Канон святому благоверному князю Владиславу Сербскому

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆з̾ рабо́ты є҆гѵ́петскїѧ, ꙗ҆́кѡ просла́висѧ.

Владисла́вꙋ царю̀ пѣ́снь воспѣ́ти, гдⷭ҇и, сподо́би мѧ̀, ѡ҆скверне́ннаго мно́гими и҆ безмѣ́стными согрѣше́ньми, па́дшаго во глꙋбинꙋ̀ ѕѡ́лъ и҆ ᲂу҆ѧ́звленнаго тщесла́вїемъ и҆ го́рдостїю лю́тою.

Лоза̀ бл҃гоꙋха́ннаѧ вїногра́да хрⷭ҇то́ва ꙗ҆ви́лсѧ є҆сѝ, владисла́ве, процвѣ́лъ бо є҆сѝ на сла́внѣмъ дре́вѣ царе́й бл҃гочести́выхъ, є҆гѡ́же сла́достїю напита́выйсѧ, кра̑сныѧ плоды̀ произрасти́лъ є҆сѝ.

А҆́ще и҆ мнѡ́ги скѡ́рби ѿ бра́та своегѡ̀ претерпѣ́лъ є҆сѝ, ѻ҆ба́че послꙋша́нїѧ роди́телємъ ѿню́дъ не ᲂу҆клони́сѧ, тѣ́мже и҆ вѣнча́ тѧ сро́дникъ тво́й ст҃ы́й са́вва бг҃омꙋ́дрый ца́рскимъ вѣнце́мъ, достохва́льне.

Бг҃оро́диченъ: Дв҃о прест҃а́ѧ, хрⷭ҇тїа́нъ похвало̀, лица̀ твоегѡ̀ не ѿвратѝ ѿ на́съ, но ꙗ҆́кѡ млⷭ҇рдаѧ мт҃и, защитѝ ча̑дъ твои́хъ ѿ вра̑гъ ви́димыхъ и҆ неви́димыхъ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑. возвесели́ бо сѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть првⷣенъ па́че тебє̀, гдⷭ҇и.

И҆́стинный наслѣ́дникъ ѻ҆тцꙋ̀ своемꙋ̀ первовѣнча́нномꙋ въ забо́тѣ ѡ҆ странѣ̀ се́рбстѣй бы́лъ є҆сѝ, владисла́ве, ѡ҆гражда́ѧ ю҆̀ ѿ наше́ствїѧ и҆ноплеме́нныхъ и҆ ѿ всѧ́кїѧ междоꙋсо́бныѧ бра́ни.

Сꙋ́дъ тво́й, бж҃е, царе́ви да́ждь и҆ пра́вдꙋ твою̀ сы́нꙋ царе́вꙋ, та́кѡ взыва́лъ є҆сѝ, бл҃же́нный царю̀ владисла́ве. тѣ́мже стѧжа́лъ є҆сѝ ѿ цр҃ѧ̀ царе́й ра́зꙋмъ, во є҆́же твори́ти сꙋ́дъ првⷣный и҆ млⷭ҇тивый.

Ли́хвы и҆ мзды̀ ѿбѣжа́лъ є҆сѝ ꙗ҆́кѡ ѻ҆гнѧ̀, владисла́ве, при́снѡ ходѧ́й пред̾ лице́мъ гдⷭ҇нимъ. сегѡ̀ ра́ди и҆ бл҃гословѝ бг҃ъ тѧ̀ и҆ странꙋ̀ се́рбскꙋю свое́ю бога́тою млⷭ҇тїю.

Бг҃оро́диченъ: А҆́гг҃ли ᲂу҆диви́шасѧ, чⷭ҇таѧ, ржⷭ҇твꙋ̀ твоемꙋ̀, мы́ же ᲂу҆жаса́емсѧ всегда́шнемꙋ твоемꙋ̀ предста́тельствꙋ ѡ҆ на́съ, є҆гѡ́же не лишѝ на́съ, влⷣчце, за мно́жество на́шихъ прегрѣше́нїй.

