Каноны святому благоверному князю Роману Углечскому (иные)

Пе́снь 1.

Ирмо́с: Я́ко по су́ху, пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

И́же ско́ро все́м послу́шный, благове́рный кня́же Рома́не, призыва́ющим свято́е и́мя твое́ в беда́х, и в ско́рбех, и в боле́знех разли́чных, и все́м прося́щим подае́ши ско́рое здра́вие и ра́достное утеше́ние, ве́рныя лю́ди ми́лостивно посеща́й.

Взы́де, я́ко светолу́чное со́лнце на высоту́ Небе́сную и осия́юще вселе́нную, та́ко и ты́, благове́рный кня́же Рома́не, Бо́гом пору́ченный ти́ гра́д У́глеч освяти́ и просла́ви ве́сь гра́д, и вся́ лю́ди, живу́щая в не́м, и вся́ стра́ны Ру́сския земли́ свои́ми чудесы́.

Ви́димых и неви́димых вра́г и от ни́х вся́каго наведе́ния вра́жия изба́ви на́с, мо́лимся тебе́, благове́рный кня́же Рома́не, от нестерпи́мых бе́д на́с свободи́.

Богоро́дичен: О, Всеми́лостивая Госпоже́ Богоро́дице, к Ро́ждшемуся из Тебе́ о на́с моли́, ско́рби на́ша на ра́дость претвори́.

И́н. гла́с 1.

Ирмо́с: Твоя́ победи́тельная десни́ца, Боголе́пно в кре́пости просла́вися, та́ бо, Безсме́ртне, я́ко всемогу́щая проти́вная сотре́, изра́ильтянам пу́ть глубины́ новосоде́лавшая.

Благочести́ваго и венчено́снаго кня́зя Рома́на по достоя́нию похва́лим, чуде́с пода́теля оби́льна, спаса́ющаго ду́ши на́ша моли́твами свои́ми.

Престо́лу у́бо предстоя́ благода́ти и со все́ми А́нгелы ра́дуяся, дне́сь ми́рови исцеле́ния раздае́т бога́тство, те́м же согла́сно зове́м ему́: спаси́ на́с моли́твами свои́ми, блаже́нне.

Пе́сньми и пе́ньми восхва́лим блаже́ннаго кня́зя Рома́на и, честну́ю его́ и благода́тную па́мять пра́зднующе, си́це возопие́м: ра́дуйся, гра́ду своему́ У́глечу многосве́тлый свети́льниче и тве́рдый засту́пниче.

Богоро́дичен: Ума́ моего́, Всенепоро́чная, омраче́ние све́том Свои́м отжени́ и тьмы́ изба́ви мя́ ве́чнующия, я́ко да пою́ вели́чия Твоя́.

Пе́снь 3.

Ирмо́с: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Благове́рный кня́же Рома́не, вси́ лю́дие пра́зднуют и мно́жество и́ночествующих по́стник покланя́ются тебе́, ви́девше от Бо́га да́нныя тебе́ пресла́вныя чудеса́ ко все́м, прося́щим у тебе́ ми́лости.

Мо́лим тя́, благове́рный кня́же Рома́не, и взыва́ем ти́: покая́нию упра́ви на́с и не лиши́ на́с душеспасе́ннаго исполне́ния.

Благове́рный кня́же Рома́не, убо́гия рабы́ твоя́, во глубине́ грехо́вней пони́кшая, воздви́гни, и на стезю́ покая́ния наста́ви на́с, и плоды́ израсти́.

Богоро́дичен: Кто́ не сла́вит или́ кто́ велегла́сно не пое́т Тебе́, Благове́рная Госпоже́, Пречи́стая Богоро́дица, Ма́ти Бо́жия, мо́лим Тя́, Милосе́рдая, откры́й на́м душеспасе́ннаго исполне́ния.

И́н.

Ирмо́с: Еди́не, ве́дый челове́ческаго существа́ не́мощь и ми́лостивно в не вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нный сла́вы Твоея́, Человеколю́бче.

