Канон святому апостолу Тимофею Ефесскому

Пѣ́снь а҃.

І҆рмо́съ: Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Воста̑нїѧ страсте́й и҆ невѣ́дѣнїѧ мра́къ, моли́твами твои́ми, блаже́нне, разорѝ свѣ́тлою безстра́стїѧ благода́тїю, ꙗ҆́кѡ да бг҃оѧвле́нна ны́нѣ досто́йнѡ воспою́ тѧ.

Ви́дѣвъ предвѣ́децъ и҆ бг҃ъ твоегѡ̀ ᲂу҆ма̀ добро́тꙋ, тїмоѳе́е, бж҃е́ствєннымъ а҆пⷭ҇лѡмъ тѧ̀ сослꙋжи́телѧ ᲂу҆досто́ивъ показа̀, мꙋ́дрымъ про́мысломъ ѡ҆ на́съ промышлѧ́ѧ.

Є҆ди́но пресꙋ́щественное нача́ло, проразꙋмѣва́ющее всѧ̑, вѣ́мы: ѿ є҆́ллинъ бо а҆пⷭ҇лъ хрⷭ҇то́вою просвѣще́нъ бл҃года́тїю, ны́нѣ бж҃е́ственномꙋ па́ѵлꙋ счислѧ́етсѧ тїмоѳе́й.

Бг҃оро́диченъ: Ра́дꙋйсѧ, благода́ти и҆сто́чниче, ра́дꙋйсѧ, лѣ́ствице и҆ две́ре нбⷭ҇наѧ, ра́дꙋйсѧ, свѣ́щниче и҆ ста́мно злата́ѧ, и҆ горо̀ несѣко́маѧ, ꙗ҆́же жизнода́вца хрⷭ҇та̀ мі́рꙋ ро́ждшаѧ.

Пѣ́снь г҃.

І҆рмо́съ: Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче.

И҆злїѧ́сѧ, всебл҃же́нне, бога́тнѡ бл҃года́ть во ᲂу҆стна́хъ твои́хъ, и҆ рѣ́ки догма́тѡвъ и҆сточѝ, цр҃ковь хрⷭ҇то́вꙋ напаѧ́ющыѧ, и҆ многопло́денъ приносѧ́щыѧ пло́дъ, тїмоѳе́е хрⷭ҇топроповѣ́дниче, бг҃омꙋ́дре а҆по́столе.

Но́ги твоѧ̑ прⷪ҇ро́чески, всеблаже́нне, ᲂу҆краси́шасѧ, всѧ́къ бо ᲂу҆́мъ ꙗ҆́вѣ преимꙋ́щїй, благовѣсти́лъ є҆сѝ ми́ръ, всемꙋ́дре, дре́внюю разрꙋши́вшагѡ человѣ́кѡвъ бра́нь, сп҃са всѣ́хъ и҆ гдⷭ҇а.

Оу҆мертви́въ твоѧ̑ ᲂу҆́ды плотскі̑ѧ, сло́вꙋ повинꙋ́лъ є҆сѝ хꙋ̑ждшаѧ, блаже́нне тїмоѳе́е, влады́чество пода́въ лꙋ́чшемꙋ, и҆ стра̑сти ᲂу҆держа́въ, дꙋ́шꙋ ᲂу҆ѧсни́лъ є҆сѝ, наставлѧ́емь па́ѵловыми ᲂу҆чє́нїи.

Бг҃оро́диченъ: И҆зъ тебє̀ прозѧбѐ, чⷭ҇таѧ, цвѣ́тъ неꙋвѧда́емый, бл҃гоꙋха́ющїй всѐ человѣ́чество бжⷭ҇твеннымъ мѵ́ромъ є҆стества̀ своегѡ̀, и҆́же ѻ҆ц҃ꙋ̀ собезнача́льный, и҆ и҆зъ тебє̀ бы́въ подъ лѣ́томъ, дв҃о всенепоро́чнаѧ.

Сѣда́ленъ, гла́съ д҃.

Бж҃е́ственными дарова̑нїи ᲂу҆кра́шенъ, ᲂу҆добри́лъ є҆сѝ, сла́вне, є҆фе́сскꙋю свѣ́тлꙋю митропо́лїю, а҆пⷭ҇ле: проповѣ́дникъ бо показа́лсѧ є҆сѝ, съ па́ѵломъ бжⷭ҇твеннымъ всѣ̑мъ провозвѣсти́лъ є҆сѝ спаси́тельное сло́во. тѣ́мже торжествꙋ́емъ вѣ́рою па́мѧть твою̀.