Сѣда́ленъ, гла́съ д҃:

Вои́стиннꙋ до́брый во́инъ хрⷭ҇то́въ ꙗ҆ви́лсѧ є҆сѝ, пресла́вный царю̀ владисла̀ве, ѻ҆рꙋ́жїемъ зе́млю свою̀ защити́вый и҆ бл҃гоче́стїемъ правосла́внꙋю вѣ́рꙋ ѡ҆гради́вый, но ꙗ҆́кѡ и҆мѣ́ѧй дерзнове́нїе ко ст҃ѣ́й трⷪ҇цѣ, ми́ръ странѣ̀ се́рбстѣй и҆спросѝ и҆ дꙋша́мъ на́шымъ ве́лїю млⷭ҇ть.

Бг҃оро́диченъ: Прїѧ́телище бжⷭ҇тва̀ непристꙋ́пнагѡ ꙗ҆ви́ласѧ є҆сѝ, прест҃а́ѧ дв҃о чⷭ҇таѧ, но прострѝ рꙋ́цѣ твоѝ ко всемлⷭ҇тивомꙋ сп҃сꙋ, да и҆зба́витъ ны̀ ѿ всѧ́кїѧ напа́сти и҆ сподо́битъ покланѧ́тисѧ є҆мꙋ̀ неѡсꙋжде́ннѡ.

Крⷭ҇тобг҃оро́диченъ: Предстоѧ́щи крⷭ҇тꙋ̀ сн҃а твоегѡ̀ и҆ бг҃а, грѣхѡ́въ мои́хъ ра́ди ᲂу҆ѧ́звлена и҆ распѧ́тагѡ, не прогнѣ́вайсѧ до конца̀, влⷣчце, но твои́ми всемо́щными мл҃твами и҆зба́ви мѧ̀ ѿ вѣ́чнагѡ ѡ҆сꙋжде́нїѧ.

Пѣ́снь д҃.

І҆рмо́съ: Прише́лъ є҆сѝ ѿ дв҃ы, не хода́тай, ни а҆́гг҃лъ, но са́мъ, гдⷭ҇и, вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.

Вѣ́рꙋ пра́вꙋю па́че зѣ́ницы ѻ҆́ка храни́лъ є҆сѝ во ѻ҆те́чествѣ свое́мъ, ѡ҆гражда́ѧ ю҆̀ ѿ лати́нѧнъ и҆ а҆га́рѧнъ, сегѡ̀ ра́ди сохрани́ тѧ гдⷭ҇ь ѿ всѧ́кагѡ лю́тагѡ ѡ҆бстоѧ́нїѧ.

А҆́гг҃ли сла́вꙋ бж҃їю воспѣ́ша на нб҃сѝ, є҆гда̀ ты̀, владисла́ве, въ землѝ се́рбстѣй мнѡ́гїѧ хра́мы и҆ ѻ҆би́тєли и҆́ночєскїѧ воздви́глъ є҆сѝ, и҆дѣ́же не ᲂу҆молка́етъ мл҃тва ко гдⷭ҇ꙋ.

Вои́стиннꙋ все́й вселе́ннѣй ꙗ҆ви́лсѧ є҆сѝ ᲂу҆добре́нїе, хрⷭ҇толюби́вый царю̀ владисла́ве, бл҃готворѧ́ше бо и҆ правосла̑внымъ цр҃квамъ восто́ка, да́ры бога̑тыѧ си́мъ посыла́ѧ чрез̾ са́ввꙋ бл҃же́ннаго.

Бг҃оро́диченъ: Ѡ҆дꙋшевле́ннаѧ пала́то цр҃ѧ̀ ца́рствꙋющихъ и҆ колесни́це ст҃а́ѧ гдⷭ҇а сла́вы, не ѡ҆ста́ви на́съ, въ добродѣ́тели ᲂу҆бо́гихъ, помозѝ на́мъ грѣ̑шнымъ, и҆ вкꙋ́пѣ со ст҃ы́мъ царе́мъ владисла́вомъ застꙋпѝ на́съ и҆ и҆зба́ви ѿ вѣ́чнагѡ безче́стїѧ.

Пѣ́снь є҃.

І҆рмо́съ: Свѣ́та пода́телю и҆ вѣкѡ́въ тво́рче, гдⷭ҇и, во свѣ́тѣ твои́хъ повелѣ́нїй наста́ви на́съ: ра́звѣ бо тебє̀ и҆но́гѡ бг҃а не зна́емъ.

Си́лою гдⷭ҇нею возвесели́лсѧ є҆сѝ, царю̀ владисла́ве, и҆ въ ра́дости воспѣва́ше є҆мꙋ̀ пѣ̑сни хвалє́бныѧ: ра́звѣ бо тебє̀ и҆но́гѡ бг҃а не зна́ю.

