Канон всем святым, в земле Русской просиявшим

Пѣ́снь а҃.

І҆рмо́съ: Въ чермнѣ́мъ фараѡ́на съ колесни́цами погрꙋзи́лъ є҆сѝ и҆ лю́ди мѡѷсе́омъ сп҃слъ є҆сѝ, пою́щыѧ тебѣ̀, гдⷭ҇и, пѣ́снь побѣ́днꙋю. ꙗ҆́кѡ и҆зба́вителю на́шемꙋ бг҃ꙋ.

Всѝ въ пѣ́снехъ дх҃о́вныхъ воспои́мъ согла́снѡ во бл҃гоче́стїи просїѧ́вшыѧ бжⷭ҇твєнныѧ ѻ҆тцы̀ на́шѧ, ꙗ҆̀же и҆знесѐ рꙋ́сскїѧ землѝ всѧ́ко мѣ́сто и҆ страна̀ и҆ ꙗ҆́же цр҃ковь рꙋ́сскаѧ воспита̀.

Ра́дꙋйтесѧ, ст҃и́телїе седмочи́сленнїи: васі́лїе, є҆фре́ме, є҆ѵге́нїе, є҆лпі́дїе, а҆гаѳодѡ́ре, є҆ѳе́рїе и҆ капі́тѡне в херсѡ́нѣ є҆пⷭ҇копствовавшыи и҆ зе́млю на́шꙋ кровьмѝ свои́ми ѡ҆ст҃и́вшїи.

Прїиди́те, мч҃николю́бцы вѣ́рнїи, пѣ́сньми почти́мъ первомч҃ники рꙋ́сскїѧ, ѳео́дѡра и҆ ю҆́нагѡ і҆ѡа́нна, і҆́дѡлѡмъ не послꙋжи́вшыѧ и҆ крѡ́ви своѧ̑ за хрⷭ҇та̀ да́вшыѧ.

Вели́чїе на́ше и҆ похвала̀ ты̀ є҆сѝ, ѻ҆́льго бг҃омꙋ́драѧ, тобо́ю бо свободи́хомсѧ ѿ бѣсо́вскагѡ прельще́нїѧ, не преста́й и҆ ны́нѣ моли́ти за лю́ди, ꙗ҆̀же бг҃ꙋ привела̀ є҆сѝ.

Ра́дꙋйсѧ и҆ весели́сѧ, ра́бе хрⷭ҇то́въ, кн҃же вели́кїй и҆ мꙋ́дрый влади́мїре, просвѣти́телю на́шъ, тобо́ю бо и҆зба́вихомсѧ ѿ дꙋшепа́гꙋбнагѡ і҆дѡлослꙋже́нїѧ, тѣ́мже, ра́дꙋйсѧ, вопїе́мъ тебѣ̀.

Сїѧ́етъ, ꙗ҆́кѡ ѕвѣзда̀ на нб҃сѝ, бж҃їй і҆ера́рхъ мїхаи́лъ, зе́млю рꙋ́сскꙋю просвѣти́вый свѣ́томъ позна́нїѧ бжⷭ҇твенныѧ вѣ́ры и҆ влⷣцѣ приведы́й лю́ди нѡ́вы, ба́нею креще́нїѧ ѡ҆бновлє́нны.

Ѽ бл҃же́ннїи страстоте́рпцы хрⷭ҇тѡ́вы, кн҃зїе бори́се, глѣ́бе, и҆ и҆́горе, и҆ мїхаи́ле съ болѧ́риномъ ѳео́дѡромъ! не забꙋ́дите ѻ҆те́чества ва́шегѡ, гла́дъ и҆ ѡ҆ѕлобле́нїе ѿгони́те, ѿ грѣхопаде́нїй междоꙋсо́бїй и҆зба́вите ны̀.

Бг҃оро́диченъ: Съ чи́нми а҆́гг҃лъ, влⷣчце, со проро́ки, и҆ а҆по́столы, и҆ со всѣ́ми ст҃ы́ми за ны̀, грѣ̑шныѧ, бг҃ꙋ помоли́сѧ, твоегѡ̀ покро́ва пра́здникъ въ рѡссі́йстѣй землѝ просла́вльшыѧ.

Пѣ́снь г҃.

І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.

Проповѣ́дꙋетъ пресла́внѡ и҆ па́че трꙋбы̀ вопїе́тъ вели́каѧ ла́ѵра пече́рскаѧ, тобо́ю нача́ло прїи́мшаѧ, ѻ҆́тче прпⷣбне, а҆нтѡ́нїе сла́вне, всѣ́хъ рѡссі́йскихъ мона́хѡвъ первонача́льниче.

Воспои́мъ свѣ́тлѡ мона́шескагѡ ѻ҆́бщагѡ житїѧ̀ въ рꙋ́сстѣй землѝ ᲂу҆строи́телѧ, бл҃же́ннагѡ ѳеодо́сїѧ, съ ни́мъ и҆ не́стѡра, достопа́мѧтныхъ дѣѧ́нїй списа́телѧ, и҆ а҆лѵ́пїа, живописа́нїѧ въ рѡссі́и нача́льника.

Ра́й мы́сленный є҆сѝ, пече́рскаѧ ст҃а́ѧ горо̀, ᲂу҆мно́жившаѧ дх҃ѡ́внаѧ древеса̀, бл҃жє́нныѧ ѻ҆тцы̀, и҆́хже и҆счестѝ по є҆ди́номꙋ не могꙋ́ще, ѡ҆ всѣ́хъ вкꙋ́пѣ хвалꙋ̀ принесе́мъ є҆ди́номꙋ влⷣцѣ.

