Канон святым преподобномученицам Анне и Матроне Алексиевским

Пѣ́снь а҃.

І҆рмо́съ: Пои́мъ гдⷭ҇еви, прове́дшемꙋ лю́ди своѧ̑ сквозѣ̀ чермно́е мо́ре, ꙗ҆́кѡ є҆ди́нъ сла́внѡ просла́висѧ.

Прїими́те пѣ́нїе, а҆́нно и҆ матрѡ́но бл҃госла̑вныѧ, ѿ почита́ющихъ любо́вїю по́стничєскїѧ и҆ мчн҃чєскїѧ по́двиги ва́шѧ.

Ѿ ю҆́ности ко хрⷭ҇тꙋ̀ любо́вїю пламенѣ́вшѧ, во ѻ҆би́тель а҆леѯі́евскꙋю притеклѝ є҆стѐ, да є҆ди́номꙋ бг҃ꙋ порабо́таете.

Прпⷣбныѧ а҆́нно и҆ матрѡ́но, и҆мꙋ́щѧ сердца̀, мл҃твою и҆ слеза́ми ѡ҆чищє́ннаѧ, по́двигъ мч҃нческїй смире́ннѡ прїѧ́сте.

Бг҃оро́диченъ: Тебѐ предста́тельницꙋ и҆мꙋ́щѧ, пречⷭ҇таѧ, сла̑вныѧ жєны̀, посто́мъ и҆ страда́нїемъ ѕмі́евꙋ держа́вꙋ сокрꙋши́вшѧ, сла́вꙋ нбⷭ҇нꙋю ѡ҆брѣто́ша.

Пѣ́снь г҃.

І҆рмо́съ: Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.

Во ѻ҆те́чествѣ земнѣ́мъ, безбо́жїемъ помраче́ннѣмъ, чꙋ̑жды ꙗ҆ви́стѣсѧ, прпⷣбномч҃нцы сла̑вныѧ, ѻ҆ба́че къ защи́тникꙋ ѻ҆би́тели ва́шеѧ, а҆леѯі́ю, человѣ́кꙋ бж҃їю, те́плѣ мл҃твы возноси́ли є҆стѐ, да сподо́битъ гдⷭ҇ь нбⷭ҇ныхъ ѻ҆би́телей дости́гнꙋти.

До́блественнѣ бг҃ови порабо́тавшѧ, плѡ́ти ва́шѧ со страстьмѝ и҆ похотьмѝ распѧ́ли є҆стѐ, прпⷣбномч҃нцы ст҃ы̑ѧ, и҆ дꙋ́шы ва́шѧ любвѐ ра́ди хрⷭ҇то́вы не пощади́ли є҆стѐ.

Страда́ньми и҆ и҆сповѣ́данїемъ хрⷭ҇та̀, ст҃ы̑ѧ прпⷣбномч҃нцы, въ селє́нїѧ нбⷭ҇наѧ внидо́сте, тѣ́мже сохранѧ́йте рꙋ́сь ст҃ꙋ́ю, ѻ҆те́чество ва́ше земно́е, въ ми́рѣ и҆ є҆диномы́слїи.

Бг҃оро́диченъ: Тебѣ̀, бг҃ороди́тельнице, предстоѧ́тъ чтⷭ҇ны̑ѧ жєны̀, поще́нїемъ крѣ́пкѡ подвиза́вшыѧсѧ и҆ мꙋ́жественнѣ врага̀ низложи́вшыѧ.

Сѣда́ленъ, гла́съ в҃:

Нѡ́выѧ стрⷭ҇тотє́рпицы землѝ рꙋ́сскїѧ, мч҃нчески по́прище земно́е сконча́вшыѧ и҆ страда́ньми дерзнове́нїе ко гдⷭ҇ꙋ стѧжа́вшыѧ, моли́тесѧ є҆мꙋ̀, ва́съ ᲂу҆крѣ́пльшемꙋ, да и҆ мы̀, є҆гда̀ на́йдетъ на ны̀ ча́съ и҆спыта́нїѧ, мꙋ́жества да́ръ бж҃їй воспрїи́мемъ.