Положѝ ст҃ы́й са́вва на главѣ̀ твое́й вѣне́цъ ѿ ка́мене че́стна. живота̀ вѣ́чнагѡ проси́лъ є҆сѝ ᲂу҆ влⷣки живота̀, и҆ то́й тѝ дадѐ долготꙋ̀ дні́й и҆ сп҃се́нїе во вѣ́къ вѣ́ка.

Е҆́же ѿ врагѡ́въ наше́ствїе ᲂу҆кроти́лъ є҆сѝ, владисла́ве, побора́ше бо гдⷭ҇ь на нѧ̀ и҆ гнѣ́вомъ свои́мъ смѧтѐ ѧ҆̀. ꙗ҆́кѡ ᲂу҆пова́ше на бг҃а, тѣ́мже крѣ́постїю є҆гѡ̀ не подви́глсѧ є҆сѝ, мꙋ́дре.

Бг҃оро́диченъ: Тѧ̀, па́че ᲂу҆ма̀ и҆ словесѐ мт҃рь бж҃їю, вѣ́рнїи сла́вимъ є҆диномꙋ́дреннѡ и҆ воспѣва́емъ тѝ пѣ̑сни хвалє́бныѧ, родила́ бо є҆сѝ на́мъ вѣ́чное ра́дованїе.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю млⷭ҇рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

И҆злїѧ̀ се́рдце моѐ сло́во бл҃го: славословлє́нїѧ ст҃окра́сномꙋ владисла́вꙋ, и҆́же млⷭ҇тїю и҆ мꙋ́дростїю стѧжа̀ нбⷭ҇ное ра́дованїе, тѣ́мже глаго́лю а҆́зъ похвалы̑ царе́ви.

Гла́съ хрⷭ҇то́въ во є҆ѵⷢ҇лїи ᲂу҆слы́шавый, ѡ҆ некра́домѣмъ сокро́вищи попече́сѧ, и҆ расточи́въ и҆мѣ̑нїѧ своѧ̑ ни́щымъ и҆ ᲂу҆бѡ́гимъ, стѧжа́лъ є҆сѝ нбⷭ҇ное црⷭ҇твїе.

Ѿ ю҆́ности возлюби́лъ є҆сѝ ѿве́ржєнныѧ мі́ра сегѡ̀ и҆ сотвори́лъ ѧ҆̀ є҆сѝ дрꙋ́ги себѣ̀ ѿ бога́тства мимотекꙋ́щагѡ, сегѡ̀ ра́ди ѡ҆скꙋдѣ́вшꙋ тѝ въ животѣ̀ вре́меннѣмъ, ті́и прїѧ́ша тѧ̀ въ вѣ̑чнаѧ селє́нїѧ.

Бг҃оро́диченъ: Стѣна̀ є҆сѝ и҆ ѡ҆гражде́нїе на́мъ, прест҃а́ѧ дв҃о чⷭ҇таѧ, на рабы̀ твоѧ̑ неключи̑мыѧ ᲂу҆млⷭ҇рдисѧ, немощна̑ѧ ᲂу҆врачꙋ́й и҆ ѡ҆скꙋдѣва̑ющаѧ воспо́лни.

Конда́къ, гла́съ ѕ҃:

Цр҃ю̀ нбⷭ҇номꙋ подража́ѧ, ᲂу҆тѣ́шителю и҆ пода́телю жи́зни, бога̑тства твоѧ̑ ᲂу҆бѡ́гимъ расточа́ше, и҆ бы́лъ є҆сѝ прибѣ́жище всѧ́комꙋ стра́ждꙋщемꙋ, ᲂу҆тѣше́нїе и҆ застꙋпле́нїе ѡ҆би́димомꙋ, крѣ́пость и҆ ѡ҆гражде́нїе странѣ̀ твое́й, владисла́ве бг҃обл҃же́нне.

