꙋ стра́ждꙋща, ꙗ҆́кѡ а҆́гг҃лъ свѣ́тлый, въ четыредесѧтодне́внѣмъ постѣ̀ мл҃твою насыща́емый, кѡ́зни вра̑жїѧ вѣ́рою побѣди́въ, сла́вꙋ цр҃кве хрⷭ҇то́вы ᲂу҆твержда́ѧ. во́ини же семꙋ̀ дивлѧ́хꙋсѧ, гл҃го́лахꙋ: вели́къ бг҃ъ хрⷭ҇тїа́нскїй, за є҆го́же мꙋчє́нїѧ сїѧ̑ под̾ѧ́лъ є҆сѝ, во́ине хрⷭ҇то́въ преди́вный. мы́ же, па́мѧть твою̀ пра́зднꙋюще, взыва́емъ тѝ: сопрѧжѝ ны̀ ᲂу҆́зами любвѐ твоеѧ̀, да не стра́ждетъ тѣ́ло хрⷭ҇то́во въ ра́спрѣхъ на́шихъ, ꙗ҆́коже на ко́лѣхъ растерза́емо.

Безневѣ́стнаѧ чⷭ҇таѧ дв҃о, бцⷣе, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ наде́ждꙋ, ѻ҆трокови́це, и҆мꙋ́щихъ: цє́ркви въ є҆диномы́слїи вѣ́ры ᲂу҆твердѝ, и҆ ꙗ҆́коже вѣ́даеши чл҃вѣ́чєскїѧ скѡ́рби сердє́чныѧ, ча̑дъ свои́хъ во є҆ди́но соберѝ, и҆ всѧ̑ ны̀ сп҃сѝ бжⷭ҇твенными мл҃твами твои́ми.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щсѧ, и҆ сп҃слъ є҆сѝ всего́ мѧ чл҃вѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Блгⷣтїю ст҃а́гѡ дх҃а и҆зъ мла́да въ вѣ́рѣ чи́стѣ воспита́нъ, любо́вїю хрⷭ҇тꙋ̀ поже́рлсѧ є҆сѝ, вѣ́рный во́ине хрⷭ҇то́въ, а҆леѯа́ндре, и҆ ꙗ҆́кѡ мно́гими скорбьмѝ ѡ҆бꙋрева́емь бы́лъ є҆сѝ, предварѝ мл҃твою за ны̀ ко гдⷭ҇ꙋ, въ ско́рбехъ мно́зѣхъ и҆знемога́ющихъ.

Проповѣ́дникъ велегла́сенъ вѣ́ры правосла́вныѧ, є҆щѐ недѣли́мѣй сꙋ́щи, ꙗ҆ви́лсѧ є҆сѝ, вѣ́рный дрꙋ́же хрⷭ҇то́въ а҆леѯа́ндре: ᲂу҆мѧгчѝ ка́плѧми крове́й твои́хъ, за цр҃ковь хрⷭ҇то́вꙋ пролїѧ́нныхъ, срⷣца̀, ра̑спри и҆ нестроє́нїѧ, и҆ враждꙋ̀ во ѡ҆гра́дѣ є҆ѧ̀ сѣ́ющихъ.

Дꙋ́шꙋ и҆ помышле́нїе къ тебѣ̀ простира́емъ, стрⷭ҇тоте́рпче хрⷭ҇то́въ а҆леѯа́ндре, согрѣ́й на́шꙋ вѣ́рꙋ и҆ любо́вь къ бг҃ꙋ, и҆знеможє́нїѧ на̑ша подкрѣпѝ, да зако́нꙋ є҆гѡ̀ ᲂу҆се́рднѡ послѣ́дꙋюще, по́прище сп҃се́нїѧ на́шегѡ пре́йдемъ непосра́мленнѡ.