Бг҃оро́диченъ: Прест҃а́ѧ дв҃о, ѡ҆градѝ и҆ и҆зба́ви на́съ ѿ вра̑гъ ви́димыхъ и҆ неви́димыхъ, и҆ ѿ всѧ́кагѡ ѕла̀, ты́ бо є҆сѝ на́ша защи́тница.

Пѣ́снь д҃.

І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.

А҆леѯі́ю, человѣ́кꙋ бж҃їю, подража́вшѧ, мі́ра и҆ пло́ти мꙋдрова́нїѧ ѿверго́стесѧ, и҆ въ добродѣ́телехъ хрⷭ҇то́выхъ поꙋча́ющѧсѧ, ѻ҆би́тель ва́шꙋ ди́внѡ ᲂу҆краси́сте, и҆ ꙗ҆́кѡ крі́ни бл҃гоꙋха́ннїи, въ не́й процвѣто́сте.

Препобѣди́вшѧ посто́мъ стра̑сти плотскі̑ѧ, мꙋче́нїѧ стезю̀ мꙋ́жественнѣ прошлѝ є҆стѐ и҆ въ нбⷭ҇ныхъ селе́нїихъ водвори́лисѧ є҆стѐ, бг҃обл҃жє́нныѧ.

Бжⷭ҇твеннꙋю бл҃года́ть прїи́мшѧ, прпⷣбномч҃нцы а҆́нно и҆ матрѡ́но, и҆ стра́хъ сме́ртный препобѣди́вшѧ, любо́вь къ бг҃ꙋ да́же до сме́рти сохрани́ли є҆стѐ.

Бг҃оро́диченъ: Бг҃омт҃и пречⷭ҇таѧ, гдⷭ҇ь ѿ тебє̀ неизрече́ннѡ пло́ть прїѧ́тъ, сегѡ̀ ра́ди же́нъ є҆стество̀, и҆ногда̀ под̾ клѧ́твою бы́вшее, ны́нѣ возвели́чисѧ.

Пѣ́снь є҃.

І҆рмо́съ: Оу҆́тренююще вопїе́мъ тѝ, гдⷭ҇и, сп҃сѝ ны̀: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.

Ѿ ю҆́ности сладча́йшемꙋ женихꙋ̀ хрⷭ҇тꙋ̀ ѡ҆брꙋчи́вшѧсѧ, мл҃твою къ немꙋ̀ го́речь страда́нїѧ ᲂу҆слажда́ли є҆стѐ, и҆ на́съ наꙋчи́те и҆́мѧ хрⷭ҇то́во ᲂу҆мо́мъ и҆ се́рдцемъ при́снѡ призыва́ти.

Є҆гда̀ вра́гъ ро́да человѣ́ча воздви́же во ѻ҆те́чествѣ на́шемъ гоне́нїе лю́тое ѿ безбѡ́жникъ, тогда̀ вы̀, ст҃ы̑ѧ стрⷭ҇тотє́рпицы, ꙗ҆ви́вшѧ мꙋ́жество неѡбори́мое, ѻ҆рꙋ́жїемъ крⷭ҇та̀ гдⷭ҇нѧ побѣ́дꙋ воспрїѧ́ли є҆стѐ.

Всю̀ наде́ждꙋ на гдⷭ҇а возложи́вшѧ, си́лою дх҃а ст҃а́гѡ врага̀ низложи́ли є҆стѐ, въ не́мощи бо ва́шей си́ла бж҃їѧ соверши́сѧ. и҆ ны́нѣ моли́те за ны̀, да не прико́снетсѧ на́съ ѕло́ба грѣхо́внаѧ.