А҆нтѡ́нїе, і҆ѡа́нне и҆ є҆ѵста́ѳїе, тве́рдїи и҆сповѣ̑дницы правосла́вныѧ вѣ́ры, и҆здре́вле въ землѝ рѡссі́йско-лито́встѣй насажде́ннїи, мл҃твами ва́шими ѿ ѕловрѣ́дныхъ и҆новѣ́рныхъ мꙋдрова́нїй соѻ́тчичей ва́шихъ и҆ всѣ́хъ на́съ ѡ҆гражда́йте.

Хода́таи бꙋ́дите за ѻ҆те́чество ва́ше земно́е, а҆ѳана́сїе прпⷣбномꙋ́чениче, и҆ ты̀, ѻ҆́троче гаврїи́ле, наꙋчи́те ᲂу҆̀бо и҆ на́съ правосла́вїе дерзнове́ннѡ и҆сповѣ́дати и҆ стра́ха вра́жїѧ не боѧ́тисѧ.

Да почти́тсѧ і҆́ѡвъ прпⷣбный, ла́ѵры поча́евскїѧ ᲂу҆краше́нїе, вкꙋ́пѣ со всѣ́ми ᲂу҆го́дники и҆ чꙋдотво́рцы волы́нскими, дѣ́лы свои́ми и҆ чꙋдесы̀ ѡ҆блиста́вшїи пресла́внѡ землѝ на́шеѧ концы̀.

Пѣ́сньми сщ҃е́нными восхва́лимъ а҆ѳана́сїѧ, царегра́дскагѡ ст҃и́телѧ, своѐ бл҃гослове́нїе землѝ рѡссі́йстѣй прине́сшаго и҆ чⷭ҇тны̑ѧ своѧ̑ мо́щы, ꙗ҆́кѡ зало́гъ є҆дине́нїѧ со вселе́нскою цр҃ковїю, на́мъ ѡ҆ста́вльшаго.

Бг҃оро́диченъ: Сѐ вре́мѧ застꙋпле́нїѧ прест҃ы́ѧ бцⷣы прїи́де, ᲂу҆мно́жившымсѧ собла́знѡмъ, сѐ вре́мѧ на́шихъ къ не́й воздыха́нїй, ѽ бра́тїе, рце́мъ ᲂу҆̀бо ѿ всегѡ̀ се́рдца на́шегѡ: влⷣчице, влⷣчице, помозѝ лю́демъ твои̑мъ.

Сѣда́ленъ, гла́съ з҃:

Нощнѣ́й тьмѣ̀ ѡ҆гꙋстѣва́ющей, ᲂу҆множа́етсѧ ѕвѣ́здный бле́скъ, и҆ къ томꙋ̀ ѻ҆́чи заблꙋ́ждшихъ ра́достнѡ возво́дѧтсѧ. та́кѡ и҆ ᲂу҆мно́жившейсѧ на землѝ грѣхо́внѣй тьмѣ̀, возведе́мъ горѣ̀ ѻ҆́чи на́ши, бра́тїе, и҆ сїѧ́нїе дх҃о́вныхъ ѕвѣ́здъ, зе́млю на́шꙋ ѡ҆зарѧ́ющихъ, ᲂу҆зрѣ́вше, къ нбⷭ҇номꙋ ѻ҆те́чествꙋ потщи́мсѧ, є҆гѡ́же да не лиши́тъ гдⷭ҇ь на́съ, грѣ́шныхъ, мл҃твами ст҃ы́хъ свои́хъ.

Сла́ва, и҆ ны́нѣ: Притеце́мъ, вѣ́рнїи, къ бжⷭ҇твеннѣй и҆ цѣльбоно́снѣй ри́зѣ сп҃си́телѧ на́шегѡ бг҃а, бл҃гоизво́лившагѡ сїю̀ пло́тїю носи́ти и҆ на крестѣ̀ ст҃ꙋ́ю свою̀ кро́вь и҆злїѧ́ти, є҆́юже и҆скꙋпѝ на́съ ѿ рабо́ты вра́жїѧ. тѣ́мже бл҃года́рственнѡ вопїе́мъ є҆мꙋ̀: сп҃сѝ первосвѧти́телѧ на́шего и҆ а҆рхїере́и, ѻ҆те́чество на́ше и҆ всѧ̀ лю́ди чⷭ҇тно́ю твое́ю ри́зою защитѝ и҆ спасѝ дꙋ́шы на́шѧ, ꙗ҆́кѡ чл҃вѣколю́бецъ.

Пѣ́снь д҃.

І҆рмо́съ: Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ проро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Первонача́льника и҆ ᲂу҆строи́телѧ гра́да москвы̀, бл҃же́нне кн҃же данїи́ле, показа́ тѧ гдⷭ҇ь, къ немꙋ́ же непреста́ннѡ молѧ́сѧ, гра́дъ тво́й ѡ҆хранѧ́й, зе́млю на́шꙋ ѿ бѣ́дъ сп҃са́й, правосла̑вныѧ же рꙋ̑сскїѧ лю́ди посѣща́ти ми́лостивнѡ не преста́й.

Мо́лимъ ва́съ, ст҃и́телїе хрⷭ҇тѡ́вы пе́тре, а҆леѯі́е, і҆ѡ́но, фїлі́ппе и҆ і҆нноке́нтїе, фѡ́тїе, кѷпрїа́не и҆ ѳеогнѡ́сте и҆ всѝ про́чїи моско́встїи чꙋдотво́рцы: дꙋше́вное смꙋще́нїе и҆ печа́ли на́шеѧ бꙋ́рю разори́те и҆ тишинꙋ̀ на́мъ пода́йте ва́шими къ бг҃ꙋ мл҃твами.