Бг҃оро́диченъ: Съ бг҃омъ тѧ̀ застꙋ́пницꙋ стѧжа́хомъ, пречⷭ҇таѧ дв҃о мр҃і́е, ты́ бо мт҃и бж҃їѧ ꙗ҆ви́ласѧ є҆сѝ, творца̀ и҆ содѣ́телѧ на́шего во ᲂу҆тро́бѣ прїи́мши, всенепоро́чнаѧ, всѣ́хъ ѿ сме́рти и҆ тлѣ́нїѧ сп҃сла̀ є҆сѝ, наде́ждо на́ша и҆ ᲂу҆тѣше́нїе, и҆ покро́въ теплоты̀ сладча́йшїѧ.

Пѣ́снь є҃.

І҆рмо́съ: Хода́тай бг҃ꙋ и҆ чл҃вѣ́кѡмъ бы́лъ є҆сѝ, хрⷭ҇тѐ бж҃е: тобо́ю бо, влⷣко, къ свѣтонача́льникꙋ ѻ҆ц҃ꙋ̀ твоемꙋ̀, ѿ но́щи невѣ́дѣнїѧ приведе́нїе и҆́мамы.

Свѣща̀ свѣтоза́рнаѧ, пла́менемъ вѣ́ры неꙋгаси́мѡ пламенѣ́юща, ꙗ҆ви́лсѧ є҆сѝ, а҆леѯа́ндре: вѣ̑рныѧ во гра́дѣхъ и҆ ве́сѣхъ ше́ствїѧ твоегѡ̀ во ѡ҆гра́дꙋ цр҃кве ст҃ы́ѧ созыва́ѧ, пꙋ́ть ко хрⷭ҇тꙋ̀ ѡ҆свѣти́лъ є҆сѝ и҆̀мъ, къ воскрⷭ҇нїю грѧдꙋ́щемꙋ ведꙋ́щїй.

Во́дꙋ жи́вꙋ, ѿ ре́бръ хрⷭ҇то́выхъ и҆сте́кшꙋ, молѧ́сѧ и҆сточѝ па́мѧть твою̀ чтꙋ́щымъ, ꙗ҆́коже и҆ногда̀ во гра́дѣ карасꙋ́рстѣмъ и҆сточи́лъ є҆сѝ во́дꙋ и҆зъ ка́мене, є҆́юже напои́лъ є҆сѝ жа́ждꙋщихъ, къ мѣ́стꙋ ᲂу҆сѣкнове́нїѧ главы̀ твоеѧ̀ поспѣша́вшихъ, всебл҃же́нне.

Прїиди́те, хрⷭ҇толюби̑выѧ ма́тєри, со стрⷭ҇тоте́рпца ма́терїю пі́менїею возра́дꙋемсѧ, ви́дѧщыѧ сы́на є҆ѧ̀ сла́вою и҆ че́стїю ᲂу҆вѣ́нчана: є҆го́же, ꙗ҆́кѡ крі́нъ неꙋвѧда́емый, ѻ҆на̀, себѣ̀ и҆ хрⷭ҇тꙋ̀ на ра́дость блгⷣтнѡ возрастѝ, и҆́же на́съ тлѣ́нїѧ и҆ сме́рти дꙋхо́вныѧ и҆зба́ви.

Бг҃оро́диченъ: На́мъ лю́бѧщымъ тѧ̀, и҆ любо́вїю чтꙋ́щымъ ст҃ꙋ́ю па́мѧть твою̀, вѣ́рный дрꙋ́же хрⷭ҇то́въ, съ пречⷭ҇тою бг҃омт҃рїю: и҆справле́нїе житїѧ̀, клеветы̀ и҆ ѕло́бы чл҃вѣ́ческїѧ и҆збавле́нїе, и҆ прегрѣше́нїй проще́нїе дарова́ти и҆спросѝ.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Неѡсла́бными ꙗ҆́звами сокрꙋша́емое тѣ́ло твоѐ, а҆леѯа́ндре, си́лою любвѝ ко возлюби́вшемꙋ тѧ̀ гдⷭ҇ꙋ, дꙋше́вное бл҃горо́дїе непоколе́блемо соблю́лъ є҆сѝ, во хрⷭ҇тѣ̀ ра́дꙋѧсѧ, дꙋше́ю и҆ тѣ́ломъ ѡ҆сщ҃е́нъ ꙗ҆ви́лсѧ є҆сѝ, скорбѧ́щымъ ᲂу҆тѣше́нїе низпосыла́еши.

