Канон на первое и второе обретение главы Пророка, Предтечи и Крестителя Господня Иоанна

Пѣ́снь а҃.

І҆рмо́съ: Ꙗ҆́кѡ по сꙋ́хꙋ, пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Грѧди́те, бл҃гохва́льнымъ ѧ҆зы́комъ и҆ всеси́льнымъ пле́щꙋще дꙋ́хомъ и҆зъ ᲂу҆сте́нъ нечи́стыхъ, гла́съ сло́ва прⷣте́чꙋ пѣ́сньми дꙋхо́вными, вѣ́рнїи, просла́вимъ.

Ми́рнымъ ᲂу҆строе́нїемъ ᲂу҆тиша́етсѧ, и҆ безмѣ́рными мно́жествы хрⷭ҇то́ва цр҃ковь, бл҃гостоѧ́тельнѣ ᲂу҆паса́етсѧ, тебѣ̀ лѣ́тнюю пѣ́снь вопїю́щи, прⷣте́че.

Ю҆́же ѿ бг҃а да́рꙋемꙋю ꙗ҆́кѡ сокро́вище на́мъ неѿе́млемо, бг҃оно́снꙋю главꙋ̀ прⷣте́чевꙋ, всѝ пѣ́сньми досто́йнѡ соше́дшесѧ, вѣ́рнїи, почти́мъ.

Бг҃оро́диченъ: Твоего̀ прїе́мши содѣ́телѧ, ꙗ҆́кѡ са́мъ восхотѣ̀ и҆зъ безсѣ́меннагѡ твоегѡ̀ чре́ва, па́че ᲂу҆ма̀ воплоща́ема, чⷭ҇таѧ, тва́рей вои́стиннꙋ ꙗ҆ви́ласѧ є҆сѝ влⷣчца.

Пѣ́снь г҃.

І҆рмо́съ: Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Оу҆тро́ба непло́дна прозѧбе́нїе тѧ̀ и҆знесѐ бжⷭ҇твенно, ꙗ҆́же ѿ ꙗ҆зы̑къ цр҃ковь, сла́вна невѣстово́дца, хрⷭ҇тꙋ̀ и҆́стинномꙋ бг҃ꙋ и҆ женихꙋ̀ сїю̀ ѡ҆брꙋча́юща.

Твоегѡ̀ бг҃овѣща́ннагѡ гла́са, прⷣте́че і҆ѡа́нне, нижѐ мече́мъ ᲂу҆держа̀ ѻ҆каѧ́ннаѧ прелюбодѣ́йца: бжⷭ҇твеннꙋю бо твою̀ на́мъ ꙗ҆влѧ́еши главꙋ̀ ѿ землѝ.

Торжествꙋ́ющїй свѣ́тлѡ жела́ющь тѧ̀ гра́дъ, ᲂу҆чрежда́емь быва́етъ ꙗ҆́кѡ бога́тство ѡ҆брѣ́тшь та́йное, и҆ и҆сто́чникъ неѡскꙋ́денъ и҆сцѣле́нїй, прⷣте́че, главꙋ̀ твою̀.

Бг҃оро́диченъ: Бжⷭ҇твеннагѡ ржⷭ҇тва̀ твоегѡ̀, чⷭ҇таѧ, всѧ́кїй є҆стества̀ чи́нъ прехо́дитъ чꙋ́до: бг҃а бо преесте́ственнѡ зачала̀ є҆сѝ во чре́вѣ, и҆ ро́ждши пребыва́еши при́снѡ дв҃а.

Сѣда́ленъ, гла́съ и҃.

Ꙗ҆́кѡ въ храни́лищи сокро́вище вложена̀ прⷣте́чева глава̀ хранѧ́шесѧ, въ водоно́сѣ кры́ющасѧ гла́съ сло́ва: ꙗ҆́кѡ пшени́ца покрове́на во глꙋбинѣ̀ землѝ и҆зцвѣтѐ, плодоносѧ́щи бжⷭ҇твеннꙋю жи́знь. Тоѧ̀ всѝ почита́емъ ѡ҆брѣ́тенїе, хрⷭ҇та̀ сла́вѧще, пода́вшаго то́й бл҃года́ть и҆сточи́ти и҆сцѣлє́нїѧ.