Бг҃оро́диченъ: Дв҃о всенепоро́чнаѧ, ꙗ҆́же пресꙋ́щнаго бг҃а ро́ждшаѧ, со безпло́тными того̀ непреста́ннѡ молѝ, ѡ҆ставле́нїе прегрѣше́нїй и҆ и҆справле́нїе житїѧ̀ да́ти на́мъ пре́жде конца̀, вѣ́рою и҆ любо́вїю пою́щымъ тѧ̀ по до́лгꙋ, є҆ди́на всепѣ́таѧ.

Крⷭ҇тобг҃оро́диченъ: На крестѣ́ тѧ возвы́шена ꙗ҆́кѡ ᲂу҆зрѣ̀ пречⷭ҇таѧ мт҃и твоѧ̀, сло́ве бж҃їй, мт҃рски рыда́ющи вѣща́ше: что̀ но́вое и҆ стра́нное сїѐ чꙋ́до, сн҃е мо́й; ка́кѡ, жи́знь всѣ́хъ, вкꙋша́еши сме́рть, ѡ҆живи́ти мє́ртвыѧ хотѧ̀, ꙗ҆́кѡ милосе́рдъ.

Пѣ́снь д҃.

І҆рмо́съ: Го́рꙋ тѧ̀, благода́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.

Зако́ннѡ, всеблаже́нне, пострада́ти и҆зво́ливъ, воздержа́нїемъ всеконе́чнымъ треволнє́нїѧ страсте́й ᲂу҆мꙋ̀ покори́лъ є҆сѝ, добродѣ́тели прїе́мъ соверше́нїе, великопроповѣ́дниче бг҃омꙋ́дре тїмоѳе́е.

Ѡ҆блиста́въ ꙗ҆́кѡ со́лнце па́ѵелъ, и҆спꙋстѝ ꙗ҆́коже зарю̀ свѣ́тлꙋ, вселе́ннꙋю бога́тнымъ свѣ́томъ просвѣща́ѧ, свѣтоѧвле́ннѡ тѧ̀, бг҃оѧвле́нне тїмоѳе́е, къ наставле́нїю на́шемꙋ и҆ ᲂу҆твержде́нїю.

Возжела́въ те́плѣ жела́нїй кра́йнѣйшее, и҆ любо́вїю сраствори́всѧ, раче́нїемъ на дрꙋгꙋ́ю жи́знь преше́лъ є҆сѝ, бг҃опрїѧ́тне, всегда̀ твоего̀ созира́ѧ рачи́телѧ, и҆ тогѡ̀ видѣ́нїѧ насыща́ѧсѧ.

Бг҃оро́диченъ: Ра́дость тебѣ̀ ꙗ҆́вѣ съ нб҃сѐ прише́дъ а҆рхїстрати́гъ, чⷭ҇таѧ, благовѣстѝ, ре́къ: бг҃ъ и҆зы́детъ съ пло́тїю и҆зъ тебє̀, дв҃о всечи́стаѧ, во спасе́нїе любо́вїю пою́щихъ тѧ̀.

Пѣ́снь є҃.

І҆рмо́съ: Бг҃ъ сы́й ми́ра, ѻ҆ц҃ъ щедро́тъ, вели́кагѡ совѣ́та твоегѡ̀ а҆́гг҃ла, ми́ръ подава́юща, посла́лъ є҆сѝ на́мъ: тѣ́мъ бг҃оразꙋ́мїѧ къ свѣ́тꙋ наста́вльшесѧ, ѿ но́щи ᲂу҆́тренююще, славосло́вимъ тѧ̀, чл҃вѣколю́бче.

Пе́рвагѡ и҆ всѣ́хъ вино́внагѡ свѣ́та невеще́ственными сїѧ̑нїи просвѣща́емь, мі́ръ ᲂу҆ѧсни́лъ є҆сѝ проповѣ́данїемъ честны́мъ: свѣти́льникъ бл҃гоче́стїѧ жи́зни сло́во преимѣ́нїѧ проѧвле́ннѡ ꙗ҆ви́лсѧ є҆сѝ, сщ҃еннотаи́нниче всебл҃же́нне.

