Канон святителю Савве I Сербскому (первый)

Пѣ́снь а҃.

І҆рмо́съ: Грѧди́те, лю́дїе, пои́мъ пѣ́снь хрⷭ҇тꙋ̀ бг҃ꙋ, раздѣ́льшемꙋ мо́ре, и҆ наста́вльшемꙋ лю́ди, ꙗ҆̀же и҆зведѐ и҆зъ рабо́ты є҆гѵ́петскїѧ, ꙗ҆́кѡ просла́висѧ.

Свѣ́тъ ѿ свѣ́та, хрⷭ҇тѐ бж҃е, ѿ ѻ҆ц҃а̀ пре́жде вѣ̑къ рожде́йсѧ, и҆ въ нача́лѣ сы́й со ѻ҆ц҃е́мъ и҆ дх҃омъ, мра́къ дꙋшѝ моеѧ̀ ѿгна́въ, ѡ҆зарѝ ᲂу҆́мъ мо́й, молю́сѧ, ꙗ҆́кѡ да возмогꙋ̀ пѣ́ти твоего̀ ᲂу҆го́дника, са́ввꙋ сщ҃е́ннаго.

А҆́ще и҆ человѣ́къ є҆сѝ, ѻ҆́тче, є҆стество́мъ, но а҆́гг҃льски на землѝ пожи́лъ є҆сѝ, десна́гѡ и҆зъ ю҆́ности пꙋтѝ є҆́мьсѧ, цѣломꙋ́дрїѧ рачи́тель бы́въ, дх҃а ст҃а́гѡ честно́е ѻ҆би́телище, са́вво всесвѧще́нне, ꙗ҆ви́лсѧ є҆сѝ.

Возлюби́въ мꙋ́дрости нача́ло стра́хъ бж҃їй, и҆ за́повѣдемъ є҆гѡ̀ при́снѡ поꙋча́ѧсѧ, дре́во насади́лсѧ є҆сѝ при и҆схо́дищихъ во́дъ дх҃о́вныхъ, ѿ ни́хже, ѻ҆́тче, напаѧ́емь, пло́дъ хрⷭ҇тꙋ̀, са́вво, прине́слсѧ є҆сѝ.

Бг҃оро́диченъ: Оу҆слы́ша є҆́ѵа прама́ти, чⷭ҇таѧ: въ печа́лехъ роди́ши ча̑да. Ты́ же, дв҃о, ᲂу҆слы́шала є҆сѝ: гдⷭ҇ь съ тобо́ю, ра́дꙋйсѧ, и҆ ра́дованнымъ гла́сомъ, бг҃оневѣ́сто, печа́ль прама́тере потреби́ла є҆сѝ.

Пѣ́снь г҃.

І҆рмо́съ: На ка́мени мѧ̀ вѣ́ры ᲂу҆тверди́въ, разшири́лъ є҆сѝ ᲂу҆ста̀ моѧ̑ на врагѝ моѧ̑, возвесели́босѧ дꙋ́хъ мо́й, внегда̀ пѣ́ти: нѣ́сть ст҃ъ, ꙗ҆́коже бг҃ъ на́шъ, и҆ нѣ́сть пра́веденъ, па́че тебє̀, гдⷭ҇и.

Презрѣ́въ ни̑жнѧѧ, ꙗ҆́кѡ попира́ємаѧ, и҆ любо́вь роди́телей преѡби́дѣвъ, пꙋстыннолю́бнѡ хрⷭ҇та̀ взыска́лъ є҆сѝ, є҆гѡ́же мече́мъ любвѐ ᲂу҆ѧзви́въ дꙋ́шꙋ твою̀, того̀ любѧ̀, и҆ тогѡ̀ и҆щѧ̀ ненасыща́емыѧ красоты̀.

Ѡ҆ всѣ́хъ сꙋ́щихъ на землѝ неради́въ, ѕвѣре́й лови́твою ᲂу҆ роди́телей и҆спроси́всѧ, пꙋсты́ню, ѻ҆́тче, пости́глъ є҆сѝ, и҆дѣ́же мно́гимъ поще́нїемъ, ско́рымъ же бдѣ́нїемъ и҆ моли́твами, дꙋшегꙋби́тєльныѧ ѕвѣ́ри, стра̑сти ᲂу҆мертви́лъ є҆сѝ.