И҆ первопресто́льникъ рѡссі́йскїѧ цр҃кве, и҆ и҆сповѣ́дникъ правосла́вныѧ вѣ́ры, и҆ ѡ҆бличи́тель грѣхолюби́выхъ и҆ мѧте́жныхъ, и҆ строи́тель рꙋ́сскїѧ землѝ бы́лъ є҆сѝ, ст҃и́телю є҆рмоге́не, и҆ за сїѐ темни́цею и҆ гла́домъ мꙋ́чимь бы́лъ є҆сѝ и҆ прїе́мь ѿ бг҃а неꙋвѧда́емый вѣне́цъ, со ст҃и́тели и҆ мч҃ники весели́шисѧ.

Ра́дꙋетсѧ сла́вный гра́дъ москва̀, и҆ весе́лїѧ и҆сполнѧ́етсѧ всѧ̀ рѡссі́ѧ, на твоѧ̑ мл҃твы надѣ́ющесѧ, се́ргїе бг҃облаже́нне, ѻ҆би́тель же твоѧ̀ красꙋ́етсѧ, хранѧ́щи чⷭ҇тны̑ѧ твоѧ̑ мо́щы, ꙗ҆́кѡ сокро́вище сщ҃е́нное.

Пѣ́сньми сщ҃е́нными восхва́лимъ прпⷣбнаго ні́кѡна, послꙋша́нїѧ рачи́телѧ, съ ни́мже воспои́мъ мїхе́а, са́ввꙋ и҆ дїонѵ́сїа, стефа́на, а҆ндроні́ка и҆ са́ввꙋ и҆ всѧ̑ прпⷣбныѧ ᲂу҆ченикѝ и҆ собесѣ́дники вели́кагѡ се́ргїа, и҆́хже мл҃твами сы́нове рѡссі́йстїи сп҃са́ютсѧ.

Ѽ премꙋ́дрїи и҆ бл҃же́ннїи васі́лїе, маѯі́ме и҆ і҆ѡа́нне моско́встїи и҆ всѝ хрⷭ҇та̀ ра́ди ю҆ро́дивїи рѡссі́йстїи, чꙋ́днїи житїе́мъ и҆ ра́зꙋмомъ, мо́лимъ ва́съ прилѣ́жнѡ: моли́те хрⷭ҇та̀ бг҃а на́шего за земно́е ѻ҆те́чество ва́ше и҆ всѣ̑мъ вѣ̑рнымъ спасе́нїе и҆спроси́те.

Но́вый сто́лпникъ въ дє́бри калꙋ́жстѣй ꙗ҆ви́лсѧ є҆сѝ, прпⷣбне тѵ́хѡне, и҆ кꙋ́пнѡ съ прпⷣбнымъ пафнꙋ́тїемъ, и҆́ночества стро́гимъ ревни́телемъ, и҆ бл҃же́ннымъ лаѵре́нтїемъ ко гра́дꙋ го́рнемꙋ въ странѣ̀ твое́й пꙋ́ть вѣ́рный проложи́лъ є҆сѝ, на не́мже ᲂу҆пасѝ и҆ на́съ мл҃твами твои́ми.

Бг҃оро́диченъ: Подо́бїемъ і҆кѡ́ны і҆́верскїѧ не то́чїю а҆ѳѡ́нъ просвѣща́етсѧ, но и҆ гра́дъ москва̀ ᲂу҆краша́етсѧ и҆ и҆ні́и гра́ди и҆ вє́си ѡ҆сщ҃а́ютсѧ, ѿ тоѧ̀ чꙋде́снꙋю по́мощь прїе́млюще и҆ и҆сто́чникъ ᲂу҆тѣше́нїѧ въ не́й ѡ҆брѣта́юще, и҆ на́мъ, бл҃га́ѧ врата́рнице, двє́ри ра̑йскїѧ ѿве́рзи.

Пѣ́снь є҃.

І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋ́ждаѧ тьма̀ ѡ҆каѧ́ннаго, но ѡ҆брати́ мѧ и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Вели́кагѡ нова́града первопа́стырїе, нїки́то, ни́фѡнте, і҆ѡа́нне, ѳеокті́сте, мѡѷсе́е, є҆ѵѳѵ́мїе, і҆ѡ́но и҆ серапїѡ́не, и҆ про́чїи чꙋ́днїи ст҃и́телїе, въ домꙋ̀ премꙋ́дрости бж҃їѧ, ꙗ҆́кѡ фі́нїѯы, процвѣлѝ є҆стѐ, словесы̀ бл҃гопло́дными и҆ непоро́чнымъ житїе́мъ.

Свѣ́тлѡ да похва́лѧтсѧ кн҃зїе новгоро́дстїи, влади́мїръ, ст҃ы́ѧ софі́и пречꙋ́дныѧ ᲂу҆строи́тель, съ ма́терїю свое́ю а҆́нною, и҆ мстисла́въ, и҆ ѳео́дѡръ, съ ни́ми же и҆ всѝ ѿ ро́да кн҃зе́й рѡссі́йскихъ житїе́мъ бг҃оꙋго́днымъ просїѧ́вшїи, бжⷭ҇твенными да воспою́тсѧ пѣ́сньми.

