Канон святому священномученику Мисаилу Рязанскому, Шацкому, архиепископу

Пѣ́снь а҃.

І҆рмо́съ: Ꙗ҆́кѡ по сꙋ́хꙋ пѣшеше́ствовавъ і҆и҃ль, по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь пои́мъ, вопїѧ́ше.

Лю́дїе хрⷭ҇тоимени́тїи землѝ рѧза́нскїѧ, спра́зднꙋйте съ на́ми торжество̀ цр҃ко́вное, па́мѧть сщ҃енномч҃нка мїсаи́ла соверша́юще, да є҆гѡ̀ мл҃твами въ вѣ́рѣ правосла́внѣй ᲂу҆тверди́мсѧ.

Мїсаи́ле чꙋ́дне и҆ а҆рхїере́ю сла́вне, ста́до хрⷭ҇то́во, ꙗ҆́кѡ па́стырь до́брый, ᲂу҆па́слъ є҆сѝ, дꙋ́шꙋ свою̀ за него̀ полага́ѧ, моли́сѧ прилѣ́жнѡ ѡ҆ дꙋша́хъ на́шихъ.

Житїе́мъ непоро́чнымъ и҆ бл҃гоче́стїемъ твои́мъ возсїѧ́лъ є҆сѝ, ст҃е мїсаи́ле, и҆ ре́вностїю по бз҃ѣ распалѧ́емь, поклоне́нїе тва́ри ᲂу҆праздни́лъ є҆сѝ, моли́сѧ ѡ҆ чтꙋ́щихъ тѧ̀ бл҃гоче́стнѡ, да въ любвѝ бж҃їей пребꙋ́демъ.

Бг҃оро́диченъ: А҆́гг҃ли ликꙋ́ютъ на нб҃сѝ, ви́дѧще ѻ҆́бразъ тво́й, пречⷭ҇таѧ, принесе́нный и҆з̾ мꙋ́рома во гра́дъ рѧза́нь первост҃и́телемъ васі́лїемъ, и҆́же пꙋчи́нꙋ рѣ́чнꙋю съ ни́мъ безбѣ́днѡ преплы́въ, бл҃гослове́нїе па́ствѣ рѧза́нстѣй дарова́лъ є҆́сть.

Пѣ́снь г҃.

І҆рмо́съ: Нѣ́сть ст҃ъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Прїиди́те, лю́дїе рѧза́нстїи, па́стырѧ до́браго, дꙋ́шꙋ свою̀ за лю́ди положи́вшаго, почти́мъ и҆ съ любо́вїю є҆мꙋ̀ возопїи́мъ: ст҃и́телю мїсаи́ле, предста́тельствꙋй ѡ҆ на́съ пред̾ бг҃омъ, во є҆́же сп҃сти́сѧ на́мъ.

Хрⷭ҇та̀, а҆́гнца бж҃їѧ, и҆змла́да возлюби́въ и҆ всего̀ себѐ въ послꙋша́нїе наста́вникꙋ твоемꙋ̀ врꙋчи́въ, а҆рхїпа́стырь до́бръ гра́дꙋ рѧза́ни показа́лсѧ є҆сѝ, мїсаи́ле пресла́вне. помозѝ и҆ на́мъ ѿ си́лы въ си́лꙋ восходи́ти.

Мꙋ́дрость бж҃їю разꙋмѣ́въ, ꙗ҆́кѡ првⷣенъ гдⷭ҇ь и҆ пра̑вды возлюбѝ, и҆́стинѣ бы́лъ є҆сѝ слꙋжи́тель вѣ́рный, мїсаи́ле сщ҃енномч҃нче. и҆ ны́нѣ ѡ҆ на́съ прилѣ́жнѡ моли́сѧ.

Бг҃оро́диченъ: Ѽ пренепоро́чнаѧ дв҃о, мт҃и творца̀ всѧ́ческихъ, сп҃си́телѧ мі́ра неизрече́ннѡ ро́ждшаѧ! того̀ молѝ сп҃сти́сѧ дꙋша́мъ на́шымъ.

Сѣда́ленъ, гла́съ д҃:

Ѻ҆́гнь бжⷭ҇твенныѧ любвѐ въ се́рдцѣ свое́мъ и҆мѣ́ѧ и҆ чистотꙋ̀ стѧжа́въ серде́чнꙋю, а҆дама́нте вѣ́ры хрⷭ҇то́вы, наꙋчѝ на́съ ше́ствовати пꙋте́мъ сп҃се́нїѧ.