Дивѧ́щесѧ бога́тствꙋ добродѣ́телей твои́хъ, а҆леѯа́ндре, мо́лимъ тѧ̀ ꙗ҆́коже блгⷭ҇ви́лъ є҆сѝ дре́во, ᲂу҆ негѡ́же ѿ мꙋчи́телей и҆стѧзꙋ́емь бы́лъ є҆сѝ, и҆ сїѐ ѿ тогѡ̀ часа̀ пло́дъ и҆сцѣле́нїѧ вѣ̑рнымъ приноша́ше. и҆сцѣлѝ, бг҃олюби́ве, срⷣца̀ на̑ша, да принесе́мъ пло́дъ покаѧ́нїѧ нелицемѣ́рна.

Терпѣ́нїемъ и҆ дꙋше́внымъ мꙋ́жествомъ, и҆ крѣ́постїю по́мысла превозше́лъ є҆сѝ всю̀ гони́телей го́рькꙋю ꙗ҆́рость, во́ине хрⷭ҇то́въ а҆леѯа́ндре: да и҆ мы̀, въ и҆спыта́нїихъ лю́тыхъ, на твоѧ̑ страда̑нїѧ взира́юще, не посрами́мъ малодꙋ́шнѣ возлюби́вшаго на́съ до кро́ве.

Бг҃оро́диченъ: Оу҆пра́ви и҆ ѡ҆ст҃ѝ ᲂу҆́мъ на́шъ, мт҃и бж҃їѧ, ѡ҆бꙋрева́емый наше́ствїемъ скорбе́й и҆ тлетво́рныхъ страсте́й, сп҃сѝ къ тебѣ̀ прибѣга́ющихъ, и҆ны́ѧ бо по́мощи, чⷭ҇таѧ, ра́звѣ тебѐ, не и҆́мамы, помозѝ влⷣчце, да не поги́бнемъ въ пꙋчи́нѣ ѿча́ѧнїѧ.

Конда́къ, гла́съ д҃:

Ꙗ҆́кѡ ѕвѣзда̀ многосвѣ́тлаѧ, возсїѧ́лъ є҆сѝ ѿ ри́ма, мч҃ниче а҆леѯа́ндре, и҆ ꙗ҆́кѡ би́серъ многоцѣ́нный, въ землѝ вѷзанті́йстѣй ра́достнѡ подъ ме́чь за хрⷭ҇та̀ главꙋ̀ твою̀ преклони́лъ є҆сѝ, и҆ сїю̀ въ непоро́чное бл҃гоꙋха́нїе бг҃ꙋ прине́слъ є҆сѝ, да красꙋ́етсѧ цр҃ковь земна́ѧ и҆ нбⷭ҇наѧ во сла́вѣ и҆сповѣ́дникѡвъ хрⷭ҇то́выхъ.