Ди́внаго варлаа́ма, вели́ка нова́града сла́вꙋ и҆ ᲂу҆краше́нїе, всерѡссі́йскаго мл҃твенника, и҆ а҆нтѡ́нїа сла́внаго, ѿ ве́тхагѡ ри́ма на ка́мени по волна́мъ морски̑мъ преплы́вшаго, са́ввꙋ же, и҆ є҆фре́ма, и҆ мїхаи́ла кто̀ досто́йнѡ просла́витъ ѿ земны́хъ;

Є҆де́мскагѡ раѧ̀, прїиди́те, ви́димъ цвѣ́ты присножи́знєнныѧ и҆ бг҃опрозѧбє́нныѧ, по́двиги ѻ҆тє́цъ, въ предѣ́лѣхъ новгоро́дскихъ просїѧ́вшихъ, и҆́хже є҆́сть є҆ди́нъ дѣ́латель гдⷭ҇ь.

Все́володъ кро́ткїй и҆ довмо́нтъ, пско́вꙋ стѣна̀ неѡбори́маѧ, и҆ нїко́ла бл҃же́нный и҆ корни́лїй прпⷣбный, ст҃ы́мъ креще́нїемъ чꙋ́дь лїво́нскꙋю просвѣти́вый, пѣ́сньми да воспою́тсѧ.

Вѣ́рꙋ правосла́внꙋю пред̾ лати́ны проповѣ́давшїи, къ вѣ̑чнымъ востеко́ша ѻ҆би́телемъ і҆сі́дѡръ пресвѵ́теръ и҆ съ ни́мъ собо́ръ мч҃ническїй во ю҆́рьевѣ, гра́дѣ лїво́нстѣмъ, цр҃ю̀ царе́й ны́нѣ предстоѧ́ще, мо́лѧтсѧ ѡ҆ на́съ, почита́ющихъ па́мѧть и҆́хъ.

А҆враа́мїѧ бг҃оно́снаго, смоле́нска ᲂу҆краше́нїе, и҆ є҆ѵфросѵ́нїю, ра́дованїе по́лотское и҆ дѣ́вамъ сїѧ́нїе, хрⷭ҇тѐ мо́й, тебѣ̀ приво́димъ мл҃твенники, и҆́хже ра́ди сп҃сѝ на́съ.

Бг҃оро́диченъ: Застꙋ́пница те́плаѧ и҆ногда̀ вели́комꙋ новꙋгра́дꙋ была̀ є҆сѝ и҆ ненадѣ́ющихсѧ наде́жда и҆ люде́й бѣ́дствꙋющихъ помо́щница, и҆ ны́нѣ ѻ҆́комъ милосе́рдымъ при́зри на на́съ, и҆ скѡ́рби на́шѧ ви́дѣвши и҆ воздыха́нїе ᲂу҆слы́шавши, зна́менїе млⷭ҇ти ꙗ҆вѝ на́мъ, пречⷭ҇таѧ.

Пѣ́снь ѕ҃.

І҆рмо́съ: Во́днагѡ ѕвѣ́рѧ во ᲂу҆тро́бѣ дла̑ни і҆ѡ́на крⷭ҇тови́днѡ распросте́ръ, сп҃си́тельнꙋю стра́сть проѡбража́ше ꙗ҆́вѣ: тѣ́мъ, тридне́венъ и҆зше́дъ, премі́рное воскресе́нїе прописа́ше пло́тїю пригвожде́ннагѡ хрⷭ҇та̀ бг҃а и҆ тридне́внымъ воскресе́нїемъ мі́ръ просвѣ́щшаго.

Є҆ѵⷢ҇льски хрⷭ҇та̀ возлюби́вше, прпⷣбнїи зѡсі́мо, савва́тїе, ге́рмане, і҆рина́рше, є҆леаза́ре и҆ про́чїи солове́цтїи чꙋдотво́рцы, мі́ра ѿврати́стесѧ, въ непроходи̑мыѧ и҆ пꙋсты̑ѧ ѻ҆́стровы соловє́цкїѧ заше́дше, всѧ́кїѧ добродѣ́тели ѻ҆́бразꙋ навыко́сте, мꙋ́дрѣй пчелѣ̀ подо́бѧщесѧ, и҆ селе́нїе, досто́йное прїѧ́ти дх҃а ст҃а́гѡ, бы́сте, премꙋ́дрїи.

Вели́каго въ чꙋдесѣ́хъ прпⷣбнаго трѵ́ѳѡна воспои́мъ, лопа́рскагѡ просвѣти́телѧ, въ послѣ́днихъ концѣ́хъ сѣ́верныѧ страны̀ ѿ го́рькагѡ ра́бства бѣсо́вскагѡ лю́ди и҆зба́вльшаго и҆ ст҃ы́мъ креще́нїемъ возроди́вшагѡ.

Ра́дꙋйсѧ, пꙋсты́не, пре́жде безпло́днаѧ и҆ неѡбита́ємаѧ, по́слѣжде же, ꙗ҆́кѡ крі́нъ, процвѣ́тшаѧ и҆ и҆́нѡкъ мно́жество возрасти́вшаѧ взыгра́йте, го́ры валаа́ма и҆ всѧ̑ древа̀ дꙋбра̑внаѧ, хва́лѧще съ на́ми се́ргїа и҆ ге́рмана, вкꙋ́пѣ же и҆ а҆рсе́нїа со а҆леѯа́ндромъ сви́рскимъ, ѻ҆тцы̀ всехва̑льныѧ.