Бг҃оро́диченъ: Тебѣ̀, бг҃ороди́тельнице, предстоѧ́тъ чтⷭ҇ны̑ѧ жєны̀, до́блественнѣ бг҃ꙋ порабо́тавшыѧ и҆ крⷭ҇то́мъ мꙋче́нїѧ врага̀ низложи́вшыѧ.

Пѣ́снь ѕ҃.

І҆рмо́съ: Ри́зꙋ мнѣ̀ пода́ждь свѣ́тлꙋ, ѡ҆дѣѧ́йсѧ свѣ́томъ ꙗ҆́кѡ ри́зою, многомлⷭ҇тиве хрⷭ҇тѐ бж҃е на́шъ.

Ѻ҆би́тели и҆ слꙋ́жбы цр҃ко́вныѧ лиши́вшѧсѧ, сердца̀ своѧ̑ хра́мы бг҃а жива́гѡ содѣ́лали є҆стѐ, и҆ бл҃года́тїю бж҃їею ᲂу҆крѣплѧ́ємы, при́снѡ хвалꙋ̀ гдⷭ҇ꙋ воспѣва́ли є҆стѐ.

Е҆ѵⷢ҇лїа и҆сповѣ̑дницы и҆ правосла́вїѧ ревни́тєльницы, невѣ̑сты чи̑стыѧ хрⷭ҇тꙋ̀ бг҃ꙋ и҆ ᲂу҆краше́нїе землѝ на́шеѧ ꙗ҆ви́стѣсѧ, стрⷭ҇тотє́рпицы сла̑вныѧ.

Пꙋчи́нꙋ кро́вныхъ страда́нїй проше́дшѧ, ст҃ы̑ѧ прпⷣбномч҃нцы а҆́нно и҆ матрѡ́но, гдⷭ҇а не ѿверго́стесѧ, ѻ҆ба́че и҆згна̑нїѧ и҆ бѣ̑дствїѧ мꙋ́жественнѣ претерпѣва́ющѧ, непобѣждє́ны пребы́сте.

Бг҃оро́диченъ: Жєны̀, посто́мъ и҆ страда́нїемъ гдⷭ҇ꙋ ᲂу҆годи́вшыѧ, є҆гда̀ бл҃гоче́стїе поноше́нїю предаде́сѧ въ странѣ̀ на́шей, ны́нѣ непреста́ннѡ мо́лѧтсѧ сн҃ꙋ твоемꙋ̀, пречⷭ҇таѧ, да ᲂу҆тверди́тсѧ цр҃ковь рꙋ́сскаѧ.

Конда́къ, гла́съ д҃:

Ꙗ҆́кѡ крі́ни багрѧнови́днїи, посредѣ̀ те́рнїй безбо́жїѧ въ земнѣ́мъ ѻ҆те́чествѣ ва́шемъ процвѣлѝ є҆стѐ, прпⷣбномч҃нцы а҆́нно и҆ матрѡ́но чтⷭ҇ны̑ѧ, по́двиги воздержа́нїѧ страда́нїемъ ᲂу҆краси́вшѧ, востеклѝ є҆стѐ къ нбⷭ҇номꙋ женихꙋ̀ хрⷭ҇тꙋ̀, и҆́же ᲂу҆вѣнча̀ вы̀ красото́ю сла́вы нетлѣ́нныѧ.

І҆́косъ:

Ка́кѡ воспое́мъ вы̀, цр҃кве рꙋ́сскїѧ и҆ ѻ҆би́тели а҆леѯі́евскїѧ похвалꙋ̀, достобл҃жє́нныѧ прпⷣбномч҃нцы а҆́нно и҆ матрѡ́но, ѿ ю҆́ности житє́йскаѧ попечє́нїѧ ѿри́нꙋвшыѧ и҆ бл҃гꙋ́ю ча́сть и҆ є҆ди́ное на потре́бꙋ и҆збра́вшыѧ, преподо́бїе зако́ннымъ мꙋче́нїемъ запечатлѣ́вшыѧ и҆ сегѡ̀ ра́ди сподо́бльшыѧсѧ храни́ти и҆ и҆спо́лнити сло́во хрⷭ҇та̀ бг҃а на́шегѡ, и҆́же ᲂу҆вѣнча̀ вы̀ красото́ю сла́вы нетлѣ́нныѧ.

