Канон святителю Харитону Исповеднику, Иконийскому

Пѣ́снь а҃.

І҆рмо́съ: Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.

Мо́рѧ стра́стнагѡ пꙋчи́нꙋ преплы́въ, живоно́снымъ ѻ҆рꙋ́жїемъ крⷭ҇та̀, фараѡ́на лꙋка́ваго мы́сленнаго, бл҃же́нне, бжⷭ҇твенною си́лою потопи́лъ є҆сѝ.

Гдⷭ҇ꙋ возложе́нъ, бл҃же́нне, ѿ ма́тернихъ пеле́нъ, предъ мꙋчи́тельскимъ сꙋди́щемъ хрⷭ҇та̀ бг҃омꙋ́дреннѡ проповѣ́далъ є҆сѝ: мѡѷсе́йски бо низложи́лъ є҆сѝ противобо́рныхъ шата̑нїѧ.

Пре́лести ѡ҆ста́вивъ є҆гѵ́петъ, харїтѡ́не прпⷣбне, и҆ пꙋстынногра́жданинъ бы́въ, чи́стѡ бесѣ́довалъ є҆сѝ, чи́стомꙋ, и҆ прїѧ́лъ є҆сѝ нбⷭ҇ное наслѣ́дїе.

Бг҃оро́диченъ: Безсѣ́меннѡ ѻ҆́ч҃ею во́лею, ѿ бжⷭ҇твеннагѡ дх҃а бж҃їѧ ты̀ зачала̀ є҆сѝ сн҃а, и҆ пло́тїю родила̀ є҆сѝ и҆зъ ѻ҆ц҃а̀ безма́тернѧ, и҆ на́съ ра́ди и҆зъ тебє̀ безѻ́тча.

Пѣ́снь г҃.

І҆рмо́съ: Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.

Весели́тсѧ ѡ҆ тебѣ̀ ᲂу҆ч҃никѡ́въ слове́снаѧ па́ства твоѧ̀ дꙋхо́внѡ, прпⷣбне, твое́й ѡ҆бща́щисѧ свѣ́тлости.

Мꙋдрова́нїе плотско́е, ꙗ҆́кѡ вино́вное вражды̀ на бг҃а, жи́зни дх҃ꙋ, прпⷣбне харїтѡ́не, повинꙋ́лъ є҆сѝ.

Низложи́лъ є҆сѝ дв҃дски и҆ноплеме́нника голїа́ѳа, прпⷣбне, мы́сленнагѡ си́лꙋ, всеѻрꙋ́жїемъ дх҃а.

Бг҃оро́диченъ: Ты̀ є҆ди́на сꙋ́щымъ на землѝ, па́че є҆стества̀ бл҃ги́хъ хода́таица, мт҃и бж҃їѧ, была̀ є҆сѝ. тѣ́мъ тебѣ̀, ра́дꙋйсѧ, зове́мъ.

Сѣда́ленъ, гла́съ и҃.

Страда́нїѧ болѣ́зньми и҆скꙋси́всѧ, поще́нїѧ страда́ньми ᲂу҆тверди́всѧ, зла́та свѣтлѣ́йшїй благоче́стїемъ ѡ҆блиста́лъ є҆сѝ, и҆ чи́стое прїѧ́телище бы́лъ є҆сѝ дх҃а: лꙋка́выхъ дꙋхѡ́въ тмꙋ̀ разгна́лъ є҆сѝ. тѣ́мъ собра́въ мона́шествꙋющихъ мно́жєства, па́стырь и҆́хъ бы́лъ є҆сѝ, и҆ свѣти́льникъ свѣтлѣ́йшїй, харїтѡ́не бл҃же́нне: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, чтꙋ́щымъ любо́вїю свѧтꙋ́ю па́мѧть твою̀.