Свети́льник Све́та яви́ся благочести́вый кня́зь Рома́н, неду́г и глубо́кую тьму́ разреша́ющ всегда́, и заре́ю све́тлою чуде́с озаря́ет прему́дрый.

Дне́сь весе́лием ра́дуется Христо́ва Це́рковь, в па́мять присноблаже́ннаго кня́зя Рома́на, и ве́рою взыва́ющи: Ты́ ми́, Христе́, держа́ва и утвержде́ние.

Я́ко честны́й би́сер, благода́ть твоя́, блаже́нне Рома́не, все́м незри́мо низхо́дит и разли́чная исцеле́ния неоску́дно подава́ющи.

Богоро́дичен: А́нгел святи́и чи́нове и во́инства Небе́сных Си́л Твоего́ Сы́на ужаса́ются, мо́лим Тя́, Милосе́рдая, в стра́шный и гро́зный де́нь прише́ствия Его́ помози́ на́м, Влады́чице.

Конда́к, гла́с 8:

Сконча́в до́брый по́двиг, и ве́ру соблюде́ в се́рдцы свое́м, и вене́ц нетле́нный от Бо́га прия́л еси́, блаже́нный кня́же Рома́не, и сла́ве Его́ сподо́бился еси́, и Престо́лу предста́л еси́ Спа́сову. Моли́ся Го́сподеви спасти́ гра́д У́глеч и вся́ гра́ды от наше́ствия иноплеме́нных, и междоусо́бныя бра́ни, и пога́ных, и твое́ честно́е преставле́ние почита́ющим грехо́в оставле́ние дарова́ти чту́щим любо́вию святу́ю па́мять твою́.

И́кос:

Всечестну́ю и Боже́ственную па́мять чти́м вели́каго кня́зя Рома́на, уго́дника Христо́ва, и́же ца́рским венце́м от ю́ности укра́шен и пребога́тым да́ром, и ми́лостынею, ве́лия вла́сть бы́сть своему́ Оте́честву, и все́й земли́ украше́ние, и заступле́ние гра́ду на́шему, и от наше́ствия иноплеме́нных изба́вил еси́, от злы́х бе́д и скорбе́й моли́твою свое́ю. И си́це рце́м: ра́дуйся, ни́щим корми́телю; ра́дуйся, вдови́цам и сирота́м засту́пниче; ра́дуйся, бе́дным утеше́ние; ра́дуйся, гра́д сво́й изба́вивый от вра́г и моли́твою победи́вый и́х. И ны́не неви́димо мо́лишися Христу́ Бо́гу, я́ко да зове́м ти́: ра́дуйся, гра́ду на́шему У́глечу похвало́ и Оте́честву своему́ сла́во и утвержде́ние.

Седа́лен, гла́с 8:

Ско́рый в беда́х уте́шитель и в боле́знех исцели́тель, во гра́дех и во страна́х вся́ лю́ди неисче́тною ми́лостию покрови́тель, благове́рный кня́же Рома́не, моли́ся Христу́ Бо́гу о чту́щих святу́ю па́мять твою́.

Богоро́дичен: Ра́дуйся, Я́же от А́нгела ми́ру ра́дость прие́мши; ра́дуйся, Ро́ждшая Творца́ тва́ри; ра́дуйся, сподо́бльшаяся бы́ти Ма́ти Христа́ Бо́га.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я Це́рковь Боголе́пно пое́т, взыва́ющи, от смы́сла чи́ста о Го́споде пра́зднующи.

Укроти́, благове́рный кня́же Рома́не, злотво́рных челове́к, из ру́к и́х исхити́ гони́мых и расхища́емых неми́лостивно.

Смири́ враго́м вознесе́нную вы́ю велере́чующих сове́т, злонра́вных сердца́, поуча́ющих на на́с по вся́ дни́, на тя́ не́сть и́х упова́ния, но упова́ют на сво́й язы́к велере́чив, язы́к челове́ч, ты́, благове́рный кня́же Рома́не, от таковы́х злотво́рных бе́д изба́ви.