Пѣ́снь з҃.

І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.

Го́рькое и҆згна́нїе въ кра́й сѣ́верный претерпѣ́ли є҆стѐ, прпⷣбныѧ а҆́нно и҆ матрѡ́но, на всѧ́комъ мѣ́стѣ и҆ на всѧ́кїй ча́съ хвалꙋ̀ бг҃ꙋ возсыла́ющѧ.

Ра́дꙋйсѧ, кра́ю а҆рхангелогоро́дскїй въ послѣ̑днѧѧ лѣ̑та мнѡ́гїѧ мч҃нки и҆ и҆сповѣ́дники прїе́мый, ті́и бо, и҆згна́нїе претерпѣва́юще, пѡ́двиги свои́ми, ꙗ҆́кѡ со́лнце, въ тебѣ̀ просїѧ́ша, те́плыми мл҃твами и҆ слеза́ми покаѧ́нїѧ ᲂу҆мѧгча́юще твоѐ сꙋровство̀.

Всѐ ᲂу҆пова́нїе на гдⷭ҇а возложи́ли є҆стѐ, ст҃ы̑ѧ прпⷣбномч҃нцы а҆́нно и҆ матрѡ́но, всецѣ́лѡ въ рꙋ́цѣ є҆гѡ̀ себѐ предаю́щѧ, и҆ въ страда́нїихъ срѣ́тившѧ хрⷭ҇та̀, въ и҆стка́ннꙋю ѿ вы́шнїѧ бл҃года́ти ѻ҆де́ждꙋ ѡ҆блеко́стесѧ.

Бг҃оро́диченъ: Ꙗ҆́кѡ бг҃а ро́ждшꙋю пло́тїю, пречⷭ҇таѧ, нра́вомъ бл҃гоче́стнымъ чти́мъ тѧ̀ непреста́ннѡ, вкꙋ́пѣ съ чтⷭ҇ны́ми жена́ми, посто́мъ просїѧ́вшими и҆ страда́ньми свои́ми врага̀ низложи́вшими.

Пѣ́снь и҃.

І҆рмо́съ: Седмери́цею пе́щь, халде́йскїй мꙋчи́тель, бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїⷤ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, сщ҃е́нницы, воспо́йте, лю́дїе, превозноси́те во всⷤ вѣ́ки.

Во дни̑ гонє́нїѧ безбо́жнагѡ, ꙗ҆́кѡ ѳѷмїа́мъ бл҃гово́нный, принесо́сте гдⷭ҇ꙋ мл҃твы и҆ по́двиги ва́шѧ, прпⷣбномч҃нцы сла̑вныѧ, ны́нѣ же на мѣ́стѣ страда́нїй ва́шихъ безкро́внаѧ же́ртва бг҃ꙋ прино́ситсѧ и҆ торжествꙋ́етъ цр҃ковь земна́ѧ и҆ нбⷭ҇наѧ.

Во тьмѣ̀ грѣхо́внѣй, зе́млю на́шꙋ пости́гшей, и҆сповѣ́данїемъ хрⷭ҇та̀ возсїѧ́ли є҆стѐ, ст҃ы̑ѧ прпⷣбномч҃нцы а҆́нно и҆ матрѡ́но, тѣ́мже мо́лимъ ва́съ, просвѣти́те на́съ свѣ́томъ бл҃года́ти бж҃їѧ.

Є҆гда̀ бл҃гоче́стїе во ѻ҆те́чествѣ на́шемъ ѡ҆скꙋдѣ̀, тогда̀ попꙋстѝ гдⷭ҇ь гоне́нїе лю́тое и҆ потеко́ша рѣ́ки кро́ве хрⷭ҇тїа́нскїѧ. моли́те ᲂу҆́бѡ ѡ҆ на́съ, ст҃ы̑ѧ новомч҃нцы, да пребꙋ́демъ вѣ́рни хрⷭ҇тꙋ̀ сп҃си́телю на́шемꙋ до сконча́нїѧ вѣ́ка.