Сла́ва, и҆ ны́нѣ, бг҃оро́диченъ: Повелѣ́нное та́йнѡ прїе́мъ въ ра́зꙋмѣ, въ кро́вѣ і҆ѡ́сифовѣ тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. є҆го́же и҆ ви́дѧ въ ложесна́хъ твои́хъ, прїе́мша ра́бїй зра́къ, ᲂу҆жаса́юсѧ зва́ти тебѣ̀: ра́дꙋйсѧ, невѣ́сто неневѣ́стнаѧ.

Пѣ́снь д҃.

І҆рмо́съ: Хрⷭ҇то́съ моѧ̑ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Ве́тхагѡ бы́лъ є҆сѝ печа́ть, всебога́те, ꙗ҆́вѣ завѣ́та, и҆ прⷪ҇ро́кѡвъ коне́цъ и҆звѣсти́лъ є҆сѝ: и҆ чертогокраси́тель же бжⷭ҇твенный, но́вагѡ ꙗ҆ви́лсѧ є҆сѝ, прⷣте́че.

Власѧны́ми рꙋ́бы, ѻ҆бы́чнѡ, прⷣте́че, честнꙋ́ю претерпѣ́лъ є҆сѝ и҆ сла́внꙋю главꙋ̀ твою̀ покры́ти ца́рскою багрѧни́цею, ꙗ҆́кѡ ри́зою, ра́дꙋѧсѧ.

Бжⷭ҇твеннꙋю главꙋ̀ твою̀, ѿбѣже́нїемъ ни́щїй и҆ скита́ѧйсѧ, твои́ми бжⷭ҇твенными наставле́ньми, ꙗ҆́коже незави́стно бога́тство, і҆ѡа́нне, показꙋ́етъ.

Заре́ю, прⷣте́че, бжⷭ҇твеннагѡ дх҃а, чтꙋ́щїй тѧ̀ гра́дъ всегда̀, молѝ ᲂу҆ѧсни́ти, и҆ въ бжⷭ҇твеннѣй па́мѧти твое́й, безплѡ́тнымъ сра́доватисѧ.

Бг҃оро́диченъ: Ме́ртва мѧ̀ показа̀ са́да вкꙋше́нїе, живо́тное же дре́во, и҆зъ тебє̀ ꙗ҆́вльшеесѧ, пречⷭ҇таѧ, воздви́же, и҆ ра́йскїѧ пи́щи наслѣ́дника мѧ̀ сотворѝ.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Не бы́лъ є҆сѝ тро́сть, крⷭ҇ти́телю, и҆скꙋси́тельными ѕлополꙋче́нїѧ вѣ̑тры всегда̀ коле́блемь, сто́лпъ же бжⷭ҇твенныхъ люде́й непоколеби́мь: си́лою бо и҆лїино́ю ꙗ҆ви́лсѧ є҆сѝ, и҆ дх҃а.

И҆́же бжⷭ҇тво̀ ѿмета́ѧ, и҆ ᲂу҆малѧ́ѧ сла́вꙋ, ѿ тебє̀ кре́щшагѡсѧ хрⷭ҇та̀, и҆ бжⷭ҇твеннꙋю бл҃года́ть твою̀ ᲂу҆таева́ѧ, пра́веднѡ ѿ ѡ҆гра́дъ бжⷭ҇твенныхъ возбранѧ́емь є҆́сть.