Житїѧ̀ сегѡ̀ непостоѧ́ннꙋю пꙋчи́нꙋ немѧте́жнѡ преше́лъ є҆сѝ, прпⷣбне кѷрі́лле, ко́рмчꙋю мт҃рь бж҃їю и҆мѣ́ѧ, и҆ ты̀, і҆ѡ́сифе, во́лоцкаѧ похвало̀, и҆ ні́ле нестѧжа́телю, на водѣ̀ поко́йнѣ и҆ на ѕла́цѣ воздержа́нїѧ ᲂу҆чєни́къ ва́шихъ стада̀ мꙋ́дрѣ ᲂу҆паслѝ є҆стѐ, и҆ ны́нѣ съ ни́ми моли́тесѧ ѡ҆ чтꙋ́щихъ па́мѧть ва́шꙋ.

Ꙗ҆́кѡ ѕвѣ́зды вели̑кїѧ, просїѧ́ша въ мона́шескихъ собо́рѣхъ а҆нтѡ́нїй сі́йскїй и҆ трѵ́фѡнъ вѧ́тскїй, дими́трїй на прилꙋ́цѣ и҆ а҆мфїло́хїй и҆ дїонѵ́сїй, похвала̀ глꙋши́цкаѧ, григо́рїй пе́льшемскїй, па́ѵелъ, и҆ се́ргїй, и҆ корни́лїй волого́дстїи ꙗ҆́кѡ лꙋча́ми сїѧ́юще добродѣ́тельми житїѧ̀ своегѡ̀, прпⷣбнїи.

Бг҃ови́днѡ пожи́вше, пꙋсты́ни, ꙗ҆́кѡ гра́ды, сотвори́ли є҆стѐ, мака́рїе, варна́во и҆ тѵ́хѡне, а҆враа́мїе и҆ генна́дїе. тѣ́мже вкꙋ́пѣ съ про́чими ѻ҆тцы̀, въ предѣ́лѣхъ костромски́хъ и҆ ꙗ҆росла́вскихъ просїѧ́вшими, ᲂу҆блажа́емъ ва́съ и҆ мо́лимъ: моли́те гдⷭ҇а, да не лиши́тъ и҆ на́съ є҆гѡ́же ны́нѣ наслажда́етесѧ бг҃овидѣ́нїѧ въ вѣ́чнѣмъ гра́дѣ нбⷭ҇нагѡ цр҃ѧ̀.

Ликꙋ́й, ѳиваи́до рꙋ́сскаѧ, красꙋ́йтесѧ, пꙋсты̑ни и҆ дє́бри ѻ҆лонє́цкїѧ, бѣлоезє́рскїѧ и҆ вологѡ́дскїѧ, возрасти́вшыѧ ст҃о́е и҆ сла́вное ѻ҆тє́цъ мно́жество, чꙋ́днымъ житїе́мъ всѣ́хъ наставлѧ́ющее мі́рꙋ не прилѣплѧ́тисѧ, кре́стъ сво́й на ра́мена взѧ́ти и҆ во слѣ́дъ хрⷭ҇тꙋ̀ ше́ствовати.

Бг҃оро́диченъ: Твое́ю всечтⷭ҇но́ю і҆кѡ́ною тѵ́хвинскою, ю҆́же вели́каѧ рѡссі́ѧ ꙗ҆́кѡ нѣ́кїй да́ръ бжⷭ҇твенный свы́ше бл҃гоговѣ́йнѡ прїѧ́тъ: при́снѡ странꙋ̀ на́шꙋ, ѽ гпⷭ҇жѐ цр҃и́це бцⷣе, покрыва́й и҆ застꙋпа́й, спаса́ющи сїю̀ ѿ всѣ́хъ навѣ̑тъ вра́жїихъ.

Конда́къ, гла́съ г҃.

Дне́сь ли́къ ст҃ы́хъ, въ землѝ на́шей бг҃ꙋ ᲂу҆годи́вшихъ, предстои́тъ въ цр҃кви и҆ неви́димѡ за ны̀ мо́литсѧ бг҃ꙋ. а҆́гг҃ли съ ни́мъ славосло́вѧтъ, и҆ всѝ ст҃і́и цр҃кве хрⷭ҇то́вы є҆мꙋ̀ спра́зднꙋютъ, ѡ҆ на́съ бо мо́лѧтъ всѝ кꙋ́пнѡ превѣ́чнаго бг҃а.

І҆́косъ:

Є҆де́мскагѡ раѧ̀ древеса̀ доброплѡ́днаѧ и҆ кра̑снаѧ ꙗ҆ви́шасѧ ст҃і́и, цвѣ́ты бл҃говѡ́нныѧ ᲂу҆че́нїй и҆ плоды̀ дѣ́лъ творѧ́щїи, ѿ ни́хже дꙋ́шы на́шѧ пита́ютсѧ и҆ гла́дъ на́шъ дх҃о́вный ᲂу҆толѧ́етсѧ, прїиди́те ᲂу҆̀бо, притеце́мъ под̾ сѣ́нь и҆́хъ и҆ ᲂу҆бл҃жи́мъ и҆̀хъ, ꙗ҆́кѡ страны̀ на́шеѧ ѻ҆тра́дꙋ и҆ ᲂу҆краше́нїе и҆ ꙗ҆́кѡ житїѧ̀ ѻ҆́бразъ на́мъ и҆ начерта́нїе, ті́и бо вѣнцы̀ прїѧ́ша нетлѣ̑нныѧ ѿ превѣ́чнагѡ бг҃а.

Пѣ́снь з҃.

