Канон святителю Мефодию, патриарху Константинопольскому

Пѣ́снь а҃.

І҆рмо́съ: Порази́вый є҆гѵ́пта, и҆ фараѡ́на мꙋчи́телѧ погрꙋзи́вый въ мо́ри, лю́ди спа́слъ є҆сѝ и҆з̾ рабо́ты, мѡѷсе́йски пою́щыѧ пѣ́снь побѣ́днꙋю: ꙗ҆́кѡ просла́висѧ.

Въ постѣ́хъ, преподо́бне, порабоща́ѧ тѣ́ло твоѐ, ᲂу҆ма́стилъ є҆сѝ дꙋ́шꙋ твою̀ восхождє́нїи бжⷭ҇твенными, и҆ пи́щꙋ прїѧ́лъ є҆сѝ вы́шнѧгѡ црⷭ҇тва неиждива́емꙋю.

Слове́снымъ мече́мъ воѡрꙋжи́всѧ дх҃а и҆, ꙗ҆́коже во бронѧ̀ вѣ́рою ѡ҆дѣ́ѧвсѧ, мꙋ́жески є҆ретїкѡ́въ полкѝ пресѣ́клъ є҆сѝ, всеблаже́нне меѳо́дїе ѻ҆́тче.

Рѣка̀ приснотекꙋ́щаѧ це́ркви бы́ша ᲂу҆ста̀ твоѧ̑ бж҃е́ствєннаѧ, є҆реті́чєскаѧ морѧ̀, ꙗ҆́кѡ вои́стиннꙋ, преподо́бне меѳо́дїе, и҆зсꙋша́ѧ и҆ напоѧ́ѧ вѣ̑рныѧ.

Бг҃оро́диченъ: Сѣ́нь ѡ҆дꙋшевле́ннꙋ, и҆ ковче́гъ, и҆ трапе́зꙋ, го́рꙋ, ѿ неѧ́же ᲂу҆сѣче́сѧ безъ рꙋкꙋ̑ человѣ̑чꙋ ка́мень, и҆́же всѣ́хъ гдⷭ҇ь, мр҃і́ю пречⷭ҇тꙋю пѣ́сньми почти́мъ.

Пѣ́снь г҃.

І҆рмо́съ: Оу҆твержда́ѧй гро́мъ, и҆ созида́ѧй дх҃ъ, ᲂу҆твердѝ менѐ, гдⷭ҇и, да тѧ̀ пою̀ и҆́стиннѡ, и҆ творю̀ во́лю твою̀: ꙗ҆́кѡ нѣ́сть свѧ́тъ, ꙗ҆́кѡ ты̀, бж҃е на́шъ.

Тꙋчено́сный бы́сть ѻ҆́блакъ, ѧ҆зы́къ тво́й, меѳо́дїе: сердца́ бо благочести́выхъ напаѧ́ющь сло́вомъ нечести́выхъ же всегда̀ подавлѧ́ющь пле́велы.

И҆справлѧ́ѧ вѣ́ры сло́во, ра́нъ и҆скꙋ́съ прїѧ́лъ є҆сѝ, и҆ въ мра́чнѣй, ѻ҆́тче, темни́цѣ сѣдѣ́ти ѡ҆сꙋжде́нъ бы́лъ є҆сѝ. тѣ́мже къ свѣ́тꙋ невече́рнемꙋ преста́вилсѧ є҆сѝ веселѧ́сѧ.

Мꙋ́ченикѡвъ страда̑нїѧ воспѣ́лъ є҆сѝ, си́хъ причасти́лсѧ є҆сѝ неѿе́млемыѧ, ѻ҆́тче, ра́дости, ꙗ҆́кѡ сꙋгꙋ́бѡ пострада́въ, непреста́нными скорбьмѝ и҆ ра́нами, меѳо́дїе.