Бг҃оро́диченъ: Бг҃ора́дованнаѧ влⷣчце, ро́ждши сп҃са хрⷭ҇та̀, бж҃їю си́лꙋ и҆ бж҃їю премꙋ́дрость, сп҃сѝ гра́дъ се́й и҆ лю́ди, на тѧ̀ ᲂу҆пова́ющыѧ.

Пѣ́снь д҃.

І҆рмо́съ: Хрⷭ҇то́съ моѧ̀ си́ла, бг҃ъ и҆ гдⷭ҇ь, чтⷭ҇на́ѧ цр҃ковь бг҃олѣ́пнѡ пое́тъ взыва́ющи, ѿ смы́сла чи́ста ѡ҆ гдⷭ҇ѣ пра́зднꙋющи.

Хрⷭ҇та̀ да восхва́лимъ, вѣ́рнїи, ст҃и́телѧ ди́внаго ꙗ҆ви́вшаго, молѧ́щасѧ ѡ҆ дꙋша́хъ на́шихъ.

Ꙗ҆́кѡ свѣти́ло нбⷭ҇ное, мїсаи́ле чꙋ́дне и҆ а҆рхїере́ю сла́вне, кро́вїю твое́ю свидѣ́тельство сло́ва бж҃їѧ просїѧ̀. моли́сѧ прилѣ́жнѡ ѡ҆ на́съ.

Любо́вь къ бг҃ꙋ стѧжа́въ и҆ пастыренача́льникꙋ хрⷭ҇тꙋ̀ подража́ѧ, па́стырь до́брый ꙗ҆ви́лсѧ є҆сѝ, ст҃и́телю мїсаи́ле. моли́сѧ ѡ҆ на́съ, да любо́вїю є҆ѵⷢ҇льскою ѡ҆богати́мсѧ.

Бг҃оро́диченъ: И҆зба́ви ѿ бѣ́дъ къ тебѣ̀ прибѣга́ющихъ, мт҃и и҆ дв҃о пречⷭ҇таѧ, хрⷭ҇та̀ бг҃а ро́ждшаѧ, молѧ́щи того̀ сп҃стѝ дꙋ́шы на́шѧ.

Пѣ́снь є҃.

І҆рмо́съ: Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Лю́ди, не вѣ́дꙋщыѧ гдⷭ҇а, нелѣ́ностнѡ просвѣща́лъ є҆сѝ, ст҃и́телю, ѻ҆ц҃а̀ и҆ сн҃а и҆ дх҃а ст҃а́го, є҆ди́наго бг҃а въ трїе́хъ ли́цѣхъ, проповѣ́дꙋѧ.

Наста́вника тѧ̀ и҆ мл҃твенника те́пла и҆мꙋ́ще, сщ҃енномч҃нче мїсаи́ле, мо́лимсѧ тѝ ᲂу҆се́рднѡ: не забꙋ́ди на́съ, сро́дникѡвъ твои́хъ, и҆збавлѧ́ѧ ѿ навѣ̑тъ вра́жїихъ и҆ всѧ́кїѧ печа́ли.

Бл҃года́рное пѣ́нїе, тебѣ̀ приноси́мое, ст҃и́телю мїсаи́ле, не пре́зри, но прїимѝ и҆ ра́дости дꙋхо́вныѧ и҆спо́лни сердца̀ мл҃твєнникъ твои́хъ, хрⷭ҇та̀ прилѣ́жнѡ ѡ҆ на́съ ᲂу҆молѧ́ѧ.

Бг҃оро́диченъ: Ра́дꙋйсѧ, ра́досте на́ша, покры́й на́съ ѿ всѧ́кагѡ ѕла̀ чтⷭ҇ны́мъ твои́мъ покро́вомъ.

Пѣ́снь ѕ҃.

І҆рмо́съ: Жите́йское мо́ре, воздвиза́емое зрѧ̀ напа́стей бꙋ́рею, къ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.

Ра́зꙋмъ и҆мѣ́ѧй бг҃омъ просвѣще́нный, до́брый дѣ́латель за́повѣдей хрⷭ҇то́выхъ ꙗ҆ви́лсѧ є҆сѝ, ст҃е мїсаи́ле, и҆ дꙋ́шꙋ твою̀ бг҃ꙋ прине́слъ є҆сѝ, ꙗ҆́кѡ же́ртвꙋ чи́стꙋ и҆ непоро́чнꙋ.

