Канон святому апостолу Архиппу Колосскому

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крⷭ҇тоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Ѡ҆блиста́въ просвѣще́нїемъ бл҃года́ти, па́ѵелъ премꙋ́дрый, ꙗ҆́коже зарю̀, бл҃же́нне, тѧ̀ свѣ́тлꙋ и҆спꙋстѝ, ѿгонѧ́щꙋ многобо́жїѧ, а҆рхі́ппе, тмꙋ̀ глꙋбоча́йшꙋю дх҃омъ.

Глагѡ́лъ бжⷭ҇твенными плени́цами ᲂу҆ловле́нъ бы́лъ є҆сѝ па́ѵла проповѣ́дника: и҆ и҆зъ глꙋбины̀ ѕло́бы вра́жїѧ лю́ди пресла́внѡ ᲂу҆лови́лъ є҆сѝ, и҆ слове́сно бра́шно на бжⷭ҇твеннꙋю трапе́зꙋ прине́слъ є҆сѝ.

Въ ри́зꙋ ѡ҆дѣ́ѧнъ, а҆рхі́ппе, бжⷭ҇твенныѧ бл҃года́ти, ѡ҆бнажи́вшыѧсѧ сла́вы бжⷭ҇твенныѧ въ нетлѣ́нїѧ ри́зꙋ и҆ спасе́нїѧ, сла́вне, ѻ҆де́ждꙋ бжⷭ҇твеннꙋю ѡ҆дѣ́ѧлъ є҆сѝ.

Бг҃оро́диченъ: Ви́дѣвше прⷪ҇ро́ческими ѻ҆чесы̀ и҆здале́ча, всечⷭ҇таѧ, є҆́же па́че ᲂу҆ма̀, твоегѡ̀ бжⷭ҇твеннагѡ ржⷭ҇тва̀ стра́шное та́инство бг҃оглаго́ливїи, пречⷭ҇таѧ, разли́чными ѻ҆́бразы ᲂу҆ѧсни́ша.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Вѣ́рна тѧ̀ раба̀ хрⷭ҇то́ва па́ѵелъ бжⷭ҇твенный свидѣ́тельствꙋетъ, а҆рхі́ппе. и҆ свѧще́нна проповѣ́дника, и҆ сво́ина, блаже́нне.

Распалѧ́емь мы́сленнѡ ᲂу҆тѣ́шителѧ ѻ҆гне́мъ, попали́лъ є҆сѝ ве́щь го́рькꙋю, а҆рхі́ппе, і҆дѡлонеи́стовства, всехва́льне.

Житїѐ твоѐ свѣтоза́рно добродѣ́тельными мо́лнїѧми просїѧ̀, просвѣща́ѧ, а҆рхі́ппе, благоче́стнѡ тѧ̀ почита́ющыѧ.

Бг҃оро́диченъ: Хра́мъ показа́ласѧ є҆сѝ бж҃їй вмѣсти́теленъ преѧвле́ннѡ, всечⷭ҇таѧ, и҆ чи́сто селе́нїе и҆ бг҃оподо́бно жили́ще.

Сѣда́ленъ, гла́съ а҃.

Па́ѵловъ ᲂу҆чени́къ бы́въ, бг҃оно́се, просвѣти́лъ є҆сѝ лю́ди, воспѣва́ти трⷪ҇цꙋ, хра́мы же разори́лъ є҆сѝ па̑гꙋбныѧ бл҃года́тїю, пострада́въ же терпѣли́внѡ, вѣнцы̀ ра́дꙋѧсѧ прїѧ́лъ є҆сѝ, ѡ҆ на́съ молѧ́сѧ, блаже́нне а҆рхі́ппе.

Сла́ва, и҆ ны́нѣ, бг҃оро́диченъ: Безневѣ́стнаѧ чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й, и҆ лю́тыхъ ѡ҆бстоѧ́нїй всѣ́хъ и҆зба́ви, и҆̀же на тѧ̀ ᲂу҆пова́нїе, ѻ҆трокови́це, и҆мꙋ́щыѧ, и҆ дꙋ́шы на́шѧ спасѝ бжⷭ҇твенными моли́твами твои́ми.

Крⷭ҇тобг҃оро́диченъ: Зрѧ́щи тѧ̀, хрⷭ҇тѐ, всенепоро́чнаѧ мт҃и, ме́ртва на крⷭ҇тѣ̀ просте́рта, вопїѧ́ше: сн҃е мо́й, собезнача́льне ѻ҆ц҃ꙋ̀ и҆ дх҃ꙋ, что̀ неизрече́нное твоѐ сїѐ смотре́нїе, и҆́мже спа́слъ є҆сѝ пречⷭ҇тыхъ рꙋ́къ твои́хъ, ще́дре, созда́нїе;

Пѣ́снь д҃.

І҆рмо́съ: Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.

Повѣствꙋ́юща бжⷭ҇твєннаѧ, и҆ безбѡ́жныѧ ꙗ҆вле́ннѣ ѡ҆блича́юща, беззако́нный гони́тель бїе́нїємъ предаде́ тѧ, и҆ ра́намъ, а҆рхі́ппе, и҆ различноѻбра̑знымъ мꙋ́камъ.