Вооружи́ся на на́с лука́вно вра́г мечта́нием злы́м, я́коже мече́м погуби́ти хотя́, но милосе́рдый кня́же Рома́не, защити́ от те́х злы́х и ми́рны и́х сотвори́.

Богоро́дичен: Кто́ изочте́т си́лы Твоя́, Чи́стая, но пощади́ на́с, вы́ими из глубины́ грехо́вныя и наста́ви на благо́е покая́ние безвозвра́тно.

И́н.

Ирмо́с: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му во спасе́ние на́ше и обновле́ние.

Заре́ю Трисо́лнечныя благода́ти сия́ет све́тлый тво́й пра́здник, блаже́нне кня́же Рома́не, стра́стнаго омраче́ния бесо́вскаго избавля́я творя́щих ве́рою па́мять твою́.

Простре́ у́м ко Еди́ному Влады́це, блаже́нне, и вене́ц нетле́ния от Него́ прии́м, сия́ющи све́тлыми све́тлостии и бога́тными дарова́нии, иде́же перворо́дных жили́ща.

Источи́л еси́ ре́ки чуде́с, благове́рный кня́же Рома́не, ве́рным напоя́юще сердца́, и му́тныя во́ды неве́рия изсуши́л еси́.

Богоро́дичен: Влады́чице ми́ру, Богоро́дице, помози́ на́м, прелука́вый вра́г поглота́ет на́с зе́льне лю́тыми воспомина́нии и помышле́нии, и́же от Бо́га на́с разлуча́ют, не оста́ви у́бо на́с, ниже́ пре́зри на́с.

Пе́снь 5.

Ирмо́с: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Ускори́, благове́рный кня́же Рома́не, отъя́ти от зла́ неми́лостивых челове́к, пленя́ющих и расхища́ющих безве́стно, и печа́ль на́шу ра́дованьми раствори́.

Покажи́ ско́рое заступле́ние, благове́рный кня́же Рома́не, прося́щим у тебе́ ми́лости, я́ко да у́зрят по на́с врази́ сопроти́в и́х борю́щую твою́ си́лу, постыдя́тся.

Благове́рный кня́же Рома́не, бу́ди на́м стена́ тве́рдая, бу́ди на́м защи́тниче непреста́нный, бу́ди на́м я́ко оте́ц чадолюби́в, бу́ди на́м прибе́жище и утвержде́ние.

Богоро́дичен: Богоро́дица, Блага́я Помо́щница, из Тебе́ бо на́м возсия́ Све́т преди́вный, те́м же Тя́, Цари́цу и Влады́чицу все́х, Ма́терь Зижди́теля тва́рем, пропове́дуем.

И́н.

Ирмо́с: Тво́й ми́р да́ждь на́м, Сы́не Бо́жий, ино́го бо, ра́зве Тебе́, бо́га не зна́ем, И́мя Твое́ имену́ем, я́ко Бо́г живы́х и ме́ртвых еси́.

Яви́ся, я́ко звезда́ све́тлая, непреле́стная, блаже́нне кня́же Рома́не, лю́дем благочести́вым побо́рник, пле́нным свободи́тель и ни́щим защи́титель, боля́щим вра́ч и гра́ду на́шему и все́й земли́ Ру́сской утвержде́ние.

Я́ко вели́кое бога́тство щедро́т, блаже́нный кня́же Рома́не, яви́ся гра́ду У́глечу безчи́сленное проли́тие ми́лости твоея́, ты́ бо прося́щим ве́рою су́щая цельбы́ подае́ши и те́х просвеща́еши свои́м милосе́рдием, блаже́нне.

Пресве́тлый свети́льник, сия́я во все́м ми́ре, блаже́нный кня́зь Рома́н, и во мра́це стра́стне озаря́я все́х на́с, и в Ру́сстей земли́ чудотво́рец яви́ся пресла́вен, прося́щим подава́я цельбу́, блаже́нне, я́ко да и мы́ благода́ть исцеле́нием обрета́ем.