Бг҃оро́диченъ: Въ напа̑сти многоплетє́нныѧ впа́дъ, ѿ вра̑гъ ви́димыхъ и҆ неви́димыхъ бꙋ́рею ѡ҆держи́мь безчи́сленныхъ согрѣше́нїй мои́хъ, и҆ ꙗ҆́кѡ къ те́пломꙋ защище́нїю и҆ покро́вꙋ моемꙋ̀, чⷭ҇таѧ, ко приста́нищꙋ притека́ю твоеѧ̀ бла́гости. тѣ́мже, пречи́стаѧ, и҆зъ тебє̀ воплоще́нномꙋ безсѣ́меннѡ моли́сѧ прилѣ́жнѡ ѡ҆ всѣ́хъ рабѣ́хъ твои́хъ, непреста́ннѡ молѧ́щихъ ти сѧ, бцⷣе пречи́стаѧ, молѧ́щи є҆го̀ при́снѡ, согрѣше́нїй ѡ҆ставле́нїе дарова́ти воспѣва́ющымъ досто́йнѡ сла́вꙋ твою̀.

Пѣ́снь д҃.

І҆рмо́съ: Любвѐ ра́ди, ще́дре, твоегѡ̀ ѻ҆́браза, на крестѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.

Веселѧ́сѧ прпⷣбный ѡ҆ гдⷭ҇ѣ, ꙗ҆́кѡ побѣди́тель, вопїѧ́ше на врагѝ безплѡ́тныѧ: бг҃ъ мо́й крѣ́пость моѧ̀ и҆ гдⷭ҇ь.

Вѣнча́ша тѧ̀ бл҃года́ти, харїтѡ́не, страда́льческимъ вѣнце́мъ хрⷭ҇то́ва црⷭ҇тва: пре́лести бо пїѧ́нство и҆скорени́лъ є҆сѝ, бл҃же́нне.

Мꙋча́щыѧ пре́жде сконча́нїѧ твоегѡ̀, харїтѡ́не, воздержа́нїѧ болѣ́зньми сла̑сти ᲂу҆мертви́въ, живоно́сною ме́ртвостїю, преподо́бне, ѡ҆дѣ́ѧлсѧ є҆сѝ.

Бг҃оро́диченъ: Неизрече́нно твоѐ рождество̀ показа́сѧ, бг҃ороди́тельнице, є҆ди́на чⷭ҇таѧ и҆ бл҃гослове́ннаѧ: тѣ́мъ тѝ припа́дающе, ра́дꙋйсѧ, взыва́емъ.

Пѣ́снь є҃.

І҆рмо́съ: Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.

Ты̀, прпⷣбне, свѣ́та нескве́рнено зерца́ло, вы́шнѧгѡ просвѣще́нїѧ, свѣ́тлѡ ꙗ҆ви́лсѧ є҆сѝ, харїтѡ́не всебл҃же́нне.

Ты̀, прпⷣбне, сꙋгꙋ́быми сїѧ́еши бл҃года́тьми, страда́нїѧ бо ра́нами благоче́стнѡ ѡ҆зари́лсѧ є҆сѝ, и҆ болѣ́зньми по́стничества.

Тѧ̀, прпⷣбне, дꙋша́мъ вра́чь ꙗ҆ви́лсѧ є҆сѝ, бжⷭ҇твенныѧ ѿ млады́хъ ногте́й взыска́въ мꙋ́дрости, всебл҃же́нне.

Бг҃оро́диченъ: Ты̀ ѻ҆рꙋ́жїе непобѣди́мое на врагѝ предлага́емъ, тѧ̀ держа́вꙋ и҆ наде́ждꙋ на́шегѡ спасе́нїѧ, бг҃оневѣ́сто, стѧжа́хомъ.

Пѣ́снь ѕ҃.

І҆рмо́съ: Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.

Не песо́къ, но хрⷭ҇та̀ ѡ҆снова́нїе положи́въ, назда́лъ є҆сѝ, ѻ҆́тче, добродѣ́тель зла́та честнѣ́йшꙋю: и҆ трⷪ҇цы прест҃ы́ѧ до́мъ бы́лъ є҆сѝ.

Ѻ҆рга́нъ ѕло́бы ѕмі́й зна́етсѧ, но твои́ми, бг҃оно́се, ᲂу҆гождє́нїи, харїтѡ́не, побѣжде́нъ, непра́вєдныѧ ѿ пра́веднагѡ про́мысла ѿмща́етъ.