І҆́косъ:

Свѣтоза́рный свѣти́льникъ ꙗ҆ви́лсѧ є҆сѝ, бг҃омꙋ́дре а҆леѯа́ндре, блгⷣти бжⷭ҇твенныѧ и҆спо́лненъ сы́й въ тѣлесѝ твое́мъ, є҆го́же спекꙋла́торы вверго́ша въ рѣкꙋ̀ по многострада́льнѣй кончи́нѣ твое́й. смотре́нїемъ же бж҃їимъ, дво́ица псѡ́въ и҆звлеко́ша чⷭ҇тны̑ѧ мо́щи твоѧ̑, присѣдѧ́хꙋ стрегꙋ́ще ѧ҆̀ ѿ пти́цъ и҆ ѕвѣре́й ди́вїихъ, доко́лѣ же бл҃же́ннаѧ ма́ти твоѧ̀ пі́менїа, прише́дши, со слеза́ми, ѱало́мски, пома́за сїѧ̑ мѵ́ромъ, погре́бши тѧ̀ при ѻ҆́нѣй рѣцѣ̀ є҆ргі́нѣ, и҆дѣ́же и҆сцѣлє́нїѧ мнѡ́га соверши́шасѧ болѧ́щымъ, съ вѣ́рою ко гро́бꙋ стрⷭ҇тоте́рпца бж҃їѧ приходѧ́щихъ, да красꙋ́етсѧ цр҃ковь земна́ѧ и҆ нбⷭ҇наѧ во сла́вѣ и҆сповѣ́дникѡвъ хрⷭ҇то́выхъ.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бл҃гочⷭ҇ти̑вымъ ѻ҆трокѡ́мъ ро́сꙋ дꙋхо́внꙋю, сы́й блгⷭ҇ве́нъ и҆ препросла́вленъ.

Ꙗ҆́кѡ кра́сное и҆ сщ҃е́ннѣйшее заколе́нїе са́мъ себѐ прине́слъ є҆сѝ пастыренача́льникꙋ хрⷭ҇тꙋ̀, за всѣ́хъ бжⷭ҇твеннѣ закла́вшагосѧ, и҆ ѻ҆гне́мъ мꙋче́нїй всесоже́глсѧ є҆сѝ, сла́вне а҆леѯа́ндре, въ сла́дости а҆́гг҃льстѣй побѣ́днѡ вопїю́ще: ѻ҆тє́цъ на́шихъ бж҃е, блгⷭ҇ве́нъ є҆сѝ.

Мольбы̑ на́шѧ ᲂу҆слы́ши, всебл҃же́нне, и҆ прїитѝ на́мъ на по́мощь потщи́сѧ, лю́тѣ ѡ҆бꙋрева́емыхъ скорбьмѝ, и҆ нꙋ́ждами жите́йскими, и҆ бѣсо́вскими ѡ҆ѕлобле́нїи, ꙗ҆́кѡ да сп҃са́еми тобо́ю, и҆ мы̀ вопїе́мъ: ѻ҆тє́цъ на́шихъ бж҃е, блгⷭ҇ве́нъ є҆сѝ.

Моли̑твы твоѧ̑ проле́й за ны̀ ко гдⷭ҇ꙋ, бг҃олюби́ве а҆леѯа́ндре, и҆ скве́рнꙋ стꙋ́дныхъ дѣ́лъ на́шихъ ка́плѧми чⷭ҇тны́хъ крове́й твои́хъ ѡ҆мы́й, наде́ждꙋ же ᲂу҆крѣпѝ, во є҆́же чи́стымъ срⷣцемъ и҆ сокрꙋше́нною дꙋше́ю воззове́мъ: ѻ҆тє́цъ на́шихъ бж҃е, блгⷭ҇ве́нъ є҆сѝ.

Бг҃оро́диченъ: Наде́жда ненаде́жныхъ ты̀ є҆сѝ, бцⷣе, вѣ́си бо, цр҃и́це, ꙗ҆́кѡ неизлѣчи́мыми ра́нами страсте́й грѣхо́вныхъ и҆знꙋрѧ́еми, ко вратѡ́мъ поги́бели доспѣ́хомъ. не ѿри́ни во́пль дꙋ́шъ на́шихъ, всебл҃га́ѧ, да сп҃са́еми, ᲂу҆тѣ́шнѣ зове́мъ: ѻ҆тє́цъ на́шихъ бж҃е, блгⷭ҇ве́нъ є҆сѝ.