Ѿве́рзлъ є҆сѝ незави́стнагѡ бжⷭ҇твеннагѡ и҆сто́чника две́рь, пою́щымъ тѧ̀ любо́вїю, сла́вный прⷣте́че, бжⷭ҇твенныѧ бл҃года́ти и҆сточа́ющїѧ во́ды, и҆ стрꙋи̑ и҆сцѣле́нїй всѣ́хъ веселѧ́щыѧ.

Бг҃оро́диченъ: Носѧ́щи добро́тꙋ мы́сленнꙋю краснѣ́йшїѧ дꙋшѝ твоеѧ̀, невѣ́ста бж҃їѧ была̀ є҆сѝ, запеча́тствована дѣ́вствомъ, чⷭ҇таѧ, и҆ заре́ю чистоты̀ мі́ръ просвѣща́ющи.

Пѣ́снь ѕ҃.

І҆рмо́съ: Жите́йское мо́ре воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.

Прⷪ҇ро́ка тѧ̀ речѐ и҆́стина хрⷭ҇то́съ, и҆ прⷪ҇ро́кѡвъ превы́шша, крⷭ҇ти́телѧ же и҆ прⷣте́чꙋ жи́зни: того́ бо ᲂу҆зрѣ́лъ є҆сѝ, є҆го́же зако́нъ и҆ прⷪ҇ро́цы провозвѣсти́ша.

Не терпѧ́ше кры́тисѧ чꙋде́съ и҆сто́чникъ, сокро́вище бл҃года́ти, сла́внаѧ глава̀ твоѧ̀, крⷭ҇ти́телю, прⷪ҇ро́че и҆ прⷣте́че: но ꙗ҆́вльшисѧ пролива́етъ и҆сцѣле́нїй и҆сто́чники.

Всебога́тно похвале́нїе, и҆ ᲂу҆краше́нїе свѣ́тло, и҆ щи́тъ спаси́теленъ, хрⷭ҇толю́бный се́й, и҆ бл҃госла́вный предлага́етъ гра́дъ тво́й, честнꙋ́ю и҆ бжⷭ҇твеннꙋю твою̀ главꙋ̀, прⷣте́че.

Бг҃оро́диченъ: Вели́кїй прописа̀ во прⷪ҇ро́цѣхъ мѡѷсе́й тѧ̀ кївѡ́тъ, и҆ трапе́зꙋ, и҆ свѣ́щникъ, и҆ ста́мнꙋ ѻ҆бра́знѣ, назна́менꙋѧ воплоще́нїе, є҆́же и҆зъ тебє̀, вы́шнѧгѡ, мт҃и дв҃о.

Конда́къ, гла́съ в҃.

Прⷪ҇ро́че бж҃їй, и҆ прⷣте́че бл҃года́ти, главꙋ̀ твою̀ ꙗ҆́кѡ шипо́къ свѧще́ннѣйшїй ѿ землѝ ѡ҆брѣ́тше, и҆сцѣлє́нїѧ всегда̀ прїе́млемъ: и҆́бо па́ки ꙗ҆́коже пре́жде въ мі́рѣ проповѣ́дꙋеши покаѧ́нїе.

І҆́косъ:

Ѿ гдⷭ҇а свидѣ́тельство прїе́мъ, і҆ѡа́нне, па́че всѣ́хъ человѣ̑къ вы́шшїй бы́лъ є҆сѝ: ѿѻнꙋ́дꙋже похвалы̑ пѣ́сней принестѝ тебѣ̀ ᲂу҆жаса́юсѧ, но любо́вїю понꙋжде́нъ, пѣ́снь нача́ти дерзнꙋ́хъ. Тѣ́мже да не ᲂу҆недосто́иши споспѣ́шникъ мнѣ̀ бы́ти, всехва́льне, да возмогꙋ̀ вѣнча́ти тво́й ве́рхъ ст҃ы́й, требога́те: и҆́бо ты̀ въ мі́рѣ проповѣ́дꙋеши покаѧ́нїе.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Дв҃ы прозѧбе́нїе, тѧ̀ па́че всѣ́хъ речѐ въ рожде́нныхъ жена́ми: ꙗ҆́кѡ бо безпло́тенъ и҆ равноа́гг҃ленъ на землѝ томꙋ̀ пожи́лъ є҆сѝ, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.