Ничто́же тебѐ ѿ хрⷭ҇то́вы любвѐ ѿлꙋчѝ, ни ᲂу҆ранѧ́емо тѣ́ло, ни сме́ртный сꙋ́дъ претѧ́щїй, во є҆дине́нїи бж҃е́ственнѣмъ наслажда́ѧсѧ, бл҃же́нне.

Бг҃оро́диченъ: Ѽ чꙋ́до, всѣ́хъ чꙋде́съ новѣ́е: ꙗ҆́кѡ дв҃а во чре́вѣ, всѧ́чєскаѧ содержа́щаго сло́вомъ, неискꙋсомꙋ́жнѡ заче́нши, не тѣсновмѣстѝ.

Конда́къ, гла́съ в҃.

Наслади́всѧ, бг҃омꙋ́дре, воздержа́нїѧ, и҆ пло́ти твоеѧ̀ вожделѣ̑нїѧ ѡ҆бꙋзда́въ, ꙗ҆ви́лсѧ є҆сѝ вѣ́рою возраща́емь, и҆ ꙗ҆́кѡ жи́зни дре́во посредѣ̀ раѧ̀ процвѣ́лъ є҆сѝ, харїтѡ́не всебл҃же́нне свѧще́ннѣйшїй.

І҆́косъ:

Ѿве́рзи моѧ̑ ᲂу҆ста̀, пребл҃же́нне, благопрїѧ́тными твои́ми моли́твами, предстоѧ̀ бг҃ꙋ, всесла́вне преподобномч҃ниче, да воспою̀ бжⷭ҇твенное твоѐ житїѐ, и҆ возглаго́лю досто́йнѡ добродѣ́тєли твоѧ̑, ꙗ҆̀же на землѝ те́плою любо́вїю соверши́лъ є҆сѝ. и҆сповѣ́дникъ бо бы́лъ є҆сѝ крѣпча́йшїй, воздержа́нїе же вѣ́рою и҆спра́вилъ є҆сѝ, бдѣ́нїе и҆ чистотꙋ̀ возлюби́въ, харїтѡ́не всебл҃же́нне, свѧще́ннѣйшїй.

Пѣ́снь з҃.

І҆рмо́съ: Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

И҆́же въ пещѝ а҆враа́мскимъ подо́бѧсѧ ре́вностїю благоче́стїѧ, велѣ́нїе мꙋчи́тельско, бг҃оно́сне попра́лъ є҆сѝ, бл҃гослове́нъ є҆сѝ, зовы́й, бж҃е мо́й, гдⷭ҇и.

Ꙗ҆́кѡ въ пещѝ и҆скꙋше́нїѧ разжже́нїѧ бжⷭ҇твенна, хладода́тельнаѧ съ небесѐ бл҃года́ть посѣтѝ тебѐ, прпⷣбне: бл҃гослове́нъ є҆сѝ, зовы́й, бж҃е мо́й, гдⷭ҇и.

Ꙗ҆́кѡ ᲂу҆ѧ́звленъ трⷪ҇ческимъ бж҃їимъ раче́нїемъ, то́й равночи́сленныѧ ѡ҆гра́ды дꙋхо́внѣ пою́щыѧ, возложи́лъ є҆сѝ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.

Бг҃оро́диченъ: Вы́шнѧгѡ ѡ҆свѧще́нное бжⷭ҇твенное селе́нїе, ра́дꙋйсѧ: тобо́ю бо даде́сѧ ра́дость, бцⷣе, зовꙋ́щымъ: бл҃гослове́нна ты̀ въ жена́хъ є҆сѝ, всенепоро́чнаѧ влⷣчце.

Пѣ́снь и҃.

І҆рмо́съ: Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Пе́рси разжига́емы ѻ҆гне́мъ непра́веднѣ, преподо́бне, ле́сть погаси́лъ є҆сѝ, са́мъ же неѡпали́мь пребы́лъ є҆сѝ, дѣ́йствомъ ст҃а́гѡ дх҃а, и҆ ко благоче́стїю лю́ди пѣ́ти возста́вилъ є҆сѝ: благослови́те, всѧ̑ дѣла̀ гдⷭ҇нѧ, гдⷭ҇а.

