Канон святому мученику Агапию и с ним семи мученикам

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Въ нбⷭ҇ныхъ мꙋ́чєницы сꙋ́ще жили́щахъ, ва́съ хва́лѧщыѧ на землѝ просвѣще́нїѧ сподо́бите.

Столпѝ цр҃кве ꙗ҆ви́стесѧ, стѣ́ны разорѧ́юще і҆дѡлонеи́стовства, стрⷭ҇тоте́рпцы хрⷭ҇тѡ́вы предо́блїи.

Оу҆ѧзви́лсѧ є҆сѝ любо́вїю, мꙋ́чениче досточꙋ́дне а҆га́пїе, влⷣки всѣ́хъ, и҆ ᲂу҆мре́ти є҆гѡ̀ ра́ди пред̾ꙋсе́рдствовалъ.

Бг҃оро́диченъ: Заре́ю пресвѣтлѣ́йшею, и҆зъ тебє̀, дв҃о, возсїѧ́вшею, дꙋшѝ моеѧ̀ зѣ̑ницы просвѣтѝ, ꙗ҆́кѡ да прославлѧ́ю тѧ̀.

Пѣ́снь г҃.

І҆рмо́съ: Нѣ́сть свѧ́тъ ꙗ҆́кѡ гдⷭ҇ь, и҆ нѣ́сть пра́веденъ ꙗ҆́кѡ бг҃ъ на́шъ, є҆го́же пое́тъ всѧ̀ тва́рь: нѣ́сть пра́веденъ па́че тебє̀, гдⷭ҇и.

Ѻ҆гне́мъ разжига́ѧсѧ любвѐ хрⷭ҇то́вы, ѻ҆гни́ще погаси́лъ є҆сѝ, мꙋ́чениче а҆га́пїе, і҆дѡлонеи́стовства, тече́ньми крове́й твои́хъ: тѣ́мже восхвалѧ́емъ тѧ̀.

Ѻ҆рꙋ̑жїѧ ꙗ҆ви́стесѧ, посѣка́юще тмы̀, блаже́ннїи, де́мѡнѡвъ благода́тїю: и҆ ны́нѣ тма́мъ совокꙋпи́стесѧ ра́дꙋющесѧ, мы́сленныхъ си́лъ.

Пꙋ́ть соверши́вше мꙋче́нїѧ мꙋ́жески, ѿложе́нїемъ тѣ́ла вы́шнее постиго́сте црⷭ҇тво: въ не́мже стѧжа́сте, мꙋ́чєницы бжⷭ҇твеннїи, житїѐ.

Бг҃оро́диченъ: Подо́бїемъ пло́ти ꙗ҆́вльшагосѧ, и҆зъ твоегѡ̀ свѣтоно́снагѡ чре́ва, зижди́телѧ позна́хомъ, за милосе́рдїе млⷭ҇ти, на́мъ пою́щымъ тѧ̀, мт҃и приснодв҃о.

Сѣда́ленъ, гла́съ и҃.

Седмочи́сленный ли́къ ст҃ы́хъ мч҃никъ пострада̀ крѣ́пкѡ за бжⷭ҇твеннꙋю трⷪ҇цꙋ, погꙋбѝ мно́жєства мы́сленныхъ вра̑гъ бл҃года́тїю, и҆ совокꙋпи́шасѧ тма́мъ нб҃сныхъ ᲂу҆мѡ́въ дх҃омъ. Тѣ́хъ моли́твами ᲂу҆ще́дри на́съ, чл҃вѣколю́бче.

Сла́ва, и҆ ны́нѣ, бг҃оро́диченъ: Ѿ всѧ́кагѡ преще́нїѧ и҆ ѕло́бы человѣ́ческїѧ спасѝ на́съ, прест҃а́ѧ дв҃о, тѧ́ бо и҆́мамы покро́въ и҆ застꙋпле́нїе прибѣга́ющїи къ тебѣ̀, бг҃ома́ти, и҆ рожде́нномꙋ и҆зъ тебє̀, бг҃ꙋ на́шемꙋ, є҆го́же молѝ, и҆зба́вити на́съ бѣ́дъ и҆ скорбе́й.

Крⷭ҇тобг҃оро́диченъ: Нескве́рнаѧ а҆́гница, а҆́гнца и҆ па́стырѧ ви́сѧща на крⷭ҇тѣ̀ зрѧ́щи, вопїѧ́ше: ча́до моѐ, что̀ стра́нное ᲂу҆́бѡ и҆ ненаде́жное сїѐ зрѣ́нїе: ка́кѡ жи́знь всѣ́хъ сме́ртїю ѡ҆сꙋжда́етсѧ зємны́мъ подо́бнѣ; но воскреснѝ тридне́внѡ и҆зъ ме́ртвыхъ, сло́во, ꙗ҆́коже ре́клъ є҆сѝ, да ра́дꙋющисѧ сла́влю тѧ̀.