До́брѣ проходѧ̀ житїѐ, бл҃же́нне, кончи́нꙋ ѡ҆брѣстѝ блаже́ннꙋ вои́стиннꙋ сподо́билсѧ є҆сѝ: мꙋ́ченикъ бо бы́лъ є҆сѝ хрⷭ҇то́въ, до́блественнѣйше болѣ̑зни претерпѣ́въ тѣлє́сныѧ.

Жирꙋ́ющꙋю безбо́жїѧ гни́лость, благочести́выхъ и҆сполне́нїе, ᲂу҆ста́вилъ є҆сѝ сла́дкою со́лїю слове́съ твои́хъ, и҆ ра́дꙋѧсѧ взыва́лъ є҆сѝ: сла́ва си́лѣ твое́й, гдⷭ҇и.

Бг҃оро́диченъ: Ꙗ҆́кѡ присѣ́ннꙋ прови́дѧ тѧ̀ дре́вле го́рꙋ а҆ввакꙋ́мъ, всенепоро́чнаѧ, носѧ́щꙋ сло́во, всѧ̑ ѡ҆сѣнѧ́ющее ѿ пла́мене престꙋпле́нїѧ и҆ грѣхѡ́въ, ѻ҆трокови́це, жже́нїѧ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.

Бжⷭ҇твенными мо́лнїѧми всемꙋ́драгѡ проповѣ́данїѧ, просвѣти́лъ є҆сѝ невѣ́дѣнїѧ но́щїю ѡ҆держи̑мыѧ, бг҃омꙋ́дре всеблаже́нне.

Бжⷭ҇твеннаѧ рѣка̀ проше́дши и҆зъ се́рдца твоегѡ̀, потопѝ пото́ки лє́стныѧ, и҆ ра́зꙋмы вѣ́рныхъ, преблаже́нне, напоѝ.

Вжилѧ́емь благи́ми наде́ждами, претерпѣ́лъ є҆сѝ влеко́мь четы́рьми, и҆ зе́млю ѡ҆свѧща́ѧ кровьмѝ, бг҃опрїѧ́тне.

Бг҃оро́диченъ: Тѧ̀ є҆ди́нꙋ ѿ всѣ́хъ родѡ́въ и҆збра̀ гдⷭ҇ь, бцⷣе? и҆ и҆зъ тебє̀ воплоти́сѧ, ѡ҆божи́въ человѣ́чество.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Ника́коже прельще́ньми ѡ҆слабѣ́вша, льсти́вый неми́лостивнѡ тѧ̀ ссѣца́етъ ра́нами, бг҃омꙋ́дре, смотрѧ́юща къ сла́вѣ, ю҆́же тѝ хрⷭ҇то́съ пода́стъ, прославлѧ́ѧ тѧ̀.

Полкѝ врагѡ́въ неви́димыхъ ꙗ҆́звами ᲂу҆ѧзви́лъ є҆сѝ, бл҃же́нне, пло́ти твоеѧ̀, а҆рхі́ппе, и҆ ѡ҆блича́ѧ се́рдце мꙋчи́телево, терза́ньми расто́рглъ є҆сѝ.

И҆̀же ка́менїю нечꙋ́вственнымъ се́рдцемъ слꙋжа́щїи ка́менїемъ побива́ютъ тѧ̀, бл҃же́нне, живота̀ ка́мень и҆сповѣ́дающа, и҆ пре́лести ᲂу҆твержде́нїе, мч҃ниче, сокрꙋша́юща.

Бг҃оро́диченъ: Оу҆мерщвле́нїѧ совле́ксѧ, въ жи́знь ѡ҆блече́сѧ въ раѝ, дв҃о, а҆да́мъ, твои́мъ же ѡ҆безсме́ртвисѧ живоно́снымъ ржⷭ҇тво́мъ, всест҃а́ѧ бг҃оневѣ́сто.

Конда́къ, гла́съ д҃.

Ꙗ҆́кѡ ѕвѣздꙋ̀ вели́кꙋю тѧ̀ цр҃ковь и҆мꙋ́щи, а҆рхі́ппе, чꙋде́съ твои́хъ лꙋча́ми просвѣща́ема, зове́тъ тебѣ̀: спасѝ вѣ́рою почита́ющыѧ па́мѧть твою̀.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Бг҃оглаго́ланьми бг҃омꙋ́дрыми, всебл҃же́нне, свидѣ́тельствованъ, ра́зꙋмомъ и҆́стиннымъ, тмꙋ̀ невѣ́дѣнїѧ ѿ дꙋ́шъ ѿгна́лъ є҆сѝ мꙋ́дрости благода́тїю честно́мꙋ сло́вꙋ твоемꙋ̀ повинꙋ́вшыѧсѧ.