Па́ѵла бж҃е́ственнагѡ и҆́стинный ᲂу҆чени́къ ᲂу҆чи́телѧ стопа́мъ послѣ́дꙋетъ, сегѡ̀ сѣ́ѧ ᲂу҆чє́нїѧ вѣ̑рнымъ: и҆́миже благоче́стїѧ къ свѣ́тꙋ наставлѧ́еми, и҆зъ но́щи ᲂу҆́тренююще славосло́вимъ тѧ̀, человѣколю́бче.

Просвѣще́нїемъ па́ѵелъ вторы́й ꙗ҆влѧ́ешисѧ, слꙋжа́щїй пе́рвѣй свѣ́тлости, сеѧ̀ позна́нїемъ просвѣтѝ на́съ. Сегѡ̀ сво́инникъ тїмоѳе́й ꙗ҆ви́сѧ, тогѡ̀ всеѻрꙋ́жїемъ побѣди́тельнѡ ѡ҆гражда́емь.

Бг҃оро́диченъ: Проклѧ́тїе є҆́ѵы, всѣ́хъ мт҃ре, твои́мъ ржⷭ҇тво́мъ, дв҃о, ᲂу҆праздни́ла є҆сѝ, мі́рꙋ благослове́нїе и҆зрасти́вши хрⷭ҇та̀: тѣ́мъ тѧ̀ ра́дꙋющесѧ, и҆ ᲂу҆сты̀ и҆ ѧ҆зы́комъ бцⷣꙋ вои́стиннꙋ и҆сповѣ́дающе велича́емъ.

Пѣ́снь ѕ҃.

І҆рмо́съ: И҆зъ ᲂу҆тро́бы і҆ѡ́нꙋ младе́нца и҆зблева̀ морскі́й ѕвѣ́рь, ꙗ҆кова̀ прїѧ́тъ: въ дв҃ꙋ же все́льшеесѧ сло́во, и҆ пло́ть прїе́мшее про́йде сохра́ншее нетлѣ́ннꙋ. Є҆гѡ́же бо не пострада̀ и҆стлѣ́нїѧ, ро́ждшꙋю сохранѝ неврежде́ннꙋ.

Колесни́ца бж҃їѧ ꙗ҆ви́лсѧ є҆сѝ, тїмоѳе́е, носѧ́щи тогѡ̀ бжⷭ҇твенное и҆́мѧ, предъ лице́мъ безбо́жныхъ мꙋчи́телей, бг҃опрїѧ́тне, не ᲂу҆жаса́ѧсѧ си́хъ свирѣ́пства: ты́ бо въ непобѣди́мꙋю сп҃са крѣ́пость ѡ҆дѣ́ѧлсѧ є҆сѝ.

Вѣне́цъ благолѣ́пенъ прїѧ́лъ є҆сѝ, пребога́те тїмоѳе́е, бг҃омꙋ́дре а҆по́столе: дїади́мою црⷭ҇твїѧ досто́йнѡ ѡ҆бложи́лсѧ є҆сѝ, и҆ предста́лъ є҆сѝ прⷭ҇то́лꙋ влⷣки твоегѡ̀, съ па́ѵломъ ра́дꙋѧсѧ въ се́лѣхъ нбⷭ҇ныхъ, блаже́нне.

Мѵ́ромъ ᲂу҆́мнагѡ, тїмоѳе́е всече́стне, пло́тїю на́съ ра́ди и҆стоще́ннагѡ хрⷭ҇та̀ ѡ҆бонѧва́емь, благово́нїе сегѡ̀ прїѧ́лъ є҆сѝ: и҆ пре́далъ є҆сѝ вѣ́рою тебѣ̀ притека́ющымъ, таи́нниче неизрече́нныхъ свѧ́те, тогѡ̀ мы́сленныѧ любвѐ.

Бг҃оро́диченъ: Ве́сь ли́къ ѿ бг҃а наꙋче́нъ прⷪ҇ро́ческїй, твоѐ проречѐ та́инство несказа́ннагѡ и҆ бж҃е́ственнагѡ зача́тїѧ, є҆́же и҆зъ тебє̀ бж҃е́ственнагѡ сло́ва, мт҃и дв҃о: ты́ бо и҆́стиннѣйшїй и҆ дре́внїй совѣ́тъ ꙗ҆ви́ла є҆сѝ.

Конда́къ, гла́съ а҃.