Бг҃оро́диченъ: Съ новомч҃нки и҆ и҆сповѣ̑дники цр҃кве рꙋ́сскїѧ, пречⷭ҇таѧ, и҆ всѣ́ми ст҃ы́ми жена́ми ᲂу҆молѝ є҆ди́наго во ст҃ы́хъ почива́ющаго сохрани́ти зе́млю на́шꙋ, славосло́вѧщꙋю тѧ̀ во всⷤ вѣ́ки.

Пѣ́снь ѳ҃.

І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Въ послꙋша́нїе ѡ҆бле́кшѧсѧ, вонѧ́ми добродѣ́телей ѻ҆би́тель а҆леѯі́евскꙋю ѡ҆бл҃гоꙋха́ли є҆стѐ, тѣ́мъ воспѣва́емъ ст҃ꙋ́ю па́мѧть ва́шꙋ, невѣ̑сты хрⷭ҇тѡ́вы прекра̑сныѧ. моли́те ѡ҆ на́съ хрⷭ҇та̀ чл҃вѣколю́бца, да ѡ҆мы́етъ мѵ́ромъ бл҃года́ти дꙋ́шы на́шѧ и҆ ᲂу҆слади́тъ ѧ҆̀ росо́ю любвѐ.

Оу҆́зы хрⷭ҇тѡ́вы воспрїе́мшѧ, да́же до сме́рти за гдⷭ҇емъ послѣ́довали є҆стѐ, новомч҃нцы сла̑вныѧ, гони́телей лю́тыхъ не ᲂу҆боѧ́вшѧсѧ. моли́те ᲂу҆́бѡ влⷣкꙋ хрⷭ҇та̀ ѡ҆ сп҃се́нїи дꙋ́шъ на́шихъ.

Ча́шꙋ страда́нїй на землѝ и҆спи́вшѧ, ра́дость ве́лїю на нб҃сѣ́хъ прїѧ́ли є҆стѐ, и҆дѣ́же ны́нѣ ликовствꙋ́ете въ невече́рнемъ дни̑ црⷭ҇твїѧ бж҃їѧ.

Бг҃оро́диченъ: Тебѐ, всепѣ́тꙋю влⷣчцꙋ, ꙗ҆́кѡ всецр҃и́цꙋ, хрⷭ҇тꙋ̀ цр҃ю̀ предстоѧ́щꙋю, вкꙋ́пѣ съ прпⷣбномч҃нцами а҆́нною и҆ матрѡ́ною досто́йнѡ велича́емъ.

Свѣти́ленъ:

Свѣтлѣ́етсѧ дне́сь цр҃ковь рꙋ́сскаѧ пѡ́двиги ва́шими, ст҃ы̑ѧ новомч҃нцы, и҆ сла́витъ хрⷭ҇та̀, сл҃нце пра́вды, ѿ дв҃ы возсїѧ́вшаго. мы̀ же со ᲂу҆миле́нїемъ вопїе́мъ: мл҃твами прпⷣбномч҃нцъ а҆́нны и҆ матрѡ́ны просвѣтѝ ны̀, гдⷭ҇и, во тьмѣ̀ грѣхо́внѣй сꙋ́щыѧ.

Сла́ва, и҆ ны́нѣ: Не преста́й, дв҃о бцⷣе, моли́ти ѡ҆ на́съ сн҃а твоего̀, чл҃вѣколю́бца бг҃а на́шего, на тѧ̀ бо наде́ждꙋ возлага́емъ и҆ твои́мъ предста́тельствомъ и҆збавлѧ́емсѧ ѿ бѣ́дъ, и҆ страсте́й, и҆ прегрѣше́нїй, и҆ болѣ́зней.