Въ ро́вѣ тѧ̀, мꙋ́чениче, до́льнѣйшемъ погреба́ютъ наро́ди ѕлочести́выхъ, и҆ ка́менїемъ неми́лостивнѡ ᲂу҆мерщвлѧ́ютъ воспѣва́ющаго: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Землѧ̀ тѣ́ло погребе́ное, мꙋ́чениче, показꙋ́етъ, и҆сточа́ѧ и҆сцѣле́нїй во́ды вѣ̑рнымъ: нб҃о же, бл҃же́нный а҆рхі́ппе, дꙋ́хъ тво́й страстоте́рпчєскимъ дꙋша́мъ причита́етъ.

Бг҃оро́диченъ: Зе́млю ᲂу҆́бѡ мгло́ю, нб҃о же ѻ҆́блаки гдⷭ҇ь, ѻ҆трокови́це, ѡ҆дѣва́ѧ, во́лею въ пло́ть ме́ртвеннꙋю ѿ крове́й твои́хъ ѡ҆дѣва́етсѧ, во ѻ҆де́ждꙋ сла́вы безсме́ртныѧ ѡ҆дѣва́ѧ человѣ́ка.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ: ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.

Па́ѵелъ похвала́ми свѧще́нными похвалѧ́ѧ тѧ̀, а҆рхі́ппе сла́вне, сво́ина тѧ̀, свѧ́те, написа̀, соверши́телѧ бжⷭ҇твенныхъ дѣѧ́нїй, слꙋжа́ща є҆мꙋ̀, и҆ вѣ́рою пою́ща: благослови́те, всѧ̑ дѣла̀ гдⷭ҇нѧ, гдⷭ҇а.

Глаго́лы пома́засѧ честны́ми къ мꙋче́нїю досточꙋ́днаѧ а҆пфі́а, лю́бѧщи, премꙋ́дре, ꙗ҆́кѡ сы́на тѧ̀ и҆́скреннѣйшаго, съ не́юже въ вы́шнихъ живе́ши ца́рствїихъ, вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Младе́нцы сꙋ́щїи ра́зꙋмомъ, тѧ̀ и҆мꙋ́щаго, смы́слъ, младе́нцємъ во и҆гра́нїе преда́ша, а҆рхі́ппе, стра́ждꙋща терпѣли́внѣйше, и҆ ѿ ни́хъ неми́лостивнѡ пробода́ема, и҆ вопїю́ща: всѧ̑ дѣла̀, благослови́те, гдⷭ҇нѧ, гдⷭ҇а.

Бг҃оро́диченъ: Ме́ртвъ снѣ́ди ра́ди є҆ди́ныѧ а҆да́мъ бы́сть, ѡ҆б̾е́мь сме́рть са́да разꙋ́мнагѡ, чⷭ҇таѧ: тебє́ же ра́ди ѡ҆живле́нъ, и҆ раѧ̀ пи́щꙋ па́ки воспрїѧ́тъ, воспѣва́ѧ: благослови́те, всѧ̑ дѣла̀ гдⷭ҇нѧ, гдⷭ҇а.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Да вѣ́чнꙋю сла́вꙋ наслѣ́диши, страстоте́рпче, сла́вꙋ земнꙋ́ю презрѣ́лъ є҆сѝ, непостоѧ́ннꙋю же и҆ преходѧ́щꙋю: и҆ ко хрⷭ҇тꙋ̀ пристꙋпи́лъ є҆сѝ, сла́вою сегѡ̀ ᲂу҆краша́емь.

Вѣнце́мъ ᲂу҆вѧзе́сѧ, бг҃омꙋ́дре, побѣ́днымъ ве́рхъ тво́й, и҆ ѡ҆дѣ́ѧлсѧ є҆сѝ въ багрѧни́цꙋ, твои́ми кровьмѝ ѡ҆моче́нꙋю, а҆рхі́ппе: и҆ со хрⷭ҇то́мъ ра́дꙋѧсѧ ца́рствꙋеши, пребл҃же́нне.

Ꙗ҆́кѡ верхо́внагѡ, всеблаже́нне, а҆пⷭ҇лѡвъ, бы́въ ᲂу҆чени́къ па́ѵла мꙋ́драгѡ бг҃оглаго́ливагѡ, съ тѣ́мъ ра́дꙋешисѧ, вѣ́чнꙋющее наслѣ́дꙋеши наслажде́нїе, колосса́євъ ᲂу҆добре́нїе.

Собра́шасѧ лю́дїе въ па́мѧти свѣтоно́снѣй твое́й воспѣ́ти бл҃года́вца сп҃са, и҆ дѡ́блїѧ, а҆рхі́ппе, болѣ̑зни твоѧ̑, ꙗ҆̀же мꙋ́жески претерпѣ́лъ є҆сѝ, низложи́въ многоко́зненнаго.

Бг҃оро́диченъ: Носѧ́щи хрⷭ҇та̀ на ѡ҆б̾ѧ́тїихъ, ма́нїемъ носѧ́щаго всѧ̑, сего̀ ꙗ҆́кѡ сн҃а твоего̀ молѝ, ѿ рꙋ́къ врага̀ мѧ̀, пречⷭ҇таѧ, и҆зба́вити, и҆ за милосе́рдїѧ бе́зднꙋ, ѡ҆б̾ѧ́ти и҆ спасти́ мѧ.