Бг҃оро́диченъ: Гаврїи́лъ, ра́дꙋйсѧ, дв҃ѣ повѣ́дꙋѧ, вѣща́ше: дх҃ъ ст҃ы́й на тѧ̀ на́йдетъ, дв҃о, и҆ сп҃са гдⷭ҇а зачне́ши во чре́вѣ твое́мъ.

Сѣда́ленъ, гла́съ д҃.

Ꙗ҆́кѡ свѣ́тлое со́лнце возсїѧ́въ, ѻ҆́тче, ᲂу҆че́ньми твои́ми всю̀ вселе́ннꙋю, свѧще́нне, просвѣща́еши, меѳо́дїе, и҆ ѿгонѧ́еши мглꙋ̀ є҆реті́ческꙋю.

Бг҃оро́диченъ: Пречи́стѣи рꙋ́цѣ твоѝ, дв҃о мт҃и, просте́рши, покры́й ᲂу҆пова́ющыѧ на тѧ̀, и҆ сн҃ꙋ твоемꙋ̀ зовꙋ́щыѧ: всѣ̑мъ пода́ждь, хрⷭ҇тѐ, ми́лѡсти твоѧ̑.

Крⷭ҇тобг҃оро́диченъ: На дре́вѣ ви́дѧщи воздви́жена сн҃а твоего̀, пречⷭ҇таѧ, ᲂу҆тро́бою мт҃ернею растерза́ема, жа́лостнѡ взыва́ла є҆сѝ: ᲂу҆вы̀ мнѣ̀, ка́кѡ заше́лъ є҆сѝ, свѣ́те мо́й безлѣ́тный;

Пѣ́снь д҃.

І҆рмо́съ: Оу҆слы́шахъ, бж҃е, слꙋ́хъ тво́й, и҆ ᲂу҆боѧ́хсѧ: разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и: ꙗ҆́кѡ твоегѡ̀ хвале́нїѧ и҆спо́лнь землѧ̀.

Мꙋ́дрости разꙋ́мною ча́шею ѡ҆мочи́въ ᲂу҆стнѣ̀, ѻ҆́тче, рѣ́ки на́мъ и҆сточи́лъ є҆сѝ ᲂу҆че́нїй, преподо́бне, бл҃гоче́стнѡ творѧ́щымъ па́мѧть твою̀.

Ты̀ проповѣ́датель возжелѣ́ненъ, сла́докъ сло́вомъ, про́стъ нра́вы, дꙋхо́вными дарова̑нїи, свѧти́телю преподо́бне, пребога́тъ ꙗ҆ви́лсѧ є҆сѝ, меѳо́дїе.

Копїе́мъ мы́сленнымъ бж҃е́ственнагѡ сло́ва, ꙗ҆́же въ ме́рзости є҆реті́честѣй, сꙋ́щꙋю пострѣка́въ, ᲂу҆ста́вилъ є҆сѝ нече́стїѧ на́глость, меѳо́дїе.

Бг҃оро́диченъ: Ра́дꙋйсѧ, две́ре мы́сленнаѧ, и҆зъ неѧ́же про́йде неизрече́ннымъ сло́вомъ цр҃ь нбⷭ҇ный, и҆ соблю́дъ непоро́чнꙋ, запеча́танꙋ па́ки ѡ҆ста́ви.

Пѣ́снь є҃.

І҆рмо́съ: Возсїѧ́й мѝ, гдⷭ҇и, свѣ́тъ повелѣ́нїй твои́хъ, ꙗ҆́кѡ къ тебѣ̀ дꙋ́хъ мо́й ᲂу҆́тренюетъ и҆ пое́тъ тѧ̀: ты́ бо є҆сѝ бг҃ъ на́шъ, и҆ къ тебѣ̀ прибѣга́ю, цр҃ю̀ ми́ра.

Свѣ́томъ просвѣща́емь трисо́лнечнымъ, сла́вне, мра́чнꙋю и҆ те́мнꙋю є҆́реси мглꙋ̀ благоче́стнѡ ѿгна́лъ є҆сѝ, и҆ ѕвѣзда̀ бы́лъ є҆сѝ, вѣ́рными блиста́ѧ сїѧ̑нїи.