Богоро́дичен: Светообра́зна и Христо́в хра́м, Отрокови́це, моли́твами Свои́ми Отцу́ и Сы́ну и Свято́му Ду́ху и на́с хра́мы сотвори́, преподо́бныя содева́юще, Пречи́стая.

Пе́снь 6.

Ирмо́с: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти́: возведи́ от тли́ живо́т мо́й, Многоми́лостиве.

Во́тчину свою́, гра́д У́глеч, и страны́ Ру́сския земли́ благомилосе́рдо пощади́ и ми́лостивно утверди́, ми́р и любо́вь, и здра́вие, и оби́лие во все́м во все́х до́мех сотвори́ и всегда́ ра́достно на́с посеща́й.

Еди́н а́з, гре́шный, и ны́не в ле́ности предлежу́, и у́м мо́й во грехи́ глубо́кия впа́д, но ты́, благове́рный кня́же Рома́не, наста́ви мя́ на стезю́ пра́вую и не оста́ви мя́, погиба́ющаго.

Процве́л еси́, я́ко цве́т ра́йский, посреди́ Ру́сския земли́, уго́дниче Бо́жий, благове́рный кня́же Рома́не, жи́в к Бо́гу свои́ми труды́, посто́м, и моли́твами, и нищелю́бием, и нощны́м стоя́нием, а по сме́рти боля́щим разли́чными неду́ги, печа́льным и бе́дным заступле́ние, здра́вие и ра́дость все́м подае́ши безпреста́нно.

Богоро́дичен: На Небеси́ Арха́нгели и А́нгели, Херуви́ми и Серафи́ми сла́вят, а на земли́ вси́ лю́дие раболе́пно покланя́ются Рождеству́ Твоему́, мо́лим Тя́: спаси́ ду́ши на́ша.

И́н.

Ирмо́с: Обы́де на́с после́дняя бе́здна, не́сть избавля́яй, вмени́хомся, я́ко о́вцы заколе́ния. Спаси́ лю́ди Твоя́, Бо́же на́ш, Ты́ бо кре́пость немощству́ющих и исправле́ние.

От пречестна́го ко́рене израсте́ ве́твь пресла́вная, благочести́вый кня́же Рома́не, благоче́стно на земли́ пожи́в, и прия́телище чи́сто Ду́ху Свято́му бы́л еси́, просвеща́я вопию́щих ны́не па́мять твою́.

Сохрани́ гра́д сво́й У́глеч и вся́ страны́ Ру́сския земли́, благочести́вый кня́же Рома́не, от безбо́жных инове́рных нахо́да и от усо́бныя ра́ти, вся́каго стра́ха и му́ки изба́ви.

Сирота́м и вдови́цам засту́пник, и в беда́х необори́мый помо́щник, и все́м притека́ющим к тебе́ приста́нище, небу́рное и неле́стное оти́шие су́щим во гресе́х.

Богоро́дичен: Вели́чия Тебе́, Чи́стая, сотвори́ Госпо́дь на́ш, Его́ же моли́ при́сно возвели́чити и в на́с бога́тую Его́ ми́лость, Пренепоро́чная Влады́чице.

Конда́к, гла́с 8:

Красоту́ ми́ра сего́, княже́ние и сла́ву я́ко вре́менно помышля́я, и сего́ ра́ди благоче́стно в ми́ре пожи́л еси́, блаже́нне кня́же Рома́не, ми́лостынею и моли́твами Бо́гу угоди́в, и по преставле́нии свое́м чуде́с да́р прии́м от Христа́ Бо́га, и свети́льник яви́ся пресве́тлый, просвеща́я свои́ми чудесы́, приходя́щим к тебе́ с ве́рою здра́вие подае́ши и от бе́д избавля́еши. Те́м же Христо́ва Це́рковь пе́сньми сла́вит тя́, благочести́вый кня́же Рома́не, гра́ду своему́ У́глечу вели́кий побо́рниче.