Хрⷭ҇та̀ на́съ ра́ди смири́вшагѡсѧ во́лею до ра́бїѧ ѻ҆́браза, возлюби́въ смире́нїе, и҆́мже высо́къ бы́въ, го́рдаго смири́лъ є҆сѝ, и҆ во пло́ти мно́гимъ воздержа́нїемъ трⷪ҇цы до́мъ благоѻби́теленъ, са́вво свѧще́нне, ᲂу҆досто́илсѧ є҆сѝ.

Бг҃оро́диченъ: Во и҆нѣ́хъ жена́хъ ма́ти, до́ндеже дв҃а не позна́сѧ, ни ма́ти по ржⷭ҇твѣ̀ дѣ́вствовати сподо́бисѧ, на тебѣ́ же, дв҃о бг҃ома́ти, ѻ҆боѧ̑ сбы́шасѧ. Тѣ́мъ весе́лїемъ дꙋ́ха воспѣва́ю: нѣ́сть непоро́чны па́че тебє̀, влⷣчце.

Сѣда́ленъ, гла́съ и҃.

Па́ѵлово насажде́нїе, и҆ а҆поллѡ́сово прїе́мый напое́нїе, и҆ ва́шеѧ вѣ́ры насажде́нїе, и҆ ᲂу҆че́нїемъ напое́нїе, всѧ̑ возраща́ѧй бг҃ъ прїѧ́лъ є҆́сть. Люде́й ва́шихъ бл҃гоче́стїѧ вѣ́рою, моли́твами ва́шими возрасти́въ ᲂу҆мно́жи, и҆ ѿ тогѡ̀ ꙗ҆́кѡ вѣ́рнїи рабѝ и҆ дѣ́латели разꙋ́мнїи, трꙋдѡ́въ возмє́здїѧ досто́йнѡ прїѧ́ли є҆стѐ, сѷмеѡ́не преподо́бне, са́вво свѧще́нне, бг҃оно́снїи ѻ҆ц҃ы̀, па́стырїе и҆ ᲂу҆чи́телїе, первопа́стырѧ и҆ ᲂу҆чи́телѧ хрⷭ҇та̀ моли́те, ста́до ва́ше въ ми́рѣ сохрани́ти, и҆ спастѝ дꙋ́шы на́шѧ.

Бг҃оро́диченъ: Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ и҆ человѣ́ческїй ро́дъ, ѡ҆сщ҃е́нный хра́ме, и҆ раю̀ слове́сный, дѣ́вственнаѧ похвало̀, и҆зъ неѧ́же бг҃ъ воплоти́сѧ, и҆ млⷣнецъ бы́сть, пре́жде вѣ̑къ сы́й бг҃ъ на́шъ: ложесна́ бо твоѧ̑ престо́лъ сотворѝ, и҆ чре́во твоѐ простра́ннѣе небе́съ содѣ́ла. Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.

Пѣ́снь д҃.

І҆рмо́съ: Пою́ тѧ, слꙋ́хомъ бо, гдⷭ҇и, ᲂу҆слы́шахъ и҆ ᲂу҆жасо́хсѧ, до менє́ бо и҆́деши, менѐ и҆щѧ̀ заблꙋ́ждшаго. Тѣ́мъ мно́гое твоѐ снизхожде́нїе, є҆́же на мѧ̀, прославлѧ́ю, многоми́лостиве.

А҆́гг҃льскомꙋ житїю̀ ревнова́въ, влады́чествꙋюща ѻ҆тца̀ ѡ҆ста́вивъ, горы̀ а҆ѳѡ́на дости́глъ є҆сѝ: ѿѻнꙋ́дꙋже поще́нїемъ и҆ моли́твами къ мы́сленномꙋ восто́кꙋ хрⷭ҇тꙋ̀ восте́клъ є҆сѝ, и҆ ѿ тогѡ̀ со́лнце за̑паднымъ возсїѧ́лъ є҆сѝ.