Пѣ́снь д҃.

І҆рмо́съ: И҆зъ горы̀ приѡсѣне́нныѧ, сло́ве, прⷪ҇ро́къ, є҆ди́ныѧ бцⷣы, хотѧ́ща воплоти́тисѧ бг҃ови́днѡ ᲂу҆смотрѝ, и҆ со стра́хомъ славосло́вѧше си́лꙋ твою̀.

Вельмѝ хрⷭ҇та̀, а҆га́пїе, возлюби́въ, стрⷭ҇те́мъ тогѡ̀ мꙋ́жески ᲂу҆подо́билсѧ є҆сѝ, заколе́нъ бы́въ ꙗ҆́кѡ а҆́гнецъ во́лею, великомꙋ́чениче досточꙋ́дне.

Мечꙋ̀ себѐ са́ми вда́вше вседꙋ́шнѡ, мꙋ́чєницы мꙋ́дрїи, кроплє́нїи крове́й ѡ҆багри́сте ри́зꙋ, въ ню́же ѡ҆дѣ́ѧвшесѧ на нб҃сѣ́хъ живе́те.

Ѽ ва́шеѧ къ бг҃ꙋ те́плыѧ любвѐ! є҆ѧ́же ра́ди себѐ са́мыхъ ѿверго́стесѧ до конца̀: и҆ нꙋ́жднѣйшꙋю сме́рть под̾е́мше, безсме́ртїѧ сподо́бистесѧ.

Бг҃оро́диченъ: Мѵ́ро во чре́вѣ сло́ва прїѧ́ла є҆сѝ, нескве́рнаѧ чⷭ҇таѧ, ве́сь мі́ръ ѿ ѕлосмра́дїѧ ѡ҆чи́стившаго, всѧ́кихъ согрѣше́нїй: тѣ́мъ вѣ́рнѡ тѧ̀ ᲂу҆блажа́емъ.

Пѣ́снь є҃.

І҆рмо́съ: Ѿ но́щи невѣ́дѣнїѧ, бг҃овѣ́дѣнїемъ просвѣти́вый концы̀, просвѣти́ мѧ̀ ᲂу҆́тромъ чл҃вѣколю́бїѧ твоегѡ̀, гдⷭ҇и.

Любо́венъ дѣѧ́нїемъ, ꙗ҆́коже и҆ зва́нїемъ бы́въ, сла́вне, пострада́лъ є҆сѝ за любо́вь всецр҃ѧ̀ хрⷭ҇та̀ бг҃а на́шегѡ.

Глаго́лъ лю́тагѡ мꙋчи́телѧ попра́сте, ст҃і́и мꙋ́чєницы, и҆ хрⷭ҇тꙋ̀ вво́инившесѧ, полкѝ дє́мѡнскїѧ погꙋби́сте.

Свѧще́нными по́двиги низлага́юще беззако́нныхъ де́рзость, вѣнце́мъ безсме́ртїѧ, мч҃ницы хрⷭ҇то́вы, ᲂу҆вѧзо́стесѧ.

Бг҃оро́диченъ: Пѣснослѡ́вїи бж҃е́ственными бцⷣꙋ, вѣ́рнїи, ᲂу҆блажи́мъ, ра́дꙋйсѧ, глаго́люще, две́рь, є҆́юже є҆ди́нъ про́йде гдⷭ҇ь.

Пѣ́снь ѕ҃.

І҆рмо́съ: Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Со а҆леѯа́ндрома двѣма̀, дїонѵ̑сїа два̀ воспои́мъ, а҆га́пїа сла́внаго, тїмола́а и҆ рѡмѵ́ла, крѣ́пкѡ пострада́вшыѧ, и҆ тмы̑ вра̑жїѧ пора́товавшыѧ.

И҆сцѣле́нїй рѣ́ки и҆сточа́юще, мч҃ницы, стра̑сти земноро́дныхъ бж҃е́ственнѣ ѡ҆чища́ете: сегѡ̀ ра́ди ра́дꙋющесѧ, ва́шѧ вѣ́рою восхвалѧ́емъ до́блєсти.

Зако́ннѡ свѧще́нный по́двигъ соверши́вше, зако́ннѡ вседѣ́тельною дла́нїю вѣнча́стесѧ, седмочи́сленїи мꙋ́чєницы, нб҃снїи гра́ждане, а҆́гг҃лѡмъ равностоѧ́телїе.