И́кос:

Го́споди, отве́рзи ми́ устне́ и язы́к мо́й, умили́ се́рдце мое́ и напо́лни ду́ха смиренному́дрия, да возглаго́лю и воспою́ Твоего́ уго́дника, но́ваго чудотво́рца, благове́рнаго кня́зя Рома́на: ра́дуйся, благочести́ваго ко́рене пречестна́я о́трасль; ра́дуйся, ма́тере благогове́йны ве́твь прекра́сна и пресла́вна; ра́дуйся, честны́й сосу́де Свято́му Ду́ху; ра́дуйся, я́ко на Небеси́ со А́нгелы живе́ши; ра́дуйся, целому́дрия сто́лпе, и́мже бесо́вская шата́ния искорени́шася; ра́дуйся, свети́льниче многосве́тлый, чуде́с сия́ния вселе́нную просвеща́еши; ра́дуйся, пра́ведным Боже́ственное наслажде́ние; ра́дуйся, гре́шным спасе́ние и леня́щимся к Бо́гу дерзнове́ние; ра́дуйся, гра́д сво́й У́глеч и живу́щая в не́м лю́ди спа́сл еси́ от бе́д и злы́х скорбе́й; ра́дуйся, крестоно́сным лю́дем похвало́ и утвержде́ние; ра́дуйся, земли́ Ру́сской засту́пниче и забра́ло неруши́мое; ра́дуйся, гра́ду на́шему У́глечу вели́кий побо́рниче.

Пе́снь 7.

Ирмо́с: Росода́тельну у́бо пе́щь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Мо́лим тя́, благове́рный кня́же Рома́не, ви́ждь на́шу нестерпи́мую печа́ль, и боле́зни, и ско́рби, и стра́сти, но умилосе́рдися, от все́х бе́д свободи́; благослове́н Бо́г оте́ц на́ших.

Показа́ся гра́ду У́глечу, я́ко свети́ло негаси́мое, благове́рный кня́же Рома́не, доброде́тельми свои́ми просвети́л еси́ все́х на́с и, трудолю́бным житие́м на земли́ пожи́в, сего́ ра́ди всели́ся во оби́тель Небе́снаго Ца́рствия; благослове́н Бо́г оте́ц на́ших.

Ра́дуйся, благове́рный кня́же Рома́не, просвети́вше свои́ми чудесы́ во́тчину свою́, гра́д У́глеч, и страны́ Ру́сския земли́; ра́дуйся, победи́вше диа́вола, и посрами́вше житие́ ны́нешняго су́етнаго све́та, и обре́тше неизрече́нную благода́ть от Бо́га в безконе́чном во о́ном ве́це со А́нгелы и святы́ми; благослове́н Бо́г оте́ц на́ших.

Богоро́дичен: Наде́ждо все́м, Госпоже́ Богоро́дице, разгони́, Влады́чице, враги́ души́ моея́ и напра́ви на стезю́ пра́ву, пощади́, Помо́щнице и Наде́ждо христиа́нская; благослове́н Бо́г оте́ц на́ших.

И́н.

Ирмо́с: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Во все́х стра́нах про́йде веща́ние, я́ко гра́ду У́глечу яви́ся чудотво́рец пресла́вен, да́рующий мно́жество исцеле́ний все́м, приходя́щим к нему́ и ве́рою пою́щим его́; отце́м Бо́г благослове́н еси́.

Чудесы́ у́бо свои́ми, я́ко цве́т, процве́л еси́, блаже́нне, исцеле́ния подае́ши притека́ющим к тебе́, Богому́дре и досточу́дне кня́же Рома́не, отце́м Бо́г благослове́н еси́.

Се́ ны́не стеко́шася от все́х градо́в и стра́н ве́рующие лю́дие, ра́дующеся вку́пе, хвалу́ возда́ти тебе́, Богоблаже́нне Рома́не; отце́м Бо́г благослове́н еси́.