Любомꙋ́дрїемъ мо́ре жите́йское и҆спыта́въ, и҆ позна́въ сꙋ́етства глꙋбинꙋ̀, бога́тство, и҆ сїѐ ꙗ҆́кѡ гни́ло ѿве́рглъ є҆сѝ, словеса́ же хрⷭ҇тѡ́ва и҆збра́въ, въ сосꙋ́дѣ се́рдца твоегѡ̀ скры́лъ є҆сѝ, и҆ ѻ҆́наѧ ꙗ҆́кѡ честна̑ѧ и҆зво́лилъ є҆сѝ храни́ти.

И҆̀же въ гора́хъ тѣсноживꙋ́щыѧ босы́ми нога́ми ѡ҆бходѧ̀, преподо́бне, и҆ си́хъ те́плыми хлѣ̑бы насыща́ѧ, тє́плыѧ и҆́хъ прїима́лъ є҆сѝ моли̑твы и҆ ѿ всѣ́хъ ко хрⷭ҇тꙋ̀ поꙋче́ньми, восхождє́нїѧ въ се́рдцы твое́мъ полага́лъ є҆сѝ.

Ты̀ ро́ждшаго тѧ̀ пло́тїю дх҃омъ породи́лъ є҆сѝ, ᲂу҆вѣща́въ є҆го̀ влады́чество све́рстницꙋ же и҆ ча̑да ѡ҆ста́вити: и҆́же ꙗ҆́кѡ а҆враа́мъ и҆зъ ѻ҆те́чества на зе́млю чꙋ́ждꙋ, къ тебѣ̀, ѻ҆́тче, въ пꙋсты́ню пресе́льникъ и҆ спо́стникъ бы́сть.

Бг҃оро́диченъ: И҆́стиннѡ тѧ̀ сѣ́нь свидѣ́тельствова, многоразли́чнѡ ѡ҆бразꙋ́юща, ꙗ҆́вѣ показꙋ́ющи воплоще́ннаго и҆зъ тебє̀ є҆ди́наго ѿ трⷪ҇цы, пречи́стаѧ, неизмѣ́ннѡ, бг҃ома́ти, влⷣчце, и҆ мі́ръ ѡ҆бно́вльша.

Пѣ́снь є҃.

І҆рмо́съ: Просвѣще́нїе во тмѣ̀ лежа́щихъ, спасе́нїе ѿча́ѧнныхъ, хрⷭ҇тѐ сп҃се мо́й, къ тебѣ̀ ᲂу҆́тренюю, цр҃ю̀ ми́ра, просвѣти́ мѧ сїѧ́нїемъ твои́мъ: и҆но́гѡ бо, ра́звѣ тебє̀, бо́га не зна́ю.

Ра́зꙋма твоегѡ̀ ре́вность предвѣ́дый ви́дѣвъ, пе́рваго тѧ̀ па́стырѧ на за́падѣ лю́демъ свои̑мъ ᲂу҆стро́и, и҆̀мже мы́сленнаго восто́ка, того̀ вопло́щшасѧ сло́ва хрⷭ҇та̀, проповѣ́далъ є҆сѝ, ра́вна же ѻ҆ц҃ꙋ̀, и҆ дх҃ꙋ ст҃о́мꙋ сопресто́льна.

А҆ѵсїтїді́йскагѡ і҆́ѡва нра́вѡмъ вои́стиннꙋ, ѻ҆́тче, подо́бѧсѧ, до́мъ тво́й ѿве́рстъ и҆мѣ́лъ є҆сѝ, и҆ ѧ҆зы́ка две́рь па́че ме́да сла́достїю а҆́лчꙋщымъ спасе́нїе ѿверза́ѧ, дꙋ́шы и҆спо́лнилъ є҆сѝ слове́съ а҆́гг҃льскїѧ пи́щи.

Зако́нѡмъ бжⷭ҇твєннымъ послѣ́дꙋѧ, законополо́жникъ ꙗ҆ви́лсѧ є҆сѝ, а҆рхїере́й бг҃опрїѧ́тенъ, пра́вило и҆звѣ́стнѣйшее, наста́вникъ заблꙋ́ждшихъ, свѣти́льникъ всесвѣ́телъ, ѻ҆те́чество твоѐ просвѣща́ѧ, са́вво бг҃омꙋ́дре.