Бж҃е́ственнагѡ ᲂу҆ченика̀ и҆ спꙋтеше́ственника па́ѵлова тїмоѳе́а, вѣ́рнїи, воспои́мъ всѝ: съ си́мъ почита́юще мꙋ́драго а҆наста́сїа, возсїѧ́вшаго ѿ персі́ды ꙗ҆́кѡ ѕвѣздꙋ̀, и҆ ѿгонѧ́щаго дꙋшє́вныѧ на́шѧ стра̑сти, и҆ недꙋ́ги тѣлє́сныѧ.

І҆́косъ:

Со́лнца мно́жае возсїѧ̀ лѣ́тнее ст҃ы́хъ торжество̀, и҆ вѣ̑рныѧ просвѣтѝ, и҆ де́мѡнскꙋю тмоѻбра́знꙋю си́лꙋ ѿгна̀ всю̀, и҆ недꙋ́ги ѡ҆чи́сти, и҆ прошє́нїѧ просѧ́щихъ и҆спо́лни. тѣ́мже притека́ю а҆́зъ ѻ҆каѧ́нный, и҆ молю́сѧ ѿ болѣ́зни стра́стнагѡ моегѡ̀ се́рдца, да прїимꙋ̀ ꙗ҆̀же хощꙋ̀, и҆ ѡ҆брѧ́щꙋ ꙗ҆̀же тре́бꙋю: премѣне́нїе печа́ли, и҆ житїѐ безпеча́льно, и҆ прегрѣше́нїй ѡ҆ставле́нїе, и҆ бж҃е́ственное врачева́нїе, дꙋше́вное и҆ тѣле́сное.

Пѣ́снь з҃.

І҆рмо́съ: Тебѐ ᲂу҆́мнꙋю, бцⷣе, пе́щь разсмотрѧ́емъ, вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ, во чре́вѣ твое́мъ всецѣ́лъ, хва́льный ѻ҆ц҃є́въ бг҃ъ и҆ препросла́вленъ.

Слико́вникъ нбⷭ҇нагѡ чи́на ты̀ по досто́инствꙋ бы́въ, весели́шисѧ ра́достнѡ, зарѝ свѣтода́тельныѧ, блаже́нне, насыща́ѧсѧ, свѧщеннотаи́нниче тїмоѳе́е, хва́льнаго возвѣща́ѧ бг҃а и҆ препросла́вленнаго.

Свѧщеннодѣ́йствꙋѧ хрⷭ҇то́во є҆ѵⷢ҇лїе, ѿ добродѣ́тельныхъ высо́тъ, бг҃опи̑саннаѧ посла̑нїѧ па́ѵелъ бж҃е́ственнѣйшїй ра́дꙋѧсѧ посла̀, ꙗ҆́кѡ ᲂу҆ченикꙋ̀ тебѣ̀, тїмоѳе́е, хва́льнаго возвѣща́ѧ бг҃а и҆ препросла́вленнаго.

Немощно́е пло́ти ᲂу҆крѣплѧ́ше благомо́щїемъ дꙋшѝ, ꙗ҆́кѡ безтѣле́сенъ бо на землѝ ты̀ жи́тельствовавъ, мꙋ́ченикъ бы́лъ є҆сѝ во главꙋ̀ сокрꙋша́емь, свѧщеннодѣ́телю та́инствъ бж҃їихъ, бг҃облаже́нне.

Бг҃оро́диченъ: Ра́дꙋйсѧ, чⷭ҇таѧ, и҆зъ тебє̀ про́йде па́стырь, и҆́же во а҆да́мовꙋ ко́жꙋ ѡ҆дѣ́ѧвсѧ, вои́стиннꙋ превозноси́мый, во всего́ мѧ человѣ́ка, за благоꙋтро́бїе непости́жное хва́льный ѻ҆ц҃є́въ бг҃ъ и҆ препросла́вленъ.

Пѣ́снь и҃.