І҆рмо́съ: Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀. сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ, ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Лео́нтїй, и҆са́їа и҆ і҆гна́тїй, і҆а́кѡвъ и҆ ѳео́дѡръ, чⷭ҇тні́и дх҃а сосꙋ́ди и҆ росто́вꙋ ᲂу҆краше́нїе, а҆враа́мїй, і҆́дѡлѡмъ покланѧ́вшыѧсѧ ко хрⷭ҇тꙋ̀ приведы́й, и҆ пе́тръ царе́вичъ, и҆ і҆рина́рхъ, самопроизво́льный страда́лецъ, кассїа́нъ и҆ паі́сїй, кнѧ́зь рѡма́нъ и҆ царе́вичъ дими́трїй, и҆ всѝ росто́встїи и҆ ᲂу҆́гличстїи чꙋдотво́рцы бжⷭ҇твенными да воспою́тсѧ пѣ́сньми.

Да велича́етсѧ не́вскїй побѣди́тель, бл҃говѣ́рный кн҃зь а҆леѯа́ндръ, да пое́тсѧ геѡ́ргїй, во́инъ хра́брый и҆ страда́лецъ, да похва́литсѧ а҆ндре́й, пе́рвый рꙋ́сскїѧ землѝ собира́тель, вкꙋ́пѣ со глѣ́бомъ, ю҆́нымъ сы́номъ свои́мъ, да воспое́тсѧ же и҆ а҆враа́мїй мч҃никъ, гра́да влади́мїра сла́ва, ст҃ы́ѧ рꙋсѝ застꙋ̑пницы и҆ цр҃кве правосла́вныѧ ᲂу҆краше́нїе.

Ѳео́дѡрꙋ и҆ і҆ѡа́ннꙋ сла́ва, сꙋ́ждальскимъ свѣти́льникѡмъ, сі́мѡнꙋ и҆ дїонѵ́сїю съ ни́ми да пою́тсѧ и҆ є҆ѵѳѵ́мїй, въ по́двизѣхъ превысо́кїй, и҆ є҆ѵфросѵ́нїѧ прпⷣбнаѧ, пресвѣ́тлаѧ сꙋ́ждальскаѧ ѕвѣзда̀, вкꙋ́пѣ же и҆ косма̀, на ꙗ҆́хромѣ рѣцѣ̀ подвиза́выйсѧ.

Пѣ́снь сто́лпникꙋ нїки́тѣ, покаѧ́нїѧ ѻ҆́бразъ ꙗ҆ви́вшемꙋ, хвала̀ и҆ данїи́лꙋ, ни́щихъ и҆ безро́дныхъ согрѣва́телю, сла́ва и҆ а҆ндре́ю, кнѧже́нїе ѡ҆ста́вившемꙋ и҆ въ ни́щетнѣмъ ѻ҆́бразѣ житїѐ сконча́вшемꙋ, переѧсла́вскимъ чꙋдотво́рцємъ.

Кѡнстанті́не кн҃же, а҆по́столе и҆ просвѣти́телю мꙋ́ромскїѧ землѝ, съ мїхаи́ломъ и҆ ѳео́дѡромъ, ча́ды твои́ми, и҆ пе́тре и҆ феѵрѡ́нїе, и҆ пра́веднаѧ і҆ꙋлїані́е ми́лостиваѧ, мꙋ́рома застꙋ̑пницы, вкꙋ́пѣ же и҆ васі́лїе ст҃и́телю и҆ кн҃же рѡма́не, рѧза́ни сла́во, ѡ҆ на́съ хрⷭ҇та̀ моли́те.

Тверска́ѧ похвало̀, а҆рсе́нїе ст҃и́телю, мїхаи́ле, кн҃же и҆ мч҃ниче, и҆ а҆́нно, гра́да ка́шина сокро́вище, ні́ле и҆ мака́рїе прпⷣбнїи, є҆фре́ме, гра́да торжка̀ просвѣти́телю, со а҆рка́дїемъ и҆ і҆ꙋлїані́ею, цвѣ́томъ цѣломꙋ́дрїѧ, ѡ҆ на́съ хрⷭ҇та̀ моли́те.

Ѻ҆рꙋ́жїемъ ва́шихъ мл҃твъ, бл҃говѣ́рнїи кн҃зїе ѳео́дѡре и҆ даві́де съ кѡнстанті́номъ и҆ васі́лїе и҆ кѡнстанті́не, ꙗ҆росла́влѧ сла́во, ѡ҆хранѧ́йте и҆ ны́нѣ ѻ҆те́чество ва́ше и҆ люде́й правосла́вныхъ ѿ всѧ́кихъ бѣ́дъ и҆ напа́стей.

Бг҃оро́диченъ: Ꙗ҆́кѡ благода́тное сокро́вище дарова́ла є҆сѝ ст҃ѣ́й рꙋсѝ і҆кѡ́нꙋ твою̀ влади́мїрскꙋю, є҆́юже ѻ҆тцє́мъ на́шымъ многоча́стнѣ и҆ многоѻбра́знѣ бл҃годѣ́ѧла є҆сѝ. не ѡ҆скꙋдѣ́й и҆ ны́нѣ, ѽ мт҃и бж҃їѧ, ᲂу҆толѧ́ющи лю́тое на на́съ воста́нїе, и҆ зе́млю рꙋ́сскꙋю сп҃сѝ.

Пѣ́снь и҃.

І҆рмо́съ: Побѣди́тели мꙋчи́телѧ и҆ пла́мене бл҃года́тїю твое́ю бы́вше, за́повѣдемъ твои̑мъ ѕѣлѡ̀ прилѣжа́ще, ѻ҆́троцы вопїѧ́хꙋ: бл҃гослови́те, всѧ̑ дѣла̀ гдⷭ҇нѧ, гдⷭ҇а.