Бг҃оро́диченъ: Оу҆пра́ви ᲂу҆́мъ мо́й, влⷣчце, трꙋжда́ющїйсѧ въ пꙋчи́нѣ скорбе́й, и҆ потоплѧ́емый наше́ствїемъ тлетво́рныхъ страсте́й: мене́ же спасѝ, бцⷣе, къ тебѣ̀ прибѣга́ющаго, и҆ны́ѧ бо по́мощи, чи́стаѧ, ра́звѣ тебє̀, не зна́ю.

Пѣ́снь ѕ҃.

І҆рмо́съ: Въ бе́зднѣ грѣхо́внѣй валѧ́ѧсѧ, неизслѣ́днꙋю милосе́рдїѧ твоегѡ̀ призыва́ю бе́зднꙋ: ѿ тлѝ, бж҃е, мѧ̀ возведѝ.

Мра́комъ є҆́реси покрыва́ема землѧ̀ люде́й твои́хъ и҆ногда̀ ны́нѣ правосла́вїѧ свѣ́томъ свѣтлѣ́етсѧ, ве́тхїѧ пре́лести и҆змѣ́ншисѧ, но́вый і҆и҃ль, и҆ лю́дїе бж҃їи бы́вше, на и҆́стинный зако́нъ тобо́ю, бг҃оно́се, наставлѧ́еми.

А҆пⷭ҇лъ ꙗ҆́кѡ ѿ хрⷭ҇та̀ посла́сѧ, и҆ сло́вомъ є҆ѵⷢ҇лїа наꙋча́ѧ, сꙋ́щыѧ въ нощѝ невѣ́дѣнїѧ просвѣти́лъ є҆сѝ: и҆сцѣлє́нїѧ же творѧ̀, и҆ чꙋдеса̀ вє́лїѧ, и҆ си́ми ᲂу҆дивлѧ́ѧ, привле́клъ є҆сѝ къ немꙋ̀ вѣ́рою люде́й твои́хъ и҆сполнє́нїѧ.

Бо́льшихъ и҆щѧ̀, лꙋ̑чшаѧ жела́ѧ, і҆ерꙋсали́ма ᲂу҆́бѡ, є҆гѵ́пта же и҆ сїна́ѧ доше́дъ, и҆ всѧ̑ та́мѡ сꙋ́щыѧ въ пꙋсты́нѧхъ ѡ҆бходѧ̀, ѻ҆би́льною рꙋко́ю на всѣ́хъ призира́ѧ, и҆́хже моли́твами ѻ҆те́чество твоѐ, са́вво, ѡ҆богати́лъ є҆сѝ.

Бг҃оро́диченъ: Ѡ҆бветша́вшыѧ ны̀ го́рькимъ дре́ва пре́жде вкꙋше́нїемъ и҆ па́дшыѧ поползнове́нїемъ, пречⷭ҇таѧ, ѡ҆бнови́ла є҆сѝ, зижди́телѧ ро́ждши, сло́во ѵ҆поста́сное, дв҃о мт҃и влⷣчце.

Конда́къ, гла́съ и҃.

Ꙗ҆́кѡ первосвѧти́телѧ вели́каго и҆ а҆пⷭ҇лѡвъ соѻ́бщника, цр҃ковь прославлѧ́етъ тѧ̀ люде́й твои́хъ, преподо́бне: но ꙗ҆́кѡ и҆мѣ́ѧ дерзнове́нїе ко хрⷭ҇тꙋ̀ бг҃ꙋ, моли́твами твои́ми ѿ всѧ́кихъ на́съ бѣ́дъ спаса́й, да зове́мъ тѝ: ра́дꙋйсѧ, ѻ҆́тче са́вво бг҃омꙋ́дре.