И҆з̾ѡщре́на тро́сть дх҃а, ѧ҆зы́къ тво́й ꙗ҆́кѡ скоропи́сца кни́жника, меѳо́дїе, показа́сѧ, на скрижа́ли начерта́ѧ серде́цъ благода́ти бжⷭ҇твенный зако́нъ нело́жнѡ.

Слє́зныѧ то́ки всено́щными стоѧ̑нїи, ꙗ҆́кѡ би́серїе носѧ̀, преподо́бне, си́ми грѣхѡ́вныѧ пото́ки и҆зсꙋши́лъ є҆сѝ: и҆ бжⷭ҇твеннагѡ дх҃а прїѧ́телище ꙗ҆ви́лсѧ є҆сѝ чи́сто.

Бг҃оро́диченъ: И҆збавлѧ́еши моли́твами твои́ми ѿ всѧ́кагѡ ѡ҆бстоѧ́нїѧ прибѣга́ющыѧ въ покро́въ тво́й, мр҃і́е бцⷣе, ты́ бо чтꙋ́щихъ тѧ̀ предста́тельница є҆сѝ и҆ ᲂу҆пова́нїе съ бг҃омъ.

Пѣ́снь ѕ҃.

І҆рмо́съ: Бꙋ́рѧ мѧ̀ помышле́нїй пости́гши, во глꙋбинꙋ̀ низвлачи́тъ мѧ̀ безмѣ́рныхъ грѣхѡ́въ: но ты̀, ᲂу҆пра́вителю благі́й, предвари́въ ᲂу҆пра́ви, ꙗ҆́кѡ прⷪ҇ро́ка, и҆ спаси́ мѧ.

Пчелѣ̀ трꙋдолю́бнѣй поревнова́въ, пи́смєнныѧ собра́лъ є҆сѝ цвѣ́ты, ꙗ҆́коже въ со́тѣ, се́рдцемъ твои́мъ сїѐ состроѧ́ѧ, и҆ всѣ̑мъ и҆сточа́ѧ рѣкꙋ̀ ᲂу҆че́нїй твои́хъ.

Слове́съ дх҃о́вныхъ напо́лнивсѧ ѧ҆зы́къ тво́й, премꙋ́дре, ѧ҆зыкобѡ́лїѧ низложѝ хꙋ́льникѡвъ, проповѣ́дающь хрⷭ҇то́во воплоще́нїе почита́ти, и҆ плотско́е подо́бїе.

Пе́рвѣе ᲂу҆́бѡ на сѣда́лищи ста́рєцъ похвали́въ гдⷭ҇а, на ст҃и́тельстѣ престо́лѣ, напослѣ́докъ же возне́слсѧ є҆сѝ са́мъ, ᲂу҆па́съ бг҃оꙋго́днѡ и҆збра̑нныѧ, ѻ҆́тче, сїѧ̑ лю́ди.

Бг҃оро́диченъ: Є҆ди́нꙋ тѧ̀ бг҃а на́шегѡ мт҃рь, бцⷣе влⷣчце, тва́рь всѧ̀ познава́етъ, ꙗ҆́кѡ є҆ди́на вмѣсти́ла є҆сѝ бг҃а несказа́ннѡ во ᲂу҆тро́бѣ твое́й, бжⷭ҇твеннымъ не ѡ҆пали́вшисѧ ѻ҆гне́мъ.

Конда́къ, гла́съ в҃.

На землѝ подвиза́лсѧ є҆сѝ ꙗ҆́кѡ безпло́тный, и҆ небеса̀ наслѣ́довалъ є҆сѝ, меѳо́дїе, ꙗ҆́кѡ и҆з̾ѧсни́вый въ концѣ́хъ і҆кѡ́нъ поклоне́нїе: въ трꙋдѣ́хъ бо и҆ болѣ́знехъ вѧ́щше пребы́въ, не преста́лъ є҆сѝ дерзнове́нїемъ ѡ҆блича́ѧ ѿмета́ющыѧсѧ і҆кѡ́ны хрⷭ҇тѡ́вы.