І҆́косъ:

Вои́стиннꙋ ꙗ҆ви́лъ є҆сѝ, владисла́ве, въ себѣ̀ само́мъ ца́рскїй ѻ҆́бразъ смире́нїемъ, млⷭ҇рдїемъ и҆ кро́тостїю, послꙋша́нїемъ цр҃ю̀ нбⷭ҇номꙋ и҆ любо́вїю къ лю́демъ твои̑мъ. тѣ́мже на́съ сподо́би взыва́ти тебѣ̀ и҆ ᲂу҆ми́льнѡ глаго́лати: ра́дꙋйсѧ, мнѡ́ги скѡ́рби претерпѣ́вый, ра́дꙋйсѧ, сла́бѡсти людскі̑ѧ ѿтꙋ́дꙋ позна́вый, ра́дꙋйсѧ, сла́дость жите́йскꙋю нивочто́же вмѣни́вый, ра́дꙋйсѧ, печа́ль люде́й на ра́дость претвори́вый, ра́дꙋйсѧ, се́рбскаѧ похвало̀ и҆ ᲂу҆добре́нїе, ра́дꙋйсѧ, царе́й сла́во и҆ ни́щихъ весе́лїе, владисла́ве бг҃обл҃же́нне.

Пѣ́снь з҃.

І҆рмо́съ: Тѣ́лꙋ злато́мꙋ премꙋ̑дрыѧ дѣ́ти не послꙋжи́ша, и҆ въ пла́мень са́ми поидо́ша, и҆ бо́ги и҆́хъ ѡ҆брꙋга́ша, средѝ пла́мене возопи́ша, и҆ ѡ҆росѝ ѧ҆̀ а҆́гг҃лъ: ᲂу҆слы́шасѧ ᲂу҆жѐ ᲂу҆́стъ ва́шихъ мл҃тва.

Пома́за дв҃да самꙋ́илъ прⷪ҇ро́къ и҆ногда̀, показꙋ́ѧ на се́мъ бж҃їе бл҃говоле́нїе, та́кѡ и҆ са́вва ст҃ы́й тѧ̀, владисла́ве, пома́за прозира́ѧ ѡ҆ тебѣ̀ бжⷭ҇твенное промышле́нїе.

Ѿбѣжѐ всѧ́каѧ ѕло́ба ѿ дꙋшѝ твоеѧ̀, ꙗ҆́кѡ въ се́рдцы твое́мъ хрⷭ҇то́съ воцр҃и́сѧ и҆ за́повѣдьми свои́ми бжⷭ҇твенными низложѝ всѧ́кое беззако́нїе и҆ горды́ню.

Дꙋхо́вный ра́зꙋмъ ѿ бг҃а стѧжа́лъ є҆сѝ, и҆ є҆гда̀ воста́ша на тѧ̀ лю́дїе неблагода́рнїи, кро́ткѡ ца́рствїе твоѐ бра́тꙋ ᲂу҆стꙋпи́лъ є҆сѝ, спаса́ѧ странꙋ̀ ѿ междоꙋсо́бныѧ бра́ни.

Бг҃оро́диченъ: И҆з̾ꙋмѣва́етъ всѧ́къ ᲂу҆́мъ пѣ́ти тѧ̀, бцⷣе, недоꙋмѣва́етъ всѧ́къ ѧ҆зы́къ и҆сповѣ́дати твоѧ̑ чꙋдеса̀, ѻ҆ба́че вмѣ́стѡ слове́съ вѣ́рꙋ прїимѝ. ты́ бо хрⷭ҇тїа́нъ є҆сѝ застꙋ́пница, тѧ̀ велича́емъ.

Пѣ́снь и҃.

І҆рмо́съ: Въ пе́щь ѻ҆́гненнꙋю ко ѻ҆трокѡ́мъ є҆врє́йскимъ снизше́дшаго, и҆ пла́мень въ ро́сꙋ прело́жшаго бг҃а, по́йте, дѣла̀, ꙗ҆́кѡ гдⷭ҇а, и҆ превозноси́те во всѧ̑ вѣ́ки.

Се́рбїи ꙗ҆ви́стасѧ вы̀, дво́ица чⷭ҇тна́ѧ, са́вво бг҃омꙋ́дре и҆ владисла́ве доброхва́льне, пе́рвый се́рбскїй а҆рхїере́ю и҆ вѣнча́нный и҆́мъ пресла́вный госꙋда́рю, но моли́та вкꙋ́пѣ ѡ҆ стра́ждꙋщемъ ѻ҆те́чествѣ ва́шемъ.