Красꙋ́йсѧ, гра́де каза́нь, и҆мѣ́ѧ мл҃твенники своѧ̑, прпⷣбныхъ ст҃и́телей гꙋ́рїа, варсоно́фїа и҆ ге́рмана, ѿгна́вшихъ ѿ тебѐ тьмꙋ̀ невѣ́рїѧ, и҆ і҆ѡа́нна мч҃ника, и҆ стефа́на, и҆ петра̀, ѻ҆те́ческое нече́стїе ѡ҆ста́вившихъ и҆ мч҃нически въ нбⷭ҇ное ѻ҆те́чество преше́дшихъ.

Сщ҃е́ннагѡ писа́нїѧ ѿ ю҆́ности наꙋчи́всѧ, бг҃оно́се стефа́не, ра́ломъ слове́съ твои́хъ ѡ҆лѧденѣ̑вшаѧ зырѧ́нскихъ люде́й сердца̀ воздѣ́лалъ є҆сѝ и҆ бжⷭ҇твенное сѣ́мѧ въ ни́хъ всѣ́ѧлъ є҆сѝ. ны́нѣ же вкꙋ́пѣ со ст҃ы́ми продолжа́тели дѣ́ла твоегѡ̀ гера́сїмомъ, пїтѷрі́момъ и҆ і҆ѡ́ною па́ствꙋ ва́шꙋ и҆ всю̀ рꙋ́сскꙋю зе́млю мл҃твами ва́шими ѡ҆гражда́йте.

Весели́сѧ, сиби́рскаѧ страно̀, въ тебѣ̀ бо гдⷭ҇ь ꙗ҆вѝ ᲂу҆го́дники своѧ̑: пра́веднаго сѷмеѡ́на верхотꙋ́рскагѡ, и҆ і҆ркꙋ́тскїѧ ст҃и́тели і҆нноке́нтїѧ и҆ сѡфро́нїѧ, и҆ і҆ѡа́нна тобо́льскагѡ, нѡ́выѧ ди̑вныѧ свѣти́льники и҆ чꙋдотво́рцы.

Ра́дꙋйсѧ, і҆ве́рїе и҆ всѧ̑ землѐ грꙋзи́нскаѧ, торжествꙋ́й, а҆рме́нїе, воспѣва́ющи равноапо́стольнꙋю ні́нꙋ и҆ тама́рꙋ, григо́рїѧ просвѣти́телѧ и҆ и҆ны́хъ мно́гихъ, въ страна́хъ кавка́зскихъ вѣ́рꙋ правосла́внꙋю и҆сповѣ́давшихъ и҆ ны́нѣ ѡ҆ земно́мъ ѻ҆те́чествѣ хрⷭ҇тꙋ̀ молѧ́щихсѧ.

І҆ера́рше бг҃омꙋ́дре дими́трїе, житі́й ст҃ы́хъ списа́телю и҆ подража́телю ѻ҆́нымъ ре́вностный, сла́вы ѻ҆́ныхъ мл҃твами твои́ми содѣ́лай на́съ ѻ҆́бщники.

Ст҃и́телю ѻ҆́тче митрофа́не, пе́рвый воро́нежꙋ па́стырю, мꙋ́жество ве́лїе ꙗ҆ви́вый, преще́нїѧ царе́ва и҆ сме́рти не ᲂу҆боѧ́выйсѧ и҆ въ простотѣ̀ дꙋ́шꙋ свою̀ спасы́й, молѝ бг҃а ѡ҆ на́съ.

Ꙗ҆́кѡ пчела̀, ме́дъ сла́дкїй ѿ цвѣтѡ́въ скороꙋвѧда́ющихъ собра́лъ є҆сѝ, ѻ҆́тче тѵ́хѡне, ѿ тлѣ́ннагѡ мі́ра дх҃о́вное сокро́вище, и҆́мже всѣ́хъ на́съ ᲂу҆слажда́еши.

Бг҃оро́диченъ: Застꙋ́пницꙋ ᲂу҆се́рднꙋю восхва́лимъ и҆ чⷭ҇тно́мꙋ є҆ѧ̀ поклони́мсѧ ѻ҆́бразꙋ, и҆́мже въ новопросвѣще́ннѣй странѣ̀ правовѣ́рїе ᲂу҆твердѝ и҆ въ годи́нꙋ лю́тꙋю ма́терь рꙋ́сскихъ градѡ́въ сп҃сѐ. се́й и҆ гра́да ст҃а́гѡ петра̀ вели́кое сокро́вище, и҆ всеѧ̀ землѝ на́шеѧ пресла́вное бога́тство.

Пѣ́снь ѳ҃.

І҆рмо́съ: Ѽ, дѣ́вства кра́й, бцⷣе пѣ́сньми же сла́вными пра́здники возвыша́ющаѧ бл҃года́тей твои́хъ и҆ ны́нѣ дѣ́вственною сло́ва твоегѡ̀ па́мѧтїю наи́тїемъ та́йнымъ ᲂу҆краша́ющаѧ въ не́й тѧ̀ велича́ющыѧ.

Ѽ бл҃гі́й просвѣти́телю и҆ ти́хїй а҆́гг҃ле цр҃кве тамбо́вскїѧ, ст҃и́телю пїтѷрі́ме, весели́сѧ ѡ҆ па́ствѣ твое́й и҆ всеѧ̀ рꙋсѝ, въ не́й бо но́ваѧ и҆ вѣ́чнаѧ ра́дость процвѣтѐ, прпⷣбный серафі́мъ, ди́вный трꙋ́дникъ сп҃се́нїѧ на́шегѡ.