І҆́косъ:

Грѣхѡ́въ мѝ разрѣше́нїе пода́ждь, є҆́же пѣ́ти по достоѧ́нїю по́двиги твоѧ̑, меѳо́дїе пресла́вне: въ ро́въ бо глꙋбо́къ вве́рженъ бы́лъ є҆сѝ, да ꙗ҆̀же пре́жде дꙋ́шы во глꙋбинѣ̀ погребє́нныѧ невѣ́дѣнїѧ, разрѣши́ши къ сїѧ́нїю бжⷭ҇твеннагѡ свѣтоли́тїѧ, наꙋчи́въ ꙗ҆́вѣ подсо́лнечнꙋю, бж҃е́ственномꙋ вои́стиннꙋ неизрече́нномꙋ хрⷭ҇то́вꙋ покланѧ́тисѧ воѡбраже́нїю, ѡ҆блича́ѧ ѿмета́ющыѧсѧ і҆кѡ́ны хрⷭ҇тѡ́вы.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Росо́ю бжⷭ҇твенныѧ любвѐ погаси́лъ є҆сѝ стрⷭ҇те́й, пресла́вне, разжже́ннꙋю пе́щь, и҆скꙋ́шсѧ же напа́стьми ꙗ҆́кѡ зла́то горни́ломъ, ꙗ҆́кѡ со́лнце блиста́еши.

А҆дама́нтское се́рдце въ ско́рбехъ и҆мѣ́лъ є҆сѝ и҆ въ гоне́нїихъ, меѳо́дїе, и҆ ны́нѣ блиста́еши лꙋча́ми нбⷭ҇ными, и҆ ѻ҆гнедохнове́нными ᲂу҆сты̀: тѣ́мже тѧ̀ восхвалѧ́емъ.

Ꙗ҆́коже неѡбори́мь сто́лпъ, неподви́жимь пребы́лъ є҆сѝ напа́стными прилѡ́ги, пре́лести ᲂу҆твержде́нїе низлага́ѧ, свѧти́телю, си́лою твои́хъ слове́съ, меѳо́дїе преблаже́нне.

Бг҃оро́диченъ: Пречꙋ́дный ты̀ черто́гъ, соеди́ншагѡ себѐ человѣ́чествꙋ, бг҃а є҆ди́на породила̀ є҆сѝ, и҆ дв҃ою пребыла̀ є҆сѝ, бг҃оневѣ́стнаѧ мт҃и мр҃і́е дв҃о.

Пѣ́снь и҃.

І҆рмо́съ: Землѧ̀, и҆ всѧ̑ ꙗ҆̀же на не́й, мо́ре и҆ всѝ и҆сто́чницы, небеса̀ небе́съ, свѣ́тъ и҆ тьма̀, мра́зъ и҆ зно́й, сы́нове человѣ́честїи, свѧще́нницы, благослови́те гдⷭ҇а и҆ превозноси́те є҆го̀ во вѣ́ки.

Ты̀ низложи́лъ є҆сѝ є҆реті́чєскаѧ шата̑нїѧ, є҆́же пои́стиннѣ ѕлочести̑ваѧ, и҆ совозне́слъ є҆сѝ вѣ́рныхъ цр҃кве, ѻ҆́тче, ро́гъ, хрⷭ҇то́вꙋ наказꙋ́ѧ і҆кѡ́нꙋ честѝ, меѳо́дїе. тѣ́мже тѧ̀ пое́мъ, и҆ любо́вїю почита́емъ.