Богоро́дичен: Тебе́, Всесвята́я и Чи́стая Госпоже́ Богоро́дице, раби́ Твои́, всегда́, во дни́ и в нощи́, мо́лимся сокруше́нною мы́слию, прося́ще избавле́ния пода́ти согреше́нием Твои́ми моли́твами; отце́м Бо́г благослове́н еси́.

Пе́снь 8.

Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Ра́достный на́м вели́кий и све́тлый пра́здничный де́нь возсия́ в Богоспаса́емом гра́де У́глече, в де́нь пра́здника основа́ния хра́ма во и́мя Преображе́ния Го́спода на́шего Иису́са Христа́ и обре́тение твои́м многочуде́сным моще́м, Его́ же превозно́сим, Го́спода, во ве́ки.

Де́нь Госпо́день всегда́ пред очи́ма зря́ и всегда́ во уме́ свое́м держа́, кто́ в ны́нешнем житии́ не у́зрит сме́рти, и Богоуго́дно и смиренному́дренно пожи́в, и с ми́ром к Бо́гу отъи́де, Его́ же превозно́сим, Го́спода, во ве́ки.

В де́нь восше́ствия твоего́ на Небеса́ ко Го́споду Бо́гу, благове́рный Рома́не, Арха́нгели, А́нгели, Херуви́ми и Серафи́ми, и вся́ святы́я, от ве́ка Бо́гу угоди́вшия, неизрече́нною ра́достию тебе́ срето́ша, а мы́, гре́шнии, про́сим у тебе́ ми́лости: изба́ви на́с от все́х скорбе́й и не лиши́ на́с душеспасе́ннаго исполне́ния.

Богоро́дичен: О, Влады́чице, непремо́лчно Тебе́, Ма́терь Бо́жию, пою́т велегла́сно Арха́нгели и А́нгели, и вси́ ро́ди челове́честии покланя́ются, и да́й, Де́во, избы́ти Тобо́ю тле́нное существо́, ра́дуйся, Обра́дованная, Госпо́дь с Тобо́ю, Его́ же превозно́сим, Го́спода, во ве́ки.

И́н.

Ирмо́с: Его́же ужаса́ются А́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие; и превозноси́те во вся́ ве́ки.

Струя́ происхо́дит от благода́ти твоея́, блаже́нне кня́же Рома́не, исцеле́ний вся́ких, и омыва́ет скве́рны страсте́й, и гное́ния лю́тых очища́ет, все́х ве́рных напоя́ет сердца́ любо́вию чту́щих тя́, пресла́вне, Го́спода по́йте и превозноси́те Его́ во ве́ки.

Хвала́ми досто́йными воспе́ти пресла́внаго чудотво́рца у́м и смы́сл да́руй ми́, Христе́ Бо́же, я́ко да пою́, ра́дуяся, па́мять его́, Го́спода по́йте и превозноси́те Его́ во ве́ки.

Дне́сь спасе́ния пра́здник весе́лию наста́, стеце́мся, ве́рнии, очи́стивше вку́пе ду́ши и телеса́, се́ бо на́с призыва́ет кня́зь Рома́н Боже́ственный, Го́спода по́йте и превозноси́те Его́ во ве́ки.

Богоро́дичен: Уврачу́й, Пречи́стая, стра́сти се́рдца моего́, ро́ждшая все́х Царя́, и пра́ведный че́сти яви́ мя́, прича́стника, Богоро́дице Де́во, Христа́, Сы́на Своего́ умоли́вше, Го́спода воспева́йте дела́ и превозноси́те Его́ во ве́ки.

Пе́снь 9.

Ирмо́с: Бо́га челове́ком невозмо́жно ви́дети, на Него́же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя́ ублажа́ем.

Сохрани́ от бе́д, благове́рный кня́же Рома́не, принося́щих ти́ сию́ ма́лую мольбу́, и от пото́па страсте́й, и вся́каго наве́та, и злотво́рных челове́к изба́ви.