Смире́нїемъ се́рдца ᲂу҆краси́всѧ, во ѻ҆би́тєли нбⷭ҇ныѧ вше́лъ є҆сѝ, сщ҃енномч҃нче, и҆дѣ́же на́съ помѧнѝ, почита́ющихъ тѧ̀ при́снѡ.

Любо́вь ко хрⷭ҇тꙋ̀ пастыренача́льникꙋ запечатлѣ́лъ є҆сѝ кро́вїю твое́ю и҆ дꙋ́шꙋ, ꙗ҆́кѡ же́ртвꙋ чи́стꙋю, бг҃ꙋ прине́слъ є҆сѝ, пꙋ́ть сп҃се́нїѧ на́мъ ᲂу҆казꙋ́ѧ.

Бг҃оро́диченъ: Мт҃и свѣ́та ꙗ҆ви́ласѧ є҆сѝ, влⷣчце, тѣ́мже мо́лимъ тѧ̀, бг҃оневѣ́сто: ѡ҆зарѝ дꙋ́шы на́шѧ свѣ́томъ сн҃а твоегѡ̀.

Конда́къ, гла́съ є҃:

Весели́тсѧ ра́достнѣ цр҃ковь рꙋ́сскаѧ, во ѡ҆брѣ́тенїи чтⷭ҇ны́хъ твои́хъ моще́й, сщ҃енномч҃нче мїсаи́ле, ты́ бо, завѣ́тъ пастыренача́льника и҆сполнѧ́ѧ и҆ ѡ҆ лю́дехъ, не вѣ́дꙋщихъ гдⷭ҇а, се́рдцемъ болѣ́знꙋѧ, дꙋ́шꙋ твою̀ за па́ствꙋ положи́лъ є҆сѝ. и҆ на́мъ прострѝ рꙋ́кꙋ по́мощи хода́тайствомъ твои́мъ и҆ ᲂу҆пра́ви на́шъ пꙋ́ть ко сп҃се́нїю.

І҆́косъ:

Ди́внаго ᲂу҆го́дника бж҃їѧ просла́вимъ, и҆́же ѿ ю҆́ности хрⷭ҇та̀ возлюби́въ, томꙋ̀ рабо́тати пла́меннѣ вожделѣ̀, пꙋ́ть вѣ̑рнымъ ѡ҆сщ҃а́ѧ, ра́ною сме́ртною ᲂу҆ѧзви́сѧ. тѣ́мже всѝ зове́мъ є҆мꙋ̀: ра́дꙋйсѧ, во смире́нїи дх҃омъ хрⷭ҇то́вымъ ѡ҆богати́выйсѧ: ра́дꙋйсѧ, во свидѣ́тельствѣ сло́ва бж҃їѧ любо́вь хрⷭ҇то́вꙋ ꙗ҆ви́вый. ра́дꙋйсѧ, въ ᲂу҆ране́нїи твое́мъ не ᲂу҆страши́выйсѧ: ра́дꙋйсѧ, сщ҃енномч҃нче мїсаи́ле, помо́щниче на́шъ, ᲂу҆пра́ви на́шъ пꙋ́ть ко сп҃се́нїю.

Пѣ́снь з҃.

І҆рмо́съ: Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Па́стырю до́брый, дꙋ́шꙋ свою̀ за ѻ҆́вцы положи́вый, сщ҃енномч҃нче мїсаи́ле, мл҃твами твои́ми помозѝ па́стырємъ ста́до хрⷭ҇то́во ᲂу҆пастѝ, да приведꙋ́тъ є҆го̀ во ѻ҆би́тєли вѣ̑чныѧ, во є҆́же зва́ти: бл҃гослове́нъ бг҃ъ ѻ҆тє́цъ на́шихъ.

Не преста́й, ст҃и́телю, моли́тисѧ ѡ҆ сро́дницѣхъ твои́хъ, во є҆́же на́мъ по за́повѣдемъ гдⷭ҇нимъ ходи́ти, зовꙋ́ще: бл҃гослове́нъ бг҃ъ ѻ҆тє́цъ на́шихъ.

Ре́вностїю по бз҃ѣ распалѧ́емый, ст҃и́телю хрⷭ҇то́въ мїсаи́ле, па́ствꙋ свою̀ поꙋча́лъ є҆сѝ, да ѡ҆ста́вѧтъ всѝ нече́стїе и҆ да пою́тъ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ: Всепѣ́таѧ мт҃и, прїимѝ мольбы̑ ᲂу҆пова́ющихъ на тѧ̀, да съ тобо́ю воспѣва́емъ гдⷭ҇а во вѣ́ки.