Тѧ̀ ѕвѣздꙋ̀ всесвѣ́тлꙋю сл҃нце показа̀ хрⷭ҇то́съ, на тве́рди, премꙋ́дре, цр҃ко́внѣй, и҆ твои́ми сїѧ̑нїи чⷭ҇тны́хъ ᲂу҆че́нїй, концы̀, ѻ҆́тче, ѡ҆зари́лъ є҆сѝ во всѧ̑ вѣ́ки.

Твоѐ сло́во ꙗ҆́коже гро́мъ, меѳо́дїе, возшꙋмѣ̀ на землѝ, мамѡ́ны содѣ́йственника, и҆ роди́телѧ пре́лести, ꙗ҆́коже ѕмі́ѧ свѧза́въ, ѿсла́лъ є҆сѝ тьмѣ̀ вѣ́чнѣй, ꙗ҆́кѡ сꙋ́ща наслѣ́дника.

Бг҃оро́диченъ: Є҆ди́нъ є҆сѝ є҆диноро́денъ горѣ̀, є҆ди́нъ и҆ до́лѣ то́йже, безъ ма́тере горѣ̀ ѿ ѻ҆ц҃а̀, и҆ безъ ѻ҆тца̀ и҆зъ мт҃ре до́лꙋ: въ не́йже воѡбрази́лсѧ є҆сѝ въ чꙋжде́е, сло́ве, ѡ҆бнища́въ, въ моѐ смири́вшеесѧ є҆стество̀ ѿ грѣха̀.

Пѣ́снь ѳ҃.

І҆рмо́съ: Ꙗ҆́кѡ сотворѝ мнѣ̀ вели̑чїѧ си́льный, и҆ ст҃о и҆́мѧ є҆гѡ̀, и҆ ми́лость є҆гѡ̀ въ ро́дъ и҆ ро́дъ боѧ́щымсѧ є҆гѡ̀.

Ст҃и́телей красота̀, мона́хѡвъ ᲂу҆добре́нїе, всѣ́хъ вѣ́рныхъ ѻ҆́бразъ, це́ркве па́стырь, и҆ правосла́вныхъ степе́нь, ты̀ є҆сѝ, меѳо́дїе.

И҆лїинꙋ̀ ре́вность стѧжа́въ, и҆спо́лнилъ є҆сѝ стꙋда̀ беззакѡ́нныѧ і҆ерє́и, воплоще́нїѧ гдⷭ҇нѧ непокланѧ́ющихсѧ ѻ҆́бразꙋ, мꙋ́дре меѳо́дїе.

Ликꙋ́ѧ со а҆́гг҃лы предъ лице́мъ и҆зба́вителѧ, и҆ сла́вы є҆гѡ̀ наслажда́ѧсѧ, моли́твами твои́ми на́съ ѿ всѧ́кихъ и҆скꙋше́нїй и҆зба́ви, меѳо́дїе.

Бг҃оро́диченъ: Пое́мъ твоѐ ржⷭ҇тво̀, и҆ сла́вимъ и҆зъ тебѐ рожде́ннаго, ꙗ҆́кѡ бг҃а же и҆ чл҃вѣ́ка, мт҃и дв҃о чⷭ҇таѧ. є҆го́же молѝ прилѣ́жнѡ, поми́ловати на́съ.

Свѣти́ленъ.

Прїиди́те, вѣ́рнїи, пое́мъ бжⷭ҇твеннꙋю па́мѧть ст҃и́телѧ дне́сь меѳо́дїа, въ ро́вѣ преиспо́днемъ вве́ржена: да дꙋ́шы и҆зба́витъ погребє́нныѧ во тьмѣ̀ ѿ лꙋка́вагѡ нече́стїѧ.

Бг҃оро́диченъ: Препѣ́таѧ, дв҃о и҆ бцⷣе, бг҃а неизрече́ннѡ ро́ждшаѧ, прилѣ́жнѡ молѝ сн҃а твоего̀ ѡ҆ на́съ рабѣ́хъ твои́хъ, ᲂу҆ще́дрити и҆ спастѝ, любо́вїю хва́лѧщыѧ тѧ̀.