І҆́косъ:

Житїе́мъ ꙗ҆́кѡ а҆́гг҃лъ на землѝ, ѻ҆́тче, ꙗ҆ви́лсѧ є҆сѝ, человѣ́къ бо сы́й є҆стество́мъ, и҆ безпло́тныхъ чистотѣ̀ ᲂу҆подо́билсѧ є҆сѝ. Тѣ́мже и҆ похва̑льнаѧ ᲂу҆дивлѧ́еши на́съ зва́ти такова̑ѧ: ра́дꙋйсѧ, ѻ҆тца̀ благочести́ва прозѧбе́нїе, и҆ ма́тере благоговѣ́йны прижи́тїе. ра́дꙋйсѧ, моли́твами бг҃ода́нне, и҆ да́вшемꙋ тѧ̀ и҆змла́да послѣ́довавъ. ра́дꙋйсѧ, поще́нїѧ свѣ́тлый ра́сте, чистото́ю бл҃гоꙋха́нне. ра́дꙋйсѧ, цѣломꙋ́дрїѧ сто́лпе, и҆́мже всѧ́каѧ стра́сть попра́сѧ. ра́дꙋйсѧ, смире́нїемъ высо́кїй, де́мѡнѡвъ горды́ню низложи́вый. ра́дꙋйсѧ, свѣти́льниче многосвѣ́тлый, возведы́й ко хрⷭ҇тꙋ̀ лю́ди твоѧ̑. ра́дꙋйсѧ, цр҃квей воздви́женїе и҆ свѧти́телємъ ѡ҆свѧще́нїе. ра́дꙋйсѧ, сиро́тъ пита́телю и҆ ни́щымъ пода́телю благоꙋтро́бный. ра́дꙋйсѧ, а҆пⷭ҇лѡвъ равноре́вностне є҆ѵⷢ҇льскимъ наꙋче́нїемъ. ра́дꙋйсѧ, мꙋ́ченикѡмъ сострада́льне стра́нствїѧ хожде́нїемъ. ра́дꙋйсѧ, чꙋдодѣ́лателю ди́вныхъ ѡ҆ бз҃ѣ и҆ ᲂу҆жа́сныхъ чꙋде́съ. ра́дꙋйсѧ, похвало̀ ѻ҆те́чествꙋ твоемꙋ̀, спаса́й пою́щихъ тѧ̀. ра́дꙋйсѧ, ѻ҆́тче са́вво бг҃омꙋ́дре.

Пѣ́снь з҃.

І҆рмо́съ: Бг҃опроти́вное велѣ́нїе беззако́ннꙋющагѡ мꙋчи́телѧ, высо́къ пла́мень вознесло̀ є҆́сть: хрⷭ҇то́съ же прострѐ бг҃очести̑вымъ ѻ҆трокѡ́мъ ро́сꙋ дх҃о́внꙋю, сы́й бл҃гослове́нъ и҆ препросла́вленъ.

Житїѧ̀ твоегѡ̀ бг҃оꙋго́дное зрѧ̀ и҆справле́нїе, провѣ́децъ, ꙗ҆́кѡ всѣ́хъ бг҃ъ, и҆збра́въ тебѐ, сочта̀ а҆пⷭ҇льскомꙋ ли́кꙋ первост҃и́тель бг҃оно́се, и҆ бл҃года́тїю просвѣтѝ се́рдце твоѐ: ты́ же лю́ди твоѧ̑ томꙋ̀ просвѣти́лъ є҆сѝ вопи́ти: бл҃гослове́нъ бг҃ъ и҆ препросла́вленъ.

Є҆ѵⷢ҇льскихъ слове́съ лꙋча́ми лю́ди твоѧ̑ разꙋ́мнѡ ѡ҆зари́въ, ѿ недосто́йнагѡ въ досто́йное и҆зве́лъ є҆сѝ: и҆ и҆зсѡ́хшаѧ и҆́хъ сердца̀ ѕловѣ́рїемъ, ѡ҆ бз҃ѣ вѣ́рою плодови̑та, са́вво ѻ҆́тче, воздѣ́лалъ є҆сѝ.

Ми́лостивъ ᲂу҆́бѡ и҆ кро́токъ, преподо́бенъ, и҆ безѕло́бивъ, ти́хъ же и҆ ᲂу҆вѣ́тливъ ꙗ҆ви́лсѧ є҆сѝ, ꙗ҆́коже па́ѵелъ ѡ҆ хрⷭ҇тѣ̀ похвалѧ́ѧ речѐ: тако́въ на́мъ подоба́ше а҆рхїере́й. є҆го́же молѝ, са́вво а҆рхїере́ю, въ ми́рѣ сохрани́ти ста́до твоѐ.