Пѣ́снь и҃.

І҆рмо́съ: Пе́щь и҆ногда̀ ѻ҆́гненнаѧ въ вавѷлѡ́нѣ дѣ̑йства раздѣлѧ́ше, бж҃їимъ велѣ́нїемъ халдє́и ѡ҆палѧ́ющаѧ, вѣ̑рныѧ же ѡ҆роша́ющаѧ, пою́щыѧ: блгⷭ҇ви́те, всѧ̑ дѣла̀ гдⷭ҇нѧ, гдⷭ҇а.

Оу҆краше́нїе мч҃никѡвъ показа́лсѧ є҆сѝ и҆ въ жили́щахъ нерꙋкотво́рныхъ цр҃кве нбⷭ҇ныѧ вѣ́чный поко́й ѡ҆брѣ́лъ є҆сѝ, любвеѻби́льне а҆леѯа́ндре: на́съ же, во мно́гихъ ѡ҆бꙋрева́нїй и҆спытꙋ́емыхъ, въ ти́хое приста́нище приведѝ, во є҆́же во хрⷭ҇тѣ̀ ра́дꙋющесѧ, взыва́ти: блгⷭ҇ви́те, всѧ̑ дѣла̀ гдⷭ҇нѧ, гдⷭ҇а.

Оу҆ма̀ красото́ю ᲂу҆вѣнча́ тѧ гдⷭ҇ь, а҆леѯа́ндре, и҆ срⷣце любвѝ преиспо́лненное дарова́ ти, во є҆́же под̾ѧ́ти ѻ҆́бразъ страда́нїй є҆гѡ̀ непосты́днѡ, и҆́миже возве́лъ є҆сѝ чл҃вѣ́ческое немощно́е є҆стество̀ къ чи́нꙋ а҆́гг҃льскомꙋ, да и҆ мы̀ въ наде́ждѣ сп҃се́нїѧ вопїе́мъ: блгⷭ҇ви́те, всѧ̑ дѣла̀ гдⷭ҇нѧ, гдⷭ҇а.

Ѻ҆́гнь мл҃твы непоро́чныѧ проле́й за ны̀ ко гдⷭ҇ꙋ, вѣ́рный мч҃ниче хрⷭ҇то́въ, да не пожре́тъ на́съ ѕло́ба грѣхо́внаѧ, враждо́ю снѣда́ющаѧ: но, ꙗ҆́кѡ предста́тель вѣ́рный, всѧ̑ ны̀ къ братолю́бїю приведѝ и҆ ᲂу҆твержде́нїю цр҃кве хрⷭ҇то́вы вѣ́рнѡ слꙋжи́ти ᲂу҆цѣломꙋ́дри, во є҆́же любо́вїю свѧзꙋ́ємымъ, взыва́ти: блгⷭ҇ви́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Ꙗ҆́кѡ мт҃рь свѣ́та, трапе́зꙋ хлѣ́ба живо́тнагѡ и҆ рꙋно̀, прохла́дою ст҃а́гѡ дх҃а ѡ҆роше́нное, и҆ сла́дость ра́йскꙋю, вѣ́рныхъ наде́ждою сп҃се́нїѧ ᲂу҆слажда́ющꙋю, почита́емъ тѧ̀, чⷭ҇таѧ дв҃о мт҃и, и҆ веселѧ́щесѧ ѡ҆ тебѣ̀, вопїе́мъ: блгⷭ҇ви́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щсѧ ѿ дв҃ы, на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ, всепѣ́тꙋю бцⷣꙋ велича́емъ.