Во ᲂу҆тро́бѣ двⷭ҇твеннѣй все́льшасѧ позна́лъ є҆сѝ и҆зъ непло́дна чре́ва, и҆ ᲂу҆потреби́въ мт҃рнѧ, прⷣте́че, гла́са, и҆гра́ѧ взыва́лъ є҆сѝ є҆мꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Ѿ пꙋсты́ни прест҃ы́мъ дх҃омъ наꙋче́нъ ꙗ҆ви́лсѧ є҆сѝ, ꙗ҆́коже ᲂу҆́тро свѣтоно́сно, а҆́гг҃лъ свѣ́та, на́съ наꙋча́ѧ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆блажи́сѧ ꙗ҆́кѡ вои́стиннꙋ во градѣ́хъ, се́й ны́нѣ, приснопа́мѧтне, стѧжа́вый тѧ̀ гра́дъ сокро́вище, прⷣте́че хрⷭ҇то́въ. тѣ́мже пра́зднꙋѧ вопїе́тъ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ: Тобо́ю, мт҃и дв҃о, свѣ́тъ возсїѧ̀ все́й вселе́ннѣй свѣ́тлый, ты́ бо зижди́телѧ всѣ́хъ родила̀ є҆сѝ бг҃а: ᲂу҆ негѡ́же и҆спросѝ, пречⷭ҇таѧ, на́мъ низпосла́ти вѣ̑рнымъ ве́лїю ми́лость.

Пѣ́снь и҃.

І҆рмо́съ: И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

По́сланъ бы́сть вопїю́щагѡ гла́съ прⷣте́ча, запꙋстѣ́вшымъ сердца́мъ, сн҃а бж҃їѧ, вѣ́рꙋ бл҃гочести́вꙋю водрꙋжа́ѧй сꙋ́щагѡ бг҃а, є҆го́же превозно́симъ во всѧ̑ вѣ́ки.

Оу҆гото́вите, глаго́летъ и҆ ны́нѣ прⷣте́ча, гдⷭ҇ню стезю̀: се́й бо ст҃ы́ни ра́ди прише́дъ, со ѻ҆ц҃е́мъ и҆ дх҃омъ, въ на̑ша сердца̀ всели́тсѧ во вѣ́ки.

Слꙋ́хомъ ᲂу҆́бѡ гла́сꙋ роди́телевꙋ, ѻ҆чи́ма же бжⷭ҇твеннагѡ дх҃а зрѣ́нїю: всѧ́чески же ѡ҆сѧза́нїемъ і҆ѡа́ннъ прⷣте́ча на тебѣ̀ рꙋ́кꙋ положи́вый, хрⷭ҇тѐ, бг҃оно́сецъ быва́етъ.

И҆зъ чре́ва ѡ҆ст҃и́сѧ бжⷭ҇твеннымъ дх҃омъ, и҆ прⷪ҇ро́къ ꙗ҆ви́сѧ во чре́вѣ носи́мь: ны́нѣ же наслажде́нїе, и҆́же въ нѣ́дрѣхъ тѧ̀ и҆мꙋ́щемꙋ гра́дꙋ показа́сѧ, прⷪ҇ро́че.

Бг҃оро́диченъ: Златоза́рный тѧ̀ свѣ́щникъ пред̾изѡбразѝ, прїе́мшꙋю неизрече́ннѡ свѣ́тъ непристꙋ́пный, позна́нїемъ тогѡ̀ ѡ҆зарѧ́ющь всѧ́чєскаѧ: є҆го́же превозно́симъ во всѧ̑ вѣ́ки.

Пѣ́снь ѳ҃.