Пѣ́снь и҃.

І҆рмо́съ: И҆з̾ пла́мене прпⷣбнымъ ро́сꙋ и҆сточи́лъ є҆сѝ, и҆ првⷣнагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки.

Дне́сь пресвѣ́тлѡ ѡ҆зарѧ́емсѧ, пречꙋ́дный мїсаи́ле, творѧ́ще па́мѧть твою̀ вѣ́рнѡ, пѣ́снь ѻ҆трокѡ́въ пою́ще: всѧ̑ дѣла̀, бл҃гослови́те, по́йте гдⷭ҇а.

Бо́дреннымъ ᲂу҆ма̀ трезве́нїемъ и҆ те́плымъ ко хрⷭ҇тꙋ̀ моле́нїемъ, ст҃е мїсаи́ле, дꙋ́шꙋ твою̀ ᲂу҆строѧ́лъ є҆сѝ, непреста́ннѡ поѧ̀: всѧ̑ дѣла̀, бл҃гослови́те, по́йте гдⷭ҇а.

Ѻ҆гне́мъ дꙋхо́внымъ, сꙋ́щимъ въ тебѣ̀, бл҃же́нне мїсаи́ле, пла́мень грѣхо́вный въ дꙋша́хъ вѣ́рныхъ въ ро́сꙋ претворѧ́шесѧ. тѣ́мже, ра́дꙋѧсѧ на нб҃сѣ́хъ со ст҃и́телемъ васі́лїемъ, взыва́еши: всѧ̑ дѣла̀, бл҃гослови́те, по́йте гдⷭ҇а.

Бг҃оро́диченъ: Чⷭ҇тꙋю сла́внѡ почти́мъ, дв҃ꙋ бцⷣꙋ, ꙗ҆́кѡ свѣ́тъ сердца́мъ на́шымъ и҆ покро́въ всеси́льный ѿ напа́стей вра́жїихъ.

Пѣ́снь ѳ҃.

І҆рмо́съ: Бг҃а человѣ́кѡмъ не возмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю же, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно, є҆го́же велича́юще, съ нбⷭ҇ными вѡ́и, тѧ̀ ᲂу҆бл҃жа́емъ.

Хва́литсѧ тобо́ю, сщ҃енномч҃нче мїсаи́ле, гра́дъ рѧза́нь, и҆мѣ́ѧ тѧ̀ мл҃твенника и҆ хода́таѧ пред̾ бг҃омъ, є҆го́же молѝ сп҃сти́сѧ дꙋша́мъ на́шымъ.

Предстоѧ̀ ᲂу҆ прⷭ҇то́ла цр҃ѧ̀ сла́вы, сщ҃енномч҃нче, проле́й те́плꙋю мл҃твꙋ ѡ҆ на́съ ко гдⷭ҇ꙋ и҆ и҆спросѝ на́мъ вє́лїѧ млⷭ҇ти.

По́двигъ тво́й, ст҃и́телю, зерца́ло бла̑гъ вѣ́чныхъ ꙗ҆ви́сѧ, ꙗ҆́кѡ дꙋ́шꙋ свою̀ положи́лъ є҆сѝ за дрꙋ́ги своѧ̑, тѣ́мже помозѝ на́мъ за́пѡвѣди гдⷭ҇нѧ и҆спо́лнити.

Бг҃оро́диченъ: Взыва́емъ всѝ къ тебѣ̀, цр҃и́цѣ нбⷭ҇нѣй: мт҃и бж҃їѧ, сп҃сѝ ро́дъ хрⷭ҇тїа́нскїй

Свѣти́ленъ:

Сла́внаго сщ҃енномч҃нка мїсаи́ла пѣ́сньми восхва́лимъ, ꙗ҆́кѡ дꙋ́шꙋ свою̀ за лю́ди положи́вшаго и҆ свѣ́томъ вѣ́ры хрⷭ҇то́вы и҆̀хъ просвѣти́вшаго.

Бг҃оро́диченъ: Прест҃а́ѧ влⷣчце, просвѣтѝ на́съ свѣ́томъ сн҃а твоегѡ̀ и҆ сп҃сѝ дꙋ́шы на́шѧ.