Во хрⷭ҇та̀ ѡ҆бле́клсѧ є҆сѝ вои́стиннꙋ, дре́внѧго человѣ́ка совле́ксѧ, и҆ ѡ҆бличи́въ, прпⷣбне, тмы̀ мїродержи́телѧ ра́нами мꙋче́нїѧ, съ весе́лїемъ вопїѧ̀: благослови́те, всѧ̑ дѣла̀ гдⷭ҇нѧ, гдⷭ҇а.

Па́ѵловъ нело́жнѣ, харїтѡ́не, бы́въ ᲂу҆чени́къ, тогѡ̀ стопа́мъ послѣ́довалъ є҆сѝ, прпⷣбне: и҆ наста́вникъ показа́лсѧ є҆сѝ мона́хѡмъ, всѣ̑мъ бы́въ пра́вило добродѣ́тели вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.

Бг҃оро́диченъ: Ты̀ є҆ди́на во всѣ́хъ родѣ́хъ, дв҃о чи́стаѧ, ꙗ҆ви́ласѧ є҆сѝ мт҃и бж҃їѧ: ты̀ бжⷭ҇тва̀ была̀ є҆сѝ пребыва́лище, всенепоро́чнаѧ, не ѡ҆па́льшисѧ ѻ҆гне́мъ непристꙋ́пнагѡ свѣ́та. тѣ́мъ вси́ тѧ бл҃гослови́мъ, мр҃і́е бг҃оневѣ́сто.

Пѣ́снь ѳ҃.

І҆рмо́съ: Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.

Ни гро́бъ хода́тай забве́нїѧ покры́ти возмо́же твои́хъ, прпⷣбне харїтѡ́не, добродѣ́телей: твоѧ́ бо па́мѧть вѣ́чнꙋющаѧ со́лнечнѡ возсїѧ̀, ю҆́же досто́йнѡ велича́емъ.

Прїиди́те, лѣ́тнюю па́мѧть дꙋхо́внѡ соверша́юще, бра́тїе, добродѣ́тельми подража́юще, бг҃оно́сцꙋ поревнꙋ́имъ, и҆ съ ни́мъ возопїи́мъ: тѧ̀ велича́емъ трист҃ы́й.

Страстьмѝ коле́блющыѧсѧ, и҆ бꙋ́рею грѣхо́вною, и҆сповѣ́дниче, погрꙋжа́ємыѧ, ко хрⷭ҇тꙋ̀ ꙗ҆́кѡ дерзнове́нїе и҆мѣ́ѧ, всегда̀ сохранѧ́й, благоче́стнѡ тѧ̀ велича́ющыѧ.

Бг҃оро́диченъ: Ра́дꙋйсѧ, и҆ весели́сѧ невѣ́сто цр҃ѧ̀ вели́кагѡ, созерца́ющаѧ свѣ́тлѡ твоегѡ̀ жениха̀ красотꙋ̀, па́че зла́та сїѧ́ющꙋю, и҆ па́че со́лнца ѡ҆блиста́вшꙋю.

Свѣти́ленъ.

Страда́нїемъ ᲂу҆́бѡ пе́рвѣе до́брѣ и҆скꙋси́всѧ, второ́е же посто́мъ тече́нїе бжⷭ҇твенное соверши́въ, на нб҃са̀ возше́лъ є҆сѝ, и҆ хрⷭ҇тꙋ̀ предстои́ши, харїтѡ́не ѻ҆́тче прпⷣбне, за ны̀ молѧ́сѧ те́плѣ пою́щыѧ тѧ̀.

Бг҃оро́диченъ: Ра́дость неизрече́ннꙋю ро́ждши гдⷭ҇а, ра́дости на́съ небе́сныѧ прича́стники сотворѝ, всѣ́хъ тебѐ почита́ющихъ вои́стиннꙋ, пречⷭ҇таѧ, и҆ ѿ дꙋшѝ вопїю́щихъ тѝ: не забꙋ́ди твои́хъ рабѡ́въ, бл҃гослове́ннаѧ марі́е.