І҆рмо́съ: Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Ꙗ҆́вѣ и҆сполне́нїѧ десѧти́цы, прⷣте́че, за́повѣдей ты̀ храни́тель крѣ́покъ бы́въ, прили́чнѣ ѿ хрⷭ҇та̀ почте́нъ бы́лъ є҆сѝ дарова́нїй десѧти́цею. тѣ́мже тѧ̀ дх҃а таи́нника, и҆ дрꙋ́га сло́вꙋ вѣ́дꙋще, ᲂу҆блажа́емъ.

Хрⷭ҇то́въ прⷪ҇ро́къ же и҆ а҆пⷭ҇лъ, а҆́гг҃лъ же и҆ прⷣте́ча, бжⷭ҇твеннагѡ воплоще́нїѧ крⷭ҇ти́тель, и҆ сщ҃е́нникъ, и҆ мч҃никъ вѣ́ренъ: проповѣ́дникъ же сꙋ́щымъ во а҆́дѣ ты̀ бы́лъ є҆сѝ, и҆ дѣ́вствꙋющымъ пра́вило, и҆ пꙋсты́ни прозѧбе́нїе.

Дꙋшѝ невѣ́рїе ѡ҆блича́етсѧ, сщ҃еннодѣ́йственныѧ рꙋкѝ ᲂу҆мерщвле́нныѧ чꙋдесе́мъ: прозѧ́бшей же па́ки вѣ́рѣ, и҆ твое́й ꙗ҆́вльшейсѧ главѣ̀, блаже́нне, поже́ртаѧ дла́нь ѡ҆бновлѧ́етсѧ.

Твоѐ ꙗ҆вле́нїе провозвѣща́юще зри́телю, возвѣща́хꙋ а҆́гг҃льстїи чи́ни нело́жнѡ, гаврїи́ла подо́бѧщесѧ бжⷭ҇твенномꙋ бл҃говѣ́щенїю, є҆́же пре́жде рождества̀ твоегѡ̀, свѧще́нный заха́рїа прїе́млетъ.

Бг҃оро́диченъ: Страсте́й и҆сцѣлє́нїѧ да почерпа́емъ, въ сла́вный хра́мъ прⷣте́чевъ притека́юще: въ то́й бо прихо́дѧтъ а҆́гг҃льстїи ли́цы, дꙋ́си же пра́ведныхъ всѣ́хъ, влⷣчца съ крⷭ҇ти́телемъ і҆ѡа́нномъ, и҆сцѣлє́нїѧ подава́юще.

Свѣти́ленъ.

Свѣтоѧвле́ннаѧ возсїѧ̀ честна́ѧ твоѧ̀ глава̀ ѿ незаходи́мыхъ нѣ́дръ земны́хъ, прⷣте́че і҆ѡа́нне, свѣти́льниче свѣ́та невеще́ственнагѡ: є҆ѧ́же ѡ҆брѣ́тенїе любо́вїю соверша́юще мо́лимъ тѧ̀, лю́тыхъ ѡ҆брѣстѝ разрѣше́нїе, и҆ вре́мѧ ᲂу҆до́бнѣ соверши́ти воздержа́нїѧ, моли́твами твои́ми, всехва́льне крⷭ҇ти́телю сп҃совъ.

Сла́ва, и҆ ны́нѣ, бг҃оро́диченъ: Оу҆тѣша́етсѧ, всечⷭ҇таѧ, вѣ́рныхъ бг҃омꙋ́дрое собра́нїе слꙋжа́щее, и҆ вѣ́рнѡ воспѣва́ющее тѧ̀ бцⷣꙋ и҆́стиннѡ. тѣ́мже моли́твами твои́ми поста̀ тече́нїе да́ждь на́мъ соверши́ти бг҃олѣ́пнѡ, и҆ крⷭ҇тꙋ̀ честно́мꙋ поклони́тисѧ, и҆ стрⷭ҇те́мъ спаси́тєльнымъ сн҃а и҆ бг҃а твоегѡ̀.