Бг҃оро́диченъ: Оу҆вѧди́вшаѧ сады̀ безбо́жїѧ, всенепоро́чнаѧ, твои́мъ ст҃ы́мъ прозѧбе́нїемъ, прозѧба́ющꙋю во мнѣ̀ вы́нꙋ вра́жїю ѕло́бꙋ и҆скоренѝ, бг҃оневѣ́сто.

Пѣ́снь з҃.

І҆рмо́съ: Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.

Са́ми себѐ во́льнѡ къ заколе́нїю ꙗ҆́кѡ а҆́гнцы преда́сте, не ᲂу҆боѧ́вшесѧ мꙋ́къ, всехва́льнїи ѻ҆рꙋ̑жницы, но благодꙋ́шнѡ взыва́юще: ѻ҆тє́цъ на́шихъ бж҃е, благослове́нъ є҆сѝ.

Просвѣ́щсѧ любо́вїю всѣ́хъ влⷣки, мꙋ́чениче а҆га́пїе, подклони́лъ є҆сѝ вы́ю мечꙋ̀, и҆ мч҃никѡвъ счи́слилсѧ є҆сѝ во́инствꙋ, взыва́ѧ: ѻ҆тє́цъ на́шихъ бж҃е, бл҃гослове́нъ є҆сѝ.

Ꙗ҆́кѡ свѣти́льникъ зрите́сѧ въ домꙋ̀ гдⷭ҇ни, мч҃ницы сла́внїи, седмосте́бленный, мі́ръ просвѣща́ющїй, вопїю́ще, сїѧ́нїемъ бл҃года́ти: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ: Свѧ́зана мѧ̀ плени́цами несказа́нныхъ прегрѣше́нїй, разрѣшѝ, всенепоро́чнаѧ, подаю́щи мѝ тꙋ̑чи сле́зъ пѣснопою́щꙋ и҆зъ тебє̀ возсїѧ́вшемꙋ: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃.

І҆рмо́съ: На горѣ̀ ст҃ѣ́й просла́вльшасѧ, и҆ въ кꙋпинѣ̀ ѻ҆гне́мъ приснодв҃ы мѡѷсе́ови та́йнꙋ ꙗ҆́вльшаго, гдⷭ҇а по́йте и҆ превозноси́те во всѧ̑ вѣ́ки.

Вра́чеве разли́чныхъ недꙋ́гѡвъ, рꙋкодѣ́йствомъ дх҃а показа́вшесѧ, всѧ̑ на́шѧ недꙋ́ги и҆сцѣли́те: ꙗ҆́кѡ да восхвалѧ́емъ и҆ славосло́вимъ ва́шꙋ бж҃е́ственнꙋю па́мѧть.

Возлюби́лъ є҆сѝ бг҃а, ѿ тогѡ̀, мꙋ́чениче, возлюби́лсѧ є҆сѝ. Тѣ́мже тѧ̀ по́двигъ бж҃е́ственный соверши́вша, приве́дъ со є҆диноревни́тели въ нбⷭ҇ныѧ, а҆га́пїе, черто́ги.

Оу҆крѣ́пльшесѧ любо́вїю влⷣки, наси́лованїе низложи́сте преле́стника, и҆ бл҃госла́внѡ побѣ́дами ᲂу҆краша́еми, въ нбсныхъ, мч҃ницы гдⷭ҇ни, живетѐ поко́ищахъ.

Бг҃оро́диченъ: И҆сцѣлѝ стра̑сти се́рдца моегѡ̀, безстра́стїѧ и҆сто́чника ро́ждшаѧ, и҆ къ животꙋ́ мѧ̀ бж҃е́ственномꙋ наста́ви, да тѧ̀ сла́влю мт҃рь сп҃совꙋ во всѧ̑ вѣ́ки.

Пѣ́снь ѳ҃.

І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.

Кра́сни бы́вше бжⷭ҇твенными бл҃голѣ́потами мꙋче́нїѧ, гдⷭ҇еви предстоитѐ, и҆ съ ни́мъ стрⷭ҇тоте́рпцы при́снѡ веселите́сѧ.

Во́инство а҆́гг҃льское ва́съ прїе́млетъ, распрѧ́гшыѧсѧ тѣле́съ, мч҃ницы, къ нбⷭ҇номꙋ гра́дꙋ, къ свѣ́тꙋ невече́рнемꙋ.

На́съ соверша́ющихъ дне́сь па́мѧть свѧще́ннꙋю ва́шꙋ, мꙋ́чєницы сла́внїи, къ бг҃ꙋ помина́ти не преста́ните.

Бг҃оро́диченъ: Свѣ́томъ мѧ̀ покаѧ́нїѧ, помраче́ннаго небреже́нїемъ, всенепоро́чнаѧ, просвѣтѝ: ꙗ҆́кѡ да пою̀ и҆ сла́влю вели̑чїѧ твоѧ̑.