Бг҃оро́диченъ: Ѡ҆бновлѧ́ютсѧ въ тебѣ̀ зако́ны є҆стества̀: вы́ше є҆стества́ бо, є҆стество́мъ непости́жнаго бг҃а, дв҃о, є҆мманꙋ́ила пресла́внѡ, чи́стаѧ, родила̀ є҆сѝ, въ на́ше вѣ́рныхъ возрожде́нїе.

Пѣ́снь и҃.

І҆рмо́съ: Свѣщено́сцы дꙋше́ю, свѣ́тлїи па́че снѣ́га пресїѧ́юще, прпⷣбнїи ѻ҆́троцы посредѣ̀ пла́мене не ѡ҆пали́шасѧ: всѧ̑ бо вкꙋ́пѣ, є҆ли̑ка подъ тва́рїю, къ бж҃їи пѣ́сни себѣ̀ созыва́юще, съ ра́достїю поѧ́хꙋ: по́йте, дѣла̀ гдⷭ҇нѧ, гдⷭ҇а.

Во ст҃ы́хъ почива́ющаго ст҃а́гѡ дх҃а бл҃года́тїю, са́вво ст҃и́телю, лю́демъ твои́мъ проповѣ́далъ є҆сѝ, сн҃а собезнача́льна ѻ҆ц҃ꙋ̀ и҆ сопресто́льна, чл҃вѣ́ка бы́вша, человѣ́кѡмъ спасе́нїе содѣва́юща пою́щымъ: дѣла̀ всѧ̑, гдⷭ҇а по́йте и҆ превозноси́те є҆го̀ во вѣ́ки.

До́брѣ тече́нїе соверши́въ, къ жела́емомꙋ концꙋ̀ преста́вилсѧ є҆сѝ ра́дꙋѧсѧ. тѣ́мже свѣтоно́снꙋю твою̀ па́мѧть це́рковь твоѧ̀, ѻ҆́тче соверша́ющи, созыва́етъ преподѡ́бныѧ па́стыри же и҆ ᲂу҆чи́тели, и҆̀же просвѣща́еми пою́тъ: дѣла̀ всѧ̑, гдⷭ҇а по́йте и҆ превозноси́те є҆го̀ во вѣ́ки.

А҆га́ри ча́дѡмъ пога̑нымъ и҆сма́ильтѧнѡмъ, внегда̀ ᲂу҆стремлѧ́тисѧ на ста́до твоѐ, возбранѝ, ст҃и́телю, моли́твами твои́ми, ꙗ҆́кѡ мно́го дерзнове́нїе ко хрⷭ҇тꙋ̀ стѧжа́вый, да въ ми́рѣ сщ҃е́ннꙋю твою̀ па́мѧть соверша́юще, ра́достнѡ пое́мъ: дѣла̀ всѧ̑, гдⷭ҇а по́йте и҆ превозноси́те є҆го̀ во вѣ́ки.

Бг҃оро́диченъ: Распѧ́тїе и҆ погребе́нїе, и҆́же ѿ тебє̀ небра́чнѡ, дв҃о, про́йде, претерпѣ́въ на́съ ра́ди и҆ мꙋче́нїе: є҆гѡ́же стрⷭ҇те́мъ ревнꙋ́юще преподо́бнїи, крⷭ҇тови́днѡ мꙋче́нїемъ поще́нїѧ, томꙋ̀, чⷭ҇таѧ, послѣ́доваша.

Пѣ́снь ѳ҃.

І҆рмо́съ: Ѿ бг҃а бг҃а сло́ва, неизрече́нною мꙋ́дростїю прише́дшаго ѡ҆бнови́ти а҆да́ма, ꙗ҆́дїю въ тлѣ́нїе па́дшаго лю́тѣ, ѿ ст҃ы́ѧ дв҃ы неизрече́ннѡ воплоти́вшагосѧ на́съ ра́ди, вѣ́рнїи, є҆диномꙋ́дреннѡ пѣ́сньми велича́емъ.