Пою́ще многоразли̑чнаѧ страда̑нїѧ твоѧ̑, хрⷭ҇та̀ ра́ди распе́ншагѡсѧ, восхвалѧ́емъ тѧ̀, ꙗ҆́кѡ ѡ҆дꙋшевле́нный сосꙋ́дъ, и҆сцѣлє́нїѧ и҆з̾ѻби́льнѡ и҆злива́ющїй. ᲂу҆бл҃жа́емъ ма́терь твою̀ пі́менїю, ꙗ҆́же пло́дъ чре́ва своегѡ̀ бг҃ꙋ въ да́ръ бл҃гопрїѧ́тенъ принесѐ: съ не́ю же, достохва́льне, моли́сѧ ми́ръ низпосла́ти дꙋша́мъ на́шымъ.

Хра́мъ ст҃а́гѡ дх҃а вои́стиннꙋ бы́лъ є҆сѝ, а҆леѯа́ндре, сего̀ преиспо́лненъ не боѧ́тисѧ ᲂу҆бива́ющихъ тѣ́ло вѣ́рныхъ наꙋча́еши, но въ животѣ̀ и҆ сме́рти прославлѧ́ти смотре́нїе бж҃їе ѡ҆ на́съ, страда́ньми воспѣва́еши пресла́внѡ. подви́гни и҆ на́съ си́хъ не ᲂу҆страша́тисѧ, лю́тѣ напа́дающихъ на на́съ.

Ѽ преди́вне мч҃ниче а҆леѯа́ндре, прїимѝ ѿ на́съ сїѐ ᲂу҆бо́гое славосло́вїе, ꙗ҆́кѡ да́нь мл҃твы, дале́кихъ по вре́мени чти́телей страда́нїй твои́хъ: и҆ прїидѝ на́мъ на по́мощь, є҆гда̀ и҆знемога́етъ дꙋ́хъ на́шъ, дꙋ́хомъ ѕло́бы поднбⷭ҇ныѧ томи́мь, да не па́дше поги́бнемъ предъ лице́мъ бж҃їимъ.

Бг҃оро́диченъ: Крѣ́пкое твоѐ предста́тельство, бг҃оꙋкра́шеннаѧ мр҃і́е, и҆ свѣ́тлаѧ твоѧ̀ сла́ва по все́й землѝ показа́сѧ, ѡ҆ тебѣ̀ ны́нѣ хва́лимсѧ, и҆мꙋ́ще тѧ̀ къ сн҃ꙋ и҆ бг҃ꙋ твоемꙋ̀ хода́таицꙋ неꙋсы́пнꙋю, въ ско́рбехъ и҆ печа́лехъ, и҆ въ ча́съ сме́ртный ᲂу҆пова́нїе непосты́дное.

Свѣти́ленъ:

Свѣ́тѧтсѧ лꙋчы̀ свѣ́тлѡ страда́нїй твои́хъ, ꙗ҆́коже сл҃нце, и҆ всю̀ житїѧ̀ твоегѡ̀ ꙗ҆влѧ́ютъ свѣ́тлость, пресла́вне мч҃ниче а҆леѯа́ндре, и҆ сїѧ́ющꙋю въ тебѣ̀ вѣ́рꙋ бжⷭ҇твеннꙋю, цр҃кве ст҃ы́ѧ неме́ркнꙋщее ᲂу҆краше́нїе, въ не́мже на́шегѡ ᲂу҆пова́нїѧ наде́жда свѣ́тлаѧ, вѣнцеда́тель хрⷭ҇то́съ.

Сла́ва, и҆ ны́нѣ, бг҃оро́диченъ: Ви́дѣти, бцⷣе, сла́вꙋ твою̀ неизрече́ннꙋю дре́вле возжелѣ́ша бжⷭ҇твеннїи прⷪ҇ро́цы всѝ: но на послѣ́докъ на́мъ ꙗ҆ви́ласѧ є҆сѝ, лю́бѧщымъ тѧ̀, херꙋві́мѡвъ чⷭ҇тнѣ́йша и҆ серафі́мѡвъ сла́внѣйша сꙋ́ща, бжⷭ҇твенныѧ сла́вы преиспо́лненнаѧ.