Просвети́лся еси́, благове́рный кня́же Рома́не, я́ко со́лнце, свои́ми чудесы́, даю́ще все́м исцеле́ние, благи́м и гре́шным, невозвра́тно.

Дерзну́х многогре́шный а́з и недосто́йный се́ написа́ние проглаго́лати тебе́, благове́рный кня́же Рома́не, приими́ с ми́лостию и покры́й мя́ неистощи́мыми свои́ми щедро́ты.

Богоро́дичен: Безнача́льнаго Роди́теля Собезнача́льну Сы́ну Ма́ти, Всекра́сная Избра́нная Пречи́стая Отрокови́це Мари́е, пою́щих Тя́ возвесели́, и ма́лое сие́ моле́ние Сы́ну Своему́ и Бо́гу на́шему пропове́ждь, и от вся́ких бе́д свободи́, и не лиши́ мене́ зре́ния Сы́на Своего́ и Бо́га на́шего, на стра́шном Суде́ ста́ти на десно́й стране́, и не отве́ржи мене́ от Престо́ла Бо́жия.

И́н.

Ирмо́с: О́браз чи́стаго рождества́ Твоего́, огнепали́мая купина́ показа́ неопа́льная, и ны́не на на́с напа́стей свирепе́ющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Яви́ся вели́к щи́т и велика́ кре́пость земли́ Ру́сстей, блаже́нный кня́зь Рома́н, лю́дем правосла́вным похвале́ние во все́х язы́цех, ны́не мо́лим ти́ ся́ сохрани́ти страну́ Ру́сскую от ва́рварскаго нахожде́ния, и от плене́ния иноплеме́нных, и от междоусо́бныя бра́ни, и от вся́каго зла́.

Кра́сен душе́ю и те́лом и, благоче́стием сия́я, сла́вне кня́же Рома́не, Боже́ственна испо́лни ра́зума и прему́дрости, орга́н Свята́го Ду́ха бы́л еси́ по сме́рти и безсме́ртней жи́зни и несконча́емому блаже́нству прише́л еси́, ра́дуяся.

У́глечестии наро́ди, прииди́те, собери́теся вси́ в це́рковь святу́ю, ко многоцеле́бному и пресла́вному но́вому чудотво́рцу, благове́рному кня́зю Рома́ну, со слеза́ми велегла́сно воззови́те: о уго́дниче Бо́жий, блаже́нне кня́же Рома́не, изба́ви гра́д и лю́ди своя́, не да́й же достоя́ния твоего́ ро́ду изма́ильтеску и междоусо́бныя бра́ни, и от вся́каго зла́ сохрани́, да до́лжно воспое́м ми́лость твою́, святы́й.

Богоро́дичен: Неизрече́нно та́инство, Ты́ бо Престо́л Херуви́мский и Светоно́сный Черто́г показа́ся Вседержи́теля Бо́га, и возопие́м к Не́й уми́льным гла́сом: о, Пресвята́я Госпоже́ Богоро́дице, от вся́ких бе́д и скорбе́й на́с сохрани́ и ве́чныя изба́ви му́ки, Ю́же благоче́стно, я́ко Богоро́дицу, велича́ем.

Свети́лен:

Всели́ся в се́рдцы твое́м, благове́рный Рома́не, ко́рень бла́г и расплоди́ в тебе́ неоску́дныя к Бо́гу многоподви́жныя труды́ и добро́ту ко все́м челове́ком, моли́ся о душа́х на́ших.

И́н свети́лен:

Ра́дуйся, Бо́гом избра́нный, благочести́вый кня́же Рома́не, лю́дем правосла́вным похвала́ и во́ином соблюде́ние, и ва́рваром побежде́ние, и в беда́х необори́мый помо́щник, и гра́ду У́глечу утвержде́ние.

Богоро́дичен: Просла́вим Ма́терь Бо́га на́шего, пре́жде рождества́ пребы́сть Де́ва, Ма́ти Сы́на Бо́жия, и по рождестве́ Де́ва яви́ся, ра́дуйся, Обра́дованная, Госпо́дь с Тобо́ю.