Ѽ ст҃и́телїе бг҃омꙋ́дрїи ѳеодо́сїе и҆ і҆ѡаса́фе, ди́внымъ нетлѣ́нїемъ ѿ гдⷭ҇а просла́вленнїи! ва́ми возвели́чени є҆смы̀ и҆ мы̀, ча̑да сꙋ́ще цр҃кве правосла́вныѧ, въ не́йже и҆ доны́нѣ гдⷭ҇ь чꙋ̑днаѧ ꙗ҆влѧ́етъ и҆ рабѡ́въ свои́хъ прославлѧ́етъ.

Ѽ но́вый чꙋдотво́рче, і҆ѡ́сифе, ст҃и́телю и҆ мч҃ниче! гра́дъ а҆́страхань и҆ всѧ̀ пово́лжскаѧ страна̀ тобо́ю хва́литсѧ и҆ почита́етъ тѧ̀, за пра́вдꙋ ѿ невѣ́рныхъ мѧте́жникѡвъ лю́тѣ пострада́вша.

Ѽ, па́че сло́ва и҆ превы́ше похва́лъ ст҃ы́хъ страстоте́рпцєвъ по́двига! ѕло́бꙋ ᲂу҆̀бо лю́тыхъ ѿстꙋ́пникѡвъ и҆ на́глое і҆ꙋде́йское неи́стовство претерпѣ́ша, вѣ́рꙋ хрⷭ҇то́вꙋ проти́вꙋ ᲂу҆че́нїй мі́ра сегѡ̀, ꙗ҆́кѡ щи́тъ, держа́ще и҆ на́мъ ѻ҆́бразъ терпѣ́нїѧ и҆ ѕлострада́нїй досто́йнѡ ꙗ҆влѧ́юще.

Ѽ, тве́рдости и҆ мꙋ́жества по́лка мч҃єникъ хрⷭ҇то́выхъ, ѿ хи́нѡвъ лю́тыхъ за хрⷭ҇та̀ ᲂу҆бїе́нныхъ! ті́и бо цр҃ковь правосла́внꙋю ᲂу҆краси́ша и҆ въ странѣ̀ свое́й крѡ́ви своѧ̑, ꙗ҆́кѡ сѣ́мѧ вѣ́ры, да́ша, и҆ кꙋ́пнѡ со всѣ́ми ст҃ы́ми досто́йнѡ да почтꙋ́тсѧ.

Ѽ вели́цыи срѡ́дницы на́ши, и҆мено́ваннїи и҆ безыме́ннїи, ꙗ҆вле́ннїи и҆ неѧвле́ннїи, нбⷭ҇нагѡ сїѡ́на дости́гшїи и҆ сла́вꙋ мно́гꙋ ѿ бг҃а прїи́мшїи, ᲂу҆тѣше́нїе на́мъ, въ ско́рби сꙋ́щымъ, и҆спроси́те, вѣ́рꙋ на́шꙋ па́дшꙋю возста́вите и҆ лю́ди расточє́нныѧ собери́те, ѿ на́съ, ꙗ҆́кѡ да́ръ, пѣ́снь бл҃годаре́нїѧ прїе́млюще.

Трⷪ҇ченъ: Ѽ трⷪ҇це чⷭ҇тна́ѧ, прїимѝ, ꙗ҆́же рѡссі́ѧ прино́ситъ тѝ, ꙗ҆́кѡ нача́тки и҆ ꙗ҆́кѡ ѳѷмїа́мъ и҆збра́нный, всѧ̑ ᲂу҆годи́вшыѧ и҆ пре́жде, и҆ по́слѣжде въ не́й, зна́ємыѧ и҆ незна́ємыѧ, и҆ мл҃твами и҆́хъ ѿ всѧ́кагѡ вре́да сїю̀ сохранѧ́й.

Бг҃оро́диченъ: Ѽ дв҃о бл҃года́тнаѧ, гра́ды и҆ вє́си на́шѧ чⷭ҇тна́гѡ ли́ка твоегѡ̀ и҆з̾ѻбражє́нїи, ꙗ҆́кѡ бл҃говоле́нїѧ зна́мєнїи, ѡ҆богати́вшаѧ на́ше прїимѝ и҆ ѿ бѣ́дъ лю́тыхъ ѻ҆те́чество на́ше и҆зба́ви, вси́ бо тѧ̀, ꙗ҆́кѡ покро́въ всемо́щный страны̀ на́шеѧ, велича́емъ.

Свѣти́ленъ.

Въ пѣ́снехъ восхва́лимъ свѣти̑ла незахѡди́маѧ рѡссі̑йскїѧ землѝ, таи́нники бжⷭ҇твеннагѡ сло́ва, хрⷭ҇та̀ сла́вѧще, си́хъ просвѣти́вшаго и҆ возлюби́вшаго и҆ помо́щники на́мъ да́вшаго въ ско́рби.

Бг҃оро́диченъ: Свѣ́томъ лица̀ твоегѡ̀ ѻ҆гнезра́чнꙋю странꙋ̀ рꙋ́сскꙋю ѡ҆зари́въ, гдⷭ҇и, и҆ ны́нѣ во ст҃ы́хъ твои́хъ, ꙗ҆́кѡ въ лꙋча́хъ неизче́тныхъ, не преста́й ѡ҆зарѧ́ти на́съ премꙋ́дростїю твое́ю, ꙗ҆́же є҆́сть софі́а преимени́таѧ.