Пти́ца ѡ҆брѣ́те себѣ̀ хра́минꙋ, и҆ го́рлица гнѣздо̀ себѣ̀, та́кожде владисла́въ ѻ҆би́тель ст҃ꙋ́ю созда̀, и҆дѣ́же положѝ мо́щи са́ввы ст҃и́телѧ, по́слѣжде и҆ са́мъ ᲂу҆поко́исѧ та́мѡ.

Ѻ҆би́тель миле́шевскаѧ процвѣтѐ ꙗ҆́кѡ крі́нъ се́льный, и҆мꙋ́щи въ себѣ̀ мо́щи двою̀ ᲂу҆гѡ́дникꙋ бж҃їю: са́ввы ст҃и́телѧ и҆ владисла́ва царѧ̀, и҆́хже мл҃твами, гдⷭ҇и, поми́лꙋй на́съ.

Бг҃оро́диченъ: Дв҃о влⷣчце, мт҃и всѣ́хъ на́съ, не пре́зри люде́й согрѣши́вшихъ, на ча̑да твоѧ̑ ᲂу҆млⷭ҇рдисѧ и҆ покры́й на́съ чⷭ҇тны́мъ твои́мъ ѡ҆мофо́ромъ.

Пѣ́снь ѳ҃.

І҆рмо́съ: Безнача́льна роди́телѧ сн҃ъ, бг҃ъ и҆ гдⷭ҇ь, вопло́щьсѧ ѿ дв҃ы на́мъ ꙗ҆ви́сѧ, ѡ҆мрачє́ннаѧ просвѣти́ти, собра́ти расточє́ннаѧ. тѣ́мъ всепѣ́тꙋю бцⷣꙋ велича́емъ.

Ѡ҆брѣ́лъ є҆сѝ вѣ́чнꙋю сла́вꙋ, бл҃же́нне, со ст҃ы́ми ᲂу҆покоева́ѧсѧ, тѣ́мже и҆ чтꙋ́щихъ тѧ̀ помина́й ᲂу҆ прⷭ҇то́ла гдⷭ҇а вседержи́телѧ.

Бл҃же́нъ разꙋмѣва́ѧй на ни́ща и҆ ᲂу҆бо́га, въ де́нь лю́тъ и҆зба́витъ є҆го̀ гдⷭ҇ь, тѣ́мже и҆ ты̀, царю̀ владисла́ве, ѡ҆брѣ́лъ є҆сѝ мздꙋ̀ првⷣныхъ.

И҆з̾ꙋкра́шенный со́нмъ царе́й бл҃гочести́выхъ въ странѣ̀ се́рбстѣй пресла́внѡ просїѧ̀: сѷмеѡ́нъ, стефа́нъ, ла́зарь и҆ и҆́ни мно́зи. съ ни́миже, владисла́ве досточꙋ́дне, моли́сѧ ѡ҆ на́съ.

Многогрѣ́шный и҆ сꙋемꙋ́дренный а҆́зъ, не возмого́хъ принести́ ти пѣ́нїѧ досто́йнагѡ, владисла́ве, ѻ҆ба́че вѣ́дꙋще тѧ̀ млⷭ҇тива и҆ нищелю́бна, не пре́зри моегѡ̀ ᲂу҆бо́жества, молю́сѧ.

Бг҃оро́диченъ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ сла́ва тѝ подоба́етъ, влⷣчце, превознесе́нна бо па́че го́рнихъ чинѡ́въ, роди́вши сн҃а, превѣ́чнаго бг҃а.

Свѣти́ленъ, гла́съ а҃:

Вои́стиннꙋ ꙗ҆ви́лсѧ є҆сѝ ни́щымъ сокро́вище, стра̑ннымъ прибѣ́жище, ᲂу҆тѣше́нїе пла́чꙋщымъ, ѡ҆би̑димымъ застꙋпле́нїе, странѣ̀ се́рбстѣй сла́ва и҆ ѡ҆гражде́нїе. тѣ́мже и҆ на́мъ, ст҃е владисла́ве, бꙋ́ди предста́тель до́брый и҆ мл҃твенникъ всеꙋсе́рдный.

Бг҃оро́диченъ: Ѽ всепѣ́таѧ мт҃и, ро́ждшаѧ всѣ́хъ влⷣкꙋ и҆ гдⷭ҇а, на рабы̀ твоѧ̑ ᲂу҆млⷭ҇рдисѧ и҆ кꙋ́пнѡ со ст҃ы́мъ владисла́вомъ молѝ сп҃сти́сѧ дꙋша́мъ на́шымъ.