І҆рмо́съ: Чꙋ́да преесте́ственнагѡ росода́тельнаѧ и҆з̾ѡбразѝ пе́щь ѻ҆́бразъ: не бо̀ ꙗ҆̀же прїѧ́тъ, пали́тъ ю҆́ныѧ, ꙗ҆́кѡ нижѐ ѻ҆́гнь бж҃ества̀ дв҃ы, въ ню́же вни́де ᲂу҆тро́бꙋ. тѣ́мъ воспѣва́юще воспое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Стоѧ́нїѧ а҆́гг҃льскагѡ сподоблѧ́емь, показа́лсѧ є҆сѝ, тїмоѳе́е блаже́нне, небе́сныхъ чинѡ́въ, наꙋчи́всѧ бо преесте́ственнѡ, свѣ́тлости си́хъ подража́лъ є҆сѝ, мꙋ́дре. съ ни́миже воспѣва́еши веселѧ́сѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Си́лою ѡ҆дѣ́ѧвсѧ съ нб҃сѐ, ꙗ҆́кѡ а҆пⷭ҇лъ ꙗ҆ви́лсѧ є҆сѝ, бг҃омꙋ́дре, наше́дшею странноѻбра́знѡ ᲂу҆ч҃никѡ́мъ сло́ва и҆ самови́дцємъ, ѽ тїмоѳе́е! съ ни́миже воспѣва́еши ра́дꙋѧсѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Ста́лъ є҆сѝ, жела́нїѧ ꙗ҆́вѣ, всеблаже́нне, кра́йнѣйшагѡ ꙗ҆́кѡ дости́глъ до́брыхъ, тїмоѳе́е бг҃опроповѣ́дниче, всегда̀ ѡ҆сїѧ́емь свѣ́томъ трⷪ҇ческимъ ꙗ҆́снѡ. и҆ ны́нѣ воспѣва́еши веселѧ́сѧ: да бл҃гослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Бг҃оро́диченъ: А҆рха́гг҃льскими пѣснослѡ́вїи сла́вимый бога́тное сло́во на́съ ра́ди ѡ҆бнища̀, тѧ̀ мт҃рь добро́тꙋ і҆а́кѡвлю, благослове́ннаѧ, и҆збра́въ. тѣ́мже воспѣва́юще пое́мъ: да благослови́тъ тва́рь всѧ̀ гдⷭ҇а, и҆ превозно́ситъ во всѧ̑ вѣ́ки.

Пѣ́снь ѳ҃.

І҆рмо́съ: Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ, и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Рече́нїе дв҃дово и҆спо́лнисѧ, ꙗ҆́кѡ бо мо́лнїѧ вселе́ннѣй ꙗ҆ви́лсѧ є҆сѝ, проповѣ́данїемъ ѡ҆зарѧ́ѧ концы̀, всеприснопа́мѧтне бл҃же́нне тїмоѳе́е: тѣ́мъ тѧ̀ бг҃оѧвле́нне, непреста́ннѡ велича́емъ.

Заре́ю свѣтонача́льною, премꙋ́дре, бг҃онача́льнымъ трисо́лнечнымъ ѡ҆сїѧ́нїемъ насыща́ѧсѧ, и҆ чи́стѡ наслажда́ѧсѧ, пою́щыѧ тѧ̀, бл҃же́нне, спаса́й ѿ мра́ка прегрѣше́нїй, свѧщеннотаи́нниче всече́стне.

Ра́вна тѧ̀ ѻ҆ц҃ꙋ̀ и҆ дх҃ꙋ, є҆диноро́дне, пра́вѣ мꙋ́дрствꙋюще, сла́вимъ, ᲂу҆че́ньми а҆пⷭ҇толѡвъ твои́хъ, влⷣко, ᲂу҆твержда́еми, па́ѵла, проповѣ́дника твоегѡ̀ смотре́нїѧ, и҆ тїмоѳе́а бг҃омꙋ́драгѡ.

Бг҃оро́диченъ: Ѽ стра́шнагѡ твоегѡ̀ чꙋдесѐ! ты́ бо, дв҃о бцⷣе, та́инство, пре́жде родѡ́въ и҆ пре́жде вѣкѡ́въ сокрове́нное въ бз҃ѣ, всѧ̑ созда́вшемъ, ро́ждши бг҃а сло́ва несказа́ннѡ, ꙗ҆ви́ла є҆сѝ.

Свѣти́ленъ.

Два̀ свѣти̑ла въ мі́рѣ сїѧ́ютъ свѣтоно́снѡ, тїмоѳе́й же вели́кїй въ хрⷭ҇то́выхъ а҆пⷭ҇толѣхъ и҆ а҆наста́сїй мч҃никъ во є҆диноѻбра́зныхъ, и҆̀хже восхва́лимъ вкꙋ́пѣ.

Бг҃оро́диченъ: Всѝ вѣ́рнїи тѧ̀ хода́таицꙋ, ко и҆зъ тебє̀ ны́нѣ ро́ждшемꙋсѧ предлага́емъ, прест҃а́ѧ: мы́ же лꙋ́чшагѡ ра́ди сраспина́емсѧ семꙋ̀. тѣ́мже не преста́й ѡ҆ на́съ молѧ́щи.