Оу҆кра́шенъ, ѻ҆́тче, вои́стиннꙋ добродѣ́тельными дѣѧ̑нїи ꙗ҆ви́лсѧ є҆сѝ, ᲂу҆краси́сѧ свѣтоно́снаѧ твоѧ̀ па́мѧть, бл҃года́тными лꙋча́ми на́съ просвѣща́ющи: въ не́йже бѣ́дъ и҆ напа́стей и҆зба́витисѧ твои́ми ко хрⷭ҇тꙋ̀ мл҃твами, мо́лимсѧ.

И҆зрасти́вшее тѧ̀ хрⷭ҇тꙋ̀ ѻ҆те́чество твоѐ ра́дꙋетсѧ, и҆ свѣтлѣ́етсѧ це́рковь сп҃са и҆ бг҃а, цѣ́ла и҆ благоꙋха́нна и҆мꙋ́щи тѧ̀, и҆ па́мѧть твою̀ дне́сь ра́достнѡ пра́зднꙋетъ: є҆́йже возме́здїе возда́въ, ст҃и́телю, всѧ́кагѡ ѡ҆ѕлобле́нїѧ и҆зба́ви ю҆̀.

Моле́нїй и҆ пѣ́нїй гла́сы ᲂу҆слы́ши, і҆ера́рше хрⷭ҇то́въ, вѣ́рѣ же и҆ любвѝ вонмѝ люде́й твои́хъ: и҆ ꙗ҆́кѡ ѻ҆течестволю́бецъ, проти́висѧ, ѻ҆́тче, ко гнѣ́вѡмъ на́съ вою́ющихъ: и҆ свы́ше покро́въ тво́й да́рꙋй хва́лѧщымъ тѧ̀.

Бг҃оро́диченъ: И҆сцѣли́ла є҆сѝ сокрꙋше́нїе, всенепоро́чнаѧ, и҆ ве́тхое страда́нїе земны́хъ, бг҃а поро́ждши цр҃ѧ̀ хрⷭ҇та̀, поне́сшаго пло́тїю недꙋ́ги на́шѧ. тѣ́мже тѧ̀ всѝ ро́ди, дв҃о влⷣчце, ᲂу҆блажа́юще, бг҃оневѣ́сто, велича́емъ.

Свѣти́ленъ:

Свѣти́льникъ тѧ̀ многосвѣ́тлый, ст҃и́телю, зна́емъ, моли́твы ча́до, пꙋсты́ни воспита́нїе, чистоты̀ ѻ҆би́телище, мона́хѡмъ спо́стника, ни́щымъ пита́телѧ, ст҃и́телємъ свѣ́тлость. тѣ́мже тѧ̀, ѻ҆́тче, вѣ́рнїи пое́мъ.

Сла́ва: Ѿ восто́ка мы́сленнагѡ сл҃нца хрⷭ҇та̀, свѣтоза̑рныѧ лꙋчы̀ возсїѧ́вшыѧ, и҆ мра́чнꙋю странꙋ̀ на за́падѣ люде́й свои́хъ просвѣти́вшыѧ свѣ́тлостїю слове́съ, и҆ добродѣ́тели дѣ́ланїемъ: и҆ ны́нѣ не преста́йте гдⷭ҇ꙋ молѧ́щесѧ, и҆ сїѧ̑ въ ми́рѣ сохрани́ти, са́вво и҆ сѷмеѡ́не, па́мѧть ва́шꙋ почита́ющихъ.

Бг҃оро́диченъ: Премꙋ́дрость ѵ҆поста́снꙋю и҆ пресꙋ́щное сло́во, и҆ врача̀ всѣ́хъ ро́ждшаѧ, всечⷭ҇таѧ цр҃и́це, гноє́нїѧ и҆ ꙗ҆́звы и҆сцѣлѝ дꙋ́шъ на́шихъ, и҆ сохранѧ́й неприкосновє́нны всѧ́кагѡ нахо́да, всегда́ тѧ молѧ́щихъ, застꙋ́пнице мі́ра.